ཇར་མ་ནི་དང་རྒྱ་ནག་གཉིས་ཀྱི་འབྲེལ་བ་ལེགས་པོ་མེད་པའི་དུས་སྐབས་འདིར་ཇར་མ་ནིའི་ཕྱི་སྲིད་བློན་ཆེན་ལྕམ་སྐུ་ Annalena Baerbock མཆོག་གིས་ཞི་ཅིན་ཕིང་ལ་སྲིད་དབང་སྒེར་སྤྱོད་པ་ཞེས་འགྲེལ་བརྗོད་གནང་བར་བརྟེན་རྒྱ་གཞུང་གིས་སྐྱོན་བརྗོད་ནན་པོ་བྱས་ནས་ཁུལ་དེར་ཡོད་པའི་ཇར་མ་ནི་གཞུང་ཚབ་པ་འབོད་འགུགས་བྱས་འདུག
ཟླ་ ༩ ཚེས་ ༡༤ ཉིན་ཨ་རིའི་ Texas མངའ་སྡེར་རྟེན་གཞིས་བྱས་པའི་Fox News བརྒྱུད་ལམ་གིས་ཇར་མ་ནིའི་ཕྱི་སྲིད་བློན་ཆེན་ལྕམ་སྐུ་ Annalena Baerbock མཆོག་ལ་ཨུ་རུ་སུས་ཡུཀ་རེན་བཙན་འཛུལ་བྱས་པའི་གནད་དོན་དང་འབྲེལ་བཅར་འདྲི་ཁག་ཅིག་ཞུས་པའི་ནང་། ཁོང་གིས་Vladimir Putin ཡིས་སྣེ་ཁྲིད་པའི་ཨུ་རུ་སུའི་གཞུང་གིས་ཡུཀ་རེན་རྒྱལ་ཁབ་ལ་དྲག་དཔུང་བརྒྱུད་བཙན་འཛུལ་བྱས་པ་དེ་ནོར་འཁྲུལ་ཡིན་པ་དང་། ལྷག་པར་ཨུ་རུ་སུ་དང་ཡུཀ་རེན་གཉིས་དབར་དམག་འཐབ་དེ་ཡུཀ་རེན་ལ་རྒྱལ་ཁ་ཐོབ་དགོས་པ་ལས་གལ་ཏེ་པུ་ཊིན་ལྟ་བུའི་སྲིད་དབང་སྒེར་སྤྱོད་པ་ཞིག་ལ་ཐོབ་ཚེ་པུ་ཊིན་འདྲ་བའི་རྒྱ་ནག་གི་སྲིད་འཛིན་ཞི་ཅིན་ཕིང་ལ་བརྡ་ནོར་ཐེབས་གཞི་འགྱུར་ངེས་པས་རྒྱལ་ཁ་དེ་མང་གཙོ་དང་རང་དབང་སྲུང་མཁན་གྱི་ཡུཀ་རེན་ལ་ཐོབ་དགོས་པ་སོགས་གསུངས་འདུག
གནད་དོན་དེ་དང་འབྲེལ་ཁ་སང་རེས་གཟའ་ཟླ་བའི་ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Mao Ning ཟེར་བས་གསར་འགོད་ལྷན་ཚོགས་ཐོག་ད་ལན་ལྕམ་སྐུ་ Annalena མཆོག་གིས་ཞི་ཅིན་ཕིང་ལ་སྲིད་དབང་སྒེར་སྤྱོད་པ་ལྟ་བུར་ འགྲེལ་བརྗོད་གནང་བ་དེ་ནི་འགན་ཁུར་རྩ་བ་ནས་མེད་པའི་བཀའ་མོལ་ཞིག་ཡིན་པ་མ་ཟད། ཕྱོགས་གཉིས་ཀྱི་རྒྱལ་འབྲེལ་ཐབས་བྱུས་དང་ཡོངས་སུ་འགལ་བ། དེ་བཞིན་རྒྱ་ནག་གི་ཆབ་སྲིད་ཆེ་མཐོང་ལ་རྡོག་རོལ་བཏང་བ་ཡོད་པར་སྐྱོན་བརྗོད་ནན་པོ་དང་སྦྲགས། ལྷག་པར་དེ་ལྟ་བུའི་རྒྱ་ནག་ལ་མིང་རྗེས་ངན་པ་བཟོ་ཐབས་ཀྱི་ལས་དོན་དེ་རིགས་འཕྲལ་དུ་མཚམས་འཇོག་དགོས་པ་སོགས་ཀྱི་ལན་འདེབས་བྱས་འདུག
རྒྱ་གཞུང་གིས་རེས་གཟའ་ཉི་མར་ཁུལ་དེར་ཡོད་པའི་ཇར་མ་ནི་གཞུང་ཚབ་པ་ལྕམ་སྐུ་ Patricia Flor ལགས་འབོད་འགུགས་བྱས་ཏེ་ཐེངས་འདིའི་ཇར་མ་ནིའི་ཕྱི་སྲིད་བློན་ཆེན་མཆོག་གིས་སྲིད་འཛིན་ཞི་ཅིན་ཕིང་ལ་སྲིད་དབང་སྒེར་སྤྱོད་པ་ཞེས་འགྲེལ་བརྗོད་གནང་བ་དེས་ཕྱོགས་གཉིས་ཀྱི་འབྲེལ་ལམ་ལ་དོ་ཕོག་འགྲོ་ངེས་ཡིན་པ་མ་ཚད་པར་མ་འོངས་པར་ཕྱོགས་གཉིས་ཀྱི་དཔོན་རིགས་ཁག་གི་གྲོས་མོལ་ལའང་གནོད་འཚེ་བཟོ་ངེས་ཡིན་པར་བཤད་འདུག
