༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་ Jagdeep Dhankhar མཆོག་རྒྱ་གར་གྱི་སྲིད་འཛིན་སྐུ་གཞོན་ལ་བདམས་ཐོན་བྱུང་བར་དགའ་བསུའི་འཚམས་འདྲི་སྩལ་བ་དང་སྦྲགས་ཏེ་མ་འོངས་ཕྱག་ལས་ཁག་ལེགས་གྲུབ་ཡོང་བར་ཐུགས་སྨོན་མཛད་འདུག༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཞི་བའི་ཚལ་ཕོ་བྲང་ནས་དགའ་བསུའི་འཚམས་འདྲི་ཞིག་སྩལ་བའི་ནང་འདས་པའི་ལོ་དུས་དེ་དག་ཁྲོད་དུ་རྒྱ་གར་ནང་ལ་ཚན་རིག་དང་འཕྲུལ་རིག་གིས་གཙོས་པའི་སྡེ་ཚན་མང་པོར་ཡར་རྒྱས་ཚད་མཐོ་པོ་འགྲོ་བཞིན་ཡོད་པ་སོགས་བཀའ་འགྲེལ་དང་སྦྲགས། ད་ཆ་རྒྱ་གར་རང་བཙན་གྱི་རྒྱལ་ཁབ་ཆགས་ནས་ལོ་ངོ་ ༧༥ འཁོར་བཞིན་པའི་དུས་སྐབས་འདིར་སྐུ་ཞབས་ Jagdeep Dhankhar མཆོག་ནས་རྒྱ་གར་གྱི་སྲིད་འཛིན་གཞོན་པའི་ཐུགས་འགན་བཞེས་གཏན་ཁེལ་བ་ནི་རྟེན་འབྲེལ་བཟང་པོ་ཞིག་རེད་ཅེས་བཀའ་སྩལ་འདུག མགོན་པོ་༸གང་ཉིད་མཆོག་གིས་རྒྱ་གར་ནི་འགྲོ་བ་སྤྱི་ལ་ཕན་པ་བསྒྲུབ་ཐུབ་པའི་འཚེ་མེད་ཞི་བ་དང་བྱམས་སྙིང་རྫེའི་ཁྱད་ཆོས་ལྡན་པའི་རྒྱལ་ཁབ་ཅིག་ཡིན་པ་དང་། བདག་ཉིན་ཆེན་པོ་གྷཾདྷཱི་མཆོག་གིས་འཚེ་མེད་ཞི་བའི་ལྟ་གྲུབ་ཁག་རྒྱལ་སྤྱིའི་ཁྱོན་ལ་ཁྱབ་སྤེལ་གནང་ཡོད་པ་སོགས་བཀའ་སྩལ་བ་དང་ཆབས་ཅིག་ཏུ་མགོན་པོ་མཆོག་གིས་ཀྱང་འཚེ་བ་མེད་པ་དང་བྱམས་སྙིང་རྗེ་གཞི་རྩར་བཟུང་སྟེ་བཟང་པོའི་ལྟ་གྲུབ་དང་བསླབ་བྱ་ཁག་རྒྱ་གར་གྱི་སྤྱི་ཚོགས་ཙམ་མ་ཟད་རྒྱལ་སྤྱིའི་ཁྱོན་ལ་གོང་སྤེལ་གང་ཐུབ་མཛད་བཞིན་ཡོད་པ་སོགས་བཀའ་སྩལ་འདུགལྷག་པར་དུ་མགོན་པོ་མཆོག་ནས་རྒྱ་གར་གྱི་གནའ་བོའི་རིག་གནས་དེ་དག་ནི་འགྲོ་བ་མིའི་སེམས་ཁམས་དང་ཤེས་པ། སེམས་ཚོར་གྱི་རྣམ་གཞག་སོགས་རྒྱུས་ལོན་གནང་ཐབས་ཀྱི་གཞི་རྟེན་ལྟ་བུར་གྱུར་ཡོད་པར་མ་ཟད་རིག་གནས་དེ་དག་ནང་བློ་སྦྱོང་དང་སྒོམ་སྒྲུབ་སོགས་ཀྱི་ཐབས་ལམ་ཡོད་པ་དེ་དག་ནི་ཚེ་འདི་ཕྱི་གཉིས་ཀར་ཕན་ཐོགས་ཡོད་པ་འབའ་ཞིག་ཆགས་ཡོད་ཅེས་བཀའ་སྩལ་བ་དང་ཆབས་ཅིག རྒྱ་གར་གྱི་གནའ་བོའི་རིག་གཞུང་དེ་དག་ཆོས་ལུགས་དང་མ་འབྲེལ་བའི་ཐོག་ནས་དེང་དུས་ཀྱི་ཤེས་ཡོན་སློབ་གསོའི་ནང་ལ་སློབ་ཁྲིད་གནང་གལ་ཡིན་པ་དང་། དེང་སྐབས་རྒྱ་གར་གྱི་མངའ་སྡེ་ཁག་ཅིག་ཏུ་དེ་དག་སློབ་ཁྲིད་དབུ་འཛུགས་གནང་ཟིན་སྟབས་རིམ་པས་རྒྱ་གར་རྒྱལ་ཡོངས་སུ་ལག་བསྟར་ཐུབ་པའི་ཐུགས་རེ་ཡོད་སྐོར་བཀའ་སྩལ་མཛད་ཡོད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་ད་ཆ་རྒྱལ་སྤྱིའི་སྤྱི་ཚོགས་ཁྱོན་ཡོངས་སུ་རྒྱ་གར་རྒྱལ་ཁབ་ཀྱི་གལ་གནད་དང་མཚན་མཐོང་གོང་འཕེལ་འགྲོ་བཞིན་པ་དང་། རྒྱ་གར་ནི་རྒྱལ་སྤྱིའི་ཐོག་ཞི་བདེ་དང་ཡར་རྒྱས་གོང་འཕེལ་ཐད་ཞབས་འདེགས་རླབས་ཆེན་བསྒྲུབ་རྒྱུའི་ནུས་པ་ལྡན་ཡོད་ཅེས་བཀའ་སྩལ་དང་འབྲེལ་ནས་སྐུ་ཞབས་ Jagdeep Dhankhar མཆོག་གིས་འདས་པའི་ལོ་དུས་ནང་ཕྱག་ལས་སྣ་མང་གནང་བའི་བརྒྱུད་རིམ་དང་ཉམས་མྱོང་ཐོག་ནས་སྲིད་འཛིན་སྐུ་གཞོན་གྱི་ལས་ཡུན་རིང་ལ་རྒྱ་གར་རྒྱལ་ཁབ་དང་མི་སེར་གྱི་བདེ་དོན་ལ་སྨན་པའི་ཕྱག་ལས་གནང་ཐུབ་པའི་ཐུགས་རེ་ཡོད་ཅེས་བཀའ་སྩལ་འདུགབོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཀྱང་རྒྱ་གར་གཞུང་མང་གཉིས་ནས་ད་བར་བོད་མིའི་འཚེ་མེད་ཞི་བའི་འཐབ་རྩོད་ལ་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ་ཞུས་པ་དང་སྦྲགས། སྐུ་ཞབས་ Jagdeep Dhankhar མཆོག་རྒྱ་གར་གྱི་སྲིད་འཛིན་གཞོན་པར་བདམས་ཐོན་བྱུང་བར་དགའ་བསུ་ཞུས་འདུག རྩ་བའི་སྐུ་ཞབས་ Jagdeep Dhankhar མཆོག་ ༡༩༥༡ ལོར་རྒྱ་གར་གྱི་ Rajasthan མངའ་སྡེར་འཁྲུངས་ཤིང་། འདས་པའི་ལོ་དུས་ནང་རྒྱ་གར་དབུས་གཞུང་གི་བློན་ཆེན་དང་དབུས་ས་གཉིས་ཀྱི་གྲོས་ཚོགས་འཐུས་མི། དེ་བཞིན་མངའ་སྡེའི་སྲིད་སྐྱོང་སོགས་ཀྱི་ཐུགས་འགན་མང་དག་ཅིག་བཞེས་མྱོང་ཡོད་པ་དང་། སྐུ་ཞབས་ཁོང་ནས་ཟླ་ ༨ ཚེས་ ༡༡ ཉིན་རྒྱ་གར་གྱི་སྲིད་འཛིན་གཞོན་པའི་དམ་འབུལ་དང་ཕྱག་ལས་དངོས་སུ་དབུ་འཛུགས་གནང་གི་ཡོད་པ་རེད།

དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་གླེ་ལྕོག་ལམ་གསར་དུ་ཡོད་པའི་བོད་ཁྱིམ་སློབ་གྲྭའི་རྩེད་ཐང་དུ་བོད་མི་ཚོར་དམིགས་བསལ་མཇལ་ཁ་དང་ལམ་སྟོན་བཀའ་སློབ་བཀྲིན་སྩལ་གནང་མཛད་ཡོད།སྐབས་དེར་ལ་དྭགས་ཀྱི་ས་ཕྱོགས་གང་ས་ནས་བོད་མི་སྟོང་ཕྲག་འགའ་ཤས་འདུ་འཛོམས་བྱུང་ཡོད་པ་དང་། མཛད་སྒོའི་སྐབས་མགོན་པོ་༸གང་ཉིད་མཆོག་ནས་ཐོག་མ་བཙན་བྱོལ་དུ་ཕེབས་དགོས་པའི་དོན་རྐྱེན་སོགས་དང་འབྲེལ་ནས་བཀའ་སྩལ་མཛད་སྐབས་གཙོ་བོ་ཕྱི་ལོ་ ༡༩༥༩ ལོར་༸གང་ཉིད་མཆོག་ལ་བཅིངས་གྲོལ་དམག་སྒར་གྱི་ཟློས་སྒར་གཟིགས་མོར་སྐུ་རྐྱང་དུ་ཕེབས་དགོས་པའི་མགྲོན་བརྡར་མི་མང་ཚོས་དངངས་འཚབ་ཀྱི་རྣམ་འགྱུར་ཤུགས་ཆེར་བཏོན་པའི་ཁྲོད་༸གང་ཉིད་མཆོག་དེར་ཕེབས་རྒྱུ་མེད་པའི་འབོད་སྐུལ་དང་སྦྲགས། རྩ་བའི་བོད་མི་ཚོས་རྒྱ་མིར་རེ་བ་དང་ཡིད་ཆེས་རྩ་བ་ནས་མེད་སྟབས། སྐབས་དེར་དོན་རྐྱེན་ཆེན་པོ་བྱུང་ཡོད་སྐོར་དང་།ལྷག་པར་དུ་དེའི་རྗེས་བཅིངས་གྲོལ་དམག་མིས་བོད་མི་ཚོར་དྲག་གནོན་བྱ་རྒྱུའི་སྡིགས་ར་བཏང་ཡོད་པ་མ་ཟད། ནོར་བུ་གླིང་གའི་ཕོ་བྲང་དུ་འབར་རྫས་དང་མེ་ཤུགས་ཕུར་མདའ་སོགས་བརྒྱག་རྒྱུའི་གྲ་སྒྲིག་བྱས་པ་སོགས་ཀྱི་གནས་སྟངས་ཤིན་ཏུ་ནས་ཛ་དྲག་བྱུང་རྐྱེན། ལྷ་བླའི་ལུང་བསྟན་ལྟར་ནོར་བུ་གླིང་ག་ནས་ཕེབས་ཐོན་གནང་དགོས་པ་སོགས་ཐུགས་ཚོར་ཆེན་པོས་དེ་བྱུང་གི་གནས་སྟངས་ཉག་ཕྲ་བ་རྣམས་ངོ་སྤྲོད་མཛད་སོང་།༸གོང་ས་༸སྐྱབས་མགོན་ཆེན་པོ་མཆོག་ནས་སྐབས་དེར་ད་དུང་རྒྱ་གར་རང་དབང་ལུང་པར་བཙན་བྱོལ་ཕེབས་དགོས་བྱུང་སྟེ་སྐུ་ཚེ་གསར་པ་ཞིག་དབུ་འཛུགས་གནང་དགོས་བྱུང་ཡོད་ཀྱང་རྐྱེན་ངན་གྲོགས་སུ་ཤར་བ་ལྟ་བུ་འགྱུར་ནས་རྒྱ་གར་དུ་བཙན་བྱོལ་འབྱོར་རྗེས་བོད་ཀྱི་ཆབ་སྲིད་གནད་དོན་སྤྱི་དང་། ལྷག་པར་དུ་འཛམ་གླིང་མི་མང་ཚོས་ཤིན་ཏུ་རྒྱ་ཆེ་བའི་དཔལ་ན་ལན་ཌ་ནས་བརྒྱུད་པའི་བོད་ཀྱི་ནང་པ་སངས་རྒྱས་པའི་ཆོས་ལ་དོ་སྣང་གསར་པ་ཞིག་དང་འཛམ་གླིང་མི་མང་ཚོས་ཤེས་རྟོགས་ཐུབ་ཡོད་པ་སོགས་ཀྱི་ངོ་སྤྲོད་མཛད་པ་དང་འབྲེལ། སྐབས་དེའི་དྲག་གནོན་བྱེད་མཁན་རྒྱ་མིའི་དཔོན་རིགས་ཚོས་བསམ་ཡུལ་ལས་འདས་དགོས་པ་སོགས་བྱུང་ཡོད་པ་དང་། དེ་དག་ནི་བོད་གངས་ཅན་པའི་མི་མང་རྣམས་ཀྱི་ལྷག་བསམ་དང་དད་པ། ཡིད་ཆེས་འདུན་པ་ཆིག་སྒྲིལ་བཅས་ཀྱི་ནུས་སྟོབས་ཡིན་པ་སོགས་བཀའ་སྩལ་མཛད་ཡོད།དེས་ན་མགོན་པོ་༸གང་ཉིད་མཆོག་ནས་རིང་པོ་མ་ཐོགས་པར་བོད་དོན་བདེན་མཐའ་སེལ་ནས་གཞིས་བྱེས་མཉམ་འཛོམས་འབྱུང་གི་རེད་ཅེས་བཀའ་བཞེས་བཟང་པོ་སྨིན་སྩལ་མཛད་སོང་།གཞན་ཡང་དེ་རིང་གི་མཛད་སྒོའི་ཐོག་ས་གནས་ཀྱི་ཡུལ་མིས་གཙོས་དད་ལྡན་ཁག་གཅིག་ཕེབས་འདུག་པ་དེར་༸གོང་ས་༸སྐྱབས་མགོན་ཆེན་པོ་མཆོག་ནས་ཧཱི་མ་ལ་ཡའི་རི་རྒྱུད་ཀྱི་མི་མང་ཚོས་རྒྱུན་དུ་ནས་སངས་རྒྱས་པའི་ཆོས་ཀྱི་གཞི་ལམ་འབྲས་གསུམ་གྱི་རྣམ་གཞག་སློབ་གཉེར་གནང་དགོས་པ་དང་ཆོས་ཤེས་པའི་ཐོག་ནས་དད་པ་བྱ་དགོས་པའི་ལམ་སྟོན་བཀྲིན་སྩལ་ཡོད།དེ་བཞིན་མཛད་སྒོའི་སྐབས་ལ་སྤྱི་དོན་གྲུབ་བཀྲིས་ལགས་ཀྱིས་ས་གནས་ཀྱི་ལས་བསྡོམས་སྙན་སྒྲོན་ཞུས་པ་མ་ཟད། སྐབས་དེར་ལ་དྭགས་བོད་ཕྲུག་ཁྱིམ་སྡེ་དང་། བསོད་ནམས་གླིང་བྱང་ཐང་མི་མང་། དེ་བཞིན་གླེ་མི་མང་བཅས་ནས་༸གང་ཉིད་མཆོག་ལ་གླུ་གར་གྱི་མཆོད་པ་ཡང་ཕུལ་ཡོད།

ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ནས་ཇི་ལྟར་གསལ་བསྒྲགས་ཞུས་པའི་དཔལ་རྔོན་དུས་སྟོན་གྱི་ཉིན་མོ་དང་བསྟུན། དེ་རིང་གི་མཛད་སྒོའི་སྐབས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དཔལ་རྔམ་གཟེངས་རྟགས་འབུལ་བཞེས་མཛད་སོང་།བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཀྱང་སྐབས་དེར་ཐུགས་བརྩེ་བ་ཆེན་པོས་༸གང་ཉིད་ནས་འགྲོ་བ་སྤྱི་ལ་བདེ་སྐྱིད་དང་། ཆོས་ལུགས་མཐུན་འབྲེལ་ཡོངས་ཐབས་ཀྱི་དགོངས་གཞི། དེ་བཞིན་ལ་དྭགས་ཁུལ་དུ་ཤིང་ནགས་འདེབས་འཛུགས་དང་ཁོར་ཡུག་སྲུང་སྐྱོབ་གནང་དགོས་པ་སོགས་ཀྱི་ལམ་སྟོན་ཀའ་སྩལ་དང་སྦྲགས། ད་རེས་ལ་དྭགས་མི་མང་ངོས་ནས་དད་པ་དང་དམ་ཚིག་གཡོ་བ་མེད་པའི་ཐོག་གཟེངས་རྟགས་འབུལ་བཞེས་མཛད་པར་༸གང་ཉིད་ནས་ཐུགས་རྗེ་ཆེ་ཞུས་དང་འབྲེལ། མ་འོངས་པར་ལ་དྭགས་ཁུལ་དུ་ཆིབས་བསྒྱུར་གནང་རྒྱུའི་ཐུགས་འདུན་ཡོད་པ་སོགས་ཀྱི་དགོངས་གཞི་བཀྲིན་སྩལ་གནང་མཛད་ཡོད།དེ་རིང་གི་མཛད་སྒོ་དེའི་ཐོག་སྐུ་མགྲོན་དུ། འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་བརྒྱ་དང་བཞི་པ་རྗེ་བཙུན་བློ་བཟང་བསྟན་འཛིན་མཆོག་དང་། ཁྲིག་སེ་རིན་པོ་ཆེ་མཆོག་གིས་དབུས་པའི་བླ་སྤྲུལ་དང་། ལ་དྭགས་རང་སྐྱོང་རི་ལྗོངས་ལྷན་ཚོགས་ཀྱི་སྲིད་སྐྱོང་སློབ་སྟོན་པ་སྐུ་ཞབས་ Umang Narula མཆོག་གི་དབུས་གྲོས་ཚོགས་ཀྱི་ཚོགས་མི་སྐུ་ཞབས་འཇམ་དབྱངས་ཚེ་རིང་རྣམ་རྒྱལ་ལགས་དང་། གཞན་ཡང་ཁུལ་དེའི་འཛིན་སྐྱོང་དང་འབྲེལ་བའི་དཔོན་རིགས་ཆེ་ཁག དེ་བཞིན་ཡུལ་ལུང་སོ་སོའི་འགོ་དཔོན་སློབ་ཕྲུག་བཅས་མང་ཚོགས་སྟོང་ཕྲག་ཉེ་བ་ཞིག་འདུ་འཛོམས་བྱུང་ཡོད་པ་མ་ཟད། སྲིད་སྐྱོང་གི་སློབ་སྟོན་པ་སྐུ་ཞབས་ Umang Narula མཆོག་གིས་སྐབས་དེར་ད་རེས་༸གོང་ས་༸སྐྱབས་མགོན་ཆེན་པོ་མཆོག་ལ་དཔལ་རྔམ་གཟེངས་རྟགས་འབུལ་བཞེས་མཛད་པ་དེ་ལོ་རྒྱུས་རང་བཞིན་ལྡན་པ་ཞིག་ཡིན་སྐོར་དང་། རྒྱ་གར་དབུས་གཞུང་གི་ངོས་ནས་ཁོར་ཡུག་སྲུང་སྐྱོབ་དང་འབྲེལ། ལ་དྭགས་རིམ་པར་ཡར་རྒྱས་གོང་འཕེལ་གྱི་ལས་འཆར་འཛུགས་བསྐྲུན་བྱེད་བཞིན་ཡོད་པ་སོགས་ཀྱི་ལས་བསྡོམས་སྙན་སྒྲོན་ཞུས་པ་མ་ཟད། མཛད་སྒོའི་ཐོག་ད་དུང་གྲོས་ཚོགས་ཀྱི་ཚོགས་མི་སྐུ་ཞབས་འཇམ་དབྱངས་ཚེ་རིང་རྣམ་རྒྱལ་ལགས་ཀྱིས། ལ་དྭགས་མི་མང་རྣམས་ལ་ཚེ་འདིར་༸གོང་ས་༸སྐྱབས་མགོན་ཆེན་པོ་དངོས་སུ་མཇལ་རྒྱུ་བྱུང་བ་དེ་སྐལ་པ་ཤིན་ཏུ་ནས་བཟང་པོ་ཞིག་དང་། ཚེ་ཕྱི་མར་ཡང་མགོན་པོ་༸གང་ཉིད་མཆོག་གི་རྗེས་སུ་བཟུང་ཐུབ་པའི་སྨོན་ལམ། དེ་བཞིན་༸གོང་ས་མཆོག་སྐུ་ཚེ་བསྐལ་བརྒྱར་བརྟན་པའི་སྨོན་མདུན་དང་། ལ་དྭགས་མི་མང་ངོས་ནས་༸གང་ཉིད་མཆོག་ལ་རྒྱ་གར་གཞུང་གི་སྤྱི་མང་གཟེངས་རྟགས་མཐོ་ཤོས་ Bharat Ratna འབུལ་བཞེས་ཡོང་བའི་འབད་བརྩོན་གང་ཡོངས་ཞུ་རྒྱུ་སོགས་ཀྱི་བཀའ་མོལ་གནང་ཡོད།རྩ་བའི་ལ་དྭགས་ཀྱི་དཔལ་རྔམ་གཟེངས་རྟགས་ཞེས་པ་དེ་ཁུལ་དེའི་མི་མང་ཁོངས་ནས་ཆབ་སྲིད་དང་སྤྱི་ཚོགས་བཅས་ཀྱི་ལས་དོན་གཟེངས་སུ་ཐོན་པ་རྣམས་ལ་གནང་སྲོལ་ཡོད་པའི་གཟེངས་རྟགས་ཤིག་ཡིན་འདུག་ཀྱང་། ༸གོང་ས་༸སྐྱབས་མགོན་ཆེན་པོ་མཆོག་གི་འགྲོ་བ་སྤྱི་དང་། བོད་མི། ཧི་མ་ལ་ཡའི་རི་རྒྱུད་ཀྱི་མི་རིགས་བཅས་དང་། ལྷག་པར་དུ་ལ་དྭགས་མི་མང་ལ་ཐུགས་ཤིན་ཏུ་བརྩེ་བ་ཆེན་པོས་ད་བར་ཁུལ་དེར་ཆིབས་བསྒྱུར་ཐེངས་༢༦ བཀྲིན་བསྐྱང་མཛད་ཡོད་པ་མ་ཟད། ཆོས་འབྲེལ་དང་བླང་དོར་ལམ་སྟོན་བཅས་ཀྱི་བཀྲིན་ལ་བརྟེན། ལ་དྭགས་མི་མང་གི་ཆབ་དཔལ་རིག་གསུམ་སྒོ་གང་ས་ནས་སྤྱི་ཚོགས་ཡར་རྒྱས་གོང་འཕེལ་ལ་ཤུགས་རྐྱེན་ཆེན་པོ་ཞིག་བསྐྲུན་ཡོད་པ་དེར་བཀྲིན་རྗེས་དྲན་མཚོན་ཆེད་གཟེངས་རྟགས་དེ་བཞིན་འབུལ་བཞེས་མཛད་པ་ཞིག་ཡིན་འདུག དེ་ཡང་དེ་རང་སྔ་དྲོ་ལ་དྭགས་གླེ་གྲོང་ཁྱེར་གྱི་སེང་གེ་གཙང་པོའི་ཆུ་མཐར་འཚོགས་པའི་མཛད་སྒོ་དེའི་ཐོག་ལ་དྭགས་རང་སྐྱོང་རི་ལྗོངས་ལྷན་ཚོགས་ཀྱི་སྡེ་དཔོན་བཀྲིས་རྒྱལ་མཚན་མཆོག་ནས་ད་རེས་ཀྱི་གཟེངས་རྟགས་འདི་བཞིན་ལ་དྭགས་མི་མང་ཡོངས་ཀྱི་དད་སེམས་ཆེན་པོའི་ཐོག་ཕུལ་བའི་གཟེངས་རྟགས་དམིགས་བསལ་ཅན་ཞིག་ཡིན་པ་མ་ཟད་། ༸གང་ཉིད་ཀྱི་བཀྲིན་ལ་བརྟེན་ནས་ད་ལྟ་ལ་དྭགས་ཀྱི་མི་མང་རྣམས་ཚགས་ཚུད་པོ་ཡོད་ཅེས་གསུངས་པ་དང་། དེ་བཞིན་བོད་མི་ཚོར་ཡང་ལ་དྭགས་མི་མང་དང་གཅིག་མཚུངས་ཀྱི་གཟིགས་སྐྱོང་གནང་གི་ཡོད་སྐོར་ཡང་སྙན་སེང་ཞུས་ཡོད་པ་རེད།མཛད་སྒོ་དེའི་ཐོག་ལ་དྭགས་ཀྱི་ལོ་རྒྱུས་རང་བཞིན་ལྡན་པའི་རིག་གཞུང་གི་གཞས་སྣ་ཁག་གཅིག་ཀྱང་གཟིགས་འབུལ་ཞུས་ཡོད།གཞི་རྩའི་ལ་དྭགས་ནི་ཆོས་དང་རིག་གཞུང་ལོ་རྒྱུས་བཅས་ཀྱི་ཐོག་ནས་བོད་དང་ཐད་ཀར་འབྲེལ་བ་ཡོད་པའི་རྒྱ་གར་གྱི་ས་གནས་ཤིག་ཡིན་པ་མ་ཟད། ས་བབ་ཀྱི་གནས་སྟངས་ཆ་ནས་ཀྱང་ལ་དྭགས་ཀྱི་ཤར་ཕྱོགས་ས་མཚམས་སུ་བོད་དང་། ལྷོ་ཕྱོགས་སུ་རྒྱ་གར་གྱི་ཧི་མ་ཅལ་མངའ་སྡེ་འཁེལ་གྱི་ཡོད་པ་རེད། མི་འབོར་ ༢༧༥༠༠༠ ཙམ་ལས་མེད་པའི་ས་གནས་འདི་ནི་ས་ཁྱོན་གྱི་ཆ་ནས་མི་ཚོགས་ཐར་ཐོར་དུ་གནས་པའི་རྒྱ་གར་གྱི་ས་ཁུལ་ཞིག་ཏུ་ངོས་འཛིན་གནང་གི་ཡོད་པ་དང་། ཕྱི་ལོ་ ༢༠༡༩ སྔ་རོལ་དུ་ལ་དྭགས་དེ་བཞིན་ཇ་མུ་ཀྴི་མིར་མངའ་སྡེའི་ཁྱབ་ཁོངས་ཤིག་ཡིན་ཡང་། ༢༠༡༩ ལོའི་ཕྱི་ཟླ་ ༡༠ ཚེས་ ༣༡ ཉིན་རྒྱ་གར་གྱི་གྲོས་ཚོགས་ནས་ཇ་མུ་ཀྴི་མིར་གྱི་མངའ་སྡེ་ཆ་བགོས་བྱས་པའི་ཁྲིམས་འཆར་ཞིག་གི་འོག་ལ་དྭགས་དེ་བཞིན་དབུས་གཞུང་གི་ཐད་ཀར་འཛིན་སྐྱོང་གི་རང་སྐྱོང་ས་གནས་ཤིག་ཏུ་ངོས་འཛིན་བྱུང་ཡོད་པ་རེད། ཆོས་ལུགས་ཀྱི་ཆ་ནས་ས་གནས་འདིའི་མོ་འབོར་གྱི་བརྒྱ་ཆ་ ༤༦ ཁ་ཆེ་དང་། བརྒྱ་ཆ་ ༤༠ ནང་པ། བརྒྱ་ཆ་ ༡༢ ཧིན་རྡུ་དང་། དེ་བཞིན་ཆོས་ལུགས་གཞན་གྱི་བརྒྱ་ཆ་གཉིས་ལས་ཟིན་གྱི་མེད་ཀྱང་། གླེ་དང་ཀར་གིལ་བཅས་རྫོང་ཁག་གཉིས་སུ་དབྱེ་བའི་རང་སྐྱོང་ས་ཁུལ་དེའི་ཁ་ཆེ་དང་ནང་པ་བཅས་མི་མང་ཡོངས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་པ་དང་བརྩི་བཀུར་ཧ་ཅང་ཆེན་པོ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོ་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་གཞུང་དམངས་ངོས་ནས་བཀྲིན་རྗེས་དྲན་མཚོན་ཆེད་དཔལ་རྔམ་གཟེངས་རྟགས་འབུལ་རྒྱུ་ཡིན་འདུགདེ་ཡང་ཁ་སང་ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་སྐུ་ཞབས་བཀྲིས་རྒྱལ་མཚན་ལགས་ཀྱི་གསར་འགོད་གསལ་བསྒྲགས་ཤིག་སྤེལ་བའི་ནང་སང་ཕྱི་ཟླ་ ༨ ཚེས་ ༥ ཉིན་རྒྱ་གར་བྱང་ཕྱོགས་ལ་དྭགས་དེ་བཞིན་ UT ཞེས་རྒྱ་གར་དབུས་གཞུང་གི་ཐད་ཀར་སྟངས་འཛིན་གནང་རྒྱུའི་ས་ཁུལ་ཞིག་ཏུ་གསལ་བསྒྲགས་གནང་བའི་ཉིན་མོ་དང་བསྟུན། ལ་དྭགས་ཁུལ་དུ་དཔལ་རྔམ་དུས་སྟོན་ཞེས་སྲུང་བརྩི་ཞུ་བཞིན་པ་དེ་ཉིད་འདི་ལོ་ནས་ཕྱི་ཚེས་ ༥ ཉིན་སྲུང་བརྩི་ཞུ་རྒྱུའི་གསལ་བསྒྲགས་དང་སྦྲགས། འདི་ལོའི་དཔལ་རྔམ་དུས་སྟོན་དེ་བཞིན་སང་ཉིན་ལ་དྭགས་ལྕོག་ལམ་སར་གྱི་ཉེ་འཁྲིས་སུ་ཆགས་པའི་ Sindhu Ghat ནང་སྲུང་བརྩི་ཞུ་རྒྱུ་དང་། དུས་སྟོན་དེའི་ཐོག་སྐུ་མགྲོན་གཙོ་བོར་༸གོང་ས་༸སྐྱབས་མགོན་ཆེན་པོ་མཆོག་གདན་ཞུ་གནང་ཡོད་པ་རེད་འདུགསྐུ་ཞབས་བཀྲིས་རྒྱལ་མཚན་ལགས་ཀྱིས་ད་དུང་དུས་སྟོན་དེའི་ཐོག་ལ་དྭགས་གཞུང་འབྲེལ་གཟེངས་རྟགས་མཐོ་ཤོས་ཏེ་དཔལ་རྔམ་དུས་སྟོན་གཟེངས་རྟགས་ཞེས་འབུལ་བཞིན་ཡོད་པ་ལྟར། བོད་མི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་དང་རྣམ་པ་ཀུན་དུ་ལ་དྭགས་མི་མང་ཡོངས་ལ་ཐུགས་བརྩེ་བ་ཆེན་པོས་ཁུལ་དེར་ཆིབས་བསྒྱུར་དང་བཀའ་ཆོས། དེ་བཞིན་བཀའ་སློབ་ལམ་སྟོན་སོགས་གནང་བཞིན་ཡོད་སྟབས། ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ནས་ཐག་གཅོད་གཙོས་མཁན་བླ་སྤྲུལ་ཁག་དང་མཁས་པ་རྣམས་པས་གྲོས་བསྡུར་གནང་མཐར་ལ་དྭགས་གཞུང་མང་གཉིས་ནས་བཀྲིན་རྗེས་དྲན་མཚོན་ཆེད་མགོན་པོ་༸གང་ཉིད་མཆོག་ལ་དཔལ་རྔམ་གཟེངས་རྟགས་འབུལ་རྒྱུ་ཡིན་འདུགགཞན་ཡང་དུས་སྟོན་སྲུང་བརྩི་ཞུ་སའི་ས་ཚིགས་དེ་བཞིན་དེ་ཙམ་གྱི་ས་ཁྱོན་ཆེན་པོ་མེད་སྟབས། ལ་དྭགས་མི་མང་ཡོངས་རྫོགས་ས་ཁུལ་དེར་ཆུད་པར་དཀའ་བས། སྤྱི་ཚོགས་དྲ་ལམ་བརྒྱུད་དུས་སྟོན་སྲུང་བརྩིའི་མཛད་རིམ་ཁག་དྲྭ་ཐོག་ནས་ཐད་གཏོང་ཞུ་རྒྱུ་དང་། དེ་ཡང་རྒྱལ་ས་གླེའི་ཁྲོམ་གཞུང་དང་ Ladakh Eco སྐྱེད་མོའི་ཚལ། དེ་བཞིན་མཐོ་སློབ་དང་སློབ་གྲྭ་ཁག་གི་ནང་དུ་བརྙན་འཕྲིན་བརྒྱུད་ཐད་གཏོང་གཟིགས་རྒྱུར་གྲ་སྒྲིག་གནང་ཡོད་པ་གསལ་བསྒྲགས་སྤེལ་འདུགགཞི་རྩའི་ཟླ་བ་སྔོན་མའི་ཚེས་ ༢༡ ཉིན་ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་གཙོས་ནང་ཚོགས་ཀྱི་ཚོགས་གཙོ། གཞན་ཡང་གནད་ཡོད་མི་སྣ་ཁག་ཅིག་ནས་གཟིམ་ཆུང་མཇལ་ཁར་བཅར་ཏེ། སྡེ་དཔོན་ལགས་ཀྱིས་ལ་དྭགས་དེ་བཞིན་རྒྱ་གར་དབུས་གཞུང་གིས་ཐད་ཀར་སྟངས་འཛིན་བྱ་སའི་ས་ཚིགས་ཤིག་ཏུ་གྱུར་པ་ནས་བཟུང་ལ་དྭགས་ཁུལ་དུ་གནས་སྡོད་བཙན་བྱོལ་བོད་མིར་ལྟ་རྟོགས་བྱ་རྒྱུར་ཡུལ་མི་དང་གང་ཐུབ་གཅིག་མཚུངས་ཡོང་ཐབས་སུ་འབད་བཞིན་ཡོད་སྐོར་སྙན་སེང་ཞུས་པའི་ཁྲོད་བསོད་ནམས་གླིང་གཞིས་ཆགས་སུ་གཞུང་ལམ་གསར་རྒྱག་དང་ཁྱིམ་ཚང་རེ་རེ་བཞིན་ཆུ་རྐ་ལ་འཐེན་ཡོད་པ་དང་། དེ་བཞིན་གློག་གི་དཀའ་ངལ་སོགས་སེལ་ཡོད་སྐོར་སྙན་སེང་ཞུས་པ་མ་ཟད། ལ་དྭགས་ཁུལ་གྱི་རྒྱ་གར་གཞུང་གི་སློབ་གྲྭ་ཁག་གི་ནང་དུ་སཱི་ཤེས་ཡོན་སློབ་གསོའི་བསླབ་གཞི་དབུ་འཛུགས་གནང་ཡོད་པའང་སྙན་སེང་དང་སྦྲགས། མགོན་པོ་༸གང་ཉིད་མཆོག་དུས་ཡུན་རིང་ཙམ་ཁུལ་དེར་༸སྐུ་ངལ་གསོ་བཞུགས་མཛད་རྒྱུའི་གསོལ་འདེབས་ཞུས་ཡོད་པ་རེད།    

བོད་ཀྱི་བུད་མེད་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༡༤ པ་དེ་བཞིན་ལ་དྭགས་གླེ་གྲོང་ཁྱེར་ལྕོག་ལམ་སར་ཡོད་པའི་བསོད་ནམས་གླིང་བོད་མིའི་གཞིས་ཆགས་ཀྱི་མཉམ་འབྲེལ་ཚོགས་ཁང་ནང་ཁ་སང་ཕྱི་ཚེས་ ༡ ནས་འགོ་འཛུགས་ཀྱིས་ཕྱི་ཚེས་ ༥ བར་འཚོག་རྒྱུ་དང་། དེ་རིང་ས་གནས་སོ་སོའི་ལས་བསྡོམས་དང་། དེ་བཞིན་རྩིས་ཁྲ་སྙན་སྒྲོན་དང་ཞིབ་བཤེར་གནང་ཡོད་པ་རེད་འདུགགཞི་རྩའི་ཐེངས་འདིའི་བེུད་ལྷན་ཚོགས་ཀྱི་འགན་འཛིན་ལྷན་ཚོགས་དེའི་ཐོག་རྒྱ་གར་དང་བལ་ཡུལ། ཨ་རི་དང་ཡོ་རོབ་བཅས་ས་གནས་ཁག་ ༢༨ ནས་རྒྱུན་ལས་མི་གྲངས་ ༧༥ ལྷག་མཉམ་ཞུགས་གནང་ཡོད་པ་དང་། དེའི་སྐབས་གྲོས་གཞི་དོན་ཚན་ཁག་བརྒྱད་ཐོག་བཀའ་བསྡུར་གྲོས་ཆོད་གཏན་འབེབས་གནང་རྒྱུ་ཡིན་འདུག དབུས་བུད་མེད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས་ཀྱིས་གསུངས་དོན་དུ་འགན་འཛིན་ལྷན་ཚོགས་དིའི་ཐོག་བཀའ་བསྡུར་གནང་རྒྱུའི་གྲོས་གཞི་གལ་ཆེ་ཤོས་ནི་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭ་དང་འབྲེལ་བའི་གནད་དོན་དང། དེ་འབྲེལ་ཆབ་སྲིད་ཀྱི་ལས་དོན་སྤེལ་ཕྱོགས་སོགས་ཀྱི་ཐོག་གྲོས་མོལ་གནང་གི་ཡོད་སྐོར་གསུངས་ཡོད།དེ་བཞིན་ཁོང་གིས་ད་རེས་བེུད་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༡༤ པ་དེ་བཞིན་མ་སྒྲིག་ལྷུན་གྲུབ་ལྟ་བུར་༸གོང་ས་༸སྐྱབས་མགོན་ཆེན་པོ་མཆོག་འདི་ག་ལ་དྭགས་སུ་ཆིབས་བསྒྱུར་དང་བསྟུན་གོ་སྒྲིག་ཞུ་ཐུབ་པ་དེ་ཧ་ཅང་སྐལ་པ་བཟང་པོ་ཞིག་ལ་ངོས་འཛིན་གནང་གི་ཡོད་སྐོེར་ཡང་གསུངས་སོང་། ཡང་ཚོགས་གཙོ་ལགས་སུ་ཨ་རིའི་ནིའུ་འོག་དང་ནིའུ་ཇར་སིའི་ཁུལ་དུ་ས་གནས་བེུད་ལྷན་ཚོགས་ཁག་གཉིས་ཡོད་པའི་སྐོར་འགན་འཛིན་ལྷན་ཚོགས་འདིའི་ནང་བཀའ་མོལ་གནང་འཆར་ཡོད་མེད་སོགས་དྲིས་པས་ཁོང་ནས་གནད་དོན་དེར་དཀའ་ངལ་ཆེན་པོ་ཞིག་ལ་ངོས་འཛིན་གནང་གི་མེད་སྐོར་གསུངས་སོང་།གཞི་རྩའི་བོད་ཀྱི་བེུད་ལྷན་ཚོགས་ནི་ཕྱི་ལོ་ ༡༩༨༤ ལོར་གསར་འཛུགས་བྱས་པ་ཞིག་དང་། བཙན་བྱོལ་ནང་གི་གཞུང་འབྲེལ་མིན་པའི་ཚོགས་པ་ཆེ་གྲས་ཞིག་ཀྱང་ཡིན་པ་རེད། ད་ལྟའི་འཆར་ཚོགས་པ་དེའི་ནང་རྒྱ་གར་དང་བལ་ཡུལ་གཙོས་པའི་ནུབ་ཕྱོགས་རྒྱལ་ཁབ་བཅས་ས་གནས་ཀྱི་ཡན་ལག་ཁག་ ༥༨ དང་ཚོགས་མི་གྲངས་ ༡༦༠༠༠ ལྷག་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ལ་དྭགས་སུ་ཆོས་ཞུ་བ་འབུམ་བརྒལ་བར་འཕགས་པ་སྤྱན་རས་གཟིགས་ཐུགས་རྗེ་ཆེན་པོའི་བཀའ་དབང་བཀྲིན་སྩལ་གནང་མཛད་པ་མ་ཟད། ད་རེས་ཀྱི་ཆོས་འབྲེལ་གསོལ་འདེབས་ཞུ་མཁན་ལ་དྭགས་ནང་ཚོགས་དང་དགོན་ཚོགས་གཙོས་མང་ཚོགས་ནས་༸གང་ཉིད་ལ་བརྟན་བཞུགས་བསྟར་འབུལ་ཡང་ཞུས་སོང་།དེ་ཡང་དེ་རིང་སྔ་དྲོ་གླེ་གྲོང་ཁྱེར་གྱི་ཞི་བའི་ཚལ་ཕོ་བྲང་གི་གསུང་ཆོས་ར་བར་ཁ་སྔོན་ཉིན་གཉིས་ལས་ཆོས་ཞུ་བ་ལྡབ་འགྱུར་གྱི་མང་བ་ཕེབས་ཡོད་པ་མ་ཟད། ཆོས་ཞུ་བ་མང་པོ་ཞིག་ཆོས་རའི་ཕྱི་ཕྱོགས་དང་འགའ་རེ་གཞུང་ལམ་གྱི་ཐེམ་སྐས་བཅས་སུའང་བཞུགས་ཡོད་པར་ཁྱོན་ཆོས་ཞུ་བ་འབུམ་གཅིག་ལྷག་ཕེབས་ཡོད་སྐོར་ཚོད་དཔག་གནང་གི་འདུག བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་འཕགས་པ་སྤྱན་རས་གཟིགས་ཐུགས་རྗེ་ཆེན་པོ་ནི་རྒྱལ་བ་ཀུན་གྱི་སྙིང་རྗེའི་རང་གཟུགས་ཤིག་ཡིན་པ་དང་། བྱེ་བྲག་ཏུ་བོད་གངས་ཅན་ལྗོངས་ནི་འཕགས་པ་སྤྱན་རས་གཟིགས་ཀྱི་འདུལ་ཞིང་ཐུན་མོང་མ་ཡིན་པ་ཞིག་ཡིན་པ་མ་ཟད། ཚེ་རབས་མང་པོའི་རིང་ལས་འབྲེལ་ཡོད་པས་རྒྱུན་དུ་གསོལ་འདེབས་པ་དང་མ་ནི་སོགས་བགྲངས་ཚེ་བྱིན་རླབས་མྱུར་བ་དང་ཕན་ཡོན་ཆེ་བ་སོགས་ཀྱི་ངོ་སྤྲོད་བཀྲིན་སྩལ་གནང་མཛད་ཡོད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་ནས་སྤྱན་རས་གཟིགས་ཐུགས་རྗེ་ཆེན་པོའི་བཀའ་དབང་གི་སྟ་གོན་དང་དངོས་གཞི་བཅས་བཀྲིན་སྩལ་གནང་མཛད་པ་མ་ཟད། མགོན་པོ་༸གང་ཉིད་མཆོག་ནས་དེ་རིང་དྲ་ཐོག་བརྒྱུད་བཀའ་དབང་ཞུ་མཁན་ཚོར་དེ་མཚུངས་ཀྱི་བྱིན་རླབས་ཐོབ་ཀྱི་ཡོད་པའང་བཀའ་སྩལ་མཛད་ཡོད། བཀའ་དབང་ལེགས་གྲུབ་བྱུང་མཚམས་སུ་༸གང་ཉིད་ནས་ཆོས་ཞུ་བ་རྣམས་ལ་ཉུང་མཐར་མ་ནི་ཁྲི་གཅིག་ཉིན་ལྟར་བགྲང་དགོས་པའི་ལམ་སྟོན་ཡང་བཀའ་སྩལ་མཛད་ཡོད། ༸སྐྱབས་རྗེ་ཁྲིག་སེ་རིན་པོ་ཆེས་དབུས་པའི་ཆོས་འབྲེལ་གསོལ་འདབེས་ཞུ་མཁན་ལ་དྭགས་ནང་ཚོགས་དང་དགོན་ཚོགས། དེ་བཞིན་ས་གནས་ཀྱི་མང་ཚོགས་བཅས་ནས་མགོན་པོ་༸གང་ཉིད་མཆོག་སྐུ་ཚེ་ཞབས་པད་བསྐལ་བརྒྱར་བརྟན་སླད་བརྟན་བཞུགས་བསྟར་འབུལ་ཞུས་པ་དང་འབྲེལ། བཀྲིན་གཏང་རག་གི་མཎྜལ་གླུའི་མཆོད་པ་ཕུལ་སྟེ་ཉིན་གྲངས་གསུམ་རིང་ཇི་ལྟར་གསོལ་འདེབས་ཞུས་པ་ལྟར་ལ་དྭགས་ཀྱི་ཆོས་འབྲེལ་འདི་བཞིན་རེ་ཞིག་མཇུག་སྒྲིལ་སོང་། གཞི་རྩའི་དེ་རིང་ལ་དྭགས་དད་ལྡན་མང་ཚོགས་ཙམ་མ་ཟད། ཉེ་འབྲེལ་ཁུ་ནུ་དང་ལྷོ་ཕྱོགས་ཀྱི་གདན་ས་ཁག དེ་བཞིན་འབྲུག་དང་མོན། བལ་ཡུལ། ལྷག་པར་དུ་བོད་རིགས་དང་ནུབ་ཕྱོགས་རྒྱལ་ཁབ་འདྲ་མིན་ནས་ཁྱོན་ཆོས་ཞུ་བ་འབུམ་གཅིག་ལྷག་ཆོས་འབྲེལ་སྐབས་དངོས་སུ་བཅར་ཡོད། འདི་ག་ལ་དྭགས་ཡུལ་མི་ཞིག་ནས་གསུངས་དོན་དུ་དེ་རིང་ལ་དྭགས་ཀྱི་ས་ཁུག་ཡོད་ཚད་ནས་རྒན་གཞོན་བྱིས་གསུམ་ཡོངས་རྫོགས་ཆོས་ཞུར་ཕེབས་ཡོད་པའི་འགྲེལ་བརྗོད་དང་། གཞན་ཡང་ཆོས་ཞུ་བ་ཁག་གཅིག་ལ་བཀའ་དྲི་ཞུས་ཡོད་པ་གཤམ་འོག་སྒྲ་གསན་ཡོང་བ་ཞུ། ༸སྐུ་པར་བདག་དབང་། དགའ་ལྡན་ཕོ་བྲང་།

ལ་དྭགས་གླེ་གྲོང་ཁྱེར་གྱི་ཞི་བའི་ཚལ་གསུང་ཆོས་ར་བའི་ནང་དེ་རིང་གི་ཉིན་གཉིས་པའི་ཆོས་འབྲེལ་སྐབས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་སྲས་ཆེན་པོ་ཞི་བ་ལྷས་མཛད་སྤྱོད་འཇུག་ཆེན་མོའི་ལེའུ་གཉིས་པ་ནས་ལྗགས་ལུང་བཀྲིན་སྩལ་གནང་མཛད་ཡོད།རྩ་བའི་དེ་རིང་ཉིན་གཉིས་པའི་ཆོས་འབྲེལ་སྐབས་ཆར་སིམ་ཁྲོད་ཆོས་ཞུ་བ་ལྔ་ཁྲི་ལྷག་ཕེབས་ཡོད་པའི་ཚོད་དཔག་དང་། ཆར་སིམ་འབབ་བཞིན་པའི་ཁྲོད་དེར་༸གོང་ས་༸སྐྱབས་མགོན་ཆེན་པོ་མཆོག་ནས་དེ་རིང་ཚེས་གཅིག་ལྷ་མོའི་ཚེས་གཏོར་དང་བསྟུན་༸གང་ཉིད་ནས་ལྷ་མོའི་འཕྲིན་བཅོལ་རྒྱས་པ་ཞིག་ཕུལ་ཡོད་པའི་ངོ་སྤྲོད་དང་སྦྲགས།     དལ་འབྱོར་མི་ལུས་བཟང་པོ་ཐོབ་པ་དེ་ནམ་འཆི་ངེས་མེད་ཡིན་སྟབས།  ཉིན་རེ་བཞིན་དལ་འབྱོར་ལུས་བརྟེན་དེའི་ཐོག་ནས་སྙིང་པོ་ལེན་རྒྱུ་གལ་འགངས་ཆེན་པོ་ཡིན་པ་དང་།    ལྷག་པར་བོད་གངས་ཅན་གྱི་ཞིང་དང་ཧཱི་མ་ལ་ཡའི་མི་རིགས་ཚོར་ལས་བཟང་པོའི་བག་ཆགས་ཡོད་པ་ཞིག་ཡིན་སྟབས།   མི་ལུས་བཟང་པོ་ཐོབ་པ་དེ་དོན་དང་ལྡན་པ་ཞིག་ཡོང་ཐབས་བྱ་དགོས་པ་སོགས་ཀྱི་ལམ་སྟོན་བཀའ་སྩལ་མཛད་སོང་།དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་ནས་བོད་དང་ཧཱི་མ་ལ་ཡའི་མི་རིགས་ཚོས་རྒྱུན་གཏན་བྱང་ཆུབ་སེམས་ལ་དོ་སྣང་དང་སྐྱབས་འགྲོའི་སྨོན་ལམ་བཅས་གསུང་འདོན་གནང་གི་ཡོད་པར་ཧ་ཅང་སྐལ་པ་བཟང་པོ་ཞིག་ཡིན་སྐོར་བཀའ་སྩལ་དང་བསྟུན།  དོན་དང་ལྡན་པའི་བདེ་བ་ཞིག་ཡོང་ཐབས་སུ་ཉིན་རེ་བཞིན་བྱང་ཆུབ་སེམས་བསྒོམ་རྒྱུ་དེ་ཡིན་པའི་ལམ་སྟོན་དང་སྦྲགས་སྤྱོད་འཇུག་ཆེན་མོའི་ལེའུ་གཉིས་པ་སྡིག་བཤགས་ནས་ལྗགས་ལུང་བཀྲིན་སྩལ་གནང་མཛད་སོང་།གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་ནས་ད་རེས་ལ་དྭགས་ཆིབས་བསྒྱུར་འདི་བཞིན་ཏོག་དབྱིབས་གཉན་རིམས་ཁྱབ་གདལ་རྗེས་མགོན་པོ་༸གང་ཉིད་ནས་རྡ་རམ་ས་ལའི་ཕྱི་ཕྱོགས་སུ་ཆོས་འབྲེལ་བཀྲིན་སྩལ་བ་ཐེངས་དང་པོ་དེ་ཡིན་པ་མ་ཟད།    ལྷག་པར་དུ་མགོན་པོ་༸གང་ཉིད་ལ་དྭགས་ཁུལ་དུ་ལོ་གསུམ་ལྷག་གི་རྗེས་ཐེངས་དང་པོར་ཆིབས་བསྒྱུར་བཀྲིན་མཛད་ཀྱི་སྐོར་དང་།   ལ་དྭགས་ཀྱི་ས་ཕྱོགས་གང་ས་ནས་ཆོས་ཞུ་བ་སྟོང་ཕྲག་མང་པོ་གྲོང་ཁྱེར་གླེ་ཁུལ་དུ་འདུ་འཛོམས་བྱུང་ཡོད་པ་མ་ཟད།   ལྷག་པར་དུ་བོད་མིའི་གཙོས་རྒྱ་བལ་འབྲུག་གསུམ་དང་། ནུབ་ཕྱོགས་རྒྱལ་ཁབ་ཁག་ནས་ཁྱོན་ཆོས་ཞུ་བ་སྟོང་ཕྲག་མང་པོ་འདུ་འཛོམས་བྱུང་འདུག་པ་ལྟར། ཆོས་ཞུ་བ་ཁག་ཅིག་གི་ཚོར་བ་དེ་ལྟར་འགྲེལ་བརྗོད་གནང་བྱུང་།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་ནང་ཚོགས་དང་དགོན་ཚོགས་གཉིས་ནས་ཇི་ལྟར་གསོལ་འདེབས་ཞུས་པ་ལྟར་སྤྱོད་འཇུག་ཆེན་མོའི་ཆོས་འབྲེལ་འདི་ཉིད་དེ་རིང་རེ་ཞིག་མཇུག་སྒྲིལ་དང་འབྲེལ།    སང་ཉིན་ཕྱི་ཚེས་ ༣༠ ཉིན་མགོན་པོ་༸གང་ཉིད་མཆོག་ནས་དད་ལྡན་ཆོས་ཞུ་བ་ཚོར་འཕགས་པ་སྤྱན་རས་གཟིགས་ཐུགས་རྗེ་ཆེན་པོའི་བཀའ་དབང་བཀྲིན་སྩལ་རྒྱུ་མ་ཟད། ལ་དྭགས་ནང་ཚོགས་དང་དགོན་གཉིས་ནས་བརྟན་བཞུགས་བསྟར་འབུལ་ཞུ་རྒྱུ་བཅས་ཀྱི་མཛད་འཆར་ཡོད་པ་རེད་འདུག

ལ་དྭགས་ནང་ཚོགས་དང་དགོན་ཚོགས་ཐུན་མོང་ནས་གསོལ་འདེབས་ཞུས་པ་ལྟར།   བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྟེ་ཕྱི་ཚེས་ ༢༨ ནས་ ༣༠ བར་ཉིན་གྲངས་གསུམ་རིང་ཆོས་འབྲེལ་བཀའ་དྲིན་འདི་བཞིན་དངོས་སུ་དབུ་འཛུགས་མཛད་སོང་།དེ་ཡང་ལ་དྭགས་གྲོང་ཁྱེར་གླེའི་ཞི་བའི་ཚལ་ཕོ་བྲང་གི་གསུང་ཆོས་ར་བར་ཉིན་དང་པོའི་ཆོས་འབྲེལ་སྐབས་ཕྱི་ནང་དད་ལྡན་ཆོས་ཞུ་བ་མི་གྲངས་གསུམ་ཁྲི་བརྒལ་བ་ཞིག་འདུ་འཛོམས་བྱུང་ཡོད་པ་དང་། ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་བདེ་སྐྱིད་ཀྱི་རྩ་བ་ནི་སེམས་བཟང་པོ་བྱ་རྒྱུ་དེ་ཡིན་པའི་དྲན་སྐུལ་དང་། གཞི་རྩའི་ཆོས་ལུགས་ཚང་མས་དེ་ལྟར་གསུངས་ཀྱི་ཡོད་ཀྱང་། ནང་པ་སངས་རྒྱས་པའི་ཆོས་སྤྱི་དང་། ལྷག་པར་དུ་དཔལ་ན་ལན་ཌ་ནས་བརྒྱུད་པའི་ནང་པའི་ཆོས་དེ་རྒྱུ་མཚན་ཡང་དག་ཡོད་པའི་ཆོས་ལུགས་ཤིག་ཡིན་པ་བཅས་ནང་ཆོས་ཀྱི་སྙིང་པོ་གང་ཡིན་ལམ་སྟོན་བཀྲིན་སྩལ་གནང་མཛད་པ་མ་ཟད། བོད་ཀྱི་ཁྱིམ་མཚེས་ལ་དྭགས་དང་ཧཱི་མ་ལའི་མི་རིགས་ཚོས་སེམས་བཟང་པོ་བྱས་ཚེ།  བོད་ནང་ཤུགས་རྐྱེན་ཆེན་པོ་བྱུང་གི་ཡོད་པ་དང།   བོད་བསྟན་སྲིད་ལའང་ཕན་ཐོགས་ཆེན་པོ་ཡོད་སྐོར་དང་།  ལྷག་པར་འཛམ་གླིང་ཞི་བདེ་ཡོང་ཐབས་སུའང་དོན་དམ་གྱི་ཕན་ཐོགས་ཡོད་པའི་ལམ་སྟོན་སོགས་ཀྱང་བཀའ་དྲིན་སྩལ་གནང་མཛད་ཡོད། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་ནས་འགྲོ་བ་མི་ཡིན་ཕྱིན་ཆད་སྤྱི་ཚོགས་ལ་བསྟུན་དགོས་པ་དང་།    སེམས་པ་བཟང་པོ་ཀུན་ནས་བླངས་ཏེ་གྲོགས་པོའི་འདུ་ཤེས་ཐོག་གནས་ཐུབ་ཚེ་ཪང་གཞན་ཀུན་གྱི་མི་ཚེ་སྐྱིད་པ་ཡོང་རྒྱུ་དང་།    རྒྱུན་དུ་ང་ཚོས་འཛམ་གླིང་ཞི་བདེ་འདོད་ཀྱི་ཡོད་ཀྱང་།  སེམས་ནང་ང་རྒྱལ་དང་ཕྲག་དོག་འཇིགས་སྣང་བཅས་ལ་བརྟེན་པས་འཛམ་གླིང་ཞི་བདེ་ཡོང་གི་མེད་པར།   ཞི་བདེའི་རྩ་བ་དེ་སེམས་བཟང་པོ་བྱ་རྒྱུ་དེ་ཡིན་པའི་ལམ་སྟོན་བཀྲིན་སྩལ་གནང་མཛད་ཡོད།༸གོང་ས་༸སྐྱབས་མགོན་ཆེན་པོ་མཆོག་ནས་སྐབས་དེར་ད་དུང་།   བོད་རྒྱ་ཆེའི་མང་ཚོགས་ནས་༸གང་ཉིད་ལ་རེ་བ་དང་ཡིད་ཆེས་བློ་འཁེལ་གནང་གི་ཡོད་པ་ལྟར།  ངོས་རང་སེམས་པ་བཟང་པོ་དང་དེའི་གཞི་རྩར་སྙིང་སྟོབས་ཡོད་སྐོར་དང་། བོད་མི་ཚོར་གཞི་རྩའི་དཀའ་ངལ་ཆེན་པོ་ཞིག་ཡོད་ཀྱང་སེམས་པ་བཟང་པོ་ཀུན་ནས་བླངས་པའི་སྙིང་སྟོབས་ལྡན་ཚེ་ང་ཚོའི་གནས་སྟངས་རིང་མིན་འགྱུར་བ་འགྲོ་ངེས་པ་སོགས་ཀྱི་སྐོར་བཀའ་གནང་སྟེ།   ཀུན་ལ་བརྩེ་སེམས་བྱ་རྒྱུ་དེ་འཛམ་གླིང་ཞེ་བདེའི་རྩ་བ་ཡིན་པ་བཅས་ཀྱི་ལམ་སྟོན་ཡང་བཀའ་སྩལ་མཛད་ཡོད།༸གོང་ས་༸སྐྱབས་མགོན་ཆེན་པོ་མཆོག་གིས་དུས་རབས་བདུན་པ་དང་བརྒྱད་པ་ནས་བྱུང་པའི་བོད་ཀྱི་སྐད་ཡིག་དང་ནང་པའི་ཆོས་བཅས་ཧ་ཅང་ཕན་ཐོགས་ཡོད་པ་ཞིག་དང་།    སྐད་ཡིག་གཞན་ལ་བརྟེན་མི་དགོས་པར་བཀའ་འགྱུར་དང་བསྟན་འགྱུར་གཙོས་ཟབ་པ་དང་རྒྱ་ཆེ་བའི་ལམ་སྟོན་པའི་ཕྱག་དཔེ་སྟོང་ཕྲག་མང་པོ་དེ་དག།   བཙན་བྱོལ་བོད་མི་ཚོས་སྐུ་ལས་བསྐྱོན་པའི་འོག་གདན་ས་གསུམ་གྱི་གཙོས་ཆོས་སྡེ་ཚོས་རྩ་བ་གསར་འཛུགས་ཐུབ་པའི་སྐོར་བཀའ་སྩལ་གནང་པ་མ་ཟད།   དེང་སྐབས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་བཅས་ལ་འཛམ་གླིང་ཁྱོན་ཡོངས་ནས་དོ་སྣང་བྱེད་ཀྱི་ཡོད་པའི་སྐོར་སོགས་བཀའ་གནང་ཡོད།  ལ་དྭགས་པ་ཚོས་རྒྱུན་དུ་རིག་ལམ་གྱི་ཐོག་ནས་གཞུང་ཆེན་ཁག་ལ་དོ་སྣང་གནང་དགོས་པའི་ལམ་སྟོན་བཀའ་སྩལ་དང་བསྟུན།   དེ་རིང་གྱི་ཆོས་འབྲེལ་དངོས་གཞི་སྤྱོད་འཇུག་ཆེན་མོའི་མཛད་པོ་རྒྱལ་སྲས་ཆེན་པོ་ཞི་བ་ལྷའི་མཛད་རྣམ་སྙིང་བསྡུས་ཤིག་བཀའ་གནང་སྟེ།   བྱང་ཆུབ་སེམས་ཀྱི་ཕན་ཡོན་བསྟན་པའི་ལེའུ་དང་པོ་ངོ་སྤྲོད་སྩལ་གནང་མཛད་ཡོད།དེ་རིང་གྱི་ཉིན་དང་པོའི་ཆོས་འབྲེལ་དེའི་སྐབས་ལ་དྭགས་ཁུལ་གྱི་ས་གནས་མང་པོ་ནས་དད་ལྡན་སྟོང་ཕྲག་མང་པོ་ཆེད་ཕེབས་གནང་འདུག་པ་མ་ཟད།   རྒྱལ་ཁབ་འདྲ་མིན་ནས་ཕེབས་པའི་ཕྱི་རྒྱལ་མི་རིགས་དང་།   དེ་བཞིན་རྒྱ་གར་གྱི་ས་ཕྱོགས་གང་ས་ནས་བོད་མི་ཆོས་ཞུ་བ་ཡང་མང་པོ་ཕེབས་ཡོད་པ་བཅས་ཉིན་དང་པོའི་ཆོས་འབྲེལ་དེར་མི་གྲངས་ཁྲི་གསུམ་ལྷག་འདུ་འཛོམས་བྱུང་ཡོད་པའི་ཚོད་དཔག་གནང་གི་འདུག

ཁ་སང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཞི་བ་ཚལ་ཕོ་བྲང་དགེ་འཕེལ་གླིང་ནས་ཟླ་བ་འདིའི་ཕྱི་ཚེས་ ༢༥ ཉིན་ Northern Ireland གྱི་སྲིད་བློན་ཐེངས་དང་པོ་དང་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ Lord David Trimble མཆོག་སྙུང་གཞི་རྐྱེན་པས་དགུང་གྲངས་ ༧༧ ཐོག་དགོངས་པ་རྫོགས་པར་ཐུགས་ཕམ་དང་སྦྲགས། དམ་པ་དེ་ཉིད་ཀྱི་བཟའ་ཟླའི་མཚན་ཐོག་ཏུ་བསྔོ་སྨོན་དང་ཤུལ་ལུས་ནང་མི་རྣམས་ལ་ཐུགས་གསོའི་གསུང་འཕྲིན་སྩལ་འདུགམགོན་པོ་༸གང་ཉིད་མཆོག་གིས་གསུང་འཕྲིན་ནང། དམ་པ་ཁོང་བློ་སྟོབས་ཆེན་པོ་དང་དངོས་ཡོད་ཀྱི་ལམ་ནས་གཉིས་ཕན་གྱི་ཐབས་ལམ་ཞིག་བཙལ་ནས་ Northern Ireland ནང་ཞི་བདེ་བསྐྲུན་རྒྱུ་ཙམ་མ་ཟད། ཕྱོགས་འགལ་ཚོགས་པའི་དཀའ་ངལ་རྣམས་གྲོས་མོལ་དང་རྒྱལ་ཁབ་ཕན་ཚུན་དབར་འབྲེལ་ལམ་བརྒྱུད་སེལ་ཐུབ་པའི་ཡིད་ཆེས་བརྟན་པོ་གནང་མཁན་ཞིག་ཡིན་སྟབས། Northern Ireland  གི་དཀའ་ངལ་སེལ་རྒྱུའི་སླད་དམ་པ་དེ་ཉིད་ཀྱིས་ཐུགས་འགན་གཙོ་བོ་བཞེས་ཏེ་གྲོས་མཐུན་གན་རྒྱ་མཚན་རྟགས་བཀོད་ཐུབ་པ་བྱུང་བ་ནི་ང་ཚོའི་དུས་སྐབས་འདིར་ཞི་བདེ་བསྐྲུན་ཐབས་ཀྱི་མིག་དཔེ་ཞིག་ཆགས་ཡོད་པ་ངོས་བཞེས་མཛད་ཀྱི་ཡོད་ཅེས་བཀའ་སྩལ་འདུགད་དུང་མགོན་པོ་༸གང་ཉིད་མཆོག་གིས་དམ་པ་ཁོང་དང་ཐེངས་ཁ་ཤས་མཇལ་འཕྲད་གནང་མྱོང་ཡོད་པ་མ་ཟད། རྒྱུན་གཏན་ནས་དམ་པ་ཁོང་གིས་ Northern Ireland ནང་ཞབས་འདེགས་རླབས་ཆེན་ཞུས་གནང་བར་ཡིད་སྨོན་མཛད་ཀྱི་ཡོད་ཅེས་བཀའ་སྩལ་དང་སྦྲགས། གལ་ཏེ་ང་ཚོས་འགྲོ་བ་མི་ཚང་མ་གཅིག་གྱུར་གྱི་འདུ་ཤེས་བཟུང་ནས་ཕན་ཚུན་བསམ་ཤེས་དང་། བརྩི་བཀུར། འདུམ་འགྲིག་བྱས་ཏེ་དཀའ་ངལ་རྣམས་སེལ་ཐབས་བྱེད་ཐུབ་ན། དེ་ནི་དམ་པ་ Lord David Trimble ཁོང་ལ་རྗེས་དྲན་བྱེད་སྟངས་འོས་ཤོས་དེ་ཆགས་ངེས་ཡིན་པ་བཀའ་སྩལ་ཡོད།