བོད།

ཕྱི་ལོ་ ༢༠༡༣ ལོར་ཁམས་ཡུལ་ཤུལ་ཆུ་དམར་ལེབ་རྫོང་། ཆིག་སྒྲིལ་གྲོང་བརྡལ་སྐྱ་འཁྱོག་ཡུལ་ཚོའི་རུ་ཁག་གཉིས་པ། ཨ་དྲེལ་སྡེ་པའི་བསྟན་འཛིན་ཤེས་རབ་ལགས་ཀྱིས་རྒྱ་ནག་གཞུང་གིས་བོད་ཐོག་འཛིན་པའི་དྲག་པོའི་སྲིད་བྱུས་ལ་ངོ་རྒོལ་གྱིས་རང་ལུས་མེར་བསྲེགས་བཏང་སྟེ་སྐུ་འདས་གྲོངས་སུ་གྱུར་བའི་གནད་དོན་དང་འབྲེལ། རང་ལུས་མེར་བསྲེགས་བཏང་བའི་ཉིན་ཤས་རྗེས་རང་ལོ་ ༢༥ ཡིན་པའི་ཨ་དྲེལ་དགོན་པའི་དགེ་བསྐོས་ཚེ་བཀྲ་ལགས་ལ་བསྟན་འཛིན་ཤེས་རབ་ལགས་ཀྱི་སྐུ་ཕུང་གི་པར་གང་སར་བརྒྱུད་སྤེལ་བྱས་པའི་ཉེས་མིང་འོག་འཛིན་བཟུང་གིས་ཟླ་བ་ ༧ ཙམ་རིང་བཀག་ཉར་དང་མནར་སྤྱོད་ཚད་མེད་བཏང་བའི་གནད་དོན་བྱུང་ཡོད་པ་རེད།རང་ལོ་ ༣༣ ཡིན་པའི་བསྟན་འཛིན་ཤེས་རབ་ལགས་ནི་རྒྱ་གཞུང་གིས་འབྲོག་པ་གཞིས་སྤོས་ཀྱི་སྲིད་བྱུས་འོག་ཆུ་དམར་ལེབ་ཁུལ་དུ་གཞིས་སྤོས་བྱས་པའི་འབྲོག་མི་ཞིག་ཡིན་པ་དང་། ཁོང་གིས་ཕྱི་ལོ་ ༢༠༡༣ ལོའི་ཕྱི་ཟླ་ ༥ ཚེས་ ༢༧ ཉིན་རང་ལུས་མེར་བསྲེགས་བཏང་བའི་རྗེས་སུ་རྒྱ་ནག་གཞུང་འབྲེལ་བརྒྱུད་ལམ་དུ་དེ་འབྲེལ་གནས་ཚུལ་སྤེལ་བའི་ནང་བསྟན་འཛིན་ཤེས་རབ་ལགས་ཀྱི་དགའ་རོགས་དང་ཁ་བྲལ་བའི་རྐྱེན་གྱིས་རང་སྲོག་བཅད་ཡོད་ཚུལ་བཀོད་ཡོད་པ་རེད། རྗེས་སུ་གནས་ཚུལ་ཤེས་རྟོགས་བྱུང་བར་བསྟན་འཛིན་ཤེས་རབ་ལགས་ནས་རང་སྲེག་མ་གནང་གོང་ལ་གྲོགས་པོ་ཁག་གཅིག་ལ་རྒྱ་ནག་གཞུང་གིས་རྩྭ་ས་བཙན་འཕྲོག་དང་གཞིས་སྤོས་སོགས་ཀྱི་སྲིད་བྱུས་འོག་བོད་མི་རྣམས་ལ་འཚོ་བའི་དཀའ་ངལ་ཆེས་ཆེར་འཕྲད་བཞིན་པ་དང་། བོད་ཀྱི་ཆོས་དང་རིག་གཞུང་རྩ་བརླག་འགྲོ་ཉེན་ཡོད་པ། དེ་བཞིན་རྒྱ་གཞུང་གི་དྲག་སྤྱོད་འོག་གནས་ཐབས་བྲལ་བ་སོགས་གསུངས་ཡོད་པ་ཤེས་རྟོགས་བྱུང་། འདི་ལོའི་ཕྱི་ཟླ་ ༥ པ་ནང་གནས་ཚུལ་ཤེས་རྟོགས་བྱུང་བར་དེ་སྔ་བསྟན་འཛིན་ཤེས་རབ་ལགས་ཀྱིས་རང་ལུས་མེར་བསྲེགས་བཏང་བའི་གནད་དོན་དང་འབྲེལ་ནས་བྱིས་པ་གསུམ་གྱི་ཨ་མ་ནོར་འཛིན་དབང་མོ་ལགས་ལ་ཕྱི་ལོ་ ༢༠༢༠ ལོར་ཆུ་དམར་ལེབ་མི་མང་ཁྲིམས་ཁང་གིས་གསང་བའི་ཁྲིམས་བཤེར་བྱས་ཏེ་ཁོང་གིས་ཕྱི་ལོ་ ༢༠༡༣ ལོར་བསྟན་འཛིན་ཤེས་རབ་ལགས་ཀྱིས་རང་ལུས་མེར་བསྲེགས་བཏང་བའི་གནས་ཚུལ་ཕྱིར་གྱར་བྱས་ཡོད་པའི་ཉེས་འཛུགས་འོག་ལོ་གསུམ་རིང་བཙོན་འཇུག་ཁྲིམས་ཐག་བཅད་ཡོད་པ་དང་། འདི་ལོའི་ཕྱི་ཟླ་ ༣ ཚེས་ ༢ ཁོང་གཟུགས་གཞིའི་གནས་སྟངས་ཛ་དྲག་འོག་ནས་སྨན་བཅོས་ཆེད་སྐྱེ་རྒུ་མདོའི་བེུད་བཙོན་ཁང་ཞིག་ནས་བཙོན་གྲོལ་བཏང་ཡོད་པ་རེད། བཙོན་གྲོལ་བཏང་བའི་རྗེས་སུ་རང་ཁྱིམ་དུ་སྨན་པ་བསྟེན་པ་ཙམ་ལས་རང་དབང་གི་ཐོག་ནས་སྨན་པ་བསྟེན་གཏུག་ལ་དམ་དྲག་བྱས་དང་བྱེད་བཞིན་ཡོད་པ་ཤེས་རྟོགས་བྱུང་ཡོད། འདི་ལོའི་ཕྱི་ཟླ་ ༧ པ་ནང་བཙོན་ཁང་དུ་མནར་སྤྱོད་ཚད་མེད་བཏང་བའི་རྐྱེན་གྱིས་གཟུགས་གཞིའི་གནས་སྟངས་ཛ་དྲག་ཆགས་ཡོད་སྟབས། བཙོན་གྲོལ་རྗེས་རིམ་པས་ཁྲིན་ཏུའུ་དང་ཟི་ལིང་སོགས་སུ་ཕྱིན་ཏེ་སྨན་པར་བསྟེན་གཏུག་བྱས་ཀྱང་དྲག་སྐྱེད་ཀྱི་རེ་བ་མེད་པ་ལྟ་བུར་གྱུར་ཡོད་པ་ཤེས་རྟོགས་བྱུང་ཡོད། ཁ་སང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བར་ཕྱི་ལོ་ ༢༠༡༣ ལོར་བསྟན་འཛིན་ཤེས་རབ་ལགས་ཀྱིས་རང་ལུས་མེར་བསྲེགས་བཏང་སྟེ་འདས་གྲོངས་སུ་གྱུར་བའི་གནད་དོན་དང་འབྲེལ་ཏེ། སྐབས་དེར་ཆུ་དམར་ལེབ་ཨ་དྲེལ་དགོན་པའི་དགེ་བསྐོས་གྲྭ་ཚེ་བཀྲ་ལགས་ཀྱང་རྒྱ་གཞུང་གིས་འཛིན་བཟུང་བྱས་ཡོད་པ་དང་སྐབས་དེར་རྒྱ་གཞུང་ཉེན་རྟོག་པས་ཚེ་བཀྲ་ལགས་ཀྱིས་བསྟན་འཛིན་ཤེས་རབ་ལགས་ཀྱི་སྤུན་མཆེད་ཐུབ་བསྟན་ལགས་དང་དེ་བཞིན་སྤུན་མཆེད་གཞན་གཅིག་དང་ངན་འབྲེལ་གྱིས་ཁོང་གི་ཕུང་པོ་ནང་མིར་རྩིས་སྤྲོད་བྱས་པའི་རྗེས་སུ་ཚེ་བཀྲ་ལགས་ཀྱི་ལག་ཐོགས་ཁ་པར་བརྒྱུད་ནས་ཕུང་པོའི་པར་ཕྱིར་གྱར་གནང་བའི་ཉེས་འཛུགས་ཀྱིས་ཟླ་བ་ ༧ ཙམ་རིང་བཀག་ཉར་བྱས་ནས་མནར་སྤྱོད་ཚད་མེད་བཏང་བ་མ་ཟད། ཁོང་ལ་ནག་ཉེས་ངོས་ལེན་གནང་དགོས་པའི་བཙན་བཀའ་ཡང་ཡང་བཏང་ཡོད་པ་སོགས་བཀོད་འདུག བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་ཉི་མ་འོད་ཟེར་ལགས་སུ་དེ་འབྲེལ་བཅར་འདྲི་ཞུས་སྐབས་ཁོང་གིས་ཕྱི་ལོ་ ༢༠༡༣ ལོར་ཚེ་བཀྲ་ལགས་འཛིན་བཟུང་བྱས་པ་དང་མནར་སྤྱོད་མྱངས་པའི་གནས་ཚུལ་ད་ལྟ་གཞི་ནས་ཤེས་རྟོགས་བྱུང་ཡོད་པ་དང་། གནད་དོན་དེའི་ཐོག་ནས་བོད་ནང་རྒྱ་གཞུང་གིས་གསར་འགྱུར་རང་དབང་དང་བོད་མིའི་གཞི་རྩའི་རང་དབང་ལ་དམ་དྲག་ག་ཚོད་ཙམ་བྱས་དང་བྱེད་མུས་ཡིན་པ་གསལ་པོ་རྟོགས་ཐུབ་ངེས་ཡིན་པ་སོགས་གསུངས་སོང་བ་དང་ཆབས་ཅིག རྒྱ་ནག་གཞུང་གི་ངོས་ནས་ཕྱི་ཕྱོགས་ལ་ཁག་དཀྲི་རྒྱུ་དང་འཁྱོག་བཤད་སོགས་མཚམས་འཇོག་བྱས་ཏེ་བོད་མི་རང་ལུས་མེར་སྲེག་གནང་མཁན་རྣམས་ཀྱི་དགོས་འདུན་གང་ཡིན་དང་མཐུན་པའི་ལག་བསྟར་དགོས་པའི་སྐུལ་མ་གནང་ཡོད། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ད་དུང་གྲྭ་ཚེ་བཀྲ་ལགས་ཀྱི་གནས་ཚུལ་ར་འཕྲོད་བྱུང་བ་དང་བསྟུན་ནས་གནད་དོན་དེས་བོད་ནང་འབྲོག་པ་གཞིས་སྤོས་ཀྱི་སྲིད་བྱུས་དེ་ནོར་འཁྲུལ་ཇི་ཙམ་ཡིན་པ་གསལ་པོ་ཆགས་ཡོད་སྐོར་མངོན་གསལ་གནང་འདུག

བདུན་ཕྲག་འདིའི་རེས་གཟའ་ཉི་མའི་ཉིན་བོད་ཀྱི་རྒྱལ་ས་ལྷ་ས་ཁུལ་དུ་མང་ཚོགས་ལ་ཏོག་དབྱིབས་གཉན་རིམས་ ༡༩ ཕོག་ཡོད་མེད་བརྟག་པའི་ཁྲོད་མི་ ༡༨ ལ་གཉན་རིམས་ཕོག་པ་ཤེས་རྟོགས་བྱུང་བ་དང་འབྲེལ། དེ་རིང་ནས་བཟུང་དུས་ཚོད་ངེས་མེད་བར་ཕོ་བྲང་པོ་ཏ་ལ་སྒོ་རྒྱག་རྒྱུ་རེད་འདུགཁ་སང་རྒྱ་ནག་གཞུང་འབྲེལ་བརྒྱུད་ལམ་ Xinhua ཐོག་གནས་ཚུལ་སྤེལ་བར་ཁ་སང་ལྷ་ས་གྲོང་ཁྱེར་ལས་ཁུངས་ཀྱིས་བསྒྲགས་གཏམ་ཞིག་སྤེལ་འདུག་པའི་ནང་ཉེ་ཆར་རེས་གཟའ་ཉི་མའི་ཉིན་རྒྱལ་ས་ལྷ་ས་ཁུལ་དུ་མང་ཚོགས་ལ་ཏོག་དབྱིབས་གཉན་རིམས་ ༡༩ ཕོག་ཡོད་མེད་བརྟག་པའི་ཁྲོད་མི་ ༡༨ ལ་གཉན་རིམས་ཕོག་པ་ཤེས་རྟོགས་བྱུང་དོན་ལྟར་དེ་དག་སྨན་བཅོས་ཆེད་སྨན་ཁང་དུ་ཁྲིད་ཡོད་པ་དང་། དེ་དག་དང་དངོས་སུ་འབྲེལ་གཏུག་བྱུང་བ་རྣམས་ཟུར་བཀག་ཐོག་འཇོག་བཞིན་ཡོད་སྐོར་འཁོད་འདུགདེ་བཞིན་དེ་རིང་ AP གསར་ཁང་གིས་ཁ་སང་ལྷ་ས་ཁུལ་གྱི་ཕོ་བྲང་པོ་ཏ་ལའི་ Weixin དྲ་ལམ་ཐོག་གསལ་བསྒྲགས་ཤིག་སྤེལ་བ་བརྒྱུད་ནས་དེ་རིང་ནས་བཟུང་ཕོ་བྲང་པོ་ཏ་ལར་ཡུལ་སྐོར་སྤྲོ་འཆམ་པ་སོགས་ཕྱི་མི་གཏང་རྒྱུ་མིན་པ་དང་རེ་ཞིག་སྒོ་རྒྱག་རྒྱུ་ཡིན་པ་བཀོད་འདུག དེ་རིང་རྒྱ་ནག་རྒྱལ་ཡོངས་སུ་མི་ ༨༢༨ ལ་གཉན་རིམས་ཕོག་པ་ཤེས་རྟོགས་བྱུང་བ་དོན་ལྟར་དེ་དག་ལས་མི་ ༢༢ བོད་ནང་ནས་ཡིན་པ་གསལ་ཡོད་ཀྱང་མང་ཆེ་བར་ནད་རྟགས་གང་ཡང་མེད་པ་རེད་འདུག རྒྱ་ནག་གི་ Hainan མཚོ་གླིང་ཁུལ་དུ་ད་ལྟའི་ཆར་ཡུལ་སྐོར་སྤྲོ་འཆམ་པ་བརྒྱད་ཁྲི་ཙམ་ཡོད་པ་རྣམས་ལ་ས་གནས་སྲིད་གཞུང་གིས་བརྟག་དཔྱད་རིམ་པ་ཁ་ཤས་ནང་གཉན་རིམས་ཕོག་མེད་པའི་གྲུབ་འབྲས་མ་ཐོན་བར་དུ་ས་གནས་ནས་ཕྱིར་བསྐྱོད་མི་ཆོག་པའི་བཀའ་རྒྱ་བཏང་སྟབས་ཡུལ་སྐོར་བ་དེ་དག་ས་ཁུལ་དེ་ནས་ཕྱིར་སྐྱོད་མ་ཐུབ་པ་ལུས་འདུགཁ་སང་རྩོམ་པ་པོ་ཚེ་རིང་འོད་ཟེར་ལགས་ཀྱིས་ཁོང་གི་ངོ་དེབ་ཐོག་བོད་ནང་ཏོག་དབྱིབས་གཉན་རིམས་ཕོག་ཡོད་མེད་ཀྱི་བརྟག་དཔྱད་བྱེད་བཞིན་པའི་པར་དང་བཅས་གནས་ཚུལ་སྤེལ་བའི་ནང་ལྷ་ས་ཁུལ་དུ་གཉན་རིམས་ཕོག་ཡོད་མེད་བརྟག་དཔྱད་བྱེད་བཞིན་སྐབས་སྔོན་འགོག་དང་འབྲེལ་བའི་དགོས་ངེས་ཀྱི་བར་ཐག་འཇོག་མེད་པ་དང་། མང་ཚོགས་དུ་མ་ཞིག་བརྟག་དཔྱད་ཆེད་འབོད་ཡོད་ཀྱང་བརྟག་དཔྱད་ཀྱི་ཡོ་ཆས་ཚང་མེད་པའི་ཁར་ལོ་ན་བགྲེས་པ་དང་ཕྲུ་གུ་སོགས་མང་ཚོགས་མང་པོ་ཞིག་ཆུ་ཚོད་མང་པོའི་རིང་སྒུག་དགོས་བྱུང་ཡོད་སྟབས་སྲིད་གཞུང་གི་ངོས་ནས་གྲ་སྒྲིག་འཐུས་ཚང་ཞིག་མེད་པར་མངོན་གསལ་གནང་འདུགགསར་ལམ་ཁག་གིས་དེ་འབྲེལ་གནས་ཚུལ་སྤེལ་བར་རྒྱ་ནག་གཞུང་གིས་གཉན་རིམས་ཀླད་ཀོར་གྱི་སྲིད་བྱུས་འོག་ནས་མང་ཚོགས་ཕོན་ཆེར་གཉན་རིམས་ཕོག་ཡོད་མེད་བརྟག་པ་དང་སྒོ་རྒྱ་བསྡམས་པ་སོགས་བྱས་ཀྱང་ཕན་ཐོགས་གང་ཡང་བྱུང་མེད་པ་སོགས་སྐྱོན་བརྗོད་གནང་ཡོད་པ་རེད།

བོད་ཀྱི་ས་ཁུལ་ཁག་ཅིག་ནང་རྒྱ་གཞུང་གིས་ཉིན་བརྒྱའི་རྡུང་རྡེག་དྲག་པོ་གཏོང་བའི་ལས་འགུལ་སྤེལ་མུས་ཡིན་པ་ལྟར་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བའི་ཁུལ་ནས་བོད་མི་  ༦   རྒྱུ་མཚན་གསལ་ཁ་གང་ཡང་མེད་པར་བཙན་འཁྲིད་བྱས་ཡོད་འདུགརྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁོངས་ཀྱི་རྒྱལ་ས་ལྷ་སའི་ཉེ་འགྲམ་དུ་ཆགས་པའི་མལ་གྲོ་གུང་དཀར་རྫོང་དང་འདམ་གཞུང་རྫོང་།   སྙེ་མོ་རྫོང་།  ལྷུན་གྲུབ་རྫོང་།  ཆུ་ཤུར་རྫོང་བཅས་ཀྱི་ནང་དུ་རྒྱ་ནག་གཞུང་ནས་ཉིན་བརྒྱའི་རྡུང་རྡེག་དྲག་པོ་གཏོང་བའི་འགུལ་སྐྱོད་དྲག་པོ་ཅེས་པའི་དྲག་གནོན་གྱི་ལས་འགུལ་ཞེས་པའི་མིང་བྱང་འོག་ལྷ་ས་གྲོང་ཁྱེར་ཉེན་རྟོག་གིས་སྣེ་འཁྲིད་སྟེ་བོད་ཀྱི་ས་ཁུལ་ཁག་ཅིག་གི་ནང་ལ་ཞིབ་བཤེར་དང་རྟོགས་ཞིབ་དམ་དྲག་གྱི་ལས་གཞི་སྔར་ལྷག་སྤེལ་བ་མ་ཟད། ཉེས་མིང་འདྲ་མིན་འོག་ནས་ཡུལ་མི་རྣམས་གྱི་འགྲོ་འདུག་གང་བྱུང་ཞིབ་བཤེར་བྱས་ནས་འཛིན་བཟུང་བཙན་འཁྲིད་བྱེད་ཀྱི་ཡོད་པ་རེད་འདུག འདི་གའི་གསར་འགོད་པར་གནས་ཚུལ་མཁོ་སྤྲོད་པས་གསུང་བར་གཞིགས་ན་ཉེ་བའི་འཆར་ཕྱི་ཟླ་ ༧ ཚེས་ ༣༡ ཉིན་རྒྱ་གཞུང་གིས་ཉིན་བརྒྱའི་རྡུང་རྡེག་དྲག་གནོན་གྱི་བྱ་སྤྱོད་འོག་བོད་མི་ ༦ བཙན་འཁྲིད་འོག་བཀག་ཉར་བྱས་ཡོད་པ་དང་ད་ལྟའི་ཆར་ཁོང་རྣམ་པའི་གནས་སྟངས་དང་ས་གནས་གང་དུ་བཀག་ཉར་བྱས་ཡོད་མེད་སོགས་ཀྱི་གནས་ཚུལ་ཞིབ་ཕྲ་ནང་མི་ཁྱིམ་མཚེས་ཚོས་ཀྱང་ཤེས་རྟོགས་ཐུབ་མེད་པ་གསུངས་བྱུང་། མ་ཟད་རྒྱ་ནག་གཞུང་གིས་དྲྭ་རྒྱའི་བདེ་ཐང་དམངས་ཀྱི་ཆེད་།   དྲྭ་རྒྱའི་བདེ་ཐང་དམངས་ལ་བརྟེན་ཟེར་བའི་འབོད་ཚིག་བསྒྲགས་བ་དང་འཕྲེད་དར་ཕྱར་བ་སོགས་ཀྱིས་བརྒྱུད་བོད་ཀྱི་རྒྱལ་ས་ལྷ་སའི་གཡས་གཡོན་གྱི་ས་ཁུལ་གང་སར་ལ་དམག་མི་སྔར་ལྷག་བཀྲམ་པ་མ་ཟད། ས་གནས་ཀྱི་མང་ཚོགས་འདུ་སྐོངས་ཀྱིས་ཚོགས་འདུ་ཚོགས་ཏེ་ཕྱིའི་རྒྱལ་ཁབ་ཁག་ནང་ཡོད་པའི་ནང་མི་ཉེ་སྤུན་དང་ཚོང་རོགས་ཚོར་ངོ་ཤེས་དང་འབྲེལ་བ་བྱེད་ཚེ། རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བ་རེད་ཅེས་དང་།  སྤྱི་ཚོགས་ནང་ཟང་ཟིང་གི་བྱ་སྤྱོད་སྤེལ་ཚེ་ཡུལ་ཁྲིམས་ལྟར་ཐག་གཅོད་ནན་པོ་བྱ་རྒྱུའི་ཉེན་བརྡ་བཏང་པ་མ་ཟད། ས་གནས་བོད་མི་རྣམས་ཀྱི་ལག་ཐོག་ཁ་པར་དང་སྡོད་ཁྱིམ་སོགས་སུ་དུས་ཚོད་ངེས་མེད་ལ་ཞིབ་བཤེར་དང་རྟོགས་ཞིབ་བྱས་ཏེ་འདྲི་རྩད་སྣ་ཚོགས་བྱས་ཀྱི་ཡོད་པ་རེད་འདུག དེ་བཞིན་བོད་དབུས་ཕྱོགས་ནས་ཡིན་པ་ད་ལྟའི་ཚར་མཐོ་སློབ་ནང་བསྐྱོད་བཞིན་པའི་བུ་མོ་ཞིག་གིས་རང་ཉིད་ཕ་ཡུལ་དང་འབྲེལ་བ་མ་བྱས་ནས་ཟླ་ཤས་ཕྱིན་སོང་བ་དང་། ཉེ་ལམ་ནང་མི་ཚོར་འབྲེལ་བ་བྱ་ཐབས་བྱས་ཀྱང་ནང་མི་རྣམས་ཀྱི་སྐད་ཆ་བཤད་རྒྱུར་ཞེད་སྣང་བྱས་ཏེ་སྐད་ཆ་དེ་སྔ་ལྟར་ཤོད་ཀྱི་མེད་པ་གསུངས་བྱུང་། གཞི་རྩའི་རྒྱ་ནག་གཞུང་ནས་ཉིན་བརྒྱའི་ལས་འགུལ་འམ་ཉིན་བརྒྱའི་བྱ་སྤྱོད་ཟེར་བའིི་དྲག་གནོན་རྡུང་རྡེག་གཏོང་བའི་འགུལ་སྐྱོད་གྱི་ལས་གཞི་ཟེར་བ་དེ་ཕལ་ཆེ་ལོ་ལྟར་སྤེལ་བཞིན་ཡོད་པ་ཞིག་ཡིན་འདུག་པ་དང་། ཉེ་སྔོན་ཕྱི་ཟླ་ ༦ པའི་ཚེས་ ༢༥ ཉིན་རྒྱ་ནག་རྒྱལ་ཡོངས་ཉེན་རྟོག་ཚན་པས་དབྱར་དུས་ཀྱི་བདེ་འཇགས་བཅོས་སྐྱོང་རྡུང་རྡེག་གི་ཉིན་བརྒྱའི་ལས་གཞི་ཟེར་བ་ཞིག་ཀྱང་སྤེལ་ཡོད་པ་རེད་འདུག པར་དབང་བོད་ཀྱི་དུས་བབ།  

བོད་ཁམས་ཕྱོགས་འབྲི་རུ་ནས་ཡིན་པའི་ཚོང་པ་བསྟན་འཛིན་ཐར་པ་ལགས་ཀྱིས་ས་གནས་བོད་མིར་ཕྱི་ཕྱོགས་སུ་དངུལ་གཏོང་རོགས་བྱས་པར་བརྟེན་རྒྱ་ནག་གཞུང་གིས་ཁོང་ལ་ལོ་གཉིས་དང་ཕྱེད་ཀའི་བཙོན་འཇུག་ཁྲིམས་ཆས་བཏང་འདུགདེ་ཡང་ Human Rights Watch ཞེས་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་ཕྱི་ལོ་ ༢༠༢༠ ལོའི་ཟླ་ ༡༠ པའི་ནང་བོད་ནག་ཆུ་གྲོང་ཁྱེར་འབྲི་རུ་རྫོང་ནས་རང་ལོ་ ༣༩ ཅན་གྱི་བོད་མི་ཐར་པ་ལགས་དང་རང་ལོ་ ༣༦ ལ་སོན་པའི་བོད་མི་ལྷ་མོ་ལགས་རྣམ་གཉིས་རྒྱ་གཞུང་གིས་དེ་ལོའི་ཕྱི་ཟླ་ ༦ པའི་ནང་འཛིན་བཟུང་བྱས་ཡོད་པ་དང་ལྷ་མོ་ལགས་བཀག་ཉར་ཁང་དུ་སྡུག་སྦྱོང་མནར་གཅོད་ཚད་མེད་བཏང་བར་བརྟེན་ཕྱི་ལོ་ ༢༠༢༠ ཕྱི་ཟླ་ ༨ པའི་ནང་འདས་གྲོངས་སུ་གྱུར་བའི་ཛ་དྲག་གི་གནས་ཚུལ་ཐོན་ཡོད་རུང་བསྟན་འཛིན་ཐར་པ་ལགས་ཀྱི་གནས་སྟངས་སྐོར་ཤེས་རྟོགས་གང་ཡང་ཐུབ་མེད། འོན་ཀྱང་དེ་རིང་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བར་གཞིགས་ན། རྒྱ་གཞུང་གིས་སྐབས་དེར་གསང་བའི་སྒོ་ནས་ཁྲིམས་ར་ཚོགས་ཏེ་བོད་མི་བསྟན་འཛིན་ཐར་པ་ལགས་ཀྱིས་ས་གནས་བོད་མིར་ཕྱི་ཕྱོགས་སུ་དངུལ་གཏོང་རོགས་བྱས་པར་བརྟེན་རྒྱ་ནག་གཞུང་གིས་ཁོང་ལ་ལོ་གཉིས་དང་ཕྱེད་ཀའི་བཙོན་འཇུག་ཁྲིམས་ཆད་བཏང་ཡོད་པ་དང་།   འདི་ལོའི་ཕྱི་ཟླ་ ༡༢ པའི་ནང་བཙོན་འཇུག་གི་དུས་ཡུན་ཚང་ནས་གློད་བཀྲོལ་ཐོབ་རྒྱུའི་དུས་ལ་བསླེབས་ཡོད་པ་བཀོད་འདུག ལྟེ་གནས་ཁང་ནས་ད་དུང་བསྟན་འཛིན་ཐར་པ་ལགས་ཀྱི་ནང་མིས་ཁྲིམས་རྩོད་པ་ཞིག་གླ་རྒྱུ་བྱུང་ཡོད་ནའང་ཕྱི་གསལ་ནང་གསལ་གྱི་ཁྲིམས་བཤེར་བྱས་མེད་པ་མ་ཟད། ཁོང་གང་དུ་བཙོན་འཇུག་བྱས་ཡོད་མེད་སོགས་ཀྱི་གནས་ཚུལ་ཡང་ནང་མིར་མཁོ་སྤྲོད་བྱས་མེད་པ་དང་། བསྟན་འཛིན་ཐར་པ་ལགས་དང་ལྷ་མོ་ལགས་རྣམ་གཉིས་ནས་རྒྱ་གར་དུ་ཡོད་པའི་སྤུན་མཆེད་དང་ལྷན་དུ་འབྲེལ་བ་བྱས་པ་དང་དངུལ་བཏང་བའི་ནག་ཉེས་འོག་འཛིན་བཟུང་བྱས་ཡོད་པ་རེད། སྤྱིར་སྔོན་མ་ནས་བོད་ནང་གི་བོད་མི་མང་པོས་རྒྱ་གར་དུ་ཡོད་པའི་འབྲེལ་ཡོད་སྤུན་མཆེད་རྣམས་ལ་འཚོ་གནས་ཆེད་དང་ཆོས་འབྲེལ་གྱི་ཆེད་དངུལ་གཏོང་སྲོལ་ཡོད་ཀྱང་ཉེ་ལམ་རྒྱ་ནག་གཞུང་གིས་དམ་བསྒྲགས་ཤུགས་ཆེར་བྱས་རྐྱེན་བོད་མི་མང་པོར་དཀའ་ཁག་ཕྲད་ཡོད་པ་དང་། ལྷག་པར་དུ་རྒྱ་གར་གྱི་མཐོ་སློབ་ཁག་ལ་འགྲིམས་བཞིན་པའི་སློབ་མ་ཚོར་དེ་བས་དཀའ་ངལ་ཆེ་པོ་འཕྲད་བཞིན་ཡོད་པ་བཀོད་འདུག གཞི་རྩའི་བསྟན་འཛིན་ཐར་པ་ལགས་ནི་སྔོན་ཆད་གསེར་རྟ་བླ་རུང་སྒར་གྱི་གྲྭ་པ་ཞིག་ཡིན་པ་དང་རྒྱ་གཞུང་གིས་གསེར་རྟ་བླ་རུང་སྒར་གཙོས་པའི་མདོ་ཁམས་ཕྱོགས་ཀྱི་དགོན་སྡེ་ཁག་ལ་སློབ་གཉེར་བྱ་རྒྱུར་དམ་བསྒྲགས་དང་སྲིད་བྱུས་འདྲ་མིན་ལག་བསྟར་བྱས་རྐྱེན་ཕྱི་ལོ་ ༢༠༡༢ ལོར་ཕྱིར་ཕ་ཡུལ་དུ་ལོག་སྟེ་སྐྱ་བོར་གྱུར་ནས་དབྱར་རྩ་དགུན་འབུ་སོགས་ཀྱི་སྨན་རྩའི་ཚོང་ལས་གཉེར་ནས་ལམ་འགྲོ་ལེགས་པོ་བྱུང་ཡོད་སྟབས། འབྲི་རུར་བུ་ཕྲུག་ཆེད་སློབ་གྲྭ་ཞིག་གསར་འཛུགས་གནང་ཡང་རྒྱ་གཞུང་གིས་སྒོ་བརྒྱབས་ཏེ་ཁོང་ལ་རྒྱུན་དུ་ལྟ་ཉུལ་བྱེད་འགོ་བརྩམས་ཡོད་པ་རེད་འདུག རྩ་བའི་ཁོང་ལྟ་བུ་བོད་མི་མང་དག་ཅིག་རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་པའི་གནས་ཚུལ་རྣམས་རྒྱ་གཞུང་གིས་ཆེས་དམ་བསྒྲགས་ཀྱིས་བཙན་བྱོལ་ནང་ལོ་ཤས་རྗེས་སུ་མ་གཏོགས་གནས་ཚུལ་མཁོ་སྤྲོད་ཐུབ་ཀྱི་མེད་པ་དང་། ཉེ་བའི་འཆར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བོད་ཀྱི་ཤར་ཕྱོགས་ནག་ཆུ་ཁུལ་གྱི་ཚོང་པ་བསྟན་འཛིན་ཆོས་འཕེལ་ལགས་ཀྱང་ཕྱི་ལོ་ ༢༠༡༨ ལོའི་ཕྱི་ཟླ་ ༣ པའི་ཟླ་མཇུག་ཏུ་རྒྱ་གཞུང་གིས་བཙན་ཁྲིད་ཀྱིས་ད་བར་གར་སོང་ཆ་མེད་དུ་སོང་ཡོད་ཀྱང་། རྒྱ་ནག་གཞུང་གིས་ཁོང་ལ་ ༢༠༡༩ ལོའི་ཟླ་ ༥ ཚེས་ ༢༤ ཉིན་རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོ་བའི་ལས་གཞིར་མཐུན་འགྱུར་དང་། རྒྱལ་ཁབ་ཀྱི་གསང་བ་ཕྱིར་གྱར། དེ་བཞིན་རྒྱལ་ཁབ་ཁ་བྲལ་སོགས་ཀྱི་ཉེས་མིང་འོག་མི་ལོ་ ༡༨ ཀྱི་བཙོན་འཇུག་ཉེས་ཆད་དང་། ལོ་ ༥ རིང་ཆབ་སྲིད་ཀྱི་ཐོབ་ཐང་འཕྲོག་རྒྱུའི་ཉེས་ཆད་བཀལ་ཡོད་བའི་གནས་ཚུལ་ཞིག་ཀྱང་སྤེལ་ཡོད་པ་རེད།  

བོད་ཀྱི་བུད་མེད་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༡༤ པ་དེ་བཞིན་ལ་དྭགས་གླེ་གྲོང་ཁྱེར་ལྕོག་ལམ་སར་ཡོད་པའི་བསོད་ནམས་གླིང་བོད་མིའི་གཞིས་ཆགས་ཀྱི་མཉམ་འབྲེལ་ཚོགས་ཁང་ནང་ཁ་སང་ཕྱི་ཚེས་ ༡ ནས་འགོ་འཛུགས་ཀྱིས་ཕྱི་ཚེས་ ༥ བར་འཚོག་རྒྱུ་དང་། དེ་རིང་ས་གནས་སོ་སོའི་ལས་བསྡོམས་དང་། དེ་བཞིན་རྩིས་ཁྲ་སྙན་སྒྲོན་དང་ཞིབ་བཤེར་གནང་ཡོད་པ་རེད་འདུགགཞི་རྩའི་ཐེངས་འདིའི་བེུད་ལྷན་ཚོགས་ཀྱི་འགན་འཛིན་ལྷན་ཚོགས་དེའི་ཐོག་རྒྱ་གར་དང་བལ་ཡུལ། ཨ་རི་དང་ཡོ་རོབ་བཅས་ས་གནས་ཁག་ ༢༨ ནས་རྒྱུན་ལས་མི་གྲངས་ ༧༥ ལྷག་མཉམ་ཞུགས་གནང་ཡོད་པ་དང་། དེའི་སྐབས་གྲོས་གཞི་དོན་ཚན་ཁག་བརྒྱད་ཐོག་བཀའ་བསྡུར་གྲོས་ཆོད་གཏན་འབེབས་གནང་རྒྱུ་ཡིན་འདུག དབུས་བུད་མེད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས་ཀྱིས་གསུངས་དོན་དུ་འགན་འཛིན་ལྷན་ཚོགས་དིའི་ཐོག་བཀའ་བསྡུར་གནང་རྒྱུའི་གྲོས་གཞི་གལ་ཆེ་ཤོས་ནི་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭ་དང་འབྲེལ་བའི་གནད་དོན་དང། དེ་འབྲེལ་ཆབ་སྲིད་ཀྱི་ལས་དོན་སྤེལ་ཕྱོགས་སོགས་ཀྱི་ཐོག་གྲོས་མོལ་གནང་གི་ཡོད་སྐོར་གསུངས་ཡོད།དེ་བཞིན་ཁོང་གིས་ད་རེས་བེུད་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༡༤ པ་དེ་བཞིན་མ་སྒྲིག་ལྷུན་གྲུབ་ལྟ་བུར་༸གོང་ས་༸སྐྱབས་མགོན་ཆེན་པོ་མཆོག་འདི་ག་ལ་དྭགས་སུ་ཆིབས་བསྒྱུར་དང་བསྟུན་གོ་སྒྲིག་ཞུ་ཐུབ་པ་དེ་ཧ་ཅང་སྐལ་པ་བཟང་པོ་ཞིག་ལ་ངོས་འཛིན་གནང་གི་ཡོད་སྐོེར་ཡང་གསུངས་སོང་། ཡང་ཚོགས་གཙོ་ལགས་སུ་ཨ་རིའི་ནིའུ་འོག་དང་ནིའུ་ཇར་སིའི་ཁུལ་དུ་ས་གནས་བེུད་ལྷན་ཚོགས་ཁག་གཉིས་ཡོད་པའི་སྐོར་འགན་འཛིན་ལྷན་ཚོགས་འདིའི་ནང་བཀའ་མོལ་གནང་འཆར་ཡོད་མེད་སོགས་དྲིས་པས་ཁོང་ནས་གནད་དོན་དེར་དཀའ་ངལ་ཆེན་པོ་ཞིག་ལ་ངོས་འཛིན་གནང་གི་མེད་སྐོར་གསུངས་སོང་།གཞི་རྩའི་བོད་ཀྱི་བེུད་ལྷན་ཚོགས་ནི་ཕྱི་ལོ་ ༡༩༨༤ ལོར་གསར་འཛུགས་བྱས་པ་ཞིག་དང་། བཙན་བྱོལ་ནང་གི་གཞུང་འབྲེལ་མིན་པའི་ཚོགས་པ་ཆེ་གྲས་ཞིག་ཀྱང་ཡིན་པ་རེད། ད་ལྟའི་འཆར་ཚོགས་པ་དེའི་ནང་རྒྱ་གར་དང་བལ་ཡུལ་གཙོས་པའི་ནུབ་ཕྱོགས་རྒྱལ་ཁབ་བཅས་ས་གནས་ཀྱི་ཡན་ལག་ཁག་ ༥༨ དང་ཚོགས་མི་གྲངས་ ༡༦༠༠༠ ལྷག་ཡོད་པ་རེད།

རྒྱ་གཞུང་གིས་དབྱེ་བའི་རང་སྐྱོང་ལྗོངས་དབུས་ཁུལ་གྱི་གཞིས་ཀ་རྩེ་རིན་སྤུངས་རྫོང་ནས་ཡིན་པའི་བོད་མི་ཚེ་དབང་རིན་ཆེན་ལགས་ཞུ་བ་ཞིག་ལ་རྒྱལ་ཁབ་ཀྱི་ལས་དོན་འཐུས་ཤོར་དང་ཕྱོགས་ཞེན་གྱིས་དབང་ཆ་ལོག་སྤྱོད་བྱས་འདུག་ཟེར་བའི་ཉེས་མིང་འོག་དུས་ཡུན་ལོ་གཅིག་དང་ཟླ་བ་དྲུག་རིང་གི་ཁྲིམས་ཐག་བཅད་འདུགདེ་ཡང་འདི་གའི་གསར་འགོད་པར་བཙན་བྱོལ་ནང་གནས་སྡོད་བོད་མི་ཞིག་གིས་གནས་ཚུལ་མཁོ་སྤྲོད་གནང་བར་གཞིགས་ན་ཚེ་དབང་རིན་ཆེན་ལགས་གཞིས་ཀ་རྩེ་རིན་སྤུངས་རྫོང་འབྲོག་སའི་དྲུང་ཡིག་གྱི་ལས་གནས་ཡོད་སྟབས་རྒྱ་གཞུང་གིས་བཀའ་བརྒྱ་བཏང་སྟེ་འབྲོག་པ་རྣམས་གྲོང་ཁྱེར་ལ་གནས་སྤོ་བྱ་དགོས་པའི་བཙན་བཀའ་ཡང་ཡང་བཏང་ཡང་ཚེ་དབང་རིན་ཆེན་ལགས་ཀྱིས་བཀའ་བརྒྱ་དེར་རྩི་མཐོང་བྱས་མ་སོང་ཟེར་བ་དང་རྒྱལ་ཁབ་ཀྱི་ལས་དོན་འཐུས་ཤོར་དང་ཕྱོགས་ཞེན་གྱིས་དབང་ཆ་ལོག་སྤྱོད་ཟེར་བའི་ཉེས་མིང་འོག་ཟླ་བ་འདིའི་ཕྱི་ཚེས་ ༡༦ ཉིན་གཞིས་ཀ་རྩེ་ནང་ཡོད་པའི་མི་མང་ཁྲིམས་ཁང་ནས་ཁོང་ལ་ལོ་གཅིག་དང་ཟླ་བ་དྲུག་རིང་བཙོན་འཇུག་གི་ཁྲིམས་ཐག་བཅད་པ་མ་ཟད། རྒྱ་སྒོར་ ༣༥༠༠༠ རྒྱ་གཞུང་ལ་སྤྲད་དགོས་པ་དང་ཁོང་གིས་དྲུང་ཡིག་གི་ལས་གནས་དེ་ཡང་ཕྱིར་བསྡུ་བྱས་འདུག་ ད་ལྟ་ཁོང་གི་གནས་སྟངས་དང་བཙོན་ཁང་གང་དུ་ཡོད་མིན་ཤེས་ཚོད་ཁག་པོར་གྱུར་འདུག གཞི་རྩའི་བོད་མི་ཚེ་དབང་རིན་ཆེན་ལགས་ཀྱིས་ཕྱི་ལོ་ ༢༠༡༣ ལོ་འགོ་ནས་རྒྱ་གཞུང་གིས་ས་གནས་འབྲོག་པའི་འཚོ་བ་སྐྱེལ་སྟངས་དེ་མེད་པར་བཟོས་ནས་འབྲོག་པ་རྣམས་གྲོང་ཁྱེར་ནང་སྤོ་དགོས་པའི་ཁྲིམས་བཟོ་སྐབས་ས་གནས་གཞུང་ལ་སྔར་རྒྱུན་ནས་གནས་པའི་འབྲོག་པའི་འཚོ་བ་དེ་མེད་པར་བཟོས་ནས་ཁོང་རྣམས་གྲོང་ཁྱེར་དུ་སྤོས་ཚེ་མ་འོངས་པར་འབྲོག་མི་རྣམས་ལ་དཀའ་ངལ་ཚད་མེད་འཕྲད་བའི་ཉེན་ཁ་ཡོད་ལུགས་འགྲེལ་བརྗོད་དང་། འབྲོག་པ་རྣམས་སྔར་བཞིན་ས་མཐོ་སར་སྒོ་ཕྱུགས་སེམས་ཅན་དང་མཉམ་དུ་འཚོ་བ་སྐྱེལ་བཅུག་ཚེ་དེས་འབྲོག་པ་རྣམས་ལ་ཕན་ཐོགས་ཡོད་པའི་སྙན་ཐོ་ཞིག་རྒྱ་གཞུང་ལ་ཕུལ་མྱོང་ཡོད་པ་རེད་འདུག པར་དབང་བོད་ཀྱི་དུས་བབ།

ཟླ་བ་འདིའི་ནང་རྒྱ་ནག་གོའང་ཏོང་ Guangdong ཞིང་ཆེན་ནང་རྒྱ་ནག་གཞུང་གིས་སྟངས་འཛིན་འོག་ཡོད་པའི་རྒྱ་ནག་ནང་པའི་མཐུན་ཚོགས་ China Buddhist Association ངོས་ནས་བོད་བརྒྱུད་ནང་བསྟན་གྱི་དགེ་འདུན་པ་ཚོས་ཁྲིམས་མཐུན་མིན་པའི་སྒོ་ནས་ཆོས་ལུགས་ཁྱབ་སྤེལ་བྱ་རྒྱུར་མཚམས་འཇོག་དགོས་པའི་དམ་བསྒྲགས་བྱས་འདུགདེ་ཡང་ Bitterwinter གསར་ཁང་གི་གནས་ཚུལ་སྤེལ་བར་གཞིགས་ན། རྒྱ་ནག་གོའང་ཏོང་ Guangdong ཞིང་ཆེན་ཁུལ་དུ་གནས་བཞུགས་ནང་པའི་ཆོས་བརྒྱུད་འཛིན་པ་རྣམས་ཀྱིས་རྒྱ་ནག་ནང་པའི་མཐུན་ཚོགས་ཁྱབ་ཁོངས་ཀྱི་དགོན་སྡེ་ཁག་རྣམས་དམར་པོའི་གཞུང་གི་ལྟ་སྤྱོད་སྤེལ་ས་ཞིག་ལ་ངོས་འཛིན་གྱིས། དེའི་ཚབ་ཏུ་བོད་དང་ཕྱི་རྒྱལ་ཁག་ནས་བོད་པའི་དགེ་འདུན་པ་གདན་ཞུ་གནང་སྟེ་གསན་བསམ་གནང་གི་ཡོད་སྟབས། རྒྱ་གཞུང་གི་སྟངས་འཛིན་འོག་ཡོད་པའི་རྒྱ་ནག་ནང་པའི་མཐུན་ཚོགས་ཟེར་བ་དང་རྒྱ་ནག་གཞུང་ནས་དེར་བཟོད་སྲན་ཐུབ་ཀྱི་མེད་པ་རེད་འདུག ཚོགས་པ་དེས་ཟླ་བ་འདིའི་ནང་སྤེལ་བའི་བཀའ་རྒྱ་དེའི་ནང་ཉེ་བའི་ལོ་ཤས་ནས་བཟུང་རྒྱ་ནག་སྐམ་ས་ཆེན་མོར་ཐེག་པ་ཆེན་པོའི་ཆོས་ཁྱབ་སྤེལ་ཡོང་རྒྱུར་ཆོག་མཆན་གང་ཡང་མེད་པའི་བོད་བརྒྱུད་ནང་བསྟན་གྱི་དགེ་འདུན་པ་མང་དུ་སོང་ཡོད་པར་རྒྱལ་ཁབ་ཀྱི་ཁྲིམས་སྒྲིག་དང་འགལ་བ་མ་ཟད། བོད་རིགས་དགེ་འདུན་པ་རྣམས་ཁ་བྲལ་རིང་ལུགས་གམ་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་བྱེད་མཁན་ཡིན་སྟབས། རྒྱལ་ནང་ལ་ཉེན་ཁ་དང་དངངས་འཚབ་བྱ་ཡུལ་ཞིག་ཏུ་གྱུར་ཡོད་པ་བཀོད་ཡོད་འདུགམ་ཟད་བཀོད་ཁྱབ་དེའི་ནང། སྤྱིར་བོད་པའི་དགེ་འདུན་པ་རྣམས་རྒྱ་ནག་གཞུང་གི་བཀའ་འཁྲོལ་མེད་པའི་ཐོག་ནས་རང་ཉིད་གནས་ཡུལ་ལས་ཕྱིར་བསྐྱོད་ནས་ནང་པའི་ཆོས་འཆད་ཁྲིད་བྱ་རྒྱུ་ནི་ཁྲིམས་འགལ་ཡིན་པ་འགྲེལ་བརྗོད་དང་འབྲེལ། གོའང་ཏོང་ Guangdong ནང་གི་ནང་པའི་དགོན་སྡེ་ཁག་དང་ཚོགས་པ་ཁག་ཡོངས་ནས་དེ་ལྟ་བུའི་བོད་བརྒྱུད་ནང་བསྟན་ཁྱབ་སྤེལ་གྱི་ལས་དོན་ཡོངས་ལ་མཉམ་ཞུགས་ཆོག་གི་མེད་པར་བརྗོད་འདུག ད་དུང་རྒྱ་ནག་གཞུང་གི་སྲིད་བྱུས་སམ་ལྟ་སྤྱོད་དང་བརྒལ་ནས་བོད་བརྒྱུད་ནང་བསྟན་ཁྱབ་སྤེལ་བྱེད་ཚེ་རྒྱལ་ཁབ་ཀྱི་ཆོས་ལུགས་དང་འབྲེལ་བའི་སྲིད་བྱུས་ལག་བསྟར་ཀྱིས་ཞིབ་བཤེར་དང་ཁྲིམས་ཆད་གཏོང་རྒྱུའི་ཉེན་བརྡ་དང་ ། གོའང་ཏོང་ Guangdong ཁུལ་དུ་གནས་སྡོད་ནང་པའི་ཆོས་བརྒྱུད་འཛིན་པ་ཚོས་རྒྱ་ནག་གཞུང་གི་བཀོད་སྒྲིག་བྱས་པའི་ནང་པའི་ཚོགས་པར་གུས་བཀུར་བྱ་དགོས་པའི་བཙན་བཀའ་བཏང་བ་མ་ཟད། ཁུལ་དེར་བོད་བརྒྱུད་ནང་བསྟན་འཛིན་པའི་བོད་རིགས་དགེ་འདུན་པ་རྣམས་ནས་ནང་ཆོས་ཁྱབ་སྤེལ་བྱས་པ་ཤེས་རྟོགས་བྱུང་ཚེ་མི་མང་བདེ་འཇགས་ལས་ཁང་དང་ས་གནས་ཆོས་ལུགས་ཚོགས་པར་རྩིས་སྤྲོད་བྱ་དགོས་པ་བཅས་ཀྱི་བཙན་བཀའང་བཏང་ཡོད་པ་རེད་འདུག

བཞུགས་སྒར་རྡ་སྟེང་བོད་ཕྲུག་ཁྱིམ་སྡེའི་ཉེ་འདབས་སུ་རྟེན་གཞི་བྱས་པའི་ Asia Health Resorts གསོལ་མགྲོན་ཁང་གི་ཡང་སྟེང་ཚོགས་ཁང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དབུས་པའི་གཏན་འཇགས་ཐབས་ཇུས་འཆར་འགོད་ཚོགས་ཆུང་གི་སློབ་སྟོན་པ་དང་ཚོགས་མི་རྣམས་ལྷན་བཞུགས་ཐོག་ཚོགས་ཆུང་གི་ཚོགས་འདུ་ཐེངས་གཉིས་པ་དབུ་འཛུགས་གནང་སོང་། ཐེངས་འདིའི་ཚོགས་འདུའི་ཐོག་སྲིད་སྐྱོང་སྤེན་པ་ཚེ་རིང་མཆོག་དང་ཚོགས་ཆུང་གི་སློབ་སྟོན་པ་བཀའ་ཟུར་འབྲོང་ཆུང་དངོས་གྲུབ་མཆོག་དང་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་ཟུར་པ་སྐལ་བཟང་རྒྱལ་མཚན་མཆོག ཚོགས་ཆུང་གི་ཚོགས་མི་བདེ་སྲུང་དྲུང་ཆེ་ཀརྨ་རིན་ཆེན་ལགས་དང་ཕྱི་འབྲེལ་དྲུང་ཆེ་ཀརྨ་ཆོས་དབྱིངས་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། བཀའ་ཤག་གི་ཆབ་སྲིད་དྲུང་ཆེ་བཀྲིས་རྒྱ་མཚོ་ལགས་བཅས་དངོས་སུ་ས་གནས་ལ་མཉམ་བཞུགས་དང་། ཚོགས་ཆུང་གི་སློབ་སྟོན་པ་བཀའ་ཟུར་བསྟན་པ་ཚེ་རིང་མཆོག་དང་། དམིགས་གསལ་གདན་ཞུ་དགའ་ལྡན་ཕོ་བྲང་གི་འབྲེལ་ཡོད་དྲུང་ཆེ་རྔ་བ་ཚེ་རྒྱམ་ལགས་གཉིས་དྲ་རྒྱའི་རྒྱུད་ཚོགས་འདུའི་ལས་རིམ་ཐོག་མཉམ་ཞུགས་གནང་ཡོད།འདི་ག་རླུང་འཕྲིན་ཁང་ནས་ཐེངས་འདིའི་གཏན་འཇགས་ཐབས་ཇུས་འཆར་འགོད་ཚོགས་ཆུང་གི་ཚོགས་འདུ་ཐེངས་གཉིས་པའི་གྲོས་གཞི་སོགས་དང་འབྲེལ་ཚོགས་ཆུང་གི་ཚོགས་མི་ཕྱི་འབྲེལ་དྲུང་ཆེ་ཀརྨ་ཆོས་དབྱིངས་ལགས་སུ་བཅར་འདྲི་ཞུ་སྐབས། ཚོགས་འདུ་ཐེངས་གཉིས་པ་འདི་བཞིན་དེ་རིང་ཕྱི་ཚེས་ ༢༧ ནས་ཕྱི་ཚེས་ ༢༩ བར་ཉིན་གྲངས་གསུམ་རིང་ཚོགས་རྒྱུ་དང་། ཚོགས་དུས་ཐོག་གཅོ་བོ་སྲིད་སྐྱོང་མཆོག་གིས་འདས་པའི་ལོ་གཅིག་ལྷག་གི་ལས་ཡུན་ཁྲོད་དུ་ཨ་རི་སོགས་སུ་ཕེབས་སྐབས་དང་། དེ་བཞིན་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ Uzra Zeya མཆོག་བཞུགས་སྒར་དང་བལ་ཡུལ་ནང་ཕེབས་སྐབས་དོན་སོ་སོར་བཀའ་མོལ་བྱུང་བའི་གནད་དོན། དེ་བཞིན་བོད་རྒྱ་འབྲེལ་མོལ་མཐུད་ཐབས་གནང་ཕྱོགས་སོགས་ཀྱི་ཐོག་བཀའ་བསྡུར་གནང་རྒྱུ་ཡིན་སྐོར་གསུངས་འགྲེལ་བརྗོད་གནང་བྱུང་། རྩ་བའི་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབུ་ཁྲིད་པའི་འཛིན་སྐྱོང་བཀའ་ཤག་སྐབས་ ༡༦ པས་སྔར་ལོའི་ཕྱི་ཟླ་ ༨ ཚེས་ ༡༣ ཉིན་དེ་སྔ་ཡོད་བཞིན་པའི་བོད་རྒྱ་གྲོས་མོལ་ལས་དོན་ཚོགས་ཆུང་ཕྱིར་བསྡུ་དང་སྦྲགས་གཏན་འཇགས་ཐབས་ཇུས་འཆར་འགོད་ཚོགས་ཆུང་ཞིག་ཆེད་བཙུགས་གནང་སྟེ། ཚོགས་ཆུང་གི་ཚོགས་འདུ་ཆེས་ཐོག་མ་དེ་སྔར་ལོའི་ཕྱི་ཟླ་ ༡༡ ཕྱི་ཚེས་ ༡༦ ནས་ ༡༨ བར་ཁྱོན་ཉིན་གྲངས་གསུམ་གྱི་རིང་བཞུགས་སྒར་ནོར་གླིང་ཉེ་འཁྲིས་སུ་ཚོགས་མི་དང་སློབ་སྟོན་པ་ཆ་ཚང་དངོས་སུ་ལྷན་འཛོམས་ཐོག་ཚོགས་ཡོད།

རྒྱ་གཞུང་གིས་ཕྱི་ལོ་ ༢༠༢༠ ནང་བོད་མི་ན་གཞོན་བསྟན་འཛིན་ཤེས་རབ་ལགས་ཀྱིས་རང་ལུས་མེར་བསྲེགས་བཏང་བའི་གནས་ཚུལ་ཕྱིར་བསྒྲགས་བྱས་པའི་ཉེས་མིང་འོག་ལོ་གསུམ་གྱི་བཙོན་འཇུག་ཁྲིམས་ཐག་བཅད་པ་ཕྲུ་གུ་གསུམ་གྱི་ཨ་མ་ནོར་འཛིན་དབང་མོ་ལགས་སུ་གཅར་རྡུང་མནར་གཅོད་ཚད་མེད་བཏང་རྗེས་འདི་ལོའི་ཕྱི་ཟླ་ ༣ པའི་ནང་གློད་བཀྲོལ་གཏོང་དགོས་བྱུང་བ་དེ་ལྟར་ཡང་། ནོར་འཛིན་དབང་མོ་ལགས་གློད་བཀྲོལ་བཏང་རྗེས་ཁྲིན་ཏུའུ་དང་ཟི་ལིང་སོགས་སུ་སྨན་པར་བསྟེན་གཏུག་བྱས་ཀྱང་དྲག་སྐྱེད་ཡོང་བའི་རེ་བ་མེད་པ་ལྟ་བུར་གྱུར་ཡོད་འདུགདེ་ཡང་ཁམས་ཡུལ་ཤུལ་ཁུལ་གྱི་ཆུ་དམར་ལེབ་རྫོང་ཆིག་སྒྲིལ་གྲོང་སྔོན་ལུང་སྡེ་བ་ནས་ཡིན་པའི་ནོར་འཛིན་དབང་མོ་ལགས་ཀྱི་འཕྲོད་བསྟེན་གནས་བབ་དང་འབྲེལ་ནས་བོད་ཀྱི་དུས་བབ་གསར་ཁང་གིས་གནས་ཚུལ་སྤེལ་དོན་ལྟར་ན། ཕྱི་ཟླ་ ༦ པའི་ཚེས་ ༡ ནས་ཁྲིན་ཏུའུ་གྲོང་ཁྱེར་གྱི་མི་མང་སྨན་ཁང་དུ་སྨན་པར་བསྟེན་ནས་ཉིན་བདུན་ཕྱིན་ཡོད་ཀྱང་ཕན་ཐོགས་བྱུང་མེད། དེ་ནས་སྐྱེ་རྒུ་མདོའི་མི་མང་སྨན་ཁང་དུ་ཉིན་གྲངས་ ༡༦ རིང་སྨན་བཅོས་བྱས་ཡོད་ནའང་དྲག་སྐྱེད་མ་བྱུང་བར་བརྟེན། སྨན་པའི་ལམ་སྟོན་བཞིན་འདས་པའི་ཉིན་གྲངས་ ༡༥ རིང་ཟི་ལིང་གྲོང་ཁྱེར་གྱི་སྨན་ཁང་ཆེ་གྲས་ཤིག་ཏུ་སྨན་བཅོས་བྱེད་མུས་ཡིན་ནའང་། དྲག་སྐྱེད་ཡོང་རྒྱུའི་རེ་བ་མེད་པ་ལྟ་བུ་གྱུར་ཡོད་པ་བཀོད་འདུག རྩ་བའི་རྒྱ་གཞུང་གིས་རྒྱལ་ཁབ་ཀྱི་གསང་བ་ཕྱིར་གྱར་དང་། ཁ་བྲལ་རིང་ལུགས་ཀྱི་ངན་སྐུལ་བྱས་ཚུལ་སོགས་ཀྱི་མིང་བྱང་སྣ་ཚོགས་འོག་ནས་ད་བར་དུ་བོད་མི་སྟོང་ཕྲག་མང་པོ་བཙོན་འཇུག་ཁྲིམས་ཐག་བཅད་ཡོད་པ་མ་ཟད། བཙོན་ཁང་ནང་སྡུག་སྦྱོང་མནར་གཅོད་ཚད་མེད་བཏང་བའི་རྒྱུ་མཚན་གྱི་བོད་མི་གློ་བུར་འདས་གྲོངས་སུ་གྱུར་བ་དང་། འཆི་ཁར་རང་ཁྱིམ་དུ་བསྐྱལ་བ་སོགས་ཀྱི་གནད་དོན་བསྟུད་མར་བྱུང་དང་འབྱུང་བཞིན་པ་ལྟར། ནོར་འཛིན་དབང་མོ་ལགས་ཀྱང་ ༢༠༡༣ ལོའི་ཟླ་ ༥ པའི་ནང་ཆུ་དམར་ལེབ་རྫོང་ཆིག་སྒྲིལ་གྲོང་སྡེ་ནས་བོད་མི་ན་གཞོན་བསྟན་འཛིན་ཤེས་རབ་ལགས་ཀྱིས་རང་ལུས་མེར་བསྲེགས་གནང་བའི་གནད་དོན་ཕྱིར་བསྒྲགས་བྱས་པའི་ཉེས་མིང་འོག་ཆུ་དམར་ལེབ་རྫོང་མི་མང་ཁྲིམས་ཁང་གིས་གསང་བའི་ཁྲིམས་ར་ཚོགས་ཏེ་ཁོང་ལ་ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་པ་མ་ཟད། ཟླ་བ་འདིའི་ཟླ་མཇུག་ཏུ་རྒྱ་ནག་གཞུང་གིས་སླར་ཡང་བོད་མི་བློ་ཚེས་ཞེས་པ་ཞིག་བརྒྱད་ཅུའི་འཁྲུངས་སྐར་བསུ་ཞེས་པའི་སྐད་འཕྲིན་ཚོགས་པ་ཞིག་བཙུགས་པའི་ཉེས་མིང་འོག་འཛིན་བཟུང་བཙན་ཁྲིད་བྱས་པའི་བརྒྱུད་ལམ་ཁག་ཏུ་གནས་ཚུལ་ཐོན་འདུགཁམས་དཀར་མཛེས་ཁུལ་སེར་ཤུལ་རྫོང་འབུམ་རྙིང་དགོན་རུ་མ་ནས་ཡིན་པ་བོད་མི་རང་ལོ་ ༥༧ ཅན་བློ་ཚེ་ལགས་ཀྱིས་བརྒྱད་ཅུའི་འཁྲུངས་སྐར་བསུ་ཞེས་བོད་ནང་གི་ས་ཁུལ་འདྲ་མིན་ནས་མཉམ་ཞུགས་གནང་མཁན་མི་གྲངས་ ༡༠༠ ལྷག་ཡོད་པའི་སྐད་འཕྲིན་ཚོགས་པ་བཙུགས་པར་ས་གནས་ཉེན་རྟོག་པས་ཁྲིམས་འགལ་གྱི་ལས་དོན་བྱས་ཡོད་སྐོར་ཟེར་ནས་འཛིན་བཟུང་བཙན་ཁྲིད་ཀྱིས་སེར་ཤུལ་རྫོང་ཐོག་ཏུ་ཁྲིད་དེ་ད་ལྟའི་ཆར་ཁོང་གི་གནས་སྟངས་སྐོར་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་མ་ཟད། ཉེན་རྟོག་པས་ཁོང་འཛིན་བཟུང་བྱེད་སྐབས་ས་གནས་ཡུལ་མི་མང་པོར་འདྲི་རྩད་དང་འཇིགས་སྐུལ་བྱས་ཡོད་པ་རེད་འདུག གཞི་རྩའི་རྒྱ་ནག་གཞུང་གིས་ནག་ཚོགས་གཙང་སེལ་དང་ཟང་ཟིང་བཅོས་སྒྲིག་ཟེར་བར་ཁ་གཡར་ཏེ་བོད་ཀྱི་རྒྱལ་ས་ལྷ་ས་གཙོས་བོད་ཀྱི་ས་ཁུལ་གང་སར་དྲ་རྒྱ་དང་སྐད་འཕྲིན་བཅས་ལ་སྔར་ལྷག་དམ་བསྒྲགས་ཆེས་ཆེར་བྱས་པ་མ་ཟད། བོད་མི་མང་པོས་སྐད་འཕྲིན་ཚོགས་པར་བཀའ་མོལ་གནང་བར་ཁྲིམས་འགལ་དང་ནག་ཉེས་ལ་བརྩིས་ནས་ས་གནས་བོད་མི་མང་དག་ཅིག་འཛིན་བཟུང་བྱེད་བཞིན་ཡོད་པའི་གནས་ཚུལ་སྔ་རྗེས་སུ་ཐོན་ཡོད་པ་རེད། ནོར་འཛིན་པར་དབང་བོད་ཀྱི་དུས་བབ། བློ་ཚེ་པར་དབང་ཨེ་ཤི་ཡ་རང་དབང་རླུང་འཕྲིན་ཁང་།