བོད་མིའི་སྒྲིག་འཛུགས།

རྒྱ་ནག་གི་སྲིད་འཛིན་ཞི་ཅིན་ཕིང་བལ་ཡལ་ནང་གཞུང་འབྲེལ་འཚམས་གཟིགས་སུ་འབྱོར་ཉེ་དང་བསྟུན་བརྒྱུད་ལམ་ཁག་ཏུ་བལ་ཡུལ་དང་རྒྱ་ནག་གཉིས་དབར་ཕན་ཚུན་དོགས་གཞི་ཡོད་པའི་མི་སྣ་རྩིད་སྤྲོད་བྱ་རྒྱུའི་  extradition treaty ཞེས་ཉེས་ཅན་རྩིས་སྤྲོད་བྱ་རྒྱུའི་གྲོས་ཆོད་ཅིག་བཞག་སྲིད་པར་ཚོད་དཔག་གནང་མཁན་འབྱུང་བཞིན་ཡོད་པ་ལྟར། བོད་མིའི་སྒྲིག་འཛུགས་ཀྱི་མགྲིན་ཚབ་པ་ཕྱི་དྲིལ་དྲུང་ཆེ་དྭགས་པོ་བསོད་ནམས་ནོར་བུ་ལགས་སུ་དེ་འབྲེལ་བཀའ་འདྲི་ཁག་གཅིག་ཞུས་པར་རྒྱ་ནག་དང་བལ་ཡུལ་དབར་ཉེས་ཅན་རྩིས་སྤྲོད་བྱ་རྒྱུའི་གྲོས་ཆོད་བཞག་པ་ཡིན་ཚེ་བལ་ཡུལ་ནང་ཡོད་པའི་བོད་མི་སྤྱི་དང་ལྷག་པར་དུ་ཁྲིམས་མཐུན་གྱི་ཡིག་ཆ་མེད་པར་བལ་ཡུལ་ནང་བཞུགས་བཞིན་པའི་བོད་མི་ཚོར་ངལ་བ་ཆེས་འཕྲད་ངེས་ཡིན་པ་འགྲེལ་བརྗོད་གནང་བ་དང་ཆབས་ཅིག་ཏུ་བལ་ཡུལ་གཞུང་ནས་རྒྱ་ནག་དང་ལྷན་དུ་གྲོད་ཆོས་དེ་འདྲ་མ་བཞག་རོགས་གནང་ཞེས་འབོད་སྐུལ་གནང་སོང་།   བལ་ཡུལ་གཞུང་ནས་ཡུལ་དེའི་ས་གནས་གང་སར་ཉེན་རྟོག་མི་སྣ་དང་གསང་བའི་མི་སྣ་གང་མང་འགྲེམས་འཇོག་གིས་བཙན་བྱོལ་བོད་མིའི་ཐོག་སྔར་ལྷག་དམ་དྲག་བྱེད་བཞིན་པ་མ་ཟད་དེ་སྔ་ས་གནས་སུ་ངོ་རྒོལ་སྐད་འབོད་སོགས་ཀྱི་ལས་འགུལ་ནང་ཞུགས་མྱོང་ཡོད་མཁན་གཙོས་པའི་བོད་མི་ཁག་གཅིག་ལ་དོགས་ཟོན་གྱིས་འདྲི་རྩད་བྱས་པའི་གནས་སྟངས་སོགས་བྱུང་འདུག བལ་ཡུལ་བོད་མིའི་སྤྱི་ཁྱབ་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་སུ་བཅར་འདྲི་ཞུས་པར་ད་ལྟའི་ཆར་བལ་ཡུལ་ཁྱོན་ཡོངས་སུ་ལྟ་སྲུང་སླད་དམག་མི་ལྔ་སྟོང་ལྷག་འགྲེམས་འཇོག་བྱས་ཡོད་པ་དང་། འདས་པའི་ཉིན་ཤས་ཁྲོད་དུ་བོད་མི་ཁག་གཅིག་ལ་འདྲི་རྩད་སོགས་བྱས་ཡོད་ཀྱང་ད་ལྟའི་ཆར་འཛིན་བཟུང་བཀག་ཉར་བྱས་པ་དངོས་སུ་ཤེས་རྟོགས་ཐུབ་མེད་ཀྱང་། བལ་ཡུལ་གྱི་ས་གནས་སྤྱི་དང་ལྷག་པར་དུ་ས་མཚམས་ཁུལ་དུ་དམ་དྲག་ཤུགས་ཆེ་བྱེད་བཞིན་པ་གསུངས་སོང་།  རྩ་བའི་རྒྱ་ནག་གི་སྲིད་འཛིན་ཞི་ཅིན་ཕིང་སང་ཉིན་ནས་རྒྱ་གར་ནང་གི་འཚམས་གཟིགས་གྲུབ་མཚམས་སུ་ཕྱི་ཚེས་ ༡༣ ནས་ཉིན་གྲགས་གཉིས་རིང་བལ་ཡུལ་ནང་འཚམས་གཟིགས་བྱ་གཏན་འཁེལ་བ་དང་བསྟུན་བལ་ཡུལ་ནང་གི་བོད་མི་ཚོར་དམ་དྲག་བྱས་པ་ཙམ་མ་ཟད་རྒྱ་གར་ནས་བལ་ཡུལ་ནང་གཉེན་འཕྲད་དང་གནས་སྐོར་ཆེད་འགྲོ་མཁན་བོད་མི་ཁག་གཅིག་བལ་ཡུལ་ས་མཚམས་ནས་ཕྱིར་སློག་བྱས་པའི་གནས་སྟངས་ཡང་བྱུང་ཡོད་པ་རེད། དེའི་སྐོར་ཉེ་འཆར་ཕྱི་ཚེས་ ༦ ཉིན་རྒྱ་གར་ནས་བལ་ཡུལ་དུ་གཉེན་འཕྲད་དང་གནས་སྐོར་ལ་ཕེབས་སྐབས་ས་མཚམས་ནས་ཕྱིར་སློག་བྱས་པ་བསྟན་འཛིན་རབ་བརྟན་ལགས་ཀྱིས་འདི་ག་རླུང་འཕྲིན་ཁང་ལ་ས་མཚམས་སུ་བལ་པོའི་ཉེན་རྟོག་པས་བཀག་སྡོམ་དང་ཕྱིར་སློག་ཇི་ལྟར་བྱས་སྐོར་འགྲེལ་བརྗོད་གནང་སོང་། གཞི་རྩའི་རྒྱ་ནག་གཞུང་གི་གནོན་ཤུགས་འོག་བལ་ཡུལ་གཞུང་ནས་ཁུལ་དེར་༸གོང་ས་མཆོག་གི་༸སྐུའི་འཁྲུངས་སྐར་དུས་ཆེན་དང་བོད་མིའི་གསུམ་བཅུའི་དུས་དྲན་གཙོས་པའི་བོད་དོན་དང་འབྲེལ་བའི་མཛད་སྒོ་ཁག་སྲུང་བརྩི་ཞུ་རྒྱུར་དམ་དྲག་དང་། བོད་ནས་གསར་དུ་འབྱོར་བའི་བོད་མི་མི་ཉུང་བ་ཞིག་འཛིན་བཟུང་དང་ཕྱིར་སློག་བྱས་པ་སོགས་ཀྱི་གནས་ཚུལ་མི་ཉུང་བ་ཞིག་འཐོན་བཞིན་ཡོད་པ་མ་ཟད། ཡུལ་དེའི་ཆབ་སྲིད་ཚོགས་པའི་འཐུས་མི་ཁག་གཅིག་བོད་དོན་དང་འབྲེལ་བའི་ཚོགས་འདུ་སོགས་ཀྱི་ཐོག་མཉམ་ཞུགས་གནང་རྐྱེན་ལས་གནད་ནས་གནས་དབྱུང་བཏང་པ་སོགས་ཀྱི་གནས་སྟངས་བྱུང་ཡོད།

ཁ་སང་ཚེས་ ༧ ཉིན་གངས་སྐྱིད་གཉའ་ཁྲི་ཚོགས་ཁང་དུ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་གཙོས་དྲུང་ཆེ་དཔེ་ཟུར་དབང་འདུས་ཚེ་རིང་ལགས་དང་དྲུང་འཕར་ཟླ་བ་ཚུལ་ཁྲིམས་ལགས་དབུ་བཞུགས་ཐོག་ཐེངས་འདིར་རྒྱ་བལ་འབྲུག་གསུམ་ནས་དམིགས་བསལ་ཚོགས་ཆེན་ཐོག་བཅར་བའི་ཁོསང་ནས་བོད་མིའི་གཞིས་སྒར་མི་འདྲ་བ་སོ་གྲངས་ཤིག་གི་ས་གནས་འགོ་འཛིན་ཆེད་འཛོམས་ཀྱིས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་རྣམས་ཀྱི་འཛིན་སྐྱོང་ལས་དོན་གནངཕྱོགས་དང་འབྲེལ་བའི་ཚོགས་འདུ་འཚོགས་འདུག ཁ་སང་ཚོགས་འདུའི་སྐབས་ས་གནས་འགོ་འཛིན་རྣམ་པ་བཅས་ཚང་འཛོམས་ཐོག་ནང་སྲིད་བཀའ་བློན་མཆོག་གིས་ནང་སྲིད་སོ་ནམ་ཚན་པས་སྐྱེ་ལྡན་སོ་ནམ་ལས་གཞི་དང་འབྲེལ་བའི་གྲངས་ཐོ་རྣམས་ལག་ཐོག་ཁ་པར་དང་ཀམ་པུ་ཊར་ཐོག་ལྟ་ཀློག་ཐུབ་ཆེད་བཀོལ་སྤྱོད་མཉེན་ཆས་ Padma App ཞེས་པ་དབུ་འབྱེད་གནང་ཡོད་པ་དང་། མཉེན་ཆས་དེ་ནི་བོད་པའི་སོ་ནམ་སྐྱེ་ལྡན་སོ་ནམ་ལས་གཞི་དང་འབྲེལ་བའི་གྲངས་ཐོ་བསྡུ་རུབ་དང་དཔྱད་ཞིབ་ཁུངས་ལྡན་ཞིག་ཡོང་སླད་ཡིན་པ་རེད་འདུག  གསར་འགོད་པས་ནང་སྲིད་སོ་ནམ་ཚན་པས་སྐྱེ་ལྡན་སོ་ནམ་ལས་གཞི་དང་འབྲེལ་ནས་ནང་སྲིད་དྲུང་འཕར་ཟླ་བ་ཚུལ་ཁྲིམས་ལགས་སུ་བོད་པའི་གཞིས་སྒར་ཁག་གི་སོ་ནམ་ཞིང་ལས་སྤྱི་ཡོངས་ཀྱི་གནས་སྟངས་ཐོག་བཀའ་འདྲི་ཞུས་པར་ཁོང་གིས་དེང་སང་བོད་པའི་གཞིས་སྒར་ཁག་ཏུ་གཞོན་སྐྱེས་རྣམས་ཀྱིས་སོ་ནམ་ཞིང་ལས་ཀྱི་ལས་རིགས་གཉེར་མཁན་ཇེ་ཉུང་དུ་འགྲོ་བཞིན་ཡོད་པ་གསུངས་སོང་། གཞི་རྩའི་སྐབས་འདིའི་ཚོགས་འདུའི་ཁྲོད་བརྗོད་གཞི་ཆེ་ཁག་གཉིས་ཡོད་པ་ནི།  ནང་སྲིད་ལས་ཁུངས་ནས་ཕྱོགས་སྒྲིག་གནང་བའི་རྒྱལ་བལ་འབྲུག་གསུམ་ནང་གི་བོད་མི་ལས་ཤུགས་གྲངས་ཐོ་བསྡུ་རུབ་ཀྱི་ལས་གཞི་གནས་སྟངས་ཐད་སྙན་གསེང་དང་གོ་བསྡུར་གནང་རྒྱུ། དེ་བཞིན་བཙན་བྱོལ་བོད་མིའི་མཐུན་རྐྱེན་སྦྱོར་སྤྲོད་གནང་ཕྱོགས་དང་འབྲེལ་བའི་ཕྱི་ལོ་ ༢༠༡༤ ལོའི་རྒྱ་གར་གྱི་སྲིད་བྱུས་དེ་གཞིས་ཆགས་ཁག་ཏུ་ལག་བསྟར་མཇུག་སྐྱོང་ཇི་ཐུབ་སོགས་ཀྱི་སྐོར་ལ་བགྲོ་གླེང་གནང་འདུག   དེ་བཞིན་རྒྱ་བལ་འབྲུག་གསུམ་ནང་གི་མི་འབོར་ཞིབ་བཤེར་ཐོག་ནས་གཞིས་ཆགས་ཁག་གིས་སྔོན་ཆད་ཕུལ་ཡོད་པའི་ལས་བསྡོམས་དང་ཉེ་ཆར་གྱི་མི་འབོར་ཞིབ་བཤེར་གྱི་གྲངས་ཐོ་གཉིས་ཀྱི་དབར་ལ་ཧེ་བག་ཆེན་པོ་བྱུང་ཡོད་སྟབས་མི་འབོར་ཞིབ་བཤེར་གྱི་ཐད་བགྲོ་གླེང་ལྷུག་པོ་གནང་སྟེ་གྲངས་ཐོ་གཏན་འབེབས་དགོས་པའི་བཀག་མངགས་གནང་ཡོད་སྐོར་གསུངས་ཡོད། རྩ་བའི་ཐེངས་འདིའི་ཚོགས་འདུ་ནི་ས་གནས་འཐུས་ཚབ་རྣམས་ཀྱི་དབར་གོ་བསྡུར་སྦྱང་བཤད་ཙམ་ལས་དམིགས་བསལ་གྲོས་ཆོད་གང་ཡང་འཇོག་གནང་གི་མེད་པ་དང་། ལོ་རྗེས་མར་བོད་མིའི་སྒྲིག་འཛུགས་ཀྱི་ནང་སྲིད་ལྷན་ཁང་ནས་གོ་སྒྲིིག་གནང་ཐོག་བོད་པའི་གཞིས་སྒར་ཁག་གི་ས་གནས་འགོ་འཛིན་ཆ་ཚང་མཉམ་འཛོམས་གནང་སྟེ་ཉིན་གསུམ་གྱི་རིང་ཚོགས་འདུ་རྒྱས་པ་ཞིག་འཚོགས་འཆར་ཡོད་པ་དང་། ལས་དོན་གནང་ཕྱོགས་དང་དཀའ་ངལ་ཅི་ཡོད་སོགས་སྤྱི་ཡོངས་ཀྱི་ཐད་ལ་གོ་བསྡུར་གནང་ནས་གྲོས་ཆོད་འཇོག་གནང་ཡོད་པ་རེད་འདུག  འབྲེལ་ཡོད་པར་རྣམས་དྲིལ་བསྒྲགས་དྲྭ་རྒྱ།  

དེ་རིང་ཕྱི་ཟླ་ ༡༠ ཚེས་ ༧ ཉིན་གྱི་སྔ་དྲོ་ཚོུད་ ༩ ཐོག་བཞུགས་སྒར་གངས་སྐྱིད་ཚོགས་ཁང་གསར་པའི་ནང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དབུ་བཞུགས་ཐོག་ནང་སྲིད་དུང་ཆེ་དཔེ་ཟུར་དབང་འདུས་ཚེ་རིང་ལགས་ཀྱིས་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གི་དྲུང་ནས་དབུས་འོས་བསྡུ་ལས་ཁུངས་ཀྱི་སྤྱི་ཁྱབ་འགན་འཛིན་དང་ལས་བྱེད་འདེམས་ལྷན་གྱི་ཚོགས་གཙོ་གཅིག་ལྕོགས་ཀྱི་ལས་ཁུར་དམ་འབུལ་ཞུས་སོང་། ཉེ་ལམ་གྲུབ་པའི་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་ཐོག་བཅའ་ཁྲིམས་ལེའུ་བརྒྱད་པའི་དོན་ཚན་ ༩༧ དང་ ༡༠༡ གཞིར་བཟུང་ཆེས་མཐོའི་ཁྲིམས་ཞིབ་པ་ཆེ་བ་དང་སྤྱི་འཐུས་ཚོགས་གཙོ་སྦྲེལ་པོ། སྲིད་སྐྱོང་མཆོག་ནས་དབུས་འོས་བསྡུ་ལས་ཁུངས་ཀྱི་སྤྱི་ཁྱབ་འགན་འཛིན་དང་ལས་བྱེད་འདེམས་ལྷན་གྱི་ཚོགས་གཙོ་གཅིག་ལྕོགས་ཀྱི་འོས་མི་འདེམས་གྲུག་གནང་བའི་ཚོགས་ཆུང་ནས་འོས་གཞིར་ནང་སྲིད་དྲུང་ཆེ་དཔེ་ཟུར་དབང་འདུས་ཚེ་རིང་ལགས་དང་སྤྱི་ཁྱབ་ཁྲིམས་དྲུང་ཤར་འབྲོང་བཀྲིས་རྒྱ་མཚོ་ལགས་གཉིས་ཀྱི་མཚན་འཆར་ཕུལ་བ་དང་སྦྲགས། སྐབས་དེར་ཚོགས་གཞོན་གཙོས་པའི་སྤྱི་འཐུས་ཞལ་གྲངས་ ༤༢ ནས་འོས་ཤོག་འཕངས་ཏེ་ནང་སྲིད་དྲུང་ཆེ་དཔེ་ཟུར་དབང་འདུས་ཚེ་རིང་ལགས་སུ་འོས་གྲངས་ ༢༣ ཐོབ་ཐོག་དབུས་འོས་བསྡུ་ལས་ཁུངས་དང་འདེམས་ལྷན་ཚོགས་གཙོ་གཅིག་ལྕོགས་ལ་བདམས་ཐོན་བྱུང་ཡོད་པ་རེད། དམ་འབུལ་མཛད་སྒོ་གྲུབ་བསྟུན་དཔེ་ཟུར་དབང་འདུས་ཚེ་རིང་ལགས་སུ་ཕྱི་ལོ་ ༢༠༢༡ ལོར་སྲིད་སྤྱི་གཉིས་ཀྱི་འོས་བསྡུ་ཆེན་མོ་དང་འབྲེལ་ནས་འོས་བསྡུ་ཚགས་ཚུད་ཡོང་རྒྱུ་དང་ད་ལྟའི་ཆར་འོས་བསྡུ་སྒྲིག་གཞི་གསར་པ་གཏན་འབེབས་གནང་ཡོད་སྟབས་དེ་འབྲེལ་དགོངས་པ་ཇི་བཞེས་སྐོར་ལ་བཀའ་འདྲི་ཞུས་པར་ཁོང་གིས་རང་ཉིད་ནས་དབུས་འོས་བསྡུ་ལས་ཁུངས་དང་འདེམས་ལྷན་གཉིས་ཀྱི་ལས་དོན་གལ་ཆེ་ཞིག་ལ་ངོས་འཛིན་ཞུ་བཞིན་བཅའ་ཁྲིམས་ཀྱི་དགོངས་དོན་གཞིར་བཟུང་ཤར་སྐྱོད་གནང་རྒྱུ་ཡིན་པ་མ་ཟད་ད་ཆ་ཁག་གཅིག་གིས་རྣམ་རྟོག་སྒོ་ནས་ཕྱི་ལོ ༢༠༢༡ ལོའི་འོས་བསྡུ་དང་འབྲེལ་བཀའ་མོལ་འདྲ་མིན་གསུངས་ཀྱང་རང་ཉིད་ནས་ཡོང་རྒྱུ་བསྡད་པའི་འོས་བསྡུ་དེ་ཚགས་ཚུད་ཡོང་རྒྱུར་རེ་བ་ཡོད་པ་གསུངས་སོང་། གཞི་རྩའི་དཔེ་ཟུར་དབང་དུས་ཚེ་རིང་ལགས་ཕྱི་ལོ་ ༡༩༥༩ ཟླ་ ༧ ཚེས་ ༡ ཉིན་འབྲས་ལྗོངས་སྒང་ཏོག་ཏུ་སྐྱེས་ཤིང་། སྦེལ་ཀོབ་གཏན་སློབ་རྗེས་ཝ་རཱ་ཎ་སཱི་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་དུ་བོད་ཀྱི་ཆོས་དང་རིག་གཞུང་ལ་སློབ་གཉེར་གྱིས་ཤཱསྟྲི་ཐོན་པ་དང་། ཕྱི་ལོ་ ༡༩༨༣ ལོར་གཞོན་དྲུང་གནས་རིམ་ཐོག་བོད་མིའི་སྒྲིག་འཛུགས་ནང་ཕྱག་ལས་གནང་རྗེས་ཐེགས་པ་རིམ་འཛེགས་ཀྱིས་འབུམ་ལ་དང་བསྟན་སྒང་། དེ་བཞིན་ཧུན་སུར་རབ་རྒྱས་གླིང་། མན་སྤར། ཀོ་ལི་གྷལ་བོད་མིའི་གཞིས་ཆགས་ཀྱི་ས་གནས་འགོ་འཛིན་གནང་ཡོད་པ་མ་ཟད། ཕྱི་ལོ་ ༢༠༡༤ ཟླ་ ༩ ཚེས་ ༡ ཉིན་བོད་ཀྱི་ཟློས་གར་འགན་འཛིན་གནང་བ་དང་། དེ་རྗེས་ཕྱི་ལོ་  ༢༠༡༨ ཟླ་ ༡༢ ཚེས་ ༡ ཉིན་ནང་སྲིད་དྲུང་ཆེའི་འགན་ཁུར་བཞེས་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དམིགས་གསལ་ཚོགས་ཆེན་ཐེངས་གསུམ་པའི་ཚོགས་བཅར་བ་དང་སྲིད་ཞུ་ལས་བྱེད་རྣམས་ལ་དམིགས་བསལ་མཇལ་ཁ་བསྩལ་བ་དང་སྦྲགས། བོད་མི་བཙན་བྱོལ་བ་ཚོས་ལོ་རྒྱུས་ལྡན་པའི་རླབས་ཆེན་གྱི་མི་རབས་གོང་མའི་མཇུག་མཐུད་ཐུབ་པ་བྱས་ནས་བོད་གངས་ཅན་པ་ཟེར་བ་འདི་འཛམ་གླིང་འདིའི་ཐོག་མིག་དཔེ་བྱ་འོས་ཤིག་ཏུ་བཟོས་དགོས་པའི་ལམ་སྟོན་བསྩལ་བ་མ་ཟད། ༸གོང་ས་མཆོག་སྐུ་སྒེར་གྱི་ཐོག་ནས་རྒྱ་ནག་དང་ལྷན་དུ་འབྲེལ་བ་མུ་མཐུད་མཛད་བཞིན་ཡོད་པའི་ཁར། ནམ་ཞིག་བོད་དང་རྒྱ་ནག་ནང་དུ་གཟིགས་སྐོར་ལ་ཕེབས་རྒྱུའི་ཐུགས་རེ་གནང་བཞིན་ཡོད་པ་དེ་ལྟར་ཡང། རྒྱ་གར་རང་དབང་ལུང་པའི་ནང་བཞུགས་ན་འགྲོ་བར་ཕན་རླབས་ཆེ་བ་གཟིགས་ཀྱི་ཡོད་པ་བཀའ་བསྩལ་སོང་། བཞུགས་སྒར་དྷརྨ་ས་ལར་ཟླ་ ༡༠ ཚེས་ ༣ ནས་ཁ་སང་ཚེས་ ༥ བར་བོད་མིའི་སྒྲིགས་འཛུགས་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ཀྱིས་གོ་སྒྲིག་འོག་རྒྱལ་ཁབ་ ༢༤ ནས་བོད་མིའི་སྐུ་ཚབ་ ༣༤༠ ལྷག་ཙམ་ལྷན་ཞུགས་ཐོག་ལྔ་དང་ལྔ་བཅུའི་ལས་འཆར་དང་༸རྒྱལ་བ་སྐུ་ཕྲེང་ན་རིམ་དང་བོད་མིའི་དབར་གྱི་འབྲེལ་བའི་སྐོར་ལ་དམིགས་བསལ་ཚོགས་ཆེན་ཐེངས་གསུམ་པ་ཚོགས་ཡོད་པ་ལྟར་དེ་རིང་སྔ་དྲོ་ཚོུད་ ༩ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚོགས་ཆེན་གྱི་གྲོས་ཆོད་ཁག་སྤྱན་འབུལ་ཞུས་པ་དང་འབྲེལ་ཏེ་མགོན་པོ་༸གང་ཉིད་མཆོག་ནས་ཚོགས་བཅར་བ་དང་བོད་མིའི་སྒྲིག་འཛུགས་ཀྱི་སྲི་ཞུ་བ་རྣམས་ལ་ཐུགས་བརྩེ་བ་ཆེན་པོའི་ཐོག་ནས་དུས་ཡུན་ཚོུད་གཅིག་ལྷག་ཙམ་རིང་ལ་བཀའ་སློབ་བཀྲིན་བསྩལ་སོང་། ༸གོང་ས་མཆོག་གིས་སྐབས་བོད་མི་རིགས་ཀྱི་ཐོུང་མ་ཡིན་པའི་ཆོས་དང་རིག་གཞུང་། ལེགས་བྱང་། སྐད་ཡིག་བཅས་ཀྱི་གལ་གནད་སྐོར་ལ་བཀའ་སློབ་བཀྲིན་ཆེ་བ་བསྩལ་བ་དང་འབྲེལ། གཞིས་ལུས་རྒྱ་ཆེ་མང་ཚོགས་ཀྱིས་རང་གི་གཅེས་པའི་ལུས་སྲོག་བློས་བཏང་གིས་རང་མི་རིགས་ཀྱི་ཆོས་རིག་དང་ལེགས་བྱང་། སྐད་ཡིག་སོགས་སྲུང་སྐྱོབ་གནང་བཞིན་པ་ལྟར་བྱེས་སྡོད་བོད་མི་གཞོན་སྐྱེས་རྣམས་ནས་བོད་ནང་གི་བོད་མི་རྣམས་ཀྱི་སེམས་ཤུགས་དང་ལྷག་བསམ་ཧ་ལས་པ་ཞིག་ཡོད་པ་དེ་དག་མུ་མཐུད་རྒྱུན་སྐྱོང་བྱེད་དགོས་པ་བཀའ་བསྩལ་འདུག དེ་བཞིན་༸གོང་ས་མཆོག་གིས་ཕྱི་ལོ་ ༡༩༥༩ ལོར་མགོན་པོ་༸གང་ཉིད་ཐོག་མར་ནོར་གླིང་ནས་བཙན་བྱོལ་དུ་ཆིབས་ཐོན་གནང་སྐབས་༸སྐུའི་མྱོང་བ་ཁག་གཅིག་ཐུགས་དྲན་གསོས་གནང་བ་དང་འབྲེལ། བོད་མི་རྣམས་ཀྱིས་འདས་པའི་ལོ་ངོ་ ༦༠ ནང་བཙན་བྱོལ་དུ་ལོ་རྒྱུས་ལྡན་པའི་རླབས་ཆེན་གྱི་བོད་མི་རིགས་ཀྱི་མི་ཚབ་བྱས་ནས་ད་ཆ་བཙན་བྱོལ་བོད་མིའི་སྤྱི་ཚོགས་དེ་འདྲ་འདྲའི་ནང་ནས་མི་འདྲ་བ་ཞིག་ཏུ་གྱུར་ཡོད་པ་འདིས་དེ་སྔ་རྒྱ་ནག་གིས་ ༥༩ ལོར་དྲག་གནོན་བརྒྱུད་བོད་མི་རིགས་ཞེས་པ་དེ་ནག་བསུབ་གཏོང་རྒྱུའི་ཚོད་དཔག་བྱས་པ་དེ་ད་ཆ་ནོར་བ་ཞིག་བཟོས་ཡོད་པར་བཀའ་བསྩལ་ཡོད། ༸གོང་ས་མཆོག་གིས་གཞན་ཡང་བོད་ཀྱི་ཆབ་སྲིད་ཀྱི་གནས་བབ་དང་འབྲེལ་ཏེ་ཕྱོགས་གཉིས་དབར་གྱི་གཞུང་འབྲེལ་འབྲེལ་མོལ་དེ་ཆད་ཡོད་ཀྱང་དམིགས་བསལ་སྐུ་ཚབ་ཆེད་འཛུགས་མི་དགོས་པར་མགོན་པོ་༸གང་ཉིད་མཆོག་༸སྐུ་སྒེར་གྱི་ཐོག་ནས་རྒྱ་ནག་དང་འབྲེལ་བ་མུ་མཐུད་མཛད་བཞིན་པ་བཀའ་བསྩལ་བ་དང་ཆབས་ཅིག་ཏུ་སྤྱིར་རྒྱ་ནག་ནང་གི་གནས་སྟངས་ལ་རིམ་པས་འགྱུར་བ་འགྲོ་བཞིན་པ་གསལ་པོ་ཡིན་པ་ལྟར་མགོན་པོ་༸གང་ཉིད་མཆོག་ནམ་ཞིག་རྒྱ་ནག་དང་བོད་ལ་གཟིགས་སྐོར་ལ་ཕེབས་རྒྱུའི་ཐུགས་རེ་མཛད་ཡོད་ཀྱང་། རྒྱ་གར་བཙན་བྱོལ་ལུང་པའི་ནང་བཞུགས་ན་འགྲོ་བའི་ཕན་བདེར་ཕན་རླབས་རྒྱ་ཆེ་མཛད་ཐུབ་ཀྱི་ཡོད་པ་བཀའ་བསྩལ་ཡོད་པ་རེད། ༸གོང་ས་མཆོག་གིས་ད་དུང་ད་ཆ་༸སྐུའི་འཕྲོད་བཞེས་ཀྱི་གནས་བབ་བཟང་དུ་ཕེབས་བཞིན་པ་ལྟར་རིམ་པས་ཡོ་རོབ་སོགས་ཕྱིའི་རྒྱལ་ཁབ་ཁག་ཏུ་སླར་ཆིབས་བསྒྱུར་མཛད་ཐུབ་པའི་ཐུགས་རེ་ཡོད་སྐོར་བཀའ་བསྩལ་བ་དང་འབྲེལ། བོད་མི་རྣམས་བཙན་བྱོལ་དུ་སྤོབས་པ་ཆེན་པོ་བྱེད་རྒྱུ་ཡོད་པ་དེ་ནི་གཞིས་ལུས་རྒྱ་ཆེ་མི་མང་དང་སྒྲིག་འཛུགས་ཀྱི་སྲི་ཞུ་བ་ཚོའི་བཀྲིན་ལ་བརྟེན་བྱུང་བ་ཞིག་ཡིན་སྟབས་མུ་མཐུད་ཧུར་ཐག་གནང་སྟེ་རླབས་ཆེན་གྱི་མི་རབས་གོང་མའི་མཇུག་མཐུད་དེ་བོད་གངས་ཅན་པ་ཟེར་བ་འདི་འཛམ་གླིང་འདིའི་ཐོག་མིག་དཔེ་བྱ་འོས་ཤིག་ཏུ་བཟོས་དགོས་པའི་ལམ་སྟོན་བསྩལ་ཡོད། གཞི་རྩའི་བཞུགས་སྒར་དུ་ཟླ་བ་འདིའི་ཚེས་ ༣ ནས་ ༥ བར་ཚོགས་པའི་བཙན་བྱལ་བོད་མིའི་དམིགས་བསལ་ཚོགས་ཆེན་གསུམ་པའི་ཐོག་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་མི་རྩམ་ཟན་ཡོངས་ཀྱི་འདི་ཕྱི་གཉིས་ཀྱི་མགོན་༸སྐྱབས་དཔུང་གཉེན་དམ་པར་མུ་མཐུད་བཞུགས་གནང་ཡོང་བ་དང་། ཇི་སྲིད་བོད་ཁ་ཅན་གྱི་འགྲོ་བ་ནམ་གནས་ཀྱི་བར་དུ་༸རྒྱལ་བའི་༸སྐུ་ཕྲེང་རིམ་བྱོན་རྣམས་ངེས་ཕེབས་ཡོང་བའི་གསོལ་བ་ཕུར་ཚུགས་སུ་འདེབས་པ་མ་ཟད་༸རྒྱལ་བའི་ཡང་སྲིད་ངོས་འཛིན་གནང་རྒྱུའི་འགན་དབང་ཆ་ཚང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཉིད་མཆོག་དང་། ༸གོང་ས་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་ཁོ་ནར་ཡོད་པ་ལས་གཞན་རྒྱལ་ཁབ་དང་གཞུང་། སྒྲིག་འཛུགས། མི་སྒེར་བཅས་སུ་ལའང་མེད་པའི་གྲོས་ཆོད་བཞག་གནང་ཡོད་པ་རེད།

ཉེ་ཆར་ཕྱི་ཚེས་ ༣ ཉིན་དབུ་འཛུགས་ཀྱིས་ཚེས་ ༥ བར་བཞུགས་སྒར་གངས་སྐྱིད་ཚོགས་ཁང་གསར་པའི་ནང་དུ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ པའི་དགོངས་དོན་འོག་ཚོགས་དྲུང་ལས་ཁུངས་ཀྱི་རྐང་འགན་བཞེས་ཐོག་བསྐོང་ཚོགས་གནང་བའི་དམིགས་བསལ་ཚོགས་ཆེན་ཐེངས་གསུམ་པ་དེ་རིང་དངོས་སུ་མཇུག་སྒྲིལ་དང་སྦྲགས། ༸གོང་ས་༸སྐྱབས་མགོན་༸སྐུ་ཕྲེང་བཅུ་བཞི་པ་ཆེན་པོ་མཆོག་བོད་མི་རྩམ་ཟན་ཡོངས་ཀྱི་འདི་ཕྱི་གཉིས་ཀྱི་མགོན་སྐྱབས་དཔུང་གཉེན་དམ་པར་མུ་མཐུད་བཞུགས་གནང་ཡོང་བ་དང་། ཇི་སྲིད་བོད་ཁ་ཅན་གྱི་འགྲོ་བ་ནམ་གནས་ཀྱི་བར་དུ་༸རྒྱལ་བའི་༸སྐུ་ཕྲེང་རིམ་བྱོན་རྣམས་ངེས་ཕེབས་ཡོང་བའི་མགྲིན་དབྱངས་གཅིག་གྱུར་གྱི་གསོལ་འདེབས་རྒྱུ་སོགས་ཀྱི་གྲོས་ཆོད་ཁག་གཅིག་གཏན་འབེབས་གནང་སོང་། ཐེངས་འདིའི་དམིགས་བསལ་ཚོགས་ཆེན་གྱི་བརྗོད་གཞི་གཙོ་བོ་ནི་བོད་མིའི་སྒྲིག་འཛུགས་ཀྱི་ལོ་ལྔ་དང་ལྔ་བཅུའི་འཆར་གཞི་དང་། ༸རྒྱལ་དབང་༸སྐུ་ཕྲེང་ན་རིམ་དང་བོད་མི་མང་དབར་གྱི་འབྲེལ་ལམ་ཞེས་ཆགས་ཀྱི་ཡོད་པ་ལྟར། ཚོགས་དུས་རིང་ལ་ཚོགས་བཅར་བ་རྣམ་པ་ཚོགས་ཆུང་བཅུར་ཆ་བགོད་གནང་སྟེ་བརྗོད་གཞི་གཉིས་པོའི་ཐོག་ས་གནས་མི་མང་གི་དགོངས་འཆར་བསྡུ་རུ་བྱུང་ཁག་སྙན་སྒྲོན་དང་། དགོངས་ཚུལ་གསར་པ་གང་ཡོད་རྣམས་སྤུངས་ཏེ་གྲོས་བསྡུར་སྦྱང་བཤད་གནང་མཐར་དེ་རིང་ཚོགས་དུས་ཉིན་མཐའ་མའི་ཐོག་༸རྒྱལ་དབང་༸སྐུ་ཕྲེང་ན་རིམ་དང་བོད་མི་མང་དབར་གྱི་འབྲེལ་ལམ་དང་འབྲེལ། ཚོགས་བཅར་བ་རྣམ་པ་མགྲིན་དབྱངས་གཅིག་གྱུར་གྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་༸སྐུ་ཕྲེང་བཅུ་བཞི་པ་ཆེན་པོ་མཆོག་༸སྐུ་ཚེ་༸ཞབས་པད་བསྐལ་པ་བརྒྱ་ཕྲག་བར་བོད་མི་རྩམ་ཟན་ཡོངས་ཀྱི་འདི་ཕྱི་གཉིས་ཀྱི་མགོན་སྐྱབས་དཔུང་གཉེན་དམ་པར་མུ་མཐུད་བཞུགས་གནང་ཡོང་བའི་གསོལ་བ་ཕུར་ཚུགས་སུ་འདེབས་རྒྱུ་དང་། ཇི་སྲིད་བོད་ཁ་ཅན་གྱི་འགྲོ་བ་ནམ་གནས་ཀྱི་བར་དུ་༸རྒྱལ་བའི་སྐུ་ཕྲེང་རིམ་བྱོན་རྣམས་ངེས་ཕེབས་ཡོང་བའི་མགྲིན་དབྱངས་གཅིག་གྱུར་གྱི་གསོལ་བ་ཕུར་ཚུགས་སུ་འདེབས་རྒྱུ། ༸རྒྱལ་བའི་ཡང་སྲིད་ངོས་འཛིན་གནང་རྒྱུའི་འགན་དབང་ཆ་ཚང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཉིད་མཆོག་དང་། ༸གོང་ས་ཏཱ་བླའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་ཁོ་ནར་ཡོད་པ་ལས་གཞན་རྒྱལ་ཁབ་དང་གཞུང་། སྒྲིག་འཛུགས། མི་སྒེར་བཅས་སུ་ལ་ཡང་མེད། དེ་བཞིན་རྒྱ་ནག་གཞུང་གིས་དེ་སྔོན་བོད་བརྒྱུད་ནང་བསྟན་གྱི་སྤྲུལ་སྐུ་ངོས་འཛིན་བྱས་པ་སྤྱི་དང་། ལྷག་པར་དུ་ཕྱི་ལོ་ ༢༠༠༧ ལོར་གཏན་འབེབས་གནང་བའི་བླ་སྤྲུལ་ཡང་སྲིད་ངོས་འཛིན་བྱེད་ཕྱོགས་ཀྱི་བཙན་བཀའ་ཨང་ལྔ་པའི་བརྒྱུད་༸རྒྱལ་བའི་ཡང་སྲིད་ངོས་འཛིན་བྱེད་ཕྱོགས་ཐད་བྱུས་ངན་བཏོན་དང་འདོན་བཞིན་པ་དེར་དགག་པ་མཐའ་ཅིག་ཏུ་བྱ་རྒྱུ་ཞེས་གྲོས་ཆོས་ནང་གསེས་བཞི་ཅན་ཞིག་སྤྱི་མོས་ཀྱིས་གཏན་འབེབས་གནང་ཡོད།   ཚོགས་ཆེན་གྱི་གྲོས་གཞི་ལྔ་དང་ལྔ་བཅུའི་འཆར་གཞི་དང་འབྲེལ་ཏེ་ཚོགས་ཆུང་སོ་སོའི་རྒྱབ་གཉེར་ཁག་དང་རྒྱ་ཆེའི་མང་ཚོགས་ཀྱི་དགོངས་འཆར་ཡིག་ཐོག་ཏུ་གང་ཡོད་པ་རྣམས་བཀའ་སྤྱི་གཉིས་ནས་བཀའ་བསྡུར་དཔྱད་ཞིབ་གནང་སྟེ་ཕྱག་བསྟར་གནང་རྒྱུ་ཡིན་ཞེས་སྤྱི་མོས་ཀྱིས་གྲོས་ཆོད་གཏན་འབེབས་གནང་ཡོད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ད་རེས་༸གོང་ས་མཆོག་དང་༸སྐུའི་ཡང་སྲིད་ཀྱི་གནད་དོན་ཐོག་སྤྱི་མོས་ཀྱིས་གྲོས་ཆོད་བཞག་ཐུབ་པ་དེ་རྒྱལ་རབས་ལོ་རྒྱུས་དང་རྩ་དོན། དེ་བཞིན་ཆོས་ཕྱོགས་བཅས་ཕྱོགས་ཡོངས་ནས་རླབས་ཆེན་གྱི་བརྡ་ལན་ཞིག་བཏང་ཐུབ་ཡོད་ཅེས་གསུངས་སོང་། དེ་བཞིན་ཐེངས་འདིའི་ཚོགས་ཆེན་ཐོག་ལྔ་དང་ལྔ་བཅུའི་ལས་གཞི་དང་འབྲེལ་བའི་དགོངས་འཆར་ཕེབས་པ་ཁག་ཕྱག་བསྟར་ཇི་ཐུབ་གནང་ངེས་དང་། མ་འོངས་པར་དགོངས་འཆར་གནང་སྐབས་ཆབ་སྲིད་དང་རྩ་དོན་ཐོག་དགོངས་པ་ཆེ་ཙམ་བཞེས་རྒྱུ་གལ་ཆེན་པོ་ཆགས་ཀྱི་འདུག་ཅེས་གསུངས་པ་དང་ཆབས་ཅིག་ཏུ་ ལོ་རྗེས་མ་སྟེ་ཕྱི་ལོ་ ༢༠༢༠ ལོ་དེ་༸གོང་ས་མཆོག་ལ་ཐུགས་རྗེ་ཆེ་ཞུའི་ལོར་སྲུང་བརྩི་ཞུ་རྒྱུ་ཡིན་པ་ཡོངས་བསྒྲགས་གནང་སོང་།    གཞི་རྩའི་དམིགས་བསལ་ཚོགས་ཆེན་ཐེངས་གསུམ་པའི་ཐོག་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་ལྷན་ཁང་གི་སྐུ་ཚབ། བཀའ་ཟུར་དང་སྤྱི་ཟུར། དེ་བཞིན་རྒྱ་བལ་འབྲུག་གསུམ་གྱི་ས་གནས་འགོ་འཛིན་དང་ས་གནས་འཐུས་མིའི་སྐུ་ཚབ། བོད་རང་དབང་བདེན་པའི་ལས་འགུལ་ཚོགས་ཆུང་ཁག་གི་སྐུ་ཚབ་རྣམ་པ། བོད་མི་གནས་ཡུལ་ཕྱི་རྒྱལ་ཡུལ་གྲུག་ཁག་གི་བོད་རིགས་སྤྱི་མཐུན་ཚོགས་པ་དང་བོད་རིགས་ཚོགས་པའི་སྐུ་ཚབ། གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་བཅས་ཁྱོན་ས་གནས་ཁག་འདྲ་མིན་ ༢༤ ལྷག་ནས་ཚོགས་བཅར་བ་ ༣༤༠ ལྷག་མཉམ་ཞུགས་གནང་ཡོད་པ་དང་། ཚོགས་བཅར་བ་རྣམས་ལ་སང་རེས་གཟའ་ཉི་མའི་ཉིན་སྔ་དྲོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་དང་བཀའ་སློབ་བཀའ་དྲིན་བསྩལ་གྱི་ཡོད་པ་རེད།

བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ པའི་འོག་དམིགས་བསལ་ཚོགས་ཆེན་ཐེངས་གསུམ་པ་དེ་རིང་ཕྱི་ལོ་ ༢༠༡༩ ཟླ་ ༡༠ ཚེས་ ༣ ཉིན་བཞུགས་སྒར་གངས་སྐྱིད་ཚོགས་ཁང་གསར་པའི་ནང་དབུ་འཛུགས་གནང་བ་དང་འབྲེལ། ཐེངས་འདིའི་ཚོགས་ཆེན་ཐོག་༸གོང་ས་༸སྐྱབས་མགོན་ཆེན་པོ་མཆོག་ལ་༸སྐུ་འཕྲེང་རིམ་བྱོན་མུ་མཐུད་ཕེབས་གནང་ཡོང་བའི་གསོ་བ་ཕུར་ཚུགས་སུ་འདེབས་དགོས་ཞེས་གསུངས་སོང་། དེ་རིང་སྔ་དྲོ་ཚོུད་ ༩ ཐོག་དྷ་ས་གངས་སྐྱིད་ཚོགས་ཁང་གསར་པར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོ། དེ་བཞིན་ཆེས་མཐོའི་ཁྲིམས་ཞིབ་པ་ཆེ་བ་བཅས་ཀྱིས་དབུས་པའི་མང་གཙོའི་ཀ་བ་གསུམ་དང་རང་དབང་ཅན་གྱི་སྡེ་ཚན་ཁག་གི་མཛད་གཙོ་ལས་ཟུར་རྣམ་པ། སྲི་ཞུ་བའི་སྐུ་ཚབ། དེ་བཞིན་ཕྱོགས་མཐའ་ཁག་ནས་ཕེབས་པའི་ཚོགས་བཅར་བ་བཅས་ཁྱོན་མི་གྲངས་ ༣༠༠ ལྷག་ཙམ་ལྷན་འཛོམས་ཐོག་དམིགས་བསལ་ཚོགས་ཆེན་ཐེངས་གསུམ་པ་དབུ་འཛུགས་གནང་སོང་། ཐེངས་འདིའི་ཚོགས་ཆེན་གྱི་བརྗོད་གཞི་གཙོ་བོ་གཉིས་ཡོད་པ་ནི་ལྔ་དང་ལྔ་བཅུའི་ལས་འཆར་དང་༸རྒྱལ་དབང་སྐུ་འཕྲེང་ན་རིམ་དང་བོད་མི་དབར་གྱི་འབྲེལ་བ་བཅས་ཡིན་པ་ལྟར། དེ་རིང་ཚོགས་འདུ་དབུ་འབྱེད་ཀྱི་མཛད་སྒོའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་༸རྒྱལ་དབང་སྐུ་འཕྲེང་ན་རིམ་དང་བོད་མི་མང་དབར་ལོ་རྒྱུས་ཀྱི་རང་བཞིན་ལྡན་པའི་ཐུན་མོང་མ་ཡིན་པའི་འབྲེལ་བའི་ལོ་རྒྱུས་དང་བཀའ་ལུང། ལྷག་པར་དུ་༸གོང་ས་༸སྐུ་འཕྲེང་བཅུ་བཞི་པ་ཆེན་པོ་མཆོག་གིས་ཕྱི་ལོ་ ༢༠༡༡ ཕྱི་ཟླ་ ༩ པར་ཚོགས་པའི་ཆོས་ཚོགས་ཐེངས་ ༡༡ པའི་སྐབས་དང། དེ་བཞིན་ཕྱི་ལོ་ ༡༩༨༨ ལོའི་གསུམ་དུས་གསུང་འཕྲིན་ནང་༸སྐུའི་ཡང་སྲིད་དང་འབྲེལ་བའི་བཀའ་སློབ་རིམ་པ་བསྩལ་ཁག་ལུང་འདྲེན་དང་འབྲེལ་ཏེ་༸རྒྱལ་བའི་ཡང་སྲིད་ངོས་འཛིན་གནང་རྒྱུ་དེ་ནི་༸གོང་ས་མཆོག་༸སྐུ་སྒེར་གྱི་༸སྐུ་དབང་ཡིན་པ་དང། དེའང་༸ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་ཁོ་ན་ལ་ཡོད་པ་ལས་གཞུང་དང་། སྒྲིག་འཛུགས། སྒེར་སོགས་སུ་ལའང་མེད་པ་ནན་བརྗོད་གནང་སྟེ་དམིགས་བསལ་ཚོགས་ཆེན་ཐེངས་ ༣ པར་ཕེབས་པའི་ཚོགས་བཅར་བ་ཚང་མས་ཀྱང་དེའི་ཐོག་བཅོས་མིན་བློ་སེམས་གཅིག་ཏུ་བསྒྲིམ་ཏེ་ཚོར་ཤུགས་ཆེན་པོས་ཐག་གཅོད་གཙང་མ་ཞིག་གནང་ཐུབ་དགོས་པའི་སྐུལ་མ་གནང་སོང་། དེ་བཞིན་བོད་མིའི་སྒྲིགས་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཀྱང་རྒྱ་ནག་གཞུང་གི་ཕྱི་ལོ་ ༢༠༠༧ ལོར་ཡིག་ཆ་ཨང་ལྔ་པ་ཞེས་པ་ཞིག་འདོན་སྤེལ་བརྒྱུད་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་བྱེད་ཆོག་དེ་རྒྱ་ནག་གཞུང་གི་ཐད་ཀར་བཏང་འཛིན་དང་ངོས་འཛིན་བྱས་པའི་བླ་སྤྲུལ་ཡང་སྲིད་ ༡༣༠༠ ལྷག་ཡོད་པ་དེ་དག་ལ་ཆབ་སྲིད་སློབ་གསོ་སྤེལ་བ་སོགས་བརྒྱུད་ནས་མ་འོངས་པར་༸གོང་ས་མཆོག་གི་ཡང་སྲིད་ཀྱི་གནད་དོན་ཐོག་བདག་དབང་རྩོད་ཐབས་ཁྲོད་རྒྱ་ནག་དང་འབྲེལ་བ་ཡོད་པའི་འཛམ་གླིང་རྒྱལ་ཁབ་ཉམ་ཐག་རྣམས་ཀྱི་ནང་ལམ་ལྷོངས་ལྡན་ཐོག་རྒྱ་ནག་གི་འཁྱོག་བཤད་དྲིལ་བསྒྲགས་སྤེལ་བཞིན་པ་མ་ཟད། རྒྱ་གར་ལྟ་བུའི་སྟོབས་ཆེན་རྒྱལ་ཁབ་ལ་ཡང་༸སྐུའི་ཡང་སྲིད་ཀྱི་གནད་དོན་ཐོག་ཐད་བྱུས་བྱེད་རྒྱུ་མེད་པའི་རྡིག་ར་སྐུལ་བཞིན་ཡོད་པ་སོགས་འཆར་གཞི་ངན་པ་ཞིག་སྒྲིག་བཞིན་པའི་གནད་དོན་སོགས་ལུང་འདྲེན་དང་སྦྲགས། ཕགས་པ་སྤྱན་རས་གཟིགས་དང་བོད་གཉིས་ཁ་བྲལ་ཐབས་མེད་པ་དང། ༸རྒྱལ་དབང་༸སྐུ་འཕྲེང་རིམ་པ་ཕེབས་དགོས་པ་དེ་བོད་མི་ཡོངས་ཀྱི་མངོན་འདོད་དང་རེ་བ་ཡིན་པ་ལྟར་ང་ཚོས་ཐེངས་འདིའི་ཚོགས་ཆེན་ཐོག་ནས་༸གོང་ས་མཆོག་ལ་དེ་ལྟར་ཡོང་བའི་གསོལ་བ་ཕུར་ཚུགས་སུ་བཏབ་དགོས་པ་དང་དེ་ནི་ང་ཚོའི་འགན་ཡིན་ཞེས་གསུངས་སོང་། དེ་བཞིན་སྲིད་སྐྱོང་མཆོག་ནས་ལྔ་དང་ལྔ་བཅུའི་ལས་འཆར་དང་འབྲེལ་ཏེ་༸རྒྱལ་བའི་བཀའ་དགོངས་གཞིར་བཟུང་བོད་མིའི་འཕྲལ་ཕུགས་གཉིས་ཀར་སྨན་པའི་ལས་འཆར་ཞིག་ཡིན་པ་ངོ་སྤྲོདང་གནང་སྟེ་མི་རིང་བར་ལོ་ ༢༠ ནང་ལས་འཆར་དེའི་གྲུབ་འབྲས་སྨིན་རྒྱུར་ཐུགས་ཡིད་ཆེས་གཏན་ཁེལ་ཡོད་ཅེས་གསུངས་ཡོད། ལྷག་དོན་ལྔ་དང་ལྔ་བཅུའི་ལས་འཆར་དེ་དོན་ཕན་ལྡན་པ་དང་ལམ་ལྷོངས་ཡོང་བར་བོད་རྒྱ་ཆེ་མང་ཚོགས་ཀྱི་ཆ་ཤས་དང་དགོངས་འཆར་གནང་གལ་ཆགས་ཀྱི་ཡོད་སྟབས། དེ་སྔ་ལྔ་དང་ལྔ་བཅུའི་ཚོགས་འདུ་རིམ་པའི་ཐོག་བསྡུ་རུབ་གནང་བའི་དགོངས་ཚུལ་དང་དགོངས་འཆར་རྣམས་ཀྱི་ཐོག་ད་རེས་གཞི་རིམ་མང་ཚོགས་ཀྱི་དགོངས་འཆར་ཇི་ཕེབས་ཐོག་ལག་བསྟར་མཐིལ་ཕྱིན་པ་གནང་གི་རེད་ཅེས་གསུངས་སོང་། བཙན་བྱོལ་བོད་མིའི་དམིགས་བསལ་ཚོགས་ཆེན་ཐེངས་ ༣ པ་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་ཆེས་མཐོའི་ཁྲིམས་ཞིབ་པ་ཆེ་བ་མཆོག དེ་བཞིན་བོད་མི་མང་སྤྱི་འཐུས་ཚོགས་གཙོ་སྦྲེལ་པོ་དང། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ་བཅས་བོད་མིའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། ཆོས་བརྒྱུད་ཁག་གི་སྐུ་ཚབ། གཞུང་ཞབས་སྲི་ཞུ་ལས་བྱེད་སྡེ་ཚན་སོ་སོའི་སྐུ་ཚབ་རྣམ་པ། དེ་བཞིན་རྒྱ་བལ་འབྲུག་གསུམ་གཙོས་འཛམ་གླིང་རྒྱལ་ཁབ་ ༢༤ ཙམ་གྱི་ས་གནས་འཐུས་མི་ཚོགས་འདུའི་སྐུ་ཚབ་དང་ས་གནས་འགོ་འཛིན་རྣམ་པ། བོད་རང་དབང་བདེན་པའི་ལས་འགུལ་ཚོགས་ཆུང་ཁག་གི་སྐུ་ཚབ་རྣམ་པ། ས་འཐུས་མེད་པའི་ས་གནས་ཀྱི་སྐུ་ཚབ་དང་རང་སྐྱོང་སྡེ་ཚན་ཁག་གི་སྐུ་ཚབ། ཕྱི་རྒྱལ་ཡུལ་གྲུ་ཁག་གི་བོད་རིགས་སྤྱི་མཐུན་ཚོགས་པ་དང་བོད་རིགས་ཚོགས་པའི་སྐུ་ཚབ་རྣམ་པ། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་རྣམ་པ་བཅས་ཁྱོན་ཚོགས་བཅར་བ་ ༣༤༠ ལྷག་ཆེད་ཕེབས་གནང་འདུག རྩ་བའི་དམིགས་བསལ་ཚོགས་ཆེན་འདི་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ ནང་གསལ་ཛ་དྲག་དང་གལ་ཆེའི་དོན་གནད་ཐོག་རྒྱ་ཆེ་མང་ཚོགས་ཀྱི་བསམ་གྲོས་བསྡུ་དགོས་ཀྱི་གནས་ཚུལ་བྱུང་སྐབས། བཀའ་ཤག་དང་སྤྱི་འཐུས་ཚོགས་གཙོ་སྦྲེལ་པོ་བཅས་ གྲོས་བསྡུར་གྱི་བསྐོང་ཚོགས་གནང་བ་ཞིག་ཡིན་པ་རེད། དམིགས་བསལ་ཚོགས་ཆེན་ཐེངས་དང་པོ་དེ་ཕྱི་ལོ་ ༢༠༠༨ ལོར་འཚོགས་ཡོད་པ་དང་ཐེངས་གཉིས་པ་ཕྱི་ལོ་ ༢༠༡༢ ལོར་འཚོགས་ཡོད་པ་རེད།

དེ་རིང་སྔ་དྲོ་ཞོགས་པའི་ཆུ་ཚོད་༩ ཐོག་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་གི་མདུན་ཐང་དུ་སྲིད་སྐྱོང་བློ་བཟང་སེང་གེ་མཆོག་གིས་དབུས་བའི་བཀའ་བློན་ལྷན་རྒྱས་དབུ་བཞུགས་ཐོག་བདག་ཉིད་ཆེན་པོ་གྷཱཾ་དྷཱི་མཆོག་གི་༸སྐུའི་འཁྲུངས་ནས་མི་ལོ་ ༡༥༠ འཁོར་བའི་༸སྐུའི་འཁྲུངས་སྐར་གྱི་དུས་ཆེན་སྲུང་བརྩི་ཞུས་སོང་། སྐབས་དེར་སྲིད་སྐྱོང་མཆོག་གིས་རྒྱ་གར་གྱི་རྒྱལ་དར་བསྒྲེངས་འཛུགས་གནང་བ་དང་སྦྲགས། མང་ཚོགས་ཀྱིས་རྒྱལ་གར་གྱི་རྒྱལ་གླུ་བླངས་རྗེས་སྲིད་སྐྱོང་མཆོག་གིས་བདག་ཉིད་ཆེན་པོ་གྷཱཾ་དྷཱི་མཆོག་གི་༸སྐུ་པར་གྱི་མདུན་དུ་སྣང་གསལ་སྒྲོན་མེ་ཞལ་ཕྱེ་དང་མེ་ཏོག་གི་མཆོད་པ་ཕུལ་སོང་། གསར་འགོད་པར་སྲིད་སྐྱོང་མཆོག་གིས་དེ་རིང་གི་དུས་དྲན་ཁྱད་པར་ཅན་འདིར་རྒྱལ་གར་རྒྱལ་ཡོངས་ཀྱིས་བདག་ཉིན་ཆེན་པོ་གང་གི་དགོངས་པ་དང་མཐུན་པའི་ཕྱག་ལས་རྒྱ་ཆེར་གནང་གི་ཡོད་པ་དང་། དམ་པ་ཁོང་གི་དགོངས་པ་ནི་བདག་ཅན་གི་སྟོན་པ་ཤཱཀྱ་ཐུབ་པ་མཆོག་གི་དགོངས་པ་དང་མཐུན་པའི་འཚེ་མེད་ཞི་བ་དང་བྱམས་སྙིང་རྗེའི་བདག་ཉིད་ལྟ་བུ་ཞིག་ཡིན་པར་བརྟེན་བོད་མི་རྣམས་ཀྱིས་ཀྱང་ཁོང་གི་འཚེ་མེད་ཞི་བའི་ལམ་ནས་བོད་མིའི་འཐབ་རྩོལ་མུ་མཐུད་ནས་རྒྱུན་སྐྱོང་གནང་རྒྱུ་ཡིན་ཞེས་གསུངས་སོང་། སྲིད་སྐྱོང་མཆོག་གིས་ད་དུང་རྒྱ་གར་རྒྱལ་ཡོངས་ཀྱི་ནང་བདག་ཉིད་ཆེན་པོ་གྷཱཾ་དྷཱི་མཆོག་གི་༸སྐུའི་འཁྲུངས་སྐར་ཉིན་མོར་རྒྱ་གར་དབུས་གཞུང་གི་གཙང་བཟོའི་ལས་འགུལ་ Swatch Bharat Abhiyaan ཞེས་གྲོང་ཁྱེར་དང་གྲོང་གསེབ་ཁག་ལ་གཙང་བཟོ་གནང་བའི་ལུགས་སྲོལ་ཞིག་ཡོད་པར་རྒྱབ་སྐྱོར་དང་། ལྷག་པར་དུ་རྒྱ་གར་གཞུང་མང་གཉིས་ཀྱི་བཀའ་དྲིན་མཚོན་ཕྱིར་ཁོར་ཡུག་གཙང་བཟོའི་ལས་འགུལ་འདི་གོ་སྒྲིག་ཞུས་འདུག གཞི་རྩའི་གཙང་བཟོའི་ལས་གཞི་འདིའི་ནང་བོད་མིའི་སྒྲིག་གཞུགས་ཀྱི་སྲི་ཞུ་ལས་བྱེད་ཡོངས་ཀྱིས་ཁོར་ཡུག་གཙང་བཟོ་ཞེས་པའི་སྟོད་གོས་གྱོན་ནས་ལས་ཁུངས་རེ་རེ་ས་བགོས་ཀྱིས་གངས་སྐྱིད་ཀྱི་གཡས་གཡོན་ཡོངས་སུ་གཙང་བཟོའི་ལས་འགུལ་དབུ་འཛུགས་གནང་སོང་བ་དང་། བཞུགས་སྒར་ཁུལ་གྱི་ས་གནས་མི་མང་བཅས་ནས་མཉམ་ཞུགས་ཐོག་གངས་ཅན་སྐྱིད་གཤོངས་དང་། མེག་གྷན་ཁྲོམ་གཞུང་སོགས་ཉེ་འཁོར་གྱི་ས་གནས་དང་གཞུང་ལམ་བཅས་གཙང་བཟོ་གནང་ཡོད་པ་དེ་ནི་རྒྱ་གར་མི་མང་ལ་དྲིན་གསོ་བའི་རྒྱུ་ཆུང་ཆུང་ཞིག་ཏུ་འགྱུར་ངེས་ཡིན་པ་གསུང་སོང་།

ཉེ་སྔོན་ལྔ་དང་ལྔ་བཅུའི་ཚོགས་འདུ་ཐོག་བོད་མིའི་སྒྲིག་འཛུགས་ཀྱི་ལོ་ ༣༥ དང་ ༣༥ མན་གྱི་ལྔ་དང་ལྔ་བཅུའི་གཞོན་སྐྱེས་སྐུ་ཚབ་ལྔ་འདེམས་སྒྲུག་གནང་རྒྱུ་གསལ་བསྒྲགས་གནང་བ་བཞིན། དེ་རིང་སྲིད་སྐྱོང་བློ་བཟང་སེང་གེ་མཆོག་གིས་ལྔ་དང་ལྔ་བཅུའི་ཚོགས་ཆུང་གི་འདེམས་སྒྲུག་གནང་བའི་བུ་མོ་གཉིས་དང་བུ་གསུམ་བཅས་གཞོན་སྐྱེས་སྐུ་ཚབ་དེ་དག་གི་མཚན་གསལ་བསྒྲགས་གནང་སོང་། དེ་རིང་ཟླ་ ༡༠ ཚེས་ ༡ ཉིན་གྱི་སྔ་དྲོ་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་གསར་འགོད་ལྷན་ཚོགས་ཤིག་གནང་སྟེ་སྲིད་སྐྱོང་མཆོག་གིས་ལྔ་དང་ལྔ་བཅུའི་གཞན་སྐྱེས་སྐུ་ཚབ་ལྔ་པོ་དེ་དག་གི་མཚན་དང་ལོ་རྒྱུས་བཅས་ཡོངས་བསྒྲགས་གནང་སོང་བ་དང། ཁོང་རྣམས་ནི་རྒྱ་གར་བྱང་ཕྱོགས་ལྡེ་ར་ལྡུན་ཁུལ་ནས་ཡིན་པའི་ལྷ་རོང་ལགས་དང། ཨ་རིའི་མི་ནེ་སོ་ཊ་ནས་ཡིན་པ་བསྟན་འཛིན་ནོར་སྒྲོན་ལགས། རྒྱ་གར་ནང་སྐྱེས་ཤིང་ཕྱིས་སུ་ཁེ་ན་ཌ་ནང་གནས་སྤོ་གནང་བ་བསྟན་འཛིན་ནོར་འཛིན་ལགས། སུད་སི་ནང་སྐྱེས་ཤིང་འཚར་ལོངས་བྱུང་བ་ལྷ་ནིང་སྐལ་བཟང་རྡོ་རྗེ་ལགས། ཨོ་སི་ཊོ་ལི་ཡའི་ Melborne གྲོང་ཁྱེར་ནས་ཡིན་པའི་མགོན་པོ་བཀྲ་ཤིས་ལགས་བཅས་ཡིན་པ་རེད། སྐབས་དེར་སྲིད་སྐྱོང་མཆོག་གིས་རྩ་བའི་མ་འོངས་པར་རྒྱ་བལ་འབྲུག་གསུམ་དང་ཕྱི་རྒྱལ་དུ་ཡོད་པའི་བོད་མིའི་གྲངས་འབོར་དེ་བརྒྱ་ཆ་ ༥༠༌༥༠ ཆགས་ངེས་ཡིན་པ་ལྟར། ཕྱི་རྒྱལ་ནང་ཡོད་པའི་བོད་མི་རྣམས་དང་ལྷག་པར་དུ་གཞོན་སྐྱེས་རྣམས་ལ་བོད་མི་རིགས་ཀྱི་ངོ་བོ་འཛིན་དགོས་པ་དང། བོད་ཀྱི་རྩ་དོན་དང་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་གནང་དགོས་པ། དེ་དག་ཆེད་དུ་ཞབས་ཞུ་སྒྲུབ་དགོས་པ། དེ་བཞིན་བོད་མིའི་སྒྲིག་འཛུགས་ལ་ཞབས་འདེགས་ཞུ་དགོས་པའི་གོ་རྟོགས་དང་སྐུལ་མ་སྤེལ་ཕྱིར་ལྔ་དང་ལྔ་བཅུའི་ཚོགས་འདུ་ཐེངས་གཉིས་ཚོགས་ཟིན་པ་དང་འབྲེལ། སྔ་ལོར་ཐག་གཅོད་བྱུང་བ་ལྟར་ཚོགས་འདིའི་ནང་མཉམ་ཞུགས་གནང་མཁན་བོད་རིག་གཞོན་སྐྱེས་ཁོངས་ནས་གཞོན་སྐྱེས་ལྔ་པོ་དེ་དག་འདེམས་སྒྲུབ་གནང་ཡོད་སྐོར་གསུངས་པ་དང་ཆབས་ཅིག་ཏུ་བོད་མི་ལྔ་པོ་དེ་དག་བདུན་ཕྲག་གཉིས་ཙམ་གྱི་རིང་ལ་བཙན་བྱོལ་བོད་མིའི་སྤྱི་ཚོགས་དང་བོད་མིའི་སྒྲིག་འཛུགས། དབུ་མའི་ལམ་གྱི་སྲིད་བྱུས་བཅས་ངོ་སྤྲོད་གནང་རྗེས་སུ་ཁོང་རྣམས་མ་འོངས་པར་ལྔ་དང་ལྔ་བཅུའི་ཚོགས་འདུའི་ཚོགས་ཆུང་ནང་ཞུགས་ཏེ་ཚོགས་འདུ་བཏང་འཛིན་གནང་རྒྱུ་དང་། སོ་སོའི་ས་གནས་སུ་སྐུ་ཚབ་དོན་ཁང་དང་མཉམ་དུ་གཞོན་སྐྱེས་རྣམས་ལ་གོ་རྟོགས་སྤེལ་རྒྱུའི་འགན་ཁུར་བཞེས་རྒྱུ་ཡིན་པ་རེད་འདུག རྩ་བའི་ཐེངས་འདིའི་གཞོན་སྐྱེས་སྐུ་ཚབ་འདེམས་སྒྲུག་གནང་བའི་སྐབས་སུ་ལྔ་དང་ལྔ་བཅུའི་ཚོགས་འདུ་ཐོག་བཀའ་སློབ་གནང་མཁན་གྱི་གཞོན་སྐྱེས་རྣམས་ཚུད་མེད་པ་དེ་ལྟར་ཡང། སླད་མར་ཁོང་རྣམས་ཡང་འོས་མིའི་ཁུངས་སུ་བཞག་རྒྱུ་རེད་འདུག ད་རེས་གཞོན་སྐྱེས་སྐུ་ཚབ་དེ་དག་ལོ་འདིའི་གཞོན་སྐྱེས་ལྔ་དང་ལྔ་བཅུའི་ཚོགས་འདུའི་ནང་འཛམ་གླིང་རྒྱལ་ཁབ་ ༡༣ ཙམ་ནས་ཕེབས་པའི་རང་ལོ་ ༢༠ ནས་ ༣༥ བར་གྱི་བོད་རིག་གཞོན་སྐྱེས་འབའ་ཞིག་ཆགས་ཀྱི་ཡོད་པ་དང་། སྐུ་ཚབ་ཀྱི་འགན་ཁུར་བཞེས་རྒྱུ་དང་འབྲེལ་ནས་རྒྱ་གར་ནང་གི་བོད་མིའི་སྒྲིག་འཛུགས་དང་བཙན་བྱོལ་བོད་མིའི་སྤྱི་ཚོགས་རྒྱུས་ལོན་ཆེད་བདུན་ཕྲག་གཉིས་ཙམ་གྱི་རིང་དུས་ཚོད་གནང་ཐུབ་མཁན་ཤ་སྟག་འདེམས་སྒྲུག་གནང་ཡོད་པ་རེད།

དེ་རིང་ཚོགས་གཙོ་པདྨ་འབྱུང་གནས་མཆོག་དབུ་བཞུགས་ཐོག་སྔ་དྲོ་ཕྱི་དྲིལ་ལས་ཁུངས་དང་ཉིན་རྒྱབ་འཕྲོད་བསྟེན་ལས་ཁུངས་ཀྱི་ལོ་ཁོར་ལས་བསྡོམས་ཐོག་སྤྱི་འཐུས་རྣམ་པའི་བགྲོ་གླེང་དང་འཕྲོས་སྐྱོང་ཡོད་ཐོག་གོ་སྐབས་གནང་རྗེས་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པ་མཇུག་སྒྲིལ་གནང་སོང་། སྐབས་དེར་ཚོགས་གཙོས་འཛིན་སྐྱོང་བཀའ་ཤག་ནས་སྤྱི་འཐུས་རྣམ་པའི་དགོངས་འཆར་ཇི་ཕེབས་ཁག་གལ་ཆེན་པོར་ངོས་བཞེས་ཀྱིས་དེ་དག་ཕྱག་བསྟར་གནང་དགོས་པ་དང། ཕྱག་བསྟར་གནང་མ་ཐུབ་ཚེ་དེ་ལྟར་མ་ཐུབ་པའི་ལན་གསོལ་པོ་གནང་དགོས་གལ་ཡིན་པ། སྤྱི་འཐུས་རྣམ་པའི་ངོས་ནས་ཀྱང་སྤྱི་འཐུས་རྣམ་པ་དང་མི་མང་དབར་རྒྱང་ཐག་མེད་པ་བཟོ་ཆེད་དུ་ས་གནས་ཁག་ལ་ས་བགོས་གནང་སྟེ་འཚམས་གཟིགས་ཕེབས་རྒྱུ་གོ་སྒྲིག་གནང་གི་ཡོད་པ་བཞིན་སྤྱི་འཐུས་རྣམས་ནས་དེ་ལྟར་གཙིགས་ཆེར་ངོས་བཞེས་ཀྱིས་ཕྱག་བསྟར་གནང་གནད་ཡིན་པ་གསུངས་སོང་། ཚོགས་གཙོ་མཆོག་གིས་ད་དུང་ཚོགས་དུས་བརྒྱད་པ་འདིའི་ཐོག་བགྲོ་གླེང་ཤུགས་ཆེ་བྱུང་བའི་གནད་དོན་ཁག་གཅིག་གི་ཐོག་ལམ་སྟོན་དང་དགོངས་འཆར་ཁག་གཅིག་གནང་བའི་ཁོངས་སུ་ད་ལན་ནང་སྲིད་ཀྱི་ལས་བསྡོམས་དང་འབྲེལ་ས་ཁང་གི་སྒྲིག་གཞིའི་ཐོག་གླེང་སློང་ཤུགས་ཆེ་བྱུང་སྐོར་དང་འབྲེལ། ས་ཁང་གི་སྒྲིག་གཞི་དེ་དག་ནི་དེ་སྔ་སྤྱི་འཐུས་སྐབས་ ༡༣ པའི་སྐབས་སུ་འཛིན་སྐྱོང་གི་དགོས་མཁོ་བཞིན་གཏན་འབེབས་གནང་བ་ཆགས་ཀྱི་ཡོད་པ་དང་དེའི་ཐོག་འཛིན་སྐྱོང་རིམ་པས་བསྐྱར་བཅོས་ཀྱི་གྲོས་འཆར་རིམ་པ་ཆེད་བཏོན་དང་འགྱུར་བ་རིམ་པ་བཏང་ཡོད་ཀྱང་། དུས་ད་ལྟའང་ས་ཁང་སྒྲིག་གཞི་གཞིར་བཟུང་ཕྱག་བསྟར་གནང་ཐུབ་ཀྱི་མེད་པའི་རྣམ་པ་གསལ་པོ་མངོན་རྒྱུ་ཡོད་སྟབས། དམིགས་བསལ་ཚོགས་ཆུང་ཞིག་བསྐོ་འཛུགས་གནང་སྟེ་ས་གནས་སོ་སོའི་གནས་སྟངས་ལ་གཞིགས་ཏེ་ཞིབ་འཇུག་གིས་བསྐྱར་བཅོས་གནང་ཐུབ་ཚེ་དགེ་མཚན་སྐོར་ལམ་སྟོན་གནང་སོང། དེ་བཞིན་ཉམ་ཐག་གི་གནས་སྟངས་དང་འབྲེལ་ཏེ་ང་ཚོའི་སྲིད་བྱུས་དེ་ཉམ་ཐག་མེད་པ་བཟོ་རྒྱུ་དེ་ཡིན་སྟབས། ད་བར་གྱི་ཉམ་ཐག་གཟིགས་སྐྱོང་གནང་ཕྱོགས་དེ་འགྲིག་ཡོད་མེད་ཐོག་ཐུགས་ཞིབ་གནང་དགོས་པ་མ་ཟད་ཐེངས་འདིའི་གྲོས་ཚོགས་ཐོག་སྤྱི་འཐུས་ཁག་གཅིག་ནས་ཨོ་སི་ཊོ་ལི་ཡའི་ Sydney བོད་རིགས་སྤྱི་མཐུན་ཚོགས་པ་དང་སྐུ་ཚབ་དོན་གཅོད་ཕྱོགས་གཉིས་དབར་རྩོད་རྙོག་ཐོག་གླེང་སློང་བྱུང་བ་བཞིན་དཀའ་རྙོག་དེ་རིགས་མེད་པ་བཟོ་དགོས་པ་དང་མ་འོངས་པར་དེ་ལྟར་མི་ཡོང་བ་གནང་དགོས་པ་སོགས་ཀྱི་ལམ་སྟོན་གནང་ཡོད། གྲོས་ཚོགས་ཐོག་སྲིད་སྐྱོང་མཆོག་གིས་བོད་རྒྱ་འབྲེལ་མོལ་གྱི་གནད་དོན་དང་འབྲེལ་ནས་༸དཔལ་ལྡན་དགའ་ལྡན་ཕོ་བྲང་གི་དྲུང་ཆེ་མཚན་སྨོས་པ་བཅས་ཀྱི་ཁྲོད་སྤྱི་འཐུས་ཁག་གཅིག་ནས་དེའི་ཐོག་གླེང་སློང་རིམ་པ་བྱུང་བ་ལྟར། དེ་རིང་ཚོགས་གཙོ་མཆོག་གིས་མ་འོངས་པར་གྲོས་ཚོགས་ཚོགས་པའི་སྐབས་སུ་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་ཕྱག་ལས་གནང་ཕྱོགས་འགྲིག་དང་མ་འགྲིག་སྐོར་ལ་གླེང་སློང་གནང་རྒྱུ་མེད་པའི་འབོད་སྐུལ་བསྐྱར་ནན་གནང་ཡོད། རྩ་བའི་གྲོས་ཚོགས་ཚོགས་དུས་བརྒྱད་པ་འདིའི་ཐོག་གཙོ་བོ་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ལྷན་ཁང་ཁག་གི་ལོ་འཁོར་ལས་བསྡོམས་སྙན་སྒྲོན་དང་དེ་དག་ཐོག་བགྲོ་གླེང་གནང་ཡོད་པ་དང། དེ་བཞིན་བོད་ནང་གི་ཛ་དྲག་གནས་སྟངས་དང་འབྲེལ་བའི་དོན་ཚན་ལྔ་ཅན་གྱི་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་གཅིག གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོས་ ༩ དེ་བཞིན་མང་གཙོ་རྩིས་ཁྲ་ཚོགས་ཆུང་བསྐོ་འཛུགས་དགོས་པའི་གྲོས་ཆོད་གྲོས་འཆར་གཅིག་བཅས་གཏན་འབེབས་གནང་ཡོད་པ་རེད། དེ་མིན་ཆེས་མཐོའི་ཁྲིམས་ཞིབ་པ་ཆེ་བ་གཅིག་དང་ཁྲིམས་ཞིབ་པ་གཞན་གཅིག དབུས་འོས་བསྡུ་ལས་ཁངས་དང་གཞུང་ཞབས་འདེམས་བསྐོ་ལྷན་ཁང་གི་ཚོགས་གཙོ་གཅིག་ལྕོགས་བཅས་གསར་འདེམས་དང་ཁྲིམས་བཟོའི་ལས་དོན་ཁག་ ༦ ཙམ་ཐོག་ཕེབས་པ་སོགས་ཡིག་ཆ་ཨང་ ༥༣ ཙམ་འགྲེམས་སྤེལ་གནང་ཡོད་པ་རེད། དེ་བཞིན་ཡོ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཡོ་རོབ་རྒྱལ་ཁབ་ཁག་ཅིག་ཏུ་བོད་དོན་ལས་འགུལ་སྤེལ་བཞིན་པ་དང་འབྲེལ་ནས་གྲོས་ཚོགས་སུ་བཅར་མ་ཐུབ་པ་མ་གཏོགས་ཐེངས་འདིའི་གྲོས་ཚོགས་ཐོག་ཚོགས་གཙོ་གཞོན་པ་མཆོག་གིས་དབུས་པའི་སྤྱི་འཐུས་ཞལ་གྲངས་ ༤༢ ནས་མཉམ་ཞུགས་གནང་ཡོད་པ་རེད།