གསར་འགྱུར།

ཁ་སང་ཕྱི་ཚེས་ ༦ ཉིན་རྒྱ་གར་གྱི་རྒྱལ་ས་ལྡི་ལིར་དབུས་འོས་བསྡུ་ལས་ཁང་གི་གོ་སྒྲིག་འོག་རྒྱ་བལ་འབྲུག་གསུམ་དུ་གནས་པའི་ས་གནས་ཀྱི་འགོ་འཛིན་ནམ་འོས་བསྡུའི་འགན་འཛིན་རྣམས་ལ་འོས་བསྡུ་འཛིན་སྐྱོང་སྟངས་འཛིན་སོགས་ཀྱི་ཟབ་སྦྱོང་ཞིག་དབུ་འཛུགས་གནང་ཡོད་པ་རེད།རྒྱལ་ས་ལྡི་ལིའི་ India International Centre ཞེས་པའི་ལྟེ་གནས་ཁང་དུ་གོ་སྒྲིག་ཞུས་པའི་ཉིན་གྲངས་གསུམ་རིང་གི་ཟབ་སྦྱོང་ཁྲོད་ས་གནས་ཁག་གི་འོས་བསྡུའི་འགན་འཛིན་ ༣༠ ལྷག་མཉམ་ཞུགས་གནང་འདུག་པ་དང་། དབུས་འོས་བསྡུ་ལས་ཁང་གི་འགན་འཛིན་དཔེ་ཟུར་དབང་འདུས་ཚེ་རིང་ལགས་ཀྱིས་ཉིན་གྲངས་གསུམ་གྱི་རིང་ས་གནས་ཀྱི་འོས་བསྡུའི་འགན་འཛིན་རྣམས་ལ་ཕྱི་ལུགས་ཀྱི་མཁས་དབང་ཁག་གཅིག་གིས་རྒྱལ་སྤྱིའི་འོས་བསྡུའི་འགྲོ་ལུགས་དང་སྔོན་འགྲོའི་བྱ་རིམ། འཛིན་སྐྱོང་། དཀའ་རྙོག་ལ་གདོང་ལེན་གནང་ཕྱོགས་སོགས་ཀྱི་ཟབ་ཁྲིད་གནང་གི་ཡོད་སྐོར་གསུངས་ཡོད། དེ་བཞིན་དབུས་འོས་བསྡུ་ལས་ཁང་གི་འགན་འཛིན་དཔེ་ཟུར་དབང་འདུས་ཚེ་རིང་ལགས་ཀྱིས་མང་གཙོའི་སྒྲིག་འཛུགས་ཤིག་གི་ནང་འོས་བསྡུའི་བྱ་རིམ་ནི་ཤིན་ཏུ་ནས་གལ་འགངས་ཆེ་བའི་གནད་དོན་ཞིག་ཆགས་ཀྱི་ཡོད་པ་མ་ཚད་པར་འོས་བསྡུའི་བྱ་རིམ་དེ་དག་དཀའ་རྙོག་མེད་པར་དྲང་བདེན་ཞིག་ཡོང་ཐབས་གནང་རྒྱུ་ནི་དེ་བས་ཀྱང་གལ་འགངས་ཆེན་པོ་ཆགས་ཡོད་སྟབས། ས་གནས་འོས་བསྡུའི་འགན་འཛིན་རྣམ་པར་རྒྱལ་སྤྱིའི་འོས་བསྡུའི་འགྲོ་ལུགས་དང་ས་གནས་ཀྱི་གནས་སྟངས་ལ་གཞིགས་པའི་འཛིན་སྐྱོང་སྟངས་འཛིན་གནང་ཕྱོགས། ལྷག་པར་དུ་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་འོས་བསྡུའི་སྒྲིག་གཞི་སོ་སོར་གོ་རྟོགས་གསལ་པོ་དགོས་སྐོར་གསུངས་པ་དང་སྦྲགས། ཉིན་གྲངས་གཉིས་རིང་ཨ་རི་སོགས་ཀྱི་མཁས་དབང་ཚོས་ཟབ་ཁྲིད་གནང་རྒྱུ་དང་ཉིན་མཐའ་མར་དབུས་འོས་བསྡུ་ལས་ཁང་ནས་ཟབ་ཁྲིད་གནང་རྒྱུ་ཡིན་སྐོར་གསུངས་སོང་། གཞི་རྩའི་དབུས་འོས་བསྡུ་ལས་ཁང་ནི། ཕྱི་ལོ་ ༡༩༩༡ ལོར་སྐབས་ ༡༡ པའི་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་འབེབས་གནང་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལོ་དེའི་ཕྱི་ཟླ་ ༦ ཚེས་ ༢༨ ཉིན་ཆོག་མཆན་བཀྲིན་སྩལ་ཉིན་ནས་ཁྲིམས་སུ་བཅས་པའི་མང་གཙོའི་ཀ་བ་གསུམ་དང་། རང་དབང་ཅན་གྱི་སྡེ་ཚན་གསུམ་གསར་གཏོད་གནང་བའི་ཁོངས་ཀྱི་སྡེ་ཚན་གལ་ཆེ་བ་ཞིག་ཡིན་པ་རེད། སྡེ་ཚན་དེའི་འགན་དབང་གཙོ་བོ་ནི་བོད་མི་མང་སྤྱི་འཐུས་རྣམ་པ་དང་ཚོགས་གཙོ་ཚོགས་གཞོན། སྲིད་སྐྱོང་། ས་གནས་འཐུས་ཚོགས། ས་གནས་འགོ་འཛིན་ལ་སོགས་པའི་མང་མོས་འོས་བསྡུའི་ལས་དོན་ཅི་རིགས་བཅའ་ཁྲིམས་སྐབས་འཕྲལ་ལག་ལེན་འཐུས་ཚང་གནང་རྒྱུ་བཅས་ཀྱི་འགན་དབང་ཡོད་པ་རེད་། འོས་བསྡུ་ལས་ཁང་གཞིར་བཟུང་བྱས་ན་ད་ལྟའི་ཆར་རྒྱ་གར་དང་བལ་ཡུལ་བཅས་ཀྱི་བོད་མི་གནས་ཡུལ་ས་གནས་ཁག་ཏུ་འོས་བསྡུའི་འགན་འཁུར་བཞེས་མཁན་གྱི་ས་གནས་འགོ་འཛིན་ནམ་འོས་བསྡུའི་འགན་འཛིན་ཁག་ ༤༨  ཡོད་ཀྱང་། ཐེངས་འདིའི་རྒྱལ་ས་སྡི་ལིའི་ཟབ་སྦྱོང་ནང་ས་གནས་ཁག་ ༣༠ ཡི་འོས་བསྡུའི་འགན་འཛིན་མཉམ་ཞུགས་གནང་མེད་པ་དང་དེ་མིན་ས་གནས་ཁག་ ༡༨ ལ་མ་འོངས་པར་འབྲས་ལྗོངས་ས་གནས་སུ་ཟབ་སྦྱོང་གནང་རྒྱུ་ཡིན་པ་རེད།

ཁ་ཉིན་རྒྱལ་ཚོགས་ཀྱི་ཟུར་ཚོགས་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ཀྱི་གནད་དོན་དང་འབྲེལ་བའི་སྙན་ཐོ་ཞིག་འདོན་སྤེལ་གནང་བའི་ནང་རྒྱ་ནག་གཞུང་གི་ངོས་ནས་མ་འོངས་པར་༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་༸སྐུ་འཚོ་བཞུགས་མེད་པའི་དུས་སྐབས་ཀྱི་གྲ་སྒྲིག་དང་འབྲེལ་ཏེ། ༸རྒྱལ་བའི་ཡང་སྲིད་བསྐོ་གཞག་གི་གནད་དོན་ཐད་བདག་དབང་རྩོད་རྒྱུའི་ལས་དོན་ཇེ་ཆེར་སྤེལ་བཞིན་ཡོད་པ་མངོན་གསལ་གནང་འདུགརྒྱལ་སྤྱིའི་ཁྲོད་བོད་དོན་རྒྱབ་སྐྱོར་ཚོགས་པ་ ༡༢༠ ཙམ་ལས་གྲུབ་པའི་ ITN འམ་རྒྱལ་སྤྱིའི་བོད་དོན་འབྲེལ་མཐུད་ཁང་དང་ཁེ་ན་ཌ་ནང་གི་ Tibet Justice Center ཞེས་པའི་བོད་དོན་རྒྱབ་སྐྱོར་ཚོགས་པ་གཉིས་མཉམ་འབྲེལ་ཐོག Tibet, the Dalai Lama, and the Geopolitics of Reincarnation ཞེས་བོད་དང་༸གོང་ས་ཏཱ་ལའི་བླ་མ་མཆོག ༸སྐུའི་ཡང་སྲིད་དང་འབྲེལ་བའི་ཡུལ་བབ་སྲིད་བྱུས་དང་འབྲེལ་བའི་གནད་དོན་ཐོག་ཤོག་གྲངས་ ༣༢ ཅན་གྱི་སྙན་ཐོ་ཞིག་ཀྱང་འདོན་སྤེལ་གནང་ཡོད་པའི་ནང་རྒྱ་ནག་དམར་པོའི་གཞུང་དང་འབྲེལ་བ་ཡོད་པའི་བོད་གནས་ཉམས་ཞིབ་པ་བརྒྱུད་ནས་ལག་སོན་བྱུང་བའི་རྒྱ་ནག་གཞུང་གི་ནང་མོལ་ཡིག་ཆ་གལ་ཆེ་གཉིས་ལུང་འདྲེན་གྱིས་རྒྱ་ནག་གཞུང་གིས་ད་ལྟ་ནས་༸གོང་ས་༸སྐྱབས་མགོན་ཆེན་པོ་མཆོག་༸སྐུ་འཚོ་བཞུགས་མེད་པའི་རྗེས་ཀྱི་དུས་རབས་ཞེས། ཏཱ་ལའི་རྗེས་ཀྱི་དུས་རབས་ཟེར་བའི་ཐབས་བྱུས་གྲ་སྒྲིག་འོག་རྒྱ་ནག་རང་ཉིད་ཀྱི་ངོས་ནས་༸རྒྱལ་བའི་༸སྐུའི་ཡང་སྲིད་བསྐོ་གཞག་བྱེད་ཕྱོགས་དང་འབྲེལ་ནས་ནུབ་ཕྱོགས་ཀྱི་རྒྱལ་ཁབ་ཁག་དང་བརྒྱུད་ལམ་ཁག་ལ་ཆེད་དམིགས་ཀྱིས་དེ་ལྟ་བུའི་དུས་སྐབས་ཁྲོད་བོད་དོན་ལ་རྒྱབ་སྐྱོར་མཚམས་འཇོག་ཐུབ་ཐབས་དང་། བོད་བརྒྱུད་ནང་བསྟན་ཀྲུང་གོ་ཅན་དུ་འགྱུར་བའི་སྲིད་བྱུས་སྒོ་ནས་ལག་བསྟར་གྱིས་བོད་ས་ཡོངས་ལ་དབང་བསྒྱུར་སྲ་བརྟན། བོད་བརྒྱུད་ནང་བསྟན་ལ་སྟངས་འཛིན་གྱི་སྲིད་བྱུས་དེ་ཉིད་བོད་ནང་ཙམ་མ་ཡིན་པར་རྒྱ་གར་དང་འབྲུག་ཡུལ། བལ་ཡུལ། སོག་ཡུལ་གཙོས་པའི་དབུས་ཨེ་ཤ་ཡ་བཅས་ལ་རྒྱ་བསྐྱེད་ནས་ལག་བསྟར་བྱ་རྒྱུའི་ངན་བྱུས་ཀྱི་ལས་དོན་ཤུགས་ཆེ་རུ་བཏང་ཡོད་པ་མངོན་གསལ་གནང་འདུག སྙན་ཐོ་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནས་བབ་འདི་བོད་དང་བོད་མི། བོད་མིའི་ཆོས་རིག་དང་འབྲེལ་བའི་གནད་ཀྱི་སྙིང་པོ་ཆགས་ཡོད་པར་མ་ཟད། བོད་ཙམ་མིན་པར་གཙོ་བོ་ཧི་མཱ་ལ་ཡ་རི་རྒྱུད་དུ་གནས་པའི་ནང་པ་དང་སོག་ཡུལ། ཉི་ཧོང་དང་ཝེ་ཏི་ནམ། ཨུ་རུ་སུ་ཁུལ་གྱི་ནང་པའི་རྒྱལ་ཁབ་ཁག་གི་རིག་གཞུང་དང་ཡང་འབྲེལ་བ་ཆེན་པོ་ཆགས་ཀྱི་ཡོད་པར་མ་ཟད། ནུབ་ཕྱོགས་རྒྱལ་ཁབ་ཁག་དང་རྒྱ་ནག་ནང་ལོག་ལའང་བོད་བརྒྱུད་ནང་བསྟན་གྱི་རྗེས་འབྲང་པ་མང་པོ་ཡོད་སྟབས་འབྲེལ་བ་ཆེན་པོ་ཆགས་ཡོད་པར་ཐེར་འདོན་གནང་བ་དང་སྦྲགས། རྒྱ་ནག་གཞུང་གི་ངན་བྱུས་དེ་དག་ལམ་ལྷོང་འབྱུང་ཚེ་དེའི་ཐོག་ནས་རྒྱལ་སྤྱིའི་ཁྲོད་བོད་དོན་རྒྱབ་སྐྱོར་བ་མེད་པ་བཟོ་རྒྱུ་སོགས་རྒྱལ་སྤྱིའི་ཁྱོན་ཡོངས་ཀྱི་ཆབ་སྲིད་ཀྱི་འབྲེལ་ལམ་ལ་འགྱུར་ལྡོག་འགྲོ་ཉེན་ཡོད་པར་མ་ཟད། རྒྱ་ནག་གིས་ངོས་འཛིན་བྱས་པའི་༸རྒྱལ་བའི་ཡང་སྲིད་བརྒྱུད་ནས་བོད་མིའི་ཆོས་དང་རིག་གཞུང་གི་སྙིང་པོ་མེད་པ་བཟོས་ཏེ་རྒྱ་གཞུང་གིས་ལོ་མང་ནས་བོད་ནང་བོད་བརྒྱུད་ནང་བསྟན་ཀྲུང་གོ་ཅན་དུ་འགྱུར་བའི་སྲིད་བྱུས་སྒོ་ནས་བོད་མི་རིགས་ཀྱི་ངོ་བོ་རྩ་མེད་བཟོ་རྒྱུ་དང་། བོད་མི་དང་ཏཱ་ལའི་བླ་མའི་དབར་གྱི་ཐུན་མོང་མིན་པའི་འབྲེལ་བ་དེ་མེད་པ་བཟོ་རྒྱུ་སོགས་ལ་དམིགས་བཞིན་ཡོད་པ་གསལ་འདུག དེ་བཞིན་ཚོགས་པར་ལག་སོན་བྱུང་བའི་ཡིག་ཆ་གཉིས་ཀའི་ནང་༸གོང་ས་མཆོག་༸སྐུ་འཚོ་བཞུགས་མེད་པའི་རྗེས་ཀྱི་གནད་དོན་དེ་རྒྱ་ནག་ལ་གོ་སྐབས་ཤིག་ཡིན་པར་བཤད་དེ་རྒྱ་ནག་གིས་ངོས་འཛིན་བྱས་པའི་༸པཎ་ཆེན་གྱི་ཐོག་ནས་བོད་ཐོག་དབང་ཆ་སྲ་བརྟན་བཟོ་རྒྱུ་སོགས་དང་། ལྷག་པར་༸པཎ་ཆེན་རྒྱལ་མཚན་ནོར་བུ་དེ་རྒྱ་ནག་དམར་ཤོག་ཚོགས་པའི་ཆབ་སྲིད་ཀྱི་ལག་ཆ་ཡིན་པའི་ལྟ་ཚུལ་ལ་གདོང་ལེན། རྒྱལ་མཚན་ནོར་བུ་དེ་རྒྱལ་གཅེས་ཆོས་གཅེས་ཀྱི་སློབ་གསོ་སྤེན་མཁན་ཙམ་མིན་པར་བོད་བརྒྱུད་ནང་བསྟན་གོང་འཕེལ་གཏོང་མཁན་དང་བོད་མིའི་བདེ་དོན་སྲུང་མཁན་གྱི་མགྲིན་ཚབ་པའི་རྣམ་པ་མངོན་གསལ་བྱེད་ཐབས་སོགས་འཁོད་པར་ཐེར་འདོན་གནང་འདུག བོད་དོན་རྒྱབ་སྐྱོར་ཚོགས་པ་དེ་དག་གིས་ཁ་ཉིན་༸སྐུའི་ཡང་སྲིད་ཀྱི་གནད་དོན་ཐོག་ཚོགས་པའི་རྒྱལ་ཚོགས་ཀྱི་ཟུར་ཚོགས་ཐོག་སྙན་ཐོ་འདོན་སྤེལ་དང་སྦྲགས། ཨ་རི་གཞུང་ལྟར་རྒྱལ་སྤྱིའི་གཞུང་གཞན་རྣམས་ཀྱིས་ཀྱང་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་རྒྱ་ནག་ལ་ཐེ་བྱུས་རྩ་བ་ནས་བྱེད་དབང་མེད་པ་གསལ་བཟོའི་ཁྲིམས་གཞི་གཏན་འབེབས་གནང་སྐྱོང་ཡོང་བ་དང། ༸པཎ་ཆེན་རྒྱལ་མཚན་ནོར་བུར་རྒྱབ་སྐྱོར་མཚམས་འཇོག་གིས་༸གོང་ས་མཆོག་གིས་ངོས་འཛིན་མཛད་པའི་༸པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་ཤེས་རྟོགས་ཐུབ་སླད་ཤུགས་གནོན་རྒྱག་དགོས་པ། དེ་བཞིན་གཞུང་སོ་སོའི་ཁྲོད་བོད་དོན་དམིགས་བསལ་འབྲེལ་མཐུད་པ་འམ་བོད་དོན་སྲིད་བྱུས་དང་འབྲེལ་བའི་སློབ་སྟོན་པ། ཡང་ན་བོད་ཀྱི་སྡེ་ཚན་སོགས་ལོགས་སུ་ཆེད་འཛུགས་གནང་ཐབས་དགོས་པར་མ་ཟད། ༸སྐུའི་ཡང་སྲིད་ཀྱི་གནད་དོན་དང་བོད་མིའི་སྒྲིག་འཛུགས་ལ་སྲུང་སྐྱོབ་སོགས་ཀྱི་ཐད་རྒྱ་གར་གཞུང་ལ་མཐུན་འགྱུར་ཡོང་ཐབས་ལ་འབད་བརྩོན་གནང་དགོས་པ་སོགས་དགོས་འདུན་དོན་ཚན་ཁག་གཅིག་ཆེད་བཀོད་གནང་འདུག དེ་མཚུངས་སུ་སྙན་ཐོ་ནང་སོག་ཡུལ་དེ་དེ་སྔ་༸རྒྱལ་བའི་ཡང་སྲིད་འཁྲུངས་ཡུལ་གྱི་རྒྱལ་ཁབ་ཅིག་དང་། དེ་སྔ་སོག་ཡུལ་གྱི་ཆོས་ཕྱོགས་ཀྱི་དབུ་ཁྲིད་ཁལ་ཁ་རྗེ་བཙུན་དམ་པ་མཆོག་གི་ཡང་སྲིད་ངོས་འཛིན་གནང་སྐབས་སུའང་༸གོང་ས་མཆོག་འབྲེལ་བ་ཆགས་ཀྱི་ཡོད་པ་བཅས་གནད་དོན་གཉིས་ཀྱི་ཐོག་ནས་གནད་དགག་ཆགས་ཀྱི་ཡོད་པ་མངོན་གསལ་གནང་བ་དང་ཆབས་ཅིག་སོག་ཡུལ་རྒྱལ་ཁབ་ཀྱི་མང་གཙོ་དང་བོད་བརྒྱུད་ནང་བསྟན་གྱི་སྒྲིག་འཛུགས། དེ་བཞིན་རིན་པོ་ཆེ་མཆོག་བཅས་ཀྱི་སྲུང་སྐྱོབ་ཐད་ལ་བཞེངས་ཕྱོགས་བརྟན་པོ་ཞིག་དགོས་པ་ཡང་བཀོད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་ཕོ་བྲང་དུ་བདེ་ལེགས་སྨན་ཁང་དབུ་བརྙེས་ནས་མི་ལོ་ ༥༠ འཁོར་བའི་དུས་སྟོན་དང་བསྟུན་སྨན་ཁང་གི་ལས་སྣེ་དང་ཞབས་ཞུ་བ་ཡོངས་ལ་མཇལ་ཁ་སྩལ་ཡོད་པ་དང་སྐབས་དེར་༸གོང་ས་མཆོག་གིས་བདེ་ལེགས་སྨན་ཁང་ལ་སྨན་གཏུག་གནང་མཁན་ཚོས་ཕན་ཐོགས་བྱུང་ཞེས་དགའ་མོས་གནང་མཁན་མང་པོ་ཡོང་གི་འདུག་པས་སྨན་ཁང་གིས་ད་བར་མི་མང་མཆོག་དམན་དབྱེར་མེད་ཚང་མར་ཕན་ཐོགས་ཆེན་པོ་བྱུང་ཡོད་སྟབས། སྨན་ཁང་ལ་སྨན་གཏུག་གནང་མཁན་ཡོངས་ཀྱི་སྐུ་ཚབ་མཛད་དེ་ཐུགས་རྗེ་ཆེ་ཞེས་བཀའ་སྩལ་མཛད་པར་མ་ཟད་ལྷག་པར་དུ་བདེ་ལེགས་སྨན་ཁང་ནི་མགོན་པོ་༸གང་ཉིད་མཆོག་གི་བཞུགས་སྒར་དང་ཇོ་བོ་ཝ་ཏི་བཟང་པོ་འདིར་བཞུགས་པའི་ཆ་ནས་དམིགས་བསལ་ཆགས་ཅན་ཞིག་ཡོད་ཅེས་དང་སྨན་ཁང་གིས་སྔར་བཞིན་དལས་དོན་མཐའ་དག་ལ་ཧུར་ཐག་གྱིས་ཤིག་ཅེས་བཀའ་སྩལ་འདུགདེ་བཞིན་མགོན་པོ་མཆོག་གིས་སྨན་ཁང་གི་ཞབས་ཞུ་བ་ཚོས་ནད་པར་ལྟ་སྐབས་སྒྲོལ་མའི་གཟུངས་སྔགས་བགྲང་ན་ཕན་ཐོགས་ཡོད་པ་བཀའ་སྩལ་བ་དང་ཆབས་ཅིག བཙན་བྱོལ་དུ་བཞུགས་རིང་བདེ་ལེགས་སྨན་ཁང་དུ་ཕྱག་ལས་གནང་བ་དེས་དགེ་བའི་ལས་སྟོབས་ཆེན་བསགས་ཡོད་པ་སྤྱི་དང་སྒོས་འཕགས་པ་སྤྱན་རས་གཟིགས་ཀྱིས་དུས་རྟག་ཏུ་གཟིགས་བཞིན་ཡོད་བསམ་ནས་སེམས་སྐྱིད་པོ་གྱིས་ཤིག་ཅེས་བཀའ་སྩལ་ཡོད།མགོན་པོ་༸གང་ཉིད་མཆོག་གིས་ད་ལྟ་བོད་ཀྱི་གནས་སྟངས་དཀའ་ངལ་ཅན་ཞིག་ཆགས་ཡོད་ཀྱང་འགྱུར་བ་ཏན་ཏན་འགྲོ་གི་རེད། ངོས་ཀྱི་ངོ་ཤེས་པ་ཚོས་ད་ལྟ་ཆབ་སྲིད་ཀྱི་ཐོག་ནས་རྒྱ་མིས་བོད་ལ་དབང་བསྒྱུར་བྱས་ཡོད་ཀྱང་། མ་འོངས་པར་ཆོས་ཕྱོགས་ཀྱི་ཐོག་ནས་རྒྱ་ནག་ལ་དབང་བསྒྱུར་ཐུབ་ཀྱི་རེད་ཅེས་སྙན་སེང་ཞུས་སྐོར་བཀའ་སྩལ་བ་དང་། དེང་སང་རྒྱ་ནག་ཏུ་ནང་པའི་ཆོས་ལ་དོ་སྣང་བྱེད་མཁན་ཤུགས་ཆེ་རུ་འགྲོ་བཞིན་འདུག ནང་པའི་ཆོས་ལ་དོ་སྣང་བྱེད་མཁན་ཚོས་རྒྱལ་བ་བསྟན་འཛིན་རྒྱ་མཚོ་ཞེས་དམིགས་བསལ་གྱིས་དགའ་བོ་བྱེད་ཀྱི་འདུག གང་ལྟར་བོད་ཀྱི་བདེན་མཐའ་གསལ་བ་ཞིག་ཏན་ཏན་ཡོང་གི་རེད་ཅེས་བཀའ་སྩལ་འདུག

བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གཙོས་པའི་རྒྱ་ནག་གི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་དང་། རྒྱལ་སྤྱིའི་མནར་གཅོད་འགོག་པའི་ཚོགས་པ། རྒྱལ་སྤྱིའི་ཡུ་གུར་ཚོགས་པ། དེ་བཞིན་ལྷོ་སོག་འགྲོ་བ་མིའི་ཐོབ་ཐང་ཤེས་ཡོན་བསྟི་གནས་ཁང་སོགས་ཚོགས་པ་ཁག་ཅིག་མཉམ་འབྲེལ་གྱིས་རྒྱ་ནག་གི་སྲིད་འཛིན་ཞི་ཅིན་ཕིང་གི་མིང་ཐོག་ལ་ཕྱག་བྲིས་ཤིག་གནང་སྟེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ངོས་ནས་རྒྱལ་ཚོགས་ལ་མནར་གཅོད་མཚམས་འཇོག་གི་གྲོས་མཐུན་ལག་བསྟར་བྱེད་ཕྱོགས་ཐད་ཀྱི་སྙན་ཐོའི་དུས་ཚོད་མཐའ་མ་དེ་ཟིན་ནས་ད་ཆ་ཕལ་ཆེར་ལོ་གསུམ་འགྲོ་གི་ཡོད་སྟབས། རྒྱ་ནག་གཙོ་གྱུར་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་ཡོངས་ཀྱི་ཚབ་ཞུས་ཏེ་དེ་འབྲེལ་གྱི་སྙན་ཐོ་དེ་ད་དུང་ཡང་དུས་འགྱངས་མེད་པ་གང་མགྱོགས་རྒྱལ་ཚོགས་ལ་འབུལ་དགོས་པའི་ཞུ་སྐུལ་གནང་འདུག ཕྱག་བྲིས་ནང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་མནར་གཅོད་མཚམས་འཇོག་གི་གྲོས་མཐུན་བཞག་པ་དང་སྦྲགས་ལོ་བཞི་རེར་དེ་འབྲེལ་སྙན་ཐོ་འབུལ་རྒྱུའི་ངོས་ལེན་ཞུས་ཡོད་པ་དེ་ལྟར་ནའང་། རྒྱ་ནག་གིས་ཕྱི་ལོ་ ༢༠༡༥ ལོར་སྙན་ཐོ་ཐེངས་ལྔ་པའི་དུས་བཀག་བསྐྱར་ཞིབ་རྗེས་སྙན་ཐོ་དྲུག་པ་དེ་ཕུལ་མེད་པ་དང་ལྷག་པར་འདས་པའི་ལོ་ངོ་བཅུ་ཕྲག་གཉིས་ནང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ངོས་ནས་རྒྱལ་ཚོགས་ཀྱི་མནར་གཅོད་འགོག་པའི་ཚོགས་ཆུང་ལ་སྙན་ཐོ་དེ་དུས་ཐོག་ཏུ་ཕུལ་མེད་པའི་ཁར་ཕྱི་ལོ་ ༢༠༠༥ ལོ་ནས་བཟུང་རྒྱལ་ཚོགས་ཀྱི་དམིགས་བསལ་ཆེད་ལས་པ་མགྲོན་འབོད་ཞུས་མེད་སྐོར་བཀོད་འདུག དེ་སྔོན་རྒྱ་ནག་གི་དུས་བཀག་བསྐྱར་ཞིབ་ཐེངས་ལྔ་པའི་སྐབས་རྒྱལ་ཚོགས་ཀྱི་ཚོགས་ཆུང་ནས་རྒྱ་གཞུང་གིས་གྱོད་ཞིབ་སྔོན་དང་བཀག་བསྐྱིལ་སྐབས་སུ་བཙོན་པར་མནར་གཅོད་དང་གར་སོང་ཆ་མེད་དུ་བཏང་བ།  དེ་བཞིན་སྡུག་སྦྱོང་ཚད་མེད་བཏང་སྟེ་སྐོར་སྲུང་བའི་དོ་དམ་འོག་འདས་གྲོངས་སུ་གྱུར་ཡོད་པར་ཐུགས་འཚབ་ཀྱི་རྣམ་པ་ཆེད་བཏོན་གནང་ཡོད་སྐོར་དང་ཆབས་ཅིག རྒྱ་གཞུང་གིས་བོད་མི་དང་ཡུ་གུར་བ། དེ་བཞིན་ཧན་རྒྱ་རིགས་ལ་སྡུག་སྦྱོང་མནར་གཅོད་བཏང་བའི་བདེན་དཔང་ཇི་སྙེད་ཅིག་ཡོད་པ་མ་ཚད་པར་རྒྱ་ནག་གི་སྐོར་སྲུང་བའི་ལག་ནས་ཆབ་སྲིད་བཙོན་ཟུར་དང་འགྲོ་བ་མིའི་ཐོབ་ཐང་དོན་གཉེར་བ་མང་དག་ཅིག་འདས་གྲོངས་སུ་གྱུར་ཡོད་པ་གསུངས་འདུག ད་དུང་རྒྱ་ནག་གིས་མནར་གཅོད་དང་རྡུང་རྡེག་ཚད་མེད་འོག་ཕྱི་ལོ་ ༢༠༡༩ ལོར་ནོར་བཟང་ལགས་དང་ཕྱི་ལོ་ ༢༠༢༠ ལོར་ལྷ་མོ་ལགས་སོགས་འདས་གྲོངས་སུ་གྱུར་སྐོར་གསུངས་འདུག་པ་དང་། ཤར་ཏུ་ཀི་སི་ཏན་ལ་ཆ་མཚོན་ན་རྒྱ་ནག་གིས་ཡུ་གུར་མི་རིགས་རྣམས་ལ་མི་འདོད་བཞིན་དུ་ཆབ་སྲིད་སློབ་གསོ་བསྟི་གནས་ཁང་དུ་ཆབ་སྲིད་སློབ་གསོ་སྤྲད་ཡོད་སྟབས་རྒྱ་ནག་གིས་སྙན་ཐོ་འབུལ་ལམ་མ་ཞུ་བ་དེས་ཕྱི་ཕྱོགས་ཀྱི་སྐྱོན་བརྗོད་སོགས་ལས་གཡོལ་ཐབས་བྱེད་ཀྱི་ཡོད་སྐོར་གསུངས་འདུག རྒྱ་ནག་གིས་སྙན་ཐོ་མ་འབུལ་བ་དེས་རྒྱལ་སྤྱི་དང་རྒྱལ་ཚོགས་ཀྱི་ལས་དོན་དག་ཚགས་ཚུད་ལམ་ལྷོང་ཡོང་བར་འགོག་རྐྱེན་དང་ཆབས་ཅིག་རྒྱལ་སྤྱིའི་ཁྲོད་འགྲོ་བ་མིའི་ཐོབ་ཐང་གི་འཐབ་རྩོད་ལ་སྣང་ཆུང་བྱས་པ་ཞིག་ཆགས་ཡོད་ཅེས་གསུངས་འདུག

འཚོགས་ལ་ཉེ་བའི་ཟླ་བ་འདིའི་ཕྱི་ཚེས་ ༡༦ ཉིན་རྒྱ་ནག་དམར་ཤོག་ཚོགས་པའི་ཚོགས་ཆེན་ཐེངས་ ༢༠ ནང་མཉམ་ཞུགས་བྱེད་མཁན་གྱི་རྒྱལ་ཡོངས་འཐུས་མི་ནང་བོད་མིའི་འཐུས་མི་མི་གྲངས་ ༣༨ བཀོད་སྒྲིག་བྱས་འདུགདེ་ཡང་ཁ་སང་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་དྲ་ཐོག་སྤེལ་བའི་གནས་ཚུལ་ལ་གཞིགས་ན། རྒྱ་ནག་དམར་ཤོག་ཚོགས་པའི་ཚོགས་ཆེན་དེའི་ཐོག་མཉམ་ཞུགས་བྱེད་མཁན་གྱི་རྒྱལ་ཡོངས་འཐུས་མིའི་ཁྱོན་མི་གྲངས་ ༢༢༩༦ ཁྲོད་བོད་མིའི་འཐུས་མི་བརྒྱ་ཆ་ ༡་༦༥ མ་གཏོགས་མེད་པ་དེ་ལྟར་ཡང་། རྒྱ་ནག་གིས་དབང་སྒྱུར་འོག་ཡོད་པའི་བོད་པའི་ས་ཁྱོན་བཞི་ཆ་གཅིག་ཆགས་ཡོད་སྐོར་འཁོད་འདུག་པ་དང་། ཚོགས་ཆེན་དེར་རྒྱ་ནག་གི་དབྱེ་བའི་བོད་རང་སྐྱོང་ལྗོངས་ནས་བོད་མི་ ༡༨ ཡོད་པ་དང་། དེའི་ཁྲོད་བུད་མེད་འཐུས་མི་ ༨ དེ་བཞིན་ཤང་ཧའེ་ཞིང་ཆེན་གྱི་བོད་རིགས་ས་ཁུལ་ནས་བོད་མིའི་འཐུས་མི་ ༤ དང་། རྒྱ་ནག་གི་དབྱེ་བའི་ཟི་ཁྲོན་དང་ཡུ་ནན། ཀན་སུ་ཞིང་ཆེན་ནས་བོད་མི་ ༣ དང་། གཉིས་རེ་བཅས་ཞིང་ཆེན་དེ་དག་བཞི་ནས་བུད་མེད་རེ་རེ་ཡོད་སྐོར་འཁོད་འདུགཕྱོགས་མཚུངས་དབུས་དང་མངའ་སྡེའི་ལས་ཁུངས་ནས་བོད་པའི་འཐུས་མི་ ༢ དང་། རྒྱ་ནག་བཅིངས་གྲོལ་དམག་མི་དང་རྒྱ་ནག་ཉེན་རྟོག་སྡེ་ཁག་ནས་བོད་པའི་འཐུས་མི་ ༤ དེ་བཞིན་དབུས་དཔལ་འབྱོར་སྡེ་ཁག་ནས་བོད་མི་ ༢ བཅས་དེ་དག་གི་ནང་དུ་བུད་མེད་འཐུས་མི་གཅིག་རེ་ཡོད་པ་མ་ཟད། གོང་གི་འཐུས་མིའི་དེ་དག་ལས་གནས་རིམ་མཐོ་ཤོས་ད་ལྟའི་ཆར་ཧྥུ་ཅིན་ཞིང་ཆེན་གྱི་ཆབ་སྲིད་གྲོས་མོལ་ཚོགས་པའི་ཚོགས་གཙོ་བོད་པའི་བུད་མེད་ ༡ བཅས་ཁྱོན་རྒྱ་ནག་དམར་ཤོག་ཚོགས་པའི་ཚོགས་ཆེན་དེར་བོད་མིའི་འཐུས་མི་མི་གྲངས་ ༣༨ བཀོད་སྒྲིག་བྱས་ཡོད་སྐོར་འཁོད་འདུག མ་ཟད་རྒྱ་ནག་དམར་པོའི་གཞུང་གི་བོད་ས་ཡོངས་རྗོགས་མི་ལོ་ ༦༠ རིང་ལ་དབང་སྒྱུར་བྱེད་པ་དེ་ལྟར་ནའང་རྒྱ་ནག་གི་ཆབ་སྲིད་ལམ་ལུགས་ཀྱི་གནས་རིམ་མཐོ་ཤོས་རྒྱ་ནག་དམར་ཤོག་ཚོགས་པའི་དབུས་ཆབ་སྲིད་ཨུ་ཡོན་ལྷན་ཁང་གི་རྒྱུན་ལས་དང་། གཉིས་པ་རྒྱ་ནག་མི་མང་དབུས་ཆབ་སྲིད་ལྷན་ཚོགས་གཉིས་ཀྱི་ནང་དུ་ད་བར་བོད་མི་གཅིག་ཀྱང་བཀོད་མྱོང་མེད་པ་སོགས་འཁོད་འདུག འདི་ག་རླུང་འཕྲིན་ཁང་ནས་ཐེ་ཝན་སྐུ་ཚབ་དོན་གཅོད་སྐལ་བཟང་རྒྱལ་མཚན་ལགས་སུ་གནད་དོན་དེ་དང་འབྲེལ་ནས་བཀའ་འདྲི་ཞུས་སྐབས། འཚོགས་ལ་ཉེ་བའི་རྒྱ་ནག་དམར་ཤོགས་ཚོགས་པའི་ཚོགས་ཆེན་གྱི་འཐུས་མིའི་ནང་བོད་མི་འདེམ་སྒྲུག་བྱས་པ་དེ་དག་འཁྲབ་སྟོན་ཙམ་ཞིག་ཡིན་པ་དང་། དེའི་བརྒྱུད་ནས་བོད་ནང་གི་བོད་མི་རྣམས་ལ་གཞི་རྩའི་ཐོབ་ཐང་དང་། ལྷག་པར་དུ་འགྲོ་བ་མིའི་ཐོབ་ཐང་སོགས་ཡོད་པ་ནམ་ཡང་མཚོན་ཐུབ་ཀྱི་མེད་ཅེས་འགྲེལ་བརྗོད་གནང་བྱུང་།རྩ་བའི་ལོ་བཅུ་རའི་ནང་ཐེངས་གཉིས་རེ་ལས་ཚོགས་སྲོལ་མེད་པའི་རྒྱ་ནག་དམར་ཤོག་ཚོགས་པའི་ཚོགས་ཆེན་དེའི་ཐོག་དམར་ཤོག་ཚོགས་པའི་སྲིད་བྱུས་གཏན་འབེབས་དང་། འགོ་ཁྲིད་མཐོ་ཤོས་དེ་འདེམ་སྒྲུག་བྱེད་ཀྱི་ཡོད་པ་དང་བསྟུན། ད་ལྟའི་ཆར་སྲིད་འཛིན་ཞི་ཅིན་ཕིང་གི་ངོས་ནས་རང་ཉིད་རྒྱ་ནག་དམར་ཤོག་ཚོགས་པའི་དྲུང་ཆེར་སླར་ཡང་དུས་ཡུན་ཐེངས་གསུམ་པར་བདམས་ཐོན་བྱུང་རྒྱུའི་རེ་བ་དང་རང་ཉིད་ཀྱི་དབང་ཆ་རྒྱ་སྐྱེད་ཀྱི་འཆར་གཞི་མངོན་གསལ་བྱུང་ཡོད་པ་ཆབས་ཅིག རྒྱ་ནག་གཞུང་འབྲེལ་གྱི་གསར་ཁང་གི་སྤེལ་བའི་གནས་ཚུལ་ལ་གཞིགས་ན། ཞི་ཅིན་ཕིང་གིས་རྒྱ་ནག་འདི་བཞིན་ལེའུ་གསར་པ་ཞིག་འགོ་འཛུགས་བྱ་རྒྱུ་ཡིན་པའི་ཡོངས་བསྒྲགས་བྱས་ཡོད་སྐོར་འཁོད་ཡོད།  

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༸དཔལ་ནཱ་ལེནྡཱའི་སློབ་དཔོན་ཆེན་མོ་དཔལ་ལྡན་ཆོས་ཀྱི་གྲགས་པས་མཛད་པའི་ཚད་མ་རྣམ་འགྲེལ་གྱི་ལེའུ་གཉིས་པའི་བཀའ་ཆོས་འཕྲོ་སྐྱོང་མཛད་པ་དང་ཆབས་ཅིག་བྱང་ཆུབ་སེམས་བསྐྱེད་ཀྱི་སྡོམ་པ་འབོག་པར་མཛད་དེ་ཉིན་གསུམ་གྱི་བཀའ་ཆོས་རེ་ཞིག་མཇུག་སྒྲིལ་མཛད་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཆེད་དུ་བྱ་བའི་གདུལ་བྱ་ཐེ་ཝན་གྱི་དད་ལྡན་མི་མང་གིས་གཙོས་པའི་ཕྱི་ནང་གི་དད་ལྡན་ཆོས་ཞུ་བ་རྣམས་ལ་སེམས་བསྐྱེད་ཀྱི་སྡོམ་པ་འབོག་པར་མཛད་པ་དང་ཆབས་ཅིག་མགོན་པོ་༸གང་ཉིད་མཆོག་གིས་ཉིན་ལྟར་བྱང་ཆུབ་ཀྱི་སེམས་དང་སྟོང་པ་ཉིད་ཀྱི་ལྟ་བ་ཉམས་བཞེས་མཛད་ཀྱི་ཡོད་སྐོར་བཀའ་སྩལ་བ་མ་ཟད་མང་ཚོགས་རྣམས་ཀྱིས་ཀྱང་བྱང་ཆུབ་སེམས་དང་སྟོང་ཉིད་ཀྱི་ལྟ་བ་ལ་མཐིལ་ཕྱིན་པའི་ཉམས་བཞེས་གནང་དགོས་པ་དང་། ལྷག་དོན་ཕྱི་ནང་གི་དད་ལྡན་ཆོས་ཞུ་བ་སྟོང་ཕྲག་ལྷག་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་གཞུང་ལ་སློབ་གཉེར་དང་སྤྱོད་འཇུག་གི་ཕྱག་དཔེར་ཉིན་ལྟར་ལྟ་ཀློག་གནང་དགོས་གལ་ཡིན་པར་ལམ་སྟོན་བཀའ་དྲིན་ཆེ་བ་མཛད་ཡོད།༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ཆོས་སྩལ་གྲུབ་མཚམས་སུ་ཆོས་ཞུ་རྣམས་ལ་བཀའ་འདྲི་དགོངས་སྐོར་ཞུ་རྒྱུའི་གོ་སྐབས་བཀའ་དྲིན་སྩལ་བ་ལྟར། ཆོས་ཞུ་བའི་ཁོངས་ནས་རིགས་ལམ་ཐོག་ནས་ནང་ཆོས་ལ་སློབ་གཉེར་གནང་སྟེ་ངེས་པ་རྙེད་ཚུལ་ཇི་ལྟར་གནང་དགོས་སྐོར་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་བོད་གངས་ཅན་ལྗོངས་ལ་ལམ་རིམ་ཞེས་པའི་ཕྱག་དཔེ་གནད་འགག་ཅན་ཞིག་ཡོད་པ་དེར་སློབ་གཉེར་གནང་དགོས་ཞེས་ལམ་སྟོན་སྩལ་སོང་།དེ་བཞིན་ཐེ་ཝན་བོད་བརྒྱུད་ནང་བསྟན་མཐུན་ཚོགས་ཀྱི་ངོས་ནས་ཐེ་ཝན་ས་གནས་ཀྱི་གནས་སྟངས་དང་མཐུན་པའི་ལས་དོན་གཙོ་བ་གནང་གཉེར་ན་ལེགས་སམ་ཞེས་ལམ་སྟོན་ཞུས་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ཝན་གྱི་ཆོས་གྲོགས་ཕལ་ཆེ་བ་དགེ་ལུགས་པའི་ཆོས་བརྒྱུད་རྗེས་འབྲང་པ་ཆགས་ཀྱི་ཡོད་སྟབས་༸རྗེ་རིན་པོ་ཆེའི་གསུང་དང་དབུ་མ་འཇུག་པ། ལྷག་པར་དུ་བོད་གངས་ཅན་ལྗོངས་ཀྱི་ས་དགེ་བཀའ་རྙིང་གི་རིས་སུ་མ་ཆེད་པའི་ཆོས་བརྒྱུད་ཁག་ཚང་མས་གཟིགས་བཞིན་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པ་ཞེས་བྱ་བའི་ཕྱག་དཔེར་སློབ་གཉེར་གནང་དགོས་གལ་ཡིན་པར་བཀའ་སྩལ་ཡོད།སེམས་ཀྱི་ཞི་བདེ་བསྐྲུན་ཐབས་དང་དགེ་བའི་ལས་བསག་ཚུལ་གྱི་བཀའ་འདྲི་དགོངས་སྐོར་ཞུས་སྐབས་ ༸གོང་ས་མཆོག་གིས་ཉོན་མོངས་དང་རང་བཅེས་འཛིན་གྱི་བློས་སེམས་ཀྱི་ཞི་བདེ་དཀྲུག་གི་ཡོད་སྟབས། སྤྱོད་འཇུག་ལས། འཇིག་རྟེན་སྡུག་བསྔལ་ཇི་སྙིད་པ། །དེ་ཀུན་རང་བདེ་འདོད་ལས་བྱུང་། །འཇིག་རྟེན་བདེ་བ་ཇི་སྙིད་པ། །དེ་ཀུན་གཞན་བདེ་འདོད་ལས་བྱུང་། ། ཞེས་གསུངས་པ་ལྟར་རང་གཅེས་འཛིན་ཤུགས་ཆུང་རུ་གཏོང་ཐུབ་པ་ཞིག་དང་དེའི་ཐོག་ལ་གཞན་གཅེས་འཛིན་གྱི་བསལ་བློ་ཇི་ཙམ་གྱིས་གཏོང་བ་དེས་ཚོད་ཀྱིས་རང་དོན་བསྒྲུབ་རྒྱུ་ཡག་ཤོས་དེ་ཆགས་ཡོད་པ་སོགས་ལམ་སྟོན་བཀའ་དྲིན་ཆེ་བ་སྩལ་གནང་མཛད་སོང་།གཞི་རྩའི་༸གོང་ས་མཆོག་གི་མཛད་འཆར་ལ་གཞིགས་ན། རིང་མིན་འདི་ལོའི་ཕྱི་ཟླ་ ༡༢ ཀྱི་ཟླ་འཇུག་ཏུ་གནས་མཆོག་རྡོ་རྗེ་གདན་དུ་བྱང་ཆུབ་སེམས་འགྲེལ་དང་ཐུགས་རྗེ་ཆེན་པོའི་བཀའ་དབང། སྒྲོལ་མ་གཉེར་གཅིག་གི་རྗེས་གནང་བཅས་ཉིན་གྲངས་གསུམ་རིང་གི་བཀའ་ཆོས་སྩལ་རྒྱུ་ཐུགས་གཏན་ཁེལ་ཡོད་པ་དང་། དེ་ནི་ཏོག་དབྱིབས་གཉན་རིམས་ཁྱབ་གདལ་གྱི་གནས་སྟངས་ཇེ་བཟང་དུ་སོང་བའི་རྗེས་སུ་མགོན་པོ་༸གང་ཉིད་མཆོག་གིས་རྡོ་རྗེ་གདན་དུ་ཆོས་འབྲེལ་མཛད་པ་ཆེས་ཐོག་མ་དེ་ཆགས་ཀྱི་ཡོད་པ་རེད། ༸སྐུ་པར་བདག་དབང་༸དཔལ་ལྡན་དགའ་ལྡན་ཕོ་བྲང་ཡིག་ཚང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མགོན་པོ་མཆོག་གི་མཛའ་གྲོགས་སྐུ་ཞབས་ Anton Zeilinger ལགས་ཀྱིས་དབུས་པའི་ཁོང་གི་ཕྱག་རོགས་ཚན་རིག་པ་གཉིས་བཅས་ལ་འདི་ལོའི་དངོས་ཁམས་རིག་པའི་ནོ་སྦེལ་གཟེངས་རྟགས་ཐོབ་པར་དགའ་བསུའི་འཚམས་འདྲི་མཛད་འདུགཁ་སང་སུད་ཌེན་ནང་རྟེན་གཞི་བྱས་པའི་ནོ་སྦེལ་ལྷན་ཚོགས་ཀྱིས་ཕྱི་ལོ་ ༢༠༢༢ ལོའི་དངོས་ཁམས་རིག་པའི་ནོ་སྦེལ་གཟེངས་རྟགས་དེ་ཨོས་ཏྲི་ཡ་ཡི་ཚན་རིག་པ་སྐུ་ཞབས་ Anton Zeilinger ལགས་དང་། ཕ་རན་སིའི་ཚན་རིག་པ་སྐུ་ཞབས་ Alain Aspect ལགས། དེ་བཞིན་ཨ་རིའི་ཚན་རིག་པ་སྐུ་ཞབས་ John F Clauser ལགས་རྣམ་པ་གསུམ་ལ་གནང་རྒྱུའི་གསལ་བསྒྲགས་གནང་དོན་ལྟར། དེ་རིང་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དྷརྨ་སཱ་ལཱའི་༸རྒྱལ་བའི་ཕོ་བྲང་ནས་ཚན་རིག་པ་གསུམ་ལ་དགའ་བསུའི་འཚམས་འདྲི་སྩལ་བ་དང་འབྲེལ། ཚན་རིག་པ་དེ་དག་གིས་འཕྲུལ་རིག་གི་དུས་རབས་གསར་པའི་ནང་རྨང་གཞིའི་བརྟག་དཔྱད་མ་ལག་ཡར་རྒྱས་ཐད་ཁྱད་པར་ཅན་གྱི་ཞིབ་འཇུག་གསར་གཏོད་མཛད་པར་མངོན་བསྟོད་མཛད་འདུག༸གོང་ས་མཆོག་གི་གསུང་འཕྲིན་ནང་མགོན་པོ་༸གང་ཉིད་མཆོག་གིས་འདས་པའི་ལོ་ངོ་བཅུ་ཕྲག་བཞིའི་ནང་ཚན་རིག་པ་མང་དག་ཅིག་དང་ལྷན་དུ་བཀའ་བསྡུར་གནང་བའི་ཁྲོད་ཚན་རིག་པ་ Anton Zeilinger ལགས་དང་ལྷན་དུ་ Quantum Physics འམ་ཚད་རྡུལ་དངོས་ཁམས་རིག་པའི་ཐོག་བཀའ་བསྡུར་ལྷུག་པོ་བྱུང་སྐོར་བཀའ་སྩལ་བ་དང་འབྲེལ། ཁོང་དང་ལྷན་དུ་ཕྱི་ལོ་ ༡༩༩༧ ལོར་བཞུགས་སྒར་དུ་ཐོག་མར་མཇལ་མོལ་མཛད་རྒྱུ་བྱུང་བ་མ་ཟད་ཕྱི་ལོ་ ༡༩༩༠ ལོར་ Innsbruck གཙུག་ལག་སློབ་གཉེར་ཁང་དུ་ཁོང་གི་ཕྱག་ལས་གནང་སའི་བརྟག་དཔྱད་ཁང་དུ་ཆིབས་བསྒྱུར་མཛད་པ་དང་། ལྷག་པར་སེམས་དང་སྲོག་གི་ལྷན་ཚོགས་ཀྱི་ཐོག་ལན་མང་མཇལ་མོལ་མཛད་མྱོང་ཡོད་ཅེས་བཀའ་སྩལ་འདུག༸གོང་ས་མཆོག་གིས་ད་དུང་ངོས་རང་དེང་དུས་ཀྱི་ཚན་རིག་ལ་གུས་བརྩེ་ཆེན་པོ་དང་ཚན་རིག་གིས་དངོས་ཡོད་གནད་དོན་བཤད་པ་གཅིག་པོ་མིན་པར་དེས་འགྲོ་བ་མིའི་རིན་ཐང་ལ་ཤུགས་རྐྱེན་སྤྲོད་ཀྱི་ཡོད་མེད་ལ་ཡུན་རིང་ནས་དགོངས་པ་གཏིང་ཟབ་བཞེས་ཀྱི་ཡོད་ཅེས་བཀའ་སྩལ་བ་དང་ཆབས་ཅིག འདི་ལོའི་དངོས་ཁམས་རིག་པའི་ནོ་སྦེལ་གཟེངས་རྟགས་དེ་ཚན་རིག་པ་ Anton Zeilinger ལགས་དང་ཁོང་གི་ཕྱག་རོགས་གཉིས་ལ་གནང་རྒྱུའི་གསལ་གས་གནང་བར་ཐུགས་དགྱེས་ཚོར་ཆེན་པོ་བྱུང་བར་མ་ཟད། དེ་ནི་ཁོང་རྣམ་པས་འགྲོ་བ་མིའི་བདེ་ཐབས་ལ་འབད་བརྩོན་གནང་བའི་གྲུབ་འབྲས་ཤིག་ཡིན་པར་བཀའ་སྩལ་བ་དང་མ་འོངས་ལས་དོན་མཐའ་དག་ལེགས་གྲུབ་ཡོང་བའི་ཐུགས་སྨོན་མཛད་འདུག པར་བདག་དབང་ thehindu དང་སྤྱི་ཚོགས་དྲ་རྒྱ།

ཇི་ནི་ཝ་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༡ འཚོགས་བཞིན་པ་དང་བསྟུན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནས་བབ་ཐོག་ཟུར་ཚོགས་ཤིག་ཚོགས་འདུགཁ་སང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཨ་རིའི་གཏན་འཇགས་སྐུ་ཚབ་ལས་ཁུངས་ཀྱི་གོ་སྒྲིག་དང་དབྱིན་ཡུལ་དང་ཁེ་ན་ཌ། ཅེཀ་སྤྱི་མཐུན་རྒྱལ་ཁབ། ལི་ཐུ་ནི་ཡ་བཅས་ཀྱིས་མཐུན་འགྱུར་གནང་བའི་འོག་༸སྐུའི་ཡང་སྲིད་ཀྱི་གནད་དོན་ཐད་ཟུར་ཚོགས་ཤིག་ཚོགས་ཡོད་པ་ལྟར་དེའི་ཐོག་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ Uzra Zeya མཆོག་དང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཏན་འཇགས་སྐུ་ཚབ་ལྕམ་ Michelle Taylor ལགས་རྣམ་གཉིས་ཀྱིས་གཙོས་པའི་དབྱིན་ཇིའི་སྲིད་བློན་གྱི་ཆོས་དད་རང་དབང་ཐད་ཀྱི་དམིགས་བསལ་སྐུ་ཚབ་ Fiona Bruce ལགས། རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་༸གོང་ས་༸སྐྱབས་མགོན་ཆེན་པོ་མཆོག་གི་གོ་ལའི་ཀུན་ཁྱབ་འགན་འཁུར་ཐེབས་རྩའི་ངེས་སྟོན་པ་སྐུ་ཞབས་ Rajiv Mehrotra ལགས། དེ་བཞིན་ Eat the Buddha ཞེས་བོད་སྤྱི་དང་ལྷག་པར་རྔ་བ་ཁུལ་རང་ལུས་མེར་སྲེག་གནང་མཁན་བོད་མི་ཚོའི་གནས་སྟངས་སྐོར་གྱི་དཔེ་དེབ་རྩོམ་པ་པོ་ Barbara Demick ལགས། བོད་དོན་ཉམས་ཞིབ་པ་ Kate Sauders ལགས། དེ་བཞིན་བོད་མིའི་ཕྱོགས་ནས་བོད་མིའི་སྒྲིག་འཛུགས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་སུད་སི་བོད་ཀྱི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས། རྒྱལ་སྤྱིའི་བོད་དོན་འབྲེལ་མཐུད་ལས་ཁང་དང་བོད་གནས་ལྟ་ཞིབ་ཁང་བཅས་ཀྱི་སྐུ་ཚབ་སོགས་ནས་མཉམ་ཞུགས་གནང་འདུགསྐབས་དེར་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ Uzra Zeya ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་འདས་མ་ད་གསུམ་གྱི་གནད་དོན་ཐད་ཨ་རིའི་གཞུང་གི་ངོས་ནས་རྒྱབ་སྐྱོར་མུ་མཐུད་ཡོད་པར་བསྐྱར་ནན་གནང་བ་དང་སྦྲགས། གཞིས་ལུས་རྒྱ་ཆེ་མང་ཚོགས་རྣམས་ཀྱིས་ལྷག་བསམ་དང་སྙིང་སྟོབས། ལ་རྒྱ་བཅས་གཡོ་བ་མེད་པར་བོད་མིའི་ཆོས་རིག་དང་བཅས་པ་སྲུང་སྐྱོབ་གནང་བཞིན་པར་བསྔགས་བརྗོད་གནང་འདུགཟུར་ཚོགས་ཐོག་རྒྱལ་སྤྱིའི་བོད་དོན་འབྲེལ་མཐུད་ཁང་གིས་ Tibet, the Dalai Lama, and the Geopolitics of Reincarnation ཞེས་བོད་དང་༸གོང་ས་ཏཱ་ལའི་བླ་མ་མཆོག ༸སྐུའི་ཡང་སྲིད་དང་འབྲེལ་བའི་ཡུལ་བབ་སྲིད་བྱུས་དང་འབྲེལ་བའི་གནད་དོན་ཐོག་སྙན་ཐོ་ཞིག་ཀྱང་འདོན་སྤེལ་གནང་ཡོད། སྙན་ཐོ་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནས་བབ་འདི་བོད་དང་བོད་མི། བོད་མིའི་ཆོས་རིག་དང་འབྲེལ་བའི་གནད་ཀྱི་སྙིང་པོ་ཆགས་ཡོད་པར་མ་ཟད། བོད་ཙམ་མིན་པར་གཙོ་བོ་ཧི་མཱ་ལ་ཡའི་རི་རྒྱུད་དུ་གནས་པའི་ནང་པ་དང་སོག་ཡུལ་གཞུང་མང་གི་རིག་གཞུང་དང་ཡང་འབྲེལ་བ་ཤུགས་ཆེར་ཆགས་རྒྱུ་ཡིན་སྐོར་བཀོད་འདུག་ལ། རྒྱ་ནག་དམར་ཤོག་ཚོགས་པའི་ནང་མོལ་ཡིག་ཆ་ལག་སོན་བྱུང་བ་ལུང་འདྲེན་གྱིས་རྒྱ་ནག་གཞུང་གིས་ད་ལྟ་ནས་༸གོང་ས་༸སྐྱབས་མགོན་ཆེན་པོ་མཆོག་༸སྐུ་འཚོ་བཞུགས་མེད་པའི་རྗེས་ཀྱི་དུས་རབས་ཞེས། ཏཱ་ལའི་རྗེས་ཀྱི་དུས་རབས་ཟེར་བའི་ཐབས་བྱུས་གྲ་སྒྲིག་འོག་རྒྱ་ནག་རང་ཉིད་ཀྱི་ངོས་ནས་༸རྒྱལ་བའི་༸སྐུའི་ཡང་སྲིད་བསྐོ་གཞག་བྱེད་ཕྱོགས་དང་འབྲེལ་ནས་ནུབ་ཕྱོགས་ཀྱི་རྒྱལ་ཁབ་ཁག་དང་བརྒྱུད་ལམ་ཁག་ལ་ཆེད་དམིགས་ཀྱིས་དེ་ལྟ་བུའི་དུས་སྐབས་ཁྲོད་བོད་དོན་ལ་རྒྱབ་སྐྱོར་མཚམས་འཇོག་ཐུབ་ཐབས་དང་། བོད་བརྒྱུད་ནང་བསྟན་ཀྲུང་གོ་ཅན་དུ་འགྱུར་བའི་སྲིད་བྱུས་སྒོ་ནས་ལག་བསྟར་གྱིས་བོད་ས་ཡོངས་ལ་དབང་བསྒྱུར་སྲ་བརྟན། བོད་བརྒྱུད་ནང་བསྟན་ལ་སྟངས་འཛིན་གྱི་སྲིད་བྱུས་དེ་ཉིད་བོད་ནང་ཙམ་མ་ཡིན་པར་རྒྱ་གར་དང་འབྲུག་ཡུལ། བལ་ཡུལ། སོག་ཡུལ་གཙོས་པའི་དབུས་ཨེ་ཤ་ཡ་བཅས་ལ་རྒྱ་བསྐྱེད་ནས་ལག་བསྟར་བྱ་རྒྱུ་སོགས་བཀོད་པ་ཕྱིར་འགྱར་གནང་འདུགདེ་བཞིན་ཚོགས་པ་དེས་ཐེངས་འདིའི་སྙན་ཐོ་བརྒྱུད་ཨ་རི་གཞུང་ལྟར་རྒྱལ་སྤྱིའི་གཞུང་གཞན་རྣམས་ཀྱིས་ཀྱང་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་རྒྱ་ནག་ལ་ཐེ་བྱུས་རྩ་བ་ནས་མེད་པ་གསལ་བཟོའི་ཁྲིམས་གཞི་གཏན་འབེབས་གནང་སྐྱོང་ཡོང་བ་དང། ༸པཎ་ཆེན་རྒྱལ་མཚན་ནོར་བུར་རྒྱབ་སྐྱོར་མཚམས་འཇོག་གིས་༸གོང་ས་མཆོག་གིས་ངོས་འཛིན་མཛད་པའི་༸པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་ཤེས་རྟོགས་ཐུབ་སླད་ཤུགས་གནོན་རྒྱག་དགོས་པ། དེ་བཞིན་གཞུང་སོ་སོའི་ཁྲོད་བོད་དོན་དམིགས་བསལ་འབྲེལ་མཐུད་པ་འམ་བོད་དོན་སྲིད་བྱུས་དང་འབྲེལ་བའི་སློབ་སྟོན་པ། ཡང་ན་བོད་ཀྱི་སྡེ་ཚན་སོགས་ལོགས་སུ་ཆེད་འཛུགས་གནང་ཐབས་དགོས་པར་མ་ཟད། ༸སྐུའི་ཡང་སྲིད་ཀྱི་གནད་དོན་དང་བོད་མིའི་སྒྲིག་འཛུགས་ལ་སྲུང་སྐྱོབ་སོགས་ཀྱི་ཐད་རྒྱ་གར་གཞུང་ལ་མཐུན་འགྱུར་ཡོང་ཐབས་ལ་འབད་བརྩོན་གནང་དགོས་པ་སོགས་དགོས་འདུན་དོན་ཚན་ཁག་གཅིག་ཆེད་བཀོད་གནང་འདུག གཞི་རྩའི་ཨ་རི་གཞུང་གིས་ཕྱི་ལོ་ ༢༠༢༠ ལོའི་ཕྱི་ཟླ་ ༡༢ ནང་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་གཞི་གཏན་འབེབས་བརྒྱུད་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་༸སྐུའི་ཡང་སྲིད་དང་བོད་མིའི་བླ་སྤྲུལ་ངོས་འཛིན་གྱི་འགན་དབང་མགོན་པོ་༸གང་ཉིད་མཆོག་དང་བོད་མི་ཚོར་ཡོད་པ་ལས་རྒྱ་ནག་གཞུང་ནས་ཐེ་བྱུས་བྱ་མི་ཆོག་པ། གལ་ཏེ་རྒྱ་ནག་གཞུང་གི་ལས་བྱེད་མི་སྣས་བོད་མིའི་བླ་སྤྲུལ་ངོས་འཛིན་ཐད་ཐེ་བྱུས་བྱས་ན་ཨ་རི་གཞུང་གིས་འབྲེལ་ཡོད་ལས་བྱེད་དེ་དག་ལ་དམ་བསྒྲགས་བཀའ་ཆད་ལྕི་མོ་གཅོད་རྒྱུ་ཡིན་པ་སོགས་བཀོད་ཡོད། ཇི་ནི་ཝ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་ལྷན་ཚོགས་འཚོགས་བཞིན་པ་དང་བསྟུན། ཟླ་ ༡༠ ཚེས་ ༣ ཉིན་རྒྱ་ནག་གི་རྒྱལ་ས་པེ་ཅིང་དུའང་རྒྱ་ནག་རྒྱལ་ནང་དང་ཕྱི་རྒྱལ་ནས་མགྲོན་འབོད་བྱས་པའི་བོད་ཀྱི་མཁས་དབང་ཟེར་བ་ཁག་ཅིག་འདུ་སྐོང་བྱས་ཏེ་བོད་བརྒྱུད་ནང་བསྟན་སྤྲུལ་སྐུའི་ཡང་སྲིད་ངོས་འཛིན་བྱེད་པའི་ལམ་ལུགས་སྐོར་ཟུར་ཚོགས་ཤིག་དྲ་ཐོག་བརྒྱུད་ཚོགས་འདུག་པ་དང་དེའི་ཐོག་༸སྐུའི་ཡང་སྲིད་ཀྱི་གནད་དོན་དེ་རྒྱ་ནག་དབུས་གཞུང་ཁོ་ནར་ཐག་གཅོད་བྱ་རྒྱུའི་བདག་དབང་ཡོད་པ་སླར་གཏན་འབེབས་བྱུང་ལུགས་སོགས་བཀོད་འདུགཉེ་ཆར་བོད་མིའི་སྒྲིག་འཛུགས་ཀྱིས་༸སྐུའི་ཡང་སྲིད་གནད་དོན་དང་འབྲེལ་ནས་དོན་ཚན་དྲུག་ཅན་གྱི་ཡོངས་ཁྱབ་གསལ་བསྒྲགས་ཤིག་སྤེལ་ཏེ་༸རྒྱལ་བའི་ཡང་སྲིད་དང་འབྲེལ་བའི་གནང་སྒོ་མཐའ་དག་༸རྒྱལ་བ་རིན་པོ་ཆེ་གང་ཉིད་ཀྱིས་ཐག་གཅོད་མཛད་རྒྱུ་ལས་གཞན་གཞུང་སྒེར་སུ་ལའང་ཐེ་བྱུས་བྱེད་པའི་དབང་ཚད་མེད་ཅེས་གསལ་འདོན་གནང་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེག་ཆེན་ཆོས་གླིང་གཙུག་ལག་ཁང་དུ་ཐེ་ཝན་གྱི་དད་ལྡན་མི་མང་གིས་ཇི་ལྟར་སྔོན་ནས་གསོལ་བ་བཏབ་པ་ལྟར་༸དཔལ་ནཱ་ལེནྡཱའི་སློབ་དཔོན་ཆེན་མོ་དཔལ་ལྡན་ཆོས་ཀྱི་གྲགས་པས་མཛད་པའི་ཚད་མ་རྣམ་འགྲེལ་གྱི་ལེའུ་གཉིས་པའི་ཉིན་པའི་བཀའ་ཆོས་འཕྲོ་སྐྱོང་མཛད་མཚམས་སུ། དེང་སྐབས་རྒྱ་ནག་གི་གཉན་རིམས་ཀླད་ཀོར་གྱི་སྲིད་བྱུས་འོག་དཀའ་སྡུག་ཚད་མེད་མྱངས་དང་མྱོང་བཞིན་པའི་གཞིས་ལུས་རྒྱ་ཆེ་མང་ཚོགས་ལ་འཕྲལ་གྱི་རྐྱེན་ངན་ཁྲོད་སེམས་ཞུམ་རྒྱུ་མེད་པ་དང་། རྒྱ་ནག་ནང་གི་གནས་སྟངས་ལ་འགྱུར་བ་རིམ་པས་འགྲོ་བཞིན་པའི་ཁྲོད་གཞིས་བྱེས་མཉམ་འཛོམས་ཀྱི་དུས་ཤིག་ཏན་ཏན་འོང་ངེས་པས་ཚང་མ་བློ་བདེ་པོའི་ངང་བཞུགས་ཞེས་བཀའ་སློབ་བཀའ་དྲིན་ཆེ་བ་སྩལ་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་རྒྱ་བོད་ཀྱི་འཐབ་རྩོད་དེ་གཙོ་བོ་སངས་རྒྱས་པའི་ཆོས་དང་ཡང་འབྲེལ་བ་ཡོད་པ་དང་སྤྱིར་རྒྱ་ནག་གི་ངོས་ནས་བོད་རྒྱ་ཆེའི་མི་མང་གི་ལྟ་བ་དང་སྤྱོད་པ་བསྒྱུར་ཐབས་གཏན་ནས་མེད་པ་དང་། བོད་ཀྱི་སངས་རྒྱས་པའི་ཆོས་དང་དེ་དང་འབྲེལ་བའི་རིག་གཞུང་རྣམས་རིམ་པས་རྒྱ་ནག་ནང་དུ་ཁྱབ་གདལ་ཇེ་ཆེར་འགྲོ་བཞིན་པ་ལྟར་བོད་མི་རྣམས་ཀྱིས་ད་ལྟའི་འཕྲལ་སེལ་གྱི་རྐྱེན་ངན་འཕྲད་པར་སེམས་མ་ཞུམ་པ་གནང་དགོས་གལ་ཡིན་པའི་ལམ་སྟོན་སྩལ་ཡོད། དེ་བཞིན་༸གོང་ས་མཆོག་གིས་བོད་གངས་ཅན་གྱི་ལྗོངས་དེ་འཕགས་པ་སྤྱན་རས་གཟིགས་ཀྱི་འདུལ་ཤིང་དུ་གྱུར་ཡོད་སྟབས་ཚང་མས་ཇོ་ཤཱཀ་རྣམ་གསུམ་ལ་སྨོན་ལམ་ལེགས་པོ་བཏབ་དགོས་པ་དང་། ལྷག་པར་༸གོང་ས་མཆོག་བཙན་བྱོལ་དུ་ས་ཁད་འགྱངས་ནས་བཞུགས་ཡོད་ཀྱང་མགོན་པོ་༸གང་ཉིད་མཆོག་དང་བོད་མི་དབར་ཐུན་མིན་གྱི་ལས་དང་འབྲེལ་ཡོད་པས་ཚང་མས་༸རྒྱལ་བ་རིན་པོ་ཆེ་ཏཱ་ལའི་བླ་མ་ཡང་དྲན་དགོས་ཞེས་བཀའ་སྩལ་བར་མ་ཟད། ༸གོང་ས་མཆོག་ལ་མཚོན་ན། ད་ལྟ་སྐུ་ཁམས་གསལ་ཐང་ཡིན་ཞིང་། ༸སྐུའི་འཕྲོད་བཞེས་ལ་བརྟག་དཔྱད་ཞུས་འབྲས་སུ་སྨན་པས་ད་དུང་དགུང་གྲངས་བཅོ་ལྔ་ཉི་ཤུའི་རིང་༸སྐུ་འཚོ་བཞུགས་མཛད་ངེས་ཡིན་པར་ལམ་སྟོན་ཕུལ་དོན་ལྟར་ཚང་མ་བློ་བདེ་པོ་གྱིས་ཤིག་ཅེས་བཀའ་སྩལ་བ་དང་ཆབས་ཅིག རྒྱ་ནག་ནང་གི་གནས་སྟངས་ལ་འགྱུར་བ་རིམ་པ་འགྲོ་བཞིན་ཡོད་པས་རིམ་གྱིས་གཞིས་བྱེས་མཉམ་འཛོམས་ཀྱི་ཐོག་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་ཐུབ་པ་ཞིག་ཏན་ཏན་འོང་ངེས་པས་ཚང་མ་བློ་བདེ་པོའི་ངང་བཞུགས་ཞེས་ལམ་སྟོན་མཛད་ཡོད།དེ་རིང་སྔ་དྲོ་ཚོུད་ ༨ ཡོལ་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ཝན་གྱི་དད་ལྡན་མི་མང་གིས་ཇི་ལྟར་གསོལ་བ་བཏབ་པ་ལྟར་བཞུགས་སྒར་དྷརྨ་སཱ་ལཱའི་ཐེག་ཆེན་ཆོས་གླིང་གཙུག་ལག་ཁང་དུ་ནཱ་ལེནྡཱའི་སློབ་དཔོན་ཆེན་མོ་དཔལ་ལྡན་ཆོས་ཀྱི་གྲགས་པས་མཛད་པའི་ཚད་མ་རྣམ་འགྲེལ་གྱི་ལེའུ་གཉིས་པའི་ཉིན་པའི་བཀའ་ཆོས་འཕྲོ་སྐྱོང་མཛད་པ་དང་འབྲེལ་ཏེ། ཕྱི་ནང་གི་དད་ལྡན་མང་ཚོགས་རྣམས་ལ་བྱང་ཆུབ་སེམས་དང་སྟོང་ཉིད་ཀྱི་ལྟ་བ་ལ་མཐིལ་ཕྱིན་པའི་ཉམས་བཞེས་གནང་དགོས་གལ་ཡིན་སྐོར་བཀའ་སྩལ་བར་མ་ཟད། ལྷག་དོན་ཆེད་དུ་བྱ་བའི་གདུལ་བྱ་ཐེ་ཝན་གྱི་དད་ལྡན་ཆོས་ཞུ་བ་རྣམས་ཀྱིས་གཙོས་པའི་ཕྱི་ནང་གི་དད་ལྡན་སྟོང་ཕྲག་བརྒལ་བར་ཐམས་ཅད་རྣལ་འབྱོར་གྱི་སེམས་བསྐྱེད་བཀའ་དྲིན་ཆེ་བར་སྩལ་སོང་།