རྒྱལ་སྤྱི།

དེ་རིང་སྔ་དྲོ་ཆུ་ཚོད་ ༡༠ ཐོག་རྒྱ་གར་གྱི་སྲིད་བློ་སྐུ་ཞབས་མོ་དཱི་མཆོག་གིས་ཏོག་དབྱིབས་རིམས་ནད་དང་འབྲེལ་བའི་རྒྱལ་ཡོངས་གསུང་བཤད་ཐེངས་གསུམ་པ་དེ་གནང་སྟེ་རྒྱ་གར་གྱི་མི་སེར་ཡོངས་ནས་འདས་པའི་ཉིན་གྲངས་ ༢༡ རིང་ཐེམ་སྤངས་ཀྱི་བཀའ་རྒྱར་བརྩི་སྲུང་གང་ལེགས་ཞུས་པའི་དབང་གིས་ད་ཆ་རྒྱ་གར་ནང་དུ་རྒྱ་ཁབ་གཞན་ལྟར་རིམས་ནད་ཁྱབ་གདལ་ཆེས་ཆེར་འགྲོ་བའི་ཛ་དྲག་གི་ངལ་བ་དེ་འདྲ་འཕྲད་མེད་པར་ཡི་རངས་བསྔགས་བརྗོད་གནང་བ་དང་སྦྲགས། གཉན་རིམས་ཀྱི་གནས་སྟངས་དེ་དུས་ད་ལྟའང་རྒྱལ་སྤྱིའི་ཁྱོན་ཡོངས་སུ་ཚོད་དཔག་དཀའ་བའི་ཆེས་ཉེན་ཚབས་ཆེ་བའི་ཛ་དྲག་གི་རང་བཞིན་ཞིག་ཏུ་གྱུར་ཡོད་སྟབས། མུ་མཐུད་སྔོན་འགོག་གནང་ཕྱིར་རྒྱ་གར་རྒྱལ་ཡོངས་སུ་དེ་རིང་ནས་དབུ་འཛུགས་ཀྱིས་ཕྱི་ཟླ་ ༥ ཚེས་ ༣ བར་ཁྱོན་ཉིན་གྲངས་ ༡༩ རིང་ཐེམ་སྤངས་ཀྱི་དུས་བཀག་འོག་གནས་དགོས་པའི་བཀའ་རྒྱ་ཡོངས་གྲགས་གནང་སོང་། སྲིད་བློན་མཆོག་གིས་ཐེངས་འདིའི་ཐེམ་སྤངས་ཀྱི་བཀའ་རྒྱ་ཕར་འགྱངས་གནང་རྒྱུ་འདི་ནི་མངའ་སྡེ་ཁག་གི་སྤྱི་ཁྱབ་བློན་ཆེན་དང་ལྷག་པར་དུ་འཕྲོད་བསྟེན་ཐོག་ཕྱག་ལས་གནང་མཁན་གྱི་སྨན་པ་དང་ཆེད་ལས་མཁས་པ་སོགས་དང་ལྷན་གོ་བསྡུར་རིམ་པ་གནང་ནས་ཐུགས་ཐག་བཅད་རྒྱུ་ཡིན་པར་འགྲེལ་བརྗོད་གནང་བ་དང་ཆབས་ཅིག ཐེམ་སྤངས་ཀྱི་དུས་ཡུན་རིང་ལ་མི་མང་ནས་དགོས་ངེས་ཅན་གྱི་སྨན་དང་བཟའ་ཆས་ཐོག་སེམས་འཚབ་གནང་མི་དགོས་པ་མ་ཟད་འཕྲོད་བསྟེན་གྱི་ཆ་ནས་ད་བར་རྒྱ་གར་རྒྱལ་ཡོངས་སུ་ཏོག་དབྱིབས་རིམས་ནད་དང་འབྲེལ་བའི་བརྟག་དཔྱད་གནང་ས་བརྟག་དཔྱད་ཁང་ ༢༠༠༠ ལྷག་དང་ཛ་དྲག་གི་ནད་པ་བཞུགས་ས་ཉལ་ཁྲི་འབུམ་གཅིག་ལྷག དེ་བཞིན་ཏོག་དབྱིབས་རིམས་ནད་ལ་དམིགས་པའི་སྨན་ཁང་ ༤༠༠ ལྷག་གྲ་སྒྲིག་གནང་ཟིན་སྐོར་གསུངས་ཡོད། ལྷག་པར་དུ་སྲིད་བློན་མོ་དཱི་མཆོག་གིས་ཐེངས་འདིའི་རྒྱལ་ཡོངས་གསུང་བཤད་བརྒྱུད་རིམས་ནད་འདི་འགོག་སྲུང་ཐུབ་ཐབས་སུ་མི་སེར་ཡོངས་ནས་ཐེམ་སྤེངས་ཀྱི་བཀའ་རྒྱ་ལ་བརྩི་སྲུང་ནན་པོ་ཞུ་དགོས་པ་དང་ཐེམ་སྤངས་ཀྱི་དུས་སྐབས་སུ་ནང་མི་རྒན་གྲས་ཚོར་ལྟ་རྟོག་གང་ལེགས་གནང་དགོས་པ། བཟོ་གྲྭ་དང་ཚོགས་པ་ཁག་གིས་ལས་བྱེད་ཕྱིར་འབུད་གཏང་རྒྱུ་མེད་པ། དགོས་ངེས་ཅན་ཚོར་གང་ནུས་ཀྱིས་རོགས་རམ་གནང་དགོས་པ་སོགས་འབོད་སྐུལ་གྱི་དོན་ཚན་བདུན་ཅན་ཞིག་ཡོངས་གྲགས་གནང་སོང་བ་མ་ཟད། རིམ་བཞིན་ཛ་དྲག་གི་གནས་སྟངས་ལ་གཞིགས་ཏེ་ཟླ་བ་འདིའི་ཕྱི་ཚེས་ ༢༠ ནས་མངའ་སྡེའི་གྲོང་ཁྱེར་ཆེ་ཁག་ཅིག་ལ་གུ་ཡངས་གནང་རྒྱུའི་དགོངས་གཞི་ཡོད་པ་གསུངས་ཡོད། གཞི་རྩའི་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་ཁྲོད་རྒྱལ་སྤྱིའི་མི་སེར་སྟོང་ཕྲག་མང་པོའི་ཚེ་སྲོག་ཤོར་བཞིན་ཡོད་པ་ལྟར་རྒྱ་གར་ལ་ཆ་མཚོན་ན་ད་བར་རིམས་ནད་ཕོག་མཁན་ཆིག་ཁྲི་ལྷག་དང་འདས་གྲོངས་སུ་གྱུར་བ་ ༣༣༩ ཆགས་ཀྱི་འདུག

དེ་རིང་ The Guardian ཞེས་པའི་གསར་ཁང་གིས་གནས་ཚུལ་སྤེལ་བ་ལྟར་ན་རྒྱ་ནག་གིས་ཏོག་དབྱིབས་ནད་དུག་དང་འབྲེལ་བའི་ཚན་རིག་གི་གྲུབ་དོན་ཕྱི་ལ་མ་བསྒྲགས་སྔོན་དུ་ངེས་པར་དུ་སྲིད་གཞུང་གིས་ཞིབ་བཤེར་བྱེད་རྒྱུར་འབུལ་དགོས་པའི་བཀའ་རྒྱ་གསར་བ་ཞིག་ཕྱིར་བསྒྲགས་བྱས་ཡོད་པ་ཡོངས་གྲགས་གནང་འདུགགསར་ཁང་གིས་ཉེ་བའི་ཆར་རྒྱ་ནག་ནང་གི་ཧྥོ་ཊན་གཙུག་ལག་སློབ་གཉེར་ཁང་དང་ཝུ་ཧན་ས་རྒྱུས་ཚན་རིག་ལྟེ་གནས་ཁང་གཉིས་ཀྱིས་ཏོག་དབྱིབས་རིམས་ནད་ཀྱི་འབྱུང་ཁུངས་དང་འབྲེལ་བའི་ཚན་རིག་ཞིབ་འཇུག་གི་གྲུབ་དོན་ཞིག་དྲྭ་ངོས་སུ་སྤེལ་མ་ཐག་རྒྱ་ནག་སྲིད་གཞུང་གིས་རིམས་ནད་ཀྱི་འབྱུང་ཁུངས་དང་འབྲེལ་བའི་གྲུབ་དོན་ཡོད་ཚད་ཐོག་མར་སྲིད་གཞུང་ལ་ཞིབ་བཤེར་བྱེད་ཆེད་དུ་འབུལ་དགོས་པའི་བཀའ་རྒྱ་གསར་བ་ཞིག་བཏང་ཡོད་པ་ཡོངས་གྲགས་གནང་བ་དང་ལྷན་དུ་ལྟེ་གནས་ཁང་དེ་གཉིས་ཀྱིས་ཕྱིར་བཏོན་པའི་རིམས་ནད་ཀྱི་འབྱུང་ཁུངས་དང་འབྲེལ་བའི་གྲུབ་དོན་དེ་གཉིས་འཕྲལ་དུ་ནག་གསུབ་བཅུག་ཡོད་པ་འཁོད་འདུག དབྱིན་ཡུལ་དུ་རྟེན་གཞི་བྱས་པའི་རྒྱ་ནག་གི་ཞིབ་འཇུག་ལྟེ་གནས་ཁང་ SOAS ཞེས་པའི་འགན་འཛིན་དང་དགེ་རྒན་ཆེན་མོ་སྐུ་ཞབས་ Steve Tsang ལགས་ཀྱིས་གསར་ལམ་ཁག་ལ་འགྲེལ་བརྗོད་བྱས་པར་ད་ཆ་རྒྱ་ནག་གིས་མི་མང་གི་འཕྲོད་བསྟེན་དང་རྒྱལ་ཁབ་ཀྱི་དཔལ་འབྱོར་ཉམས་ཉེས་ལས་ལྷག་པའི་དོ་སྣང་བྱེད་ས་གཅིག་ནི་ཏོག་དབྱིབས་རིམས་ནད་དེ་ཐོག་མར་ཇི་ལྟར་ཁྱབ་བརྡལ་དུ་ཕྱིན་པའི་འབྱུང་ཁུངས་ཐད་ཀྱི་གཏམ་བརྗོད་དེ་གཙུགས་སུ་འཛིན་གྱི་ཡོད་པར་ཡོངས་གྲགས་གནང་ཡོད་པ་ལྟར།  གསར་ཁང་གིས་རིམས་ནད་ཀྱི་འབྱུང་ཁུངས་དང་འབྲེལ་ནས་རྒྱ་ནག་གིས་གནས་ཚུལ་རྫུན་སྒྲིག་བྱེད་བཞིན་པར་སེམས་འཁྲལ་ཆེན་པོ་བྱེད་མཁན་མང་པོ་ཡོད་པ་འཁོད་འདུག དེ་བཞིན་ཨོ་གླིང་གི་ Monash གཙུག་ལག་སློབ་གཉེར་ཁང་དུ་རྒྱ་ནག་གི་སྐོར་ལ་ཞིབ་འཇུག་བྱེད་བཞིན་པའི་སྐུ་ཞབས་  Kevin Carrico ལགས་ཀྱིས་ ༢༠༠༢ ལོའི་ Sars རིམས་ནད་ཀྱི་རྗེས་ནས་རྒྱ་ནག་གིས་ཐེངས་འདིའི་ཏོག་དབྱིབས་ཀྱི་རིམས་ནད་དེ་དངོས་སུ་གཙང་བཟོ་བྱེད་དགོས་པ་ཞིག་ཆགས་ཡོད་ཀྱང་། ད་ཆ་རྒྱ་ནག་གིས་རིམས་ནད་ཀྱི་འབྱུང་ཁུངས་ཐོག་དངོས་ཡོད་ཀྱི་གནས་ཚུལ་ལ་ཁས་ལེན་བྱེད་ཀྱི་མེད་པར་ཡོངས་གྲགས་གནང་འདུག གཞན་ཡང་གསར་ཁང་གིས་རྒྱ་ནག་གིས་དང་ཐོག་ཏོག་དབྱིབས་ནད་རིམས་ཁྱབ་བརྡལ་གྱི་གནས་ཚུལ་ལ་གསང་རྒྱ་བྱས་པ་མ་ཟད་རིམས་ནད་དང་འབྲེལ་ནས་མི་མང་ལ་གཞེན་སྐུལ་གནང་མཁན་གྱི་སྨན་པ་རྣམས་ལ་སྲིད་གཞུང་གི་བཀའ་རྒྱའི་འོག་ཉེས་ཆད་བཅད་ཡོད་པ་ཡོངས་གྲགས་ཀྱིས་ཨ་རིའི་རིམས་ནད་སྟངས་འཛིན་དང་སྔོན་འགོག་སྡེ་ཚན་གྱི་རིམས་ནད་ཆེད་མཁས་པ་སྐུ་ཞབས་ Robert Redfield ལགས་སུ་ཡང་རྒྱ་ནག་གིས་ཁ་པར་བརྒྱུད་ནས་རིམས་ནད་དང་འབྲེལ་བའི་གནས་ཚུལ་ཐད་ནས་ཉེན་བརྡ་བཏང་ཡོད་ལུགས་ངོ་སྤྲོད་དང་སྦྲགས། ཨ་རིས་དང་ཐོག་ནས་རིམས་ནད་ཆེད་མཁས་བ་རྒྱ་ནག་ཏུ་བཏང་ནས་རིམས་དེར་ཞིབ་འཇུག་བྱེད་རྒྱུའི་སྐུལ་མ་བཏང་ཡོད་ནའང་། རྒྱ་ནག་གིས་ཞུ་སྐུལ་དེར་ངེས་ལེན་མ་བྱས་སྟབས་ག་ལེར་རིམས་ནད་དེ་ཨེ་ཤ་ཡ་སྤྱི་དང་གླིང་ཕྲན་གཞན་དུ་ཡང་ཁྱབ་གདལ་བྱུང་ཡོད་ལུགས་འགྲེལ་བརྗོད་ཀྱིས་རྒྱ་ནག་སྲིད་གཞུང་གིས་དང་པོ་ནས་རིམས་ནད་དང་འབྲེལ་བའི་གནས་ཚུལ་གསང་རྒྱ་བྱས་ཡོད་པར་སྐྱོན་བརྗོད་གནང་འདུག གཞི་རྩའི་རྒྱ་ནག་གི་ཚན་རིག་དང་འཕྲུལ་ལས་བློན་ཆེན་ལས་ཁུངས་ཀྱིས་ཐོག་མར་ཟླ་འདིའི་ཚེས་ ༣ ཉིན་ནས་བཟུང་ཏོག་དབྱིབས་རིམས་ནད་ཀྱི་འབྱུང་ཁུངས་དང་འབྲེལ་བའི་ཚན་རིག་གི་གྲུབ་དོན་ཡོད་ཚན་ངེས་པར་དུ་སྲིད་གཞུང་ལ་ཞིབ་བཤེར་བྱེད་ཆེད་འབུལ་དགོས་པའི་ཡོངས་ཁྱབ་ཀྱི་གསལ་བསྒྲགས་བཏང་ཟིན་པ་ལྟར།  ད་ཆ་རྒྱ་ནག་ནང་དུ་ཏོག་དབྱིབས་རིམས་ནད་འབྱུང་ཁུངས་འཚོལ་བྱེད་ཀྱི་གནད་དོན་དེ་ནི་སྲིད་གཞུང་གིས་བཀག་རྒྱ་བྱེད་བཞིན་པའི་གསང་བའི་གནད་དོན་ཞིག་ཏུ་གྱུར་ཡོད་པར་བརྟེན་ཕྱི་ལོག་གི་སྨན་པ་དང་ཞིབ་འཇུག་པ་མང་པོས་རྒྱ་ནག་གིས་རིམས་ནད་ཀྱི་འབྱུང་ཁུངས་དངོས་ཀྱི་གནད་དོན་དེར་གསང་རྒྱ་དམ་པོ་བྱེད་བཞིན་པ་མངོན་གསལ་གནང་མུས་རེད་འདུག

ཡོ་རོབ་མཐུན་ཚོགས་ཀྱིས་རྒྱ་ནག་གཞུང་གི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་པའི་༸སྐུའི་ཡང་སྲིད་ལ་གུས་བརྩི་ཞུ་དགོས་པ་དང་༸སྐུའི་ཡང་སྲིད་དེ་ཡང་བོད་བརྒྱུད་ནང་བསྟན་གྱི་ལམ་སྲོལ་གཞི་བཞག་ཐོག་ངོས་འཛིན་ཞུ་དགོས་ཞེས་ནན་བརྗོད་གནང་འདུགཡོ་རོབ་གྲོས་ཚོགས་འཐུས་མི་ཁག་ཅིག་གིས་ཉེ་སྔོན་ཡོ་རོབ་གྲོས་ཚོགས་བརྒྱུད་ཡུ་རོབ་སྤྱི་མཐུན་ཚོགས་པའི་ཚོགས་གཞོན་དང་ཕྱི་འབྲེལ་གཙོ་འཛིན་དང་ཡུ་རོབ་ལྷན་ཚོགས་ཀྱི་ཚོགས་གཞོན་སྐུ་ཞབས་ Joesp Borrell མཆོག་ལ་ཡིག་ཐོག་ནས་དྲི་བ་ཞིག་ཕུལ་འདུག་པ་དང་དེའི་ནང་གཙོ་བོ་ཡོ་རོབ་གྲོས་ཚོགས་འཐུས་མི་ཁག་ནས་ཉེ་ཆར་རྒྱ་ནག་གཞུང་གིས་ལོ་ངོ་སྟོང་ཕྲག་ལྷག་གི་ལོ་རྒྱུས་ལྡན་པའི་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་ཞུ་རྒྱུའི་ལམ་སྲོལ་དེར་རྡོག་རོལ་བཏང་བ་མ་ཟད། ལྷག་དོན་༸གོང་ས་ཏཱ་ལའི་བླ་མའི་མ་འོངས་པར་༸སྐུའི་ཡང་སྲིད་ངོས་འཛིན་ཞུ་ཕྱོགས་ཐད་ལའང་ཐེ་བྱུས་བྱ་རྒྱུ་ཡིན་པ་གསལ་པོ་ཡིན་པ་སོགས་ལུང་འདྲེན་གྱིས་ཡུ་རོབ་སྤྱི་མཐུན་ཚོགས་པའི་ངོས་ནས་༸གོང་ས་མཆོག་གི་མ་འོངས་པའི་ཡང་སྲིད་གནད་དོན་ཐོག་ལངས་ཕྱོགས་གང་འདྲ་ཞིག་འཛིན་བཞིན་ཡོད་ཅེས་འདྲི་རྩད་ཞུས་ཡོད་པ་རེད། ཉེ་ཆར་ཕྱི་ཟླ་ ༤ ཚེས་ ༣  ཉིན་ཡུ་རོབ་ལྷན་ཚོགས་ཀྱི་ཚོགས་གཞོན་སྐུ་ཞབས་ Joesp Borrell མཆོག་གིས་ཉེ་སྔོན་གྲོས་ཚོགས་འཐུས་མི་རྣམ་པའི་དྲི་བར་ཡིག་ཐོག་ནས་ལན་འདེབས་གནང་བར་ཁོང་གིས་ཡོ་རོབ་འཐུན་ཚོགས་ཀྱིས་དུས་དང་རྣམ་པ་ཀུན་ཏུ་རྒྱ་ནག་གཞུང་ལ་གྲངས་ཉུང་མི་རིགས་ཁག་དང་ལྷག་དོན་བོད་དང་ཡུ་གུར་མི་རིགས་ཀྱི་ཆོས་དད་རང་དབང་དང་འགྲོ་བ་མིའི་ཐོབ་ཐང་སོགས་ལ་ཐུགས་འཚབ་གནང་གི་ཡོད་པ་མ་ཟད་གྲངས་ཉུང་མི་རིགས་ཁག་དང་བོད་དང་ཡུ་གུར་མི་རིགས་ཀྱི་ཆོས་དད་རང་དབང་དང་འགྲོ་བ་མིའི་ཐོབ་ཐང་སོགས་ལ་བརྩི་བཀུར་ཞུ་དགོས་པའི་སྐུལ་འདེད་གནང་བཞིན་ཡོད་པ་དང་ཆབས་ཅིག ཡོ་རོབ་མཐུན་ཚོགས་ནས་དེ་ལྟ་བུའི་ལངས་ཕྱོགས་གཞི་བཞག་ཐོག་ད་བར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་རྒྱལ་ཚོགས་ཀྱི་སྤྱི་ཁྱབ་ལྷན་ཚོགས། དེ་མིན་རྒྱ་ནག་གཞུང་གི་འབྲེལ་ཡོད་འགོ་ཁྲིད་དང་འབྲེལ་མོལ་བཅས་ཁག་སོ་སོར་ལའང་ཡོངས་གྲགས་ཐོག་གླེང་སློང་གནང་བཞིན་ཡོད་ཅེས་གསུངས་འདུགསྐུ་ཞབས་ Joesp Borrell མཆོག་གིས་ད་དུང་ཡོ་རོབ་མཐུན་ཚོགས་ཀྱི་ངོས་ནས་༸གོང་ས་མཆོག་གི་ཡང་སྲིད་གནད་དོན་ཐོག་སྔ་ལོའི་ཡོ་རོབ་མཐུན་ཚོགས་དང་རྒྱ་ནག་དབར་གྱི་འགྲོ་བ་མིའི་ཐོབ་ཐང་འབྲེལ་མོལ་སྒྲོམ་གཞི་འོག་ཡོ་རོབ་མཐུན་ཚོགས་ཀྱིས་རྒྱ་ནག་གཞུང་ལ་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་པའི་ཡང་སྲིད་གནད་དོན་སྐོར་གླེང་སློང་བྱས་ཡོད་པ་དང་མ་འོངས་པ་ཡང་མུ་མཐུད་ནས་དེ་ལྟར་གླེང་སློང་གནང་རྒྱུ་ཡིན་པ་མ་ཟད་རྒྱ་ནག་གཞུང་གི་ངོས་ནས་མ་འོངས་པའི་༸སྐུའི་ཡང་སྲིད་ལ་གུས་བརྩི་ཞུ་དགོས་པ་དང་ཡང་སྲིད་དེ་ཡང་བོད་བརྒྱུད་ནང་བསྟན་གྱི་ལམ་སྲོལ་གཞི་བཞག་ངོས་འཛིན་ཞུ་དགོས་ཞེས་ནན་བརྗོད་གནང་འདུག སྤྱིར་ཐེངས་འདིའི་ཡུ་རོབ་ལྷན་ཚོགས་སུ་བོད་ནང་གི་ཆོས་དད་རང་དབང་དང་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་གནད་དོན་སྐོར་ལ་འདྲི་རྩད་གནང་བ་དེ་གཙོ་བོ་ཡོ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཡུ་རོབ་གྲོས་ཚོགས་ཀྱི་གྲོས་ཚོགས་འཐུས་མི་ Petras Auštrevičius མཆོག་དང་། Aušra Maldeikienė མཆོག Hannes Heide མཆོག དེ་བཞིན་ Francisco Guerreiro མཆོག Petra De Sutter མཆོག་བཅས་ནས་གནད་དོན་དེ་འབྲེལ་སྙན་སེང་ཞུས་ཡོད་པ་རེད། གཞི་རྩའི་ཉེ་བའི་ལོ་ཤས་ནང་དུ་རྒྱ་ནག་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་པའི་༸སྐུའི་ཡང་སྲིད་ངོས་འཛིན་ཞུ་ཕྱོགས་ཐད་ཐེ་བྱུས་བྱ་རྒྱུ་རྒྱལ་སྤྱིའི་ཐོག་ཡོངས་གྲགས་བྱས་པ་ནས་བཟུང་ཉེ་ཆར་ཨ་རི་དང་ནི་ཐར་ལན་ཌི་དང་། དེ་བཞཱིན་བྷེལ་འཇམ་བཅས་ནས་༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་གནད་དོན་དང་འབྲེལ་བའི་ནང་བླ་སྤྲུལ་ཡང་སྲིད་གནད་དོན་དེ་ནི་བོད་མིའི་གཞི་རྩའི་ཆོས་དད་རང་དབང་དང་འབྲེལ་བ་ཡོད་སྟབས་བོད་མི་ཁོ་ནར་དེ་འབྲེལ་ཐོག་ཇི་ལྟར་གནང་རྒྱུའི་རང་དབང་ཡོད་པ་ལས་རྒྱ་ནག་གཞུང་ལ་དེ་ལྟར་མེད་ཅེས་བརྗོད་ཡོད་པ་རེད།

རྒྱ་ནག་གྲོང་ཁྱེར་ཝུ་ཧན་ནས་ཐོག་མར་མཆེད་པའི་ཏོག་དབྱིབས་རིམས་ནད་དེ་ད་ཆ་འཛམ་གླིང་གི་རྒྱལ་ཁབ་ཉིས་བརྒྱ་ལྷག་ནང་ཁྱབ་གདལ་འགྲོ་བཞིན་པར་བརྟེན་རིམས་ནད་དེར་གདོང་ལེན་དང་བཅོས་ཐབས་སོགས་ཀྱི་ཆེད་རྒྱལ་ཁབ་སོ་སོ་ནས་དམིགས་བསལ་མ་དངུལ་མཁོ་སྒྲུབ་གནང་གི་ཡོད་པ་རེད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་ཀྱི་ཆོས་བརྒྱུད་ཆེན་པོ་ས་དགེ་བཀའ་རྙིང་གཙོས་གཡུང་དྲུང་བོན་སོགས་རིས་མེད་ཀྱི་བླ་སྤྲུལ་ཁག་དང་བོད་པའི་ཚོགས་སྒེར་ཁག་གིས་རྒྱ་གར་དབུས་གཞུང་དང་མངའ་སྡེར་ཏོག་དབྱིབས་རིམས་ནད་ལ་གདོང་ལེན་སླད་དངུལ་དངོས་ཀྱི་ཞལ་འདེབས་མང་དག་ཅིག་གནང་བཞིན་ཡོད་པ་དང་དུས་ད་ལྟའང་དེ་ལྟར་ཞལ་འདེབས་ཕུལ་མཁན་ཇེ་མང་དུ་འགྲོ་བཞིན་འདུགརྒྱ་གར་ལྷོ་ཕྱོགས་སུ་རྟེན་གཞི་བྱས་པའི་༸སྐྱབས་རྗེ་པད་ནོར་རིན་པོ་ཆེ་མཆོག་གི་དགེ་རྩ་ཚོགས་པས་ཀ་ན་ཊ་ཀའི་མངའ་སྡེའི་བློན་ཆེན་གྱི་མཚན་ཐོག་ཏུ་ཕྱག་བྲིས་ཕུལ་བའི་ནང་ད་ཆ་ཏོག་དབྱིབས་རིམས་ནད་རྐྱེན་པས་མི་མང་དག་ཅིག་ནད་དེས་མནར་བཞིན་པ་དང་དེ་བཞིན་དུ་མ་ཞིག་འདས་གྲོངས་སུ་གྱུར་ཡོད་པས་དེར་ཐུགས་ཕམ་ཡོད་པ་གསུངས་པ་དང་སྒོས་རིམས་ནད་དེ་འགོག་ཐབས་སླད་རྒྱ་གར་གྱི་སྲིད་བློན་སྐུ་ཞབས་མོ་དཱི་མཆོག་གི་དབུ་ཁྲིད་འོག་དབུས་དང་མངའ་སྡེ་གཞུང་། འཕྲོད་བསྟེན་གྱི་འབྲེལ་ཡོད་ལས་བྱེད་སོགས་ནས་ཉིན་མཚན་བལྟོས་མེད་ཕྱག་ལས་གནང་བཞིན་པ་མ་ཟད་ལྷག་པར་ཀ་ན་ཊ་ཀ་མངའ་སྡེས་ས་གནས་ཀྱི་ཡུལ་མི་རྣམས་རིམས་ནད་དེ་ལས་སྐྱོབ་སླད་ལས་དོན་རྒྱ་གང་ཆེ་གནང་པར་རྒྱབ་སྐྱོར་མཚོན་ཕྱིར་མངའ་སྡེ་བློན་ཆེན་གྱི་ངལ་སེལ་ཐེབས་རྩར་ཧིན་སྒོར་འབུམ་བཅུ་ཞལ་འདེབས་ཕུལ་བ་དང་ནད་ཡམས་དེ་མགྱོགས་མྱུར་ཞི་བར་སྨོན་འདུན་གནང་འདུགདེ་བཞིན་རྒྱ་གར་བྱང་ཕྱོགས་སྒང་ཏོག་ཏུ་རྟེན་གཞི་བྱས་པའི་མཚུར་ཕུ་བླ་བྲང་གིས་ཏོག་དབྱིབས་ནད་ལ་གདོང་ལེན་སླད་མངའ་སྡེ་བློན་ཆེན་གྱི་ངལ་སེལ་ཐེབས་རྩར་ཧིན་སྒོར་འབུམ་གསུམ་ཞལ་འདེབས་ཕུལ་འདུག དེ་དང་ཕྱོགས་མཚུངས་ཁ་སྔོན་ཚེས་ ༨ ཉིན་རྒྱ་གར་བྱང་ཕྱོགས་ལྡེ་ར་ལྡུན་གྲོང་ཁྱེར་ནང་རྟེན་གཞི་བྱས་པའི་འབྲི་གུང་བཀའ་བརྒྱུད་གཙུག་ལག་སློབ་གཉེར་ཁང་གིས་ཁུལ་དེའི་མངའ་སྡེ་གཞུང་གི་ཕྱག་ལས་གནང་ཁག་ལ་བསྔགས་བརྗོད་དང་སྦྲགས། མངའ་སྡེ་བློན་ཆེན་གྱི་ངལ་སེལ་ཐེབས་རྩར་ཧིན་སྒོར་འབུམ་ལྔ་ཞལ་འདེབས་གནང་ཡོད་པ་དང་གཙུག་ལག་སློབ་གཉེར་ཁང་གི་དགེ་ལས་སློབ་མ་སོགས་ཀྱི་སར་ནས་དབུལ་ཕོངས་ཉམ་ཐག་ཚོར་ཟས་སྦྱིན་སླད་ཞལ་འདེབས་ཧིན་སྒོར་འབུམ་གཉིས་ལྷག་བསྡུ་རུབ་གནང་འདུགརྒྱ་གར་ལྷོ་ཕྱོགས་སུ་རྟེན་གཞི་བྱས་པའི་དཔལ་ལྡན་འབྲས་སྤུངས་བློ་གསལ་གླིང་གྲྭ་ཚང་གིས་ཁ་སང་ཚེས་ ༩ ཉིན་ནད་ཡམས་འགོག་བཅོས་ཀྱི་ལས་གཞིའི་ཆ་ཤས་སུ་རྒྱ་གར་དབུས་གཞུང་ལ་ཧིན་སྒོར་འབུམ་བདུན་དང་ཁྲི་ལྔ་དང་མངའ་སྡེ་གཞུང་ལ་ཧིན་སྒོར་འབུམ་གསུམ་དང་ཁྲི་ལྔ། དེ་བཞིན་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་སུ་འབུམ་གཉིས་དང་ཁྲི་ལྔ། མོན་གྷོ་འདོད་རྒུ་གླིང་གི་བོད་མིའི་ས་གནས་སུ་ཧིན་སྒོར་འབུམ་གཅིག་བཅས་ཞལ་འདེབས་གནང་འདུག བློ་གསལ་གླིང་གྲྭ་ཚང་གིས་མངའ་སྡེ་གཞན་ནས་ཡོང་བའི་རྒྱ་གར་ལས་མི་དང་ས་གནས་བོད་མི་གཙོས་པའི་རྒྱ་གར་བ་དཔལ་འབྱོར་ཞན་པའི་ཁྱིམ་ཚང་ཁག་ལ་བཟའ་ཆས་སོགས་ཀྱི་རོགས་སྐྱོར་གནང་མུས་རེད་འདུགཁ་སང་ཕྱི་ཚེས་ ༩ ཉིན་རྒྱ་གར་བྱང་ཕྱོགས་ཧི་མཱ་ཅལ་མངའ་ཁོངས་སྦིར་བོད་ཚོགས་ནས་ཀྱང་མངའ་སྡེ་ནས་རིམས་ནད་དེར་གདོང་ལེན་གནང་ཕྱོགས་ལ་རྒྱབ་སྐྱོར་དང་སྦྲགས་ཏེ་མངའ་སྡེ་བློན་ཆེན་གྱི་ངལ་སེལ་ཐེབས་རྩར་ཧིན་སྒོར་འབུམ་གཅིག་དང་།  དེ་བཞིནཀཱངྒ་རཱ་རྫོང་དཔོན་གྱི་ངལ་སེལ་ཐེབས་རྩར་ཁྲི་ལྔ་ཞལ་འདེབས་གནང་འདུགགཞི་རྩའི་ཉེ་ལམ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་མི་རྣམས་ནས་དང་བླངས་ཐོག་རང་རང་སོ་སོའི་མངའ་སྡེ་དང་དེ་བཞིན་སྲིད་བློན་མཆོག་གི་མཚན་ཐོག་ཏུ་ཡོད་པའི་ངལ་སེལ་ཐེབས་རྩར་ཞལ་འདེབས་རྒྱ་གང་ཆེ་གནང་དགོས་པའི་གཞེན་བསྐུལ་གནང་ཡོད་པ་དང་འདས་པའི་ཉིན་ཤས་ནས་བོད་པའི་བླ་སྤྲུལ་ཁག་དང་དགོན་སྡེ་གྲྭ་ཚང་། གཞིས་ཆགས་སོ་སོ་ནས་མངའ་སྡེ་དང་དབུས་གཞུང་གཉིས་སུ་རིམས་ནད་དེར་གདོང་ལེན་དང་གཞུང་གི་ལས་དོན་ལ་རྒྱབ་སྐྱོར་མཚོན་ཕྱིར་ཞལ་འདེབས་དང་དབུལ་ཕོངས་ཉམ་ཐག་ཚོར་ཟས་སྦྱིན་སོགས་རྣམ་དཀར་དགེ་བའི་ཕྱག་ལས་གནང་མུས་ཡིན་པ་རེད།རྩ་བའི་ཏོག་དབྱིབས་རིམས་ནད་རྐྱེན་པས་ད་བར་འཛམ་གླིང་གི་མི་གྲངས་ས་ཡ་གཅིག་ལྷག་ལ་ནད་དེ་ཕོག་ཡོད་པ་དང་ཁྲི་དགུ་ལྷག་ཙམ་འདས་གྲོངས་སུ་གྱུར་བ། འབུམ་གསུམ་ལྷག་དྲག་སྐྱེད་བྱུང་ཡོད་པ་རེད། ལྷག་དོན་རྒྱ་གར་ནང་རིམས་ནད་དེ་ཕོག་མཁན་གྱི་གྲངས་འབོར་ཉིན་རེ་བཞིན་ཇེ་འཕར་འགྲོ་གི་ཡོད་པ་དང་ད་བར་གྱི་གྲངས་ཐོར་གཞིགས་ན་རྒྱ་གར་ནང་མི་དྲུག་སྟོང་ལྷག་ལ་རིམས་ནད་དེ་ཕོག་ཡོད་པ་དང་ཉིས་བརྒྱ་ལྷག་འདས་གྲོངས་གྱུར་ཡོད་པ་རེད། དེ་བཞིན་མང་ཚོགས་ལྔ་བརྒྱ་ལྷག་ཙམ་དྲག་སྐྱེད་དུ་བྱུང་ཡོད་པ་རེད།

ཁ་ཉིན་ཚེས་ ༦ ཉིན་ཨ་རིའི་གྲོས་ཚོགས་གོང་མའི་སྤྱི་མཐུན་ཚོགས་པའི་གྲོས་ཚོགས་འཐུས་མི་བདུན་གྱིས་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ Antonio Guterres མཆོག་གི་མཚན་ཐོག་ཏུ་ཕྱག་ཡིག་ཅིག་ཕུལ་ཏེ་རྒྱ་ནག་མཉམ་འཐུས་ཚབ་པ་ Jiang Duan རྒྱལ་ཚོགས་ཀྱི་ལས་དོན་ཚོགས་ཆུང་དུ་བསྐོ་གཞག་བྱས་པར་སྐྱོན་བརྗོད་ནན་པོ་གནང་འདུགཁོང་ཚོའི་ཕྱག་བྲིས་དེའི་ནང་རྒྱ་ནག་ནི་རང་རྒྱལ་གྱི་ཕྱི་ནང་གཉིས་སུ་འགྲོ་བ་མིའི་ཐོབ་ཐང་གི་གནས་བབས་ཆེས་ཞན་ཤོས་ཀྱི་རྒྱལ་ཁབ་ཅིག་ཡིན་པར་བརྟེན་ཐེངས་འདིར་རྒྱ་ནག་མཉམ་འབྲེལ་རྒྱལ་ཚོགས་ཀྱི་ཤུགས་རྐྱེན་ཆེ་བའི་ལས་དོན་ཚོགས་ཆུང་དུ་བསྐོ་བཞག་བྱས་པར་ངོས་ལེན་རྩ་བ་ནས་མེད་པ་མ་ཟད་རྒྱལ་ཚོགས་ཀྱིས་རྒྱ་ནག་དེ་ལས་དོན་ཚོགས་ཆུང་ནས་ཕྱིར་ཕུད་གནང་དགོས་པའི་དགོས་འདུན་ཆེད་བཏོན་གནང་འདུགདེ་བཞིན་ཞུ་སྙན་དེའི་ནང་ཐེངས་འདིར་རྒྱ་ནག་གི་སྐུ་ཚབ་འགྲོ་བ་མིའི་ཐོབ་ཐང་གི་ལས་དོན་ཚོགས་ཆུང་དུ་བསྐོ་གཞག་བྱས་པ་དེས་སྤྱི་ཡོངས་ཀྱི་འགྲོ་བ་མིའི་ཐོབ་ཐང་དུ་འབྲེལ་ནས་རང་དབང་གི་རྟོག་ཞིབ་པ་ ༡༧ ལྷག་འདེམས་སྒྲུག་གནང་གི་ཡོད་ལུགས་ལུང་འདྲེན་གྱིས་ས་མིག་དེ་དག་གི་ཁྲོད་རྒྱ་ནག་གིས་དུས་རྒྱུན་ནས་ལག་བསྟར་བྱེད་བཞིན་པའི་སྨྲ་བརྗོད་རང་དབང་ལ་དམ་དྲག་དང་གང་བྱུང་དུ་འཛིན་བཟུང་། གར་སོང་ཆ་མེད་དུ་གྱུར་བ་སོགས་ཀྱི་གནད་དོན་ལ་རྟོག་ཞིབ་གནང་མཁན་མི་སྣ་མང་པོར་དམ་དྲག་ཤུགས་ཆེ་བྱས་པར་བརྟེན་རྒྱལ་ཚོགས་ཀྱིས་རྒྱ་ནག་གི་འཐུས་པ་པ་ལས་དོན་ཚོགས་ཆུང་དུ་བསྐོ་གཞག་བྱས་པར་བློ་ཕམ་ཆེན་པོ་ཡོད་པ་འཁོད་འདུགདེ་བཞིན་གྲོས་ཚོགས་འཐུས་མི་རྣམས་ཀྱིས་རྒྱ་ནག་གིས་འདི་ལོའི་རྒྱ་ནག་གི་གྲོང་ཁྱེར་ཝུ་ཧྲན་ནས་ཁྱབ་བརྡལ་བྱུང་བའི་ཉེན་ཚབས་ཀྱི་ཐད་ནས་འཛམ་གླིང་ཧྲིལ་པོར་མགོ་སྐོར་བཏང་ཡོད་པར་མ་ཟད་ནད་ཡམས་ཁྱབ་བརྡལ་གྱི་སྐབས་སུ་སྤྱི་ཡོངས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ་གཉན་རིམས་ཁྱབ་བརྡལ་ལ་གསལ་འདེབས་བྱེད་མཁན་གྱི་སྨན་པ་རྣམས་ལ་ཉེས་ཆད་བཅད་པ་དང་རིམས་ནད་ཀྱི་གནས་ཚུལ་ཡོད་ཚད་ལ་དྲྭ་ཐོག་ནས་བཀག་སྡོམ་བྱས་ཏེ་ད་ཆ་འཛམ་གླིང་ཡོངས་ལ་ནད་ཡམས་ཁྱབ་བརྡལ་འགྲོ་བཞིན་པ་སོགས་མངོན་གསལ་གནང་བ་དང་ཆབས་ཅིག་ཏུ་རྒྱ་ནག་གི་འཐུས་ཚབ་པ་མཉམ་འབྲེལ་རྒྱལ་ཚོགས་ཀྱི་ལས་དོན་ཚོགས་ཆུང་དུ་བསྐོ་གཞག་གནང་རྒྱུ་རྩིས་མེད་གཏོང་དགོས་པའི་འབོད་སྐུལ་གནང་འདུག  གནས་ཚུལ་དེ་དང་འབྲེལ་ཏེ་རྒྱ་ནག་གིས་ཡུ་གུར་མི་མང་ས་ཡ་གཅིག་ལྷག་བཀག་བསྐྱིལ་གྱིས་གྲངས་ཉུང་མི་རིགས་གཙང་བཟོ་བྱེད་རྒྱུའི་སྲིད་བྱུས་ལག་བསྟར་བྱེད་ཀྱི་ཡོད་པ་གསལ་པོ་ཆགས་ཡོད་པ་དང་ཁ་ཆེ་མི་རིགས་ནི་རྒྱ་ནག་གི་ནང་མི་སེར་རིམ་པ་གཉིས་ལ་ལྟ་བུའི་ངོ་བོར་གནས་ཡོད་ལུགས་ལུང་འདྲེན་གནང་སྟེ་དེ་ལྟ་བུའི་བྱེད་བབ་དེ་ནི་འགྲོ་བ་མིའི་རིགས་སྤྱིར་གནོད་འཚབ་ཆེ་བའི་ནག་ཉེས་ཤིག་ཡིན་པ་གསུངས་བ་མ་ཟད་རྒྱ་ནག་དེ་རྒྱལ་ཚོགས་ཀྱི་ལས་དོན་ཚོགས་ཆུང་དུ་བསྐོ་གཞག་བྱེད་ཐབས་མེད་པ་ཡོངས་གྲགས་གནང་འདུགམཉམ་འབྲེལ་རྒྱལ་ཚོགས་ནི་འགྲོ་བ་མིའི་རིགས་ཀྱི་དཀའ་རྙོག་བསྐྱར་བཟློས་མི་ཡོང་བ་དང་མིའི་རིགས་ཀྱི་བདེ་རྩར་དམིགས་ནས་ཆེད་འཛུགས་བྱས་པ་ཞིག་ཡིན་པ་གསལ་འདེབས་གནང་བ་དང་ལྷན་དུ་ང་ཚོས་ངེས་པར་དུ་མཉམ་འབྲེལ་རྒྱལ་ཚོགས་ཀྱི་དབུ་ཁྲིད་དང་ཚོགས་མིའི་རྒྱལ་ཁབ་ཁག་ནས་ལེགས་ཕྱོགས་ལ་རེ་བ་བྱས་ཏེ་ང་ཚོའི་ཐུན་མོང་གི་རིན་ཐང་དང་ཆེ་མཐོང་གཙུག་ཏུ་བཟུང་ཐོག་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་གྱི་རྒྱ་ནག་གི་འཐུས་ཚབ་པ་ལས་དོན་ཚོགས་ཆུང་ནས་ཕྱིར་ཕུད་གཏོང་དགོས་པའི་འབོད་སྐུལ་ནན་བརྗོད་གནང་འདུགགཞི་རྩའི་ཕྱི་ཟླ་ ༤ ཚེས་ ༡ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་དོན་ཚོང་ཆུང་གི་ནང་རྒྱ་ནག་ཨེ་ཤ་ཡའི་ཞི་བདེ་རྒྱ་མཚོའི་ཁུལ་གྱི་འཐུས་མིར་བསྐོས་ཡོད་པར་བརྟེན་ཨ་རིའི་གྲོས་ཚོགས་འཐུས་མི་དང་རྒྱལ་ཚོགས་གནད་དོན་ལྟ་ཞིབ་ཁང་སོགས་ནས་སྨྲ་བརྗོད་རང་དབང་དང་ཆོས་དད་རང་དབང་སོགས་རྡོག་རོལ་གཏོང་མཁན་ཆེས་སྡུག་ཤོས་ཀྱི་རྒྱ་ནག་གི་འཐུས་ཚབ་པ་རྒྱལ་ཚོགས་ཀྱི་ལས་དོན་ཚོགས་ཆུང་ནང་བསྐོ་གཞག་བྱུང་བར་སྐྱོན་བརྗོད་ཤུགས་ཆེ་གནང་ཡོད་པ་རེད། ལྷག་པར་དུ་བོད་མིའི་སྒྲིག་འཛུགས་དྲིལ་བསྒྲགས་དྲུང་ཆེ་ཚེ་དབང་རྒྱལ་པོ་ཨརྱ་ལགས་ཀྱིས་རྒྱ་ནག་དམར་པོའི་སྲིད་གཞུང་ནི་འཛམ་གླིང་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་ཐོག་དམ་དྲག་ཤུགས་ཆེ་ཤོས་བྱེད་མཁན་དང་བསམ་ཚུལ་བརྗེ་ལེན་དང་སྨྲ་བརྗོད་རང་དབང་བརྡལ་བཤིག་གཏོང་མཁན་གྱི་རྒྱལ་ཁབ་གཙོ་བོ་ཞིག་ཡིན་པ་ཡོངས་གྲགས་ཡིན་བཞིན་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ལམ་སྟོན་ཚོགས་ཆུང་གི་ཚོགས་མིའི་ཁོངས་སུ་བསྐོ་གཞག་བྱས་པ་དེ་ནི་བློ་ཕམ་གྱི་གནས་ཤིག་ཡིན་པ་དང་། གནང་བབས་དེས་རང་དབང་དང་དྲང་བདེན་ལ་དགའ་བའི་རྒྱལ་སྤྱིའི་སྤྱི་ཚོགས་ནང་བརྡ་ལན་ལོག་པ་ཞིག་བཏང་བ་མ་ཟད་རྒྱལ་སྤྱིའི་ཐོག་འགྲོ་བ་མིའི་ཐོབ་ཐང་གི་གནས་སྟངས་ཐོག་འགྲེལ་བརྗོད་བྱེད་སྟངས་ལའང་ཤུགས་རྐྱེན་ངན་པ་ཐེབས་རྒྱུ་ཡིན་པ་སོགས་འགྲེལ་བརྗོད་གནང་བ་དང་སྦྲགས། ད་ཆ་དཀའ་སྡུག་མྱོང་བཞིན་པའི་མི་རིགས་དེ་དག་གི་ངོས་ནས་རེ་བ་བཅོལ་ཡུལ་རྒྱལ་སྤྱིའི་སྒྲིག་འཛུགས་ནང་ཉེས་ཅན་པ་རང་ཉིད་སྒྲིག་འཛུགས་སྲུང་མིར་བསྐོས་པ་ནི་སྤྱང་ཀི་ལུག་རྫིར་བསྐོས་པའི་དཔེ་ལྟར་རེད་ཅེས་གསུངས་འདུག

ཉེ་ཆར་རྒྱ་ནག་གཞུང་གིས་སྤྱི་ཚོགས་ཁྲོད་ Pornography འམ་འཆལ་སྤྱོད་དང་ཁྲིམས་འགལ་གྱི་གནད་དོན་བརྒྱུད་སྤེལ་འགོག་ཐབས་ཀྱི་ཁྲིམས་སྒྲིག་གསར་པ་ངོ་སྤྲོད་བྱེད་བཞིན་འོག་བོད་ཆེན་པོ་དང་ཚད་མཐོའི་རང་སྐྱོང་གི་གནས་བབས། དེ་བཞིན་དབུ་མའི་ལམ་སོགས་བོད་དོན་དང་འབྲེལ་བའི་གནད་དོན་གླེང་སློང་གནང་བ་རྣམས་ཁྲིམས་འགལ་དུ་ངོས་འཛིན་གྱིས་གླེང་སློང་དང་དཔེ་དེབ་དཔར་སྐྲུན། པར་དང་བརྙན་སོགས་ཀྱི་ཐོག་ནས་བརྒྱུད་སྤེལ་གནང་བ་འམ་རང་གི་ཁ་པར་ནང་སོགས་ལ་དེ་འབྲེལ་སྒྲིག་གཤོམ་གནང་བ་ཐམས་ཅད་ཁྲིམས་འགལ་ཡིན་པ་དང་། བྱ་སྤྱོད་དེ་དག་སྤེལ་མཁན་སྐོར་ཉེན་རྟོག་པར་གནས་ཚུལ་མཁོ་སྤྲོད་བྱེད་མཁན་རྣམས་ལ་དངུལ་འབོར་ཆེན་གྱི་བྱ་དགའ་སྤྲད་རྒྱུ་ཡིན་པའི་གསལ་བསྒྲགས་སྤེལ་འདུག ཁ་སང་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་གཞུང་གིས་སྔ་ལོའི་ཕྱི་ཟླ་ ༩ ཚེས་ ༡༢ ཉིན་རྒྱ་ནག་གཞུང་འབྲེལ་དྲྭ་རྒྱར་འཆལ་སྤྱོད་གཙོས་པའི་ཁྲིམས་འགལ་གྱི་གནད་དོན་རིགས་བརྒྱུད་སྤེལ་འགོག་ཐབས་ཀྱི་ཁྲིམས་སྒྲིག་གསར་པ་ཞིག་གཏན་འབེབས་བྱས་ཡོད་སྐོར་གནས་ཚུལ་སྤེལ་རྗེས་འདི་ལོའི་ཕྱི་ཟླ་ ༣ པའི་ནང་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བའི་ནང་ཁྲིམས་གཞི་དེ་ལག་བསྟར་བྱེད་རྒྱུའི་གསལ་བསྒྲགས་ནང་བོད་ལ་རང་སྐྱོང་གི་གནས་བབས་དང་དབུ་མའི་ལམ་སོགས་བོད་དོན་དང་འབྲེལ་བའི་གནད་དོན་རིགས། རྒྱ་ནག་གཞུང་གི་ངོས་ནས་བོད་ཐོག་འཛིན་་པའི་སྲིད་བྱུས་ལ་སྐྱོན་བརྗོད་བྱེད་མཁན་རྣམས་རྒྱལ་ཁབ་ཀྱི་ཆིག་སྒྲིལ་ལ་གནོད་འཚེ་བཟོ་མཁན་དང་གཞུང་ནས་གྲངས་ཉུང་མི་རིགས་ཀྱི་འཛིན་སྐྱོང་ལ་ཁ་གཏད་ལངས་པར་ངོས་འཛིན་རྒྱུ་ཡིན་པར་མ་ཟད་རྒྱ་ནག་གཞུང་དང་འགོ་ཁྲིད། རྒྱ་ནག་གི་སྤྱི་ཚོགས་རིང་ལུགས་ཀྱི་ཁྱད་ཆོས་བཅས་ལ་སྐྱོན་བརྗོད་བྱེད་མཁན་གཙོས་པའི་རྒྱ་གཞུང་གི་ལྟ་སྤྱོད་དང་མི་མཐུན་པའི་བྱ་སྤྱོད་སྤེལ་མཁན་དག་ལ་ཁྲིམས་འགལ་དུ་ངོས་འཛིན་རྒྱུ་དང་དེ་འབྲེལ་གནས་ཚུལ་མཁོ་སྤྲོད་བྱེད་མཁན་འབྱུང་ཚེ་དེ་དག་ལ་གསང་རྒྱའི་སྲུང་སྐྱོབ་བྱས་ནས་རྒྱ་སྒོར་ཆིག་སྟོང་ནས་འབུམ་གཅིག་བར་བྱ་དགའ་སྤྲད་རྒྱུ་ཡིན་པ་སོགས་འཁོད་འདུགརྒྱལ་སྤྱིའི་བོད་དོན་ལས་འགུལ་ཁང་གིས་ད་དུང་ཉེ་ཆར་ཕྱི་ཟླ་ ༣ ཚེས་ ༢༠ ཉིན་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པའི་དྲུང་ཆེ་ Wu Yingjie ཡིས་བོད་ནང་དཔལ་འབྱོར་དང་བརྟན་ལྷིང་གོང་འཕེལ་གཏང་ཆེད་ཏཱ་ལའི་ཁ་བྲལ་རུ་ཚོགས་ལ་ཁ་གཏད་གཅོག་རྒྱུའི་དབུས་གཞུང་གི་སྲིད་བྱུས་ལག་བསྟར་དོན་འཁྱོལ་བྱེད་དགོས་པ་དང་། མང་ཚོགས་ཀྱིས་དམར་ཤོག་གཞུང་དང་སྤྱི་ཚོགས་ལ་བརྩེ་སེམས་བཅངས་ནས་རྒྱལ་ཁབ་ཀྱི་ཆིག་སྒྲིལ་སྲུང་སྐྱོབ་བྱེད་དགོས་སྐོར་བཤད་པ་ལུང་འདྲེན་དང་སྦྲགས་ཏེ་རྒྱ་ནག་གཞུང་གི་ངོས་ནས་གཞུང་ལ་དགའ་ཞེན་ཡོད་མེད་ལ་གཞིགས་ནས་ལས་དོན་གང་གཉེར་བ་དེ་དག་ཁྲིམས་འགལ་ཡིན་མིན་ཐག་གཅོད་བཞིན་ཡོད་པ་ལྟར་བྱ་སྤྱོད་དེ་ནི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཡོངས་ཁྱབ་ཀྱི་ཁྲིམས་སྒྲིག་དང་སྒོས་ཁྲིམས་སྒྲིག་དེའི་དོན་ཚན་ ༡༩ དང་ཡོངས་སུ་འགལ་གྱི་ཡོད་པ་དང་། བོད་མི་མང་ཚོགས་དབར་ཡིད་ཆེས་མེད་པའི་གནས་སྟངས་སྐྲུན་བཞིན་ཡོད་པར་ཐེར་འདོན་དང་འབྲེལ། རྒྱ་ནག་གཞུང་གི་ངོས་ནས་ཁྲིམས་གཞི་གསར་པ་དེར་བཅོས་བསྒྱུར་བཏང་ནས་རྒྱལ་སྤྱིའི་ཁྲིམས་དང་མཐུན་པ་བཟོ་དགོས་པ་དང་། བོད་མི་རྣམས་ལ་རང་གི་ནང་མི་དང་གྲོགས་པོ། དེ་བཞིན་རང་གི་སྤྱི་ཚོགས་ལ་གནོད་པའི་ལས་དོན་གཉེར་བར་བྱ་དགའ་དེ་ལྟར་སྤྲད་རྒྱུ་མཚམས་འཇོག་དང་བོད་དོན་དང་འབྲེལ་བའི་གནད་དོན་གླེང་སློང་གནང་བར་ཁྲིམས་འགལ་དུ་ངོས་འཛིན་བྱེད་རྒྱུའི་སྲིད་བྱུས་དེའང་མཚམས་འཇོག་བྱེད་དགོས་པའི་ཞུ་སྐུལ་གནང་འདུག

མདང་དགོང་ཆོུད་ ༩ ཐོག་རྒྱ་གར་གྱི་སྲིད་བློན་མོ་དཱི་མཆོག་གི་བཀའ་རྒྱ་ལྟར་རྒྱ་གར་རྒྱལ་ཡོངས་སུ་རང་ཁྱིམ་གྱི་གློག་བསད་ནས་མི་མང་རང་ཁྱིམ་གྱི་འཁྱམས་རར་ཐོན་ཏེ་སྒྲོན་མེ་སྦར་བ་དང་ཁ་པར་གྱི་གློག་གཞུ་འགར་བ་སོགས་ཀྱི་རྒྱལ་ཡོངས་སུ་དུས་གཅིག་གི་བྱ་འགུལ་སྤེལ་ཏེ་ད་ལྟའི་བར་དུ་རིམས་ནད་ཕོག་པ་རྣམས་ལ་གདོང་སེམས་མཉམ་སྐྱེད་དང་གཞན་ཡང་རིམས་ནད་ཁྱབ་བརྡལ་ཁྲོད་མདུན་དུ་ཐོན་ནས་ཕྱག་ལས་རྒྱ་ཆེར་གནང་མཁན་གྱི་སྨན་པ་དང་སྨན་ཞབས་པ་རྣམས་ལ་རྒྱབ་སྐྱོར། དེ་བཞིན་འཛམ་གླིང་ཡོངས་གང་མགྱོགས་ཏོག་དབྱིབས་རིམས་ནད་ཀྱི་མུན་པ་ལས་གྲོལ་ནས་མི་མང་གི་འཚོ་བ་སྔར་བཞིན་ཞི་བདེ་བག་ཕེབས་ངང་གནས་རྒྱུའི་སྨོན་ལམ་བཏབས་ཏེ་སྐར་མ་དགུའི་རིང་རྒྱལ་ཡོངས་སུ་དུས་གཅིག་ལ་མུན་སེལ་གྱི་ལས་འགུལ་གཞི་རྒྱ་ཆེ་བ་ཞིག་སྤེལ་སོང་།གཞི་རྩའི་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་ནད་ཡམས་དེ་ད་ཆ་འཛམ་གླིང་གི་རྒྱལ་ཁབ་ཉིས་བརྒྱ་ལྷག་ལ་ཁྱབ་བརྡལ་དུ་སོང་ཡོད་པ་ལྟར། ད་ཆ་རྒྱལ་ཁབ་མང་པོ་ཞིག་གི་ནང་དུ་སྲིད་གཞུང་གིས་མང་ཚོགས་ཀྱི་འགྲོ་འདུག་ལ་བཀག་སྡོམ་གྱིས་རིམས་ནད་སྔོན་འགོག་ལ་ཤུགས་སྣོན་རྒྱག་བཞིན་པར་རྒྱ་གར་གྱི་ནང་དུ་ཡང་ཟླ་བ་སྔོན་མའི་ཕྱི་ཚེས་ ༢༤ མཚན་དགུང་ཕྱག་ཚོད་ ༡༢ ནས་བཟུང་ཉིན་གྲངས་ ༢༡ རིང་ལ་རྒྱལ་ཡོངས་སུ་མི་མང་རང་ཁྱིམ་དུ་བཀག་སྡོམ་བྱེད་རྒྱུའི་བཀའ་རྒྱ་བཏང་བ་ལྟར་ད་ལྟའི་ཆར་མི་མང་ཞོགས་པའི་རིང་ཉེར་མཁོའི་བཟའ་བཅའ་ཉོ་རུ་འགྲོ་ཆོག་པ་ཙམ་ལས་སྤྱི་ཡོངས་ཀྱི་བཀག་སྡོམ་གྱི་གནས་བབ་འོག་གནས་ཡོད་པ་རེད། དེ་རིང་རྒྱ་གར་གྱི་དུས་བབ་གསར་ཁང་གིས་རྒྱ་གར་གྱི་ནང་དུ་ཏོག་དབྱིབས་རིམས་ནད་ཕོག་པའི་གྲངས་ཐོ་ཕྱིར་འདོན་བྱས་པར་ད་ལྟའི་བར་དུ་རྒྱ་གར་གྱི་ནང་དུ་རིམས་ནད་ཕོག་པའི་ནད་པ་ ༤༠༠༠ ལྷག་བརྒལ་ཡོད་པ་དང་། དེ་དག་ལས་རྐྱེན་འདས་སུ་ཕྱིན་པའི་ནད་པའི་གྲངས་ཚད་ ༡༠༠ ལྷག་ཐོན་ཡོད་པར་འགྲེལ་བརྗོད་ཀྱིས་རྒྱ་གར་གྱི་ནང་རིམས་ནད་ཁྱབ་བརྡལ་ཆེས་ཆེ་སའི་ས་ཁུལ་ནི་རྒྱལ་ས་ལྡི་ལི་དང་ Maharastra མངའ་སྡེ།  དེ་ཞིན་ Tamil Nadu མངའ་སྡེ་གསུམ་ཆགས་ཡོད་པར་ཡོངས་གྲགས་གནང་འདུག ད་ལྟའི་ཆར་རྒྱ་གར་ནང་གི་བོད་མིའི་སྒྲིག་འཛུགས་ཀྱི་ལྟེ་གནས་དང་བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་གནས་བྱང་ཕྱོགས་ཧི་མྰ་ཅལ་མངའ་སྡེ་ནང་དུ་རིམས་ནད་ཁྱབ་བརྡལ་ནད་པ་ ༡༣ བྱུང་ཡོད་པ་ལས། ད་ལྟའི་ཆར་ཧི་མཱ་ཅལ་གྱི་ནང་ནད་པ་ ༦ ལ་སྨན་བཅོས་བྱེད་བཞིན་ཡོད་པ་དང་། དེའི་ཁོངས་ནས་མི་ ༣ ཞི་མ་ལ་ཁུལ་གྱི་ IGMC སྨན་ཁང་དང་མི་ ༣ དྷ་ས་ཉེ་འཁྲིས་ཀྱི་ Tanda སྨན་ཁང་དུ་སྨན་བཅོས་བྱེད་བཞིན་ཡོད། མི་ ༤ ཙམ་ཞིག་ལྡི་ལིའི་ Medanta སྨན་ཁང་དུ་སྨན་བཅོས་བྱེད་བཞིན་ཡོད་པ་རེད། ད་བར་ཧི་མཱ་ཅལ་མངའ་སྡེ་ནང་རིམས་དན་ཕོག་པའི་ནད་པ་གཅིག་ལས་རྐྱེན་འདས་སུ་སོང་མེད་པ་རེད། གཞན་ཡང་ཁ་སང་ཚེས་ ༥ ཉིན་ཀཱངྒ་རཱ་རྫོང་གི་ཉེན་རྟོག་རུ་ཁག་གི་གཙོ་འཛིན་གྱིས་མང་ཚོགས་ལ་གསར་འགོད་གསལ་བསྒྲགས་ཤིག་སྤེལ་ཏེ་ཕྱི་རྒྱལ་ཁག་ནས་ཕེབས་པའི་མི་ཚང་མས་ཚེས་ ༥ ཕྱི་དྲོ་བར་སོ་སོའི་གང་ནས་སླེབས་པའི་གནས་ཚུལ་ཡར་ཞུ་གསལ་པོ་བྱེད་དགོས་པ་དང་། དེ་ལྟར་བྱས་པ་ཡིན་ན་ཀཱངྒ་རཱ་རྫོང་གི་ལས་ཁུངས་ཀྱིས་ཁོང་རྣམས་ལམ་སང་ཟུར་འཇོག་གནང་རྒྱུ་ཡིན། གལ་ཏེ་དེ་ལྟར་མ་བྱས་པར་རིམས་ནད་ཡོད་པའི་གནས་ཚུལ་གསང་རྒྱ་བྱས་པ་ཤེས་རྟོགས་བྱུང་ཚེ་རྒྱ་གར་གྱི་ཁྲིམས་ལུགས་གཞིར་བཟུང་གིས་མི་གསོད་ཐབས་བྱེད་བཞིན་པའི་ནག་ཉེས་འགེལ་རྒྱུ་དང་། སོ་སོའི་ནང་ལ་ཕྱི་མི་ཡོད་པའི་གནས་ཚུལ་གསང་རྒྱ་བྱས་པའི་ཁྲོད་མི་དེ་ཤི་བ་སོགས་ཀྱི་གནས་ཚུལ་བྱུང་ཚེ་ཁྲིམས་སྒྲིག་ཨང་ ༣༠༢ གཞིར་བཟུང་མི་བསད་པའི་ནག་ཉེས་ཕོག་རྒྱུ་ཡིན་པའི་ཉེན་བརྡ་བཏང་འདུག གཞནང་ཡང་ཁོང་གིས་ད་ལྟའི་ཆར་མི་མང་དང་མཉམ་དུ་རྒྱང་ཐག་རིང་བོར་གནས་རྒྱུ་གལ་ཆེན་པོ་ཡིན་ནའང་ནད་པ་དང་དོགས་ཡོད་ཀྱི་ནད་པར་དབྱེ་འབྱེད་བྱེད་རྒྱུ་མེད་པར་རེ་སྐུལ་བྱས་པ་དང་སྦྲགས། ཨུ་ན་ཁུལ་དུ་མང་ཚོགས་ཀྱི་ལྟ་སྟངས་མི་འདྲ་བའི་ཁྲོད་རང་ཉིད་དོགས་ཡོད་ནད་པ་མིན་པ་གསལ་པོ་ཆགས་ནའང་མཐར་རང་སྲོག་བཅད་ཡོད་པའི་གནད་དོན་བྱུང་ཡོད་ལུགས་ངོ་སྤྲོད་ཀྱིས་མང་ཚོགས་ཀྱིས་ཕན་ཚུན་ལ་དབྱེ་འབྱེད་བྱེད་རྒྱུ་མེད་པའི་གཞེན་སྐུལ་གནང་འདུག ཁ་སང་རྒྱ་གར་གྱི་ Divya Himachal བརྙན་འཕྲིན་གསར་ཁང་གིས་གནས་ཚུལ་སྤེལ་བར་གཞིགས་ན། ཁ་སང་ཀཱངྒ་རཱ་ལམ་ཆེན་གྱི་འགག་སྒོ་ཞིག་ཏུ་བོད་མི་གཞོན་སྐྱེས་གཉིས་དང་རྒྱ་གར་བ་གཅིག་བཅས་ཁྱོན་མི་གསུམ་ཀཱངྒ་རཱ་ནང་དུ་འཛུལ་ཐབས་བྱེད་སྐབས་འཛིན་བཟུང་བྱས་ཡོད་པའི་གནས་ཚུལ་ཐོན་འདུག ཉེན་རྟོག་པས་འདྲི་རྩད་བྱས་སྐབས་ཁོང་རྣམས་ Bhuntar ཉེ་འཁྲིས་ KheerGanga ས་ཁུལ་ནས་གོམ་པ་རྒྱབ་ནས་སླེབས་པ་དང་དེའི་ཁོངས་སུ་ཡོད་པོའི་བོད་མི་བསྟན་འཛིན་བྱང་ཆུབ་ཞུ་བ་ཁོང་གིས་གསུངས་པར་གཞིགས་ན། ཁོང་བཞུགས་སྒར་དྷརྨ་སཱ་ལཱར་བཞུགས་མཁན་ཡིན་པ་དང་། ཁོང་གི་སྤུན་མཆེད་ཅིག་བོར་བརླག་བྱུང་བར་བརྟེན་དེ་སྔོན་ཟླ་མ་སྔོན་མའི་ ༡༩ ཉིན་དྷས་ནས་མེ་འཁོར་དུ་བསྡད་ནས་ཁོང་འཚོལ་དུ་ཕྱིན་པའི་ལམ་བར་དུ་གཞུང་འབྲེལ་གྱི་བཀག་རྒྱའི་གནས་སྟངས་ཆགས་པའི་རྐྱེན་གྱིས་ད་ཆ་གོམ་པ་རྒྱབ་ནས་ཕྱིར་ལོག་བྱེད་བཞིན་ཡོད་པར་བརྗོད་འདུག ཉེན་རྟོག་པ་རྣམས་ཀྱིས་གསུངས་པར་ད་ལྟའི་ཆར་ཁོང་རྣམས་མན་ཌི་གྲོང་ཁྱེར་ནང་ཟུར་འཇོག་བྱས་ནས་འཇོག་རྒྱུ་ཡིན་པར་གསུངས་འདུག

རེས་གཟའ་ལྷག་པའི་ཉིན་རྒྱ་ནག་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཤུགས་རྐྱེན་ཆེ་བའི་སློབ་སྟོན་རུ་ཁག་ཏུ་བསྐོ་གཞག་བྱས་ཡོད་པ་དང་འབྲེལ་ཏེ་ཐེངས་འདིའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ལ་བསྐོ་གཞག་བརྒྱུད་འཛམ་གླིང་གི་སྨྲ་བརྗོད་རང་དབང་དང་འཕྲོད་བསྟེན། གར་སོང་ཆ་མེད་དུ་གྱུར་བ། དོ་དམ་བཀག་བསྐྱིལ་སོགས་ཀྱི་གནད་དོན་ཐད་རྒྱལ་སྤྱིའི་འགྲོ་བ་མིའི་ཐོབ་ཐང་གི་རྟོག་ཞིབ་པ་འདེམས་སྒྲུག་གི་ལས་དོན་གཙོ་བོ་གཉེར་དགོས་སྟབས་རྒྱལ་སྤྱིའི་འགྲོ་བ་མིའི་ཐོབ་ཐང་དོན་གཉེར་བ་ཚོས་དེར་ངོ་རྒོལ་གནང་བཞིན་འདུགདེ་རིང་བརྒྱུད་ལམ་ཁག་གིས་ད་ལན་རྒྱ་ནག་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ཁོངས་སུ་བསྐོ་གཞག་བྱས་པ་བརྒྱུད་རྒྱ་ནག་ནས་ཉུང་མཐར་རྒྱལ་ཁབ་སོ་སོའི་སྨྲ་བརྗོད་དང་ཆོས་དད་རང་དབང་གཙོས་པའི་འགྲོ་བ་མིའི་གཞི་རྩའི་ཐོབ་ཐང་ཁག་གི་གནས་སྟངས་ཐད་རྟོག་ཞིབ་གནང་མཁན་གྱི་མི་སྣ་ ༡༧ ལྷག་འདེམས་སྒྲུག་བྱེད་རྒྱུའི་ཐོག་ཤུགས་རྐྱེན་སྤྲད་རྒྱུ་ཡིན་པར་བརྟེན་སུད་སི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་རྒྱལ་ཚོགས་ལྟ་ཞིབ་ཚོགས་པའི་འགྲོ་བ་མིའི་ཐོབ་ཐང་གི་ཚོགས་པའི་འགན་འཛིན་སྐུ་ཞབས་ Hillel Neuer ལགས་ཀྱིས་དེར་ངོ་རྒོལ་གནང་བ་དང་འབྲེལ། དྲག་གནོན་དང་མི་སྤྱོད་ལས་འདས་པའི་སྲིད་བྱུས་སྤེལ་མཁན་རྒྱ་ནག་ལྟ་བུ་འཛམ་གླིང་གི་འགྲོ་བ་མིའི་ཐོབ་ཐང་ཐད་རྟོག་ཞིབ་པ་འདེམས་སྒྲུག་བྱ་རྒྱུའི་དབང་ཚད་སྤྲད་པ་ནི་མེར་བསྲེག་གཏང་རྒྱུར་དགའ་བའི་སྨྱོན་སྤྱོད་བྱེད་མཁན་གྱི་མི་སྣ་གྲོང་སྡེའི་མེ་གསོད་རུ་ཁག་གི་གཙོ་འཛིན་བསྐོ་གཞག་བྱས་ཡོད་པ་དང་གཅིག་མཚུངས་ཡིན་པ་གསུངས་པ་མ་ཟད། ལྷག་པར་དུ་རྒྱལ་ཚོགས་ནས་ད་ལན་རྒྱ་ནག་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ལ་བསྐོ་གཞག་བྱས་པར་མོས་མཐུན་གནང་བ་ནི་ཁུངས་མེད་དང་ཚུལ་མིན་གྱི་བྱ་སྤྱོད་ཁོ་ན་ཡིན་པར་གསུངས་འདུག དེ་བཞིན་སྐུ་ཞབས་ Hillel Neuer ལགས་ཀྱིས་རྒྱ་ནག་ནས་འགྲོ་བ་མིའི་ཐོབ་ཐང་གི་ལས་འགུལ་བ་ Zhang Baocheng ལགས་དང་། Wang Binzhang ལགས་གཉིས་གཙོས་འགྲོ་བ་མིའི་ཐོབ་ཐང་གི་དོན་གཉེར་བ་མང་དག་ཅིག་ལ་དོ་དམ་བཀག་བསྐྱིལ་བྱས་ཡོད་པ་མ་ཟད་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་རིམས་ནད་ཐད་རྒྱ་རིགས་ཁག་གཅིག་གིས་རྒྱ་གཞུང་གི་དཔོན་རིགས་ཚོས་དེར་འགོག་ཐབས་བྱེད་ཀྱི་མེད་པ་སོགས་ཀྱི་གནད་དོན་དང་འབྲེལ་བའི་གཏམ་བཤད་གནང་མཁན་ཚོ་གར་སོང་ཆ་མེད་དུ་གྱུར་བའི་གནས་སྟངས་བཟོས་ཡོད་པ་དང་ལྷག་པར་དུ་ཡུ་གུར་ཁ་ཆེའི་མི་རིགས་དང་གཞན་གྲངས་ཉུང་མི་རིགས་དུ་གྱུར་བའི་མི་གྲངས་ས་ཡ་གཅིག་ལྷག་བཀག་བསྐྱིལ་ཁང་དུ་བཙན་དབང་གིས་བཅུག་ཡོད་སྟབས་རྒྱལ་ཚོགས་ནས་རྒྱ་ནག་དེ་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ཁོངས་སུ་བསྐོ་གཞག་གནང་བར་མོས་མཐུན་གནང་བ་དེ་ནི་རྒྱུ་མཚན་དང་མི་ལྡན་པ་ཞིག་ཡིན་པར་གསུངས་འདུགསྐུ་ཞབས་ Hillel ལགས་ཀྱིས་ད་དུང་རྒྱ་ནག་གིས་སྨྲ་བརྗོད་དང་བསམ་བརྗོད་རང་དབང་ཐད་རྒྱལ་ཚོགས་ཀྱི་དམིགས་བསལ་སྐུ་ཚབ་ཇི་ལྟར་འདེམས་སྒྲུག་བྱ་རྒྱུ་ཡིན་པ་དང་ད་ཆ་ཛ་དྲག་གི་དུས་ཚིགས་འདིར་ཁྱབ་གདལ་ཤུགས་ཆེ་འགྲོ་བཞིན་པའི་ཏོག་དབྱིབས་རིམས་ནད་ཐོག་རྒྱ་ནག་གི་སྨན་པ་གཙོས་གསར་འགོད་པ་དང་མི་སེར་ཚོས་དེ་འབྲེལ་བཀའ་མོལ་གནང་བར་དམ་དྲག་དང་ཁྲིམས་སྒྲིག་དམ་པོ་ལག་བསྟར་བྱེད་བཞིན་ཡོད་པས་རྒྱ་ནག་ནས་འཛམ་གླིང་གི་འཕྲོད་བསྟེན་སོགས་ཀྱི་ཐད་རྟོག་ཞིབ་པ་ཇི་ལྟར་འདེམས་སྒྲུག་བྱ་རྒྱུའི་ཡིན་པ་སོགས་ཀྱི་དྲི་བ་ཁག་གཅིག་གནང་ཡོད། སྤྱིར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ནང་རྒྱ་ནག་གཙོས་པའི་ Venezuela དང་པ་ཀིས་ཐན། Eritrea དེ་བཞིན་ Qatar བཅས་ཚོགས་མི་ལྔ་ཡོད་པ་དང་ད་ལན་རུ་ཁག་དེའི་ནང་རྒྱ་ནག་བསྐོ་གཞག་བྱས་པ་དེས་སློབ་སྟོན་རུ་ཁག་དེས་གནང་ཕྱོགས་ལ་ཉེན་ཚབས་ཆེན་པོ་འགྱུར་ངེས་ཡིན་པ་གསུངས་འདུག རྒྱལ་ཚོགས་ཀྱི་ལྟ་ཞིབ་ཚོགས་པས་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་ Antonio Guterres མཆོག་དང་འགྲོ་བ་མིའི་ཐོབ་ཐང་གི་གཙོ་འཛིན་ Michelle Bachelet མཆོག་རྣམ་གཉིས་ནས་རྒྱ་ནག་དེ་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ལ་བསྐོ་གཞག་བྱས་པར་ཡོངས་གྲགས་ཐོག་སྐྱོན་བརྗོད་གནང་དགོས་པར་མ་ཟད་རྒྱ་ནག་གཙོས་པའི་འཛམ་གླིང་ཁྲོད་འགྲོ་བ་མིའི་ཐོབ་ཐང་དང་འབྲེལ་དཀའ་སྡུག་མྱོང་བཞིན་པའི་གནོད་འཚེ་ཕོག་ཡུལ་གྱི་གང་ཟག་རྣམས་ལ་རྒྱབ་སྐྱོར་གནང་དགོས་པའི་འབོད་སྐུལ་ཞུས་འདུག ད་ལན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་རྒྱ་ནག་དེ་འགྲོ་བ་མིའི་ཐོབ་ཐང་ལྷན་ཚོགས་ཀྱི་སློབ་སྟོན་རུ་ཁག་ཁོངས་བསྐོ་གཞག་གིས་མོས་མཐུན་གནང་བ་དེ་ནི་ཁྲིམས་མཐུན་གི་རང་བཞིན་ལ་སྣང་ཆུང་བྱས་ཡོད་པར་སྐྱོན་བརྗོད་གནང་ཡོད། གཞི་རྩའི་རྒྱ་ནག་གིས་དཔལ་འབྱོར་སྟོབས་ཤུགས་སྒོ་ནས་འཛམ་གླིང་སྤྱི་ཡོངས་ཙམ་མ་ཟད་རྒྱལ་ཚོགས་ལའང་དེ་འབྲེལ་གྱི་ཤུགས་རྐྱེན་སྤྲོད་ཐབས་བྱེད་བཞིན་ཡོད་པ་ཡོངས་གྲགས་ཡིན་པ་རེད། ལྷག་དོན་རྒྱ་ནག་ནས་ཐོག་མར་ཏོག་དབྱིབས་རིམས་ནད་ཁྱབ་གདལ་འགྲོ་སྐབས་རྒྱལ་ཚོགས་ནས་དེར་ཛ་དྲག་གི་རང་བཞིན་ཞིག་ཏུ་ངོས་འཛིན་གནང་མེད་སྟབས་ད་ཆ་རིམས་ནད་དེ་གོ་ལའི་རྒྱལ་ཁབ་ ༡༩༠ ལྷག་ནང་ཁྱབ་གདལ་ཆེས་ཆེར་གྲོ་མུས་ཁྲོད་རྒྱལ་ཁབ་དང་ཚོགས་སྒེར་ཁག་གིས་རྒྱལ་ཚོགས་ལ་སྐྱོན་བརྗོད་ཤུགས་ཆེ་གནང་ཡོད་པ་རེད།

འཛམ་གླིང་གི་རྒྱལ་ཁབ་དང་ས་ཁུལ་ ༡༧༦ ཙམ་ནང་ཁྱོན་མི་འབུམ་བརྒྱད་ལྷག་ལ་རྒྱ་ནག་ནས་ཁྱབ་པའི་ Covid 19 འམ་ཏོག་དབྱིབས་རིམས་ནད་དེ་འགོས་ཡོད་པའི་ཁྲོད་ནས་ད་ཆ་གཉན་རིམས་དེ་ཁྱབ་གདལ་མང་ཤོས་བྱུང་ཡུལ་གྱི་རྒྱལ་ཁབ་ཨ་རི་དང་དེའི་ནང་ནས་ནིའུ་ཡོག་གྲོང་ཁྱེར་ཆགས་ཀྱི་ཡོད་པ་དང་གྲོང་ཁྱེར་དེར་མཚོན་ན་བོད་རིགས་སྨན་པའི་གྲངས་འབོར་གང་ཙམ་ཞིག་ཡོད་པ་རེད། ད་ལྟའི་ཆར་ནིའུ་ཡོག་འདི་རིམས་ནད་ཁྱབ་གདལ་བྱུང་སའི་ཆེས་ཛ་དྲག་རང་བཞིན་ཞིག་ཏུ་འགྱུར་བཞིན་ཡོད་ཀྱང་། ས་ཁུལ་དེའི་ནང་གནས་བཞུགས་བོད་རིགས་སྨན་པ་དང་སྨན་ཞབས། དེ་བཞིན་འཕྲོད་ལས་པ་སོགས་མུ་མཐུད་མདུན་ལ་འཐོན་ནས་ཕྱག་ལས་གནང་བཞིན་ཡོད་པ་ལྟར་མང་དག་ཅིག་ལ་གཉན་རིམས་དེ་ཕོག་ཡོད་པར་དོགས་གཞིའི་འོག་ཟུར་བཀག་གནང་བ་དང་ཁག་གཅིག་རིམས་ནད་ཕོག་རྐྱེན་སྤྱི་ཚོགས་ཁྲོད་ཀྱི་འཚོ་རྟེན་དང་ཉིན་རེའི་བྱ་གཞག་ལ་ཆེས་ངལ་བ་ཆེན་པོ་འཕྲད་མུས་རེད་འདུག དེའི་ཁོངས་ནིའུ་ཡོག་ཏུ་གཞུང་གི་སྨན་ཁང་ཆེ་གྲས་ Bellevue ནང་སྨན་ཞབས་ཕྱག་ལས་གནང་མཁན་བོད་རིགས་བསྟན་འཛིན་བག་གྲོ་ལགས་དང་འཆི་མེད་ཨ་འབུམ་ཚང་ལགས་གཉིས་ལ་ཏོག་དབྱིབས་རིམས་ནད་ཀྱི་ནད་རྟགས་འཐོན་པར་བརྟེན་ད་ཆ་ཟུར་བཀག་ཐོག་བཞུགས་མུས་ཡིན་པ་རེད། རིམས་ནད་དེ་འབྲེལ་ནིའུ་ཡོག་དང་ནིའུ་ཡོག་ཇར་སིའི་བོད་རིགས་སྨན་ཞབས་ཚོགས་པས་ཉིན་ཤས་གོང་ཁུལ་དེའི་ནང་གནས་བཞུགས་བོད་མི་སླད་ཛ་དྲག་ལམ་སྟོན་གྱི་འབྲེལ་གཏུག་ལས་རིམ་ཞིག་དབུ་འཛུགས་གནང་བ་མ་ཟད། Go Fund me ཞེས་པའི་དྲྭ་ཚིགས་གསར་བཟོ་བརྒྱུད་དེ་དཔལ་འབྱོར་བསྡུ་རུབ་གནང་སྟེ་ནིའུ་ཡོག་ནང་ཟུར་བཀག་གནང་བཞིན་པའི་བོད་རིགས་འཕྲོད་ལས་པ་དང་སྨན་ཁང་ཁག་ཏུ་ཕྱག་ལས་གནང་བཞིན་པ་རྣམས་ལ་འདང་ངེས་ཡོད་པའི་ Personal protection Equipment ཞེས་རིམས་ནད་སྔོན་འགོག་དང་སྲུང་སྐྱོབ་ཀྱི་ཁ་རས་དང་གདོང་ཁེབས་སོགས་མཁོ་ཆས་ཁག་གཅིག་མཁོ་སྒྲུབ་གནང་བཞིན་འདུག རླུང་འཕྲིན་ཁང་གིས་ཏོག་དབྱིབས་རིམས་ནད་ཀྱི་ནད་རྟགས་འཐོན་ནས་ཟུར་བཞུགས་གནང་བཞིན་པ་བོད་རིགས་སྨན་ཞབས་གཉིས་དང་ནིའུ་ཡོག་དང་ནིའུ་ཡོག་ཇར་སིའི་བོད་རིགས་སྨན་ཞབས་ཚོགས་པའི་ཚོགས་གཙོ་བཅས་ལ་བཅར་འདྲི་ཁག་གཅིག་ཞུས་ཡོད།