རྒྱ་གར་བྱང་ཕྱོགས་དོན་གྲུབ་གླིང་གཞིས་ཆགས་ནས་ཡིན་པའི་ཚེ་རིང་ཡེ་ཤེས་ལགས་ཀྱིས་བོད་དོན་ཆེད་ཕྱི་ལོ་ ༢༠༢༡ ནས་དབུ་འཛུགས་གནང་བའི་སྦག་སྦག་སྐོར་སྐྱོད་ཀྱི་ལས་འགུལ་དེ་ཁ་སང་རྒྱ་གར་གྱི་རྒྱལ་ས་ལྡི་ལིའི་རོ་ཧི་ནི་བོད་ཁྱིམ་སྡོད་ཁང་མཇུག་སྒྲིལ་གནང་ཡོད་པ་རེད།
ཚེ་རིང་ཡེ་ཤེས་ལགས་ཀྱི་སྦག་སྦག་སྐྱོད་ཀྱི་ལས་འགུལ་གྱི་དམིགས་ཡུལ་ནི། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་རིན་པོ་ཆེ་མཆོག་ལ་རྒྱ་གར་གྱི་སྤྱི་དམངས་གཟེགས་རྟགས་མཐོ་ཤོས། Bharat Ratna ཞེས་པ་དེ་འབུལ་ལམ་ཞུ་རྒྱུར་མཚན་རྟགས་བསྡུ་རུབ་ཀྱི་ཞུ་སྐུལ་གནང་ཕྱིར་ཡིན་པ་དང་། ཁོང་གིས་ཁ་སང་བར་རྒྱ་གར་གྱི་མངའ་སྡེ་ཁག་ ༢༥ ནང་སྦག་སྦག་སྐོར་སྐྱོད་་གནང་ཡོད་པ་རེད།
ཁ་སང་བོད་ཁྱིམ་སྡོད་ཁང་དུ་ཚོགས་པའི་མཇུག་སྡོམ་མཛད་སྒོའི་ཐོག་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་སྒེར་ལ་མཚན་གནས་ཆེ་བའི་གཟེངས་རྟགས་དེ་ལྟ་བུ་ཞིག་ཉེ་མཁོ་མ་མཆིས་ཀྱང་། གཟེངས་རྟགས་དེའི་བརྒྱུད་ནས་མགོན་པོ་༸གང་ཉིད་མཆོག་ལ་བཀྲིན་རྗེས་དྲན་དང་ལྷག་དོན་རྒྱལ་སྤྱི་དང་རྒྱ་གར་གཞུང་མང་གི་བོད་དོན་ཐོག་འཛིན་པའི་སྲིད་བྱུས་ལ་འགྱུར་བ་ཞིག་འགྲོ་ངེས་ཡིན་པར་ཡིད་ཆེས་ཞུ་བཞིན་ཡོད་ཅེས་གསུངས་འདུག
ཚེ་རིང་ཡེ་ཤེས་ལགས་ཀྱིས་ཐེངས་འདིའི་སྦག་སྦག་སྐོར་སྐྱོད་ཀྱི་ཐོག་མའི་དམིགས་ཡུལ་ནི་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་རིན་པོ་ཆེ་མཆོག་ལ་རྒྱ་གར་གྱི་སྤྱི་དམངས་གཟེགས་རྟགས་མཐོ་ཤོས། Bharat Ratna ཞེས་པ་དེ་འབུལ་ལམ་ཞུ་རྒྱུར་མཚན་རྟགས་བསྡུ་རུབ་ཀྱི་ཞུ་སྐུལ་གནང་འཆར་ཡོད་ཀྱང་། ཕྱི་ལོ་ ༢༠༢༡ ཕྱི་ཟླ་ ༣ ཚེས་ ༢༢ ཉིན་བཞུགས་སྒར་དྷརྨ་ཤཱ་ལཱ་ནས་རྒྱ་གར་རྒྱལ་ཡོངས་སུ་བོད་དོན་ཆེད་སྦག་སྦག་སྐོར་སྐྱོད་ཀྱི་ལས་འགུལ་དབུ་འཛུགས་གནང་ནས་ཉིན་གྲངས་ཁ་ཤས་རྗེས་སུ་༸དཔལ་ལྡན་དགའ་སྡན་ཕོ་བྲང་ཡིག་ཚང་ནས་དེ་ལྟར་གནང་ཐལ་མི་གནང་བའི་བཀའ་དགོངས་ཕེབས་ཡོད་པ་ལྟར་ ལས་འགུལ་གྱི་འབོད་སྒྲར་བསྒྱུར་བཅོས་གནང་དགོས་བྱུང་སྟེ་ Ride For Pride ཞེས་པའི་འབོད་ཚིག་འོག་ད་བར་རྒྱ་གར་རྒྱལ་ཡོངས་ཀྱི་མངའ་སྡེ་ཁག་ ༢༥ ནང་མུ་མཐུད་ནས་སྐོར་སྐྱོད་གནང་ཡོད་པ་དང་། ཁོང་གི་ངོས་ནས་མང་ཚོགས་ཁྲོད་དངོས་སུ་མཚན་རྟགས་བསྡུ་རུབ་གནང་མི་འདུག་ཀྱང་། ས་གནས་ཀྱི་མང་ཚོགས་ལ་ཐོག་མའི་དམིགས་ཡུལ་ལྟར་གཟེངས་རྟགས་འབུལ་བཞེས་ཐོག་རྒྱབ་སྐྱོར་གནང་དགོས་པའི་ཞུ་སྐུལ་དང་ལྷག་པར་དུ་ཁ་སང་སླར་བོད་ཁྱིམ་གྱི་སློབ་ཕྲུག་ཚོར་དེ་ལྟར་སྐུལ་མ་གནང་ཡོད།
མཇུག་སྡོམ་གྱི་མཛད་སྒོ་ཐོག་ལྡི་ལི་མཐོ་སློབ་ཁག་ཏུ་སློབ་གཉེར་གནང་བཞིན་པའི་བོད་ཁྱིམ་སྡོད་ཁང་གི་སློབ་མ་གྲངས་ ༥༠ ལྷག་ཙམ་ཞིག་འདུ་འཛོམས་བྱུང་བ་བཞིན་སྐབས་དེར་ཚེ་རིང་ཡེ་ཤེས་ལགས་ཀྱིས་བོད་རིགས་ན་གཞོན་ཚོར་སོ་སོའི་རྒྱལ་ཁབ་དང་མི་རིགས། ལེགས་བྱང་། ཆོས་རིག་བཅས་པ་རྩ་མེད་བཟོ་མཁན་རྒྱ་གཞུང་ངེས་པར་དུ་མ་བརྗེད་པ་གནང་དགོས་པ་མ་ཟད་ཁྱད་པར་དུ་སོ་སོའི་རྒྱལ་ཁབ་དང་མི་རིགས་ཀྱི་ཆེད་དུ་དུས་ཚོད་རྒྱས་བཅད་ཀྱིས་འགན་བཞེས་དགོས་པའི་གཞེན་སྐུལ་གནང་ཡོད།
སྦག་སྦག་སྐོར་སྐྱོད་ཀྱི་མཇུག་སྡོམ་མཛད་སྒོ་དེ་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁུངས་ཀྱི་ངོས་ནས་གོ་སྒྲིག་ཞུས་ཡོད་པ་དང་མཛད་སྒོའི་སྐུ་མགྲོན་གཙོ་བོར་ BTSM རྒྱ་གར་བོད་དོན་རྒྱབ་སྐྱོར་ཚོགས་པའི་རྒྱལ་ཡོངས་དྲུང་ཆེ་སྐུ་ཞབས་ Pankaj Goyal མཆོག་གིས་དབུས་པའི་འབྲེལ་ཡོད་ཁག་ཅིག་ཕེབས་འདུག
སྐབས་དེར་སྐུ་ཞབས་ Pankaj Goyal མཆོག་གིས་རྒྱ་ནག་གཞུང་ནས་བོད་ཀྱི་ཆོས་དང་རིག་གཞུང་། མི་རིགས་བཅས་པ་རྩ་མེད་བཟོ་ཐབས་ཀྱི་སྲིད་བྱུས་ལ་ངོ་རྒོལ་དང་ཚེ་རིང་ཡེ་ཤེས་ལགས་ཀྱི་ལས་འགུལ་ལ་བསྔགས་བརྗོད་གནང་སྟེ། བོད་རིགས་ན་གཞོན་ཚོས་སོ་སོའི་མི་རིགས་ཀྱི་ཆོས་རིག་དང་། ལེགས་བྱང་། སྐད་ཡིག་བཅས་པ་མི་ཉམས་རྒྱུན་འཛིན་གནང་གལ་ཡིན་པ་མ་ཟད། བོད་རྒྱལ་ཁབ་ཀྱི་རང་དབང་སླར་གསོ་གནང་བའི་སེམས་ཤུགས་དགོས་པར་སྐུལ་མ་སོགས་གནང་ཡོད།
