བོད་མིའི་སྒྲིག་འཛུགས།

བོད་མི་མང་སྤྱི་འཐུས་ཚོགས་གཙོ་མཆོག་གིས་ཨ་རིའི་གྲོས་ཚོགས་འཐུས་མི་ཁག་ཅིག་དང་མཇལ་འཕྲད་གནང་སྟེ་བོད་དོན་སྙན་གསེང་ཞུས་འདུག དེའང་སྤྱི་འཐུས་ཚོགས་གཙོ་མཆོག་ཨ་རིའི་ནིའུ་ཡོག་གྲོང་ཁྱེར་ནང་གཞུང་འབྲེལ་ཕྱོགས་བསྐྱོད་ལེགས་གྲུབ་ཀྱིས་ད་ཆ་རྒྱལ་ས་ཝ་ཤིང་ཊོན་ནང་ཕྱོགས་ཕེབས་གནང་བཞིན་པ་དང་འབྲེལ། ཁ་ཉིན་ཚེས་ ༡༢ ཉིན་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་དང་ནིའུ་ཡོག་ས་ཁུལ་གྱི་གྲོས་ཚོགས་འོག་མའི་འཐུས་མི་གཅིག་ལྕོགས་ཡིན་པ་སྐུ་ཞབས་ Eliot Engel ལགས་དང་ཨ་རིའི་གཞུང་འཛིན་སྤྱི་མཐུན་ཚོགས་པའི་གྲོས་ཚོགས་འཐུས་མི་རྒན་གྲས་སྐུ་ཞབས་ Jim Sensenbrenner ལགས། དེ་བཞིན་གྲོས་ཚོགས་དཀྱིལ་ཤར་ཡུལ་གྲུ་དང་ལྷོ་ཨེ་ཤི་ཡའི་མངའ་ཁུལ་ལས་དོན་ཚན་པའི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ Steve Chabot ལགས་བཅས་ཀྱི་ལས་ཁུངས་སུ་བཅར་ནས་མཇལ་འཕྲད་གནང་འདུག སྐབས་དེར་སྤྱི་འཐུས་ཚོགས་གཙོ་མཆོག་དང་ལྷན་དུ་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཆེད་བཅར་ཞུས་འདུག ལྷན་རྒྱས་ཀྱི་མཇལ་མོལ་དེའི་ཐོག་སྤྱི་འཐུས་ཚོགས་གཙོ་མཆོག་གིས་གཙོ་བོ་བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་དང་སྦྲགས། རྒྱ་གཞུང་གིས་བོད་མིའི་ཆབ་སྲིད་དང་ཆོས་དད་རང་དབང་ཐོག་དམ་བསྒྲགས་ཤུགས་ཆེ་བྱེད་བཞིན་ཡོད་པ་མ་ཟད། བོད་ཀྱི་ཁོར་ཡུག་དང་བོད་མིའི་ཐུན་མིན་རིག་གཞུང་དང་བཅས་པ་རྩ་མེད་བཏང་དང་གཏོང་བཞིན་པ་གསལ་བཤད་གནང་སྟེ། གྲོས་ཚོགས་འཐུས་མི་རྣམས་ནས་བོད་དོན་ཐོག་སྔར་བཞིན་རྒྱབ་སྐྱོར་མུ་མཐུད་གནང་དགོས་པའི་རེ་འདུན་བཏོན་འདུག ལྷག་དོན་རྒྱ་གཞུང་ལ་བོད་ཀྱི་གནད་དོན་སེལ་ཆེད་དབུ་མའི་ལམ་གྱི་སྲིད་བྱུས་གཞི་རྩར་བཞག་པའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་འབྲེལ་མོལ་བསྐྱར་གསོ་གནང་དགོས་པར་འབོད་སྐུལ་ཞུས་འདུག རྩ་བའི་སྤྱི་འཐུས་ཚོགས་གཙོ་མཆོག་ཟླ་བ་འདིའི་ཚེས་ ༡༡ ཉིན་ཨ་རིའི་རྒྱལ་ས་ཝ་ཤིང་ཊོན་དུ་ཕེབས་འབྱོར་གྱིས་ཁུལ་དེར་སང་ཉིན་བར་ལས་འཆར་བསྐྱང་གནང་གི་འདུག་པ་མ་ཟད། ཚེས་ ༡༥ ཉིན་ San Francisco གྲོང་ཁྱེར་དང་ཚེས་ ༡༧ ཉིན་ཡུ་ཊ་མངའ་སྡེའི་རྒྱལ་ས་ Salt Lake City ནང་ཕེབས་གནང་རྗེས་ཚེས་ ༡༨ ཉིན་རྒྱ་གར་གྱི་རྒྱལ་ས་ལྡི་ལིར་ཕྱིར་ཕེབས་གནང་གི་འདུག

ཁ་ཉིན་ཕྱི་ཟླ་ ༡༢ ཚེས་ ༡༠ ཉིན་མོ་སྟེ་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་བསྟུན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྒྱ་རིགས་མང་གཙོ་དོན་གཉེར་བ་སྐུ་ཞབས་ Liu Xiabo ལགས་ཀྱི་རྗེས་དྲན་རྩོམ་ཡིག་མཛད་སྒོར་ལྷན་ཞུགས་ཀྱིས་དམ་པ་དེ་ཉིད་ཀྱི་རླབས་ཆེན་མཛད་རྗེས་ལ་བསྔགས་བརྗོད་གནང་འདུག དེ་ཡང་སྐུ་ཞབས་ Liu Xiabo ལགས་དམ་པ་དེ་ཉིད་ཀྱི་རྗེས་དྲན་རྩོམ་ཡིག་གི་མཛད་སྒོ་དེ་ཨ་རིའི་ནིའུ་ཡོག་གྲོང་ཁྱེར་དུ་ཕྱི་སྡོད་རྒྱ་རིགས་མང་གཙོ་དོན་གཉེར་བ་ཁག་ཅིག་གིས་གོ་སྒྲིག་འོག་ཚོགས་འདུག་པ་དང་། སྐབས་དེར་རྒྱ་རིགས་མཁས་དབང་ཁག་ཅིག་དང་མང་གཙོ་དོན་གཉེར་བ། དེ་བཞིན་བོད་མིའི་ཕྱོགས་ནས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས། རྒྱ་རིགས་འབྲེལ་མཐུད་པ་ཀུན་དགའ་བཀྲིས་ལགས་བཅས་ལྷན་ཞུགས་གནང་འདུག མཛད་སྒོའི་ཐོག་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་དམ་པ་ཁོང་ནི་རྒྱ་ནག་ནང་འགྲོ་བ་མིའི་ཐོབ་ཐང་རྩོད་ལེན་གནང་མཁན་དང་འདི་བཞིན་རྒྱ་གཞུང་ལ་གནད་དོན་དེའི་ཐོག་གདོང་ལེན་གྱིས་ཕྱག་ལས་བསྟུད་མར་གནང་མཁན་གྱི་སྐྱེས་བུ་གཉིས་ལྡབ་ཅན་ཞིག་ཡིན་པར་ཆེ་བསྟོད་ཞུས་འདུག་པ་དང་། ལྷག་དོན་དམ་པ་ཁོང་སྐུ་འཚོ་བཞུགས་མེད་ཀྱང་ཁོང་གིས་རྒྱ་ནག་ནང་བརྟན་ལྷིང་དང་འཆམ་མཐུན་གྱི་སྤྱི་ཚོགས་ཤིག་བསྐྲུན་ཆེད་ཡུན་རིང་ནས་འབད་བརྩོན་གནང་པའི་དམིགས་ཡུལ་དེ་དག་ཐོག་ང་ཚོས་མུ་མཐུད་འབད་བརྩོན་གནང་དགོས་གལ་ཡིན་པར་སྐུལ་མ་གནང་འདུག ད་རེས་ཕྱི་སྡོད་རྒྱ་རིགས་མང་གཙོ་དོན་གཉེར་བ་ཁག་ཅིག་གིས་རྐང་འགན་བཞེས་ཐོག་སྐུ་ཞབས་ལིའུ་ཞའོ་པའོ་རླབས་ཆེན་མཛད་རྗེས་ལ་རྗེས་དྲན་ཞུ་ཕྱིར་རྩོམ་དེབ་ཕྱོགས་སྒྲིག་གནང་བར་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ཀྱང་བསྔགས་བརྗོད་ཡོད་པ་གསུངས་འདུག་པ་དང་ཆབས་ཅིག ཁོང་གི་སྐུ་ཟླ་ལྕམ་ Liu Xia ལགས་ལ་སེམས་གསོ་དང་ཁོ་མོའི་སེམས་སྡུག་རྣམས་རིམ་བཞིན་སེལ་ཐུབ་པར་སྨོན་འདུན་ཞུས་ཡོད་པ་རེད། བྱང་ཨ་རིའི་བོད་ཀྱི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ནས་ཀྱང་སྐུ་ཞབས་ Liu Xiaobo ལགས་ཀྱི་མཛད་རྗེས་ལ་ཆེ་བསྟོད་ཀྱིས་རྩོམ་ཡིག་ཕྱོགས་སྒྲིག་གནང་མཁན་ཀུན་ལ་ཡི་རང་བསྔགས་བརྗོད་གནང་པ་དང་འབྲེལ། སྐུ་ཞབས་ཁོང་གིས་མང་གཙོ་དང་འགྲོ་བ་མིའི་ཐོབ་ཐང་རྩོད་ལེན་གནང་རྒྱུར་ཕྱག་ལས་རླབས་ཆེན་གནང་པ་དེ་དག་རྒྱ་ནག་དང་བོད་ནང་ཙམ་མིན་པར་འཛམ་གླིང་སྤྱིའི་ཞི་བདེ་ལ་ཕན་པའི་ཐུགས་རེ་མཛད་ཡོད་སྟབས། ང་ཚོས་དམ་པ་ཁོང་གི་དགོངས་བཞེས་དང་རླབས་ཆེན་གྱི་མཛད་རྗེས་མུ་མཐུད་ནས་མཇུག་སྐྱོང་གནང་གལ་ཡིན་པ་གསུངས་འདུག

  ཁ་སང་ཕྱི་དྲོ་བོད་རང་བཙན་སློབ་ཕྲུག་ཚོགས་པའི་ཚོགས་མི་ཁག་ཅིག་གིས་རྒྱལ་ས་ལྡི་ལིའི་ Janpath ཁུལ་དུ་རྟེན་གཞི་བྱས་པའི་རྒྱ་གཞུང་གི་ཕྱི་སྲིད་བློན་ཆེན་  Wang Yi  སྡོད་གནས་ Imperial  མགྲོན་ཁང་གི་གཡས་གཡོན་གང་སར་དམ་དྲག་ཤུགས་ཆེ་བྱེད་བཞིན་ཡོད་པར་ལྟོས་མེད་ཀྱིས་ལས་འགུལ་བ་ཕོ་མོ་མི་གྲངས་དགུས་རིང་ཚད་ཧྤེ་ཊི་བཅུ་ལྷག་ཡོད་པའི་བོད་ལ་རང་དབང་སྤྲོད་དགོས་ཟེར་བའི་རས་བྱང་ཞིག་བཤམས་པ་མ་ཟད།  ལས་འགུལ་བ་དེ་དག་གིས་ Wang Yi  སྡོད་གནས་མགྲོན་ཁང་གི་ཕྱི་ཕྱོགས་སུ་ངོ་རྒོལ་སྐད་འབོད་སོགས་ཀྱང་གནང་སོང་། རྒྱ་ནག་གི་ཕྱི་སྲིད་བློན་ཆེན་  Wang Yi  ད་རེས་རྒྱལ་ས་ལྡི་ལིའི་ནང་རྒྱ་གར་དང་ཨུ་རུ་སུ། རྒྱ་ནག་བཅས་རྒྱལ་ཁབ་གསུམ་གྱི་ལྷན་ཚོགས་ཤིག་གི་ཆེད་ཁ་ཉིན་ཕྱི་དྲོ་རྒྱལ་ས་ལྡི་ལིར་འབྱོར་ཡོད་པ་དང་། བོད་རང་བཙན་སློབ་ཕྲུག་ཚོགས་པས་ཁོ་པ་གནམ་ཐང་ནས་མགྲོན་ཁང་དུ་ཡོང་སྐབས་བོད་ལ་རང་དབང་དགོས་པའི་འཕྲེད་དར་འཕྱར་ནས་སྣེ་ལེན་ཞུས་ཡོད་པ་མ་ཟད།  བོད་ཀྱི་གཞོན་ནུ་ལྷན་ཚོགས་ཀྱིས་ཀྱང་རྒྱལ་ས་ལྡི་ལིའི་ India Gate  ཁུལ་དུ་ Flash Mob རྔམ་སྟོན་གྱི་ལས་འགུལ་སྤེལ་བའི་བརྒྱུད་བོད་མིའི་མངོན་འདོད་ཁག་གསལ་སྟོན་གནང་ཡོད་པ་རེད།  ཁ་སང་ཕྱི་དྲོ་ Imperial  མགྲོན་ཁང་གི་མདུན་དུ་ས་གནས་སྐོར་སྲུང་བས་ཕར་འགྲོ་ཚུར་འོང་གི་མི་འགྲོ་ཁག་ལ་བཀག་འགོག་བྱས་འདུག་ཀྱང་།   ལས་འགུལ་བ་དེ་དག་ Wang Yi  སྡོད་སའི་མགྲོན་ཁང་གི་ཁ་སྤྲོད་ཁང་པ་ཞིག་གི་བར་ནས་ཆུ་ཚོད་  ༦༌༣༠ ཙམ་ལ་ཐོག་རྒྱག་ཡོང་སྟེ་ཉེ་འཁྲིས་སུ་ཡོད་པའི་གསང་སྤྱོད་ཞིག་གི་ཐོག་ཁར་འཛེགས་ཏེ་བོད་མིར་རང་དབང་དགོས་ཟེར་བའི་འབོད་ཚིག་འཁོད་པའི་རས་བྱང་བཤམ་སྟོན་གནང་པ་མ་ཟད་བོད་མིར་རང་དབང་སྤྲོད་དགོས། ༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་སྐལ་བརྒྱར་བརྟན་པའི་སྐད་འབོད་སོགས་གནང་ཡོད་པ་རེད། ལས་འགུལ་བ་དེ་དག་ཁོངས་སུ་བོད་རང་བཙན་སློབ་ཕྲུག་ཚོགས་པའི་རྒྱ་གར་རྒྱལ་ཡོངས་ཀྱི་འགན་འཛིན་བསྟན་འཛིན་ཚེ་ལྷ་ལགས་ཀྱང་མཉམ་ཞུགས་གནང་འདུག ས་གནས་སྐོར་སྲུང་བས་འཛིན་བཟུང་བྱས་པའི་ལས་འགུལ་བ་དེ་དག་ད་ལྟའི་ཆར་ Malcha Marg སྐོར་སྲུང་ལས་ཁུངས་སུ་དོ་དམ་འོག་གནས་ཡོད་པ་རེད།

བོད་མིའི་སྒྲིག་འཛུགས་བཀའ་ཤག་གི་བཀའ་འབྲེལ་ལྟར་ཕྱི་ལོ་ ༢༠༡༧ ལོ་འདི་བོད་དོན་ལས་འགུལ་གྱི་ལོར་སྲུང་བརྩི་ཞུ་བཞིན་པའི་ཁྲོད་ཁ་སང་ཕྱི་ཟླ་ ༡༢ ཚེས་ ༡༠ ཉིན་ཨ་རིའི་ནིའུ་ཡོག་གྲོང་ཁྱེར་དུ་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་དུ་འཚེ་མེད་ཞི་བ་དང་བོད་དོན་གདུང་སེམས་མཉམ་བསྐྱེད་ཀྱི་གཞི་རྒྱ་ཆེ་བའི་ལས་འགུལ་ཞིག་སྤེལ་འདུག འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཡོངས་ཁྱབ་བསྒྲགས་གཏམ་སྤེལ་ནས་ལོ་ངོ་ ༦༩ འཁོར་བ་དང་ལྷག་དོན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༢༨ འཁོར་བའི་སྐལ་བཟང་གི་དུས་ཆེན་གཉིས་འཛོམས་ཐོག་གྲོང་ཁྱེར་ནིའུ་ཡོག་ཏུ་བོད་མི་སྟོང་ཕྲག་བརྒལ་བ་ལྷན་ཞུགས་ཀྱིས་བོད་ནང་འགྲོ་བ་མིའི་ཐོབ་དང་ཆོས་དད་རང་དབང་དགོས་པར་ཞི་རྒོལ་གྱི་ལས་འགུལ་གཞི་རྒྱ་ཆེ་བ་ཞིག་སྤེལ་འདུག སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་དབུས་པའི་བྱང་ཨ་རིའི་བོད་ཀྱི་སྐུ་ཚབ་དོན་གཅོད་དང་ས་གནས་སྤྱི་འཐུས། དེ་བཞིན་མཛད་སྒོའི་སྐུ་མགྲོན་དུ་མེས་པོ་དམ་པ་གཱན་དྷིའི་ཚ་བོ་སྐུ་ཞབས་ Rajmohan Gandhi མཆོག་དང་རྒྱ་རིགས་ཁྲིམས་རྩོད་པ་དང་རང་དབང་འཐབ་རྩོད་པ་གྲགས་ཅན་སྐུ་ཞབས་ Chen Guangcheng ལགས། གཞན་ཡང་ཨ་རི་དང་ཁེ་ན་ཌ་སོགས་ནས་བོད་མི་སྟོང་ཕྲག་ལྷག་བ་མཉམ་ཞུགས་གནང་འདུག ལས་འགུལ་དེའི་ཐོག་སྲིད་སྐྱོང་མཆོག་དང་སྤྱི་འཐུས་ཚོགས་གཙོ་མཆོག་རྣམ་གཉིས་ནས་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་སྤྱི་དང་སྒོས་བོད་མི་ས་ཡ་དྲུག་ལ་བྱམས་བརྩེའི་གཟིགས་པ་ཆེན་པོས་ད་བར་བཀའ་དྲིན་བསྐྱངས་དང་སྐྱོང་མུས་ཀྱི་མཛད་རྗེས་ལ་བཀའ་དྲིན་རྗེས་དྲན་ཞུས་པ་དང་སྦྲགས། བོད་ཀྱི་གནད་དོན་འདི་བོད་མི་གཅིག་པོའི་གནད་དོན་ཞིག་མིན་པར་རྒྱལ་སྤྱིའི་གནད་དོན་ཞིག་ཡིན་སྟབས་བོད་མིའི་འཚེ་མེད་ཞི་བའི་ཐབས་ལམ་ཐོག་ནས་བོད་དོན་བདེན་མཐའ་སེསལ་ཐབས་བྱེད་བཞིན་པ་དེས་རྒྱལ་སྤྱིའི་སྤྱི་ཚོགས་ལ་བརྡ་ལན་ཞིག་སྤྲོད་བཞིན་ཡོད་པས་རྒྱལ་ཚོགས་ནས་ངེས་པར་དུ་བོད་མིར་རྒྱབ་སྐྱོར་གནང་དགོས་པ་དང་ལྷག་དོན་བོད་རྒྱ་འབྲེལ་མོལ་བསྐྱར་གསོ་ཡོང་སླད་རྒྱ་གཞུང་ལ་གནོན་ཤུགས་ནན་པོ་སྤྲོད་དགོས་པར་ཚོར་ཤུགས་ཆེན་པོས་རེ་འདུན་བཏོན་འདུག ཁ་སང་སྔ་དྲོ་གསུང་བཤད་ཀྱི་ལས་རིམ་ཁག་གྲུབ་རྗེས་ལས་འགུལ་བ་རྣམས་རྒྱལ་ཚོགས་ཀྱི་ལས་ཁུངས་མདུན་ནས་འགོ་འཛུགས་ཀྱིས་ཁུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་བར་གོམ་བགྲོད་གནང་འདུག་པ་དང་གོམ་བགྲོད་པ་རྣམས་ཀྱི་ཕྱག་ཏུ་བོད་དོན་དང་འགྲོ་བ་མིའི་ཐོབ་ཐང་ལ་རྒྱབ་སྐྱོར་གནང་དགོས་པ་བཅས་ཀྱི་འབོད་ཚིག་འཁོད་པའི་འཕྲེད་དར་འཕྱར་བ་དང་། ལྷག་དོན་བོད་མི་ ༡༥༠ ཡིས་རང་ལུས་མེར་སྲེག་གནང་སྟེ་རྒྱ་གཞུང་གིས་དབང་བསྒྱུར་ལ་ཞི་རྒོལ་བྱས་ཡོད་པའི་པུར་སྒམ་བཅས་འཁུར་ནས་རྒྱ་གཞུང་ལ་ཞི་རྒོལ་གནང་འདུག་པ་མ་ཟད། རྒྱ་ནག་གཞུང་ཚབ་ཁང་གི་མདུན་དུ་འབྱོར་སྐབས་རྒྱ་རིགས་མཁས་དབང་གཉིས་ནས་ཀྱང་རྒྱ་གཞུང་གིས་དབང་བསྒྱུར་འོག་བོད་མི་རྣམས་ལ་ཐོབ་ཐང་འདྲ་མཉམ་མེད་པ་དང་༸གོང་ས་མཆོག་ལ་རྒྱ་རིགས་མང་ཚོགས་ཚོའི་ངོས་ནས་འཚེ་མེད་ཞི་བའི་དབུ་ཁྲིད་ཞིག་ལ་ངོས་འཛིན་ཞུ་བཞིན་ཡོད་སྐོར་གསུང་བཤད་སོགས་གནང་ནས་ལས་འགུལ་མཇུག་སྒྲིལ་གནང་ཡོད་པ་རེད།

བཙན་བྱོལ་བོད་མིའི་བསྟི་གནས་བཞུགས་སྒར་རྡ་རམ་ས་ལར་བོད་མིའི་སྒྲིག་འཛུགས་ཀྱི་གོ་སྒྲིག་འོག་ཁ་སང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སྐུ་མགྲོན་གཙོ་བོ་རྒྱ་གར་གྲོས་ཚོགས་འོག་མའི་གཞུང་འཛིན་ཚོགས་པའི་ BJP འཐུས་མི་སྐུ ་ཞབས་ Ram Swaroop Sharma མཆོག་དང། མང་གཙོ་ཀ་བ་གསུམ་གྱི་མཛད་གཙོ་རྣམ་པ་གཙོས་པའི་རྡ་ས་ཁུལ་གྱི་སེར་སྐྱ་མང་ཚོགས་སོགས་ལྷན་འཛོམས་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞེ་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༢༨ འཁོར་བར་གཞུང་འབྲེལ་མཛད་སྒོ་ཚོགས་ཡོད་སོང། སྐབས་དེར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཨཱ་ཙཱརྱ་ཡེ་ཤེས་ཕུན་ཚོགས་མཆོག་གིས་བོད་མིི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་ད་བར་མགོན་པོ་༸གང་ཉིད་མཆོག་གིས་བོད་འབངས་སྤྱི་དང་ཡང་སྒོས་མཐའ་ཡས་པའི་སྐྱེ་འགྲོའི་ཕན་བདེའི་སླད་དུ་མཛད་འཕྲིན་བསྐྱངས་དང་སྐྱོང་བཞིན་པར་བཀྲིན་རྗེས་དྲན་ཞུས་པ་དང། ཁྱད་པར་དུ་ད་ལྟའི་དུས་སྐབས་འདིར་རྒྱ་ནག་གཞུང་གིས་ཕྱི་ཚུལ་དུ་འདྲ་ཆགས་པའི་རྣམ་འགྱུར་བསྟན་ཡང་དོན་ཐོག་བོད་ནང་གི་བོད་མིའི་འགྲོ་བ་མིའི་ཐབ་ཐང་དང་ས་གནས་མང་ཚོགས་ཀྱི་གནས་སྟངས་ལ་བཟང་ཕྱོགས་ཀྱི་འགྱུར་བ་གང་ཡང་ཕྱིན་མེད་པ་ལུང་འདྲེན་དང་སྦྲགས། ཉེ་བའི་ཆར་སྲིད་འཛིན་ཞི་ཅིང་ཕིང་གི་གོ་གནས་དང་དབང་ཚད་བླ་ན་མེད་པ་ཆགས་སྐབས་འདིར་སྲིད་འཛིིིན་ཞི་ཅིང་ཕིང་ནས་གུ་ཡངས་ཀྱི་སྲིད་བྱུས་བཟུང་སྟེ་རྒྱལ་སྤྱིའི་ནང་རྒྱ་ནག་ལ་ཆེ་མཐོང་རག་ཐབས་དང་། ལྷག་དོན་བོད་མི་རིགས་ཀྱི་མངོན་འདོད་ལ་བདག་བཟུང་གིས་དཀའ་རྙོག་སེལ་ཐབས་གནང་དགོས་གལ་ཆགས་ཡོད་པ་གསུངས་སོང། དེ་བཞིན་སྤྱི་འཐུས་ལྷན་ཚོགས་ཀྱི་ངོས་ནས་གཞིས་བཞུགས་རྒྱལ་གཅེས་དཔའ་བོ་དཔའ་མོ་འདས་གསོན་རྣམས་ཀྱི་ལྷག་བསམ་དང་། དཔའ་མཛངས་སྙིང་སྟོབས། བླ་ན་མེད་པའི་མཛད་རྗེས་རྣམས་ལ་གདུང་སེམས་མཉམ་བསྐྱེད་ཀྱི་ཆེ་བསྟོད་ཞུས་པ་དང་འབྲེལ།  བཙན་བྱོལ་བོད་མི་རྣམས་ནས་བོད་མིའི་མཐུན་ལམ་དང་ཆིག་སྒྲིལ་རྒྱུན་གནས་ཡོང་ཐབས་སུ་ཚང་མས་ཡིད་གཟབ་ཀྱིས་རྟག་ཏུ་འབད་བརྩོན་ལྷོད་མེད་གནང་དགོས་པ་ལས། དེ་མིན་སྤྱི་ཚོགས་དྲ་ལམ་ཁག་ཏུ་དགྲ་དགའ་གཉེན་སྡུག་གི་ལས་བོད་མིའི་མཐུན་སྒྲིལ་ལ་གཏོར་སྐྱོན་འགྲོ་གཞིའི་ཐལ་སྐྱོན་རིགས་རྩ་བ་ནས་མ་ཤོར་བ་དགོས་པར་གཞེན་སྐུལ་ནན་པོ་གནང་ཡོད་པ་རེད། བོད་མིའི་སྒྲིག་འཛུགས་ཀྱི་སྲིད་ཚབ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་རྒྱ་དམར་གཞུང་གིས་བོད་བཙན་བཟུང་བྱས་པ་ནས་ད་བར་བོད་མིའི་ཐོག་དྲག་གནོན་དང་གཡོ་ཐལ་གྱི་སྲིད་བྱུས་རིམ་པ་ལག་བསྟར་དང་། ཕྱོགས་གཞན་ནས་དཔལ་འབྱོར་ལྷུག་གཏོང་གི་སྲིད་བྱུས་ཤིག་ཀྱང་འཛིན་ཁུལ་བྱེད་ཀྱི་ཡོད་ནའང་བོད་མི་ཚོའི་བློ་ནམ་ཡང་འགུག་ཐབས་བྲལ་བ་ཞིག་ཡིན་པར་བརྟེན། རྒྱ་གཞུང་གིས་དབུ་མའི་ལམ་གྱི་སྲིད་བྱུས་གཞིར་བཞག་༸གོང་ས་མཆོག་གི་༸སྐུ་ཚབ་དང་ལྷན་དུ་གྲོས་མོལ་བསྐྱར་མཐུད་དགོས་པར་འབོད་སྐུལ་ཞུས་པ་དང་ཆབས་ཅིག ང་ཚོས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ལས་རང་བཙན་རྩོད་སྒྲུབ་བྱེད་ཀྱི་མེད་པ་ནན་བརྗོད་གནང་སོང། ལྷག་དོན་འཛིན་སྐྱོང་བཀའ་ཤག་ནས་ལོ་རྗེས་མའི་ནང་བོད་མི་རྣམས་བཙན་བྱོལ་དུ་འགྱར་ནས་མི་ལོ་ ༦༠ འཁོར་གྱི་ཡོད་སྟབས། རྒྱ་གར་གཙོ་འགྱུར་བོད་མི་གནས་ཡུལ་རྒྱལ་ཁབ་སོ་སོའི་ནང་གི་གཞུང་དམངས་གཉིས་ལ་བོད་མི་རིགས་ཀྱི་གཉན་འཕྲང་ཆེ་བའི་དུས་སྐབས་འདིར་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུ་རྒྱུའི་ལས་འགུལ་གཞི་རྒྱ་ཆེ་བ་ཞིག་སྤེལ་རྒྱུ་ཡིན་ཞེས་གསུངས་སོང། དེ་བཞིན་མཛད་སྒོའི་སྐུ་མགྲོན་གཙོ་བོ་རྒྱ་གར་གྲོས་ཚོགས་འོག་མའི་གཞུང་འཛིན་ཚོགས་པའི་འཐུས་མི་སྐུ་ཞབས་ Ram Swaroop Sharma མཆོག་གིས་༸གོང་ས་མཆོག་གི་མཛད་འཕྲིན་ལ་ཆེ་བསྟོད་དང་བཀའ་དྲིན་ཆེ་ཞེས་གསུངས་པ་དང་འབྲེལ། རྒྱ་གར་གཞུང་གི་ངོས་ནས་༸གོང་ས་མཆོག་ལ་རྒྱ་གར་གཞུང་གི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པར་འབོད་སྐུལ་ཞུ་རྒྱུ་ཡིན་པ་མ་ཟད། ༸གོས་ས་མཆོག་རྒྱ་གར་གྱི་གྲོས་ཚོགས་ནང་གདན་འདྲེན་ཞུ་རྒྱུའི་ཐོག་རྒྱ་གར་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ངོས་ནས་ཤུགས་གནོན་གནང་བཞིན་ཡོད་པ་གསུངས་ཡོད། སྔ་དྲོའི་མཛད་སྒོ་ཐོག་བོད་ཀྱི་ཟློས་གར་ཚོགས་པ་དང་བཞུགས་སྒར་ཁུལ་གྱི་སློབ་གྲྭ་ཁག་གི་དགེ་སློབ་བཅས་སྡེ་ཁག་སོ་སོ་ནས་བོད་ཀྱི་ཐུན་མིན་རིག་གཞུང་ལས་རྐང་བྲོ་གླུ་གཞས་ཁག་ཅིག་གཟིགས་འབུལ་ཞུས་ཐོག་དེ་ཉིན་མོ་དགའ་སྐྱིད་དཔལ་ལ་རོལ་བཞིན་སྲུང་བརྩི་གཟབ་རྒྱས་ཞུས་ཡོད་པ་རེད།

ཁ་སང་ཕྱི་ཟླ་ ༡༢ ཚེས་ ༡༠ རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་བསྟུན་དབུས་བོད་ཀྱི་གཞོན་ནུ་ལྷན་ཚོགས་ནས་རྒྱ་གར་ནང་གི་གྲོང་ཁྱེར་དང་གྲོང་རྡལ་ཆེ་ཁག་ ༡༥༠ ནང་རྒྱ་གར་གཞུང་དམངས་གཉིས་ལ་བོད་དོན་གོ་རྟོགས་ཀྱི་གཞི་རྒྱ་ཆེ་བའི་ལས་འགུལ་སྤེལ་རྒྱུ་དབུ་འཛུགས་གནང་སོང། དེ་ཡང་བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་གར་གྲོས་ཚོགས་ནང་བོད་ཀྱི་གནད་དོན་གླེང་སློང་དགོས་པ་དང་། རྒྱ་གར་གཞུང་ནས་བོད་ཐོག་འཛིན་པའི་སྲིད་བྱུས་ལ་བསྐྱར་ཞིབ་དགོས་པ། དེ་བཞིན་ཧིན་བོད་མི་མང་ནས་རྒྱ་ནག་གི་ཅ་དངོས་ཉོ་ཚོང་སྤྱོད་གསུམ་བྱ་རྒྱུ་མཚམས་འཇོག་དགོས་པ་བཅས་འབོད་སྐུལ་དོན་ཚན་གསུམ་གྱི་ཐོག་ནས་དབུས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་ཁག་ཅིག་ས་གནས་འཆར་འགོད་ཐོག་བཞུགས་སྒར་རྡ་རམ་ས་ལ་དང་། རྒྱ་གར་བྱང་ཤར་ས་ལུ་གྷ་ར། དེ་བཞིན་རྒྱ་གར་ཕྱོགས་ཅན་ནའི་གྲོང་ཁྱེར་བཅས་སུ་ཁ་སང་ཚེས་ ༡༠ ཉིན་དབུ་འཛུགས་ཀྱིས་རྒྱ་གར་གྱི་མངལ་སྡེ་ ༢༢ ལྷག་གི་གྲོང་ཁྱེར་དང་གྲོང་རྡལ་ཆེ་ཁག་ ༡༥༠ ནང་བོད་དོན་ལས་འགུལ་སྤེལ་གནང་གི་ཡོད་པ་རེད། རྩ་བའི་བོད་ཀྱི་གཞོན་ནུ་ལྷན་ཚོགས་ཀྱིས་ཁ་སང་བཞུགས་སྒར་རྡ་རམ་ས་ལ་དང་། རྒྱ་གར་བྱང་ཤར་ས་ལུ་གྷ་ར། དེ་བཞིན་རྒྱ་གར་ཕྱོགས་ཅན་ནའི་གྲོང་ཁྱེར་བཅས་ནས་བོད་དོན་ལས་འགུལ་དབུ་འཛུགས་ཀྱིས་རྒྱ་གར་གྱི་མངལ་སྡེ་ ༢༢ ལྷག་གི་གྲོང་ཁྱེར་དང་གྲོང་རྡལ་ཆེ་ཁག་ ༡༥༠ ནང་བསྐྱོད་གནང་གི་ཡོད་པ་དང་། སྐབས་དེར་ཁོང་རྣམས་ནས་ས་གནས་ཀྱི་དཔོན་རིགས་དང་མི་མང་མཇལ་འཕྲད། དེ་བཞིན་གསར་འགོད་ལྷན་ཚོགས་དང། མཚན་རྟགས་བསྡུ་རུབ་གནང་རྒྱུ་སོགས་རྒྱ་གར་གཞུང་དམངས་གོ་རྟོགས་ལས་འགུལ་དང་འབྲེལ་བོད་ཡིག་དང་ཧིན་དྷི། དེ་བཞིན་དབྱིན་ཡིག བྷན་གྷ་ལི་སོགས་སྐད་ཡིག་མི་འདྲ་བ་དྲུག་ནང་ལ་ཡོད་པའི་ཡིག་ཆ་འབུམ་བཅུ་ལྷག་འགྲེམས་སྤེལ་གནང་གི་འདུག་པ་མ་ཟད། ད་བར་བོད་ཕྱི་ནང་གཉིས་སུ་རང་སྲེག་གནང་མཁན་ཁོང་རྣམ་པའི་ལོ་རྒྱུས་དང་དགོས་འདུན། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གྱི་མཛད་རྣམ་ཡོད་པའི་འོད་སྡེར་སོགས་ཀྱང་འགྲེམས་སྤེལ་གནང་གི་འདུག

ཨ་རིའི་བོད་ཀྱི་ཐེབས་རྩ་ཁང་ནས་བྱང་ཨ་རིའི་བོད་ཀྱི་སྐུ་ཚབ་དོན་གཅོད་ཁང་ལ་ཨ་སྒོར་ས་ཡ་གཅིག་དང་ཕྱེད་ཀ་བུན་གཡར་གྱི་ཕྱོགས་གཉིས་ཀའི་མོས་མཐུན་གན་རྒྱ་བཞག་སྐོརཡིག་ཆ་ཞིག་ཕྱིར་བསྒྲགས་བྱས་པ་དང་འབྲེལ། ཕྱོགས་གཉིས་ནས་ལས་ཀ་མཉམ་དུ་བྱས་པའི་མྱོང་ཚོར་གཞི་ལ་བཞག་སྟེ་དུས་ཚོད་རན་འཚམས་སུ་བུན་ལོན་རོགས་སྐྱོར་དུ་བསྒྱུར་རྒྱུར་རེ་བ་ཞུ་གི་ཡོད་ཅེས་གསུངས་འདུག དེ་ཡང་ཉེ་ལམ་ཨ་རི་སྐུ་ཚབ་དོན་གཅོད་འཕོ་འགྱུར་བཏང་བའི་བརྒྱུད་རིམ་ཁྲོད་བཙན་བྱོལ་བོད་མིའི་སྤྱི་ཚོགས་ནང་ཨ་རིའི་བོད་ཀྱི་ཐེབས་རྩ་ཁང་དང་ཨ་རིའི་བོད་ཀྱི་སྐུ་ཚབ་དོན་གཅོད་ཁང་གཉིས་དབར་གྱི་ཨ་སྒོར་ས་ཡ་གཅིག་དང་ཕྱེད་ཀའི་གནད་དོན་སྐོར་གླེང་སློང་ཤུགས་ཆེ་གནང་བཞིན་པ་ལྟར། ཁ་སང་ཕྱི་ཚེས་ ༦ ཉིན་ཨ་རིའི་བོད་ཀྱི་ཐེབས་རྩ་ཁང་ནས་གནད་དོན་དེའི་ཐོག་གསལ་བཤད་ཕྱིར་བསྒྲགས་ཤིག་སྤེལ་འདུག དེའི་ནང་བོད་མིའི་སྒྲིག་འཛུགས་ནས་ཨ་རིའི་རྒྱལ་ས་ཝ་ཤིང་ཌོན་དུ་དོན་གཅོད་ལས་ཁུངས་གསར་གཟིགས་གནང་རྒྱུའི་ཐོག་བོད་ཀྱི་ཐེབས་རྩ་ཁང་གིས་མཐུན་རྐྱེན་སྦྱོར་བའི་ཆེད་ཕྱི་ལོ་ ༢༠༡༤ ཕྱི་ཟླ་ ༣ ཚེས་ ༣༡ ཉིན་སྐུ་ཚབ་དོན་གཅོད་ཁང་དང་བོད་ཀྱི་ཐབས་རྩའི་དབར་བུན་དངུལ་ཨ་སྒོར་ས་ཡ་གཅིག་དང་ཕྱེད་ཀའི་མོས་མཐུན་གན་ཡིག་བཞག་ཡོད་པ་དང།  སྐྱིན་ཚབ་ལོ་སུམ་ཅུའི་ནང་ཕྱིར་སློག་གནང་རྒྱུའི་དུས་བཀག་བཟོས་ཐོག བུན་གཡར་དང་འབྲེལ་བའི་ཆ་རྐྱེན་ཡོངས་རྫོགས་ཡིག་ཐོག་གཏན་འབེབས་ཀྱིས་ནེའུ་ཡོག་མངའ་སྡེའི་ཁྲིམས་སྲོལ་དང་མཐུན་པ་བྱུང་ཡོད་སྐོར་དང། དེ་ཡང་སྐུ་ཚབ་དོན་གཅོད་ཁང་གི་རེ་འདུན་བཞིན་བུན་དངུལ་དེ་དག་ཆ་ཚང་བོད་མིའི་སྤྱི་ཚོགས་ཡར་རྒྱས་ཐེབས་རྩར་ཕུལ་ཡོད་པ་འཁོད་འདུག འོན་ཀྱང་བོད་ཀྱི་ཐེབས་རྩ་ཁང་གིས་གསལ་བཤད་ཕྱིར་བསྒྲགས་གནང་པ་དེའི་ནང་བོད་ཀྱི་ཐེབས་རྩའི་འགན་འཛིན་ལྷན་ཚོགས་ཀྱི་གཙོ་འཛིན་ནས་སྲིད་སྐྱོང་མཆོག་ལ་ཕྱི་ལོ་ ༢༠༡༧ ཕྱི་ཟླ་ ༧ ཚེས་ ༦ ཉིན་ཕུལ་བའི་གནས་འཕྲིན་ནང་ཐོག་མར་བུན་གཡར་སྐབས་ཕྱོགས་གཉིས་ནས་དུས་ཡུན་གང་འཚམས་རྗེས་བུན་ལོན་ཧྲིལ་པོ་སྤྲོད་འཇལ་མ་དགོས་པར་བོད་མིའི་སྒྲིག་འཛུགས་ལ་རོགས་སྐྱོར་ཚུལ་དུ་འབུལ་ཐུབ་པའི་རེ་བ་བྱས་ཡོད་ཀྱང། བུན་ལོན་རོགས་དངུལ་དུ་ག་བསྒྱུར་ཞུ་རྒྱུའི་ལོ་དུས་སོགས་ཞིབ་ཕྲ་གོ་བསྡུར་དང་མོས་མཐུན་གང་ཡང་བྱུང་མེད་ཅིང། ཕྱོགས་གཉིས་ནས་ལས་ཀ་མཉམ་དུ་བྱས་པའི་མྱོང་ཚོར་གཞི་ལ་བཞག་སྟེ་དུས་ཚོད་རན་མཚམས་སུ་བུན་ལོན་རོགས་སྐྱོར་དུ་བསྒྱུར་རྒྱུར་བོད་ཀྱི་ཐེབས་རྩ་འགན་འཛིན་ལྷན་ཚོགས་ནས་རེ་བ་ཞུ་གི་ཡོད་ཅེས་འཁོད་འདུག ལྷག་པར་དུ་ཕྱིར་བསྒྲགས་གནང་པའི་ནང་བོད་མིའི་སྒྲིག་འཛུགས་ནས་བུན་དངུལ་ཡིག་ཆའི་འབྲུ་དོན་རྩ་འཛིན་དང་། བོད་ཀྱི་ཐེབས་རྩ་ཁང་དང་བོད་མིའི་སྒྲིག་འཛུགས་གཉིས་ཀྱི་འབྲེལ་ལམ་མུ་མཐུད་ཕན་ཚུན་བརྩི་མཐོང་དང་། གཅིག་ཕན་གཅིག་གྲོགས་བྱུང་ཚེ། བོད་ཀྱི་ཐབས་རྩའི་འགན་འཛིན་ལྷན་ཚོགས་ནས་འབྱུང་འགྱུར་དུས་སྐབས་རན་པ་ཞིག་ལ་བུན་ལོན་རོགས་དངུལ་དུ་ག་བསྒྱུར་ཞུ་ཐུབ་པའི་རེ་འདུན་མུ་མཐུད་བསམ་ཞིབ་ཞུ་བཞིན་པ་བཅས་འཁོད་འདུག དེ་རིང་གསར་འགོད་པས་གནད་དོན་དེའི་ཐོག་བོད་མིའི་སྒྲིག་འཛུགས་ཀྱི་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ལ་བཅར་འདྲི་ཞུས་པར་སྲིད་ཚབ་མཆོག་གིས་བོད་ཀྱི་ཐེབས་རྩའི་ངོས་ནས་ཁྲིམས་དང་དངུལ་དང་འབྲེལ་བའི་ཡིག་ཆ་འགྲོ་སྟངས་ཀྱི་ཆ་ནས་གནས་སྐབས་རིང་བུན་ལོན་དང་རིམ་པས་གནང་སྦྱིན་ལ་བསྒྱུར་ནས་ཁོ་རང་ཚོའི་འགྲོ་སྟངས་ཆགས་ཀྱི་ཡོད་པ་དང། བོད་མིའི་སྒྲིག་འཛུགས་འཛིན་སྐྱོང་བཀའ་ཤག་གི་ངོས་ནས་དེ་སྔོན་དོན་ཚན་བཅུའི་ནང་གསལ་བཤད་གནང་པ་ལྟར། དངུལ་དེ་བུན་ལོན་མིན་པར་གནང་སྦྱིན་རང་ཆགས་ཡོད་པ་བསྐྱར་ནན་གནང་སོང་། ད་ལན་བོད་ཀྱི་ཐེབས་རྩ་ཁང་གི་གསལ་བཤད་ཡིག་ཆ་དེའི་ནང་བོད་མིའི་སྒྲིག་འཛུགས་དང་། བོད་ཀྱི་ཐེབས་རྩ་ཁང་དང་བོད་མིའི་སྒྲིག་འཛུགས་གཉིས་ཀྱི་འབྲེལ་ལམ་མུ་མཐུད་ཕན་ཚུན་བརྩི་མཐོང་དང་། གཅིག་ཕན་གཅིག་གྲོགས་བྱུང་ཚེ། བོད་ཀྱི་ཐེབས་རྩའི་འགན་འཛིན་ལྷན་ཚོགས་ནས་འབྱུང་འགྱུར་དུས་སྐབས་རན་པ་ཞིག་ལ་བུན་ལོན་རོགས་དངུལ་དུ་ག་བསྒྱུར་ཞུ་ཐུབ་པའི་རེ་འདུན་མུ་མཐུད་བསམ་ཞིབ་ཞུ་བཞིན་པ་བཅས་འཁོད་པ་དེར་སྲིད་ཚབ་མཆོག་གིས་གནད་དོན་དེའི་ཤེས་རྟོགས་གང་ཡང་མེད་ལ། དེའི་འདྲ་སྐད་ཆ་ཡང་ཡོད་མ་རེད་ཅེས་གསུངས་སོང། རྩ་བའི་བོད་མིའི་སྒྲིགས་འཛུགས་བཀའ་ཤག་ནས་ཉེ་སྔོན་ཚོགས་ཟུར་སྤེན་པ་ཚེ་རིང་མཆོག་ཨ་རིའི་སྐུ་ཚབ་དོན་གཅོད་ནས་འཕོ་འགྱུར་གནང་བའི་རྒྱུད་རིམ་ཁྲོད་དོན་ཚན་བཅུ་ཅན་གྱི་རྒྱུ་མཚན་གསལ་བཤད་གནང་བའི་ནང་ཨ་རིའི་བོད་ཀྱི་ཐེབས་རྩ་ཁང་གི་ཨ་སྒོར་ས་གཅིག་དང་ཕྱེད་ཀའི་གནད་དོན་དེ་འཁོད་ཡོད་པ་རེད། དོན་གཅོད་ཟུར་པ་སྤེན་པ་ཚེ་རིང་ལགས་ཀྱིས་ཟླ་བ་འདིའི་ཚེས་ ༥ ཉིན་བཞུགས་སྒར་དུ་གསར་འགོད་ལྷན་ཚོགས་ཐོག་བཀའ་ཤག་གིས་གསལ་བཤད་གནང་ཁག་ལ་ལན་འདེབས་གནང་སྐབས་གནད་དོན་དེ་ནི་བཙན་བྱོལ་བོད་མིའི་བཅའ་ཁྲིམས་དང་འགལ་ཡོད་པ་གསུངས་ཡོད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཟླ་བ་སྔོན་མའི་ནང་ཁེ་ན་ཊའི་གྲོང་ཁྱེར་Toronto ནང་དུ་གཞུང་འབྲེལ་ཕྱོགས་སྐབས་ས་གནས་བོད་རིགས་ཚོར་གསུང་བཤད་དང་མང་ཚོགས་ཀྱི་དྲི་བར་ལན་འདེབས་བཅས་གནང་སྐབས་བོད་ཀྱི་ཐེབས་རྩ་ཁང་གི་ངོས་ནས་ཁྲིམས་ཀྱི་འགྲོ་སྟངས་ཆ་ནས་ཨ་སྒོར་ས་ཡ་གཅིག་དང་ཕྱེད་ཀ་དེ་བོད་མིའི་སྒྲིག་འཛུགས་ལ་བུན་ལོན་གྱི་ངོ་བོའི་ཐོག་ནས་གནང་བ་ཙམ་ལས་དོན་དངོས་ཐོག་བུན་ལོན་སྤྲད་དགོས་ཀྱི་མེད་པར་གནང་སྦྱིན་རང་ཡིན་སྐོར་གསུངས་ཡོད་པ་རེད། རྩ་བའི་བོད་མིིའི་སྒྲིག་འཛུགས་ཀྱི་སྔོན་རྩིས་སྒྲིག་གཞི་ལྟར་བྱས་པ་ཡིན་ན། ལྷན་ཁང་སོ་སོའི་ལོ་འཁོར་སྔོན་རྩིས་འཆར་འབུལ་གང་འདྲ་ཞིག་ཡིན་རུང། ཐོག་མར་བོད་མིའི་སྒྲིག་འཛུགས་དཔལ་འབྱོར་ལས་ཁུངས་དང། དེ་ནས་འཛིན་སྐྱོང་བཀའ་ཤག དེ་རྗེས་བོད་མི་མང་སྤྱི་འཐུས་ལྷན་ཚོགས་ཀྱི་སྔོན་རྩིས་ཚོད་དཔག་འཆར་རྩིས་ཚོགས་ཆུང་བཅས་རིམ་པར་འཆར་འབུལ་གྱིས་ཞིབ་འཇུག་དང། མཐར་སྔོན་རྩིས་འཆར་འབུལ་དེ་བོད་མི་མང་སྤྱི་འཐུས་ལྷན་ཚོགས་ནང་དུ་སྤྱི་འཐུས་རྣམ་པ་བགྲོ་གླེང་གནང་སྟེ་གཏན་འབེབས་གནང་གི་ཡོད་པ་རེད།

ཨ་རིའི་སྐུ་ཚབ་དོན་གཅོད་ནས་འཕོས་མ་ཐག་པ་སྤྱི་འཐུས་ཚོགས་གཙོ་ཟུར་པ་སྤེན་པ་ཚེ་རིང་མཆོག་ནས་དེ་རིང་བཞུགས་སྒར་ནོར་བུ་གསོལ་མགྲོན་ཁང་དུ་གསར་འགོད་ལྷན་ཚོགས་ཤིག་གི་ཐོག་བཀའ་ཤག་གིས་ཁོང་དོན་གཅོད་ནས་འཕོ་འགྱུར་བཏང་དགོས་དོན་གྱི་གསལ་བཤད་སྔ་རྗེས་ཐད་ལ་ཚོུད་ ༤།༠༠ ཙམ་རིང་ལན་འདེབས་གནང་སོང་བ་དང་། ཁོང་གིས་སྐབས་དེར་ཨ་རིའི་དོན་གཅོད་འཕོ་འགྱུར་དང་འབྲེལ་ནས་སྤྱི་ཚོགས་ནང་གི་འཁྲུག་རྐྱེན་དང་ཨ་སྒོར་ས་ཡ་གཅིག་དང་ཕྱེད་ཀའི་མཇུག་འབྲས་ཡོངས་ཀྱི་འགན་བཀའ་ཤག་དང་སྲིད་སྐྱོང་ལ་ཡོད་ཅེས་གསུངས་སོང་། སྐབས་དེར་ཨ་རིའི་དོན་གཅོད་ཟུར་པ་སྤེན་པ་ཚེ་རིང་མཆོག་ནས་ལན་འདེབས་གསལ་བཤད་ཁུངས་སྐྱེལ་ཡིག་ཆ་ཤོག་གྲངས་ ༩༠ ཡས་མས་འགོས་འགྲེམས་གནང་ཐོག་བོད་མིའི་སྒྲིག་འཛུགས་ཀྱི་གསལ་བཤད་དོན་ཚན་བཅུ་ཅན་དང་། དེ་བཞིན་ད་དབར་སྲིད་སྐྱོང་བློ་བཟང་སེང་གེ་མཆོག་དང་ཆོས་རིག་བཀའ་བློན་གཡུ་ཐོག་ཀརྨ་དགེ་མཆོག་གིས་དོན་གཅོད་འཕོ་འགྱུར་དང་འབྲེལ་བའི་ཐད་ལ་གསལ་བཤད་དང་འགྲེལ་བརྗོད་གང་གནང་པ་དེ་དག་བདེན་པ་ཡིན་མིན་ཁུངས་སྐྱེལ་དཔང་ཡིག་དང་བཅས་པ་འགྲེལ་བརྗོད་ཞིབ་ཚགས་གནང་སོང་། ཁྱད་པར་དུ་དོན་གཅོད་ཟུར་པ་སྤེན་པ་ཚེ་རིང་མཆོག་ནས་དེ་རིང་གི་གསར་འགོད་ལྷན་ཚོགས་འདིའི་ཐོག་ནས་བཀའ་ཤག་གི་དོན་ཚན་བཅུ་ཅན་གྱི་གསལ་བཤད་དེ་དོན་ཚན་གསུམ་གྱི་ཐོག་ནས་ལན་འདེབས་དང་སྦྲགས། ད་བར་ཁོང་ལ་འཁྲི་པའི་ལས་དོན་བསྒྲུབ་མ་ཐུབ་པ་གང་ཡང་མེད་པ་དང་། འཛིན་སྐྱོང་གི་ངོས་ནས་ཁོང་ལ་ཡིད་ཆེས་བློས་འགེལ་གནང་མེད་པ། བྱ་སྤུ་གནོན་གྱི་གོ་རིམ་ལ་ལྟོས་མེད་གནང་མེད་པ་དཔེ་མཚོན་རེ་རེ་གཉིས་གཉིས་ཁུངས་སྐྱེལ་དང་བཅས་འགྲེལ་བརྗོད་གནང་ཡོད་པ་མ་ཟད་སྒོས་སུ་དོན་གཅོད་ཟུར་པ་སྤེན་པ་ཚེ་རིང་མཆོག་གིས་དོན་གཅོད་འཕོ་འགྱུར་གྱི་ཐག་གཅོད་དེ་བཀའ་ཤག་གིས་གནང་པ་ལས་ཁོང་གིས་དགོངས་ཞུ་གནང་པ་དེ་འདྲ་མིན་སྟབས། དེའི་རྗེས་འབྲེལ་གྱི་གནས་ཚུལ་ཡོངས་རྫོགས་ཀྱི་འགན་དབང་བཀའ་ཤག་དང་སྲིད་སྐྱོང་མཆོག་ལ་ཡོད་ཅེས་གསུངས་ཡོད། ད་དུང་ཁོང་གིས་ཐེངས་འདིའི་གནས་ཚུལ་ཁོངས་སུ་ཨ་རིའི་བོད་ཀྱི་ཐེབས་རྩ་ཁང་གི་ཨ་སྒོར་ས་ཡ་གཅིག་དང་ཕྱེད་ཀའི་སྐོར་དང་འབྲེལ། གནད་དོན་དེ་ནི་བཙན་བྱོལ་བོད་མིའི་བཅའ་ཁྲིམས་དང་འགལ་ཡོད་པ་མ་ཟད། ཨ་སྒོར་ས་ཡ་གཅིག་དང་ཕྱེད་ཀའི་སྐོར་གྱི་གྲོས་འགོ་བཏོན་མཁན་དང་པོ་དེ་འཛིན་སྐྱོང་ཡིན་སྟབས་དེའི་མཇུག་འབྲས་ཇི་བྱུང་གི་འགན་ཡོངས་རྫོགས་བཀའ་ཤག་དང་སྲིད་སྐྱོང་མཆོག་ལ་ཡོད་པ་གསུངས་ཡོད་པ་རེད། དུས་ཡུན་ཚོུད་ ༢།༠༠ ལྷག་རིང་ལ་ལན་འདེབས་གསལ་བཤད་གནང་པའི་ཁྲོད་དོན་གཅོད་ཟུར་པ་སྤེན་པ་ཚེ་རིང་མཆོག་གིས་ཁོང་ནས་ལོ་གཅིག་དང་ཟླ་གསུམ་རིང་ཨ་རིའི་དོན་གཅོད་ཀྱི་ལས་འགན་བཞེས་པའི་ཁྲོད་རྩ་དོན་དང་སྒྲིག་འཛུགས་གཙོ་བཟུང་ཐོག་ལས་འགན་འཁུར་ཡོད་སྟབས། དོན་མེད་ཉེས་མེད་ཉེས་འཛུགས་དང་མ་ཉེས་ཁག་གཡོགས་གནང་ཚེ་མང་གཙོའི་ཁེ་དབང་ལོངས་སུ་སྤྱོད་ནས་དཀར་ནག་བདེན་རྗུན་མཐའ་སེལ་གྱི་བྱེད་ཐབས་ཇི་དགོས་བརྩམ་རྒྱུ་ཡིན་ཞེས་གསུངས་ཡོད། དེ་བཞིན་དོན་གཅོད་ཟུར་པ་མཆོག་གིས་རྒྱ་ཆེ་མང་ཚོགས་ནས་གནས་ཚུལ་འདི་ནི་སྒྲིག་འཛུགས་ཀྱི་ལས་དོན་བྱེད་ཕྱོགས་གཅིག་དང་འབྲེལ་ཡོད་སྟབས། བློ་གཟུ་བོར་གནས་པའི་ཐོག་ནས་བདེན་རྫུན་ཞིབ་འཇུག་གནང་གལ་ཡིན་པར་འབོད་སྐུལ་སོགས་གནང་སོང་། སྐུ་ཞབས་སྤེན་པ་ཚེ་རིག་མཆོག་དོན་གཅོད་ཀྱི་ལས་གནས་ནས་འཁྱུར་མ་ཐག་ཚོགས་ཟུར་གྱི་མཚན་གནས་ཐོག་ནས་མང་ཚོགས་ལ་འབྲེལ་བ་བྱ་རྒྱུའི་སྒེར་གྱི་ངོ་དེབ་གཅིག་ཕྱེས་ཡོད་ནའང། ཁ་སང་ངོ་དེབ་བཀག་ཡོད་པའི་གནས་ཚུལ་བྱུང་བ་མ་ཟད། དེ་རིང་གསར་འགོད་ལྷན་ཚོགས་དེ་ངོ་དེབ་ཁ་བྱང་གཞན་ཞིག་གི་ཐོག་ནས་གནང་ཡང་ལས་རིམ་དེ་འགོ་འཛུགས་ནས་ཚོུད་ཕྱེད་ཀ་ཙམ་སོང་མཚམས་སུ་ངོ་དེབ་དེ་ཡང་བཀག་པའི་གནས་ཚུལ་བྱུང་ཡོད་པ་རེད། རྩ་བའི་ཨ་རིའི་དོན་གཅོད་འཕོ་འགྱུར་དང་འབྲེལ་ཏེ་འཛིན་སྐྱོང་བཀའ་ཤག་གིས་ཐོག་མའི་བཀོད་ཁྱབ་དེ་ཟླ་བ་སྔོན་མའི་ཚེས་ ༧ ཉིན་བཏང་རྗེས་སྤྱི་ཚོགས་ནང་གནད་དོན་དེའི་རྒྱུ་རྐྱེན་ཇི་ཡིན་སོགས་གླེང་གཞི་ཅན་དུ་འགྱུར་ནས་དྲི་བ་དང་དྭོགས་པ་རྣམ་རྟོག་ཇེ་སྙེད་ཅིག་ལྷག་ཡོད་ཅིང་། ཕྱི་ཚེས་ ༩ ཉིན་སྲིད་ཚབ་ཆོས་རིག་བཀའ་བློན་མཆོག་ནས་གསར་འགོད་པར་གསལ་བཤད་དང་དྲི་བར་ལན་འདེབས་བཅས་གནང་ཡོད་པ་དང་། དེའི་རྗེས་སུ་ཕྱི་ཟླ་ ༡༡ ཚེས་ ༡༨ ཉིན་འཛིན་སྐྱོང་བཀའ་ཤག་གི་གསལ་བཤད་དོན་ཚན་བཅུ་ཅན་ཞིག་གི་ཐོག་ནས་དོན་གཅོད་སྤེན་པ་ཚེ་རིང་མཆོག་ནས་བཀའ་ཤག་གི་ཐུགས་རེ་བཞིན་ལས་དོན་བསྒྲུབ་མ་ཐུབ་པ་དང་། ཡིད་ཆེས་བློས་འགེལ་མི་ཐུབ་པ། དེ་བཞིན་འཛིན་སྐྱོང་བྱ་སྤུ་གནོན་གྱི་གོ་རིམ་ལ་ལྟོས་མེད་གནང་ཡོད་པ་བཅས་གསུངས་ཡོད་པ་རེེད། ཐེངས་འདིའི་ཨ་རིའི་དོན་གཅོད་འཕོ་འགྱུར་གྱི་གནད་དོན་དང་འབྲེལ་ནས་ཉིན་ཤས་གོང་ཟླ་སྔོན་མའི་ ༢༧ དང་ ༢༨ སོ་སོར་ཨ་རིའི་རྒྱལ་ས་ Washington DC དང་བཞུགས་སྒར་གངས་ཅན་སྐྱིད་གཤོངས་སུ་མང་ཚོགས་བརྒྱ་སྐོར་ལ་ཉེ་བས་ཨ་རིའི་དོན་གཅོད་འཕོ་འགྱུར་གྱི་གནད་དོན་དང་འབྲེལ་འཛིན་སྐྱོང་ནས་རང་དབང་ལྡན་པའི་ཞིབ་འཇུག་ཚོགས་ཆུང་ཞིག་ཆེད་འཛུགས་ཐོག་དོན་རྐྱེན་གང་ཡིན་གང་མགྱོགས་ཕྱི་གསལ་ནང་གསལ་གྱི་ཐག་གཅོད་བྱེད་དགོས་པ་དང་དབང་ཆ་བེད་སྤྱོད་ལོག་པ་གཏང་རྒྱུ་མེད་པ། མི་མང་གི་མངོན་འདོད་སྣང་མེད་གཏང་མི་ཆོག་པ་བཅས་བོད་མིའི་སྒྲིག་འཛུགས་ལ་ཞུ་འབོད་ཀྱི་ལས་འགུལ་སྤེལ་ཡོད་པ་རེད།

ཁ་སང་ཕྱི་དྲོ་བཞུགས་སྒར་དུ་འདས་པའི་ལོ་ངོ་ ༣༢ རིང་གཞིས་བྱེས་གཉིས་སུ་དགའ་ལྡན་ཕོ་བྲང་གཞུང་གི་གཞུང་ཞབས་སྲི་ཞུ་བསྒྲུབས་མཁན་བཀའ་ཟུར་དམ་པ་ས་འདུ་ཚང་རིན་ཆེན་དོན་གྲུབ་ལགས་ཀྱིས་བརྩམས་པའི་བརྗོད་པར་དཀའ་བའི་མི་ཚེའི་ལོ་རྒྱུས། གཞིས་བྱེས་གཉིས་སུ་གཞུང་ས་དགའ་ལྡན་ཕོ་བྲང་གི་ཞབས་ཞུའི་ལས་སྐལ་བྱུང་བ་” ཞེས་དཔེ་དེབ་ཞིག་དབུ་འབྱེད་གནང་ཡོད་པ་དང་། དཔེ་དེབ་དེ་ནི་ཐོག་མར་དབྱིན་ཡིག་ནང་ A life unforeseen ཞེས་པ་དེ་བོད་ཀྱི་དཔེ་མཛོད་ཁང་གི་ངག་རྒྱུན་ལོ་རྒྱུས་སྡེ་ཚན་ནས་བོད་བསྒྱུར་གྱིས་དབུ་འབྱེད་འགྲེམས་སྤེལ་གནང་བ་ཞིག་ཆགས་ཀྱི་འདུག དཔེ་དེབ་དབུ་འབྱེད་ཀྱི་མཛད་སྒོའི་སྐུ་མགྲོན་གཙོ་བོར་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་དང་བཀའ་ཟུར་བློ་བཟང་དར་རྒྱས་མཆོག བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས། དབུས་བོད་མིའི་སྒྲིག་འཛུགས་ཀྱི་བཀའ་བློན་དང་སྤྱི་འཐུས་ལས་ཐོག་དང་ལས་ཟུར་རྣམ་པ། གཞན་ཡང་གནད་ཡོད་མི་སྣ་ཁག་ཅིག་དང་འབྲེལ་ཡོད་སེར་སྐྱ་མི་མང་བཅས་ཕེབས་ཡོད་པ་རེད། སྐུ་མགྲོན་གཙོ་བོར་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་བཀའ་ཟུར་རིན་ཆེན་དོན་གྲུབ་ལགས་ལྟ་བུ་ནི་བོད་ཀྱི་ཆབ་སྲིད་འཕོ་འགྱུར་ཆེ་བའི་སྐབས་སུ་གནད་འགག་ཆེ་བའི་ལས་དོན་མང་པོ་ནང་དུ་ཞུགས་མཁན་དཀོན་པོ་ཡིན་པ་གསུངས་སོང་བ་དང། དེ་བཞིན་ ༡༩༥༡ ནས་ད་ལྟ་བར་འདས་པའི་ལོ་ ༦༠ ལྷག་གི་རིང་བོད་ཀྱི་ལོ་རྒྱུས་ཁྲོད་སྤྱི་ཡོངས་དང་མི་འདྲ་བའི་ཁྱད་པར་ཆེན་པོ་ཞིག་བྱུང་ཡོད་པ་མ་ཟད། ལྷག་པར་དུ་བོད་རང་དབང་ཡིན་པའི་གཞུང་དང་བཙན་བྱོལ་གཞུང་ནང་སྲི་ཞུ་མི་མི་རེ་ངོ་རེའི་འཚོ་བའི་གནས་སྟངས་དེ་བོད་མི་རིགས་དང་རྒྱལ་ཁབ་ཀྱི་བྱུང་རབས་ཆ་ཤས་གལ་ཆེ་ཞིག་ཆགས་ཡོད་པ་སོགས་གསུངས་སོང། གཞི་རྩའི་བཀའ་ཟུར་ས་འདུ་རིན་ཆེན་དོན་གྲུབ་མཆོག་ནི་ཕྱི་ལོ་ ༡༩༢༩ ལོར་བོད་ཁམས་ཏྲེ་ཧོར་ས་ཁུལ་དཀར་མཛེས་རྫོང་གི་གྲོང་གསེབ་གླིང་ཚང་ཞེས་པར་འཁྲུངས་འདུག་ཅིང།  སྔར་སྲོལ་ཡིག་རྩིས་རིག་གནས་སློབ་གཉེར་བའི་རྗེས་སུ་ རྡོར་གླིང་དབྱིན་སློབ་ཏུ་སློབ་སྦྱོང་གནང།  ༡༩༤༨ ལོར་གཞུང་ཞབས་ཤོད་དྲུང་ཁོངས་སུ་གསར་མཇལ་ཞུས་ཤིང་། མི་རིང་བར་ལྷ་ལྡན་ཕྱི་རྒྱལ་ལས་ཁུངས་ཀྱི་ལས་བྱར་བསྐོ་གཞག་གནང་བ་དང།  བཀའ་ཟུར་སྐུ་གཤེགས་རིན་ཆེན་ལགས་ཀྱི་གནས་བབ་ཁྱད་པར་བ་གཅིག་ནི་ ༥༩ གོང་དུ་ཕ་བརྒྱུད་བུ་བརྒྱུད་གཞུང་ཞབས་མ་ཡིན་མཁན་ཚོང་པ་ཆེན་པོ་ཞིག་གི་མི་ཚང་ནས་གཞུང་ཞབས་ཞུས་པ་དང་པོའི་གྲས་ཆགས་ཀྱི་ཡོད་པ་རེད་འདུག ལྷག་པར་དུ་ཕྱི་ལོ་ ༡༩༥༩ ལོར་རང་ཡུལ་བོད་རྒྱལ་ཁབ་ནང་རྒྱ་དམར་དྲག་པའི་དབང་འགྱུར་བྱས་པའི་རྗེས། བཙན་བྱོལ་དུ་ཡོང་དགོས་བྱུང་སྐབས་༸རྒྱལ་བའི་བཞུགས་སྒར་མ་སུ་རིར་འཕྲལ་དུ་ངོ་བཅར་གྱིས་རྒྱ་གར་གྱི་དཔོན་རིགས་རྣམ་པར་མཇལ་འཕྲད་དང་མཉམ་འབྲེལ་རྒྱལ་ཚོགས་བཅས་སུ་བོད་དོན་ཞུ་སྐུལ་གྱི་གནད་དོན་ནམ་བྱུང་ལ་གསུང་སྒྱུར་ཞབས་ཞུ། རིམ་པས་དྷ་ས་༸སྐུ་སྒེར་ཡིག་ཚང་དང།  དེ་བཞིན་བཀའ་བློན་གྱི་མཚན་གནས་ཐོག་ལྡི་ལི་དོན་གཅོད་དུ་བསྐོ་གཞག་གནང་དོན་ཐུགས་འགན་ཞེས་པ་སོགས་མི་ལོ་ ༣༢ རིང་བོད་གཞིས་བྱེས་གཉིས་སུ་གཞུང་ཞབས་གནང་མཁན་ཞིག་ཆགས་ཀྱི་འདུག