བོད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཕྱི་དྲོ་རྒྱ་གར་གྱི་ Odisha མངའ་སྡེའི་ Mayurbhanj རྫོངས་ཁོངས་ནས་ཡིན་པའི་ལྕམ་སྐུ་ Droupadi Murmu མཆོག་རྒྱ་གར་གྱི་སྲིད་འཛིན་སྐབས་ ༡༥ པར་བདམས་ཐོན་བྱུང་བར་དགའ་བསུའི་འཚམས་འདྲི་དང་སྦྲགས། མ་འོངས་ལས་དོན་ཁག་གང་ལེགས་གྲུབ་ཐུབ་པའི་ཐུགས་སྨོན་མཛད་འདུག དེ་ཡང་མགོན་པོ་གང་ཉིད་མཆོག་གིས་ད་ལྟའི་བཞུགས་བཞག་མཛད་ཡུལ་ལ་དྭགས་ཞི་བའི་ཚལ་ཕོ་བྲང་ནས་སྩལ་བའི་དགའ་བསུའི་འཚམས་འདྲི་དེའི་ནང་དུ་ད་ཆ་རྒྱལ་སྤྱིའི་སྤྱི་ཚོགས་ཁྱོན་ཡོངས་སུ་རྒྱ་གར་རྒྱལ་ཁབ་ཀྱི་གལ་གནད་དང་མཚན་མཐོང་གོང་འཕེལ་འགྲོ་བཞིན་པ་མ་ཟད། རྒྱ་གར་འདི་བཞིན་རྒྱལ་སྤྱིའི་ཐོག་ཞི་བདེ་དང་ཡར་རྒྱས་གོང་འཕེལ་ཐད་ཞབས་འདེགས་རླབས་ཆེན་གྲུབ་རྒྱུའི་ནུས་པ་ལྡན་པའི་རྒྱལ་ཁབ་ཞིག་ལ་ངོས་འཛིན་ཞུ་བཞིན་པའི་སྐབས་འདིར་ལྕམ་སྐུ་ Droupadi Murmu མཆོག་ནས་སྲིད་འཛིན་གྱི་ཐུགས་འགན་བཞེས་ཀྱིས་ཡོད་སྟབས། ལྕམ་སྐུ་མཆོག་གི་ལས་ཡུན་ཁྲོད་རང་ཉིད་ཀྱི་ནུས་པ་གང་ཡོད་ཀྱིས་རྒྱ་གར་རྒྱལ་ཁབ་འདི་བཞིན་མཚན་མཐོང་གོང་འཕེལ། ལྷག་པར་དུ་རྒྱ་གར་གྱི་གནའ་བོའི་རིག་གཞུང་བཟང་པོའི་བློ་སྤོབས་དང་སེམས་འགུལ་ཐེབས་པའི་ཐོག་རྒྱ་གར་གྱི་ནུས་སྟོབས་སྲ་བརྟན་དང་འཛམ་གླིང་ཞི་བདེའི་སྣེ་ཁྲིད་ཐུབ་པའི་ཡིད་ཆེས་ཡོད་ཅེས་བཀའ་སྩལ་འདུགམ་ཟད་མགོན་པོ་གང་ཉིད་མཆོག་རྒྱ་གར་གཞུང་གི་སྐུ་མགྲོན་དུས་ཡུན་རིང་ཤོས་ཤིག་ཡིན་པའི་ཆ་ནས་རྟག་ཏུ་རྒྱལ་ཁབ་འདི་ལ་གུས་བརྩི་ཞུ་བཞིན་ཡོད་པ་མ་ཟད། ལྷག་པར་དུ་འདས་པའི་ལོ་དུས་དེ་དག་རིང་རྒྱ་གར་གྱི་ས་གནས་ཕལ་མོ་ཆེར་ཕེབས་རྒྱུའི་གོ་སྐབས་བྱུང་ཡོད་པ་སོགས་བཀའ་འགྲེལ་དང་སྦྲགས། རྒྱ་གར་རྒྱལ་ཁབ་ཀྱིས་ལོ་ངོ་སྟོང་ཕྲག་རིང་སྙིང་རྗེ་དང་འཚེ་བ་མེད་པའི་རྣམ་གཞག་རྒྱུན་འཛིན་དང་། བདག་ཉིད་ཆེན་པོ་གན་དྷི་མཆོག་གིས་འཚེ་བ་མེད་པའི་རྣམ་གཞག་རྒྱ་ཁྱབ་མཛད་པ། དེ་བཞིན་ཆོས་ལུགས་སྣ་ཚོགས་མཉམ་གནས་ཐོག་ཆོས་ལུགས་མཐུན་འབྲེལ་ལྡན་པའི་རྒྱལ་ཁབ་ཞིག་ཡིན་པ་དེ་ནི་གང་ཟག་སྒེར་དང་རྒྱ་ཆེ་ས་ནས་འཛམ་གླིང་སྤྱི་ལ་ཞི་བདེ་བསྐྲུན་རྒྱུའི་ནུས་པ་ཡོད་པ་བཀའ་སྩལ་འདུག་པ་མ་ཟད་། ད་ཆ་རྒྱ་གར་གྱི་གནའ་བོའི་སེམས་ཁམས་རིག་པའི་ཤེས་ཡོན་ལ་དོ་སྣང་དང་གོ་རྟོགས་སྤེལ་ཏེ་གནའ་དེང་གྱི་ཤེས་ཡོན་གཉིས་ཆ་སྙོམ་བཟོ་དགོས་རྒྱུ་གལ་ཆེན་པོ་ཡིན་པ་དང་། དེ་ལྟར་བྱུང་ཚེ་འགྲོ་བ་མི་རྣམས་ཀྱི་སེམས་ཁམས་འཕྲོད་བསྟེན་ལ་ཕན་པ་དང་། རྒྱུན་དུ་ཉོན་མོངས་མ་རིག་པའི་བསམ་བློ་ལ་གདོང་ལེན་གྱིས་སེམས་ཞི་བདེ་དང་ལྡན་པ་ཞིག་ཡོང་རྒྱུར་དགེ་ཚན་ཡོད་པ་སོགས་བཀའ་སྩལ་དང་ཆབ་ཅིག མགོན་པོ་གང་ཉིད་མཆོག་ནས་སྙིང་རྗེའི་ནུས་པ་གཙོ་བོར་གྱུར་པའི་རིན་ཐང་བྲལ་བའི་རྒྱ་གར་གྱི་གནའ་བོའི་རིག་གནས་ཁག་རྒྱ་གར་ཙམ་མ་ཟད་འཛམ་གླིང་མི་མང་ལ་གོ་རྟོགས་མུ་མཐུད་སྤེལ་རྒྱུའི་དམ་བཅའ་བརྟན་པོ་ཡོད་ཅེས་བཀའ་སྩལ་འདུགགཞན་ཡང་མགོན་པོ་གང་ཉིད་མཆོག་གིས་ལྕམ་སྐུ་ Droupadi Murmu མཆོག་ལ་སྩལ་བའི་འཚམས་འཕྲིན་དེའི་ནང་རྒྱ་གར་གཞུང་དམངས་གཉིས་ནས་བོད་མི་ཡོངས་ལ་ནང་ཆོས་གཙོས་པའི་བོད་ཀྱི་ངོ་བོ་སྲུང་སྐྱོབ་གནང་རྒྱུ་སོགས་ཀྱི་ཐོག་རྒྱབ་སྐྱོར་དང་རོགས་རམ་རྒྱ་ཆེར་གནང་དང་གནང་བཞིན་པར་ཐུགས་རྗེ་ཆེ་ཞུ་དང་སྦྲགས། ལྕམ་སྐུ་མཆོག་གི་མ་འོངས་ལས་དོན་མཐའ་དག་ལམ་ལྷོང་ཡོང་བའི་སྨོན་འདུན་མཛད་འདུག རྩ་བའི་ལྕམ་སྐུ་ Droupadi Murmu མཆོག་ནི་ཕྱི་ལོ་ ༡༩༥༨ ལོར་རྒྱ་གར་གྱི་ Odisha མངའ་སྡེའི་ Mayurbhanj རྫོངས་ཁོངས་སུ་འཁྲུངས་ཤིང་། ད་རེས་ལྕམ་སྐུ་མཆོག་རྒྱ་གར་གྱི་སྲིད་འཛིན་ལ་བདམས་ཐོན་བྱུང་བ་དེ་ནི་རྒྱ་གར་ནང་བེུད་སྲིད་འཛིན་གནང་མཁན་གཉིས་པ་དང་། རྒྱ་གར་གྱི་ Santal ཞེས་པའི་གདོད་མའི་མི་རིགས་ཁྲོད་ཀྱི་བེུད་ཞིག་སྲིད་འཛིན་དུ་བསྐོ་བཞག་བྱུང་བ་ཐེངས་དང་པོ་དང་། རྒྱ་གར་རང་བཙན་ཐོབ་རྗེས་སྐུ་འཁྲུངས་པའི་སྲིད་འཛིན་ཐོག་མ། དེ་བཞིན་ད་བར་གྱི་རྒྱ་གར་སྲིད་འཛིན་དགུང་གྲངས་ཆུང་ཤོས་བཅས་ཆགས་ཀྱི་ཡོད་པ་རེད།ལྕམ་སྐུ་ Droupadi Murmu མཆོག་ཆབ་སྲིད་ཀྱི་ལས་དོན་ནང་མ་བཞུགས་གོང་ས་གནས་སུ་དགེ་རྒན་དང་སློབ་གསོ་བའི་ཕྱག་ལས་གནང་མྱོང་ཡོད་པ་དང་། ཕྱིས་སུ་རྒྱ་གར་གྱི་ BJP ཆབ་སྲིད་ཚོགས་པའི་ནང་བཞུགས་ཏེ་ Odisha མངའ་སྡེའི་གྲོས་ཚོགས་འཐུས་མི་དང་མངའ་སྡེའི་ཚོང་དང་འགྲིམ་འགྲུལ། དེ་བཞིན་ནུ་གསོ་སེམས་ཅན་ལྷན་ཁང་སོགས་ཀྱི་བློན་ཆེན། གཞན་ཡང་ཕྱི་ལོ་ ༢༠༡༥ ནས་ ༢༠༢༡ བར་ Jharkhand མངའ་སྡེའི་སྲིད་སྐྱོང་གི་ཐུགས་འགན་སོགས་བཞེས་ཡོད་པ་དང་། དེ་སྔ་མངའ་སྡེའི་གྲོས་ཚོགས་འཐུས་མི་གནང་པའི་སྐབས་འཐུས་མི་བཟང་ཤོས་ཀྱི་གཟེངས་རྟགས་སོགས་ཀྱང་ཐོབ་མྱོང་འདུག

རྒྱ་ནག་གཞུང་གིས་བོད་རིགས་པདྨ་འཕྲིན་ལས་ཡུལ་དེའི་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོར་བསྐོ་བཞག་བྱས་འདུག དེ་ཡང་ཟླ་བ་འདིའི་ཕྱི་ཚེ་ ༡༩ ཉིན་པེ་ཅིང་དུ་ཚོགས་པའི་རྒྱ་ནག་གི་འགྲོ་བ་མིའི་ཐོབ་ཐང་ཚོགས་པའི་རྒྱལ་ཡོངས་ལྷན་ཚོགས་ཐེངས་ ༥ པའི་ཆེས་ཐོག་མའི་ཚོགས་འདུའི་སྐབས་རྒྱ་ནག་རྒྱལ་ཡོངས་མི་མང་འཐུས་མི་ཚོགས་ཆེན་གྱི་རྒྱུན་ལས་ཚོགས་གཞོན་བོད་རིགས་པདྨ་འཕྲིན་ལས་སམ་པདྨ་ཆོས་གླིང་ཟེར་བ་ཁོང་རྒྱ་ནག་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོར་བསྐོ་བཞག་བྱས་འདུག་པ་མ་ཟད། ཚོགས་འདུའི་ཐོག་ཚོགས་མི་ ༢༠༠ ལྷག་མཉམ་ཞུགས་བྱས་ཡོད་པ་རྣམས་ནས་སྐབས་དེར་རྒྱལ་ཡོངས་ལྷན་ཚོགས་ཐེངས་ ༤ པའི་སྐབས་ཀྱི་སྙན་ཐོར་ཞིབ་འཇུག་དང་བསྐྱར་ཞིབ་ནན་ཏན་གྱིས་ཁྲིམས་གསར་གཏན་འབེབས་དང་ཆབས་ཅིག རྒྱལ་ཡོངས་ལྷན་ཚོགས་ཐེངས་ ༥ པའི་ཚོགས་མི་དང་། རྒྱུན་ལས། དེ་བཞིན་འགོ་གཙོ་རྣམས་འོས་འདེམས་བྱས་ཡོད། སྐབས་དེར་རྒྱ་ནག་ཆབ་སྲིད་གྲོས་ཚོགས་ཀྱི་ཚོགས་མི་དང་། དེའི་ཁྱབ་ཁོངས་སུ་ཡོད་པའི་རྒྱལ་ཡོངས་མི་རིགས་དང་ཆོས་ལུགས་ཚོགས་པའི་ཚོགས་གཞོན་ Jiang Jianguo ཟེར་བ་ཁོང་འགྲོ་བ་མིའི་ཐོབ་ཐང་ཚོགས་པའི་ཚོགས་གཞོན་དུ་བསྐོ་བཞག་བྱས་འདུགརྩ་བའི་པདྨ་འཕྲིན་ལས་ནི་བོད་ཆབ་མདོ་བདེ་ཆེན་རྫོངས་ཁོངས་ནས་ཡིན་པ་དང་། ཕྱི་ལོ་ ༡༩༦༩ ལོ་ནས་གཞིས་ཀ་རྩེ་དང་ལྷ་ས་ཁུལ་དུ་བོད་རང་སྐྱོང་ལྗོངས་ཀྱི་མི་མང་སྲིད་གཞུང་ནང་དུས་ཡུན་རིང་ཤོས་ཀྱི་བོད་རིགས་མཐོ་རིམ་ལས་བྱེད་ཞིག་ཆགས་ཀྱི་ཡོད་པ་དང་། དེའང་ཁོ་པས་བོད་རང་སྐྱོང་ལྗོངས་མི་མང་སྲིད་གཞུང་གི་དྲུང་ཆེ་དང་གཙོ་འཛིན། མི་མང་འཐུས་མི་ཚོགས་ཆེན་གྱི་ཚོགས་གཙོ། དམར་ཤོག་ཚོགས་པའི་དྲུང་ཆེ་གཞོན་པ་མ་ཟད། ༢༠༡༨ ནས་རྒྱ་ནག་རྒྱལ་ཡོངས་མི་མང་འཐུས་མི་ཚོགས་ཆེན་གྱི་རྒྱུན་ལས་ཚོགས་གཞོན་བྱེད་མུས་ཡིན་པ་དང་། ཉེ་སྔོན་ཕྱི་ལོ་ ༢༠༢༠ ལོར་ཨ་རིས་ཧོང་ཀོང་གི་གནད་དོན་དང་འབྲེལ་ནས་རྒྱ་ནག་གི་དཔོན་རིགས་ཁག་ ༡༤ ལ་སྲིད་དོན་ཉེས་ཆང་བཀལ་བའི་ཁོངས་སུ་ཡོད་པ་རེད།དེ་བཞིན་རང་ཉིད་ཀྱི་ལས་ཡུན་ཁྲོད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཁ་བྲལ་རིང་ལུགས་ཀྱི་སྐྱོན་བརྗོད་དང་མཚན་སྨད་ཤུགས་ཆེར་བྱེད་མཁན་ཞིག་དང་། ཕྱི་ལོ་ ༢༠༡༠ ལོ་ནས་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་གཞོན་པར་བསྐོ་བཞག་བྱས་པ་ནས་བཟུང་བོད་ཐོག་སྲིད་བྱུས་དྲག་པོ་འཛིན་ཏེ་བོད་མི་རང་ལུས་མེར་བསྲེགས་གཏོང་མཁན་བྱུང་མེད་པ་སོགས་ཀྱི་རྫུན་བཤད་དང་རང་ལུས་མེར་བསྲེགས་དང་འབྲེལ་བའི་གནས་ཚུལ་རྒྱལ་སྤྱིའི་ནང་སྤེལ་བ་དེ་དག་བདེན་པ་མིན་པའི་གནས་ཚུལ་ཡིན་པར་ལོག་བཤད་སོགས་ཀྱང་བྱས་མྱོང་ཡོད་པ་རེད།  

དེ་སྔོན་རེས་གཟའ་ཉི་མའི་ཉིན་རྒྱ་གར་བྱང་ཤར་ཁུལ་གྱི་མངའ་སྡེ་ཨ་རུ་ན་ཅལ་ནང་རྟེན་གཞི་བྱས་པའི་དབུས་ཧི་མ་ལ་ཡའི་ལེགས་བྱང་མཐོ་སློབ་ཁང་དུ་ཨ་རུ་ན་ཅལ་དང་ཨ་སམ་མངའ་སྡེ་གཉིས་གཙོས་པའི་རྒྱ་གར་བྱང་ཤར་ཁུལ་གྱི་དམག་སྡེ་ཁག་གི་སྡེ་ཚན་ཅི་རིགས་ནང་ཕྱག་ལས་གནང་མཁན་གྱི་དམག་དཔོན་དང་། དམག་མི། དེ་བཞིན་འབྲེལ་ཡོད་ལས་བྱེད་སོགས་ལ་ཉིན་གྲངས་ ༤༢ རིང་བོད་རིག་པའི་སློབ་གཉེར་ཟབ་སྦྱོང་ཐེངས་དང་པོ་དེ་གནང་ཟིན་ཡོད་པའི་གནས་ཚུལ་ཐོན་ཡོད།དེ་འབྲེལ་གནས་ཚུལ་རྒྱ་གར་གྱི་བརྒྱུད་ལམ་ཁག་ཅིག་གི་ནང་ཐེངས་འདིའི་རྒྱ་གར་གྱི་དམག་དཔོན་དང་དམག་མི་སོགས་ལ་བོད་རིག་པའི་སློབ་ཁྲིད་དེ་ནི་རྒྱ་ནག་གི་མཐའ་སྲུང་དམག་མི་ལ་འཐབ་རྒོལ་ནན་པོ་ཐུབ་ཐབས་ལ་དམིགས་པ་ཞིག་ཡིན་པ་དང་། ལྷག་པར་དུ་སློབ་གཉེར་ཁྲོད་དུ་བོད་ཀྱི་སྐད་ཡིག་དང་། ནང་ཆོས། དེ་བཞིན་བོད་ཀྱི་ལོ་རྒྱུས་ངོ་སྤྲོད་སོགས་འདི་ཕྱོགས་ནས་གནང་སྟངས་དེ་རྒྱ་ནག་གཞུང་གིས་བོད་ནང་ལ་བོད་དམག་འདུ་སྐོང་བྱས་པ་དང་། དེ་བཞིན་མཐའ་སྲུང་དམག་མི་ལ་རྒྱ་གར་གྱི་སྐད་ཡིག་སློབ་ཁྲིད་བྱས་པ་སོགས་ཀྱི་བརྒྱུད་རིམ་དང་གཅིག་མཚུངས་ཡིན་སྐོར་བརྗོད་ཡོད། བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་འབུམ་རམས་པ་ཚེ་དབང་རྡོ་རྗེ་ལགས་ཀྱིས་ད་རེས་རྒྱ་གར་གཞུང་ནས་དམག་དཔོན་དང་དམག་མི་ཚོར་བོད་རིག་པའི་སློབ་གཉེར་གནང་རྒྱུ་དངོས་སུ་འགོ་བཙུགས་པ་དེ་ལ་དོན་ཚན་གསུམ་གྱི་ཐོག་ནས་གལ་གནད་ཆགས་ཀྱི་ཡོད་པ་དང་། དེ་ཡང་དང་ཐོག་ལ་དེ་སྔ་ཕྱི་ལོ་ ༢༠༢༠ ལོར་རྒྱ་དཀར་ནག་གཉིས་ཀྱི་མཐའ་སྲུང་དམག་མིའི་དབར་གདོང་ཐུག་ཆེ་ཆེར་བྱུང་རྗེས་རྒྱ་གར་ནས་ས་མཚམས་ཀྱི་གནད་དོན་ཐོག་ལ་དོན་སྣང་གསར་པ་ཞིག་བསླེབས་ཏེ། ད་ཆ་དམག་མི་ཚོར་བོད་རིག་པའི་སློབ་གཉེར་གནང་འགོ་བཙུགས་པ་དེ་ནི་ Soft Power ཞེས་འཇམ་པོའི་ཐབས་བྱུས་ཀྱི་ཆ་ཤས་ཤིག་བེད་སྤྱོད་དང་། གཉིས་པ་མཐའ་མཚམས་ཀྱི་ཡུལ་མི་ཁག་དང་འབྲེལ་བ་བཟང་ཏུ་གཏོང་ཆེད་བོད་ཀྱི་སྐད་ཡིག་བཀོལ་སྤྱོད་ཀྱི་གནད་འགག་ཙམ་དུ་མ་ཟད། ལྷག་པར་དུ་དོན་ཚན་གསུམ་པ་དེ་ནི་རྒྱ་དཀར་ནག་གཉིས་ཀྱི་གནད་དོན་སེལ་རྒྱུར་བོད་ཀྱི་གནད་དོན་འདི་གལ་ཆེན་པོ་ཡིན་པར་རྒྱ་གར་ངོས་ནས་ངོས་འཛིན་གསལ་པོ་ཐུབ་ཀྱི་ཡོད་སྐོར་གསུངས་བྱུང་།ད་རེས་རྒྱ་གར་གྱི་དམག་མི་ཚོར་བོད་རིག་པའི་སློབ་གཉེར་གནང་པ་དེ་ཡིས་གྲུབ་འབྲས་ཇི་འདྲ་ཐོན་སྲིད་མིན་སོགས་ཀྱི་ཐད་བཀའ་དྲི་ཞུ་སྐབས། རྒྱ་གར་དམག་མིས་ཟླ་བ་ཁ་ཤས་རིང་བོད་རིག་པའི་ཐོག་སློབ་གཉེར་གནང་སྟེ་བསླབ་པ་མཐར་སོན་སོགས་བྱུང་ཁག་པོ་ཡིན་ཡང་། སྤྱི་ཡོངས་ནས་བོད་རིག་པའི་ཐོག་དོ་སྣང་དང་། མ་འོངས་པར་རྒྱ་གར་གྱི་མཐོ་སློབ་ཁག་ཏུ་བོད་རིག་པའི་ལྟེ་གནས་ཆེད་འཛུགས་ཀྱི་ས་བོན་ལྟ་བུ་ཞིག་ཏུ་འགྱུར་རྒྱུ་དང་། ལྷག་པར་དུ་ད་རེས་རྒྱ་གར་གཞུང་གིས་བོད་རིག་པའི་ཟབ་སྦྱོང་འདི་ཉིད་རྒྱ་གར་གྱི་དམག་མིའི་ནང་ངོ་སྤྲོད་བྱས་པ་དེ་མ་འོངས་པར་ནུས་པ་དང་ལྡན་པའི་འཐབ་བྱུས་ཤིག་ལ་ངོས་འཛིན་ཞུས་ཀྱི་ཡོད་ཅེས་གསུངས་བྱུང་།གཞན་ཡང་ཁོང་ནས་དེ་རིང་བརྒྱུད་ལམ་ཁག་ཏུ་འབྲུག་དང་རྒྱ་གར། བོད་བཅས་ཀྱི་ས་མཚམས་དང་འབྲེལ་ཡོད། Doklam ས་ཁུལ་དུ་རྒྱ་ནག་གཞུང་གིས་དེ་སྔ་གྲོང་ཚོ་འཛུགས་སྐྲུན་ཀྱི་ལས་གཞི་སྣ་ཚོགས་སྤེལ་ཡོད་པ་དང་། ཉེ་ཆར་ས་ཁུལ་དེར་དངོས་སུ་རྒྱ་ནག་གི་དམག་མི་དང་འབྲེལ་ཡོད་མི་སེར་གནས་སྤོས་ཟིན་པའི་ཚད་མཐོའི་པར་རིས་ཁག་སྤེལ་བཞིན་པ་དང་འབྲེལ། འཐབ་བྱུས་ཀྱི་ཆ་ནས་ Doklam ས་ཁུལ་ནི་རྒྱལ་ཁབ་ཕྱོགས་ཡོངས་ལ་གནད་འགག་ཆེན་པོ་ཞིག་ཡིན་པ་མ་ཟད། ཁུལ་དེར་རྒྱ་ནག་གི་གྲོང་འཚོ་དེ་དག་བརྒྱུད་རིམ་པས་འབྲུག་ཡུལ་དེ་ཡང་བལ་ཡུལ་ལྟ་བུ་ཆགས་མི་སྲིད་པ་མ་རེད་ཅེས་ཚོད་དཔག་གནང་མཁན་མང་པོ་ཡོད་པ་འགྲེལ་བརྗོད་གནང་ཡོད།གཞི་རྩའི་རྒྱ་གར་གྱི་དམག་མི་རྣམས་ནས་བོད་ཀྱི་སྐད་ཡིག་དང་རིག་གཞུང་། ལོ་རྒྱུས་སོགས་ཀྱི་ཐོག་སློབ་སྦྱོང་བྱེད་རྒྱུའི་ལས་གཞི་འདི་ནི་ཕྱི་ལོ་ ༢༠༢༠ ལོར་འཕགས་བོད་གཉིས་ཀྱི་ས་མཚམས་སུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་ཀྱི་གནད་དོན་རིམ་པས་བྱུང་སྐབས། སྐབས་དེའི་ཕྱི་ཟླ་ ༡༠ ནང་ཚོགས་པའི་རྒྱ་གར་གྱི་དམག་སྤྱིའི་ལྷན་ཚོགས་ཐོག་གྲོས་བསྡུར་ཐོག་མ་བྱུང་སྟེ་ཉེ་བའི་ཆར་དངོས་སུ་དམག་མིའི་ཚོགས་ཁག་ལ་སློབ་གཉེར་གནང་ཟིན་པ་དང་། སྐབས་དེར་རྟ་དབང་དགོན་པའི་མཁན་ཟུར་གུ་རུ་སྤྲུལ་སྐུ་མཆོག་དང་། བོད་དོན་ཆེད་མཁས་བ་དང་རྩོམ་པ་པོ་སྐུ་ཞབས་ Claude Arpi ལགས་སློབ་ཁྲིད་དང་གསུངས་བཤད་གནང་མཁན་ཁོངས་སུ་ཡོད་པ་རེད།  

རྒྱ་ནག་གཞུང་གིས་དེ་སྔ་ཕྱི་ལོ་ ༢༠༡༨ ལོར་ནག་སེལ་གཤེད་བཅོམ་གྱི་ཆེད་དོན་འཐབ་རྩོད་ལས་འགུལ་ཞེས་པའི་མིང་བྱང་འོག་རེབ་གོང་ཧོར་རྒྱ་སྡེ་བ་ནས་བོད་མི་ ༩ འཛིན་བཟུང་གིས་ལོ་ ༣ ནས་ ༧ བར་གྱི་བཙོན་འཇུག་ཁྲིམས་ཐག་བཅད་ཡོད་པའི་ཁོངས་ནས་བཀྲིས་ཚེ་རིང་ལགས་དང་འབྲུག་འབུམ་ཚེ་རིང་ལགས་གཉིས་ཉེ་འཆར་ཟླ་བ་འདིའི་ཚེས་ ༡ ཉིན་བཙོན་གྲོལ་བཏང་འདུགདེ་ཡང་ཁ་སང་ཕྱི་ཚེས་ ༢༠ ཉིན་བོད་ཀྱི་དུས་བབས་གསར་ཁང་གིས་གནས་ཚུལ་སྤེལ་བར་གཞིགས་ན། བཀྲིས་ཚེ་རིང་ལགས་དང་འབྲུག་འབུམ་ཚེ་རིང་ལགས་གཉིས་ཟླ་བ་འདིའི་ཕྱི་ཚེས་ ༡ ཉིན་བཙོན་གྲོལ་བཏང་ཡོད་ཀྱང་། སོ་ཉུལ་བ་ཆེད་གཏོང་གིས་འགྲོ་འདུག་སྤྱོད་གསུམ་ལ་རྟོགས་ཞིབ་ནན་པོ་བྱེད་མུས་ཡིན་པ་མ་ཟད། ཧོར་རྒྱ་སྡེ་བའི་གྲོང་མི་རྣམས་ལ་ཁོང་གཉིས་ཀྱི་སྐོར་གླེང་སློང་དང་ཕེབས་བསུའི་སྣེ་ལེན་སོགས་བྱེད་མི་ཆོག་པའི་བཙན་བཀའ་བཏང་ཡོད་པ་རེད་འདུག གནས་ཚུལ་ཡོང་ཁག་ལ་གཞིགས་ན། དེ་སྔ་ཕྱི་ལོ་ ༢༠༡༨ ལོར་འཛིན་བཟུང་བྱས་པའི་བོད་མི་ ༩ ཁོངས་སུ་ཡོད་པའི་བཀྲིས་ཚེ་རིང་ལགས་ཀྱི་གཅེན་པོ་བསོད་ནམས་རྒྱལ་ལགས་འདི་ལོའི་ཕྱི་ཟླ་ ༡ པོའི་ནང་དུ་བཙོན་གྲོལ་བཏང་ཡོད་ཀྱང་། དུས་དེ་ནས་བཟུང་ད་བར་ནད་མནར་གྱི་གནས་སུ་ལྷུང་སྟེ་ད་ལྟའང་དྲགས་སྐྱེད་རྩ་བ་ནས་བྱུང་མེད་པ་རེད་འདུག རྩ་བའི་རྒྱ་ནག་གཞུང་གིས་ཕྱི་ལོ་ ༢༠༡༨ ཕྱི་ཟླ་ ༧ པའི་ནང་ནག་སེལ་གཤེད་བཅོམ་གྱི་ཆེད་དོན་འཐབ་རྩོད་ལས་འགུལ་ཞེས་པའི་ཉེས་མིང་འོག་རེབ་གོང་ཧོར་རྒྱ་སྡེ་བའི་དགེ་འདུན་བཟོད་པ་དང། ཆོས་བཟང་། བན་དེ་རྡོ་རྗེ། བཀྲིས་ཚེ་རིང། བསོད་ནམས་རྒྱལ། དར་རྒྱས། ཤ་བོ་ཚེ་རིང་། མཁའ་བྱམས་རྒྱལ། དེ་བཞིན་འབྲུག་འབུམ་ཚེ་རིང་བཅས་བོད་མི་ ༩ ལ་འཛིན་བཟུང་གིས་ཟླ་བ་ ༨ ཙམ་བཀག་ཉར་བྱས་པའི་རྗེས་སུ་ཕྱི་ལོ་ ༢༠༡༩ ལོའི་ཕྱི་ཟླ་ ༤ པའི་ནང་རེབ་གོང་རྫོང་མི་དམངས་ཁྲིམས་ཁང་ནས་བོད་མི་དགུ་པོ་དེ་དག་ལ་བཙན་སྐུལ་གྱིས་ཚོང་བརྗེ་བྱེད་དུ་བཅུག་པ་དང། ཧམ་འཕྲོག་གཡོ་ལེན་བྱས་པ། དེ་བཞིན་མི་མང་དཔུང་བསྡེབས་ཀྱིས་སྤྱི་ཚོགས་སྒྲིག་ལམ་ལ་གཏོར་བརླག་གནང་ཡོད་ཚུལ་སོགས་ཀྱི་ཉེས་མིང་གཡོག་སྟེ་མི་ལོ་ ༣ ནས་ ༧ བར་གྱི་བཙོན་འཇུག་ཁྲིམས་ཐག་བཅད་ཡོད་པ་རེད།སྐབས་དེར་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་སྟི་གནས་ཁང་གིས། ཧོར་རྒྱ་སྡེ་བའི་ས་གནས་མང་ཚོགས་ནས་སྲིད་གཞུང་ལ་སྤྲད་པའི་ཡིག་ཆའི་འདྲ་པར་དང་བཅས་དེའི་སྐོར་གནས་ཚུལ་སྤེལ་བའི་ནང་དུ། དེ་སྔ་རེབ་གོང་ཧོར་རྒྱ་སྡེ་བའི་ས་གནས་སུ་སྲིད་གཞུང་ནས་མང་ཚོགས་ཀྱི་ས་ཆ་བཙན་འཕྲོག་རྗེས་སོ་ཕག་གི་བཟོ་གྲྭ་གསུམ་གསར་འཛུགས་དང་། ཕྱི་ལོ་ ༢༠༡༡ ལོར་ཁོར་ཡུག་སྲུང་སྐྱོབ་ཀྱི་མིང་ཐོག་ནས་བཟོ་གྲྭ་དེ་དག་སྒོ་བརྒྱབ་སྟེ། སྲིད་གཞུང་གིས་བཟོ་གྲྭའི་བདག་པོ་རྣམས་ལ་གུན་གསབ་འབོར་ཆེན་སྤྲད་ཡོད་ཀྱང་། འདས་པའི་མི་ལོ་ ༧ རིང་ལ་ས་བདག་ས་གནས་མང་ཚོགས་རྣམས་ལ་ས་ཆ་ཕྱིར་སློག་མ་བྱེད་པའི་ཁར་ས་རིན་ཡང་སྤྲད་མེད་པ་རེད་འདུག དེའི་ཁྲོད་ཕྱི་ལོ་ ༢༠༡༧ ཟླ་ ༢ ཚེས་ ༢༡ ཉིན་ཧོར་རྒྱ་སྡེ་བའི་མི་མང་ ༥༠༠ ཙམ་གྱིས་རྒྱབ་སྐྱོར་ཡོད་པའི་ཐོག་༼ཁ་འགོ་བ་༽ཞེས་པའི་ཚོགས་ཆུང་ཞིག་གསར་འཛུགས་ཀྱིས་ས་གནས་ཀྱི་ཤེས་འཇོན་གཉིས་ལྡན་གྱི་མི་སྣ་ ༢༤ བསྐོ་གཞག་དང་འབྲེལ། ཁ་འགོ་བའི་ཚོགས་མི་ ༢༤ ནས་ས་ཡིག་བཀོད་པའི་ཞུ་ཡིག་ཞིག་ས་གནས་སྲིད་གཞུང་ལ་ཕུལ་ཡོད་པ་དང་། ཞུ་ཡིག་དེའི་ནང་དེ་སྔོན་སྲིད་གཞུང་ནས་མང་ཚོགས་ཀྱི་ས་ཆ་བཙན་འཕྲོག་བྱས་ཏེ་སོ་ཕག་བཟོ་གྲྭ་བཙུགས་ཡོད་ཀྱང་བཟོ་གྲྭ་སྒོ་བརྒྱབ་པའི་རྗེས་ས་ཆ་དེ་དག་ཕྱིར་མང་ཚོགས་ལ་སྤྲད་དགོས་པའི་ཞུ་སྐུལ་གནང་དོན་ལྟར། སྐབས་དེར་ཧོར་རྒྱ་སྡེ་གཞུང་གིས་རྒྱབ་སྐྱོར་དང་ཁག་ཐེག་བྱས་ཡོད་ཀྱང་། སྲིད་གཞུང་གིས་ངོས་ནས་བོད་མིའི་སྐུ་ཚབ་ཚོགས་ཆུང་གི་ཞུ་ཡིག་ལ་དང་ལེན་བྱ་རྒྱུ་ལས་ལྡོག་སྟེ་ཞུ་གཏུག་གི་ལས་འགུལ་སྤེལ་བར་དྲག་གནོན་བྱས་པ་མ་ཟད། ཧོར་རྒྱ་སྡེ་བའི་འགོ་ཁྲིད་ཀྱི་སྟོབས་ཤུགས་མེད་པ་བཟོ་ཐབས་ཀྱི་ཉེས་འཛུགས་ཀྱང་བྱས་ཡོད་པ་རེད། བཙོན་གྲོལ་ཐོབ་མི་པར་གྱི་བདག་དབང་། བོད་ཀྱི་དུས་བབ་གསར་ཁང་།

རྒྱ་གར་ལྷོ་ཕྱོགས་ཧུན་སུར་རབ་རྒྱས་གླིང་གཞིས་ཆགས་དེ་བཞིན་ཐོག་མར་ཕྱི་ལོ་ ༡༩༧༡ ལོར་དབུ་བརྙེས་ནས་དེ་རིང་མི་ལོ་ ༥༠ འཁོར་བའི་དུས་དྲན་སྲུང་བརྩི་ཞུས་སོང་། དེ་རིང་ཧུན་སུར་རབ་རྒྱས་གླིང་གཞིས་ཆགས་ནང་སྔ་དྲོའི་ཕྱག་ཚོད་ ༨་༣༠ ཐོག་དགེ་འདུན་པ་དང་གཞིས་མི་རྣམས་དཔལ་ལྡན་སྨད་རྒྱུད་གྲྭ་ཚང་དུ་ལྷན་འཛོམས་ཀྱིས་ལྷ་སྲུང་འཕྲིན་བསྐུལ་དང་འབྲེལ་བསངས་གསོལ་དང་། ཚོགས་མགོན་དུ་རྒྱལ་བའི་སྐུ་པར་མཐོང་གྲོལ་རིན་པོ་ཆེ་གདན་ཞུས་ཀྱིས་མཎྜལ་རྟེན་གསུམ་འདེགས་འབུལ་དང་འབྲེལ་མཛད་སྒོ་ཟབ་རྒྱས་ཐོག་ནས་སྲུང་བརྩི་ཞུས་གནང་སོང་།ལྔ་བཅུའི་དུས་དྲན་གོ་སྒྲིག་ཚོགས་ཆུང་གི་ཚོགས་གཙོ་རྟ་མགྲིན་ཚེ་དབང་ལགས་ཀྱིས་མཛད་སྒོའི་ཐོག་གཞིས་ཆགས་ཀྱི་ལོ་རྒྱུས་སྙིང་བསྡུས་ངོ་སྤྲོད་གནང་བ་མ་ཟད། ལས་གཞི་གང་ཞིག་ཡིན་ཡང་དངུལ་གྱི་རྒྱབ་སྐྱོར་དགོས་རྒྱུ་དེ་གལ་ཆེན་པོ་ཡིན་པས་འདི་ལོ་རབ་རྒྱས་གླིང་ལོ་ངོ་ ༥༠ འཁོར་བའི་དུས་དྲན་སླད་གཞིས་མི་དང་། ལྷག་པར་ཕྱི་རྒྱལ་ཁག་ལ་བཞུགས་པའི་གཞིས་མི་རྣམས་ཀྱི་རྒྱབ་སྐྱོར་ཤུགས་ཆེ་འོག་དེ་རིང་ཀྱི་དུས་ཚིག་དེའི་ཐོག་ཡུལ་མི་དབུལ་ཕོངས་ཀྱི་སློབ་ཕྲུག་རྣམས་ལ་གྱོན་ཆས་དང་འཛིན་ཆས་བགོ་འགྲེམས་དང་ཤིང་སྡོང་འདེབས་འཛུགས་ཀྱི་ལས་གཞི་སྤེལ་གནང་ཡོད་པ་རེད།རྩ་བའི་དེ་རིང་གི་མཛད་སྒོའི་ཐོག་སྐུ་མགྲོན་གཙོ་བོར་ Mysore Resettlement and Development  འམ་ MYRADA ཞེས་ལྷོ་ཕྱོགས་མངའ་སྡེ་འདྲ་མིན་གྱི་རྫོང་ ༡༨ ཙམ་གྱི་ནང་དབུལ་ཕོངས་མང་ཚོགས་ཀྱི་འཚོ་བའི་གནས་སྟངས་ཡར་རྒྱས་སླད་ཕྱག་ལས་གནང་མཁན་གྱི་མེ་སོར་གཞུང་འབྲེལ་མིན་པའི་ཚོགས་པའི་ལས་བྱེད་ William D Souza  ལགས་མགྲོན་འབོད་གནང་ཡོད་པ་དང་། ཁོང་གིས་མཛད་སྒོའི་ཐོག་ས་གནས་མང་ཚོགས་ལ་མཚམས་འདྲི་ཞུས་པ་མ་ཟད། ཁོང་རང་ཉིད་གཞིས་ཆགས་དེ་ཐོག་མར་དབུ་བརྙེས་སྐབས་མཉམ་འབྲེལ་ནང་རྩིས་པའི་ཕྱག་ལས་གནང་མྱོང་ཡོད་པ་དང་། ད་རེས་དངོས་སུ་ཧོན་སུར་ནང་ཕེབས་ནས་ལོ་ངོ་ ༥༠ དུས་དྲན་སྲུང་བརྩི་ཞུ་རྒྱུ་བྱུང་བ་དེར་དགའ་སྤོབས་ཆེན་པོ་བྱུང་བར་འགྲེལ་བརྗོད་དང་འབྲེལ། གཞིས་ཆགས་དེ་ཐོག་མར་གསར་འཛུགས་སྐབས་བོད་མི་རྣམས་ཀྱི་གནས་སྟངས་ཧ་ཅང་སྐྱོ་བོ་ཡོད་པ་དང་། དེ་བཞིན་གནམ་གཤིས་དང་ནད་གཞི་འདྲ་མིན་རྐྱེན་པས་བོད་མི་མང་པོ་རྐྱེན་འདས་ སུ་ཕྱིན་པ་ཡང་མཐོང་མྱོང་ཡོད། དེ་རིང་གཞིས་མི་རྣམས་ལྷན་འཛོམས་ཀྱིས་དགའ་སྤྲོ་ཆེན་པོིའི་ཐོག་ནས་དུས་དྲན་སུང་བརྩི་ཞུས་ཐུབ་པ་འདི་དམིགས་བསལ་གྱི་སྤྲོ་སྣང་ཞིག་འདུག་ཅེས་གསུངས་ཡོད།ཡང་ས་གནས་འགོ་འཛིན་ཐུབ་བསྟན་ཚེ་རིང་ལགས་ཀྱིས་དེ་རིང་ཚང་མ་མཉམ་འཛོམས་ཐོག་གཞིས་ཆགས་དེ་དབུ་བརྙེས་ནས་མི་ལོ་ ༥༠ འཁོར་བའི་དུས་དྲན་སྲུང་བརྕི་ཞུས་ཐུབ་པ་དེ་གཙོ་བོར་སྤྱི་ནོར་༸གོང་ས་༸སྐྱབས་མགོན་ཆེན་པ་མཆོག་གིས་བཀའ་དྲིན་དང་མི་རབས་རྒན་པ་ཚོས་སྐུ་ལས་བསྐྱོན་པའི་ལག་རྗེས་ཡིན་པར་དྲན་དགོས། དེ་བཞིན་གཞིས་ཆགས་དེ་ཉིད་ཡར་རྒྱས་ཆེད་ནང་ཁུལ་འཆམ་མཐུན་དགོས་གལ་ཡིན་པའི་ལམ་སྟོན་གནང་ཡོད།མ་ཟད་ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་སྐབས་དེར་ལྷོ་ཕྱོགས་གཞིས་ཆགས་ཁག་གི་དཀའ་ངལ་དང་བོད་མིའི་སྒྲིག་འཛུགས་ངོས་ནས་དཀའ་ངལ་དེ་དག་སེལ་ཐབས་དང་འབྲེལ་བའི་སྐོར་མི་མང་རྣམས་ལ་བཀའ་སློབ་རོབ་ཙམ་གནང་ཡོད། སྤྱིར་དེ་རིང་གི་མཛད་སྒོའི་ཐོག་མེ་སོར་ Mysore གྱི་གནད་ཡོད་མི་སྣ་ཁག་ཅིག་དང་། ལྷོ་སྤྱི། དགོན་སྡེ་ཁག་གི་མཁན་རིན་པོ་ཆེ་དང་ཕྱག་མཛོད་རྣམས་པ། ཕྱོགས་བཞུགས་སྤྱི་འཐུས་རྣམ་པ། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་གཙོས་སེར་སྐྱ་མི་མང་དང་སློབ་ཕྲུག་མང་པོ་ཆེད་ཕེབས་གནང་འདུག་པ་དང་། དེ་རིང་གི་དུས་ཚིག་དེའི་ཐོག་རབ་རྒྱས་གླིང་གི་མི་རབས་རྒན་པ་རང་ལོ་ ༧༥ ཡན་ལ་བཀའ་དྲིན་རྗེས་དྲན་གྱི་ཕྱག་འཁྱེར་དང་། ས་གནས་སུ་སྤྱི་ཚོགས་ཞབས་ཞུ་མི་ལོ་ ༢༠ ལྷག་གནང་མཁན་རྣམས་ལ་ལེགས་གསོལ་ཕྱག་འཁྱེར་བཅས་ཕུལ་གནང་ཡོད་པ་རེད།མཛད་རིམ་ལྟར་ན། གཞིས་ཆགས་དབུ་བརྙེད་ནས་མི་ལོ་ ༥༠ འཁོར་བའི་དུས་དྲན་དེ་ཉིད་དེ་རིང་དང་སང་ཉིན་བཅས་ཉིན་གཉིས་རིང་སྲུང་བརྩི་དང་འབྲེལ། སང་ཉིན་མི་ཐོག་རྒན་པ་རྣམས་ལ་ལྷ་མོའི་འཁྲབ་གཞུང་གཟིགས་འབུལ་དང་གཞོན་སྐྱེས་དང་བྱིས་པ་རྣམས་ལ་རྩེད་རིགས་འདྲ་མིན་ཁག་གཅིག་གོ་སྒྲིག་ཞུས་འདུག

བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཉིན་ལྔའི་རིང་མ་ཧཱ་གུ་རུའི་འབུམ་ཚོགས་དབུ་འཛུགས་བསྐྱངས་གནང་མཛད་སོང་།དེ་ཡང་དེ་རིང་ཟླ་ ༧ ཚེས་ ༡༩ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༸རྒྱལ་བའི་སྐུ་ཕྱྭ་དང་བསྟན་སྲིད་ཞབས་རིམ་དུ་དམིགས་ཏེ་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་དང་སྐུ་བཅར་རྣམ་རྒྱལ་གྲྭ་ཚང་གི་མཐུན་འགྱུར་འོག་ཕྱི་ལོ་ ༢༠༢༢ ཟླ་ ༧ ཚེས་ ༡༩ ནས་ ༢༣ བར་ཉིན་ལྔའི་རིང་བྱང་གཏེར་རིག་འཛིན་གདུང་སྒྲུབ་ཆོ་གའི་སྒོ་ནས་མ་ཧཱ་གུ་རུའི་འབུམ་ཚོགས་འདི་བཞིན་དབུ་འཛུགས་དང་། སྐབས་དེར་སྐུ་བཅར་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་གི་སློབ་དཔོན་དང་དགེ་འདུན་འདུས་པ་རྒྱ་མཚོ། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་དབུས་པའི་མཛད་གཙོ་རྣམ་པའི་དབུ་བཞུགས་ཐོག་སེར་སྐྱ་མི་མང་མང་པོ་ནས་གལ་ཆེན་དོན་ཆེར་དགོངས་ཏེ་འབུམ་ཚོགས་ལ་ཆེད་ཕེབས་ཀྱིས་ཚོགས་ཞུགས་གནང་འདུག རྩ་བའི་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱི་གོ་སྒྲིག་འོག་བཞུགས་སྒར་དུ་ལོ་ལྟར་༸གོང་ས་མཆོག་གི་དབུས་པའི་རིས་སུ་མ་ཆད་པའི་སྐྱེས་ཆེན་དམ་པ་རྣམས་ཀྱི་སྐུ་ཚེ་བསྐལ་བརྒྱར་བརྟན་པ་ཡོང་སླད་དང་། བོད་ཀྱི་བདེན་མཐའ་མྱུར་དུ་སེལ་བ། དེ་བཞིན་འཛམ་གླིང་ཞི་བདེ་བཅས་དམིགས་ཏེ་མ་ཧཱ་གུ་རུའི་འབུམ་ཚོགས་ཚོགས་སྲོལ་ཡོད་པ་དང་། ཐེངས་འདིའི་འགྲོ་གྲོན་སྔོན་བརྩི་འབུམ་བཅུ་གཉིས་ཞུས་ཡོད་པ་རེད་འདུག    

རྒྱ་གར་བྱང་ཕྱོགས་ལ་དྭགས་དང་བོད་གཉིས་ཀྱི་ས་མཚམས་ Moldo ཁུལ་དུ་རྒྱ་དཀར་ནག་གི་དམག་མིའི་འགོ་ཁྲིད་དབར་རྒྱལ་ཁབ་ཕྱོགས་གཉིས་དབར་འཕྲད་བཞིན་པའི་མཐའ་མཚམས་ཀྱི་གནད་དོན་ཁག་སེལ་ཐབས་དང་འབྲེལ་བའི་གྲོས་མོལ་ཐེངས་ ༡༦ པ་གནང་སྟེ་མུ་མཐུད་ས་མཚམས་དང་བདེ་འཇགས་ཀྱི་གནད་དོན་ཐོག་གྲོས་མོལ་གནང་རྒྱུའི་ཐོག་ལ་མོས་མཐུན་བྱུང་བ་ཙམ་མ་གཏོགས་མཐའ་མཚམས་དང་འབྲེལ་བའི་དཀའ་རྙོག་ཁག་གཙང་སེལ་ཐུབ་རྒྱུའི་ཐབས་ལམ་ཞིག་གི་ཐོག་ལ་བབས་ཐུབ་མེད།དེ་ཡང་ཁ་ཉིན་རེ་གཟའ་ཉི་མའི་ཉིན་རྒྱ་དཀར་ནག་གི་དམག་མིའི་འགོ་ཁྲིད་དབར་ལ་གྲོས་མོལ་ཚོུད་ ༡༢ ཙམ་གནང་པའི་རྗེས་སུ་ཐུན་མོང་གིས་བསྒྲགས་གཏམ་ཞིག་འདོན་སྤེལ་གནང་འདུག་པ་དང་། དེའི་ནང་འགོ་ཁྲིད་ཕན་ཚུན་དབར་ས་མཚམས་ཀྱི་གནད་དོན་ཐོག་རྒྱལ་ཁབ་སོ་སོའི་བཞེངས་ཕྱོགས་དང་དགོས་འདུན་སོགས་ཀྱི་ཐོག་གྲོས་བསྡུར་ལྷུག་པོ་བྱུང་ཡོད་པ་འགྲེལ་བརྗོད་དང་སྦྲགས། གནད་དོན་འདིའི་ཐད་མུ་མཐུད་ཕྱོགས་སོ་སོའི་དམག་དཔོན་དང་། འབྲེལ་ཡོད་གཞུང་འབྲེལ་སྐུ་ཚབ་དབར་ལ་གྲོས་མོལ་གནང་རྒྱུ་ཡིན་ཞེས་འཁོད་འདུག མ་ཟད་སྐབས་དེར་གྲོས་བསྡུར་བྱུང་བའི་གནད་དོན་ཁག་རྒྱལ་ཁབ་སོ་སོའི་འབྲེལ་ཡོད་སྡེ་ཚན་གོང་མ་ཁག་ལ་སྙན་སེང་ཞུས་ཏེ་ལ་དྭགས་ཀྱི་ཤར་ཕྱོགས་ས་ཁུལ་གཙོས་པའི་ས་མཚམས་དང་འབྲེལ་བའི་དཀའ་རྙོག་ཅན་གྱི་གནད་དོན་ཁག་རྒྱལ་ཁབ་ཕྱོགས་གཉིས་ཀར་ཕན་ཐོགས་ཡོད་པའི་གྲོས་ཆོད་ཞིག་གཏན་འབེབས་བརྒྱུད་གང་མགྱོགས་སེལ་ཐབས་གནང་རྒྱུ་ཡིན་ཞེས་གསུངས་འདུག གཞི་རྩའི་ལོ་གཉིས་ཙམ་གྱི་གོང་ལ་དྭགས་སྤང་གོང་མཚོའི་ཁུལ་དུ་རྒྱ་དཀར་ནག་གཉིས་ཀྱི་དམག་མིའི་དབར་མཐའ་མཚམས་ཀྱི་གནད་དོན་དང་འབྲེལ་གདོང་ཐུག་རིམ་པ་བྱུང་པའི་རྗེས་སུ་རྒྱལ་ཁབ་ཕྱོགས་གཉིས་ཀྱི་དམག་དཔོན་དང་། འབྲེལ་ཡོད་གཞུང་འབྲེལ་སྐུ་ཚབ་དབར་ལ་གྲོས་མོལ་ཐེངས་ ༡༥ གནང་པའི་ཁྲོད་དུ་སྤང་གོང་དང་ Gogra ཁུལ་གྱི་གནད་དོན་སེལ་ཐུབ་ཙམ་བྱུང་ཡོད་ཀྱང་། Depsang དང་བདེན་མཆོག་གཙོས་པའི་ཨ་རུ་ན་ཅལ་མངལ་ཁུལ་གྱི་ས་མཚམས་དང་འབྲེལ་བའི་རྩོད་རྙོག་ཁག་ད་ལྟའང་ཞི་འགྲིག་ཐུབ་མེད་པ་དང་། ད་རེས་གྲོས་མོལ་ཐེངས་ ༡༦ པའི་སྐབས་མ་འོངས་པར་མུ་མཐུད་གྲོས་མོལ་གནང་རྒྱུ་སོགས་ཀྱི་ཐག་གཅོད་ཙམ་ལས་མཐའ་མཚམས་དང་འབྲེལ་བའི་དཀའ་རྙོག་ཁག་གཙང་སེལ་ཐུབ་རྒྱུའི་ཐབས་ལམ་ཞིག་གི་ཐོག་ལ་བབས་ཐུབ་མེད་པ་རེད། ལྷག་པར་དུ་ཐེངས་འདིའི་རྒྱ་དཀར་ནག་གཉིས་ཀྱི་གྲོས་མོལ་དང་འབྲེལ་རྒྱ་གར་གྱི་བརྒྱུད་ལམ་ཁག་ཏུ་དཔྱད་ཞིབ་པ་ཁག་ཅིག་ནས་རྒྱ་གར་ཕྱོགས་ནས་རྒྱལ་ཁབ་གཉིས་ཀྱི་འབྲེལ་ལམ་བཟང་པོ་ཡོང་བར་རྒྱ་ནག་ཕྱོགས་ནས་ Depsang དང་བདེན་མཆོག་ཁུལ་དུ་ཡོད་པའི་རྒྱ་ནག་དམག་མི་རྣམས་ཕྱིར་འཐེན་གྱིས་དེ་སྔ་ཕྱི་ལོ་ ༢༠༢༠ ལོར་བྱུང་བའི་གདོང་ཐུག་ཀྱི་དོན་རྐྱེན་གོང་གི་ས་མཚམས་གནས་བབ་ལ་བརྩི་བཀུར་ཞུ་དགོས་པའི་དགོན་འདུན་བཏོན་ཡོད་ཀྱང་། རྒྱ་ནག་ཕྱོགས་ནས་རྒྱལ་ཁབ་ཕྱོགས་གཉིས་ཀྱི་དུས་རྒྱུན་གྱི་འབྲེལ་བ་ཡོད་པ་ཁག་ས་མཚམས་ཀྱི་གནད་དོན་དང་འབྲེལ་བ་མེད་སྐོར་བཤད་ཡོད་པ་གསུངས་བཞིན་འདུག རྩ་བའི་འདས་པའི་ལོ་ཤས་ཁྲོད་དུ་འཕགས་བོད་གཉིས་ཀྱི་ས་མཚམས་ཁུལ་དུ་རྒྱ་དཀར་ནག་ཀྱི་དམག་མིའི་དབར་གདོང་ཐུག་གི་གནད་དོན་རིམ་པས་བྱུང་པའི་རྗེས་སུ་རྒྱལ་ཁབ་ཕྱོགས་གཉིས་ཀྱི་འབྲེལ་ལམ་ལ་དོ་ཕོག་ཧ་ཅང་ཐེབས་ཡོད་པ་མ་ཟད། ལྷག་པར་དུ་ཕྱོགས་གཉིས་ཀས་ས་མཚམས་ཁུལ་དུ་དམག་མི་སྔར་ལས་ལྷག་པ་འགྲེམ་འཇོག་དང་། གཞུང་ལམ་དང་འཛུགས་བསྐྲུན་གྱི་ལས་གཞི་སོགས་རྒྱ་སྐྱེད་གཏོང་བཞིན་ཡོད་པ་རེད།

ཉེ་ལམ་ཟླ་བ་ ༧ པའི་ཕྱི་ཚེས་ ༦ སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དང་བསྟུན།  ཤྲི་ལངྐའི་ནང་ཉིན་དེར་༸གོང་ས་མཆོག་གི་ཐུགས་བསྐྱེད་དམ་བཅའ་བཞི་དང་ Universal ethics ཞེས་གོ་ལ་སྤྱི་ཡོངས་ལ་ཁྱབ་པའི་བཟང་སྤྱོད་སོགས་ཀྱི་བརྗོད་གཞིའི་ཐད་གོ་བསྡུར་གྱིས་༸སྐུའི་འཁྲུངས་སྐར་སྲུང་བརྩི་ཞུས་ཡོད་པ་ལྟར།  ༸དཔལ་ལྡན་དགའ་ལྡན་ཕོ་བྲང་ཡིག་ཚང་ནས་ཐུགས་རྗེ་ཆེ་ཞུའི་ཕྱག་བྲིས་ཞིག་སྩལ་འདུག དེ་ཡང་ཁ་སྔོན་ཕྱི་ཚེས་ ༡༦ ཉིན་ Sri lankan Tibetan Buddhist Brotherhood Society ཞེས་ཤྲི་ལངྐན་བོད་ཀྱི་ནང་ཆོས་མཐུན་ཚོགས་ཀྱི་ཚོགས་གཙོ་ Dr. Damenda Porage ལགས་ཀྱི་མཚན་ཐོག་ཏུ་སྩལ་བའི་ཕྱག་བྲིས་ནང་།  ཤྲི་ལངྐན་བོད་ཀྱི་ནང་ཆོས་མཐུན་ཚོགས་ནས་ཉེ་ཆར་༸གོང་ས་མཆོག་གི་༸སྐུའི་འཁྲུངས་སྐར་ཉིན་ལ་༸གང་ཉིད་མཆོག་གི་ཐུགས་བསྐྱེད་དམ་བཅའ་དང་མགོན་པོ་མཆོག་གི་འགྲོ་བ་མི་སྤྱིའི་བདེ་རྩའི་སླད་མཛད་འཕྲིན་བསྐྱངས་དང་སྐྱོང་མུས་གང་དེར་ཆེ་བསྟོད་ཀྱིས་བགྲོ་གླེང་གོ་སྒྲིག་གནང་བར་ཐུགས་རྗེ་ཆེ་ཞེས་བཀའ་སྩལ་མཛད་འདུགཕྱོགས་མཚུངས་ཤྲི་ལངྐའི་བླ་ཆེན་རྣམས་ནས་༸གང་ཉིད་མཆོག་ལ་༸སྐུའི་འཁྲུངས་སྐར་འཚམས་འདྲི་ཞུས་པར་མགོན་པོ་མཆོག་ཐུགས་ཧ་ཅང་མཉེས་པོ་བྱུང་བ་དང་དེ་འབྲེལ་འཚམས་འདྲི་ཞུ་མཁན་ཆོས་གྲོགས་ཡོངས་དང་གཏམ་བཤད་པ་རྣམས་ལ་ཐུགས་རྗེ་ཆེ་ཞེས་བཀའ་སྩལ་དང་སྦྲགས།  ལྷག་པར་ད་ཆ་ཤྲི་ལང་ཀའི་ལུང་པའི་ནང་དཀའ་ངལ་འཕྲད་བཞིན་པའི་གནད་དོན་རྣམས་མགོན་པོ་མཆོག་ནས་མཁྱེན་གྱི་ཡོད་པ་དང་།   ༸གང་ཉིད་མཆོག་ནས་ད་ཆ་ལུང་པའི་ནང་དཀའ་ངལ་འཕྲད་པ་ཁག་མྱུར་དུ་ཞི་བའི་སྨོན་འདུན་ཡོད་ཅེས་བཀའ་སྩལ་དང་།  ཆབས་ཅིག་མང་ཚོགས་ནས་གནས་སྟངས་ཁག་པོ་ཡོད་མིན་ལ་མ་ལྟོས་པར་ད་ལྟའི་གནས་སྟངས་དེ་བཞིན་བཟང་ས་ལ་བསྒྱུར་བ་གཏོང་བའི་ནུས་པར་གདེང་ཚོད་མ་བརླག་པའི་རེ་བ་ཡོད་པ་བཀའ་སྩལ་ཡོད་པ་འཁོད་འདུགགཞི་རྩའི་མི་འབོར་ས་ཡ་ ༢༢ ལྷག་ཡོད་པའི་ཤྲི་ལང་ཀའི་ནང་ཉེ་བའི་ཟླ་ཤས་ནས་སྔར་བྱུང་མྱོང་མེད་པའི་དཔལ་འབྱོར་གྱི་དཀའ་ངལ་ཤུགས་ཆེ་འཕྲད་པའི་རྐྱེན་གྱིས་མང་ཚོགས་དང་རྒྱལ་ཁབ་ཀྱི་དཔུང་དམག་དབར་གདོང་ཐུག་ཤུགས་ཆེ་བྱུང་མུས་ཡིན་པ་མ་ཟད། ལུང་པའི་ཆེས་ཛ་དྲག་གི་གནས་སྟངས་འོག ཡུལ་དེའི་སྲིད་བློན་ Mahinda Rajapaksa ལས་གནས་ནས་རྩ་དགོངས་ཞུས་དགོས་བྱུང་བ་དང་། དེ་བཞིན་ཁོང་གི་བུ་སྤུན་སྲིད་འཛིན་ Gotabaya Rajapaksa ཀྱང་ཡུལ་དེ་ནས་བྲོས་བྱོལ་དུ་འགྲོ་དགོས་བྱུང་བའི་གནས་སྟངས་ཆགས་ཡོད།བརྒྱུད་ལམ་ཁག་ཏུ་ཐོན་པའི་གནས་ཚུལ་ལ་གཞིགས་ན། ཤྲི་ལངྐའི་གྲོས་ཚོགས་ནས་ཡུལ་དེའི་སྲིད་འཛིན་གསར་པ་འོས་བསྡུ་བྱ་རྒྱུའི་གྲ་སྒྲིག་ཁྲོད། བར་རྒལ་སྲིད་འཛིན་ Ranil Wickremesinghe མཆོག་གིས་ཁ་སང་ཕྱི་དྲོ་ཛ་དྲག་གི་བཀོད་ཁྱབ་ཞིག་བཏང་བའི་བརྒྱུད་རྒྱལ་ཁབ་དེའི་ནང་དྲག་པོའི་ཁྲིམས་གཞི་གདམ་རྒྱུའི་གསལ་བསྒྲགས་བྱས་ཡོད་པ་རེད་འདུག  

བཞུགས་སྒར་དུ་རྟེན་གཞི་བྱས་པའི་གཞུང་འབྲེལ་མིན་པའི་ཚོགས་པ་ཆེ་ཁག་བཞི་ནས་གཏམ་བརྗོད་ཀྱི་ལམ་ནས་བོད་ནང་རང་དབང་དང་དྲང་བདེན་མེད་པའི་གནས་སྟངས་གསལ་བཏོན་བརྒྱུད་རྒྱལ་སྤྱིའི་དྲང་བདེན་ཉིན་མོར་སྲུང་བརྩི་ཞུས་སོང་། དེ་ཡང་ཕྱི་ཟླ་ ༧ ཚེས་ ༡༧ ཉིན་བཞུགས་སྒར་ཁུལ་དུ་རྟེན་གཞི་བྱས་པའི་བོད་ཀྱི་བུད་མེད་ལྷན་ཚོགས་དང་། བོད་རྒྱལ་ཡོངས་མང་གཙོ་ཚོགས་པ། བོད་ཀྱི་དགུ་བཅུ་གསུམ་ལས་འགུལ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཆེ་ཁག་བཞི་ནས་གཏམ་བརྗོད་ཀྱི་ལས་འགུལ་དེའི་བརྒྱུད་ནས་བོད་ནང་རང་དབང་མེད་པ་དང་། རྒྱ་ནག་གིས་མི་ལོ་བདུན་བཅུ་ལྷག་གི་རིང་དྲག་གནོན་དང་མནར་གཅོད། སྡུག་སྦྱོང་སོགས་ཀྱི་ཁྲོད་བོད་མི་ས་ཡ་གཅིག་ལྷག་རྐྱེན་འདས་སུ་སོང་ཡོད་པ་དེས་རྒྱལ་སྤྱིའི་དྲང་བདེན་དང་ཁྲིམས་ལ་རྒྱ་ནག་འདི་བཞིན་ཉེན་ཁ་ཞིག་ཏུ་གྱུར་ཡོད་པ་མཚོན་གྱི་ཡོད་སྐོར་དང་། མ་ཟད་ད་དུང་བོད་ནང་སྡུག་སྦྱོང་མནར་གཅོད་སོགས་གཏོང་མུས་ཡིན་པ་རྣམས་འཕྲལ་དུ་མཚམས་འཇོག་དགོས་པའི་ངོ་རྒོལ་གྱི་རྣམ་པ་ཤུགས་ཆེར་བཏོན་འདུགཚོགས་པ་དེ་དག་གིས་སྤེལ་བའི་བསྒྲགས་གཏམ་ནང་རྒྱ་ནག་གིས་བོད་ས་ཡོངས་རྫོགས་ཇི་ལྟར་དབང་གྱུར་བྱས་ཡོད་པ་དང་། ལྷག་པར་དུ་གཞི་བྱེས་གཉིས་སུ་གྱར་དགོས་པ་ཡིད་སྐྱོའི་གནས་ཚུལ་རིམ་པའི་ཁྲོད་གཞིས་བཞུགས་ཀྱི་བོད་མི་རྣམས་རང་སར་ཡོད་ཀྱང་རང་དབང་བྲལ་བའི་གནས་སྟངས་ཞིག་གི་འོག་ཚུད་ཡོད་སྐོར་དང་། དེ་བཞིན་༸ཀུན་གཟིགས་པན་ཆེན་རིན་པོ་ཆེ་གཙོས་ཆབ་སྲིད་བཙོན་པ་རྣམས་ལ་མི་སྤྱོད་དང་དྲང་བདེན་ལས་འདས་པའི་མནར་གཅོད་ཚད་ལས་བརྒལ་བ་བཏང་རྐྱེན་ད་བར་བོད་མི་ ༡༦༠ ཙམ་གྱི་རང་ལུས་མེར་བསྲེགས་བཏང་ཡོད་པའི་གནས་ཚུལ་རྣམས་བྱུང་ཡོད་པ་མ་ཟད། བོད་ཀྱི་སྐད་ཡིག་དང་རིག་གཞུང་རྩ་མེད་བཟོ་རྒྱུའི་ལས་གཞི་སྤེལ་བཞིན་ཡོད་པ་དང་། ལྷག་པར་དུ་༸གོང་ས་༸སྐྱབས་མགོན་ཆེན་པོའི་སྐུ་པར་ཙམ་ཡང་ཉར་འཇོག་བྱེད་མི་ཆོག་པ་དང་། དེ་འབྲེལ་ཤེས་རྟོགས་བྱུང་ཚེ་འཛིན་བཟུང་བཙོན་འཇུག་སོགས་ཀྱི་གནས་སྟངས་ཧ་ཅང་ཉམས་ང་རྣམས་འབྱུང་བཞིན་ཡོད་པ་དང་ཆབས་ཅིག ཨ་ཉག་སེང་སྒྲ་ལགས་གཙོས་པའི་བོད་ནང་གི་ཁོར་ཡུག་ལས་འགུལ་བ་རྣམས་འཛིན་བཟུང་གི་དྲང་བདེན་མིན་པའི་ཐོག་སྡུག་སྦྱོང་མནར་གཅོད་སོགས་གཏོང་བཞིན་ཡོད་པ་རྣམས་འཕྲལ་དུ་མཚམས་འཇོག་དགོས་པའི་འབོད་སྐུལ་ནན་བརྗོད་གནང་འདུགསྐབས་དེར་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ནས་ཀྱང་ལས་འགུལ་དེའི་བརྒྱུད་བོད་ནང་ཆབ་སྲིད་དང་། སྐད་ཡིག དེ་བཞིན་རིག་གཞུང་སོགས་ཀྱི་ཐོག་ནས་འདྲ་མཉམ་དང་དྲང་བདེན་མེད་པ་མཚོན་པར་བྱེད་རྒྱུ། དེ་བཞིན་རྒྱལ་སྤྱིའི་སྡིངས་ཆ་སྟེང་དུ་ཁྱབ་བསྒྲགས་བྱ་རྒྱུ་སླད་ལས་འགུལ་དེ་ལྟར་སྤེལ་ཡིན་པར་འགྲེལ་བརྗོད་གནང་བྱུང་།གཞི་རྩའི་རྒྱལ་སྤྱིའི་དྲང་བདེན་གྱི་ཉིན་མོ་དེ་ནི་ཕྱི་ལོ་ ༡༩༩༨ ཟླ་ ༧ ཚེས་ ༡༧ ཉིན་གཏན་འབེབས་བྱས་པ་ཞིག་ཡིན་པ་དང་དེའི་དམིགས་ཡུལ་གཙོ་བོ་ནི། རྒྱལ་སྤྱིའི་ནང་དྲང་བདེན་གྱི་གོ་རྟོགས་སྤེལ་རྒྱུ་དང་། དེ་བཞིན་དྲང་བདེན་མིན་པའི་གནས་སྟངས་ཀྱི་འོག་ནས་འགྲོ་བ་མིའི་ཐོབ་ཐང་རྡོག་རོལ་དང་། མི་རིགས་སྡེབ་གསོད་སོགས་རྒྱ་དམར་གཞུང་ལྟ་བུའི་ཁྲིམས་བརྒལ་གྱི་བྱ་སྤྱོད་དག་ལ་གདོང་ལེན་གྱིས་གཞི་རྩའི་ཐོབ་ཐང་རྣམས་སྲུང་སྐྱོབ་བྱས་པའི་ཐོག་འཛམ་གླིང་ཞི་བདེ་དང་བདེ་འཇགས་བསྐྲུན་རྒྱུ་དེ་ཡིན་པ་རེད།