བོད་མིའི་སྒྲིག་འཛུགས།

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་བྱང་ཨ་རིའི་ནང་གི་མཛད་རིམ་ཁག་རེ་ཞིག་གྲུབ་རྗེས་ཡོ་རོབ་རྒྱལ་ཁབ་ Austria ནང་གཞུང་འབྲེལ་ཕྱོགས་ཕེབས་གནང་གྲུབ་རྗེས་ཟླ་བ་འདིའི་ཕྱི་ཚེསས་ ༡༨ ཉིན་ཨ་རིའི་རྒྱལ་ས་ཝ་ཤིང་ཊོན་ལ་འབྱོར་བ་དང་འབྲེལ་ཨ་རིའི་ཕྱི་སྲིད་ལས་ཁུངས་ཀྱི་ཆེས་མཐོའི་གནད་ཡོད་མི་སྣ་ཁག་གཅིག་དང་གྲོས་ཚོགས་ཀྱི་ལས་བྱེད་དང་མཇལ་འཕྲད་ཀྱི་སོགས་ཀྱི་མཛད་རིམ་ཁག་མུ་མཐུད་སྐྱོང་ཡོད་པ་རེད་འདུག དེའང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་ཕྱི་ཚེསས་ ༡༨ ཉིན་ Austria ནས་ཨ་རིའི་རྒྱལ་ས་ཝ་ཤིང་ཊོན་ལ་ཕེབས་ཐོན་གནང་ཡོད་པ་ལྟར། ཨ་རིའི་ཕྱི་སྲིད་ལས་ཁུངས་ཀྱི་ཆེས་མཐོའི་གནད་ཡོད་མི་སྣ་ཁག་གཅིག་དང་གྲོས་ཚོགས་ཀྱི་ལས་བྱེད་དང་མཇལ་འཕྲད་ཀྱིས་ད་ལྟའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་བོད་དོན་རྒྱབ་སྐྱོར་གྱི་བསྐྱར་ཞིབ་ཁྲིམས་འཆར་གསར་པའི་སྐོར་ལ་བཀའ་བསྡུར་ཤུགས་ཆེ་གནང་འདུག དེ་བཞིན་བྱང་ཨ་རིའི་སྐུ་ཚབ་དོན་ཁང་གིས་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ལས་བྱེད་དང་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་ཀྱི་ཕྱི་སྲིད་སློབ་སྟོན་པ་དང་དེ་བཞིན་ལྕམ་སྐུ་ Nancy Pelosi མཆོག་གི་སློབ་སྟོན་པ་བགྲེས་པ་བཅས་ལ་གྲོས་ཚོགས་འོག་མར་བོད་དོན་རྒྱབ་སྐྱོར་གྱི་བསྐྱར་ཞིབ་ཁྲིམས་འཆར་གསར་པར་ཚད་མཐོའི་མང་མོས་ཀྱི་རྒྱབ་སྐྱོར་ཤུགས་ཆེ་ཐོབ་པར་དགའ་སྟོན་ཞུ་ཕྱིར་དགུང་ཚིགས་ཤིག་གོ་སྒྲིག་གནང་བ་བརྒྱུད་ནས་སྲིད་སྐྱོང་བློ་བཟང་སེང་གེ་མཆོག་དང་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་རྣམ་གཉིས་ཀྱིས་བོད་དོན་གྱི་ཁྲིམས་འཆར་གསར་པར་རྒྱབ་སྐྱོར་ཆེས་ཆེར་གནང་བར་ཐུགས་རྗེ་ཆེ་ཞུས་འདུག གཞན་ཡང་སྲིད་སྐྱོང་མཆོག་གིས་ཨ་རིའི་ཕྱི་སྲིད་ལྷན་ཁང་གི་མང་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་གོང་འཕེལ་ལས་དོན་ཚན་པའི་དྲུང་ཆེ་ལས་རོགས་གཞོན་པ་གཙོ་བོ་སྐུ་ཞབས་ Scott Busby མཆོག་དང་མཇལ་འཕྲད་ཀྱིས་ད་ལྟའི་བོད་ནང་གི་མི་ཛ་དྲག་གནས་སྟངས་དང་བོད་དང་རྒྱ་ནག་གཉིས་ཀྱི་ས་བབ་ཆགས་ཚུལ་སོགས་ཀྱི་སྐོར་ལ་གླེང་སློང་གནང་འདུག་པར་མ་ཟད། སྲིད་སྐྱོང་མཆོག་ལ་ཨ་རིའི་ Virginia མངའ་སྡེ་ནང་རྟེན་གཞི་བྱས་པའི་ཝར་ཇི་ནི་ཡ་ཁྲིམས་ཀྱི་གཙུག་ལག་སློབ་ཁང་ནས་མགྲོན་འབོད་ཞུས་དོན་བཞིན་ཕྱི་ཚེས་ ༢༡ ཉིན་ཝིར་ཇི་ནི་ཡ་ཁྲིམས་ཀྱི་གཙུལ་གལ་སློབ་ཁང་དུ་གསུང་བཤད་གནང་གཏན་ཁེལ་ཡོད་པ་རེད། རྩ་བའི་སྲིད་སྐྱོང་བློ་བཟང་སེང་གེ་མཆོག་ཟླ་བ་འདིའི་ཕྱི་ཚེས་ ༧ ཉིན་རྒྱབ་ནས་བྱང་ཨ་མི་རི་ཀའི་ནང་གི་གཞུང་འབྲེལ་ཕྱོགས་ཕེབས་གནང་ཡོད་པ་ལྟར། ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་ཆེས་མཐོའི་སྐུ་ཚབ་ Samuel D. Brownback མཆོག་དང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག དེ་བཞིན་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ཚོགས་གཙོ་དང་ཨ་རིའི་རྒྱལ་ཡོངས་གྲོས་ཚོགས་འོག་མའི་འཐུས་མི་སྐུ་ཞབས་ Jim McGovern མཆོག་བཅས་སོ་སོར་མཇལ་འཕྲད་གནང་སྟེ་ཁོང་གིས་དེ་སྔ་ ༢༠༡༩ ལོར་བོད་དོན་རྒྱབ་སྐྱོར་གྱི་བསྐྱར་ཞིབ་ཁྲིམས་འཆར་གསར་པ་བཏོན་པར་ཐུགས་རྗེ་ཆེ་ཞུའི་མཛད་འཆར་ཁག་ཅིག་གྲུབ་རྗེས་ཕྱི་ཚེས་ ༡༥ ནས་ ༡༧ བར་ཉིན་གྲངས་གསུམ་རིང་ཡོ་རོབ་རྒྱལ་ཁབ་ Austria ལ་གཞུང་འབྲེལ་ཕྱོགས་ཕེབས་གནང་ཡོད་པ་དང་། ཨོ་སི་ཊེ་ཡའི་ Tyrol མངའ་སྡེའི་རྒྱལ་ས་ Innsbruck ནང་རྟེན་གཞི་བྱས་པའི་ University of Innsbruck’s Winter School ཞེས་དགུན་ཁའི་སློབ་དུས་དབུ་འབྱེད་མཛད་སྒོར་དབུ་མའི་ལམ་གྱི་སྲིད་བྱུས་དང་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་སྐོར་ལ་གསུང་བཤད་གནང་བ་དང་། དེ་བཞིན་རྒྱ་ཡིག་དང་བོད་ཡིག་གཉིས་ཀ་བཀོལ་སྤྱོད་ཆོག་པའི་སྲིད་བྱུས་རྣམས་ཇི་བཞིན་ལག་བསྟར་བྱེད་ཀྱི་མེད་པའི་ཁར་རྒྱ་ནག་གཞུང་གིས་བོད་ཀྱི་སྐད་ཡིག་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་ལགས་ལ་རྒྱལ་ཁབ་ཁ་བྲལ་གྱི་བསྙོན་དཀྲི་བཙན་འགེལ་གྱིས་བཙོན་འཇུག་ཁྲིམས་ཐག་བཅད་ཡོད་པར་མ་ཟད། མི་རིགས་ཤིག་གི་སྐད་ཡིག་གཏོར་བཤིག་བཏང་བ་ནི་མི་རིགས་ཤིག་གི་ངོ་བོ་གཏོར་བཤིག་བཏང་བ་རེད་ཅེས་སོགས་གསུང་བཤད་གནང་ཡོད་པ་རེད། དེ་དང་ཕྱོགས་མཚུངས་སུ་སྲིད་སྐྱོང་མཆོག་ནས་ཨོ་སི་ཀྲི་ཡ་ Grafenworth ས་གནས་རྫོང་དཔོན་སྐུ་ཞབས་ Alfred Riedl མཆོག་དང་མཇལ་མོལ་གནང་བ་མ་ཟད། ཨིན་སི་བྷི་རག་གཙུག་ལག་སློབ་ཁང་གི་སློབ་སྤྱི་སྐུ་ཞབས་ prof. Dr. H.C. Mult Tilmann Mark ལགས་ཀྱིས་གཙོས་སློབ་དཔོན་ཁག་གཅིག་དང་མཇལ་འཕྲད་གནང་ཡོད་པ་དང་། ད་ལྟའི་ཆར་སྲིད་སྐྱོང་མཆོག་ཨ་རི་ནང་གི་མཛད་རིམ་ཁག་མུ་མཐུད་སྐྱོང་བཞིན་ཡོད་པ་རེད།

ཕྱི་ལོ་ ༢༠༢༠ ཟླ་ ༢ ཚེས་ ༢༤ ཉིན་ནས་བོད་རྒྱལ་ལོ་ ༢༡༤༧ རབ་གནས་ལྕགས་བྱི་ལོའི་གནམ་ལོ་གསར་བཞད་ཀྱི་དགའ་སྟོན་སྲུང་བརྩི་ཞུ་གནང་གི་ཡོད་པ་ལྟར། ཁ་སང་ཨ་རིའི་ཕྱི་སྲིད་ལས་ཁུངས་ཀྱི་གོ་སྒྲིག་འོག་དེ་ལས་སུ་བོད་དོན་གསུང་བཤད་དང་བོད་ཀྱི་ཐུན་མིན་རྐང་བྲོ་གླུ་གཞས་གཟིགས་འབུལ་བརྒྱུད་ནས་སྔ་སྣུར་གྱིས་བོད་ཀྱི་ལོ་གསར་སྲུང་བརྩི་ཞུས་འདུག དེ་ཡང་ཁ་སང་རེས་གཟའ་མིག་དམར་ཉིན་རྒྱབ་ཏུ་ཨ་རིའི་ཕྱི་སྲིད་ལས་ཁུངས་ཀྱིས་གོ་སྒྲིག་ཞུས་པའི་བོད་ཀྱི་གནམ་ལོ་གསར་བཞད་ཀྱི་དུས་སྟོན་མཛད་སྒོའི་ཐོག་ཨེ་ཤ་ཡ་དང་ཞི་བདེ་ལས་དོན་ལས་ཁུངས་ཀྱི་དྲུང་ཆེ་ལས་རོགས་སྐུ་ཞབས་ David Stilwell ལགས་དང་ཨ་རིའི་ཕྱི་སྲིད་ལས་ཁུངས་ཀྱི་དྲུང་ཆེ་སྐུ་ཞབས་ Mike Pompeo ལགས། ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས། རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་གཙོས་གནད་ཡོད་མི་སྣ་ཁག་ཅིག་ལྷན་འཛོམས་གནང་འདུག སྐབས་དེར་སྐུ་ཞབས་ David Stilwell ལགས་ཀྱིས་ང་ཚོའི་ངོས་ནས་སླད་མར་བོད་ཀྱི་གནད་དོན་ཐད་མུ་མཐུད་གླེང་སློང་གནང་རྒྱུ་དང་བོད་ཀྱི་རིག་གཞུང་སོགས་མི་ཉམས་གོང་འཕེལ་སླད་རྒྱབ་སྐྱོར་གནང་རྒྱུ་ཡིན་པར་མ་ཟད་ལྷག་པར་དུ་༸གོང་ས་མཆོག་གི་༸སྐུའི་ཡང་སྲིད་ངོས་འཛིན་ཞུ་རྒྱུའི་བདག་དབང་དེ་༸གོང་ས་མཆོག་དང་བོད་མིར་ཡོད་པ་སོགས་ཀྱི་གསུང་བཤད་གནང་འདུག སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་དེ་སྔ་ཕྱི་ལོ་ ༡༩༥༩ སྔ་རོལ་དུ་བོད་ནང་གི་བོད་མི་ཚོའི་ངོས་ནས་བོད་ཀྱི་གནམ་ལོ་གསར་བཞད་སྲུང་བརྩི་གནང་སྟངས་སྐོར་ངོ་སྤྲོད་གནང་བ་དང་། ད་ཆ་བོད་ནང་རྒྱ་གཞུང་གིས་བོད་མི་མང་ཚོགས་ཀྱི་སྨྲ་བརྗོད་དང་འདུ་འཛོམས་སོགས་གཞི་རྩའི་འགྲོ་བ་མིའི་ཐོབ་ཐང་ཁག་ལ་རྡོག་རོལ་དང་དམ་དྲག་ཤུགས་ཆེ་བྱེད་བཞིན་ཡོད་པའི་ཁྲོད་འདིར་རང་དབང་ལུང་པར་བོད་མི་རྣམས་ནས་ལོ་གསར་གཙོས་པའི་དགའ་སྤྲོའི་དུས་སྟོན་གང་འདྲི་སྲུང་བརྩི་ཞུས་དང་ཞུ་བཞིན་ཡོད་ཀྱང་བོད་ནང་གི་ཆེས་ཛ་དྲག་ཆེ་བའི་འགྲོ་བ་མིའི་ཐོབ་ཐང་གི་གནས་སྟངས་རྣམས་ཡིད་ལ་དྲན་བཞིན་ཡོད་པར་གསུངས་འདུག དེ་བཞིན་ཁོང་གིས་ཨ་རིར་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་ཀྱིས་ Queens དཔེ་མཛོད་ཁང་དུ་དེང་རབས་ཀྱི་རྒྱ་ནག་ཞེས་པའི་འཁྱོག་བཤད་ཀྱི་པར་རིས་འགྲེམས་སྟོན་ཞིག་བྱེད་བཞིན་ཡོད་པའི་གནད་དོན་སྐོར་དང་འབྲེལ། རྒྱ་གཞུང་ནས་པར་རིས་འཁྱོག་བཤད་ཀྱི་འགྲེམས་སྟོན་བྱས་ཡོད་པ་དེ་ངོ་གནོང་དགོས་པར་བརྗོད་ནས་སྐྱོན་བརྗོད་གནང་འདུག དོན་གཅོད་ལགས་ཀྱིས་ཕྱི་སྲིད་ལས་ཁུངས་ནང་ཨ་རིའི་བོད་དོན་དམིགས་བསལ་སྐུ་ཚབ་མྱུར་དུ་བསྐོ་བཞག་གནང་རྒྱུ་དང་ཨ་རིའི་སྲིད་འཛིན་གཞོན་པ་སྐུ་ཞབས་ Mike Pence མཆོག་དང་ཕྱི་སྲིད་ལས་ཁུངས་ཀྱི་དྲུང་ཆེ་སྐུ་ཞབས་ Mike Pompeo ལགས་རྣམ་གཉིས་ཀྱིས་གཙོས་པའི་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་ Sam Brownback མཆོག་ནས་བོད་ཀྱི་འགྲོ་བ་མིའི་ཐོབ་ཐང་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞེས་ཞུས་འདུག ཨ་རིའི་ཕྱི་སྲིད་ལས་ཁུངས་ནས་འདི་ལོ་ཙམ་མིན་པར་ལོ་ལྟར་བོད་ཀྱི་ལོ་གསར་སྲུང་བརྩི་གནང་གི་ཡོད་པ་རེད།

ལོ་ལྟར་སུད་སི་གྲོང་ཁྱེར་ཇི་ནི་ཝ་ནང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་དུས་ཡུན་སྔ་རྗེས་དང་བསྟུན་རྒྱལ་སྤྱིའི་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གཞུང་འབྲེལ་མིན་པའི་ཚོགས་པ་ ༢༥ ཟུང་འབྲེལ་ཐོག་འགྲོ་བ་མིའི་ཐོབ་ཐང་དང་མང་གཙོ་ཞེས་པའི་གླེང་བརྗོད་ཐད་ཇི་ནི་ཝའི་ལྷན་ཚོགས་ཞེས་པ་ཞིག་ཚོགས་ཀྱི་ཡོད་པ་དང་། ད་བར་གྱི་ལྷན་ཚོགས་དེའི་ཚོགས་དུས་ནམ་ཡིན་ལ་སུད་སི་བོད་ཀྱི་བེུད་ལྷན་ཚོགས་ནས་གོ་སྐབས་ཆེ་བཞེས་ཀྱིས་ལྷན་ཚོགས་བརྒྱུད་དེ་བོད་ནང་འགྲོ་བ་མིའི་ཐོབ་ཐང་དང་། བོད་མིའི་ཆབ་སྲིད་བཙོན་པའི་གནས་སྟངས་སོགས་རྒྱལ་སྤྱིའི་མང་ཚོགས་ལ་བརྒྱུད་བསྒྲགས་གནང་བཞིན་ཡོད་པ་རེད། སྤྱིར་ཇི་ནི་ཝའི་འགྲོ་བ་མིའི་ཐོབ་ཐང་མང་གཙོའི་ལྷན་ཚོགས་ནི་ཐོག་མར་ཕྱི་ལོ་ ༢༠༠༩ ལོར་ UN watch ཞེས་རྒྱལ་ཚོགས་ལ་ལྟ་སྲུང་གནང་མཁན་གྱི་གཞུང་འབྲེལ་མིན་པའི་ཚོགས་པས་སྣི་ཁྲིད་གནང་སྟེ་རྒྱལ་སྤྱིའི་ནང་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གཞུང་འབྲེལ་མིན་པའི་ཚོགས་པ་ ༢༠ ལྷག་མཉམ་རུབ་ཀྱིས་ཆེད་བཙུགས་གནང་བའི་ལྷན་ཚོགས་ཤིག་ཡིན་ཞིང་། ཁ་སང་ཕྱི་ཚེས་ ༡༨ ཉིན་སུད་སི་གྲོང་ཁྱེར་ཇི་ནི་ཝར་ ༢༠༢༠ ལོའི་ཇི་ནི་ཝའི་ལྷན་ཚོགས་ཐེངས་ ༡༢ དེ་བསྐོང་ཚོགས་གནང་སོང་བ་དང་སུད་སི་བོད་ཀྱི་བེུད་ལྷན་ཚོགས་རྒྱུན་ལས་ཚོགས་མི་ཁག་ཅིག་ནས་མཉམ་ཞུགས་ཀྱིས་བོད་མིའི་ངོ་ཚབ་མཚོན་པ་གནང་ཡོད་པ་རེད། ཕྱི་ལོ་ ༢༠༡༠ ལོ་ནས་སུད་སི་བོད་ཀྱི་བེུད་ལྷན་ཚོགས་ལྷན་ཚོགས་ཀྱི་མི་ཁོངས་སུ་འཛུལ་ཞུགས་གནང་འདུག  སྐབས་དེ་དུས་ལྷན་ཚོགས་ཐོག་རྒྱ་ནག་གཞུང་གི་བཙོན་ཁང་ནང་བོད་པའི་བེུད་ཆབ་སྲིད་བཙོན་པའི་ཁོངས་ནས་བཙུན་འཇུག་གི་དུས་ཡུན་རིང་ཤོས་བཞུགས་མྱོང་མཁན་ཆབ་སྲིད་བཙོན་ཟུར་ཕུན་ཚོགས་ཉི་སྒྲོན་ལགས་ཀྱིས་བོད་མིའི་སྐུ་ཚབ་གནང་སྟེ་ཉན་ཞིབ་ཐོག་མ་གནང་ཡོད་པར་མ་ཟད། འདས་པའི་དུས་ཡུན་ལོ་ངོ་བཅུ་ལྷག་གི་ལྷན་ཚོགས་ཐོག་སུད་སི་བོད་ཀྱི་བེུད་ལྷན་ཚོགས་བརྒྱུད་ནས་ལྷན་ཚོགས་སྟེང་བོད་མིའི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་མགོ་ལོག་འཇིགས་མེད་ལགས། དེ་བཞིན་བོད་མིའི་སྒྲིག་འཛུགས་ཀྱི་བཀའ་བློན་དང་འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་སོགས་འབྲེལ་ཡོད་མི་སྣ་ཁག་གཅིག་གིས་བོད་དོན་གཏམ་བཤད་དང་ཉན་ཞིབ་སོགས་ཀྱང་གནང་ཐུབ་པ་བྱུང་འདུག འོན་ཀྱང་འདས་ལོའི་ནང་རྒྱལ་སྤྱིའི་བརྒྱུད་ལམ་ཐོག་དོ་སྣང་ཆེ་ཆེར་གནང་བའི་ཡུ་གུར་དང་དང་ཧོང་ཀོང་ནང་གི་གནད་དོན་རྐྱེན་པས་བོད་མིའི་སྐུ་ཚབ་ལ་ཐེངས་འདིའི་ལྷན་ཚོགས་སྟེང་གསུང་བཤད་དང་ཉན་ཞིབ་གནང་རྒྱུའི་གོ་སྐབས་གནང་མི་འདུག་ཀྱང་། ལྷན་ཚོགས་ཚོགས་ཡུལ་ཚོགས་རར་འཛམ་གླིང་ནང་ཆབ་སྲིད་བཙོན་པའི་སྐུ་པར་འགྲེམས་སྟོན་གནང་བའི་ཁྲོད་བོད་མིའི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱི་སྐུ་པར་བཤམས་སྟོན་གནང་བ་མཇལ་རྒྱུ་འདུག རྩ་བའི་འདས་པའི་ལོ་ངོ་བཅུ་ལྷག་རིང་ཇི་ནི་ཝའི་ལྷན་ཚོགས་ཐོག་བོད་མིའི་སྐུ་ཚབ་ནས་མཉམ་ཞུགས་དང་ཉན་ཞིབ། གསུང་བཤད་སོགས་གནང་སྟེ་བོད་ནང་གི་འགྲོ་བ་མིའི་ཐོབ་ཐང་གི་གནས་བབས་ཇི་ཡིན་བརྒྱུད་བསྒྲགས་གནང་ཐུབ་ཡོད་པ་ཙམ་མིན་པར་སྔ་ལོའི་ཇི་ནི་ཝའི་ལྷན་ཚོགས་ཐེངས་ ༡༡ ཐོག་ལྷན་ཚོགས་འདིའི་ ༢༠༡༩ ལོའི་འཛམ་གླིང་ནང་འགྲོ་བ་མིའི་ཐོབ་ཐང་སྲུང་སྐྱོབ་ཐད་ཕྱགས་ལས་གནང་མཁན་ལ་ཕུལ་བའི་སྙིང་སྟོབས་ཞེས་པའི་བྱ་དགའ་དེ་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ལ་འབུལ་བཞེས་གནང་ཐུབ་པ་བྱུང་ཡོད་པ་རེད།

བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་ཉིན་གྲངས་བཞིའི་རིང་ལྷོ་ཨ་ཕི་རི་ཀའི་ནང་གཞུང་འབྲེལ་ཕྱོགས་སྐྱོད་གནང་ཡོད་པའི་ཁྲོད་ཡུལ་དེའི་སྲིད་འཛིན་མཆོག་གི་རྒྱལ་ཡོངས་གསུང་བཤད་ཐོག་མཉམ་ཞུགས་དང་དེ་བཞིན་གྲོས་ཚོགས་འཐུས་མི་ཁག་ཅིག་དང་མཇལ་མོལ་གྱིས་ལྷོ་ཨ་ཕི་རི་ཀའི་ནང་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེད་འཛུགས་གནང་བའི་ཞུ་སྐུལ་གནང་འདུག ཨ་ཕི་རི་ཀའི་སྲིད་དོན་ཚོགས་པ་ Inkatha Freedom Party འམ་ཨིན་ཀ་ཐ་རང་དབང་ཚོགས་པས་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་ཁུལ་དེའི་ State of the National Address  འམ་ལྷོ་ཨ་ཕི་རི་ཀའི་སྲིད་འཛིན་མཆོག་གི་རྒྱལ་ཡོངས་གསུང་བཤད་ཐོག་གདན་ཞུས་གནང་དོན་ལྟར་ཚེས་ ༡༣ ཉིན་ Inkatha Freedom Party སྲིད་དོན་ཚོགས་པའི་གྲོས་ཚོགས་འཐུས་མི་རྣམས་དང་མཇལ་འཕྲད་དང་སྲིད་འཛིན་མཆོག་གི་རྒྱལ་ཡོངས་གསུང་བཤད་ཐོག་ལྷན་ཞུགས་གནང་ཡོད་པ་དང་། མཛད་སྒོའི་ཐོག་ Inkatha སྲིད་དོན་ཚོགས་པའི་ཚོགས་གཙོ་ཟུར་པ་རྒྱལ་སྲས་ Buthelize མཆོག་དང་ད་ལྟའི་ཚོགས་གཙོ་ལས་ཐོག་སྐུ་ཞབས་ Velenkosini Hlabisa མཆོག་ལ་སོགས་པའི་གྲོས་ཚོགས་འཐུས་མི་དང་དེ་བཞིན་ཚོགས་པ་དེ་དང་འབྲེལ་ཡོད་ཁག་ཅིག ཐེ་ཝན་གཞུང་ཚབ། འཇར་མ་ནིའི་སྤྱི་ཚོགས་རིང་ལུགས་སྲིད་དོན་ཚོགས་པའི་གཞུང་འབྲེལ་མིན་པའི་ཚོགས་པ་ཁག་གི་འཐུས་མི་སོགས་མཉམ་ཞུགས་གནང་ཡོད་སྟབས། སྐབས་དེར་ Inkatha འི་གྲོས་ཚོགས་ཤོག་ཁག་འགན་འཛིན་སྐུ་ཞབས་ Narend Singh མཆོག་གིས་རྒྱ་ནག་གཞུང་མཉམ་འབྲེལ་རྒྱལ་ཚོགས་ཀྱི་གཞུང་ཚབ་ནས་ཁོང་ཚོའི་ཚོགས་པར་བོད་དང་ཐེ་ཝན་གྱི་སྐུ་ཚབ་མགྲོན་འབོད་གནང་ན་འགྲིག་གི་མེད་པའི་ཉེན་བརྡ་བཏང་བར་བལྟོས་མེད་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་དང་ཐེ་ཝན་གཞུང་ཚབབཅས་མགྲོན་འབོད་གནང་བ་ལྟར་ཕེབས་ཐུབ་པར་དགའ་བསུ་ཡོད་ཅེས་གསུངས་ཡོད་པ་རེད། ཐེངས་འདིའི་གཞུང་འབྲེལ་ཕྱོགས་བསྐྱོད་ཁྲོད་ཕྱི་ཚེས་ ༡༤ ཉིན་གྱི་སྔ་དྲོ་སྤྱི་འཐུས་ཚོགས་གཙོ་མཆོག་གིས་ Scalabrini and Africa Committee for Tibet གཉིས་ནས་གོ་སྒྲིག་ཞུས་པའི་བོད་དེ་རྒྱ་ནག་གཞུང་གིས་ཁྲིམས་འགལ་ཐོག་བཙན་བཟུང་བྱས་ རྗེས་རྒྱ་གར་དུ་བཙན་བྱོལ་བོད་མིའི་སྒྲིག་འཛུགས་ཀྱི་འཛིན་སྐྱོང་གནང་ཕྱོགས་སྐོར་གྱི་བརྗོད་གཞིའི་ཐོག་གསུང་བཤད་དང་དྲི་བ་དྲིས་ལན་གྱི་མཛད་རིམ་ཞིག་གནང་ཡོད་པ་དང་། སྐབས་དེར་ཚོགས་བཅར་བ་མི་གྲངས་ ༦༠ ལྷག་ཕེབས་ཡོད་པའི་ཁོངས་ནས་གྲོས་ཚོགས་འཐུས་མི་ལྔ་དང་སྤྱི་ཚོགས་ཞབས་ཞུ་བ། བོད་དོན་སྣང་ཅན། ཡུལ་དེར་སྐྱབས་བཅོལ་དུ་འབྱོར་བ་བཅས་ཆགས་ཀྱི་འདུག ཕྱི་ཚེས་ ༡༤ ཉིན་སྤྱི་འཐུས་ཚོགས་གཙོ་མཆོག་གིས་ལྷོ་ཨ་ཕི་རི་ཀའི་མང་གཙོ་མཉམ་མཐུན་ཚོགས་པའི་གྲོས་ཚོགས་ཤོག་ཁག་གི་འགན་འཛིན་ལྕམ་སྐུ་ Natasha Mazzone མཆོག་དང་མཇལ་མོལ་གནང་ཡོད་པ་ལྟར་མཇལ་མོལ་སྐབས་བོད་ནང་གི་དཀའ་ངལ་དངོས་ཡོད་ཁག་ངོ་སྤྲོད་དང་འབྲེལ་ལྷོ་ཨ་ཕི་རི་ཀའི་གྲོས་ཚོགས་ནང་བོད་དོན་ཐོག་གྲོས་ཆོད་དང་གསུང་བཤད་གནང་ཐུབ་ཚེ་དགེ་མཚན་ཆེ་སྐོར་དང་དེ་བཞིན་ཡུལ་དེར་སྲིད་དོན་ཚོགས་པ་འདྲ་མིན་ལས་གྲུབ་པའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེད་འཛུགས་གནང་རྒྱུ་གཙོས་པའི་ལྕམ་སྐུ་མཆོག་དང་གྲོས་ཚོགས་འཐུས་མི་རྣམ་པ་བཞུགས་སྒར་དུ་གཞུང་འབྲེལ་སྐུ་མགྲོན་དུ་གདན་ཞུ་ལྟར་ཕེབས་ཐུབ་ན་དགའ་བསུ་ཡོད་ཅེས་ཞུས་པར་ལྕམ་སྐུ་མཆོག་གིས་ཁོང་ནི་༸གོང་ས་༸སྐྱབས་མགོན་ཆེན་པོ་མཆོག་ལ་དད་མོས་ཤུགས་ཆེ་ཞུ་མཁན་ཞིག་ཡིན་པ་དང་དེ་སྔོན་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ཡུལ་དེར་གདན་འདྲེན་ཞུས་ཡོད་སྐོར་གསུངས་པ་མ་ཟད། གྲོས་ཚོགས་ནང་བོད་དོན་སྐོར་གསུང་བཤད་གནང་རྒྱུར་དཀའ་ངལ་མེད་པར་འགྲེལ་བརྗོད་གནང་སྟེ་སླད་མར་ལྷོ་ཨ་ཕི་རི་ཀར་གྲོས་ཚོགས་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་རྒྱུར་ཡུལ་དེའི་  Inkatha སྲིད་དོན་ཚོགས་པའི་གྲོས་ཚོགས་ཤོག་ཁག་དང་ལྷན་དུ་བཀའ་མོལ་གནང་རྒྱུའི་ཞལ་བཞེས་གནང་འདུག གཞི་རྩའི་ཕྱི་ལོ་ ༢༠༡༨ ཕྱི་ཟླ་ ༢ པའི་ནང་ཨ་ཕི་རི་ཀའི་སྲིད་དོན་ཚོགས་པ་ Inkatha Freedom Party འམ་ཨིན་ཀ་ཐ་རང་དབང་ཚོགས་པས་ཡུལ་དེའི་གྲོས་ཚོགས་སུ་ལྷོ་ཨ་ཕི་རི་ཀའི་སྲིད་འཛིན་ཛུ་མ་མཆོག་གི་རྒྱལ་ཡོངས་གཏམ་བཤད་མཛད་སྒོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟངསེང་གེ་མཆོག་ཀྱང་གདན་ཞུ་གནང་ཡོད་པ་མ་ཟད། འདས་པའི་ལོ་ཤས་ནང་ལྷོ་ཨ་ཕི་རི་ཀའི་རྒྱལ་ཁབ་དང་རྒྱ་ནག་གཞུང་དབར་དཔལ་འབྱོར་དང་ཚོང་གི་འབྲེལ་ལམ་དམ་ཟབ་ཕྱིན་ཡོད་པ་དང་། འབྲེལ་ལམ་དེའི་རྐྱེན་གྱིས་རྒྱ་གཞུང་གིས་གནོན་ཤུགས་འོག་ཕྱི་ལོ་ ༢༠༠༩ ལོ་ནས་ད་བར་༸གོང་ས་༸སྐྱབས་མགོན་ཆེན་པོ་མཆོག་ཡུལ་དེའི་ནང་ཆིབས་བསྒྱུར་མཛད་ཐུབ་མེད་པ་རེད།

བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་བོད་མིའི་སྤྱི་ཚོགས་ཡར་རྒྱས་ཐེབས་རྩ་ཁང་གཉིས་ཀྱིས་གོ་སྒྲིག་གནང་ཐོག་འདི་ལོའི་ཕྱི་ཟླ་ ༤ ཚེས་ ༢ ནས་དབུ་འཛུགས་གནང་སྟེ་ཚེས་ ༤ བར་ཉིན་གྲངས་གསུམ་གྱི་རིང་བཞུགས་སྒར་དྷརྨ་སཱ་ལཱར་ཕྱི་རྒྱལ་ཁག་ཏུ་ཡོད་པའི་བོད་རིགས་སྤྱི་མཐུན་ཚོགས་པས་གཙོས་བོད་མིའི་སྒེར་གཉེར་སྤྱི་ཚོགས་ཞབས་ཞུ་བའི་ལས་ཁང་སོགས་ནས་བོད་མི་རིགས་ཀྱི་བདེ་དོན་སླད་དུ་ཕྱག་ལས་གནང་མཁན་བོད་མི་ཁྱོན་ ༡༢༥ ལྷག་བསྡུ་བསྐོང་གིས་ Global summit of international Tibetan Associations /Organizations ཞེས་རྒྱལ་སྤྱིའི་བོད་རིགས་སྤྱི་མཐུན་ཚོགས་པའི་ལྔ་དང་ལྔ་བཅུའི་ཚོགས་འདུ་ཆེས་ཐོག་མ་འཚོགས་གཏན་ཁེལ་འདུག ཚོགས་ཆེན་ཐོག་ཕྱི་རྒྱལ་དུ་བཞུགས་པའི་བོད་མི་ཚོས་རྒྱལ་སྤྱིའི་ཐོག་བོད་ཀྱི་འཐབ་རྩོད་ཀྱི་གནས་བབས་དེ་ ཤུགས་ཆེ་རུ་གཏོང་ཐབས་དང་ཁུལ་དེ་དག་ཏུ་འཚར་ལོངས་བྱུང་བའི་བོད་ཕྲུག་ཚོར་བོད་ཀྱི་ཆོས་རིག་སློབ་ཁྲིད་གནང་བ་བརྒྱུད་ནས་སྲུང་སྐྱོབ་གནང་ཐབས། བོད་རིགས་སྤྱི་མཐུན་ཚོགས་པ་སྲ་བརྟན་དང་ཚགས་ཚུད་གནང་རྒྱུ། དེ་བཞིན་བོད་མིའི་སྒྲིག་འཛུགས་དང་བོད་རིགས་ཚོགས་པའི་དབར་འབྲེལ་ལམ་དམ་ཟབ་གནང་ཐབས་བཅས་ཀྱི་བརྗོད་གཞི་བཞིའི་ཐོག་བཀའ་བསྡུར་གནང་རྒྱུ་རེད་འདུག ཨ་རིའི་ཕྱི་སྲིད་ལྷན་ཁང་གི་མང་གཙོ་དང་། འགྲོ་བ་མིའི་ཐོབ་ཐང་། ངལ་རྩོལ་གོང་འཕེལ་ལས་དོན་ཚོགས་ཆུང་ནས་ཚོགས་འདུར་མཐུན་འགྱུར་གནང་གི་ཡོད་པ་རེད། རླུང་འཕྲིན་ཁང་ནས་རིང་མིན་འཚོགས་རྒྱུའི་རྒྱལ་སྤྱིའི་བོད་རིགས་སྤྱི་མཐུན་ཚོགས་པའི་ལྔ་དང་ལྔ་བཅུའི་ཚོགས་འདུ་དང་འབྲེལ་བའི་ཞིབ་ཕྲའི་གནས་ཚུལ་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཁྱབ་ཁོངས་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དབུ་དཀར་ཚང་སྐལ་བཟང་རྡོ་རྗེ་ལགས་སུ་བཅར་འདྲི་ཞུས་ཡོད།

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་བྱང་ཨ་མི་རི་ཀའི་ནང་གི་གཞུང་འབྲེལ་ཕྱོགས་ཕེབས་ཁག་ཅིག་གྲུབ་རྗེས་ཕྱི་ཚེས་ ༡༥ ནས་ ༡༧ བར་ཉིན་གྲངས་གསུམ་རིང་ཡོ་རོབ་རྒྱལ་ཁབ་ Austria ལ་གཞུང་འབྲེལ་ཕྱོགས་ཕེབས་གནང་བཞིན་འདུག ཐེངས་འདིའི་གཞུང་འབྲེལ་ཕེབས་གནང་དོན་གཙོ་བོ་ནི་ཡུལ་དེར་རྟེན་གཞི་བྱས་པའི་ Innsbruck གཙུག་ལག་སློབ་གཉེར་ནས་དགུན་དུས་ཤེས་ཡོན་ལས་རིམ་གྱི་དབུ་འབྱེད་མཛད་སྒོར་གསུང་བཤད་བར་སྲིད་སྐྱོང་མཆོག་གདན་ཞུ་ཕུལ་བ་ལྟར་ཆེད་ཕེབས་གནང་བ་ཞིག་ཆགས་ཀྱི་འདུག སྲིད་སྐྱོང་མཆོག་གིས་ཟླ་ ༢ ཚེས་ ༡༥ ནས་ ༡༧ བར་ཉིན་གྲངས་གསུམ་ཨོ་སི་ཀྲི་ཡའི་གཞུང་འབྲེལ་ཕྱོགས་ཕེབས་ཁྲོད་ས་གནས་སུ་ཡོད་པའི་བོད་དོན་རྒྱབ་སྐྱོར་ཚོགས་པའི་འབྲེལ་ཡོད་མི་སྣ་མི་ཁག་ལ་མཇལ་མོལ་དང་གསར་ཁང་ཁག་ལ་བཅར་འདྲི་དང་ལེན། དེ་བཞིན་ཨོ་སི་ཀྲི་ཡ་ Grafenworth ས་གནས་རྫོང་དཔོན་སྐུ་ཞབས་ Alfred Riedl མཆོག་དང་མཇལ་མོལ། ཕྱི་ཚེས་ ༡༥ ཉིན་སྲིད་སྐྱོང་མཆོག་ནས་ཨོ་སི་ཀྲི་ཡའི་བོད་རིགས་མི་མང་རྣམས་ལ་གསུང་བཤད་གནང་བ་དང་འབྲེལ། སྐབས་དེར་ཨོ་སི་ཀྲི་ཡའི་བོད་རིགས་མི་མང་ཚོགས་པས་སྲིད་སྐྱོང་མཆོག་གིས་ད་བར་སྲིད་སྐྱོང་གི་ཕྱག་ལས་གནང་རིང་ལ་ཆབ་སྲིད་དང་དཔལ་འབྱོར། འཕྲོད་བསྟེན། ཤེས་ཡོན་བཅས་ཀྱི་ཐོག་ཞབས་འདེགས་གང་ལེགས་ཞུས་པར་ཆེ་བསྟོད་ཀྱི་བཀའ་དྲིན་ཅན་ལ་བཀྲིན་ཆེ་ཞེས་པའི་གཟེངས་རྟགས་ཤིག་ཕུལ་ཡོད་པ་རེད། དེ་རིང་ཁུལ་དེའི་ནང་གཞུང་འབྲེལ་ཕྱོགས་ཕེབས་མཐའ་མ་དང་འབྲེལ་ཏེ་ཁུལ་དེར་རྟེན་གཞི་བྱས་པའི་ Innsbruck གཙུག་ལག་སློབ་གཉེར་ནས་དགུན་དུས་ཤེས་ཡོན་ལས་རིམ་གྱི་དབུ་འབྱེད་མཛད་སྒོར་དགེ་སློབ་ཚོར་དབུ་འབྱེད་ཀྱི་གསུང་བཤད་གནང་ཡོད་པ་མ་ཟད་གཙུག་ལག་སློབ་གཉེར་ཁང་གི་དབུ་འཛིན་དང། ས་གནས་རྫོང་དཔོན་ Georg Wille ལགས་དང་མཇལ་མོལ་སོགས་གནང་ཡོད་པ་རེད། ཤེས་རྟོགས་བྱུང་བར་གཞིགས་ན། སང་ཉིན་ཕྱི་ཚེསས་ ༡༨ ཉིན་སྲིད་སྐྱོང་མཆོག་ Austria ནས་ཨ་རིའི་རྒྱལ་ས་ཝ་ཤིང་ཊོན་ལ་ཕེབས་ཐོན་གནང་གི་ཡོད་པ་རེད།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་རྒྱལ་ས་དི་ལླཱི་སྤྱི་ཁྱབ་བློན་ཆེན་སྐུ་ཞབས་ Arvind Kejriwal མཆོག་སླར་ཡང་མངའ་སྡེའི་འོས་བསྡུའི་ཁྲོད་ཚད་མཐོའི་རྒྱལ་ཁ་ཐོབ་པར་འཚམས་འདྲི་བསྩལ་བ་དང་སྦྲགས། རྒྱ་གར་མང་ཚོགས་ནས་མང་གཙོ་ཡང་དག་ལོངས་སུ་སྤྱོད་བཞིན་པར་བསྔགས་བརྗོད་མཛད་འདུག ཁ་སང་༸གོང་ས་མཆོག་གིས་བསྩལ་བའི་གསུང་འཕྲིན་ནང་དི་ལླཱི་མང་ཚོགས་ནས་མུ་མཐུད་ཁྱེད་ཀྱི་འགོ་ཁྲིད་ལམ་སྟོན་འོག་ཁེ་ཕན་བྱུང་ངེས་ཡིན་པ་དང་སྒོས་དེ་སྔ་མགོན་པོ་༸གང་ཉིད་མཆོག་ནས་ཕྱི་ལོ་ ༢༠༡༨ ལོར་དི་ལླཱི་མངའ་སྡེ་གཞུང་གི་སྟངས་འཛིན་འོག་ཡོད་པའི་གཞུང་གི་སློབ་གྲྭའི་དགེ་སློབ་བཅས་ལྷན་ཞུགས་ཐོག་བདེ་སྐྱིད་སྐྲུན་ཐབས་ Happiness Curriculum ཞེས་པའི་བསླབ་གཞི་གསར་པ་དབུ་འབྱེད་མཛད་པར་སྐུ་ཞབས་ཁོང་དང་དི་ལླཱིའི་གཞུང་འཛིན་ཚོགས་པར་བསྔགས་བརྗོད་མཛད་པ་ལུང་འདྲེན་དང་འབྲེལ། བསླབ་གཞི་དེས་སློབ་ཕྲུག་ཚོའི་སློབ་སྦྱོང་སྤྱི་ཡོངས་ལ་གྲུབ་འབྲས་བཟང་པོ་ཐོན་ངེས་དང་ལྷག་པར་དུ་སློབ་ཕྲུག་ཞན་ཚོར་རང་ཉིད་ཀྱི་མི་ཚེ་གོང་འཕེལ་གཏང་རྒྱུའི་རོགས་འདེགས་ཐུབ་རྒྱུ་ཡིན་པར་བཀའ་བསྩལ་འདུག མགོན་པོ་༸གང་ཉིད་མཆོག་གིས་འགྲོ་བ་མིའི་གཞི་རྩའི་རིན་ཐང་གོང་མཐོར་དང་ཆོས་ལུགས་ཕན་ཚུན་མཐུན་སྒྲིལ་གནང་ཕྱིར་༸མགོན་པོ་མཆོག་ནས་རྒྱ་གར་གྱི་གནའ་བོའི་རིག་གནས་བསྐྱར་གསོའི་སླད་ཞལ་བཞེས་མཛད་པ་དང་དི་ལླཱི་གཞུང་ནས་སློབ་གྲྭ་ཁག་ཏུ་བདེ་སྐྱིད་སྐྲུན་ཐབས་ཀྱི་བསླབ་གཞི་གཏན་འབེབས་གནང་བར་ཡི་རངས་བསྔགས་བརྗོད་མཛད་པ་མ་ཟད། དི་ལླཱི་གཞུང་ནས་དེ་ལྟར་གནང་བ་དེས་རྒྱ་གར་གྱི་མངའ་སྡེ་གཞན་ཁག་ལའང་མིག་དཔེ་ཞིག་བསྟན་ཐུབ་ཡོད་པར་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་རྒྱ་གར་ལྟ་བུར་ཆ་མཚོན་ན་གནའ་དེང་གཉིས་ཀྱི་ཤེས་ཡོན་ཟུང་འབྲེལ་གནང་ཐུབ་པའི་རྒྱལ་ཁབ་གཅིག་པོ་དེ་ཡིན་པར་ཡིད་ཆེས་མཛད་ཀྱི་ཡོད་པ་དང་ཆབས་ཅིག་ཏུ་རྒྱ་གར་གྱི་སློབ་ཕྲུག་ཚོའི་ངོས་ནས་བསླབ་གཞི་དེར་དོ་སྣང་དང་དགའ་མོས་བྱེད་པ་དེ་ནི་རེ་བ་དང་སེམས་འགུལ་གྱི་རྣམ་པ་མངོན་པ་ཞིག་ཡིན་པར་བཀའ་བསྩལ་ཡོད་པ་དང་། ལྷག་དོན་༸གོང་ས་མཆོག་གིས་སྐུ་ཞབས་ཀེཇ་རི་ཝལ་མཆོག་ལ་རྒྱལ་ས་དི་ལླཱིའི་མི་མང་གི་བསམ་དོན་འགྲུབ་པའི་ཐུགས་སྨོན་མཛད་འདུག དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་སྤྱི་ཁྱབ་བློན་ཆེན་མཆོག་ལ་བོད་མིའི་སྒྲིག་འཛུགས་དང་བོད་མི་སྤྱི་ཡོངས་ཀྱི་ཚབ་ཞུས་ཏེ་འཚམས་འདྲི་ཞུས་ཏེ་སྐུ་ཞབས་ཀེཇ་རི་ཝལ་མཆོག་སླར་ཡང་འོས་བསྡུའི་རྒྱལ་ཁ་ཐོབ་པ་དེས་མང་ཚོགས་ནས་ཁོང་གི་འགོ་ཁྲིད་དང་ཁོང་གི་ཆབ་སྲིད་ཚོགས་པར་ཡིད་ཆེས་བློ་སྐྱེལ་གནང་གི་ཡོད་པ་ཞིག་མཚོན་པ་མ་ཟད།  ཁོང་གི་གཞུང་འཛིན་ཚོགས་པ་ནས་དི་ལླཱིར་གནས་བཞུགས་བོད་མི་ཡོད་དོ་ཅོག་ལ་རྒྱབ་སྐྱོར་གནང་བ་དེ་དག་རྣམ་ཀུན་ནས་ཚོར་བཞིན་ཡོད་པ་དང་། ལྷག་དོན་དི་ལླཱི་གཞུང་ནས་སློབ་གྲྭ་ཁག་ཏུ་ ༸གོང་ས་མཆོག་གི་དགོངས་གཞི་ལས་བདེ་སྐྱིད་སྐྲུན་ཐབས་ཀྱི་བསླབ་གཞི་གཏན་འབེབས་གནང་བར་ཡི་རངས་བསྔགས་བརྗོད་གནང་ཡོད་པ་རེད། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཨཱཙཱརྱ་ཡེ་ཤེས་ཕུན་ཚོགས་མཆོག་གིས་ཀྱང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་འཚམས་འདྲི་ཞུས་པ་དང་འབྲེལ། སྐུ་ཞབས་ཀེཇ་རི་ཝལ་མཆོག་དང་ཁོང་གི་ཆབ་སྲིད་ཚོགས་པས་བོད་དོན་ཐོག་རྒྱབ་སྐྱོར་གཡོ་མེད་པར་གནང་ཁག་ལ་ཐུགས་རྗེ་ཆེ་ཞུས་པ་དང་ཆབས་ཅིག དི་ལླཱི་གཞུང་གི་སློབ་གྲྭ་ཁག་ཏུ་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལས་བདེ་སྐྱིད་སྐྲུན་ཐབས་ཀྱི་བསླབ་གཞི་གཏན་འབེབས་གནང་བར་བསྔགས་བརྗོད་ཞུས་ཏེ་བསླབ་གཞི་དེས་སླད་མར་མི་རབས་གཞོན་པ་ཚོར་ཕན་ངེས་ཡིན་པ་གསུངས་འདུག ཚོགས་གཞོན་མཆོག་གིས་ད་དུང་དི་ལླཱི་གཞུང་འཛིན་ནས་ཁུལ་དེར་གནས་བཞུགས་བོད་མི་དང་བོད་སྒར་བསམ་ཡས་གླིང་གི་བོད་མིར་རྒྱབ་སྐྱོར་དང་། དེ་བཞིན་ཕྱི་ལོ་ ༢༠༡༦ ལོར་ལཱལ་ཀི་ལར་སུད་ཚོང་གཉེར་མཁན་རྣམས་ཀྱི་ཁྲོམ་རར་མེ་སྐྱོན་ཤོར་སྐབས་རོགས་རམས་གནང་བར་ཐུགས་རྗེ་ཆེ་ཞུས་འདུག ལྷག་དོན་ཁོང་གི་ཆབ་སྲིད་ཚོགས་པ་ Aam Aadmi Party ནས་སླད་མར་བོད་མིར་དེ་འབྲེལ་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་གནང་ཡོད་པ་རེད། གཞི་རྩའི་སྐུ་ཞབས་ Kejriwal མཆོག་ད་རེས་རྒྱལ་ས་དི་ལླཱི་ནས་འོས་བསྡུའི་རྒྱལ་ཁ་ཐོབ་པ་དེ་ཐེངས་གསུམ་པ་ཆགས་ཀྱི་ཡོད་པ་དང་། དི་ལླཱི་མངའ་སྡེ་གྲོས་ཚོགས་ནང་ཞབས་སྟེགས་ ༧༠ ཡོད་པའི་ཁྲོད་ད་རེས་ Aam Aadmi ཆབ་སྲིད་ཚོགས་པར་ཞབས་སྟེགས་ ༦༢ ཐོབ་ཏེ་ཚད་མཐོའི་རྒྱལ་ཁ་ཐོབ་ཡོད་པ་རེད། དྲྭ་ལམ་ཁག་ཏུ་གནས་ཚུལ་སྤེལ་བར་གཞིགས་ན་ཀེཇ་རི་ཝལ་མཆོག་གི་ཆབ་སྲིད་ཚོགས་པར་བསྐྱར་དུ་རྒྱལ་ཁ་ཐོབ་པ་ནི་འདས་པའི་ལོ་ལྔའི་ནང་ཁོང་གི་ཆབ་སྲིད་ཚོགས་པས་ལས་དོན་ཡག་པོ་གནང་བར་ངོས་འཛིན་གྱིས་མང་ཚོགས་ནས་འོས་འཕེན་ཡོད་སྐོར་གསུང་བཞིན་འདུག

རྒྱ་གར་མངའ་སྡེ་ཨུ་ཏྲ་ཁནྚའི་རྒྱལ་ས་རྡེ་ར་ལྡུན་གྱི་ཉེ་འདབས་སུ་ཆགས་པའི་ཧར་པ་སྤུར་གཏན་ཉིན་དྭངས་སློབ་དམག་སྒར་གྱི་སློབ་གྲྭ་དེ་རིང་ཕྱི་ལོ་ ༢༠༢༠ ཟླ་ ༢ ཚེས་ ༧ ཉིན་དབུ་བརྙེས་ཏེ་ལོ་ངོ་ ༥༠ འཁོར་བའི་དུས་སྟོན་སྲུང་བརྩི་ཞུས་སོང་། དུས་སྟོན་གྱི་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གཙོས་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག དམིགས་བསལ་སྐུ་མགྲོན་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག དེ་བཞིན་བདེ་སྲུང་བཀའ་བློན་འཕགས་པ་ཚེ་རིང་མཆོག་དང་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག  དང་སློབ་ཨང་ ༢༢ ཀྱི་དམག་སྤྱི་སྐུ་ཞབས་ Ashish Ahuja མཆོག་དང་དང་སློབ་དམག་སྒར་གྱི་རུ་དཔོན།  སློབ་གྲྭའི་སློབ་སྤྱིས་གཙོས་པའི་དགེ་ལས་སློབ་ཕྲུག འཛམ་གླིང་ཡུལ་གྲུ་གང་སར་ནས་ཕེབས་པའི་སློབ་ཟུར་བརྒྱ་ལྷག་དང་མི་མང་བཅས་ལྷན་འཛོམས་གནང་འདུག དུས་སྟོན་དང་འབྲེལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་ཞིག་བསྩལ་ཡོད་པ་དང་སློབ་ཟུར་མཐུན་ཚོགས་ཀྱི་ཚོགས་གཞོན་མགོན་པོ་དོན་གྲུབ་ལགས་ནས་སྙན་སྒྲོན་གནང་བའི་གསུང་འཕྲིན་དེའི་ནང་ཧར་པར་སྤུར་གཏན་ཉིན་སློབ་གྲྭ་དབུ་བརྙེས་ནས་ལོ་ངོ་ ༥༠ འཁོར་བར་འཚམས་འདྲི་མཛད་པ་དང་། མགོན་པོ་༸གང་ཉིད་མཆོག་གིས་ཧར་པ་སྤུར་ནི་དེ་སྔ་བཙན་བྱོལ་ནང་སློབ་གྲྭ་ཐོག་མར་བཙུགས་པའི་ཁོངས་སུ་ཡོད་པ་དང་། འདས་པའི་ལོ་ངོ་ ༥༠ རིང་སློབ་གྲྭ་དེའི་དགེ་ལས་ཡོངས་ནས་སྐུ་བསྐྱོན་པར་བརྟེན་ནས་སློབ་གྲྭ་འཕེལ་རིམ་དང་། དེ་བཞིན་ཤེས་ཡོན་སོགས་ཀྱི་ཐད་གྲུབ་འབྲས་ལེགས་པོ་ཐོན་ཡོད་སྐོར་བཀའ་བསྩལ་འདུག ལྷག་པར་དུ་མགོན་པོ་༸གང་ཉིད་མཆོག་གིས་སློབ་སྦྱོང་གི་རིན་ཐང་དང་འབྲེལ་ཏེ་དགེ་ལས་ཡོངས་ལ་ཤེས་ཡོན་སློབ་ཁྲིད་སྐབས་སློབ་ཕྲུག་ཚོར་སློབ་ཚན་གཏན་འབེབས་གནང་བ་དེ་དག་ཁོ་ན་ཙམ་མིན་པར་དེའི་ཐོག་མིའི་གཞི་རྩའི་རིན་ཐང་སྐོར་སློབ་ཁྲིད་གནང་དགོས་གལ་ཡིན་པར་ལམ་སྟོན་བཀྲིན་ཆེ་བ་བསྩལ་འདུག སྐབས་དེར་སྐུ་མགྲོན་གཙོ་བོ་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་ཧར་པ་སྤུར་སློབ་གྲྭའི་འཕེལ་རིམ་རགས་བསྡུས་ངོ་སྤྲོད་དང་སྦྲགས། དེ་རིང་སློབ་གྲྭ་བཙུགས་གནང་ནས་ལོ་ངོ་ ༥༠ འཁོར་བ་དང་བསྟུན་ཐོག་མར་སློབ་གྲྭ་དེར་ཕྱག་ལས་གནང་མཁན་དང་ད་བར་དེ་འབྲེལ་ཕྱག་ལས་གནང་བཞིན་པའི་ལས་བྱེད་ཀུན་གྱིས་ལོ་ངོ་ལྔ་བཅུའི་རིང་སྐུ་ངལ་འཛེམ་མེད་ཀྱིས་ཕྱག་ལས་གནང་བར་བརྟེན་ད་ཆ་སྤྱི་ཚོགས་ཁྲོད་སློབ་གྲྭ་འདིའི་སློབ་ཟུར་མང་དག་ཅིག་བོད་མིའི་སྒྲིག་འཛུགས་གཙོས་པའི་སྤྱི་ཚོགས་ནང་ལས་དོན་རྒྱ་ཆེ་གནང་བཞིན་པ་མངོན་རྒྱུ་ཡོད་སྟབས་དེ་ནི་སློབ་གྲྭ་གསར་འཛུགས་གནང་བའི་གྲུབ་འབྲས་ཤིག་ཡིན་པས་དེ་འབྲེལ་ཀུན་ལ་ལེགས་གསོ་བསྔགས་བརྗོད་གནང་སོང་། དེ་བཞིན་ཚོགས་གཙོ་མཆོག་གིས་ད་ཆ་འཛམ་གླིང་གི་གནས་བབས་དང་འབྲེལ་ནས་ང་ཚོ་བོད་མི་སྤྱི་བོ་གནམ་བསྟན་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་ཐོག་ངེས་པར་དུ་སློབ་སྦྱོང་གནང་སྟེ་མགོན་པོ་༸གང་ཉིད་མཆོག་གི་ལམ་སྟོན་ལ་འཇུག་ནས་སླད་མར་སྤྱི་ཚོགས་འདི་ཚུལ་མཐུན་ཞིག་དང་བདེ་སྐྱིད་ལྡན་པ་ཞིག་བསྐྲུན་ཐབས་ལ་འབད་རྩོན་དགོས་གལ་ཡིན་སྐོར་གསུངས་ཡོད། དམིགས་བསལ་སྐུ་མགྲོན་དང་དེ་སྔ་སློབ་གྲྭ་དེར་ ༡༩༨༠ ནང་དགེ་རྒན་གྱི་ཕྱག་ལས་གནང་མྱོང་མཁན་ཁྲིམས་ཞིབ་པ་ཆེ་བ་བསོད་ནམས་དྭགས་པོ་མཆོག་གིས་རང་ཉིད་སློབ་གྲྭ་དེར་ཕྱག་ལས་གནང་སྐབས་ཀྱི་གནས་སྟངས་དྲན་གསོ་དང་སྦྲགས། དེ་རིང་ལྔ་བཅུའི་དུས་སྟོན་འདི་ང་ཚོའི་ངོས་ནས་སློབ་གྲྭ་ཐོག་མར་གསར་འཛུགས་གནང་མཁན་རྣམས་ལ་བཀའ་དྲིན་བསམ་ཤེས་ཞུ་རྒྱུའི་དུས་ཚིགས་ཤིག་དང་། གཏན་ཉིན་སློབ་གྲྭ་འདི་ལྟ་བུར་མཚོན་ན་སློབ་ཟུར་མང་དག་ཅིག་ད་ལྟའི་ཆར་སྤྱི་ཚོགས་ཁྲོད་གཟེངས་སུ་ཐོན་པའི་ལས་དོན་གཉེར་བཞིན་པ་དང་ཆབས་ཅིག་ཏུ་སློབ་གྲྭ་འདིར་བོད་ཕྲུག་གཙོས་པའི་རྒྱ་གར་གྱི་སློབ་ཕྲུག་མང་དག་ཅིག་ཡོད་པ་རྣམས་ནས་མི་བཟང་པོ་བྱམས་བརྩེ་ལྡན་པ་ཞིག་ཆགས་རྒྱུ་དང་ལྷག་པར་དུ་སླད་མར་སྤྱི་ཚོགས་ལ་ཞབས་འདེགས་ཞུ་ཐུབ་པ་ཞིག་བྱེད་དགོས་པ་གསུངས་ཡོད། དུས་སྟོན་གྱི་སྐུ་མགྲོན་གཙོ་བོ་སྲིད་སྐྱོང་མཆོག་གིས་གཏན་ཉིན་སློབ་གྲྭ་དེའི་དགེ་ལས་ཡོངས་ནས་ལོ་ངོ་མང་པོའི་རིང་སྐུ་ལས་བསྐྱོན་པར་བརྟེན་ད་ཆ་སློབ་ཟུར་མང་པོ་ཞིག་རང་ཉིད་ཀྱི་རྐང་པར་ཧྲ་ཏག་ཏག་ལངས་ཐུབ་པ་ཆགས་པ་འདི་གཟི་རྗིད་ཅིག་ཡིན་པ་གསུངས་ཡོད་པ་རེད། སློབ་གྲྭ་འདིའི་ནང་སློབ་ཕྲུག་ ༤༠༠ ལྷག་ཡོད་པའི་ཁྲོད་བོད་ཕྲུག་ ༤༠ ཙམ་ལས་མེད་པ་ལྟར་སྲིད་སྐྱོང་མཆོག་གིས་ད་ལྟའི་ཆར་བོད་པའི་སློབ་གྲྭ་གཞན་ཁག་ཏུའང་བོད་ཕྲུག་ཉུང་ཤས་ལས་མེད་པའི་གནས་སྟངས་གྱུར་བས་བོད་སློབ་འཛིན་ཚོགས་ནས་སློབ་གྲྭ་རྩིས་བཞེས་གནང་རྒྱུར་འབོད་སྐུལ་ཞུས་པ་ལྟར་ད་ཆ་གཞིས་ཆགས་ཁག་ནང་ཡོད་པའི་སློབ་གྲྭ་རྣམས་རྩིས་བཞེས་ཐུབ་ཡོད་སྐོར་གསུངས་སོང་། གཞན་ཡང་སྲིད་སྐྱོང་མཆོག་གིས་བོད་པའི་སློབ་གྲྭ་ཁག་གི་རྒྱུགས་འཕྲོད་ཀྱི་བརྒྱ་ཆ་དེ་རྒྱ་གར་སློབ་གྲྭ་མང་དག་ཅིག་ལས་བརྒྱ་ཆ་མཐོ་བ་སོན་གྱི་ཡོད་པ་དང་། ལྷག་པར་དུ་བོད་པའི་ཡི་གེ་འབྲི་ཀློག་ཤེས་པའི་བརྒྱ་ཆ་དེ་རྒྱ་གར་དང་སྐྱབས་བཅོས་བ་གཞན་ལས་ཚད་མཐོ་བ་ཆགས་ཀྱི་ཡོད་སྟབས་ང་ཚོ་ནི་ལུང་པ་ཡོད་མཁན་གྱི་རྒྱལ་ཁབ་ལས་ལྷག་པའི་གྲུབ་འབྲས་སྨིན་ཐུབ་པའི་སྤྱི་ཚོགས་ཤིག་ཡིན་པ་དེ་ནམ་ཡང་བརྗེད་རྒྱུ་མེད་པ་གསུངས་ཡོད། གཞི་རྩའི་ཧར་པ་སྤུར་གཏན་ཉིན་སློབ་གྲྭ་བོད་མིའི་སློབ་གྲྭ་ནི་ཕྱི་ལོ་ ༡༩༧༠ ལོར་གསར་འཛུགས་གནང་ཞིང༌། ཐོག་མར་དང་སློབ་ལས་ཁང་གིས་འཛིན་སྐྱོང་གནང༌བ་དང་། སློབ་དམག་སྤྱི་ཟུར་སྐུ་ཞབས་ཤར་དཱ་དང་དབུས་བོད་སློབ་འཛིན་ཚོགས་དྲུང་ཆེ་སྐུ་ཞབས་ S.P.Datta གཉིས་ནས་འབད་བརྩོན་ལ་བརྟེན་ཕྱི་ལོ་ ༡༩༩༤ ཟླ་ ༧ ཚེས་ ༢༣ ཉིན་སློབ་གྲྭ་འདི་ཉིད་དབུས་བོད་སློབ་འཛིན་སྐྱོང་ཚོགས་པས་རྩིས་བཞེས་གནང་བ་ཞིག་ཡིན་པ་རེད།

རྒྱ་གར་ནང་ NRC འམ་མི་སར་ཐོ་འགོད་དང་ CAA འམ་མི་སེར་ཐོབ་ཐང་གི་ཁྲིམས་འཆར་དང་འབྲེལ་ངོ་རྒོལ་རིམ་པ་འབྱུང་བཞིན་པའི་ཁྲོད་འདིར་རྒྱ་གར་གཞུང་གི་ངོས་ནས་འདི་ལོའི་སྔོན་རྩིས་བཀའ་འཁྲོལ་ནང་བོད་མིས་གཙོས་པའི་ཡུལ་དེའི་ནང་གནས་སྡོད་བྱེད་མཁན་སྐྱབས་བཅོལ་བར་རོགས་དངུལ་ཧིན་སྒོར་ས་ཡ་ཉིས་བརྒྱ་ལྷག་ཙམ་མ་གཏོགས་གཏན་འབེབ་གནང་མེད་པའི་ཁར་སྔ་ལོའི་སྔོན་རྩིས་ལས་གསུམ་ལྡབ་ཙམ་ཉུང་འཕྲི་གནང་འདུག ཟླ་བ་འདིའི་ཕྱི་ཚེས་ ༣ ཉིན་ The Economic Times གསར་ཁང་ཞིག་གིས་གནས་ཚུལ་སྤེལ་བར་རྒྱ་གར་དབུས་གཞུང་གིས་ཕྱི་ལོ་ ༢༠༡༨༌༡༩ ལོའི་སྔོན་རྩིས་ནང་རྒྱལ་ཁབ་འདི་ནང་གནས་སྡོད་བྱེད་མཁན་གྱི་བོད་མི་དང་ཤྲི་ལངྒ་ནས་ཡིན་པའི་ཏ་མིལ་མི་རིགས། དེ་བཞིན་པ་ཀིས་ཐན་བཅས་ཀྱི་སྐྱབས་བཅོལ་བའི་རོགས་དངུལ་ས་ཡ་ ༡༠༠༠ ལྷག་གཏན་འབེབས་གནང་ཡོད་ཀྱང་། ཕྱི་ལོ་ ༢༠༡༩༌༢༠༢༠ ལོའི་སྔོན་རྩིས་ནང་ས་ཡ་ ༨༠༠ ལྷག་ཙམ་དང་འདི་ལོའི་སྔོན་རྩིས་བཀའ་འཁྲོལ་ནང་ས་ཡ་ཉིས་བརྒྱ་ལས་གཏན་འབེབས་གནང་མེད་སྟབས་འདི་ནི་སྔ་ལོའི་སྔོན་རྩིས་ལས་གསུམ་ལྡབ་ཙམ་ཉུང་འཕྲི་གནང་འདུག གནད་དོན་འདི་དང་འབྲེལ་རླུང་འཕྲིན་ཁང་གིས་དེ་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་སུ་བཀའ་འདྲི་ཞུས་པར་ཁོང་གིས་ད་ལྟའི་ཆར་རྒྱ་གར་དབུས་གཞུང་ནས་བཙན་བྱོལ་བོད་མིར་གནང་བའི་རོགས་དངུལ་དེ་འཕར་ཆ་དང་ཉུང་འཕྲི་གང་གནང་ཡོད་མེད་ཀྱི་བཀོད་ཁྱབ་གང་ཡང་ཕེབས་མེད་སྐོར་གསུངས་པ་དང་སྦྲགས། སྤྱིར་རྒྱ་གར་གཞུང་ནས་ད་བར་བོད་མི་སྐྱབས་བཅོལ་བ་རྣམས་ལ་རོགས་རམ་མུ་མཐུད་གནང་བཞིན་ཡོད་པ་མ་ཟད། ཉེ་ལམ་ཕྱི་ཟླ་ ༢ ཚེས་ ༡ ཉིན་ཀ་ན་ཊ་ཀ་མངའ་སྡའི་གཞུང་གིས་ལྷོ་ཕྱོགས་བོད་མིའི་གཞིས་ཆགས་ཁག་ལྔ་དང་ལྷོ་སྤྱི་བཅས་ཀྱི་རྒྱུན་གྲོན་དང་འཛུགས་སྐྲུན་ཡར་རྒྱས་སླད་དུ་རོགས་དངུལ་ཧིན་སྒོར་ས་ཡ་ ༣༠ གནང་སོན་བྱུང་ཡོད་སྐོར་གསུངས་ཡོད། གཞི་རྩའི་རྒྱ་གར་དབུས་གཞུང་གིས་བཙན་བྱོལ་བོད་མིའི་འཛུགས་སྐྲུན་དང་གཞིས་ཆགས་སྲ་བརྟན་སོགས་ལ་དམིགས་པའི་ལོ་ལྔ་རེའི་མཚམས་ནས་རོགས་དངུལ་ཧིན་སྒོར་ས་ཡ་ ༨༠ གནང་མུས་ཡིན་པ་དང་། ཉེ་ཆར་ ༢༠༡༥ ནས་ ༢༠༢༠ བར་གྱི་རོགས་དངུལ་དེ་གནང་འབྱོར་བྱུང་དོན་ལྟར་འགྲོ་གྲོན་སླད་དུ་བཏང་དང་གཏོང་མུས་ཡིན་པ་མ་ཟད། མ་འོངས་ཀྱི་ལོ་ལྔའི་རོགས་དངུལ་ཆེད་དུ་བོད་མིའི་སྒྲིག་འཛུགས་ཀྱིས་རྒྱ་གར་དབུས་གཞུང་ལ་སྙན་སེང་ཞུས་ཡོད་པ་རེད་འདུག