ཨ་རིའི་གྲོས་ཚོགས་གོང་མའི་སྤྱི་མཐུན་ཚོགས་པའི་འཐུས་མི་སྐུ་ཞབས་ Marco rubio ལགས་དང་མང་གཙོ་ཚོགས་པའི་ལྕམ་ Catherine Cortez Masto ལགས་རྣམ་གཉིས་ནས་ཨ་རིའི་གྲོས་ཚོགས་སུ་ཨ་རི་གཙོ་བོར་གྱུར་པའི་རྒྱལ་སྤྱིའི་རྒྱལ་ཁབ་ཚོས་རྒྱ་ནག་དམར་ཤོག་ཚོགས་པའི་ཆབ་སྲིད་ཀྱི་ཤུགས་རྐྱེན་འགོག་ཐབས་གྲོས་འཆར་བསྐྱར་བཏོན་གནང་འདུག
ཁ་ཉིན་ཕྱི་ཚེས་ ༡༣ ཉིན་སྐུ་ཞབས་ Marco rubio ལགས་ནས་གསར་འགོད་བསྒྲགས་གཏམ་སྤེལ་བའི་ནང་ཨ་རིའི་གྲོས་ཚོགས་སུ་རྒྱ་ནག་དམར་ཤོག་ཚོགས་པའི་ཆབ་སྲིད་ཀྱི་ཤུགས་རྐྱེན་འགོག་ཐབས་གྲོས་འཆར་དེ་གཏན་འབེབས་བྱུང་ཚེ་ཨ་རིའི་ཕྱི་སྲིད་དྲུང་ཆེ་དང་ཨ་རིའི་རྒྱལ་ཡོངས་གསང་བའི་ལས་ཁུངས་གཉིས་ཐུན་མོང་ནས་ཞིབ་འཇུག་གི་སྡེ་ཚན་ཟུར་འཛུགས་གནང་ཐོག་ཨ་རི་གཙོ་གྱུར་རྒྱལ་ཁབ་གཞན་ཁག་ཏུ་རྒྱ་ནག་གི་ཁུངས་ལྡན་མིན་པའི་གནས་ཚུལ་དྲིལ་བསྒྲགས་དང། རྒྱ་གཞུང་གིས་གསར་འགྱུར་འཁྱོག་བཤད་བྱས་པ། དེ་བཞིན་དཔལ་འབྱོར་དང་ཆབ་སྲིད་སོགས་ཀྱི་ཤུགས་རྐྱེན་སྤྲད་ཁག་གི་སྙན་ཐོ་བསྡུ་རུབ་གནང་རྒྱུ་ཡིན་པ་མ་ཟད་ལྷག་དོན་གྲོས་འཆར་དེ་བརྒྱུད་ནས་ཨ་རིའི་མི་སེར་ཡིན་པའི་རྒྱ་རིགས་དང་ཡུ་གུར་དེ་བཞིན་བོད་མི་བཅས་ལ་རྒྱ་གཞུང་གི་འཇིགས་སྐུལ་དང་སྡིགས་ར་ལས་སྲུང་སྐྱོབ་བྱེད་རྒྱུའི་ཐབས་བྱུས་ཀྱང་འདོན་གནང་རྒྱུ་རེད་འདུག
སྐུ་ཞབས་ Marco ལགས་ཀྱིས་རྒྱ་ནག་དམར་ཤོག་ཚོགས་པའི་ཨ་རི་གཙོ་གྱུར་རྒྱལ་སྤྱིའི་ཁྲོད་ཤུགས་རྐྱེན་བཀོལ་སྤྱོད་ཀྱི་ལས་གཞིར་འཐབ་རྒོལ་སླད་ང་ཚོས་རྒྱ་གཞུང་གི་ཤུགས་རྐྱེན་དེའི་ངན་འབྲས་གང་བྱུང་མིན་ངེས་པར་དུ་ཤེས་དགོས་ཞེས་དང་། དེ་རེས་ཁོང་གིས་གནད་ཆེའི་གྲོས་འཆར་དེ་བསྐྱར་དུ་གྲོས་ཚོགས་སུ་ཆེད་བཏོན་ཐུབ་པར་དགའ་སྤོབས་དང། གལ་ཏེ་གྲོས་འཆར་དེ་གཏན་འབེབས་བྱུང་ཚེ་སྲིད་དོན་པ་ཙམ་མིན་པར་ཨ་མི་རི་ཀའི་མི་སེར་དང། གསར་ཁང། དེ་བཞིན་རྒྱ་གཞུང་གི་ཤུགས་རྐྱེན་ཐེབས་པའི་རྒྱལ་ཁབ་གཞན་ཁག་ལའང་དགེ་མཚན་ཡོང་ངེས་ཡིན་སྐོར་གསུངས་འདུག 
དེ་བཞིན་ལྕམ་ Catherine Cortez Masto ལགས་ཀྱིས་ང་ཚོའི་མང་གཙོའི་ལམ་ལུགས་ཀྱི་ཐོག་ནས་རྒྱ་གཞུང་གི་དབང་ཚད་ཇེ་ཆེར་འགྲོ་ཡི་ཡོད་པ་དང་། རྒྱ་ནག་གི་ཤུགས་རྐྱེན་འགོོག་ཐབས་སླད་ང་ཚོས་སོ་སོར་ཉེན་ཁ་གང་ཡོང་གི་ཡོད་པ་དེ་དག་ཤེས་དགོས་པ་དང་། གྲོས་འཆར་དེ་བརྒྱུད་ནས་འཛམ་བུ་གླིང་གི་རྒྱལ་ཁབ་གཞན་ཚོར་དེ་འབྲེལ་གོ་རྟོགས་སྤེལ་རྒྱུ་གཙོས་པའི་ཨ་རི་གཞུང་ནས་ཀྱང་རྒྱ་ནག་གི་ཤུགས་རྐྱེན་འགོག་ཐབས་ཆེད་རང་གི་སྲིད་བྱུས་གོང་འཕེལ་གནང་ཐོག་རྒྱལ་ཁབ་ཀྱི་བདེ་འཇགས་དང་ཆབ་སྲིད་ཀྱི་ལམ་ལུགས་སྲུང་སྐྱོབ་བྱེད་དགོས་པ་སོགས་གསུངས་ཡོད། ཐེངས་འདིའི་གྲོས་འཆར་ཐོག་གྲོས་ཚོགས་གོང་མའི་འཐུས་མི་སྐུ་ཞབས་ Cory Gardner ལགས་དང། Ed Markey ལགས། John Cornyn ལགས། དེ་བཞིན་ Tom Cotton ལགས་ནས་རྒྱབ་སྐྱོར་གནང་ཡོད་པ་རེད།
