Tibetan Royal Year of 2151 | Year of the Wood Dragon

བོད།

འཇམ་དབྱངས་རྡོ་རྗེ་ལགས་ཀྱི་གནས་སྟངས་ཤེས་རྟོགས་མེད་པར་གྱུར་འདུག

བོད་མདོ་ཁམས་དཀར་མཛེས་རྫོང་གི་ཉེ་འདབས་སུ་རྟེན་གཞི་བྱས་པའི་འབུ་ཆུ་གྲོང་ནས་ཡིན་པའི་འཇམ་དབྱངས་རྡོ་རྗེ་ལགས་ཀྱིས་ཟླ་འདིའི་ཕྱི་ཚེས་ ༡༤ ཉིན་རྫོང་ཐོག་ཏུ་ ‘༸གོང་ས་མཆོག་བོད་ལ་གདན་འདྲེན་ཞུ་དགོས། བོད་ལ་རང་དབང་དགོས་’ ཞེས་རྒྱ་གཞུང་ལ་ཞི་རྒོལ་གནང་སྟབས། རྒྱ་གཞུང་ཉེན་རྟོག་པས་ཁོང་འཛིན་བཟུང་བྱས་འདུག དེ་ཡང་ཟླ་འདིའི་ཕྱི་ཚེས་ ༡༤ སྟེ་བོད་ཟླ་ ༡ ཚེས་ ༦ ཉིན་གྱི་སྔ་དྲོ་འཇམ་དབྱངས་རྡོ་རྗེ་ལགས་ཀྱིས་དཀར་མཛེས་རྫོང་ཐོག་ཏུ་རྒྱ་གཞུང་ལ་༸གོང་ས་མཆོག་བོད་ལ་གདན་འདྲེན་ཞུ་དགོས། བོད་ལ་རང་དབང་དགོས་ཞེས་ཞི་འབོད་གནང་མ་ཐག་རྒྱ་གཞུང་གི་ཉེན་རྟོག་པས་འཛིན་བཟུང་གིས་བཙོན་འཇུག་བྱས་འདུག ད་ལྟའི་ཆར་ཁོང་བཙོན་ཁང་གང་དུ་བཀག་ཉར་བྱེད་ཡོད་མེད་དང་ཁོང་གི་གནས་སྟངས་ཇི་ཆགས་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་མེད་པ་རེད། འོན་ཀྱང་གནས་ཚུལ་དེ་ཕྱིར་མི་གྱར་བའི་ཆེད་དུ་ཁོང་གི་ནང་མི་གཙོས་པའི་གཉེན་ཉེ་རྣམ་པའི་ཁ་པར་ཨང་གྲངས་དང་སྐད་འཕྲིན་སོགས་འབྲེལ་ཡོད་ཉེན་རྟོག་ལས་ཁུངས་སུ་ཐོ་འགོད་དགོས་པའི་དམ་དྲག་བྱས་ཡོད་པ་རེད། རྩ་བའི་འཇམ་དབྱངས་རྡོད་རྗེ་ལགས་ནི་མདོ་ཁམས་དཀར་མཛེས་རྫོང་གི་ཉེ་འཁྲིས་སེར་ཤུལ་ཤང་ཡ་ག་པའམ་འབུ་ཆུ་གྲོང་ནས་ཡིན་པ་དང། ད་ལྟ་རང་ལོ་ ༤༡ ཙམ་རེད་འདུག ཁོང་ནི་སངས་རྒྱས་རྒྱ་མཚོ་དང་རིག་འཛིན་ལྷ་མཚོ་གཉིས་ཀྱི་བུ་ཡིན་འདུག ལྷག་དོན་ཁོང་དབྱང་དུས་སུ་འབྲོག་སར་བཞུགས་ཀྱི་ཡོད་པ་དང་། དགུན་དུས་སུ་རང་ཁྱིམ་དུ་ཕ་མ་གཉིས་པོར་ཞབས་ཕྱི་ཞུ་ནས་བཞུགས་ཀྱི་ཡོད་པ་རེད་འདུག ལྷག་དོན་བོད་ཀྱི་ལོ་གསར་འཆར་ལ་ཉེ་བའི་སྔ་རོལ་ནས་རྒྱ་གཞུང་གིས་དཀར་མཛེས་ས་གནས་རྫོང་ཁག་མང་པོའི་ནང་སྐད་འཕྲིན་བརྒྱུད་ལམ་བཀག་འགོག་གིས་དམ་དྲག་སྔར་ལྷག་བྱས་ཡོད་པ་རེད།

བོད་ནང་དུ་༸རྒྱལ་བའི་ཞབས་རིམ་གསོག་སྒྲུབ།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ད་ལྟ་ཨ་རིའི་མི་ནེ་སོ་ཊ་ Minnesota མངའ་སྡེའི་གྲོང་ཁྱེར་ Rochester ནང་དུ་༸སྐུའི་འཕྲོད་བཞེས་བརྟག་དཔྱད་གནང་ནས་སྐུ་ངལ་གསོ་བཞུགས་མཛད་བཞིན་ཡོད་པའི་མཚམས་འདིར།  བོད་ཕྱི་ནང་གཉིས་སུ་༸སྐུའི་འཕྲོད་བཞེས་བརྟག་དཔྱད་ཁག་ལམ་ལྷོང་ལྡན་པ་ཡོང་ཕྱིར་གསོལ་འདེབས་སྨོན་ལམ་སོགས་གསོག་སྒྲུབ་ཞུ་མུས་ཡིན་པ་ལྟར།  ཁྱད་པར་དུ་བོད་མདོ་ཁམས་རྫ་ཆུ་ཁའི་ཁྲི་འདུ་རྫོང་མཁར་ནང་སོ་དགོན་དགེ་ལྡན་བཤད་སྒྲུབ་ཐུབ་བསྟན་འཕེལ་རྒྱས་གླིང་དང་མཁར་ནང་སྡེ་བའི་ས་གནས་མང་ཚོགས་སྟོང་ཕྲག་ཁ་ཤས་ནས་༸སྐུ་ཕྱྭའི་ཞབས་རིམ་རྒྱ་ཆེ་གསོག་སྒྲུབ་གནང་འདུག དེ་ཡང་བོད་མདོ་ཁམས་རྫ་ཆུ་ཁའི་མཁར་ནང་དགོན་གྲོང་གཉིས་ནས་༸གོང་ལ་བོད་ལུགས་ལྟར་དགུང་གྲངས་ ༨༠ ཕེབས་པར་༸སྐུའི་གྱ་སྟོན་ལ་བཀྲིས་པའི་རྟེན་འབྲེལ་གྱི་ལེགས་སྐྱེས་དང། ལྷག་དོན་མགོན་པོ་༸གང་ཉིད་མཆོག་ཨ་རིའི་མི་ནེ་སོ་ཊ་ Minnesota མངའ་སྡེའི་གྲོང་ཁྱེར་ Rochester ནང་དུ་༸སྐུའི་འཕྲོད་བཞེས་བརྟག་དཔྱད་གནང་བཞིན་པར་ཆེད་དམིགས་ཀྱིས་གཟའ་འཁོར་གཅིག་རིང་མ་ཎི་དུང་གྲུབ་ཚོགས་པ་དང་འདི་བཞིན་གཟའ་འཁོར་གཅིག་རིང་གུ་རུའི་འབུམ་ཚོགས་འཚོགས་འདུག གཞན་ཡང་མཁར་ནང་སེར་སྐྱ་མང་ཡོངས་ནས་ཆོ་འཕྲུལ་སྨོན་ལམ་ཆེན་མོའི་བོད་ཚེས་ ༡༦ ཉིན་༸རྒྱལ་བ་པཎ་ཆེན་རྣམ་གཉིས་ཀྱི་སྐུ་པར་གཙོས་དགོན་པའི་མཁན་སྤྲུལ་སྐུ་པར་གདན་ཞུས་ཀྱིས་རང་ནུས་གང་ཡོད་དཔག་པའི་༸རྒྱལ་བའི་༸སྐུ་ཕྱྭའི་ཞབས་རིམ་རྒྱ་གང་ཆེ་གསོག་སྒྲུབ་ཞུ་རྒྱུའི་དམ་འབུལ་དང་དོལ་རྒྱལ་བསྟེན་སྲོལ་བྱ་རྒྱུ་མིན་པའི་མནའ་སྐྱེལ་དམ་འབུལ་ཡང་གནང་འདུག      

གྲྭ་སྒོ་དམར་ཆོས་འཕེལ་ལགས་ལ་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་པ།

བོད་རེབ་གོང་རོང་པོ་དགོན་ཆེན་གྱི་གྲྭ་སྒོ་དམར་ཆོས་འཕེལ་ལགས་རྒྱ་གཞུང་གིས་འཛིན་བཟུང་བྱས་ཏེ་ལོ་གཉིས་རིང་བཙོན་འཇུག་བྱ་རྒྱུའི་ཁྲིམས་ཐག་བཅད་འདུག     དེ་ཡང་ཟླ་འདིའི་ཚེས་ ༡༧ ཉིན་བོད་རེབ་གོང་རོང་པོ་དགོན་ཆེན་གྱི་གྲྭ་སྒོ་དམར་ཆོས་འཕེལ་ལགས་ལ་རྨ་ལྷོ་ཁུལ་མི་དམངས་འབྲིང་རིམ་ཁྲིམས་ཁང་གིས་ཁོང་ནས་༸གོང་ས་མཆོག་གི་༸སྐུ་པར་བདག་ཉར་གནང་སྟེ། ཆ་འཕྲིན་བརྒྱུད་ལམ་ཁག་ཏུ་༸གོང་ས་མཆོག་གི་༸སྐུ་པར་བཀྲམས་ཏེ་སྤྱི་ཚོགས་ཀྱི་བརྟན་ལྷིང་དཀྲུགས་པའི་ཉེས་མིང་འོག་འཛིན་བཟུང་གིས་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་འདུག འདི་གར་བོད་མི་ཞིག་གིས་ཁུངས་ལྡན་གནས་ཚུལ་འགྲེལ་བརྗོད་གནང་དོན་ལ། ད་ལྟའི་ཆར་གྲྭ་སྒོ་དམར་ཆོས་འཕེལ་ལགས་ལ་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་དེ་རེབ་གོང་རྫོང་གི་བྲག་དམར་འོག་བཙོན་ཁང་དུ་བཅུག་ཡོད་པ་གསུངས་ཀྱི་འདུག གཞི་རྩའི་གྲྭ་སྒོ་དམར་ཆོས་འཕེལ་ལགས་ནི། ལོ་སྔོན་མའི་ཕྱི་ཟླ་ ༧ ཕྱི་ཚེས་ ༡༠ ཙམ་ལ་ཐུན་རིན་རྫོང་གི་རྒྱ་གཞུང་སྤྱི་བདེ་ཉེན་རྟོག་པས་འཛིན་བཟུང་བཙན་ཁྲིད་བྱས་སྟབས། རྒྱ་གཞུང་གིས་ཁོང་འཛིན་བཟུང་བྱེད་དགོས་དོན་ནི་ཁོང་གི་གྲྭ་ཤག་ཏུ་སྔོག་གཤེར་བྱེད་སྐབས་༸གོང་ས་མཆོག་གི་༸སྐུ་པར་སྒྲིག་གཤོམ་བྱེད་ཡོད་སྐོར་བཤད་ནས་འཛིན་བཟུང་བྱས་པ་ཞིག་ཡིན་པ་དང། ད་ལྟ་བར་ཟླ་བ་བདུན་ལྷག་རིང་ཁོང་ལ་འདྲི་བརྩད་དང་བཀག་བསྐྱིལ་བྱས་པ་བརྒྱུད་བཙོན་འཇུག་གི་ཁྲིམས་ཐག་བཅད་ནས་ཉིན་བཅུའི་རྗེས་སུ་ནང་མི་སྤུན་མཆེད་ཐུག་འཕྲད་ལ་ཡོང་ཆོག་པ་བཤད་འདུག རྩ་བའི་རང་ལོ་ ༤༧ སོན་པའི་གྲྭ་སྒོ་དམར་ཆོས་འཕེལ་ལགས་ནི་བྲག་དམར་སྡེ་བ་ནས་ཡིན་ཞིང་། ཕ་མིང་ལ་ཀླུ་བྱམས་ཟེར་གྱི་ཡོད་འདུག བོད་མདོ་སྨད་རེབ་གོང་རོང་པོ་དགོན་ཆེན་ཐོས་བསམ་ནོར་གླིང་གྲྭ་ཚང་དུ་སློབ་གཉེར་གནང་པ་མ་ཟད རེབ་གོང་རོང་པོ་དགོན་ཆེན་གྱི་གྲྭ་པ་རྒན་གྲས་ཡིན་པ་དང། རྒྱུན་དུ་ཡ་རབས་ཚུལ་མཐུན་ཅན་དང་སློབ་སྦྱོང་ལ་བརྩོན་ཞིང་དགོན་པ་ནས་བསླབ་པ་མཐར་སོན་པ་བྱུང་འདུག

ཞོགས་ལྗང་ལགས་ལ་ལོ་གསུམ་གྱི་ཁྲིམས་ཐག་བཅད་པ་དེ་ནི་ཁྲིམས་མཐུན་མིན་པ་གསུངས་སོང་།

བོད་མདོ་སྨད་བླ་བྲང་བསང་ཆུ་རྫོང་ནས་ཡིན་པའི་རྩོམ་པ་པོ་དང་བོད་མིའི་རང་དབང་རྩོད་ལེན་པ་ཞོགས་ལྗང་ལགས་ལ་རྒྱ་གཞུང་གིས་ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་པ་རེད། དེ་ཡང་སྔ་ལོའི་ཕྱི་ཟླ་ ༣ ཚེས་ ༡༩ ཉིན་བོད་མདོ་སྨད་རེབ་གོང་ནས་ས་གནས་རྒྱ་གཞུང་གི་ཉེན་རྟོགས་པས་ནག་ཉེས་གང་ཡིན་གསལ་ཁ་མེད་པར་ཞོགས་ལྗང་ལགས་བཙན་ཁྲིད་ཀྱི་འཛིན་བཟུང་བྱས་པ་ནས་བཟུང་ད་བར་ཁོང་གི་གནས་སྟངས་གང་ཡིན་སོགས་ཤེས་རྟོགས་མེད་པར་ལྷག་ཡོད་པ་རེད། སྤྱི་ཚོགས་ཀྱི་དྲ་གནས་ཁག་ཏུ་གནས་ཚུལ་སྤེལ་བ་གཞིགས་ན། ཟླ་འདིའི་ཕྱི་ཚེས་ ༡༥ ཉིན་ཐུན་རིན་ཁྲིམས་ཁང་གིས་ཞོགས་ལྗང་གི་ནང་མི་ཚོར་བརྡ་ལན་བཏང་ནས་ཚེས་ ༡༧ ཉིན་ཁྲིམས་ཐག་གཅོད་རྒྱུ་ཡིན་སྐོར་བརྗོད་ཡོད་པ་རེད་འདུག  ཁ་ཉིན་ཚེས་ ༡༦ ཉིན་ཁོང་གི་ནང་མི་སྤུན་མཆེད་དང་ཚོ་བའི་མི་སྣ་མི་སྣ་ ༤༠ ལྷག་མདོ་སྨད་རེབ་གོང་དུ་ཕྱིན་ཡོད་ཀྱང།  སྐབས་དེར་རྨ་ལྷོ་ཁུལ་མི་དམངས་འབྲིང་རིམ་ཁྲིམས་ཁང་དུ་ཁྲིམས་རྩོད་པ་སོགས་ཀྱི་གོ་རིམ་མི་སྣ་གང་ཡང་མེད་པར་ཁྲིམས་དཔོན་ཞིག་གིས་ཞོགས་ལྗང་ལགས་ཀྱིས་དེ་སྔ་ཕྱི་ལོ་ ༢༠༠༨ ལོར་མི་རིགས་ཁ་བྲལ་གྱི་ལས་འགུལ་སྤེལ་བ་དང་ཕྱི་གྱར་ཁ་བྲལ་བར་ལྐོག་འབྲེལ་བྱས་པ། ཆ་འཕྲིན་བརྒྱུད་ལམ་ཁག་ཏུ་ལན་མང་རིང་སྤྱི་ཚོགས་ཀྱི་བརྟན་ལྷིང་ལ་གནོད་པའོ་ལས་བརྩམས་པ་སོགས་ནག་ཉེས་བཞིའི་ཐོག་ནས་ལོ་གསུམ་གྱི་བཙོན་འཇུག་ཁྲིམས་ཐག་བཅད་འདུག བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱལ་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་རྒྱ་གཞུང་གིས་བོད་མིའི་ཐོག་ལག་བསྟར་བྱས་དང་བྱེད་བཞིན་པའི་བྱ་སྤྱོད་ཁག་ནི་ཆེས་ནོར་འཁྲུལ་ཅན་ཞིག་དང་། ལྷག་དོན་ཞོགས་ལྗང་ལགས་ཀྱིས་རྒྱ་གཞུང་ནས་བོད་མིའི་ཐོག་ལག་བསྟར་བྱེད་བཞིན་པའི་བྱ་སྤྱོད་ཁག་ནི་ནོར་འཁྲུལ་ཡིན་པར་རྩོམ་ཡིག་སྤེལ་བར་ ལོ་གསུམ་གྱི་བཙོན་འཇུག་ཁྲིམས་ཐག་བཅད་པ་དེ་ནི་ཁྲིམས་མཐུན་ཞིག་མིན་པ་གསུངས་ཀྱི་འདུག ད་དུང་ཁོང་གིས་རྒྱ་གཞུང་ནས་ཞོགས་ལྗང་ལགས་ཀྱི་གཟུགས་གཞི་དང་སེམས་ཁམས་ཀྱི་གནས་སྟངས་ལའང་འགན་ཁུར་བྱ་དགོས་པ་སོགས་གསུངས་ཡོད། གཞི་རྩའི་རྩོམ་པ་པོ་ཞོགས་ལྗངས་ལགས་ནི། བོད་མདོ་སྨད་བླ་བྲང་བསང་ཆུ་རྫོང་ནས་ཡིན་ཞིང་། ཁོང་ལ་རྒྱ་ནག་གཞུང་གིས་སྔ་རྗེས་སུ་ཐེངས་གཉིས་འཛིན་བཟུང་བཙོན་འཇུག་བྱས་འདུག  དེ་ཡང་ཕྱི་ལོ་ ༢༠༠༨ ལོར་བོད་ནང་དུ་ས་བྱི་ཞི་རྒོལ་ཆེན་མོའི་བྱུང་བའི་སྐབས་སུ། ནུབ་བྱང་མི་རིགས་སློབ་གྲྭ་ཆེན་མོའི་སློབ་མ་རྣམས་དངོས་སུ་སློབ་གྲྭའི་ཐང་ཆེན་དུ་འཛོམས་ཏེ།༼བོད་མིའི་སྐྱིད་སྡུག་མཉམ་མྱོང་༽ཞེས་པའི་འཕྲེད་དར་བསྣམས་ཏེ། ཞི་རྒོལ་འགོ་ཁྲིད་མཁན་དང་མི་རིགས་ཁ་བྲལ་གྱི་བསམ་བློ་བཅངས་ཏེ་རྩོམ་ཡིག་སྤེལ་ཡོད་པར་བརྟེན།  སྤྱི་ལོ་ ༢༠༡༠ ལོར་རྩོམ་པ་པོ་ཐེའུ་རིང་དང་ཞོགས་ལྗང་གཉིས་སློབ་གྲྭ་ནས་འཛིན་བཟུང་བྱས་ནས་ཟླ་གཅིག་ལྷག་རིང་ཞི་དྲག་གཉིས་ཀྱི་ཐོག་ནས་འདྲི་བརྩད་བཀག་བསྐྱིལ་བྱས་མཐར་གློད་བཀྲོལ་བཏང་འདུག  དེ་རྗེས་བོད་མིའི་རང་དབང་དང་། མང་གཙོ། ལྷག་དོན་ས་གནས་དུ་སྐོར་བསྐྱོད་ཀྱི་མཐོང་ཐོས་སྐོར་ཟིན་བྲིས་སོགས་སྤེལ་སྟབས།  སྔ་ལོའི་ཕྱི་ཟླ་ ༣ ཚེས་ ༡༩ ཉིན་རེབ་གོང་ནས་ས་གནས་རྒྱ་གཞུང་ཉེན་རྟོག་པས་འཛིན་བཟུང་ཐེངས་གཉིས་པ་དེ་བྱས་འདུག  

བྲག་འགོ་ནང་༸གོང་ས་མཆོག་གི་༸སྐུ་པར་སྒྲིག་གཤོམ་མི་ཆོག་པའི་དམ་དྲག་བྱེད་པ་རྒྱ་གཞུང་གིས་ངོས་ལེན་བྱས་འདུག

ཉེ་སྔོན་ཁམས་དཀར་མཛེས་བྲག་འགོ་རྫོང་གི་བོད་མིའི་ཚོང་ཁང་ཁག་ལ་༸གོང་ས་མཆོག་གི་༸སྐུ་པར་སྒྲིག་གཤོམ་མི་ཆོག་པ་དང་། ལྷག་དོན་༸སྐུ་པར་ཡོངས་རྫོགས་རྫོང་རིག་གནས་ཁྲིམས་འཛིན་རུ་ཆེན་ལ་རྩིས་སྤྲོད་བྱ་དགོས་པའི་བཙན་བཀའ་བཏང་པ་རྒྱ་གཞུང་གིས་ངོས་ལེན་བྱས་འདུག དེ་ཡང་ཁ་སང་ཟླ་ ༢ ཚེས་ ༣ ཉིན་ Global Times བརྒྱུད་ལམ་ཐོག་གནས་ཚུལ་སྤེལ་བའི་ནང་འཁོོད་དོན། རྒྱ་གཞུང་གིས་དབྱེ་བའི་ཟི་ཁྲོན་ཞིང་ཆེན་ས་གནས་སྲིད་གཞུང་གི་དྲིལ་བསྒྲགས་ཚན་པའི་མགོ་གཙོ་ Gou Yadong ཟེར་བ་དེས་ཟླ་སྔོན་མའི་ཚེས་ ༤ ཉིན་རྒྱ་གཞུང་གིས་བོད་ཁམས་དཀར་མཛེས་བྲག་འགོར་༸གོང་ས་མཆོག་གི་༸སྐུ་པར་སྒྲིག་གཤོམ་མི་ཆོག་པའི་བརྡ་ཐོ་ཞིག་བཏང་ཡིན་པ་ངོས་ལེན་བྱས་འདུག་པ་དང། དེའང་ལོ་ལྟར་སྤྱི་གསར་དུས་ཆེན་གྱི་སྔ་རོལ་དུ་རྒྱལ་ཁབ་ཁ་བྲལ་གྱི་དབུ་ཁྲིད་༸གོང་ས་མཆོག་༸སྐྱབས་མགོན་ཆེན་པོ་མཆོག་གི་༸སྐུ་པར་ནི་ཁྲིམས་འགལ་གྱི་པར་དང་། དེ་བཞིན་དཔེ་དེབ་ཁག་ཅིག་ཀྱང་བཀག་སྡོམ་བྱ་རྒྱུའི་ལས་འགུལ་སྤེན་བཞིན་ཡོད་པའི་ཆ་ཤས་ཤིག་ཡིན་སྐོར་བཤད་པ་མ་ཟད། ལྷག་དོན་བོད་མི་མང་ཚོགས་ཚོའི་ངོས་ནས་རྒྱ་ནག་གི་འགོ་ཁྲིད་རིམ་པའི་འདྲ་པར་ཁག་སྒྲིག་གཤོམ་བྱེད་ན་དེར་བཀག་སྡོམ་གང་ཡང་མེད་པ་བརྗོད་འདུག ད་དུང་ Gou Yadong ཡིས་ལས་འགུལ་དེ་ཡང་བྲག་མགོ་རྫོང་རིག་གནས་ཡུལ་སྐོར་ལས་ཁུངས་དང་། བྲག་མགོ་རྫོང་སྤྱི་བདེ་ལས་ཁུངས། དེ་བཞིན་རྫོང་མི་རིགས་ཆོས་དོན་ལས་ཁུངས་བཅས་ཀྱིས་སྟངས་འཛིན་འོག་སྤེལ་མུས་ཡིན་པ་བཤད་ཡོད་པ་རེད། དེ་མཚུངས་སུ་ Tibet.cn བརྒྱུད་ལམ་གྱིས་འདི་ལོར་རྒྱ་གཞུང་གིས་མང་ཚོགས་ཚོར་བོད་རང་སྐྱོང་ལྗོངས་ཟེར་བ་དེ་དབུ་བརྙེས་ནས་ལོ་ ༥༠ འཁོར་བའི་དུས་དྲན་དང་བསྟུན། གཞུང་གི་ལས་ཁུངས་དང་དགོན་སྡེ་སོགས་ཚོགས་སྐྱིད་ཁག་ལ་རྒྱ་ནག་གི་འགོ་ཁྲིད་སྔ་རྗེས་ལྔའི་པར་རྔན་པའི་ཚུལ་དུ་སྤྲད་ཡོད་པ་མངོན་གསལ་བྱས་འདུག གཞི་རྩའི་ཟླ་སྔོན་མའི་ཚེས་ ༤ ཉིན་རྒྱ་གཞུང་གིས་བོད་ཁམས་དཀར་མཛེས་བྲག་འགོ་རྫོང་གི་བོད་མིའི་ཚོང་ཁང་ཁག་ལ་༸གོང་ས་མཆོག་གི་༸སྐུ་པར་སྒྲིག་གཤོམ་མི་ཆོག་པ་དང་། ལྷག་དོན་༸སྐུ་པར་ཡོངས་རྫོགས་རྫོང་རིག་གནས་ཁྲིམས་འཛིན་རུ་ཆེན་ལ་སྤྲོད་དགོས་པ་དང་རང་འགུལ་གྱིས་རྩིས་སྤྲོད་མ་བྱེད་ཚེ། ཐབས་ཤེས་དྲག་པོ་སྤྱད་ནས་རྩིས་ལེན་བྱེད་རྒྱུ་མ་ཟད། དོ་བདག་ལ་ཁྲིམས་ཆད་ནན་པོ་གཏང་རྒྱུ་ཡིནཞེས་བཀའ་རྒྱའི་བརྡ་ཐོ་ཞིག་བཏང་ཡོད་པ་རེད།

མཚོ་སྔོན་ཁྲི་ཤོར་རྒྱལ་མོ་ནས་རྒྱ་རིགས་ཁྲིམས་འགལ་གྱིས་ཉ་འཛིན་ཚོར་བཀག་སྡོམ་མི་བྱེད་པ།

བོད་མདོ་སྨད་མཚོ་སྔོན་ཁུལ་དུ་ཆགས་ཤིང་བོད་མིི་ཚོས་རྩ་ཆེར་འཛིན་པའི་མཚོ་སྔོན་ཁྲི་ཤོར་རྒྱལ་མོ་ཞེས་ཡོངས་སུ་གྲགས་པའི་མཚོ་དེ་ལས་རྒྱ་རིགས་ཚོས་གསང་སྟབས་ཀྱིས་གསེར་ཉ་འཛིན་བཞིན་པར་རྒྱ་གཞུང་གིས་བཀག་སྡོམ་གང་ཡང་བྱེད་ཀྱི་མེད་པ་རེད་འདུག དེ་ཡང་བོད་མདོ་སྨད་མཚོ་སྔོན་ཁུལ་དུ་ལོ་མང་སྔོན་ནས་རྒྱ་རིགས་ཉ་འཛིན་མཁན་མང་པོ་ཞིག་གིས་མཚོ་དེ་ནས་གསེར་ཉ་མང་པོ་འཛིན་བཞིན་པར་ས་གནས་བོད་མི་ཚོས་གོང་རིམ་ལ་ཞུ་གཏུགས་ལན་མང་བྱས་ཀྱང་། གོང་རིམ་ནས་དེར་དམིགས་བསལ་གྱི་བདག་སྤྲོད་མེད་ཁར། ཉ་འཛིན་མཁན་དང་ངན་འབྲེལ་བྱས་པ་མ་ཟད། གསང་སྟབས་ཀྱིས་མཚོ་ནས་གསེར་ཉ་འཛིན་གྱི་ཡོད་པར་བརྟེན་ས་གནས་བོད་མི་ཚོས་མཚོ་སྔོན་པོའི་གསེར་ཉ་སྲུང་སྐྱོབ་ཚོགས་པ་ཞེས་པ་ཞིག་གསར་འཛུགས་ཀྱིས་གསེར་ཉ་སྲུང་སྐྱོབ་བྱ་རྒྱུའི་ལས་འགུལ་སྤེལ་དང་སྤེལ་མུས་ཡིན་པ་རེད་འདུག འདི་ག་རླུང་འཕྲིན་ཁང་དུ་བོད་ས་གནས་ཀྱི་གསེར་ཉ་སྲུང་སྐྱོབ་ཚོགས་པའི་ཚོགས་མི་ཞིག་གིས་ཁུངས་ལྡན་གནས་ཚུལ་ངོ་སྤྲོད་གནང་དོན། ཁོང་གིས་མཚོ་སྔོན་པོ་ཉེ་འདབས་རྐང་ཚ་སྡེ་བའི་ཡུལ་མི་ཐོུང་གིས་དང་བླངས་ཐོག་ནས་གསེར་ཉ་སྲུང་སྐྱོབ་བྱེད་བཞིན་ཡོད་ཀྱང། བོད་ནང་རྒྱ་རིགས་མང་དག་ཞིག་གནས་སྤོ་བྱས་པ་དང། ལྷག་དོན་རྒྱ་རིགས་མང་པོ་ཞིག་མཚོ་སྔོན་པོ་ཉེ་འགྲམ་དུ་གཞིས་ཆགས་ཡོད་སྟབས། དེང་སྐབས་དགུན་དུས་མཚོ་ལ་དར་ཆགས་པའི་སྐབས་དང་བསྟུན། ཉེ་ཆར་རྒྱ་མི་དེ་དག་ནས་གསང་སྟབས་ཀྱིས་མཚོར་ཉ་རྒྱ་བཀྲམས་ཡོད་པ་ས་གནས་བོད་རིགས་གསེར་ཉ་སྲུང་སྐྱོབ་ཚོགས་པས་ཤེས་རྟོགས་བྱུང་མ་ཐག་མི་བརྒྱ་ཙམ་ཕྱིན་ནས་ཉ་རྒྱ་རྣམས་ཕྱིར་བཏོན་གྱིས་ཉ་རྣམས་ཚེ་ཐར་བཏང་ཡོད་པ་གསུངས་ཀྱི་འདུག ད་དུང་ཁོང་གིས་གནད་དོན་དེ་བྱུང་རྗེས་ས་གནས་སྲིད་གཞུང་ལ་ཞུ་གཏུགས་ལན་མང་བྱས་རྐྱེན་བོད་མི་ཚོར་ཉེས་རྡུང་གཏོང་བ་དང་རླངས་འཁོར་གཏོར་སྐྱོན་བྱེད་པ་སོགས་ཀྱི་གནས་ཚུལ་ཐོན་ཡོད་སྐོར་སོགས་འགྲེལ་བརྗོད་གནང་ཡོད། རྩ་བའི་ས་གནས་གསེར་ཉ་སྲུང་སྐྱོབ་ཚོགས་པ་ནི་ས་གནས་རྫོང་སྲིད་གཞུང་ནས་ངོས་ལེན་ཡོད་པའི་ཚོགས་པ་ཞིག་ཡིན་པ་རེད་འདུག སྔ་ལོ་ ༢༠༡༥ ཟླ་ ༦ པའི་ནང་བོོད་ཀྱི་ན་གཞོན་རྩོམ་པ་པོ་ཁ་བའི་སྙིང་ལྕགས་ལགས་མཚོ་ནང་དུ་ཉ་འཛིན་དྲ་བ་ལེན་པར་བསྐྱོད་སྐབས་སྐུ་སྲོག་ཤོར་བའི་གནང་ཚུལ་ཡང་ཐོན་མྱོང་འདུག གཞི་རྩའི་མཚོ་སྔོན་པོའི་ལོ་རྒྱུས་ཡིག་ཚགས་ནང་གསལ་བ་ལྟར་ན་མཚོ་སྔོན་པོའམ་མཚོ་ཁྲི་ཤོར་རྒྱལ་མོར་གྲགས་པ་ནི།རྒྱ་གཞུང་གི་བརྗོད་བཞིན་པའི་མཚོ་སྔོན་ཞིང་ཆེན་མཚོ་ལྷོ་ཁུལ་དང་མཚོ་བྱང་ཁུལ་གཉིས་ཀྱི་བར་དུ་གནས་ཤིང་།མཚོའི་མཐའི་རིང་ཚད་ལ་སྤྱི་ལེ་ ༣༦༠ དང་། མཚོ་ངོས་ལ་སྤྱི་ལེ་གྲུ་བཞི་མ་ ༤༦༣༥ ཡོད་པ་མ་ཟད། ཚན་རིག་པས་ཞིབ་འཇུག་བྱས་པ་ལྟར་ན་མཚོ་དེ་ཆགས་ནས་ལོ་ངོ་ཁྲི་གཅིག་ལྷག་སོང་ཡོད་ཚུལ་བརྗོད་ཀྱི་ཡོད་པ་རེད་འདུག མཚོ་དེ་ནི་ནང་པ་གཙོས་པའི་ཧིན་དུ་དང། བོན་བཅས་ཀྱི་ཆོས་ལུགས་ཐོག་ནས་གནས་ཆེན་ཞིག་ཏུ་ངོས་འཛིན་གནང་གི་ཡོད་པ་རེད།

ཁམས་དཀར་མཛེས་བྲག་འགོ་ནང་༸གོང་ས་མཆོག་གི་༸སྐུ་པར་སྒྲིག་གཤོམ་བྱ་མི་ཆོག་པའི་བཙན་་བཀའ་བཏང་པ།

  རྒྱ་གཞུང་གིས་བོད་ཀྱི་ས་ཁུལ་ཁག་ཏུ་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་སྒྲིག་གཤོམ་བྱ་མི་ཆོག་པར་དམ་དྲག་ཤུགས་ཆེ་བྱེད་བཞིན་པ་དང་བསྟུན། ཉེ་ཆར་ཟླ་བ་ ༡ ཚེས་ ༤ ཉིན་རྒྱ་གཞུང་གིས་བོད་ཁམས་དཀར་མཛེས་བྲག་འགོ་རྫོང་གི་བོད་མིའི་ཚོང་ཁང་ཁག་ལ་༸གོང་ས་མཆོག་གི་༸སྐུ་པར་སྒྲིག་གཤོམ་མི་ཆོག་པ་དང་། ལྷག་དོན་༸སྐུ་པར་ཡོངས་རྫོགས་ས་གནས་སྲིད་གཞུང་ལ་རྩིས་སྤྲོད་དགོས་པའི་བཀའ་རྒྱའི་བརྡ་ཐོ་ཞིག་བཏང་འདུག དེ་ཡང་ཁམས་དཀར་མཛེས་བྲག་འགོ་རྫོང་ཡོངས་ཀྱི་ཚོང་ཁང་ཆེ་ཆུང་ཚང་མས་འབྲེལ་ཡོད་ཀྱི་རྩ་ཁྲིམས་ཀྱི་དགོངས་དོན་ལྟར། ཚོང་ཁང་ཁག་གི་ནང་དུ་༸གོང་ས་མཆོག་གི་༸སྐུ་པར་སྒྲིག་གཤོམ་བྱ་མི་ཆོག་པ་དང་ལྡེབས་རིས་སོགས་ལའང་བྲིས་བཀོད་རིགས་བྱ་མི་ཆོག་པ་མ་ཟད། ལྷག་དོན་མགོན་པོ་༸གང་ཉིད་མཆོག་གི་༸སྐུ་པར་སྒྲིག་གཤོམ་གནང་ཡོད་པའི་ཚོང་གཉེར་བ་ཚོས་དེ་རིང་ཟླ་བ་ ༢ ཚེས་ ༢ ཉིན་སྔོན་ཚུད་རང་འགུལ་གྱིས་ཕྱིར་ཕབ་ཀྱིས་རྫོང་སྲིད་གཞུང་ལ་རྩིེས་སྤྲོད་དགོས་པའི་ཉེན་བརྡའི་དུས་བཀག་བཟོས་ཡོད་པ་རེད་འདུག འདི་ག་རླུང་འཕྲིན་ཁང་དུ་ཕ་ཡུལ་བྲག་འགོ་ནས་ཡིན་པའི་བྱེས་བཞུགས་གྲྭ་ངག་དབང་མཁྱེན་རབ་ལགས་ཀྱིས་ཁུངས་ལྡན་གནས་ཚུལ་ངོ་སྤྲོད་གནང་དོན། ཁོང་གིས་དེ་སྔ་བོད་ཀྱི་ས་ཁྱོན་ཡོངས་ལ་༸གང་ཉིད་མཆོག་གི་༸སྐུ་པར་སྒྲིག་གཤོམ་བྱ་མི་ཆོག་པར་དམ་དྲག་དེ་ཙམ་བྱེད་ཀྱི་མེད་ཀྱང་། ཉེ་ལམ་ནས་འགོ་འཛུགས་ཀྱིས་བྲག་འགོ་རྫོང་ཁོངས་ནང་ཡོད་པའི་ཚོང་ཁང་ཆེ་ཆུང་ཚང་མའི་ནང་༸གོང་ས་མཆོག་གི་༸སྐུ་པར་སྒྲིག་གཤོམ་བྱ་མི་ཆོག་པ་མ་ཟད། དེ་ལྟར་གནང་མཁན་ཡོད་རིགས་ནས་རྫོང་རིག་གནས་ཁྲིམས་འཛིན་རུ་ཆེན་ལ་སྤྲོད་དགོས་པ་དང་རང་འགུལ་གྱིས་དེ་ལྟར་མ་བྱེད་ཚེ། རྫོང་རིག་ནས་ཕྱོགས་བསྡུས་ཁྲིམས་འཛིན་རུ་ཆེན་གྱིས་ཐབས་ཤེས་དྲག་པོ་སྤྱད་ནས་རྩིས་ལེན་བྱེད་པ་དང་དོ་བདག་ཚོང་གཉེར་བར་ཐག་གཅོད་ནན་པོ་བྱེད་རྒྱུ་ཡིན་ཞེས་བཀོད་ཡོད་པ་གསུངས་སོང་། ད་དུང་ཁོང་གིས་ལས་འགུལ་དེས་བོད་མི་ཚོའི་ཆོས་དད་རང་དབང་ལ་རྡོག་རོལ་བཏང་པ་དང་། མང་ཚོགས་ཀྱི་སེམས་ལ་རྨ་ཁ་བཟོས་པ་མ་ཟད། ལྷག་དོན་མི་རིགས་ཀྱི་མཐུན་སྒྲིལ་གཏོར་བཤིག་བཏང་བ་ཞིག་ཡིན་པ་སོགས་འགྲེལ་བརྗོད་གནང་གི་འདུག དེ་མཚུངས་སུ་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བསྟི་གནས་ཁང་གི་ཉམས་ཞིབ་པ་ཚེ་རིང་རྒྱལ་ལགས་ཀྱིས་ད་ལན་འཕྲད་བཞིན་པའི་གནད་དོན་འདི་ནི་བོད་མིའི་དད་མོས་རང་དབང་དང་བསམ་བློའི་རང་དབང་བཅས་ལ་བརྩི་མེད་རྡོག་རོལ་ཤུགས་ཆེ་བཏང་པ་རྣམ་པ་གསལ་པོ་ཞིག་དང་། ལྷག་དོན་རྒྱ་གཞུང་གིས་བོད་རང་སྐྱོང་ལྗོངས་སུ་དེ་བཞིན་ལག་བསྟར་གྱིས་བོད་མི་ཚོར་དམ་དྲག་ཤུགས་ཆེ་བྱ་ངེས་ཡིན་སྐོར་གསུངས་ཀྱི་འདུག

སྟོད་མངའ་རིར་མི་མང་ནས་འདོད་པ་མེད་བཞིན་དུ་གཏེར་ཁ་སྔོག་འདོན་བྱེད་བཞིན་ཡོད་པ།

བོད་ལྗོངས་གཞི་རྩེ་གྲོང་ཁྱེར་སྟོད་མངའ་རིས་ཀྱི་ས་ཁུལ་ཁག་ཅིག་དུ་རྒྱ་ནག་གཞུང་དང་གཞུང་འབྲེལ་མ་ཡིན་པའི་རྒྱ་མི་གཏེར་འདོན་ཚན་པས་བོད་མི་མང་ཚོགས་ཀྱིས་འདོད་མོས་མེད་བཞིན་དུ་རང་སྣང་གང་ཤར་གྱིས་ཁུལ་དེའི་ཁོར་ཡུག་ལ་དོ་ཕོག་ཚབས་ཆེན་ཕོག་གཞི་གཏེང་ཁ་སྔོག་འདོན་བྱེད་བཞིན་ཡོད་པ་རེད་འདུག དེ་སྔོན་སྟོད་མངའ་རིས་སྒེར་རྩེ་རྫོང་གཞུང་པ་ཡུལ་མཚོ་ཟ་ལུང་ཞེས་པའི་ས་ཆར་ལོ་ངོ་ ༢༠ ཙམ་རིང་ས་གནས་བོད་རིགས་མང་ཚོགས་ཚོས་གཏེར་འདོན་གྱི་ལས་གཞི་བཀག་འགོག་བྱས་ཐུབ་ཡོད་ཀྱང་། ༢༠༡༤ དང་ ༢༠༡༥ ལོ་གཉིས་ནང་རྒྱ་རིགས་གཞུང་འབྲེལ་མིན་པའི་གཏེར་འདོན་ཚན་པས་མང་ཚོགས་རྣམས་ལ་ས་ཞིང་འདེབས་ལས་བྱ་རྒྱུ་ཡིན་ཚུལ་གྱིས་མགོ་སྐོར་བཏང་སྟེ། གངས་རིན་པོ་ཆེའི་ཉེ་འདབས་ཀྱི་བ་འབྲོག་ཞེས་པའི་ས་གནས་སུ་གཏེར་ཁ་བསྔོག་འདོན་བྱས་ཡོད་པ་རེད་འདུག འདི་ག་རླུང་འཕྲིན་ཁང་དུ་ས་གནས་བོད་མི་ཞིག་གིས་ཁུངས་ལྡན་གནས་ཚུལ་ངོ་སྤྲོད་གནང་དོན། ཁོང་གིས་སླར་ཡང་འདི་ལོ་ ༢༠༡༦ ལོའི་ནང་གཏེར་བཏོན་ཚན་པ་ཡོང་སྐབས་ས་གནས་རྫོང་དང་བོད་རིགས་མང་ཚོགས་ཟུང་སྦྲེལ་གྱིས་ཕྱིར་ཕུད་བཏང་ཐུབ་ཡོད་སྐོར་གསུངས་སོང། ད་དུང་ཁོང་གིས་འགྲེལ་བརྗོད་གནང་བར་ས་གནས་མང་ཚོགས་ཀྱི་ངོས་ནས་གཏེར་ཁ་བསྔོག་འདོན་གྱི་ལས་གཞི་དེ་དག་ལ་བརྟེན་ནས་ཁེ་ཕན་གང་ཡང་མེད་པ་མ་ཟད། ཁོར་ཡུག་ལ་གནོད་འཚེ་ཚབས་ཆེན་ཕོག་གི་ཡོད་པ་སོགས་རྒྱུ་མཚན་དུ་བཀོད་ནས་ས་གནས་རྒྱ་གཞུང་ལ་ལས་གཞི་དེ་དག་མཚམས་འཇོག་དགོས་པའི་ཞུ་གཏུགས་ལན་མང་བྱས་ཀྱང་དེར་དོ་སྣང་མེད་པ་རེད་འདུག  ལས་གཞི་དེར་བརྟེན་ས་གནས་སུ་ཁོར་ཡུག་དག་ལ་གནོད་སྐྱོན་འཚབ་ཆེན་ཕོག་གི་འདུག་སྟབས།  བརྒྱུད་ལམ་ཁག་ལས་ཁྱབ་བསྒྲགས་རྒྱ་གང་ཆེ་ཐོག་རྒྱལ་སྤྱིའི་སྤྱི་ཚོགས་ཁྲོད་ནས་ཞུ་གཏུགས་ཀྱི་ལས་འགུལ་དེར་རྒྱབ་སྐྱོར་ཡོང་བའི་འབོད་སྐུལ་ཡང་གནང་གི་འདུག

བོད་ནང་དུ་ཕ་སྐད་སྲུང་སྐྱོབ་ཀྱི་མིང་མཛོད་རྒྱུགས་སྤྲོད་ཆེན་མོ།

བོད་མདོ་ཁམས་ནང་ཆེན་གྱི་རྫ་ཉིན་ཕ་སྐད་གཅེས་སྐྱོང་མཐུན་ཚོགས་ཀྱིས་ཟླ་བ་འདིའི་ཚེས་ ༢༠ ཉིན་ཁུལ་དེར་སྐབས་བཞི་པའི་ཆོལ་གསུམ་རིས་མེད་ཀྱི་མིང་མཛོད་རྒྱུགས་སྤྲོད་ཆེན་མོ་སྐོང་ཚོགས་གནང་འདུག   དེ་ཡང་སྤྱི་ཚོགས་དྲ་ལམ་ཁག་ཏུ་གནས་ཚུལ་ཐོན་པར་གཞིགས་ན། ཕ་སྐད་སྲུང་སྐྱོབ་ཀྱི་མིང་མཛོད་རྒྱུགས་སྤྲོད་ཆེན་མོ་དེ་བཞིན་ཟླ་བ་འདིའི་ཚེས་༢༠ ནས་འགོ་འཛུགས་ཀྱིས་ཚེས་ ༢༥ བར་ཉིན་གྲངས་ལྔ་རིང་ཚོགས་འདུག་པ་དང་། རྒྱུགས་སྤྲོད་ནང་འགྲན་ཞུགས་པ་རྣམས་ལ་ལེགས་སྐྱེས་ཀྱི་ཚུལ་དུ་རླངས་འཁོར་དང་འཕྲུལ་རྟ་ཆེ་ཆུང་སོགས་གནང་སྟབས། མཉམ་ཞུགས་པ་དང་མང་ཚོགས་ནས་ལས་འགུལ་དེར་ཡི་རངས་དང་དགའ་སྤོབས་ཆེན་པོ་གནང་ཡོད།          སྐབས་དེར་འགྲན་ཞུགས་གནང་སྟངས་ལ་སྡེ་ཁག་གསུམ་དུ་དབྱེ་སྟེ།  ཨང་རིམ་དང་པོ་སོན་མཁན་མི་གཅིག་ལ་གཟེངས་རྟགས་སུ་རླངས་འཁོར་གཅིག་དང་། ཨང་རིམ་དང་པོའི་གཉིས་པ་སོན་མཁན་མི་དྲུག་ལ་བུའི་འཕྲུལ་རྟ་རེ་དང་སྒོར་ ༥༠༠ ཐམ་པ། ཨང་རིམ་གསུམ་པ་སོན་མཁན་མི་དྲུག་ལ་བུ་མོའི་འཕྲུལ་རྟ་གཅིག་བྱ་དགའ་གནང་པ་མ་ཟད། གཞན་ཡང་ཨང་རིམ་བཞི་པ་ནས་བདུན་པ་བར་ལེགས་གསོལ་བྱ་དགའ་ཡང་གནང་འདུག ལྷག་པར་དུ་ད་ལན་གྱི་མིང་མཛོད་རྒྱུགས་སྤྲོད་ཆེན་མོའི་ལས་འགུལ་དེར་མཉམ་ཞུགས་པ་རྣམས་ནས་དགའ་སྤེབས་ཆེན་པོས་ཡི་རངས་ཀྱི་སྔགས་བརྗོད་ཞུས་པ་མ་ཟད། མང་ཚོགས་ཀྱི་ཁྲོད་ནས་ཀྱང་ལས་འགུལ་དེར་རྒྱབ་སྐྱོར་དང་བཅས་ གོ་སྒྲིག་ཚོགས་ཆུང་ལ་ཐུགས་རྗེ་ཆེ་ཞུ་ཞུས་འདུག    གཞི་རྩའི་རྫ་ཉིན་ཕ་སྐད་གཅེས་སྐྱོང་མཐུན་ཚོགས་ནི་ཁམས་ནང་ཆེན་གྱི་སེར་སྐྱ་མི་མང་ཐུན་མོང་གིས་ཆེད་བཙུགས་གནང་པ་ཞིག་ཡིན་འདུག  དེ་ལྟར་གོ་སྒྲིག་གནང་པའི་དགོས་དམིགས་གཙོ་བོ་ནི། བོད་མི་རིགས་ཀྱི་རིག་གནས་དང་ཕ་སྐད་གཙང་མ་སྲུང་སྐྱོབ་འཐུས་ཚང་ཞིག་ཕྱིར་ཡིན་པ་རེད་འདུག

Latest news