རྒྱ་ནག་གཞུང་གིས་བོད་རིགས་པདྨ་འཕྲིན་ལས་ཡུལ་དེའི་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོར་བསྐོ་བཞག་བྱས་འདུག
དེ་ཡང་ཟླ་བ་འདིའི་ཕྱི་ཚེ་ ༡༩ ཉིན་པེ་ཅིང་དུ་ཚོགས་པའི་རྒྱ་ནག་གི་འགྲོ་བ་མིའི་ཐོབ་ཐང་ཚོགས་པའི་རྒྱལ་ཡོངས་ལྷན་ཚོགས་ཐེངས་ ༥ པའི་ཆེས་ཐོག་མའི་ཚོགས་འདུའི་སྐབས་རྒྱ་ནག་རྒྱལ་ཡོངས་མི་མང་འཐུས་མི་ཚོགས་ཆེན་གྱི་རྒྱུན་ལས་ཚོགས་གཞོན་བོད་རིགས་པདྨ་འཕྲིན་ལས་སམ་པདྨ་ཆོས་གླིང་ཟེར་བ་ཁོང་རྒྱ་ནག་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོར་བསྐོ་བཞག་བྱས་འདུག་པ་མ་ཟད། ཚོགས་འདུའི་ཐོག་ཚོགས་མི་ ༢༠༠ ལྷག་མཉམ་ཞུགས་བྱས་ཡོད་པ་རྣམས་ནས་སྐབས་དེར་རྒྱལ་ཡོངས་ལྷན་ཚོགས་ཐེངས་ ༤ པའི་སྐབས་ཀྱི་སྙན་ཐོར་ཞིབ་འཇུག་དང་བསྐྱར་ཞིབ་ནན་ཏན་གྱིས་ཁྲིམས་གསར་གཏན་འབེབས་དང་ཆབས་ཅིག རྒྱལ་ཡོངས་ལྷན་ཚོགས་ཐེངས་ ༥ པའི་ཚོགས་མི་དང་། རྒྱུན་ལས། དེ་བཞིན་འགོ་གཙོ་རྣམས་འོས་འདེམས་བྱས་ཡོད།
སྐབས་དེར་རྒྱ་ནག་ཆབ་སྲིད་གྲོས་ཚོགས་ཀྱི་ཚོགས་མི་དང་། དེའི་ཁྱབ་ཁོངས་སུ་ཡོད་པའི་རྒྱལ་ཡོངས་མི་རིགས་དང་ཆོས་ལུགས་ཚོགས་པའི་ཚོགས་གཞོན་ Jiang Jianguo ཟེར་བ་ཁོང་འགྲོ་བ་མིའི་ཐོབ་ཐང་ཚོགས་པའི་ཚོགས་གཞོན་དུ་བསྐོ་བཞག་བྱས་འདུག
རྩ་བའི་པདྨ་འཕྲིན་ལས་ནི་བོད་ཆབ་མདོ་བདེ་ཆེན་རྫོངས་ཁོངས་ནས་ཡིན་པ་དང་། ཕྱི་ལོ་ ༡༩༦༩ ལོ་ནས་གཞིས་ཀ་རྩེ་དང་ལྷ་ས་ཁུལ་དུ་བོད་རང་སྐྱོང་ལྗོངས་ཀྱི་མི་མང་སྲིད་གཞུང་ནང་དུས་ཡུན་རིང་ཤོས་ཀྱི་བོད་རིགས་མཐོ་རིམ་ལས་བྱེད་ཞིག་ཆགས་ཀྱི་ཡོད་པ་དང་། དེའང་ཁོ་པས་བོད་རང་སྐྱོང་ལྗོངས་མི་མང་སྲིད་གཞུང་གི་དྲུང་ཆེ་དང་གཙོ་འཛིན། མི་མང་འཐུས་མི་ཚོགས་ཆེན་གྱི་ཚོགས་གཙོ། དམར་ཤོག་ཚོགས་པའི་དྲུང་ཆེ་གཞོན་པ་མ་ཟད། ༢༠༡༨ ནས་རྒྱ་ནག་རྒྱལ་ཡོངས་མི་མང་འཐུས་མི་ཚོགས་ཆེན་གྱི་རྒྱུན་ལས་ཚོགས་གཞོན་བྱེད་མུས་ཡིན་པ་དང་། ཉེ་སྔོན་ཕྱི་ལོ་ ༢༠༢༠ ལོར་ཨ་རིས་ཧོང་ཀོང་གི་གནད་དོན་དང་འབྲེལ་ནས་རྒྱ་ནག་གི་དཔོན་རིགས་ཁག་ ༡༤ ལ་སྲིད་དོན་ཉེས་ཆང་བཀལ་བའི་ཁོངས་སུ་ཡོད་པ་རེད།
དེ་བཞིན་རང་ཉིད་ཀྱི་ལས་ཡུན་ཁྲོད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཁ་བྲལ་རིང་ལུགས་ཀྱི་སྐྱོན་བརྗོད་དང་མཚན་སྨད་ཤུགས་ཆེར་བྱེད་མཁན་ཞིག་དང་། ཕྱི་ལོ་ ༢༠༡༠ ལོ་ནས་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་གཞོན་པར་བསྐོ་བཞག་བྱས་པ་ནས་བཟུང་བོད་ཐོག་སྲིད་བྱུས་དྲག་པོ་འཛིན་ཏེ་བོད་མི་རང་ལུས་མེར་བསྲེགས་གཏོང་མཁན་བྱུང་མེད་པ་སོགས་ཀྱི་རྫུན་བཤད་དང་རང་ལུས་མེར་བསྲེགས་དང་འབྲེལ་བའི་གནས་ཚུལ་རྒྱལ་སྤྱིའི་ནང་སྤེལ་བ་དེ་དག་བདེན་པ་མིན་པའི་གནས་ཚུལ་ཡིན་པར་ལོག་བཤད་སོགས་ཀྱང་བྱས་མྱོང་ཡོད་པ་རེད།
