ཡུ་གུར།

རྒྱ་ནག་གཞུང་གིས་ཤིན་ཅང་མི་རིགས་ཀྱི་འགྲོ་བ་མིའི་ཐོབ་ཐང་རྡོག་རོལ་ཤུགས་ཆེར་གཏོང་བཞིན་པའི་གནད་དོན་དང་འབྲེལ་ནས་ད་ཆ་དབྱིན་ཡུལ་གཞུང་ལ། རྒྱ་ནག་གི་དཔོན་རིགས་ཁག་ཡུལ་དེའི་ནང་ཡོང་རྒྱུར་བཀག་སྡོམ་བྱེད་དགོས་པའི་གནོན་ཤུགས་སྤྲོད་བཞིན་པའི་ཁྲོད། ཁ་སང་ཨ་རིའི་ཕྱི་སྲིད་དྲུང་ཆེ། སྐུ་ཞབས་ Mike Pompeo མཆོག་གིས་དབྱིན་ཡུལ་གྱི་སྲིད་བློན། སྐུ་ཞབས་ Boris Johnson མཆོག་དང་དངོས་སུ་མཇལ་འཕྲད་ཀྱིས།  ཨ་རི་དང་དབྱིན་ཡུལ་གཉིས་ཀྱིས་མཉམ་འབྲེལ་གྱི་ཐོག་ནས་རྒྱ་ནག་ལ་ཁ་གཏད་གཅོད་རྒྱུའི་རེ་སྐུལ་ཞུས་འདུག དེའང་དེ་རིང་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ད་ལྟའི་ཆར་པེ་ཅིན་སྲིད་གཞུང་དང་ནུབ་ཕྱོགས་ཀྱི་རྒྱལ་ཁབ་དག་གི་བར་དུ་ས་ཁོངས་ཆབ་སྲིད་ཀྱི་སེམས་འཚབ་ཇེ་ཆེར་འཕེལ་བཞིན་པའི་ཁྲོད། སྐུ་ཞབས་ Pompeo མཆོག་གིས་དབྱིན་ཡུལ་གྱི་སྲིད་བློན་དང་། ཕྱི་སྲིད་དྲུང་ཆེ། དེ་བཞིན་ཕྱོགས་འགལ་ཚོགས་པའི་དབུ་ཁྲིད་ཀྱི་དབུས་པའི་གནད་ཡོད་དཔོན་རིགས་ཁག་ཅིག་དང་ལྷན་དུ་མཇལ་མོལ་གནང་བ་མ་ཟད། ཡུལ་དེའི་གྲོས་ཚོགས་འཐུས་མི་ཁག་གཅིག་དང་ལྷན་དུའང་མཇལ་འཕྲད་གནང་འདུག ཁ་སང་གི་མཇལ་མོལ་དེའི་ཐོག  སྐུ་ཞབས་ Pompeo མཆོག་གིས་ད་སྐབས་ནུབ་གླིང་གི་རྒྱལ་ཁབ་རྣམས་ཀྱིས་མཉམ་འབྲེལ་གྱི་ཐོག་ནས་རྒྱ་ནག་ལ་ཁ་གཏད་གཅོག་གི་ཡོད་པར་འགྲེལ་བརྗོད་ཀྱིས། དབྱིན་ཡུལ་ཡང་མཉམ་འབྲེལ་དེར་འཛུལ་ཞུགས་བྱེད་རྒྱུའི་རེ་སྐུལ་ཞུས་ཡོད་པ་དང་། མཇལ་མོལ་ཐོག་བཅར་བའི་དབྱིན་ཡུལ་གྱི་གྲོས་ཚོགས་མི་སྣ་ཞིག་གིས་ཀྱང་། ཕྱོགས་གཉིས་ཀྱི་མཇལ་མོལ་དེ་དག་ནི་གཙོ་བོ་རྒྱ་ནག་ལ་ཐད་ཀར་ངོ་རྒོལ་བྱེད་རྒྱུ་མིན་པར། རྒྱ་ནག་གི་ཀུན་སྤྱོད་ཀྱིས་ནུབ་གླིང་བ་དག་གིས་རྒྱ་ནག་དང་མཉམ་དུ་ཚོངའབྲེལ་བྱེད་དཀའ་བའི་བརྡ་ལན་སྤྲོད་རྒྱུའི་ཆེད་ཡིན་པ་འགྲེལ་བརྗོད་གནང་འདུག དེ་བཞིན་སྐུ་ཞབས་ Mike Pompeo ལགས་ཀྱིས་རྒྱ་ནག་གིས་ཡུ་གུར་མི་མང་ས་ཡ་གཅིག་ཙམ་བཀག་སྐྱིལ་བྱས་ཡོད་པའི་གནད་དོན་དང་འབྲེལ་ནས། དབྱིན་ཡུལ་གཞུང་གིས་ Magnitsky Act  ཞེས་པའི་ཁྲིམས་འཆར་བརྒྱུད་ནས་ཤིན་ཅང་གི་དྲག་གནོན་དང་འབྲེལ་བ་ཡོད་པའི་རྒྱ་ནག་གི་དཔོན་རིགས་རྣམས་དབྱིན་ཡུལ་དུ་ཡོང་རྒྱུར་བཀག་སྡོམ་བྱེད་རྒྱུ་སོགས་ཀྱི་གནད་དོན་ཡང་གླེང་སློང་གནང་འདུག དེ་བཞིན་སྐུ་ཞབས་ Pompeo མཆོག་གིས་རྗེས་སུ་གསར་འགོད་ལྷན་ཚོགས་ཤིག་གི་ཐོག་འགྲེལ་བརྗོད་གནང་དོན་ལྟར་ན། ཁོང་གིས་དབྱིན་ཡུལ་གྱི་ཕྱི་སྲིད་བློན་ཆེན་སྐུ་ཞབས་ Mr Raab ལགས་དང་ལྷན་དུ། རྒྱ་ནག་གིས་ཧོང་ཀོང་བདེ་འཇགས་ཀྱི་ཁྲིམས་གཞི་གཏན་འབེབས་དང་འབྲེལ་ཧོང་ཀོང་ནང་གི་ད་ལྟའི་གནས་སྟངས་དང་། རྒྱ་ནག་གིས་ད་ཆ་ཡུལ་དེའི་ཁྱིམ་མཚེས་རྒྱལ་ཁབ་རྣམས་ལ་བཙན་འཛུལ་བྱེད་བཞིན་པའི་གནད་དོན་གྱི་ཐད་ལ་གྲོས་བསྡུར་གནང་ཡོད་པ་མ་ཟད། དབྱིན་ཡུལ་གཞུང་གིས་རྒྱ་ནག་གི་Huawei བཟོ་ལས་ཁང་གི་དྲ་འབྲེལ་གྱི་ G5 ལས་གཞི་ཕྱིར་འཐེན་བྱས་ཡོད་པ་དེ་ནི་ཁྲིམས་སྒྲིག་དང་མཐུན་པའི་ཐག་གཅོད་ཅིག་རེད་ཅེས་བསྔགས་བརྗོད་གནང་འདུག མ་ཟད་རྒྱ་ནག་གིས་དབྱིན་རྒྱ་གཉིས་ཀྱི་ཆངས་ཡིག་རྩིས་མེད་བཏང་ཡོད་པར་བརྟེན། དབྱིན་ཡུལ་གཞུང་གིས་བྲོས་བྱོལ་དུ་ཡོང་བཞིན་པའི་ཀོང་ཧོང་བ་རྣམས་ལ་སྣེ་ལེན་བྱེད་བཞིན་པ་དེར་ཆེ་བསྟོད་དང་། ལྷག་པར་གནད་དོན་དེ་དང་འབྲེལ་དབྱིན་ཡུལ་གཞུང་གིས་ཧོང་ཀོང་དང་ཉེས་ཅན་རྩིས་སྤྲོད་ཀྱི་ཆིང་ཡིག་རྩིས་མེད་བཏང་བ་བཅས་ལ་ཨ་རིའི་ངོས་ནས་རྒྱབ་སྐྱོར་ཡོད་པ་འགྲེལ་བརྗོད་གནང་འདུག གོང་གི་གནད་དོན་དེ་དག་དང་འབྲེལ་ནས། འདི་གའི་གསར་འགོད་པས་དེ་རིང་དབྱིན་ཡུལ་བོད་ཀྱི་སྐུ་ཚབ་དོན་གཅོད། བསོད་ནམས་ཚེ་རིང་ཕར་སི་ལགས་སུ་ཞལ་པར་བརྒྱུད་ནས་བཀའ་འདྲི་ཞུས་པར་ཁོང་གིས་ད་ལྟའི་ཆར་རྒྱ་ནག་གི་ནད་ཡམས་དང་ཁྱིམ་མཚེས་རྒྱལ་ཁབ་སོགས་དང་འབྲེལ་བའི་ས་མཚམས་ཀྱི་རྙོག་གླེང་སོགས་ཀྱི་གནད་དོན་དང་འབྲེལ་ནས། རྒྱལ་སྤྱིཨ་རིའི་ཕྱི་སྲིད་དྲུང་ཆེ་སྐུ་ཞབས་ Pompeo མཆོག་ད་རེས་དབྱིན་ཡུལ་དུ་ཕེབས་པ་དང་བསྟུན། ཁ་སང་ཁུལ་དེའི་ནང་རྟེན་གཞི་བྱས་པའི་ཨ་རིའི་གཞུང་ཚབ་ཆེན་མོའི་གཟིམ་ཁང་དུ། ཧོང་ཀོང་དབྱིན་ཡུལ་འོག་ཡོད་པའི་སྐབས་ཀྱི་སྲིད་སྐྱོང་མཐའ་མ་སྐུ་ཞབས་ Chris Pattern ལགས་དང་། གཞན་ཡང་ཉེས་ཆར་རང་ཁུལ་དེར་བྲོས་བྱོལ་དུ་ཕེབས་པའི་ཧོང་ཀོང་གི་དམངས་གཙོའི་ལས་འགུལ་བ་གྲགས་ཅན་སྐུ་ཞབས་ Nathan Law ལགས་དང་ལྷན་དུའང་ཟུར་དུ་མཇལ་འཕྲད་གནང་འདུག སྐུ་ཞབས་ Pompeo ལགས་དང་འབྲེལ་བ་དམ་ཟབ་ཡོད་པའི་དཔོན་རིགས་མིང་མི་གསལ་བ་ཞིག་གིས་ས་གནས་བརྒྱུད་ལམ་ལ་འགྲེལ་བརྗོད་གནང་དོན་ལྟར་ན། ཨ་རིའི་གཞུང་ངོས་ནས་ད་ལྟའི་ཆར་རྒྱ་ནག་གིས་ཉེ་ལམ་གཏན་འབེབས་ལག་བསྟར་བྱས་པའི་ཧོང་ཀོང་གི་བདེ་འཇགས་དང་འབྲེལ་བའི་ཁྲིམས་གཞི་དེའི་ཐོག་ལན་འདེབས་ཇི་ལྟར་བྱེད་མིན་ལ་བསམ་ཞིབ་གནང་བཞིན་ཡོད་པ་དང་། ཁ་སང་སྐུ་ཞབས་ Nathan ལགས་ཀྱིས་སྐུ་ཞབས་ Pompeo ལགས་སུ་ཧོང་ཀོང་ནང་གི་ད་ལྟའི་གནས་བབ་དང་། ཁུལ་དེའི་ནང་གི་དམངས་གཙོའི་ལས་འགུལ་བཅས་ཀྱི་སྐོར་ལ་སྙན་གསེང་ཞིབ་ཕྲ་ཞུས་འདུགགཞི་རྩའི་ཨ་རིའི་གཞུང་ངོས་ནས་ཉེ་བའི་ཆར་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གྱི་གནད་དོན་འོག་ཤིན་ཅང་གི་དམར་ཤོག་ཚོགས་པའི་དྲུང་ཆེ་གཙོས་པའི་དཔོན་རིགས་ཁག་ཅིག་ཨ་རིའི་ནང་བསྐྱོད་རྒྱུ་བཀག་སྡོམས་བྱས་པ་མ་ཟད། གཞན་ཡང་ཉེ་ལམ་ཡུ་གུར་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མཁན་རྒྱ་ནག་སྲིད་གཞུང་དང་འབྲེལ་བ་ཡོད་པའི་རྒྱ་ནག་གི་འཕྲུལ་རིགས་དང་གྱོན་ཆས་སོགས་དང་འབྲེལ་བའི་བཟོ་ཚོང་ཁང་༡༡ དངོས་སུ་མིང་འདོན་གནང་སྟེ་ཨ་རི་གཞུང་གིས་ཆོག་མཆན་མེད་པར་མཉམ་འབྲེལ་གྱི་ཚོང་ལས་གནང་མི་ཆོག་པའི་ཉེས་ཆད་བཅད་པ་ལྟར། རྒྱ་ནག་གིས་དེ་རིང་ཨ་རིའི་བྱེད་བབ་དེ་ནི་རྒྱལ་སྤྱིའི་འབྲེལ་ལམ་སྟངས་འཛིན་གྱི་ལམ་ལུགས་དང་བརྒལ་ཞིང་། རྒྱ་ནག་གི་ནང་སྲིད་ལ་ཐེ་གཏོགས་བྱས་པ་ཞིག་ཡིན་པའི་ལན་འདེབས་བྱས་ཡོད་པ་རེད།།

ཤིན་ཅང་མང་ཚོགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་བའི་གནད་དོན་དང་འབྲེལ་ཨ་རི་གཞུང་གིས་ཤིན་ཅང་ནང་གི་རྒྱ་ནག་གཞུང་འབྲེལ་ལས་ཁུངས་གཅིག་དང་ད་ལྟའི་ཤིན་ཅང་གི་དམར་ཤོག་ཚོགས་པའི་དཔོན་རིགས་ ༤ ལ་ Global Magnitsky Act ཞེས་པའི་ཁྲིམས་གཞིའི་འོག་ནས་ཉེས་ཆད་བཀལ་བར་ངན་ལན་དང་སྦྲགས་ཏེ་རྒྱ་ནག་གཞུང་གིས་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་དང་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback ལགས་དང་གྲོས་ཚོགས་འཐུས་མི་གསུམ་བཅས་ཨ་རིའི་གཞུང་གི་ལས་ཁུངས་གཅིག་དང་དཔོན་རིགས་ ༤ ལ་ཉེས་ཆད་འགེལ་རྒྱུ་ཡིན་པ་ཡོངས་གྲགས་བྱས་འདུགདེ་རིང་རྒྱལ་སྤྱིའི་བརྒྱུད་ལམ་ཁག་གིས་ཁ་སང་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Hua Chunying ཡིས་གསར་འགོད་ལྷན་ཚོགས་བརྒྱུད་ནས་རྒྱ་ནག་གཞུང་གི་ངོས་ནས་རྣམ་ཀུན་རྒྱ་ནག་གི་འགྲོ་བ་མིའི་ཐོབ་ཐང་གི་གནད་དོན་ཐོག་ཚོར་ཤུགས་ཆེན་པོའི་ཐོག་ནས་གསུང་མཁན་ཨ་རིའི་གཞུང་གི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback ལགས་དང་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་ Chris Smith ལགས། དེ་བཞིན་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་སྐུ་ཞབས་ Marco Rubio ལགས། ཨ་རིའི་གྲོས་ཚོགས་ནང་སྐུ་ཞབས་ Rubio ལགས་ཀྱི་ལྷན་དུ་ཤིན་ཅང་ནང་གི་གནད་དོན་ཐད་རྒྱ་ནག་དཔོན་རིགས་ལ་ཉེས་ཆད་འགེལ་དགོས་པའི་གྲོས་འཆར་འདོན་མཁན་གྲོས་ཚོགས་གོང་མའི་འཐུས་མི་སྐུ་ཞབས་ Ted Cruz ལགས་བཅས་ལ་རྒྱ་ནག་གཞུང་གིས་ཉེས་ཆད་འགེལ་རྒྱུ་ཡིན་པ་དང་ད་ལྟའི་ཆར་ཉེས་ཆད་གང་འགེལ་རྒྱུ་ཡིན་པ་སོགས་ཁ་གསལ་གང་ཡང་བརྗོད་མི་འདུགསྐབས་དེར་རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Hua Chunying ཡིས་ཤིན་ཅང་གི་གནད་དོན་ནི་རྒྱ་ནག་རྒྱལ་ནང་གི་གནད་དོན་ཡིན་པས་ཨ་རི་གཞུང་ལ་དེའི་ཐོག་ཐད་བྱུས་གནང་དབང་མེད་སྐོར་དང་འབྲེལ། ཨ་རི་གཞུང་གི་ངོས་ནས་ཉེ་ལམ་རྒྱ་ནག་གཞུང་འབྲེལ་གྱི་ལས་ཁུངས་གཅིག་དང་དཔོན་རིགས་བཞིར་ཉེས་ཆད་འགེལ་རྒྱུ་ཡིན་པ་ཡོངས་གྲགས་གནང་བ་དེ་ནོར་འཁྲུལ་ཡིན་སྟབས་ནོར་འཁྲུལ་ལ་ཡོ་བསྲང་གནང་དགོས་ཞེས་སྐུལ་མ་གནང་འདུགརྩ་བའི་གཟའ་འཁོར་སྔོན་མའི་ནང་ཨ་རིའི་ཕྱི་སྲིད་ལས་ཁུངས་དང་ཨ་རིའི་ Department of the Treasury ཞེས་ནོར་སྲིད་སྤྱི་ཁྱབ་ལྷན་ཁང་གཉིས་ཀྱིས་དེ་སྔ་ ༢༠༡༦ ཨ་རིའི་གྲོས་ཚོགས་སུ་གཏན་འབེབས་གནང་བའི་ Global Magnitsky Human Rights Accountability Act ཞེས་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་ཐོག་འགན་འཁུར་ཐུབ་ཐབས་དང་འབྲེལ་བའི་ཁྲིམས་འཆར་དེ་དངོས་སུ་ཕྱག་བསྟར་བརྒྱུད་དེ་ཡུ་གུར་གྱི་ཁ་ཆེའི་མི་རིགས་ཀྱི་འགྲོ་བ་མིའི་ཐོབ་ཐང་ལ་ཁག་རྡོག་རོལ་གཏང་མཁན་རྒྱ་ནག་གི་དཔོན་རིགས་བཞི་དང་རྒྱ་ནག་གཞུང་འབྲེལ་གྱི་ལས་ཁུངས་གཅིག་བཅས་དངོས་སུ་མིང་མངོན་གསལ་གྱིས་དཔལ་འབྱོར་གྱི་ཉེས་ཆད་འགེལ་རྒྱུ་དང་ཨ་རིར་འགྲོ་ཆོག་པའི་མཐོང་མཆན་ལ་དམ་དྲག་གནང་རྒྱུ་ཡིན་སྐོར་གསུངས་པ་མ་ཟད། དེ་སྔ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱི་རྒྱ་ནག་དམར་ཤོག་ཚོགས་པའི་དྲུང་ཆེ་བྱེད་མྱོང་ཡོད་པ་ད་ལྟ་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ Chen Quanguo དང་ཤིན་ཅང་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་གཞོན་པ་ Zhu Hailun དེ་བཞིན་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་ཀྱི་དམར་ཤོག་དྲུང་ཆེ་དང་འགན་འཛིན་གཅིག་ལྕོགས་ Wang Mingshan ལས་ཁུངས་དེའི་དམར་ཤོག་དྲུང་ཆེ་ཟུར་པ་ Huo Liujun བཅས་ཀྱི་མིང་མངོན་གསལ་གནང་ཡོད།ཨ་རིའི་ཐག་གཅོད་དེའི་འོག་ཤིན་ཅང་རང་སྐྱོང་ལྗོངས་ཁོངས་སུ་ཆེད་འཛུགས་བྱས་པའི་རྒྱ་ནག་དམར་ཤོག་ཚོགས་པའི་སྤྱི་བདེ་ལས་ཁུངས་དང་དཔོན་རིགས་བཞི་པོ་རྣམས་ཀྱི་ས་ཁང་དང་། དཔལ་འབྱོར་སོགས་ཨ་རི་ནང་ཡོད་པ་རྣམས་བེད་སྤྱོད་བྱེད་མི་ཆོག་པ་དང་། ཁོང་རྣམ་པ་དང་དངོས་ཤུགས་བརྒྱུད་གསུམ་ནས་དཔལ་འབྱོར་དང་ཚོང་སོགས་ཀྱི་འབྲེལ་བ་ཡོད་པའི་ཨ་རིའི་གཞུང་འབྲེལ་ལས་ཁུངས་དང་གང་ཟག་སྒེར་རྣམས་ནས་ཀྱང་དེ་དག་དང་འབྲེལ་བ་གནང་མི་ཆོག་པ་བཟོས་འདུག།དེ་རྣམས་ཀྱིས་གཙོས་པའི་ནང་མི་ཉེ་འབྲེལ་རྣམས་ཨ་རིར་ཡོང་རྒྱུའི་མཐོང་མཆན་ལ་དམ་དྲག་གནང་གཏན་ཁེལ་འདུག དཔྱད་ཞིབ་པ་རྣམས་ཀྱིས་ད་ལྟ་ཨ་རི་དང་རྒྱ་ནག་གཉིས་དབར་འབྲེལ་ལམ་ཆེས་ཞན་པོ་ཆགས་ཡོད་པ་དང་། རྒྱལ་ཁབ་ཕྱོགས་གཉིས་ཀྱི་ངོས་ནས་བཞེངས་ཕྱོགས་མཁྲེགས་པོ་འཛིན་ཡོད་པ་ལྟར་དེ་ལྟར་གནང་བ་མ་གཏོགས། ཕན་ཚུན་ཉེས་ཆད་འགེལ་སའི་ལས་ཁུངས་དང་སྒེར་གྱི་དཔོན་རིགས་རྣམས་དང་ལྷན་དུ་དུས་རྒྱུན་ཚོང་སོགས་ཀྱི་འབྲེལ་བ་དེ་ཙམ་མེད་སྟབས། ཚོང་འབྲེལ་ལ་དམིགས་བསལ་དཔོ་ཕོག་གི་མེད་པ་དེ་ལྟར་ཡང་། གལ་ཏེ་ཨ་རི་གཞུང་གིས་ཧོང་ཀོང་ནང་གི་ཁྲིམས་གཞིའི་འོག་ནས་ལག་བསྟར་གནང་ཚེ་ཕྱོགས་གཉིས་ཀྱི་ཚོང་འབྲེལ་ལའང་དོ་ཕོག་ངེས་ཅན་འགྲོ་སྲིད་པར་གསུངས་འདུག

ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོ་ཐེངས་ ༢༡ པ་དེ་ཁ་སང་འདོན་སྤེལ་གནང་བ་དང་སྦྲགས་ཏེ་རྒྱ་ནག་བྱེ་བྲག་ཏུ་དོ་སྣང་བྱ་ཡུལ་གྱི་རྒྱལ་ཁབ་ཁོངས་སུ་མིང་འདོན་བྱས་འདུག ད་ལན་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཕྱི་ལོ་ ༢༠༢༠ ལོའི་སྙན་ཐོ་ནང་ཆོས་དད་རང་དབང་རྡོག་རོལ་ཐད་བྱེ་བྲག་ཏུ་དོ་སྣང་བྱ་ཡུལ་གྱི་རྒྱལ་ཁབ་ཁག་གཅིག་དང་དེ་བཞིན་དམིགས་བསལ་དོ་སྣང་བྱེད་དགོས་པའི་རྒྱལ་ཁབ་བཅས་སྡེ་ཚན་གཉིས་ལ་འབྱེ་ཡོད་པ་རེད། སྙན་ཐོ་བརྒྱུད་ནས་ཨ་རི་ཕྱི་སྲིད་ལས་ཁུངས་ནས་བྷར་མ་དང་རྒྱ་ནག དེ་བཞིན་ཨི་རན། བྱང་ཀོ་རི་ཡ། ཨུ་རུ་སུ། པ་ཀིས་ཏན། སཱའུ་ཌན་ཨ་ར་བྷི་ཡ་སོགས་ཆོས་དད་རང་དབང་རྡོག་རོལ་ཐད་བྱེ་བྲག་ཏུ་དོ་སྣང་བྱེད་དགོས་པའི་རྒྱལ་ཁབ་དང་། དེ་བཞིན་སུ་ཌན་དང་ཊར་ཀི། ཨི་རག ཁུ་བྷ། ཨུཛ་བྷེ་ཀིས་ཏན་སོགས་དམིགས་བསལ་དོ་སྣང་གནང་དགོས་པའི་རྒྱལ་ཁབ་ཀྱི་སྡེ་ཚན་ཁོངས་སུ་མིང་འདོན་དགོས་པ་བརྗོད་འདུག རྒྱལ་ཁབ་དེ་དག་ཁྲོད་རྒྱ་ནག་ལྟ་བུར་མཚོན་ན་འདས་ལོར་རྒྱ་གཞུང་གིས་དེས་དབང་སྒྱུར་འོག་ཡོད་པའི་མི་རིགས་རྣམས་ལ་གསང་མྱུལ་ལྟ་ཞིབ་དང་ངོ་གདོང་ངོས་འཛིན་གྱི་འཕྲུལ་ཆས་བེད་སྤྱོད་ཀྱིས་མང་ཚོགས་ཀྱི་འགྲོ་འདུག་སྤྱོད་གསུམ་ལ་ལྟ་ཞིབ་ནན་པོ་བྱེད་ཀྱི་ཡོད་པ་མ་ཟད་ལྷག་པར་ཟླ་བ་ ༤ ཚེས་ ༡ ཉིན་ཁྲིམས་སྒྲིག་གསར་པ་ལག་བསྟར་འོག་ཆོས་ལུགས་ཀྱི་ལྟེ་གནས་ཁག་ཏུ་ཁྲིམས་ཐོག་ནས་སྐུ་ཚབ་དགོས་པ་སོགས་ཀྱི་སྒྲིག་གཞི་ལག་བསྟར་བྱེད་ཀྱི་ཡོད་པའི་གནས་ཚུལ་སྤེལ་འདུག སྙན་ཐོ་ནང་རྒྱ་གཞུང་ནས་མུ་མཐུད་བོད་མི་ཚོར་རང་ཉིད་ཀྱི་ཆོས་ཕྱོགས་ཀྱི་ཆོ་ག་ཕྱག་ལེན་ལག་བསྟར་ཐད་དམ་དྲག་དང་ལྷག་པར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་གཙོས་བོད་བརྒྱུད་ནང་བསྟན་གྱི་བླ་སྤྲུལ་འདེམས་ཕྱོགས་ལ་ཐེ་བྱུས་དང་སྟངས་འཛིན་བྱེད་པ་སྒོས་རྒྱ་གཞུང་གིས་སྲིད་བྱུས་ལ་དང་ལེན་མ་བྱེད་མཁན་གྱི་གྲྭ་བཙུན་ཚོར་དགོན་སྡེ་ནས་ཕྱིར་འབུད་དང་བཙོན་འཇུག་བྱས་ཡོད་པ་སོགས་གསལ་འདོན་བྱས་འདུག ཕྱི་ལོ་ ༢༠༡༩ ལོའི་དབྱར་དུས་སྐབས་ཡ་ཆེན་སྒར་གྱི་གྲྭ་བཙུན་རྣམས་ཀྱི་ཤག་སྟོང་ཕྲག་མང་པོ་གཏོར་བཅོམ་བཏང་བ་དང་༸གོང་ས་མཆོག་གི་སྐུ་པར་ཉར་མཁན་ཚོར་འཛིན་བཟུང་སློབ་ཕྲུག་རྣམས་གུང་སེང་སྐབས་ཆོས་ཕྱོགས་ཀྱི་བྱེད་སྒོར་མཉམ་ཞུགས་གནང་རྒྱུར་བཀག་སྡོམ་བྱས་པའི་གནས་ཚུལ་སོགས་ཐེར་འདོན་བྱས་འདུགཉེ་བའི་ལོ་ནང་རྒྱ་གཞུང་གིས་ཡེ་ཤུའི་ལྷ་ཁང་བཙན་དབང་གིས་སྒོ་བརྒྱབ་པ་དང་ཆོས་དཔོན་རྣམས་འཛིན་བཟུང་བྱས་པ། དེ་བཞིན་མཆོད་ཁང་ནང་རྒྱ་ནག་གི་སྲིད་འཛིན་ཞི་ཅིན་ཕིང་གི་འདྲ་པར་སོགས་བཞག་དགོས་པ་སོགས་ཀྱི་གནད་དོན་དང་ལྷག་པར་ཧྥ་ལུན་གྷོང་ཉམས་ལེན་བྱེད་མཁན་ཚོར་གང་བྱུང་འཛིན་བཟུང་དང་དེ་བཞིན་ཡུ་གུར་དང་། ཀ་ཛཀ། ཀིར་གྷིཛ་དང་གཞན་ཁ་ཆེ་མི་རིགས་ས་ཡ་གཅིག་ལྷག་ཙམ་ཞིག་ཤིན་ཅང་གི་ཆབ་སྲིད་སློབ་གསོ་བསྟི་གནས་ཁང་ ༡༣༠༠ ལྷག་ནང་བཀག་ཉར་བྱས་ཡོད་པའི་གནད་དོན་སོགས་ཆེད་འདོན་གནང་འདུག རྒྱ་གཞུང་གིས་ཆོས་ལུགས་རང་དབང་ཐད་རྡོག་རོལ་མུ་མཐུད་གཏོང་བར་བརྟེན་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས་ཨ་རིའི་ཕྱི་སྲིད་ལས་ཁུངས་ནས་རྒྱ་ནག་དེ་བྱེ་བྲག་ཏུ་དོ་སྣང་བྱེད་དགོས་པའི་རྒྱལ་ཁབ་ཁོངས་སུ་བཞག་དགོས་པ་དང་ཆོས་དད་རང་དབང་རྡོག་རོལ་གཏོང་མཁན་དམར་ཤོག་ཚོགས་པའི་དྲུང་ཆེ་ Chen Quanguo དང་། Zhu Hailun སོགས་རྒྱ་གཞུང་གི་དཔོན་རིགས། གཞུང་ཚབ་ལས་ཁང་སོགས་ཨ་རི་ནང་འགྲུལ་བསྐྱོད་སླད་བཀག་སྡོམ་དང་རྒྱ་གཞུང་གིས་མུ་མཐུད་ཆོས་ལུགས་རང་དབང་ཐད་རྡོག་རོལ་གཏང་ཚེ་ཨ་རིའི་གཞུང་གི་ལས་བྱེད་ཚོས་ཨོ་རྩེད་འགྲན་ཚོགས་ཐོག་མཉམ་ཞུགས་གནང་རྒྱུ་མེད་པ་དང་དེ་འབྲེལ་གྱི་གནད་དོན་ཐད་ཡོངས་གྲགས་སྒོ་ནས་ཐུགས་འཚབ་གནང་དགོས་པ་བརྗོད་འདུགལྷག་པར་དུ་ཨ་རི་གྲོས་ཚོགས་ནས་ Tibetan Policy and Support Act of 2019 ཞེས་ཨ་རིའི་བོད་དོན་ཁྲིམས་འཆར་གསར་པ་དང་གཞན་ཆོས་ལུགས་རང་དབང་གོང་མཐོར་སླད་ཁྲིམས་འཆར་དེ་དག་དང་དེ་བཞིན་ Uyghur Forced Labor Prevention Act ཞེས་ཡུ་གུར་ངལ་རྩོལ་འགོག་ཐབས་ཀྱི་ཁྲིམས་འཆར་ལ་རྒྱབ་སྐྱོར་དགོས་པའི་ཞུ་སྐུལ་གནང་འདུག་པ་མ་ཟད། ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ཚོགས་ཟུར་དང་འགན་འཛིན་གྲས་སུ་ཡོད་པ་སྐུ་ཞབས་བསྟན་འཛིན་རྡོ་རྗེ་ལགས་ཀྱིས་ཉེ་ལམ་རང་དབང་ཁང་པའི་སྙན་ཐོ་ནང་བོད་དེ་ཆོས་ལུགས་རང་དབང་དང་འགྲོ་བ་མིའི་ཐོབ་ཐང་གི་གནས་སྟངས་ཐད་ཆེས་ཞན་ཤོས་གཉིས་པའི་ཁོངས་སུ་ཆེད་འདོན་གནང་བ་དང་བོད་ནང་གི་གནས་སྟངས་དེ་བྱང་ཀོ་རི་ཡའི་གནས་སྟངས་ལས་ཆེས་ཞན་པ་ཡོད་པར་ལུང་འདྲེན་གནང་བ་དང་སྦྲགས་ཏེ་རྒྱ་གཞུང་གིས་བོད་མི་དང་ཡུ་གུར་མི་རིགས་རྣམས་ཀྱི་བྱ་སྤྱོད་ལ་དམ་དྲག་དང་སློབ་ཕྲུག་ཚོར་རང་གི་སྐད་ཡིག་དང་ཆོས་ཕྱོགས་སྐོར་སློབ་ཁྲིད་གནང་རྒྱུར་བཀག་སྡམ་བྱེད་བཞིན་ཡོད་སྟབས་ཨ་རི་སྲིད་གཞུང་ནས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ངེས་པར་དུ་ཕྱག་བསྟར་དང་ཨ་རིའི་ནང་བོད་གནས་འབྲེལ་མཐུད་པ་གང་མགྱོགས་བསྐོ་གཞག་གནང་དགོས་པར་འབོད་སྐུལ་ཞུས་གནང་འདུག གཞི་རྩའི་ཤོག་གྲངས་ ༡༠༤ ཡོད་པའི་སྙན་ཐོ་དེའི་ནང་འདས་ལོར་རྒྱལ་ཁབ་ ༢༩ ལྷག་གི་ནང་ཆོས་ལུགས་རང་དབང་རྡོག་རོལ་བཏང་བའི་གནད་དོན་ཞིབ་ཕྲ་འདོན་སྤེལ་དང་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ནས་དེ་འབྲེལ་ཨ་རིའི་སྲིད་གཞུང་ལ་གནད་དོན་ཁག་གཅིག་ཀྱང་ཞུ་སྐུལ་གནང་འདུག རང་དབང་ཁང་པའི་སྙན་ཐོ་གཙོས་པའི་གཞུང་དང་གཞུང་འབྲེལ་མིན་པའི་སྙན་ཐོ་ཁག་གི་ནང་མུ་མཐུད་རྒྱ་ནག་ནང་གི་ཆོས་དད་རང་དབང་གཙོས་འགྲོ་བ་མིའི་ཐོབ་ཐང་གི་གནས་སྟངས་ཆེས་ཞན་ཤོས་ཁོངས་སུ་ཐོན་གྱི་ཡོད་པསའགྲོ་བ་མིའི་ཐོབ་ཐང་དཔྱད་ཞིབ་པ་ཚོས་དུས་ནས་དུས་སུ་དེ་འབྲེལ་གྱི་གནད་དོན་ཐད་ཐུགས་འཚབ་དང་སྦྲགས་ཏེ་ཞུ་གཏུག་གི་ལས་འགུལ་སོགས་སྤེལ་མུས་ཡིན་པ་རེད།

ཁ་ཉིན་ཚེས་ ༦ ཉིན་ཨ་རིའི་གྲོས་ཚོགས་གོང་མའི་སྤྱི་མཐུན་ཚོགས་པའི་གྲོས་ཚོགས་འཐུས་མི་བདུན་གྱིས་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ Antonio Guterres མཆོག་གི་མཚན་ཐོག་ཏུ་ཕྱག་ཡིག་ཅིག་ཕུལ་ཏེ་རྒྱ་ནག་མཉམ་འཐུས་ཚབ་པ་ Jiang Duan རྒྱལ་ཚོགས་ཀྱི་ལས་དོན་ཚོགས་ཆུང་དུ་བསྐོ་གཞག་བྱས་པར་སྐྱོན་བརྗོད་ནན་པོ་གནང་འདུགཁོང་ཚོའི་ཕྱག་བྲིས་དེའི་ནང་རྒྱ་ནག་ནི་རང་རྒྱལ་གྱི་ཕྱི་ནང་གཉིས་སུ་འགྲོ་བ་མིའི་ཐོབ་ཐང་གི་གནས་བབས་ཆེས་ཞན་ཤོས་ཀྱི་རྒྱལ་ཁབ་ཅིག་ཡིན་པར་བརྟེན་ཐེངས་འདིར་རྒྱ་ནག་མཉམ་འབྲེལ་རྒྱལ་ཚོགས་ཀྱི་ཤུགས་རྐྱེན་ཆེ་བའི་ལས་དོན་ཚོགས་ཆུང་དུ་བསྐོ་བཞག་བྱས་པར་ངོས་ལེན་རྩ་བ་ནས་མེད་པ་མ་ཟད་རྒྱལ་ཚོགས་ཀྱིས་རྒྱ་ནག་དེ་ལས་དོན་ཚོགས་ཆུང་ནས་ཕྱིར་ཕུད་གནང་དགོས་པའི་དགོས་འདུན་ཆེད་བཏོན་གནང་འདུགདེ་བཞིན་ཞུ་སྙན་དེའི་ནང་ཐེངས་འདིར་རྒྱ་ནག་གི་སྐུ་ཚབ་འགྲོ་བ་མིའི་ཐོབ་ཐང་གི་ལས་དོན་ཚོགས་ཆུང་དུ་བསྐོ་གཞག་བྱས་པ་དེས་སྤྱི་ཡོངས་ཀྱི་འགྲོ་བ་མིའི་ཐོབ་ཐང་དུ་འབྲེལ་ནས་རང་དབང་གི་རྟོག་ཞིབ་པ་ ༡༧ ལྷག་འདེམས་སྒྲུག་གནང་གི་ཡོད་ལུགས་ལུང་འདྲེན་གྱིས་ས་མིག་དེ་དག་གི་ཁྲོད་རྒྱ་ནག་གིས་དུས་རྒྱུན་ནས་ལག་བསྟར་བྱེད་བཞིན་པའི་སྨྲ་བརྗོད་རང་དབང་ལ་དམ་དྲག་དང་གང་བྱུང་དུ་འཛིན་བཟུང་། གར་སོང་ཆ་མེད་དུ་གྱུར་བ་སོགས་ཀྱི་གནད་དོན་ལ་རྟོག་ཞིབ་གནང་མཁན་མི་སྣ་མང་པོར་དམ་དྲག་ཤུགས་ཆེ་བྱས་པར་བརྟེན་རྒྱལ་ཚོགས་ཀྱིས་རྒྱ་ནག་གི་འཐུས་པ་པ་ལས་དོན་ཚོགས་ཆུང་དུ་བསྐོ་གཞག་བྱས་པར་བློ་ཕམ་ཆེན་པོ་ཡོད་པ་འཁོད་འདུགདེ་བཞིན་གྲོས་ཚོགས་འཐུས་མི་རྣམས་ཀྱིས་རྒྱ་ནག་གིས་འདི་ལོའི་རྒྱ་ནག་གི་གྲོང་ཁྱེར་ཝུ་ཧྲན་ནས་ཁྱབ་བརྡལ་བྱུང་བའི་ཉེན་ཚབས་ཀྱི་ཐད་ནས་འཛམ་གླིང་ཧྲིལ་པོར་མགོ་སྐོར་བཏང་ཡོད་པར་མ་ཟད་ནད་ཡམས་ཁྱབ་བརྡལ་གྱི་སྐབས་སུ་སྤྱི་ཡོངས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ་གཉན་རིམས་ཁྱབ་བརྡལ་ལ་གསལ་འདེབས་བྱེད་མཁན་གྱི་སྨན་པ་རྣམས་ལ་ཉེས་ཆད་བཅད་པ་དང་རིམས་ནད་ཀྱི་གནས་ཚུལ་ཡོད་ཚད་ལ་དྲྭ་ཐོག་ནས་བཀག་སྡོམ་བྱས་ཏེ་ད་ཆ་འཛམ་གླིང་ཡོངས་ལ་ནད་ཡམས་ཁྱབ་བརྡལ་འགྲོ་བཞིན་པ་སོགས་མངོན་གསལ་གནང་བ་དང་ཆབས་ཅིག་ཏུ་རྒྱ་ནག་གི་འཐུས་ཚབ་པ་མཉམ་འབྲེལ་རྒྱལ་ཚོགས་ཀྱི་ལས་དོན་ཚོགས་ཆུང་དུ་བསྐོ་གཞག་གནང་རྒྱུ་རྩིས་མེད་གཏོང་དགོས་པའི་འབོད་སྐུལ་གནང་འདུག  གནས་ཚུལ་དེ་དང་འབྲེལ་ཏེ་རྒྱ་ནག་གིས་ཡུ་གུར་མི་མང་ས་ཡ་གཅིག་ལྷག་བཀག་བསྐྱིལ་གྱིས་གྲངས་ཉུང་མི་རིགས་གཙང་བཟོ་བྱེད་རྒྱུའི་སྲིད་བྱུས་ལག་བསྟར་བྱེད་ཀྱི་ཡོད་པ་གསལ་པོ་ཆགས་ཡོད་པ་དང་ཁ་ཆེ་མི་རིགས་ནི་རྒྱ་ནག་གི་ནང་མི་སེར་རིམ་པ་གཉིས་ལ་ལྟ་བུའི་ངོ་བོར་གནས་ཡོད་ལུགས་ལུང་འདྲེན་གནང་སྟེ་དེ་ལྟ་བུའི་བྱེད་བབ་དེ་ནི་འགྲོ་བ་མིའི་རིགས་སྤྱིར་གནོད་འཚབ་ཆེ་བའི་ནག་ཉེས་ཤིག་ཡིན་པ་གསུངས་བ་མ་ཟད་རྒྱ་ནག་དེ་རྒྱལ་ཚོགས་ཀྱི་ལས་དོན་ཚོགས་ཆུང་དུ་བསྐོ་གཞག་བྱེད་ཐབས་མེད་པ་ཡོངས་གྲགས་གནང་འདུགམཉམ་འབྲེལ་རྒྱལ་ཚོགས་ནི་འགྲོ་བ་མིའི་རིགས་ཀྱི་དཀའ་རྙོག་བསྐྱར་བཟློས་མི་ཡོང་བ་དང་མིའི་རིགས་ཀྱི་བདེ་རྩར་དམིགས་ནས་ཆེད་འཛུགས་བྱས་པ་ཞིག་ཡིན་པ་གསལ་འདེབས་གནང་བ་དང་ལྷན་དུ་ང་ཚོས་ངེས་པར་དུ་མཉམ་འབྲེལ་རྒྱལ་ཚོགས་ཀྱི་དབུ་ཁྲིད་དང་ཚོགས་མིའི་རྒྱལ་ཁབ་ཁག་ནས་ལེགས་ཕྱོགས་ལ་རེ་བ་བྱས་ཏེ་ང་ཚོའི་ཐུན་མོང་གི་རིན་ཐང་དང་ཆེ་མཐོང་གཙུག་ཏུ་བཟུང་ཐོག་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་གྱི་རྒྱ་ནག་གི་འཐུས་ཚབ་པ་ལས་དོན་ཚོགས་ཆུང་ནས་ཕྱིར་ཕུད་གཏོང་དགོས་པའི་འབོད་སྐུལ་ནན་བརྗོད་གནང་འདུགགཞི་རྩའི་ཕྱི་ཟླ་ ༤ ཚེས་ ༡ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་དོན་ཚོང་ཆུང་གི་ནང་རྒྱ་ནག་ཨེ་ཤ་ཡའི་ཞི་བདེ་རྒྱ་མཚོའི་ཁུལ་གྱི་འཐུས་མིར་བསྐོས་ཡོད་པར་བརྟེན་ཨ་རིའི་གྲོས་ཚོགས་འཐུས་མི་དང་རྒྱལ་ཚོགས་གནད་དོན་ལྟ་ཞིབ་ཁང་སོགས་ནས་སྨྲ་བརྗོད་རང་དབང་དང་ཆོས་དད་རང་དབང་སོགས་རྡོག་རོལ་གཏོང་མཁན་ཆེས་སྡུག་ཤོས་ཀྱི་རྒྱ་ནག་གི་འཐུས་ཚབ་པ་རྒྱལ་ཚོགས་ཀྱི་ལས་དོན་ཚོགས་ཆུང་ནང་བསྐོ་གཞག་བྱུང་བར་སྐྱོན་བརྗོད་ཤུགས་ཆེ་གནང་ཡོད་པ་རེད། ལྷག་པར་དུ་བོད་མིའི་སྒྲིག་འཛུགས་དྲིལ་བསྒྲགས་དྲུང་ཆེ་ཚེ་དབང་རྒྱལ་པོ་ཨརྱ་ལགས་ཀྱིས་རྒྱ་ནག་དམར་པོའི་སྲིད་གཞུང་ནི་འཛམ་གླིང་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་ཐོག་དམ་དྲག་ཤུགས་ཆེ་ཤོས་བྱེད་མཁན་དང་བསམ་ཚུལ་བརྗེ་ལེན་དང་སྨྲ་བརྗོད་རང་དབང་བརྡལ་བཤིག་གཏོང་མཁན་གྱི་རྒྱལ་ཁབ་གཙོ་བོ་ཞིག་ཡིན་པ་ཡོངས་གྲགས་ཡིན་བཞིན་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ལམ་སྟོན་ཚོགས་ཆུང་གི་ཚོགས་མིའི་ཁོངས་སུ་བསྐོ་གཞག་བྱས་པ་དེ་ནི་བློ་ཕམ་གྱི་གནས་ཤིག་ཡིན་པ་དང་། གནང་བབས་དེས་རང་དབང་དང་དྲང་བདེན་ལ་དགའ་བའི་རྒྱལ་སྤྱིའི་སྤྱི་ཚོགས་ནང་བརྡ་ལན་ལོག་པ་ཞིག་བཏང་བ་མ་ཟད་རྒྱལ་སྤྱིའི་ཐོག་འགྲོ་བ་མིའི་ཐོབ་ཐང་གི་གནས་སྟངས་ཐོག་འགྲེལ་བརྗོད་བྱེད་སྟངས་ལའང་ཤུགས་རྐྱེན་ངན་པ་ཐེབས་རྒྱུ་ཡིན་པ་སོགས་འགྲེལ་བརྗོད་གནང་བ་དང་སྦྲགས། ད་ཆ་དཀའ་སྡུག་མྱོང་བཞིན་པའི་མི་རིགས་དེ་དག་གི་ངོས་ནས་རེ་བ་བཅོལ་ཡུལ་རྒྱལ་སྤྱིའི་སྒྲིག་འཛུགས་ནང་ཉེས་ཅན་པ་རང་ཉིད་སྒྲིག་འཛུགས་སྲུང་མིར་བསྐོས་པ་ནི་སྤྱང་ཀི་ལུག་རྫིར་བསྐོས་པའི་དཔེ་ལྟར་རེད་ཅེས་གསུངས་འདུག

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་སྐུ་ Michelle Bachelet མཆོག་རྒྱ་ནག་ནང་ཕེབས་འཆར་ཡོད་པ་ལྟར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ལྕམ་སྐུ་མཆོག་བོད་ནང་དུ་ངེས་ཕེབས་གནང་སྐྱོང་ཡོང་བའི་རེ་སྐུལ་ཞུས་འདུག འདི་ལོར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་སྐུ་ Michelle Bachelet མཆོག་གིས་རྒྱལ་ཚོགས་ཀྱི་ལྷན་ཚོགས་ཐེངས་ ༤༣ པའི་སྐབས་སུ་ཁོང་ལ་རྒྱ་ནག་གཞུང་གིས་ཡུལ་དེའི་ནང་དུ་ཕེབས་གནང་ཡོང་བའི་མགྲོན་བརྡ་གནང་ཡོད་པ་ཡོངས་ཁྱབ་གནང་ཡོད་པར་མ་ཟད། ཁོང་གིས་ང་ཚོའི་ངོས་ནས་རྒྱ་ནག་ནང་དུ་འགྲོ་བ་མིའི་ཐོབ་ཐང་གི་གནས་སྟངས་ཇི་ལྟར་ཡོད་མེད་ཐོག་གཏིང་ཟབ་ཀྱི་ཞིབ་འཇུག་བྱ་རྒྱུར་སྒུག་ཆོག་གི་རེད་ཅེས་གསུངས་ཡོད་པ་རེད། བོད་མིའི་སྒྲིག་འཛུགས་ཀྱི་ཨིན་ཡིག་དྲྭ་རྒྱའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་ད་རེས་སྐོར་བསྐྱོད་དེ་ནི་དུས་ཀྱི་དགོས་མཁོ་ཞིག་ཆགས་ཡོད་པ་དང་། ལྕམ་སྐུ་ Michelle Bachelet མཆོག་ཐེངས་འདིའི་སྐོར་སྐྱོད་དང་འབྲེལ་ཏེ་བོད་ནང་ལ་མ་ཕེབས་ཚེ་རྒྱ་ནག་ནང་དུ་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་ཇི་ལྟར་ཡོད་མེད་ཐོག་གཏིང་ཟབ་ཀྱི་ཞིབ་འཇུག་གནང་ཐབས་བྲལ་བར་མ་ཟད། བོད་ནང་དུ་བཞུགས་པའི་གཞིས་ལུས་རྒྱ་ཆེ་མང་ཚོགས་རྣམས་ཀྱིས་འདས་པའི་མི་ལོ་ ༦༠ རིང་ལ་རྒྱ་གཞུང་གིས་ཁྲིམས་འགལ་གྱི་ཐོག་ནས་བོད་དུ་བཙན་འཛུལ་གྱིས་གཞི་རྩའི་འགྲོ་བ་མིའི་ཐོབ་ཐང་ལ་བརྩི་མེད་ཀྱིས་མནར་སྤྱོད་ཚབས་ཆེན་བཏང་བའི་བྱ་སྤྱོད་དག་ལ་གདོང་ལེན་གནང་ཡོད་སྐོར་གསུངས་འདུག དེ་བཞིན་སྲིད་སྐྱོང་མཆོག་གིས་རྒྱ་ནག་གཞུང་གིས་བོད་མི་དག་ལ་མི་སྤྱོད་ལས་འདས་པའི་མནར་གཅོད་བཏང་བར་བརྟེན་ནས་ཕྱི་ལོ་ ༢༠༠༩ ལོ་ནས་བོད་མི་ ༡༤༥ ནས་བོད་བསྟན་སྲིད་སྤྱིའི་སླད་དུ་སྐུ་ལུས་ཞུགས་འབུལ་གནང་བའི་གནས་སྟངས་སོགས་གསུངས་པ་དང་ཆབས་ཅིག མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་སྐུ་ Bachelet མཆོག་བོད་ནང་དུ་ངེས་ཕེབས་གནང་སྐྱོང་ཡོང་བའི་རེ་སྐུལ་ཞུས་པ་དང་འབྲེལ་ཏེ་སྐུ་ཉིད་མཆོག་བོད་དུ་མ་ཕེབས་ཚེ་བོད་ནང་དུ་གཞིས་ལུས་བོད་མི་རྣམས་རྟག་ཏུ་འཇིགས་སྣང་ངང་འཚོ་བཞིན་ཡོད་པ་དང་དེ་བཞིན་རྒྱ་གཞུང་གི་དོགས་ཟོན་འོག་གནས་པའི་དངོས་ཡོད་ཀྱི་གནས་སྟངས་ཁག་རྟོགས་ཐུབ་རྒྱུ་མེད་པར་གསུངས་འདུག དེ་སྔ་ཕྱི་ལོ་ ༡༩༩༨ ལོར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་འགན་འཛིན་བོད་དུ་ཕེབས་ཡོད་པ་ལས་འདས་པའི་ལོ་ངོ་ ༢༢ རིང་ལ་རྒྱ་ནག་གི་བཀག་སྡོམ་འོག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་བོད་དུ་སྐོར་བསྐྱོད་གནང་མྱོང་མེད་པ་དང་། གལ་ཏེ་རྒྱ་གཞུང་གིས་ད་རེས་ལྕམ་སྐུ་ Michelle Bachelet མཆོག་བོད་ཕེབས་རྒྱུའི་ཆོག་མཆན་སྤྲད་ཚེ་དེ་ནི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་འགན་འཛིན་ཞིག་བོད་ནང་དུ་སྐོར་བསྐྱོད་ལ་ཕེབས་པ་ཐེངས་གཉིས་པ་དེ་ཆགས་ཀྱི་ཡོད་པ་རེད་ཅེས་སོགས་གསུངས་པ་དང་སྦྲགས། རྒྱ་གཞུང་གི་ངོས་ནས་རྒྱལ་ཚོགས་ཀྱི་འགྲོ་བ་མིའི་ཐོངབ་ཐང་གི་འབྲེལ་ཡོད་མི་སྣ་ཁག་ལ་འགྲོ་སྐྱོད་ཐད་ལ་བཀག་སྡོམ་བྱས་ཡོད་པ་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་སྐུ་ཞབས་ Zeid Raad Al Hussein མཆོག་གིས་ཀྱང་རྒྱ་གཞུང་གི་ངོས་ནས་བོད་མི་དང་ཤིན་ཅང་གི་མང་ཚོགས་རྣམས་ཀྱི་འགྲོ་སྐྱོད་ལ་བཀག་སྡོམ་གནང་རྒྱུ་མེད་པའི་འབོད་སྐུལ་གནང་ཡོད་སྐོར་ལུང་འདྲེན་གནང་འདུག གཞན་ཡང་སྲིད་སྐྱོང་མཆོག་གིས་ཤིན་ཅང་ནང་གི་ཡུ་གུར་བའི་འགྲོ་བ་མིའི་ཐོབ་ཐང་གི་གནས་སྟངས་ཇི་ཡིན་གསལ་པོ་ཤེས་པའི་ཆེད་དུ་ཞིབ་འཇུག་གནང་བར་བོད་ནང་ད་བར་བྱུང་བའི་གནས་སྟངས་ཁག་ལ་ཞིབ་འཇུག་གནང་དགོས་གལ་ཡིན་པ་དང་། བོད་ནང་དུ་འཕྲད་བཞིན་པའི་དཀའ་ངལ་གང་ཡིན་པ་དེ་དག་མ་སེལ་བར་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་འཕེལ་རྒྱས་སུ་གཏོང་བར་དགོངས་པ་དེ་ནི་སྟོང་བསམ་རེད་ཅེས་གསུངས་འདུག དེའི་བར་ན ཁ་སང་ཕྱི་ཚེས་ ༢ ཉིན་ཨོ་སི་ཊོ་ལི་ཡར་ཡོད་པའི་ ASPI སྲིད་བྱུས་ཉམས་ཞིབ་ཁང་གིས་ཤིན་ཅང་གི་ཡུ་གུར་བའི་སྐོར་ལ་སྙན་ཐོ་ཞིག་བཏོན་པར་གཞིགས་ཚེ་རྒྱ་ནག་གཞུང་གིས་ཤིན་ཅང་ནང་ཡུ་གུར་བ་ས་ཡ་མང་བརྒལ་བ་བཀག་བསྐྱིལ་བྱེད་བཞིན་པའི་ཁོངས་ནས་མི་གྲངས་ཁྲི་བརྒྱད་ལྷག་རྒྱ་ནག་གི་ས་ཁུལ་གཞན་དུ་ཡོད་པའི་བཟོ་གྲྭ་ཁག་ཏུ་ངལ་རྩོལ་སྒྱུར་བཀོད་གཏོང་བཞིན་ཡོད་པ་རེད་འདུག ད་ལྟའི་ཆར་ཤིན་ཅང་ནང་གི་ཡུ་གུར་མང་ཚོགས་དེ་དག་གི་གནས་སྟངས་གང་ཡིན་ལ་བལྟ་ཚེ་ཁོང་རྣམས་ལ་བཙན་དབང་གིས་ངལ་རྩོལ་སྒྱུར་བཀོད་བྱེད་དི་འཇུག་པའི་གནས་སྟངས་ཤིག་ཆགས་ཀྱི་འདུག་པར་མ་ཟད། ཡུ་གུར་བ་དེ་རྣམས་ནཱའེ་ཀི། གྷེཔ། སེམ་སྔག།སོ་ནི་སོགས་རྒྱལ་སྤྱིའི་བཟོ་ཚོང་ཁང་གྲགས་ཅན་ ༨༣ ལྷག་ལ་ཆ་བགོས་ཀྱིས་ངལ་རྩོལ་ཆེད་གཏོང་བཞིན་ཡོད་པ་རེད་འདུག འོན་ཀྱང་རྒྱ་ནག་གཞུང་གི་ངོས་ནས་ད་ལྟའི་ཆར་གནས་སྟངས་དེ་ལ་ངོས་ལེན་རྩ་བ་ནས་བྱེད་མི་འདུག དེ་བཞིན་རྒྱ་ནག་གི་བཟོ་གྲྭ་དེ་དག་ཏུ་ཡོད་པའི་ཡུ་གུར་བ་དང་གྲངས་ཉུང་མི་རིགས་ཀྱི་མང་ཚོགས་བཙན་དབང་གི་ཐོག་ནས་ངལ་རྩོལ་དུ་བཀོལ་པ་དང་། དེ་དག་རྣམས་ལོགས་སུ་ཚོམས་ཁང་ལྟ་བུར་བཞག་ནས་རྒྱ་ཡིག་ལ་སློབ་སྦྱོང་དང་བསམ་བློ་བཅོས་བསྒྱུར་གྱི་སློབ་གསོ་སྤྲོད་བཞིན་ཡོད་པར་མ་ཟད་ཆོས་ལུགས་ཀྱི་གནང་སྒོ་ཁག་ལ་ཞུགས་རྒྱུར་བཀག་སྡོམ་བྱེད་མུས་ཡིན་པ་བཀོད་འདུག

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་སྐུ་ Michelle Bachelet མཆོག་རྒྱ་ནག་ནང་ཕེབས་འཆར་ཡོད་པ་ལྟར་རྒྱལ་སྤྱིའི་བོད་དོན་ལས་འགུལ་ཁང་གིས་ཁོང་མོར་བོད་ནང་གི་འགྲོ་བ་མིའི་ཐོབ་ཐང་སྐོར་ལ་དངོས་སུ་གཟིགས་ཞིབ་གནང་དགོས་པའི་འབོད་སྐུལ་ཞུས་འདུག རྒྱལ་སྤྱིའི་བོད་དོན་ལས་འགུལ་ཁང་གིས་ཁ་སྔོན་གནས་ཚུལ་སྤེལ་བར་འདི་ལོར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་སྐུ་ Michelle Bachelet མཆོག་གིས་རྒྱ་ནག་གི་བཙན་གནོན་འོག་ཡོད་པའི་ཤིན་ཅང་ཡུ་གུར་མི་རིགས་རང་སྐྱོང་ཁུལ་སོགས་ཀྱི་ནང་གཞུང་འབྲེལ་སྐོར་བསྐྱོད་གནང་འཆར་ཡོད་སྟབས། རྒྱལ་སྤྱིའི་བོད་དོན་ལས་འགུལ་ཁང་གིས་ལྕམ་སྐུ་ལགས་ཀྱི་ཐེངས་འདིའི་སྐོར་སྐྱོད་དང་འབྲེལ་ཏེ་བོད་ནང་ལའང་ཕེབས་ཐབས་གནང་སྟེ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་རྒྱ་ནག་གི་འགོ་ཁྲིད་དང་མཉམ་དུ་གླེང་སློང་གནང་དགོས་པའི་འབོད་སྐུལ་ཞུས་འདུག རྒྱལ་སྤྱིའི་བོད་དོན་ལས་འགུལ་ཁང་གི་འབོད་སྐུལ་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་མཆོག་གིས་རྒྱ་ནག་ནང་སྐོར་བསྐྱོད་གནང་རྒྱུ་ཡིན་པར་འཚམས་འདྲི་དང་སྦྲགས། རྒྱ་ནག་གཞུང་གིས་བཙན་འཛུལ་བྱས་པའི་བོད་ནི་ལོ་རྒྱུས་ཐོག་ནས་རང་བཙན་གཙང་མའི་རྒྱལ་ཁབ་ཅིག་ཡིན་ཞིང་། རྒྱ་ནག་གཞུང་གིས་ད་བར་བོད་ནང་མཉམ་འབྲེལ་རྒྱལ་ཚོགས་དང་ཕྱིའི་རྒྱལ་ཁབ་ཁག་གི་གཞུང་འབྲེལ་སྐུ་ཚབ་རྣམས་བོད་ནང་གི་གནས་སྟངས་རྒྱུས་ལོན་ཆེད་གཏོང་གི་མེད་པ་དང་། བོད་ནི་འཛམ་གླིང་གི་ཆེས་ཁེར་རྐྱང་དང་རྒྱལ་སྤྱིའི་གསར་འགོད་པ་ཚོ་བོད་ནང་བསྐྱོད་རྒྱུ་ནི་བྱང་ཀོ་རི་ཡ་ལས་ལྷག་པའི་བཀག་སྡོམ་ཆེ་བ་ཡོད་པར་བརྗོད་འདུག རྒྱལ་སྤྱིའི་བོད་དོན་ལས་འགུལ་ཁང་གི་རྒྱལ་ཚོགས་ནང་གི་ཁྲིམས་དོན་ཞུ་གཏུག་འགན་འཛིན་སྐུ་ཞབས་ Kai Mueller མཆོག་གིས་རྒྱ་ནག་གཞུང་གིས་དུས་རྒྱུན་ནས་བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་དང་སྟངས་འཛིན་དོ་དོམ་ནན་པོ་བྱེད་ཀྱི་ཡོད་པ་དང་སྦྲགས། བོད་ནི་རྒྱ་ནག་གི་སྲིད་དབང་སྒེར་གཅོད་འོག་ཏུ་དབྱེ་འབྱེད་རང་བཞིན་ལྡན་པའི་སྲིད་བྱུས་ལག་བསྟར་བྱེད་ས་ཞིག་ཆགས་ཡོད་པར་མངོན་གསལ་གནང་འདུག བོད་མིའི་ཆོས་དང་རིག་གཞུང་ལ་རྒྱ་ནག་གིས་སྟངས་འཛིན་ནན་པོ་བྱེད་བཞིན་ཡོད་པར་གསུངས་པ་དང་ལྷན་དེ་རིང་གི་ཤིན་ཅང་གི་དྲག་གནོན་ནི་རྒྱ་ནག་གིས་བོད་ནང་ལག་བསྟར་བྱས་པའི་གྲུབ་དོན་ཞིག་ཡིན་པར་ལུང་འདྲེན་གྱིས་ལྕམ་ Bachelet མཆོག་གིས་ཐེངས་འདིའི་སྐོར་སྐྱོད་དང་ལྷན་རྒྱ་ནག་གིས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་བཙན་ཁྲིད་བྱས་པ་དང་བོད་ནང་གི་ཆོས་དད་རང་དབང་རྡོག་རོལ་གཏོང་བཞིན་པ། དེ་བཞིན་བོད་ཀྱི་སྐད་ཡིག་རང་དབང་འཐབ་རྩོད་པ་བཀྲ་ཤིས་དབང་ཕྱུག་ལགས་སོགས་ཀྱི་སྐོར་རྒྱ་གཞུང་གི་འགོ་ཁྲིད་དང་ལྷན་དུ་གླེང་སློང་གནང་དགོས་པའི་འབོད་སྐུལ་གནང་བར་མ་ཟད་བོད་ནི་རྒྱ་ནག་གི་སྟངས་འཛིན་ནན་པོ་བྱེད་སའི་ས་ཁུལ་ཞིག་ཆགས་ཡོད་པར་བརྟེན་བོད་ནང་གཟིགས་ཞིབ་གནང་ཐུབ་ཚེ་དངོས་ཡོད་གནས་ཚུལ་ལ་རྒྱུས་ལོན་བརྒྱུད་ནས་འགྲོ་བ་མིའི་ཐོབ་ཐང་ལ་སྲུང་སྐྱོབ་གནང་རྒྱུར་རོགས་འདེགས་ཆེན་པོ་ཞིག་ཡིན་པར་གསུངས་འདུག རྩ་བའི་ཕྱི་ལོ་ ༡༩༩༨ ནས་འདས་པའི་ལོ་ངོ་ ༢༢ རིང་ལ་རྒྱ་ནག་གི་བཀག་སྡོམ་འོག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ཞིག་བོད་ནང་སྐོར་བསྐྱོད་གནང་མྱོང་མེད་པ་དང་། ལྕམ་སྐུ་ Bachelet མཆོག་ད་རེས་བོད་དུ་ཕེབས་ཐུབ་ན་དེ་ནི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་འགན་འཛིན་ཞིག་བོད་ནང་དུ་སྐོར་བསྐྱོད་ལ་ཕེབས་པ་ཐེངས་གཉིས་པ་དེ་ཆགས་ཀྱི་ཡོད་པ་རེད། འོན་ཀྱང་ཁོང་ནམ་ཞིག་ལ་རྒྱ་ནག་ཏུ་ཕེབས་འཆར་ཡོད་མེད་སོགས་ཀྱི་དུས་ཚོད་གཏན་འཁེལ་གསལ་པོ་མེད་པ་རེད།

རྒྱལ་སྤྱིའི་དྲྭ་རྒྱ་བདེ་འཇགས་དང་འགྲོ་བ་མིའི་ཐོབ་ཐང་ལས་འགུལ་ཚོགས་པ་ ༡༢ ཀྱིས་རིང་མིན་འཚོགས་ལ་ཉེ་བའི་ཀུ་ཤུ་རྟགས་ཅན་གྱི་མ་རྩ་འཛུགས་མཁན་རྣམ་པའི་ལོ་འཁོར་ཚོགས་འདུ་དང་བསྟུན་ཚོང་ལས་ཁང་དེས་རྒྱ་ནག་དང་ངན་པ་ལག་སྦྲེལ་བྱེད་མཚམས་འཇོག་དགོས་པ་དང་། ངན་འབྲེལ་གྱི་ཤུགས་རྐྱེན་ཐེབས་ཡུལ་བོད་མི་དང་ཤིན་ཅང་། ཧོང་ཀོང་། ཐེ་ཝན། དེ་བཞིན་རྒྱ་མི་རིགས་སོགས་ཀྱི་འཐུས་ཚབ་མི་སྣ་དང་ལས་འགུལ་བ་རྣམ་པ་དང་ལྷན་ངལ་བ་ཇི་འཕྲད་གསན་འཇོག་གནང་དགོས་པའི་ཞུ་སྐུལ་གནང་འདུག དེ་ཡང་རིང་མིན་ཟླ་ ༢ ཚེས་ ༢༤ ཉིན་ཀུ་ཤུ་རྟགས་ཅན་ནང་མ་རྩ་འཛུགས་མཁན་རྣམས་ལྷན་འཛོམས་ཐོག་ཚོང་ལས་ཁང་དེའི་ལོ་འཁོར་ཚོགས་འདུ་ཞིག་འཚོགས་གཏན་ཁེལ་ཡོད་པ་དང་བསྟུན། ཟླ་ ༢ ཚེས་ ༡༣ ཉིན་བོད་དོན་ལས་འགུལ་བསྟི་གནས་ཁང་དང་རྒྱལ་སྤྱིའི་བོད་དོན་འབྲེལ་མཐུད་ཁང་། བོད་རང་བཙན་སློབ་ཕྲུག་ཚོགས་པ། བོད་རང་དབང་ཚོགས་པ། དེ་བཞིན་རྒྱལ་སྤྱིའི་ཡུ་གུར་ཚོགས་པ། ཐེ་ཝན་རང་དབང་ཚོགས་པ། Sum OF us  ཞེས་འགྲོ་བ་མིའི་ཐོབ་ཐང་དང་དྲང་བདེན་རྩོད་ལེན་གནང་མཁན་སོགས་ཀྱི་ཚོགས་པ་ ༡༢ མཉམ་སྦྲེལ་ཐོག་ཀུ་ཤུ་རྟགས་ཅན་ཚོང་ལས་ཁང་གི་མཉེན་ཆས་ཕབ་ལེན་གྱི་ཚོང་ལས་འགན་འཛིན་སྐུ་ཞབས་ Philip Schiller ལགས་ཀྱི་མཚན་ཐོག་ཏུ་ཞུ་སྙན་ཞིག་ཕུལ་འདུག ཞུ་སྙན་དེའི་ནང་ཚོགས་པ་དེ་དག་གིས་དེ་སྔོན་ཀུ་ཤུ་རྟགས་ཅན་གྱི་གཙོ་འཛིན་ Tim Cook ལགས་སུ་རྒྱ་གཞུང་གིས་བོད་དང་ཧོང་ཀོང་། ཐེ་ཝན་བཅས་ཀྱི་གཞི་རྩའི་འགྲོ་བ་མིའི་ཐོབ་ཐང་གཙོས་པའི་རང་དབང་ཁག་ལ་རྡོག་རོལ་ཚད་མེད་བཏང་བར་ཀུ་ཤུ་རྟགས་ཅན་གྱི་ངོས་ནས་རོགས་འདེགས་ཞུ་བཞིན་པར་སྐྱོན་བརྗོད་དང་འབྲེལ། གོང་དུ་མིང་སྨོས་ཡུལ་ལུང་དེ་དག་ལ་རྒྱ་ནག་གཞུང་ནས་སོ་ཉུལ་སླད་དུ་ཚོང་ལས་ཁང་དེས་ངན་པ་ལག་འབྲེལ་བྱེད་ཤུགས་ཆེ་རུ་སོང་རྐྱེན་གནས་ཚུལ་རྒྱུས་ལོན་རང་དབང་དང་། སྨྲ་བརྗོད་རང་དབང་སོགས་ལ་རྡོག་རོལ་ཤུགས་ཆེར་ཐེབས་བཞིན་ཡོད་སྟབས་རྒྱ་ནག་གཞུང་ལ་རོགས་འདེགས་དང་ངན་པ་ལག་འབྲེལ་བྱེད་འཚམས་འཕྲལ་དུ་འཇོག་དགོས་པའི་ཞུ་སྐུལ་ཐེངས་ཁ་ཤས་གནང་ཡོད་ཀྱང་ད་བར་ལན་འདེབས་གསལ་བཤད་གང་ཡང་བྱུང་མེད་སྐོར་འཁོད་འདུག ཕྱི་ལོ་ ༢༠༡༧ ལོར་ཀུ་ཤུ་རྟགས་ཅན་གྱི་མཉེན་ཆས་ ༡༠༠༠ ཙམ་ཞིག་རྒྱ་ནག་གི་མཉེན་ཆས་ཚོང་ལས་ཁང་ནས་ཕྱིར་འཐེན་གནང་རྐྱེན་བོད་གཙོས་ཤིན་ཅང་དང་རྒྱ་ནག ཧོང་ཀོང་བཅས་ཀྱི་ནང་གནས་ཚུལ་མཁོ་སྒྲུབ་བྱ་རྒྱུར་ཆེས་དམ་དྲག་དང་ལྷག་དོན་༸གོང་ས་མཆོག་གི་མཚན་དང་བོད་རང་བཙན། དེ་བཞིན་ཡུ་གུར་བའི་རང་དབང་དང་དྲུག་བཞི་དོན་རྐྱེན་སོགས་ཀྱི་ཐ་སྙད་ལ་དོག་ཟོན་ཆེན་པོ་གནང་དགོས་ཀྱི་ཡོད་པར་མ་ཟད། རྒྱ་ནག་ནང་ཀུ་ཤུ་རྟགས་ཅན་གྱི་ཁ་པར་སྤྱོད་མཁན་རྒྱ་རིགས་མང་ཚོགས་ཀྱི་གནས་ཚུལ་རྣམས་གསང་སྙུལ་བྱས་ཏེ་རྒྱ་ནག་གཞུང་ལ་མཁོ་སྤྲོད་བྱས་ཡོད་པ་སོགས་ཀྱང་ལུང་འདྲེན་གནང་འདུག བོད་གཙོས་པའི་ཤིན་ཅང་དང་རྒྱ་ནག ཧོང་ཀོང་བཅས་ཀྱི་སྐུ་ཚབ་དང་ལྷན་དཀའ་ངལ་ཇི་འཕྲད་གསན་འཇོག་གནང་དགོས་པ་དང་ཚོང་ལས་ཁང་གིས་དེ་སྔ་ཕྱིར་འཐེན་གནང་བའི་མཉེན་ཆས་རྣམས་རྒྱ་གཞུང་གི་ཁྲིམས་དང་མཐུན་པ་ཞིག་གང་འདྲ་ཡིན་མིན་དང་དེ་དག་ཁྲིམས་གཞི་གང་ཐོག་ནས་ཕྱིར་འཐེན་གནང་མིན་ཐད་གསལ་བཤད་དགོས་སྐོར་གསུངས་པར་མ་ཟད། བཟོ་ཚོང་ཁང་དེའི་འབྲུ་དོན་ལྟར་འགྲོ་བ་མིའི་སྨྲ་བརྗོད་རང་དབང་དང་སྒེར་གྱི་གསང་བ་བདག་སྲུང་གནང་རྒྱུ་དང་མཐུན་པའི་འགན་དབང་འཐུས་ཚང་བཞེས་དགོས་གལ་ཡིན་པའི་ཞུ་སྐུལ་གནང་འདུག

ལོ་ལྟར་སུད་སི་གྲོང་ཁྱེར་ཇི་ནི་ཝ་ནང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་དུས་ཡུན་སྔ་རྗེས་དང་བསྟུན་རྒྱལ་སྤྱིའི་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གཞུང་འབྲེལ་མིན་པའི་ཚོགས་པ་ ༢༥ ཟུང་འབྲེལ་ཐོག་འགྲོ་བ་མིའི་ཐོབ་ཐང་དང་མང་གཙོ་ཞེས་པའི་གླེང་བརྗོད་ཐད་ཇི་ནི་ཝའི་ལྷན་ཚོགས་ཞེས་པ་ཞིག་ཚོགས་ཀྱི་ཡོད་པ་དང་། ད་བར་གྱི་ལྷན་ཚོགས་དེའི་ཚོགས་དུས་ནམ་ཡིན་ལ་སུད་སི་བོད་ཀྱི་བེུད་ལྷན་ཚོགས་ནས་གོ་སྐབས་ཆེ་བཞེས་ཀྱིས་ལྷན་ཚོགས་བརྒྱུད་དེ་བོད་ནང་འགྲོ་བ་མིའི་ཐོབ་ཐང་དང་། བོད་མིའི་ཆབ་སྲིད་བཙོན་པའི་གནས་སྟངས་སོགས་རྒྱལ་སྤྱིའི་མང་ཚོགས་ལ་བརྒྱུད་བསྒྲགས་གནང་བཞིན་ཡོད་པ་རེད། སྤྱིར་ཇི་ནི་ཝའི་འགྲོ་བ་མིའི་ཐོབ་ཐང་མང་གཙོའི་ལྷན་ཚོགས་ནི་ཐོག་མར་ཕྱི་ལོ་ ༢༠༠༩ ལོར་ UN watch ཞེས་རྒྱལ་ཚོགས་ལ་ལྟ་སྲུང་གནང་མཁན་གྱི་གཞུང་འབྲེལ་མིན་པའི་ཚོགས་པས་སྣི་ཁྲིད་གནང་སྟེ་རྒྱལ་སྤྱིའི་ནང་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གཞུང་འབྲེལ་མིན་པའི་ཚོགས་པ་ ༢༠ ལྷག་མཉམ་རུབ་ཀྱིས་ཆེད་བཙུགས་གནང་བའི་ལྷན་ཚོགས་ཤིག་ཡིན་ཞིང་། ཁ་སང་ཕྱི་ཚེས་ ༡༨ ཉིན་སུད་སི་གྲོང་ཁྱེར་ཇི་ནི་ཝར་ ༢༠༢༠ ལོའི་ཇི་ནི་ཝའི་ལྷན་ཚོགས་ཐེངས་ ༡༢ དེ་བསྐོང་ཚོགས་གནང་སོང་བ་དང་སུད་སི་བོད་ཀྱི་བེུད་ལྷན་ཚོགས་རྒྱུན་ལས་ཚོགས་མི་ཁག་ཅིག་ནས་མཉམ་ཞུགས་ཀྱིས་བོད་མིའི་ངོ་ཚབ་མཚོན་པ་གནང་ཡོད་པ་རེད། ཕྱི་ལོ་ ༢༠༡༠ ལོ་ནས་སུད་སི་བོད་ཀྱི་བེུད་ལྷན་ཚོགས་ལྷན་ཚོགས་ཀྱི་མི་ཁོངས་སུ་འཛུལ་ཞུགས་གནང་འདུག  སྐབས་དེ་དུས་ལྷན་ཚོགས་ཐོག་རྒྱ་ནག་གཞུང་གི་བཙོན་ཁང་ནང་བོད་པའི་བེུད་ཆབ་སྲིད་བཙོན་པའི་ཁོངས་ནས་བཙུན་འཇུག་གི་དུས་ཡུན་རིང་ཤོས་བཞུགས་མྱོང་མཁན་ཆབ་སྲིད་བཙོན་ཟུར་ཕུན་ཚོགས་ཉི་སྒྲོན་ལགས་ཀྱིས་བོད་མིའི་སྐུ་ཚབ་གནང་སྟེ་ཉན་ཞིབ་ཐོག་མ་གནང་ཡོད་པར་མ་ཟད། འདས་པའི་དུས་ཡུན་ལོ་ངོ་བཅུ་ལྷག་གི་ལྷན་ཚོགས་ཐོག་སུད་སི་བོད་ཀྱི་བེུད་ལྷན་ཚོགས་བརྒྱུད་ནས་ལྷན་ཚོགས་སྟེང་བོད་མིའི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་མགོ་ལོག་འཇིགས་མེད་ལགས། དེ་བཞིན་བོད་མིའི་སྒྲིག་འཛུགས་ཀྱི་བཀའ་བློན་དང་འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་སོགས་འབྲེལ་ཡོད་མི་སྣ་ཁག་གཅིག་གིས་བོད་དོན་གཏམ་བཤད་དང་ཉན་ཞིབ་སོགས་ཀྱང་གནང་ཐུབ་པ་བྱུང་འདུག འོན་ཀྱང་འདས་ལོའི་ནང་རྒྱལ་སྤྱིའི་བརྒྱུད་ལམ་ཐོག་དོ་སྣང་ཆེ་ཆེར་གནང་བའི་ཡུ་གུར་དང་དང་ཧོང་ཀོང་ནང་གི་གནད་དོན་རྐྱེན་པས་བོད་མིའི་སྐུ་ཚབ་ལ་ཐེངས་འདིའི་ལྷན་ཚོགས་སྟེང་གསུང་བཤད་དང་ཉན་ཞིབ་གནང་རྒྱུའི་གོ་སྐབས་གནང་མི་འདུག་ཀྱང་། ལྷན་ཚོགས་ཚོགས་ཡུལ་ཚོགས་རར་འཛམ་གླིང་ནང་ཆབ་སྲིད་བཙོན་པའི་སྐུ་པར་འགྲེམས་སྟོན་གནང་བའི་ཁྲོད་བོད་མིའི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱི་སྐུ་པར་བཤམས་སྟོན་གནང་བ་མཇལ་རྒྱུ་འདུག རྩ་བའི་འདས་པའི་ལོ་ངོ་བཅུ་ལྷག་རིང་ཇི་ནི་ཝའི་ལྷན་ཚོགས་ཐོག་བོད་མིའི་སྐུ་ཚབ་ནས་མཉམ་ཞུགས་དང་ཉན་ཞིབ། གསུང་བཤད་སོགས་གནང་སྟེ་བོད་ནང་གི་འགྲོ་བ་མིའི་ཐོབ་ཐང་གི་གནས་བབས་ཇི་ཡིན་བརྒྱུད་བསྒྲགས་གནང་ཐུབ་ཡོད་པ་ཙམ་མིན་པར་སྔ་ལོའི་ཇི་ནི་ཝའི་ལྷན་ཚོགས་ཐེངས་ ༡༡ ཐོག་ལྷན་ཚོགས་འདིའི་ ༢༠༡༩ ལོའི་འཛམ་གླིང་ནང་འགྲོ་བ་མིའི་ཐོབ་ཐང་སྲུང་སྐྱོབ་ཐད་ཕྱགས་ལས་གནང་མཁན་ལ་ཕུལ་བའི་སྙིང་སྟོབས་ཞེས་པའི་བྱ་དགའ་དེ་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ལ་འབུལ་བཞེས་གནང་ཐུབ་པ་བྱུང་ཡོད་པ་རེད།

རྒྱ་ནག་གཞུང་གིས་གནོན་ཤུགས་འོག་ཕྱིའི་རྒྱལ་ཁབ་ཁག་ནས་བོད་མི་དང་ཡུ་གུར་བ་ཕྱིར་རྒྱ་ནག་ལ་རྩིས་སྤྲོད་བྱས་པ་རྣམས་དུས་ཚོད་ངེས་མེད་བར་དུ་གར་སོང་ཆ་མེད་དུ་གྱུར་སྲིད་པའི་ཉེན་ཁ་ཡོད་པ་གསུངས་འདུག ཉེ་ཆར་འཇར་མ་ནི་ཕྱི་སྲིད་ལས་ཁུངས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་སྙན་ཐོ་ཕྱོགས་བསྒྲིགས་ཞུས་པའི་གསང་ཡིག་ཞིག་ཡུལ་དེའི་གསར་ཁང་ཁག་གཅིག་ཏུ་ཕྱིར་འགྱར་བྱུང་ཡོད་སྟབས་ཁ་སང་ཡུལ་དེའི་གསར་ཁང་ཆེ་གྲས་ Deutsche Welle ཞེས་པའི་དྲྭ་གནས་ཐོག་གནས་ཚུལ་སྤེལ་བར་ཕྱི་ལོ་ ༢༠༡༦ ལོ་ནས་རྒྱ་ནག་གཞུང་གིས་འཆར་གཞི་ལྡན་པའི་ཐོག་ཡུལ་དེའི་གྲངས་ཉུང་མི་རིགས་ལ་དྲག་གནོན་དང་མི་རིགས་དབྱེ་འབྱེད་སོགས་ཀྱི་སྲིད་བྱུས་འདྲ་མིན་ལག་བསྟར་བྱེད་ཤུགས་ཆེ་རུ་བཏང་ཡོད་པར་བརྟེན་ཉེ་བའི་ལོ་ཤས་ནང་རྒྱ་ནག་སྤྱི་དང་ལྷག་པར་དུ་ཤིན་ཅང་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཆེས་ཇེ་ཞན་ཇེ་སྡུག་ཏུ་ཕྱིན་ཡོད་པ་མངོན་གསལ་གསུངས་འདུག སྙན་ཐོ་ནང་རྒྱ་ནག་གཞུང་གིས་ཤིན་ཅང་ཁུལ་དུ་ས་གནས་ཡུ་གུར་བ་ས་ཡ་བཅུ་ལྷག་བཀག་བསྐྱིལ་ཁང་དུ་བཀག་ཉར་བྱེད་བཞིན་པ་ཚོར་ལག་ཤེས་སྦྱོང་བསྡར་སོགས་སྤྲོད་མུས་ཡིན་སྐོར་འགྲེལ་བརྗོད་བྱེད་བཞིན་ཡོད་ཀྱང་། ཡུ་གུར་བ་ཚོར་རྒྱ་ནག་གི་ལྟ་སྤྱོད་དང་མཐུན་པའི་ཆབ་སྲིད་ཀྱི་སློབ་གསོ་སྤྲོད་པ་དང་། ངལ་རྩོལ་ཅན་གྱི་ལས་ཀ་བྱེད་འཇུག་པ། དེ་བཞིན་མང་དག་ཅིག་ལ་ཚུལ་མིན་གྱི་བྱ་སྤྱོད་སྤེལ་བའི་ཁྲོད་འདས་གྲོངས་སུ་གྱུར་བའི་གནས་སྟངས་ཡང་འབྱུང་བཞིན་པ་ཐེར་འདོན་གནང་འདུག་པ་མ་ཟད། རྒྱ་ནག་གཞུང་ནས་ཕྱིའི་རྒྱལ་ཁབ་ཁག་ཏུ་ཡོད་པའི་ཡུ་གུར་བ་ཚོར་གསང་བའི་ལྟ་སྲུང་བྱེད་དེ་ཤིན་ཅང་ནང་ཡོད་པའི་རང་ཉིད་ཀྱི་ཡུ་གུར་སྤུན་མཆེད་ཚོ་དང་འབྲེལ་བ་རིགས་བྱས་ཚེ་ཡུ་གུར་བ་དེ་དག་ལ་འདྲི་རྩད་ནན་པོ་བྱེད་ཀྱི་ཡོད་པ་ཆེད་བཀོད་གནང་འདུག ལྷག་དོན་རྒྱ་ནག་གཞུང་གི་ཉེ་བའི་ལོ་ཤས་ནང་ Egypt དང་ Kazakhstan Malaysia Pakistan དེ་བཞིན་ Thailand སོགས་ཀྱི་གཞུང་ལ་ས་གནས་སུ་ཡོད་པའི་ཡུ་གུར་བ་རྣམས་ཕྱིར་རྒྱ་ནག་ལ་རྩིས་སྤྲོད་དགོས་པའི་གནོན་ཤུགས་རིགས་སྤྲོད་བཞིན་ཡོད་པ་མངོན་གསལ་ཡིན་ཀྱང་ད་བར་རྒྱ་ནག་ལ་ཕྱིར་ལོག་བྱས་པའི་མིའི་གྲངས་འབོར་གསལ་པོ་ཤེས་རྟོགས་ཐུབ་ཀྱི་མེད་སྟབས། ཕྱིའི་རྒྱལ་ཁབ་ཁག་ནས་རྒྱ་ནག་ལ་རྩིས་སྤྲོད་བྱས་པའི་ཡུ་གུར་བ་དང་བོད་མི་རྣམས་དུས་ཚོད་ངེས་མེད་བར་དུ་གར་སོང་ཆ་མེད་དུ་གྱུར་ཉེན་ཡོད་པ་གསུངས་འདུག སྙན་ཐོ་དེ་དང་འབྲེལ་གསར་འགྱུར་སྤེལ་མཁན་ Deutsche Welle གསར་ཁང་ནས་འཇར་མ་ནི་གཞུང་ནས་རྒྱ་གཞུང་གིས་ཡུ་གུར་དང་བོད་མིའི་འགྲོ་བ་མིའི་ཐོབ་ཐང་རྡོག་རོག་གཏོང་བཞིན་པ་ཤེས་བཞིན་ཡོད་ཀྱང་། གནད་དོན་དེ་དག་ཐོག་རྒྱ་ནག་ལ་འདྲི་རྩད་དང་སྐྱོན་བརྗོད་མ་གནང་བ་དེ་ནི་འཇར་མ་ནི་ཡི་ཚོང་ལས་སྡེ་ཚན་ཆེ་གྲས་ Siemens དང་ BASF དེ་བཞིན་ Volkswagen སོགས་ཤིན་ཅང་ནང་ཚོང་ལས་གཉེར་བཞིན་པ་དེའི་རྐྱེན་གྱིས་རེད་དམ་ཞེས་དོགས་གཞི་ཆེད་འདོན་གནང་ཡོད། གཞི་རྩའི་རྒྱ་ནག་གཞུང་ནས་བོད་དང་ཡུ་གུར་གཙོས་པའི་གྲངས་ཉུང་མི་རིགས་ཐོག་ལག་བསྟར་བྱེད་བཞིན་པའི་སྲིད་བྱུས་ལ་ཨ་རི་གཙོས་པའི་རྒྱ་སྤྱིའི་གཞུང་ཁག་དང་། རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་དབུས་གཞུང་འབྲེལ་མ་ཡིན་པའི་ཚོགས་པ་ཁག་ནས་སྐྱོན་བརྗོད་ཤུགས་ཆེ་གནང་བཞིན་ཡོད་ཀྱང་། རྒྱ་ནག་གཞུང་ནས་བོད་དང་ཤིན་ཅང་སོགས་ནི་རྒྱ་ནག་རྒྱལ་ནང་གི་གནད་དོན་ཞིག་ཡིན་སྟབས་ཕྱིའི་རྒྱལ་ཁབ་དང་ཚོགས་པ་ཁག་ནས་དེར་ཐེ་བྱུས་བྱེད་དབང་མེད་སྐོར་འགྲེལ་བརྗོད་གནང་མུས་ཡིན་པ་རེད།