གསར་འགྱུར།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕ་རན་སིའི་ད་ལྟའི་སྲིད་འཛིན་ལས་ཐོག་སྐུ་ཞབས་ Emmanuel Macron ལགས་སྲིད་འཛིན་གྱི་འོས་བསྡུ་ཆེན་མོའི་ཁྲོད་རྒྱལ་ཁ་ཐོབ་སྟེ་སླར་ཡང་ཡུལ་དེའི་སྲིད་འཛིན་དུ་བདམས་ཐོན་བྱུང་བར་དགའ་བསུའི་འཚམས་འདྲི་སྩལ་བ་དང་སྦྲགས། ད་བར་ཕ་རན་སིའི་གཞུང་མང་གཉིས་ནས་བོད་མི་ཚོ་ལ་རོགས་རམ་བསྟུད་མར་གནང་བཞིན་པ་དེ་ནི་བོད་མིའི་བསོད་ནམས་དང་ལས་དབང་བཟང་པོ་ཞིག་ལ་དགོངས་བཞིན་ཡོད་སྐོར་བཀའ་སྩལ་མཛད་འདུག ཕྱི་ཟླ་ ༤ ཚེས་ ༡༠ ནས་དབུ་འཛུགས་གནང་བའི་ཡོ་རོབ་ཕ་རན་སི་རྒྱལ་ཁབ་ཀྱི་སྲིད་འཛིན་གྱི་འོས་བསྡུ་ཆེན་མོའི་ལས་རིམ་འདི་ཁ་སང་ཕྱི་ཚེས་ ༢༤ ཉིན་དངོས་སུ་མཇུག་སྒྲིག་གནང་བ་དང་སྦྲགས་ཏེ། ད་ལྟའི་སྲིད་འཛིན་ལས་ཐོག་སྐུ་ཞབས་ Emmanue Macron ལགས་ལ་འོས་གྲངས་བརྒྱ་ཆ་ ༥༨་༥༥ ཐོབ་པའི་ཐོག་ནས་སླར་ཡར་ཡུལ་དེའི་སྲིད་འཛིན་དུ་བདམས་ཐོན་བྱུང་ཡོད་པ་ལྟར། དེ་རིང་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་ Emmanue Macron ལགས་ཀྱི་སྲིད་འཛིན་ལས་ཡུན་རིང་ནང་གདོན་ལེན་གནང་དགོས་པའི་གནད་དོན་ཐམས་བཅད་ལ་གདོང་ལེན་གནང་སྟེ་ཕ་རན་སི་མི་མང་གི་རེ་བ་དང་མངོན་འདོད་ཁག་ལམ་ལྷོང་ལྡན་པའི་ཐོག་ནས་བསྒྲུབ་ཐུབ་པ་མ་ཟད་འཛམ་གླིང་འདི་སྔར་ལྷག་ཞི་བདེ་དང་བདེ་སྐྱིད་ལྡན་པ་ཞིག་བཟོ་རྒྱུར་ཞབས་འདེགས་བསྒྲུབ་ཐུབ་པའི་སྨོན་འདུན་གྱི་མཚམས་སྦྱོར་དང་བཅས་འཚམས་འདྲི་མཛད་འདུགམགོན་པོ་༸གང་ཉིད་མཆོག་གིས་ད་བར་ཕ་རན་སི་རྒྱལ་ཁབ་ཀྱི་དབུ་ཁྲིད་རིམ་བྱོན་རྣམ་པ་དང་མི་མང་རྣམས་ནས་བོད་མི་ལ་མཛའ་འབྲེལ་གྱི་མཐུན་འགྱུར་རོགས་རམ་དང་། ལྷག་པར་དུ་བོད་ཀྱི་ཐུན་མོང་མ་ཡིན་པའི་ནང་པ་སངས་རྒྱས་པའི་ཆོས་དང་། འགྲོ་བ་སྤྱི་ལ་སྨན་པའི་ཞི་བདེ་དང་འཚེ་བ་མེད་པ། དེ་བཞིན་གཞན་ཕན་སོགས་ཀྱི་གཞི་རྩར་བཟུང་བའི་བོད་ཀྱི་རིག་གཞུང་ཁག་མི་ཉམས་རྒྱུན་འཛིན་དང་སྲུང་སྐྱོབ་གནང་རྒྱུའི་ཐོག་རོགས་རམ་གནང་དང་གནང་བཞིན་པ་དེ་ནི་བོད་མིའི་བསོད་ནམས་དང་ལས་དབང་བཟང་པོ་ཞིག་ལ་དགོངས་བཞིན་ཡོད་པར་བཀའ་སྩལ་བ་དང་ཆབས་ཅིག བོད་མི་ཡོངས་ཀྱི་ཚབ་ཞུས་ཏེ་ཕ་རན་སིའི་དབུ་ཁྲིད་རྣམ་པ་དང་མི་མང་བཅས་ལ་ཐུགས་རྗེ་ཆེ་ཞེས་བཀའ་སྩལ་འདུགརྩ་བའི་ཐེངས་འདིའི་ཕ་རན་སི་རྒྱལ་ཁབ་ཀྱི་སྲིད་འཛིན་གྱི་འོས་བསྡུ་ཆེན་མོའི་ནང་སྐུ་ཞབས་ Emmanue Macron ལགས་ལ་འོས་གྲངས་བརྒྱ་ཆ་ ༥༨་༥༥ ཁོང་གི་ཁ་གཏད་ལྕམ་སྐུ་ Marine Le Pen ལགས་ལ་འོས་གྲངས་བརྒྱ་ཆ་ ༤༡་༤༥ བཅས་ཐོབ་ཡོད་པ་ལྟར་སྐུ་ཞབས་ Emmanue Macron ལགས་སླར་ཡང་སྲིད་འཛིན་གྱི་རྒྱལ་ཁ་ཐོབ་པ་འདི་ནི་འདས་པའི་ལོ་ངོ་ ༢༠ ནང་ཕ་རན་སིའི་ལས་ཐོག་སྲིད་འཛིན་ཞིག་བསྐྱར་དུ་སྲིད་འཛིན་ལ་འོས་འདེམས་བྱུང་བ་ཐེངས་དང་པོ་ཆགས་ཀྱི་ཡོད།

ཉེ་ཆར་རྒྱ་ནག་གཞུང་གིས་བོད་ཁམས་ཕྱོགས་རྫ་ཆུ་ཁ་སེར་ཤུལ་རྫོང་ཁོངས་སུ་ཡོད་པའི་བོད་པའི་སྒེར་བཙུགས་སློབ་གྲྭ་ཆ་ཚང་སྒོ་བརྒྱབས་ཏེ་བསླབ་གཞིའི་སྐད་ཡིག་རྒྱ་ཡིག་ཡིན་པའི་རྒྱ་གཞུང་གི་སློབ་གྲྭར་ཐོ་འགོད་གནང་དགོས་པའི་བཙན་བཀའ་བཏང་འདུག བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བར་གཞིགས་ན། རྒྱ་ནག་གཞུང་གིས་བོད་ཁམས་ཕྱོགས་རྫ་ཆུ་ཁ་སེར་ཤུལ་རྫོང་ཁོངས་སུ་ཡོད་པའི་བོད་པའི་སྒེར་བཙུགས་སློབ་གྲྭ་ཆ་ཚང་སྒོ་བརྒྱབས་ནས་ཟླ་བ་འདིའི་ཚེས་ ༢༠ སྔོན་ཚུད་དུ་བསླབ་གཞིའི་སྐད་ཡིག་རྒྱ་ཡིག་ཡིན་པའི་རྒྱ་གཞུང་སློབ་གྲྭར་ངེས་པར་དུ་སློབ་ཕྲུག་ཆ་ཚང་ཐོ་འགོད་གནང་དགོས་པའི་བཙན་བཀའ་བཏང་ཡོད་པ་དེར་ས་གནས་བོད་མི་ཚོས་དང་ལེན་བྱེད་དགོས་པ་དང་། གལ་ཏེ་བཀའ་རྒྱར་དང་ལེན་མ་གནང་བར་རྒྱབ་འགལ་རིགས་བྱས་པའི་གནས་སྟངས་འབྱུང་ཚེ་བཙོན་འཇུག་སོགས་ཀྱི་ཉེས་ཆད་ཕོག་སྲིད་པའི་ཉེན་བརྡ་བཏང་ཡོད་སྐོར་བཀོད་འདུག གཞི་རྩའི་སེར་ཤུལ་རྫོང་ཁོངས་ཀྱི་སྒེར་བཙུགས་སློབ་གྲྭ་དེ་དག་ཕལ་ཆེ་བ་འབྲོག་པའི་ས་ཁུལ་དུ་ཡོད་པ་དང་། ད་ཆ་ཁུལ་དེར་ཡོད་པའི་དགེ་མང་སྒེར་བཙུགས་སློབ་གྲྭ་དང་འབུམ་གསར་སློབ་གྲྭ། ཁྲོ་ཤུལ་སློབ་གྲྭ། ཨ་སེ་སློབ་གྲྭ། ཕན་བདེ་གཅེས་སྐྱོང་སློབ་གྲྭ། ཝ་རོང་སློབ་གྲྭ་སོགས་སྒེར་བཙུགས་སློབ་གྲྭ་བཅུ་གྲངས་ཤིག་ཡོད་པ་ཆ་ཚང་སྒོ་བརྒྱག་ཏུ་བཅུག་ཡོད་པ་རེད། ལྟེ་གནས་ཁང་གིས་གནས་ཚུལ་སྤེལ་བར་རྒྱ་གཞུང་གི་ཐག་གཅོད་དེར་ས་གནས་སྡེ་པ་སོ་སོའི་མི་མང་ནས་འགོ་ཁྲིད་ཚོར་སློབ་གྲྭ་སྒོ་བརྒྱབ་པ་ཡིན་ན་གཞུང་གི་སློབ་གྲྭ་ས་ཐག་རིང་དྲག་སྟབས་ཕྲུ་གུ་སློབ་གྲྭར་འཇོག་རྒྱུ་ཧ་ཅང་དཀའ་ངལ་ཡོད་པ་སོགས་ཀྱི་བདེ་སྡུག་ཞུས་ཡོད་ཀྱང་། ས་གནས་འགོ་ཁྲིད་ཚོས་མི་མང་གི་བདེ་སྡུག་ལ་བསམ་ཤེས་མེད་པར་གཞུང་གི་བཀོད་ཁྱབ་ལ་འགྱུར་ལྡོག་རྩ་བ་ནས་མེད་པས་ས་གནས་མི་མང་ཚོའི་ངོས་ནས་ཚུལ་བཞིན་ལག་བསྟར་བྱེད་དགོས་པ་སོགས་བཤད་པ་མ་ཟད་བཀའ་རྒྱ་དང་ལེན་མ་གནང་ན་བཙོན་འཇུག་སོགས་ཀྱི་ཉེས་ཆད་ཕོག་སྲིད་པའི་ཉེན་བརྡ་བཏང་བའི་གནས་སྟངས་བྱུང་ཡོད་པ་བཀོད་འདུག དེ་བཞིན་ལྟེ་གནས་ཁང་ལ་སེར་ཤུལ་རྫོང་ཁོངས་ཀྱི་སྒེར་བཙུགས་སློབ་ཆུང་ཞིག་ཏུ་སློབ་ཁྲིད་བྱེད་བཞིན་པའི་དགེ་རྒན་ཞིག་གིས་གཞུང་གི་སློབ་གྲྭ་ལས་སྒེར་བཙུགས་སློབ་གྲྭར་སློབ་ཁྲིད་བྱ་རྒྱུ་ལས་སླ་བ་མ་ཟད། སྒེར་བཙུགས་སློབ་གྲྭར་སྲིད་གཞུང་གིས་གཏན་འབེབས་བྱས་པའི་སློབ་ཚན་གྱི་ཞོར་དུ་བོད་ཀྱི་སྐད་ཡིག་དང་ལོ་རྒྱུས་མང་ཙམ་ཁྲིད་ཐུབ་ཀྱི་ཡོད་པ་དང་། གཞུང་གཉེར་སློབ་གྲྭའི་ནང་དེ་ལྟ་བུའི་གོ་སྐབས་རྩ་བ་ནས་མེད་སྐོར་སོགས་འགྲེལ་བརྗོད་གནང་འདུག གཞི་རྩའི་རྒྱ་ནག་གཞུང་ནས་འདས་པའི་ལོ་ཤས་ནས་བཟུང་སྟེ་བོད་གཙོས་པའི་གྲངས་ཉུང་མི་རིགས་ཀྱི་ས་གནས་ཁག་ཏུ་མི་རིགས་ཀྱི་ངོ་བོ་རྩ་མེད་གཏོང་ཐབས་སོགས་ལ་དམིགས་ཏེ་རྒྱ་གཞུང་གིས་གཏན་འབེབས་བྱས་པའི་རྒྱ་ཡིག་ཐོག་གི་བསླབ་གཞི་ཁག་སློབ་ཁྲིད་བྱེད་དགོས་པའི་བཙན་བཀའ་བཏང་དང་གཏོང་བཞིན་ཡོད་པ་དང་། རྒྱ་གཞུང་གི་བྱ་སྤྱོད་དང་སྲིད་བྱུས་དེ་དག་དང་འབྲེལ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་ཨེ་ཤ་ཡའི་གཟི་བརྗིད་སྣེ་ཁྲིད་ཚོགས་པ་གཉིས་ནས་ང་ཚོའི་རུས་རྐང་འཇིབས་སོང་། ཞི་ཅིན་ཕིང་འོག་གི་བོད་ཀྱི་ཤེས་ཡོན་དང་སྐད་ཡིག་གི་ཐོབ་ཐང་ཞེས་པའི་སྙན་ཐོ་ཞིག་ཀྱང་འདོན་སྤེལ་གནང་འཆར་ཡོད་པ་རེད།

ཁ་ཉིན་ཨ་རིའི་གྲོང་ཁྱེར་ནིའུ་ཡོག་ཏུ་༸ཀུན་གཟིགས་༸པཎ་ཆེན་སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་སྲུང་བརྩི་ཞུས་པ་དང་འབྲེལ། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཚམས་འཕྲིན་གྱི་ཕྱག་ཡིག་སྩལ་ཏེ་རིན་པོ་ཆེ་མཆོག་གི་ཞལ་མཇལ་གསུང་ཐོས་མྱུར་དུ་ཡོང་བའི་སྨོན་འདུན་ཡོད་ཅེས་བཀའ་སྩལ་མཛད་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་འཚམས་འཕྲིན་དེའི་ནང་གདན་ས་ཆེན་པོ་བཀྲིས་ལྷུན་པོ་ནས་གྲོང་ཁྱེར་ནིའུ་ཡོག་ཏུ་༸པཎ་ཆེན་སྐུ་ཕྲེང་བཅིུག་པའི་འཁྲུངས་སྐར་སྲུང་བརྩི་ཞུས་པར་ཡིད་སྤྲོ་དང་བཅས་བཀའ་དྲིན་ཆེ་ཞུས་པ་དང་འབྲེལ། རྒྱལ་པཎ་རིམ་བྱོན་བླ་སློབ་ཀྱི་འབྲེལ་བ་འདི་ཐུན་མོང་མིན་པ་ཞིག་ཏུ་མ་ཟད། ༸པཎ་ཆེན་སྐུ་ཕྲེང་བཅུ་པ་སྐུ་ན་ཆུང་དུས་ནས་མགོན་པོ་༸གང་ཉིད་མཆོག་དང་འབྲེལ་འདྲིས་ཟབ་པས་དམིགས་བསལ་འབྲེལ་བ་ཞིག་ཡོད་ཅེས་བཀའ་སྩལ་མཛད་འདུག ༸པཎ་ཆེན་སྐུ་ཕྲེང་བཅུ་པ་དགོངས་པ་གཞན་དོན་དུ་གཤེགས་པ་ནས་ཡང་སྲིད་རྩད་གཅོད་སོགས་༸གང་ཉིད་མཆོག་ལ་དམ་ཚིག་དང་ལོ་རྒྱུས་ཀྱིས་དཀྲིས་པའི་ལས་འགན་རྣམས་ཧུར་ཐག་གིས་བསྒྲུབས་ཀྱང་ཆབ་སྲིད་གེགས་བར་གྱི་གཞན་དབང་དུ་སོང་བ་ཕངས་པ་ལྟར་སྣང་ཡོད་པར་བཀའ་སྩལ་མཛད་དེ། ད་ལན་ཡང་སྲིད་རིན་པོ་ཆེ་དགུང་གྲངས་ ༣༣ ལ་ཕེབས་པའི་༸སྐུའི་འཁྲུངས་སྐར་རྒྱས་ཤིག་འབྲེལ་ཡོད་ཁྱེད་རྣམས་ནས་ཨ་རིའི་ནིའུ་ཡོག་ཏུ་ཚོགས་པར་བཀྲིས་བདེ་ལེགས་དང་མཆོག་སྤྲུལ་བསྟན་འཛིན་དགེ་འདུན་ཡེ་ཤེས་འཕྲིན་ལས་ཀྱི་ཞལ་མཇལ་གསུང་ཐོས་མྱུར་དུ་ཡོང་བའི་སྨོན་ལམ་ཡོད་ཅེས་ཀའ་སྩལ་འདུག དེ་རིང་ཕྱི་ཟླ་ ༤ ཚེས་ ༢༥ ཉིན་མོ་སྟེ་༸ཀུན་གཟིགས་༸པཎ་ཆེན་སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༣ ལ་ཕེབས་པའི་༸སྐུའི་འཁྲུངས་སྐར་དུས་ཆེན་ཡིན་པ་དང་བསྟུན་འཛམ་གླིང་ས་ཕྱོགས་གང་སར་གནས་སྡོད་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་རྒྱ་གཞུང་ལ་ངོ་རྒོལ་གྱི་ལས་འགུལ་རྣམ་པ་འདྲ་མིན་བརྒྱུད་ནས་སྤེལ་ཏེ་སྲུང་བརྩི་ཞུ་བཞིན་ཡོད་པ་ལྟར་ཁ་ཉིན་ཕྱི་ཚེས་ ༢༣ ཉིན་གདན་ས་ཆེན་པོ་བཀྲིས་ས་ལྷུན་པོས་གོ་སྒྲིག་ཞུས་པའི་འོག་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་ཁང་ཕུན་ཚོགས་སྡེ་བཞིར་༸པཎ་ཆེན་རིན་པོ་ཆེའི་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་འདུག མཛད་སྒོ་ཐོག་གདན་ས་བཀྲིས་ལྷུན་པོའི་༸སྐྱབས་རྗེ་མཁན་རིན་པོ་ཆེ་གཟིག་རྒྱབ་སྤྲུལ་སྐུ་མཆོག་གིས་དབུས་པའི་སྐུ་མགྲོན་གཙོ་བོ་བྱང་ཨ་རི་སྐུ་ཚབ་དོན་གཅོད་དང་བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་དང་བཀའ་ཟུར་གཙོས་པའི་སྐུ་མགྲོན་རྣམ་པ། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་སེར་སྐྱ་མང་ཚོགས་བཅས་ལྷན་འཛོམས་ཀྱིས་༸རྒྱལ་བ་ཡབ་སྲས་གཉིས་ཀྱི་༸སྐུ་ཕྱྭའི་ཞབས་རིམ་གསོག་སྒྲུབ་དང་མཎྡྲལ་འདེགས་འབུལ། དེ་བཞིན་སྤྲི་སྒོར་བགོས་འགྲེམས་སོགས་གནང་སྟེ་བོད་ལུགས་དང་ཕྱི་ལུགས་གཉིས་ཀྱི་ཐོག་ནས་རིན་པོ་ཆེ་མཆོག་དགུང་གྲངས་ ༣༣ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་ཞུས་པ་མ་ཟད། ༸སྐྱབས་རྗེ་མཁན་རིན་པོ་ཆེ་མཆོག་གིས་གདན་ས་བཀྲིས་ལྷུན་པོའི་ངོས་ནས་རིན་པོ་ཆེའི་༸སྐུའི་འཁྲུངས་ཉིན་མོར་ཡོངས་ཁྱབ་བསྒྲགས་གཏམ་སྤེལ་བ་སྒྲོག་སྦྱང་གནང་སྟེ། རྒྱ་གཞུང་ལ་ནན་ཏན་གྱིས་དོན་ཚན་གསུམ་གྱི་ཐོག་ནས་ཉེས་མེད་བཙན་འཁྲིད་བྱས་པའི་ཀུན་གཟིགས་༸པཎ་ཆེན་རིན་པོ་ཆེ་ཡབ་ཡུམ་སྐུ་མཆེད་དང་ཡང་སྲིད་འཚོལ་ཞིབ་ཚོགས་ཆུང་གི་འགན་འཛིན་དང་གདན་ས་བཀྲིས་ལྷུན་པོའི་དབུ་འཛིན་གཅིག་ལྕོགས་སྐུ་ཞབས་བྱ་བྲལ་རིན་པོ་ཆེ་བཅས་འཕྲལ་དུ་གློད་བཀྲོལ་དགོས་པ་དང་། ཁོང་རྣམ་པའི་གནས་སྟངས་ཇི་ཆགས་གསལ་པོ་བཟོ་དགོས་པའི་རེ་སྐུལ་བསྐྱར་ནན་གནང་ཡོད། སྐབས་དེར་སྐུ་མགྲོན་གཙོ་བོ་བྱང་ཨ་རི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་ལགས་ཀྱིས་དེ་རིང་ནི་བོད་མི་ཚོས་དགའ་སྐྱོ་ཟུང་འབྲེལ་གྱི་ཚོར་བའི་ཐོག་ནས་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་འཁྲུངས་སྐར་སྲུང་བརྩི་ཞུ་རྒྱུའི་ཉིན་མོ་ཞིག་ཡིན་པ་དང་ལྷག་དོན་རྒྱ་གཞུང་གིས་འདས་པའི་ལོ་ ༧༠ རིང་བོད་མིའི་ཐོག་ཆེས་དྲག་གནོན་ཅན་གྱི་སྲིད་བྱུས་སྤེལ་ཁག་གི་ངལ་བ་ཆེས་ཆེར་མྱང་ཡོད་ཀྱང་། གཞིས་ལུས་རྒྱ་ཆེ་མང་ཚོགས་ཀྱི་ལྷག་བསམ་དང་སྙིང་སྟོབས་ཆེ་རུ་སོང་ཡོད་སྟབས་ང་ཚོས་རྗེས་སུ་ཡི་རང་ཞུས་པའི་ཐོག་ནས་རང་ཉིད་ཀྱི་འགན་འཁྲི་དང་ནུས་པ་བཅས་མཉམ་སྤུངས་ཀྱིས་རྩ་དོན་སླད་ཕྱར་གྲུ་མཉམ་འདེགས་གནང་དགོས་པ་དང་ཆབས་ཅིག བོད་མིའི་སྒྲིག་འཛུགས་ཀྱིས་ཀྱང་མུ་མཐུད་༸པཎ་ཆེན་རིན་པོ་ཆེའི་གནས་སྟངས་གསལ་བཟོ་དང་གང་མགྱོགས་གློད་བཀྲོལ་ཡོང་ཐབས་སུ་འཆར་གཞི་ལྡན་པའི་ཞུ་གཏུག་སྐོར་སྐྱོད་གནང་འཆར་ཡོད་པ་གསུངས་འདུག དེའི་ཁྲོད་ཁ་སང་ཨ་རི་ནིའུ་ཡོག་དང་ནིའུ་ཇར་སི་ས་གནས་གཞོན་ནུའི་གོ་སྒྲིག་འོག་ཁུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་མདུན་དུ་བོད་མི་ ༣༠ ལྷག་འདུ་འཛོམས་ཀྱིས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་དགུང་ལོ་ ༣༣ ལ་ཕེབས་པའི་འཁྲུངས་སྐར་དང་སྟབས་བསྟུན་རིན་པོ་ཆེ་མཆོག་གིས་དབུས་པའི་ཡབ་ཡུམ་སྐོ་འཁོར་དང་བཅས་པ་རྒྱ་གཞུང་གིས་བཙན་ཁྲིད་བྱས་ནས་གར་སོང་ཆ་མེད་དུ་གྱུར་ནས་མི་ལོ་ཧྲིལ་པོ་ ༢༧ འཁོར་བ་གློད་བཀྲོལ་དགོས་པའི་སྐད་འབོད་ལས་འགུལ་ཞིག་སྤེལ་འདུག དེ་དང་ཕྱོགས་མཚུངས་སུ་རྒྱ་གར་ནང་གི་བཙན་བྱོལ་བོད་མིའི་སྡོད་གནས་བཞུགས་སྒར་དྷརྨ་སཱ་ལཱ་གཙོས་ལ་དྭགས་དང་ལྷོ་ཕྱོགས་སོགས་ས་གནས་ཁག་ཅིག་ཏུ་རྣམ་པ་འདྲ་མིན་ཐོག་ནས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་༸སྐུའི་འཁྲུངས་སྐར་སྲུང་བརྩི་ཞུས་ཡོད་པ་རེད།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཟླ་བ་འདིའི་ཕྱི་ཚེས་ ༢༢ ཉིན་ཉིན་གྱི་ཕྱི་དྲོ་ཇར་མ་ནིའི་གྲོང་ཁྱེར་ Frankfurt ནང་ལ་ཕེབས་འབྱོར་བྱུང་སྟེ། ཕྱི་ཚེས་ ༢༣ ཉིན་གྲོང་ཁྱེར་ Frankfurt ཁུལ་གྱི་བོད་མི་རྣམས་ལ་གསུང་བཤད་དང་ཁུལ་དེར་ཚོགས་པའི་བསམ་མཛོད་བསྟི་གནས་ཀྱི་མཁས་པའི་ཚོགས་འདུར་དབུ་བཞུགས་གནང་འདུག སྲིད་སྐྱིང་མཆོག་གིས་ས་གནས་བོད་མི་ཚོར་བཀའ་ཤག་སྐབས་ ༡༦ པའི་ལས་དོན་བྱེད་ཕྱོགས་སོགས་ངོ་སྤྲོད་གནང་བ་དང་སྦྲགས། ད་ལྟའི་ཆར་རྒྱ་གར་ནང་ཡོད་པའི་བོད་པའི་གཞིས་ཆགས་ཁག་ཏུ་བོད་མི་ཉུང་དུ་ཕྱིན་ཏེ་ཕྱི་རྒྱལ་ཡུལ་གྲུ་ཁག་ཏུ་བོད་མི་མང་དུ་འགྲོ་བཞིན་པ་སོགས་ཕྱོགས་ཡོངས་ནས་གདོང་ལེན་གནང་དགོས་པའི་གནས་སྟངས་མང་དག་ཅིག་ཡོང་གི་ཡོད་པ་དང་། ང་ཚོའི་ངོས་ནས་གདོང་ལེན་གནང་དགོས་པའི་གནས་སྟངས་དེ་དག་གོ་སྐབས་ཤིག་ཏུ་བསྒྱུར་རྒྱུར་དགོངས་པ་བཞེས་དགོས་གལ་ཡིན་པ་དང་། བོད་མིའི་སྒྲིག་འཛུགས་ཀྱིས་བོད་དོན་དང་བླངས་ཞུ་གཏུག་ལས་འགུལ་ཞེས་པ་ཞིག་དབུ་འཛུགས་གནང་ཡོད་པ་དེས་རྒྱལ་སྤྱིའི་སྲིད་གཞུང་ལ་བོད་མི་མང་ཚོགས་ཀྱི་ཞུ་གཏུག་གནང་ཐུབ་རྒྱུ་དང་རིམ་པས་བོད་པའི་སྤྱི་ཚོགས་ནང་གཞོན་སྐྱེས་ཀྱི་འགོ་ཁྲིད་ཐོན་ཐུབ་རྒྱུ་སོགས་ལ་དགེ་མཚན་ལྡན་ཡོད་པ་གསུངས་འདུག  སྲིད་སྐྱོང་མཆོག་གིས་ཆབ་སྲིད་ཀྱི་གནད་དོན་ཐད་བོད་མིའི་སྒྲིག་འཛུགས་ནས་བོད་རྒྱའི་དཀའ་ངལ་སེལ་ཐབས་སུ་རྒྱ་ནག་ལ་འབྲེལ་བ་ཞུ་དགོས་པ་ཁག་མུ་མཐུད་ནས་འབད་བརྩོན་གནང་བཞིན་ཡོད་པ་དང་བོད་ཀྱི་གནད་དོན་སེལ་ཐུབ་པའི་གནས་བབས་ཤིག་གི་མ་བྱུང་བར་དུ་བོད་ནང་གི་གནས་སྟངས་ཐོག་ཞིབ་འཇུག་དང་། རྒྱལ་སྤྱིའི་ཁྲོད་དུ་བོད་ནང་གི་དངོས་ཡོད་གནས་སྟངས་ཁག་ཞུ་གཏུག་གནང་རྒྱུ་སོགས་ཀྱི་ལས་འགུལ་སྤེལ་རྒྱུ་ཡིན་པ་གསུངས་ཡོད། དེ་བཞིན་སྲིད་སྐྱོང་མཆོག་ནས་སྐབས་དེར་བཅར་བའི་ས་གནས་བོད་མི་ཚོས་བཀའ་འདྲི་ཞུས་ཁག་ལ་ལན་འདེབས་གནང་ཟིན་མཚམས་སུ་ཉིན་གུང་ཁུལ་དེར་ཚོགས་པའི་བསམ་མཛོད་བསྟི་གནས་ཀྱི་མཁས་པའི་ཚོགས་འདུར་དབུ་ཞུགས་གནང་སྟེ་བོད་དོན་གསུང་བཤད་གནང་བ་མ་ཟད། ཇར་མ་ནིའི་གྲོས་ཚོགས་འཐུས་མི་སྐུ་ཞབས་ Michael Brand ལགས་དབུས་གཞུང་འབྲེལ་གནད་ཡོད་མི་སྣ་ཁག་དང་མཇལ་འཕྲད། དེ་བཞིན་ས་གནས་ཀྱི་གསར་འགྱུར་བརྒྱུད་ལམ་ཁག་གི་བཅར་འདྲི་དང་ལེན་གནང་འདུག སྲིད་སྐྱོང་སྤེན་པ་ཚེ་རིང་མཆོག་ཡོ་རོབ་ཇར་མ་ནི་ནང་གི་གཞུང་འབྲེལ་མཛད་རིམ་ཁག་གྲུབ་མཚམས་སུ་བྱང་ཨ་རི་ཁུལ་དུ་ཕེབས་ཐོན་གནང་སྟེ། ཁ་སང་ཕྱི་ཚེས་ ༢༤ ཉིན་ཨ་རིའི་རྒྱལ་ས་ཝ་ཤིན་ཊོན་ཌི་སིར་ཕེབས་འབྱོར་བྱུང་ཡོད་པ་དང་། སྲིད་སྐྱོང་མཆོག་གིས་ཉིན་གྲངས་ལྔའི་རིང་ཁུལ་དེར་ཡོད་པའི་ཨ་རིའི་གྲོས་ཚོགས་ཀྱི་ཚོགས་གཙོ་མཆོག་དབུས་པའི་གྲོས་ཚོགས་འཐུས་མི་དང་ཨ་རིའི་བོད་དོན་དམིགས་བསལ་འབྲེལ་མཐུད་པ། དེ་བཞིན་གྲོས་ཚོགས་ཀྱི་སྔོན་རྩིས་དང་ཕྱི་འབྲེལ་ཚོགས་ཆུང་སོགས་ཀྱི་གནད་དོན་མི་སྣ་ཁག་ཅིག་དང་མཇལ་འཕྲད་གནང་འཆར་ཡོད་པ་མ་ཟད། རྒྱལ་སའི་མངའ་ཁུལ་གྱི་མཛད་རིམ་ཁག་གྲུབ་མཚམས་སུ་ཕྱི་ཟླ་ ༥ ཚེས་ ༡ ཉིན་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་ཁང་ཕུན་ཚོགས་སྡེ་བཞིར་ས་གནས་བོད་མི་མང་ཚོགས་ལ་གསུང་བཤད་དང་། བོད་པའི་གཞོན་སྐྱེས་དང་ཆེད་ལས་པ་ཚོ་དང་ཟུར་དུ་མཇལ་འཕྲད་གནང་རྒྱུ་སོགས་ཀྱི་མཛད་རིམ་ཁག་ཅིག་ཡོངས་གྲགས་གནང་ཡོད། གཞི་རྩའི་ཐེངས་འདིའི་འཚམས་འཟིགས་འདི་ནི་སྐུ་ཞབས་སྤེན་པ་ཚེ་རིང་མཆོག་བོད་མིའི་སྒྲིག་འཛུགས་ཀྱི་སྲིད་སྐྱོང་གི་ཐུགས་འགན་བཞེས་པའི་རྗེས་ཀྱི་བྱང་ཨ་རི་ཁུལ་གྱི་གཞུང་འབྲེལ་འཚམས་གཟིགས་ཆེས་ཐོག་མ་དེ་ཆགས་ཀྱི་ཡོད་པ་དང་། མཛད་རིམ་གཏན་འབེབས་གནང་བར་གཞིགས་ན། སྲིད་སྐྱོང་མཆོག་བྱང་ཨ་རི་ཁུལ་གྱི་མཛད་རིམ་ཁག་ཕྱི་ཟླ་ ༥ ཚེས་ ༡༢ ཉིན་ལེགས་གྲུབ་ཟིན་གྱི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གོ་ལོའི་ཉིན་མོ་དང་བསྟུན་རང་ཅག་ཐུན་མོང་གི་རྟེན་གཞིར་གྱུར་པའི་གོ་ལ་འདི་སྲུང་སྐྱོབ་སླད་རང་གཞན་ཀུན་གྱིས་ཕྱར་གྲུ་མཉམ་འདེགས་གནང་དགོས་པའི་ལམ་སྟོན་སྩལ་འདུག༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཕྱི་ལོ་ ༢༠༢༢ ཕྱི་ཟླ་ ༤ ཕྱི་ཚེས་ ༢༢ ཉིན་སྩལ་བའི་ཡོངས་ཁྱབ་གསུང་འཕྲིན་ནང་། དེ་རིང་འཛམ་གླིང་གི་ཉིན་མོར་འགྲོ་བ་མི་ཙམ་མ་ཟད་ཐ་ན་སྲོག་ཆགས་འབུ་སྲིན་ཕྲ་མོ་མཚོན་པའི་སེམས་ཅན་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པ་དེ་དྲན་སྐུལ་མཛད་པ་དང་སྦྲགས། ང་ཚོ་ཚང་མས་གོ་ལ་འདིའི་ཐོག་ཐུན་མོང་གི་འཚོ་གནས་ཆེད་དུ་འགན་ཁུར་བཞེས་དགོས་སྐོར་བཀའ་སྩལ་བ་དང་། ལྷག་དོན་འགྲོ་བ་མི་ཞིག་ཡིན་པའི་ཆ་ནས་ཁྱད་དུ་འཕགས་པའི་ཆོས་རབ་ཏུ་རྣམ་འབྱེད་ཀྱི་ཤེས་རབ་ལྡན་ཡོད་ཀྱང་ད་ལྟའི་འཛམ་གླིང་འདིའི་གནས་སྟངས་ལ་བལྟས་ཚེ་དེ་ལས་ལྷག་པ་ཞིག་གནང་དགོས་པ་ཆགས་ཡོད་སྟབས། མ་འོངས་པར་ཡོངས་སྒྲིལ་ཤེས་ཡོན་ཞེས་ནང་བསམ་བློ་ཡར་རྒྱས་ཀྱི་སྟེང་ནས་ཤེས་ཡོན་གྱི་ལམ་ལུགས་ཤིག་བསྐྲུན་དགོས་པ་ནི་མེད་དུ་མི་རུང་བའི་གནད་འགག་ཆགས་ཡོད་པའི་གཞེན་སྐུལ་གནང་འདུག དེ་བཞིན་མགོན་པོ་༸གང་ཉིད་མཆོག་གིས་འཛམ་གླིང་འདིའི་ཐོག་ང་ཚོ་ཚང་མ་ཕན་ཚུན་གཅིག་ལ་གཅིག་བརྟེན་གྱི་ཐོག་ནས་གནས་དགོས་སྟབས། གོ་ལའི་གནམ་གཤིས་འགྱུར་ལྡོག་གི་ངལ་བ་དེས་འཛམ་གླིང་སྤྱིར་ལྡོག་ཏུ་མེད་པའི་ཤུགས་རྐྱེན་ཐེབས་བཞིན་ཡོད་པའི་མཚམས་སུ་ཚང་མ་འགྲོ་བ་མི་གཅིག་གྱུར་ཡིན་པའི་འདུ་ཤེས་འཛིན་སྟེ་གོ་ལའི་གནད་དོན་དེ་ཆེས་གནད་ཆེར་ངོས་འཛིན་གནང་དགོས་པའི་ལམ་སྟོན་སྩལ་བ་དང་ཆབས་ཅིག ད་ཆ་ང་ཚོས་ངེས་པར་དུ་འཛམ་གླིང་ནང་གི་ Fossil Fuels འམ་རྡོ་སྣུམ་དང་རྡོ་སོལ་སོགས་རང་བྱུང་གི་ཐོན་རྫས་སྤྱོད་བཞིན་པ་དེ་དག་ལ་བརྟེན་རྒྱུ་ཉུང་དུ་གཏོང་དགོས་པའི་ཛ་དྲག་གི་གོམ་པ་སྤོ་དགོས་པ་དང་། དེ་ལས་བསྐྱར་གསོ་བྱེད་རུང་བའི་ཐོན་ཁུངས་ཁག་ལ་མང་ཙམ་བརྟེན་དགོས་པ་མ་ཟད། ང་ཚོས་ཤིང་ནགས་རྩ་གཏོར་གཏོང་རྒྱུ་ལས་ལྗོན་ཤིང་འདེབས་འཛུགས་དང་ལྗོན་ཤིང་ལ་ལྟ་རྟོག་གི་ལས་གཞི་གང་མང་སྤེལ་ཏེ་ཁོར་ཡུག་སྲུང་སྐྱོབ་ཀྱི་གནང་སྒོར་ཐུགས་སྣང་གནང་དགོས་པའི་ལམ་སྟོན་བཀྲིན་ཆེ་བ་མཛད་འདུག དེ་བཞིན་གསུང་འཕྲིན་ནང་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཚེ་ཧྲིལ་པོའི་ནང་བོད་དང་དེ་ནས་མགོན་པོ་༸གང་ཉིད་མཆོག་གི་བཞུགས་གནས་དྷརྨ་སཱ་ལཱར་གངས་འབབ་ཚད་ཉུང་དུ་འགྲོ་བཞིན་ཡོད་པ་དངོས་སུ་གཟིགས་མྱོང་ཡོད་སྐོར་བཀའ་སྩལ་བ་དང་འབྲེལ། རྒྱལ་སྤྱིའི་ཚན་རིག་པ་ཁག་ཅིག་གིས་མགོན་པོ་༸གང་ཉིད་མཆོག་ལ་མ་འོངས་པར་བོད་གཙོ་བོར་གྱུར་པའི་ས་ཆ་ཁག་གཅིག་རིམ་པས་བྱེ་ཐང་དུ་འགྱུར་རྒྱུའི་ཉེན་ཁ་ཡོད་སྐོར་སྙན་སེང་ཞུས་པ་ལུང་འདྲེན་མཛད་དེ། ༸གོང་ས་མཆོག་གིས་༸སྐུ་ཚེའི་ནང་གི་ཐུགས་བསྐྱེད་ཆེན་པོ་གཅིག་ནི་ཁོར་ཡིག་སྲུང་སྐྱོབ་མཛད་རྒྱུ་དེ་ཡིན་སྟབས། ༸གོང་ས་མཆོག་ས་གནས་གང་དུ་ཆིབས་བསྒྱུར་མཛད་ཀྱང་གས་ཆག་སླ་བའི་བོད་མཐོ་སྒང་གི་ཁོར་ཡུག་སྲུང་སྐྱོབ་སྐོར་ལ་བཀའ་སློབ་སྩལ་གྱི་ཡོད་པ་བཀའ་སྩལ་མཛད་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་གཞན་ཡང་ང་ཚོའི་མི་ཚེ་འདི་རེ་བར་གཞི་བཅོལ་ཡོད་པ་དང་། རེ་བ་ཞེས་པ་འདི་མ་འོངས་པ་དང་འབྲེལ་ཡོད། མ་འོངས་པའི་སྐོར་ཁག་ཐེག་ངེས་བརྟན་འཕེལ་བ་གང་ཡང་མེད་ཀྱང་། རང་ཉིད་ཀྱིས་རྣམ་པ་ཀུན་ཏུ་རེ་བ་བཟང་ས་ཞིག་ལ་རྒྱག་རྒྱུ་དང་། གང་ལྟར་བློས་དཔྱད་པའི་ཐོག་ནས་དཀའ་ངལ་དག་ལ་གདོང་ལེན་གནང་དགོས་པར་ལམ་སྟོན་རྒྱ་ཆེར་སྩལ་བ་མ་ཟད། ད་ཆ་རང་ཅག་ཐུན་མོང་གི་གོ་ལ་འདིར་ཚ་དྲོད་ཤུགས་ཆེ་འཕེལ་བཞིན་པའི་ཛ་དྲག་གི་གནས་སྟངས་སེལ་ཐབས་སླད་གཞོན་སྐྱེས་མང་དག་གིས་མཉམ་རུབ་ཀྱིས་ཐབས་ལམ་འཚོལ་ཐབས་དང་སྤེལ་རེས་བྱེད་དགོས། གཞོན་སྐྱེས་ཚོ་ནི་ང་ཚོའི་རེ་བ་རེད་ཅེས་བཀའ་སྩལ་འདུག དེ་འབྲེལ་ངལ་བར་གདོང་ལེན་ཆེད་ང་ཚོ་ཚང་མས་མཉམ་རུབ་ངང་འབད་སྤུངས་ཀྱིས་དུས་བཅས་རེའུ་མིག་འཆར་འགོད་ཐོག་ནས་ལས་འགུལ་སྤེལ་དགོས་ཞེས་བཀའ་སྩལ་འདུག ལར་ནས་མགོན་པོ་༸གང་ཉིད་མཆོག་གིས་རང་གཞན་ཀུན་གོ་ལ་འདི་ཉིད་ལ་བརྟེན་ནས་འཚོ་དགོས་ཀྱི་ཡོད་སྟབས། དེའི་ནང་ཞི་བདེ་བག་ཕེབས་ངང་གནས་པ་ཙམ་མིན་པར་གོ་ལ་སྤྱིར་འཕྲད་པའི་ངལ་བ་སེལ་ཐབས་སུ་རང་གཞན་ཚང་མས་འགན་བཞེས་རྒྱུ་ནི་ཤིན་ཏུ་གནད་ཆེ་ཆགས་ཡོད་པའི་ལམ་སྟོན་མཛད་འདུག

ད་ཆ་ཨུ་རུ་སུས་ཡུཀ་རེན་ནང་དུ་དྲག་པོའི་བཙན་འཛུལ་བྱས་ནས་ཟླ་བ་གཉིས་ལྷག་འགྲོ་བཞིན་པའི་ཁྲོད་འདིར་ཨུ་རུ་སུའི་ཕྱོགས་ནས་ཡུཀ་རེན་གྱི་གྲོང་ཁྱེར་ཁག་ཅིག་ཏུ་དངོས་སུ་འབར་རྫས་དང་གོ་མཚོན་གྱི་ལམ་ནས་གཏོར་རྒོལ་ཚབས་ཆེན་གཏོང་བཞིན་ཡོད་སྟབས་ཡུཀ་རེན་གྱི་མི་སེར་འབུམ་ཕྲག་མང་པོ་ Poland དང་ Slovakia དེ་བཞིན་ Hungary སོགས་ཉེ་འཁོར་ཁྱིམ་མཚེས་རྒྱལ་ཁབ་ཁག་ཏུ་སྐྱབས་བཅོལ་ལ་འགྲོ་དགོས་བྱུང་བ་མ་ཟད་དོན་རྐྱེན་དེའི་འོག་ད་བར་ཡུཀ་རེན་གྱི་མི་སེར་ ༤༠༠༠ ལྷག་གི་ཚེ་སྲོག་ཤོར་བ་དང་ ༥༥༠༠ ལྷག་ལ་རྨས་སྐྱོན་ཕོག་པ་བྱུང་ཡོད།ཡུཀ་རེན་ནང་དུ་ངལ་བ་འཕྲད་བཞིན་པའི་དམག་འཁྲུག་གི་དོན་རྐྱེན་ཁྲོད་ཨ་རི་གཙོས་ནུབ་ཕྱོགས་རྒྱལ་ཁབ་ཁག་གིས་ཡུཀ་རེན་ལ་མཚོན་ཆ་སོགས་ཀྱི་རྒྱབ་སྐྱོར་གནང་བ་དང་ཆབས་ཅིག ཨུ་རུ་སུར་དཔལ་འབྱོར་དང་ཚོང་ལས་བཀག་སྡོམ་གནང་ཡོད་པ་རེད།དེའི་ཁྲོད་སི་པེན་གྱི་གྲོང་ཁྱེར་ Barcelon ནང་རྟེན་གཞི་བྱས་པའི་བོད་ཁང་གིས་སྣེ་ཁྲིད་འོག་ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་གཙོས་དེ་འབྲེལ་ལས་བྱེད་གཉིས་དང་། པོཊ་ལན་ཌི་བོད་རིགས་ཚོགས་པའི་ཚོགས་མི་ཁག་ཅིག་བཅས་མཉམ་འབྲེལ་ཐོག་ཡུཀ་རེན་གྱི་ས་མཚམས་ Medyka ལ་ཆེད་ཕེབས་ཀྱིས་སྐྱབས་བཅོལ་བ་རྣམས་ལ་རོགས་སྐྱོར་གནང་འདུག རྩ་བའི་ཨུ་རུ་སུས་ཡུཀ་རེན་ལ་དྲག་པོའི་བཙན་འཛུལ་བྱས་པའི་གནད་དོན་དང་འབྲེལ་ཏེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡུཀ་རེན་གྱི་གནས་སྟངས་ལ་ཐུགས་ཕམ་མཛད་པ་དང་སྦྲགས། གྲོས་མོལ་བརྒྱུད་ཡུཀ་རེན་ནང་ཞི་བདེ་སླར་གསོ་གནང་དགོས་པའི་གསུང་འཕྲིན་ཞིག་སྩལ་ཡོད་པ་མ་ཟད། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཀྱང་ཨུ་རུ་སུས་ཡུཀ་རེན་ནང་དུ་བཙན་འཛུལ་བྱེད་བཞིན་པའི་གནས་སྟངས་འདིས་དེ་སྔ་ ༡༩༥༠ ལོར་རྒྱ་ནག་གིས་བོད་ལ་བཙན་འཛུལ་བྱས་པའི་གནས་སྟངས་དེ་དྲན་གསོ་གནང་ཡོད་པར་འགྲེལ་བརྗོད་དང་འབྲེལ་ཏེ། འཚེ་བའི་ལམ་ལ་བསྐྱོད་རྒྱུ་དེ་ནི་འགྲོ་བ་མི་ཞིག་གི་གནང་སྟངས་མིན་པར་མ་ཟད་དེ་ནི་ད་ལྟའི་དུས་ཚོད་དང་མི་མཐུན་པའི་བྱེད་སྟངས་ཤིག་རེད་ཅེས་དང་ཡུཀ་རེན་ལ་གང་མགྱོགས་ཞི་བདེ་སླར་གསོ་གནང་དགོས་པ་གསུངས་ཡོད།

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོང་ཐང་གཙོ་འཛིན་ལྕམ་སྐུ་ Michelle Bachelet མཆོག་རིང་མིན་ཕྱི་ཟླ་ ༥ པའི་ནང་ཤིན་ཅང་གཙོ་གྱུར་རྒྱ་ནག་ནང་གི་འགྲོ་བ་ཐོབ་ཐང་གི་གནས་སྟངས་རྟོག་ཞིབ་སླད་ཁུལ་དེར་ཕེབས་གཏན་ཁེལ་བ་དང་འབྲེལ་ཏེ་རྒྱལ་སྤྱིའི་ཁྲོད་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་ཁག་ ༦༠ ཡིས་མཉམ་འབྲེལ་ཐོག་ལྕམ་སྐུ་མཆོག་ལ་སྔ་ལོའི་ཕྱི་ཟླ་ ༡༢ ནང་འདོན་སྤེལ་གནང་འཆར་སྐོར་གསུངས་པའི་ཤིན་ཅང་ནང་གི་འགྲོ་བ་མིའི་ཐོབ་ཐང་གནས་སྟངས་ཐོག་གི་སྙན་ཐོ་དེ་གང་མགྱོགས་འདོན་སྤེལ་གནང་དགོས་པ་དང་། རིང་མིན་རྒྱ་ནག་ནང་དངོས་སུ་ཕེབས་སྐབས་རང་དབང་ལྡན་པའི་རྟོག་ཞིབ་ཀྱི་འབྲུ་དོན་ཡོངས་སུ་ཚང་བའི་དོན་ལ་སྨིན་པའི་སྐོར་སྐྱོད་གནང་དགོས་པའི་ཞུ་སྐུལ་གནང་འདུག རྩ་བའི་ལྕམ་སྐུ་ Michelle Bachelet མཆོག་གིས་དེ་སྔ་ཕྱི་ལོ་ ༢༠༡༨ ཟླ་ ༩ པའི་ནང་ཤིན་ཅང་ནང་གི་གནས་སྟངས་རྟོག་ཞིབ་སླད་རང་དབང་ངང་སྐོར་སྐྱོད་གནང་འཆར་ཡོད་སྐོར་གསུངས་པ་དེ་ལྟར་ཡང་། དུས་དེ་ནས་བཟུང་ད་བར་རྒྱ་ནག་གཞུང་གིས་གནད་དོན་དེའི་ཐོག་གཡོལ་ཐབས་ཁོ་ན་བྱས་ཡོད་པའི་ཁྲོད་སྔ་ལོའི་ཕྱི་ཟླ་ ༩ པ་ནང་དུ་འགྲོ་བ་མིའི་ཐོབ་ཐང་གཙོ་འཛིན་ཁོང་གི་འབྲེལ་ཡོད་ལས་ཁུངས་ནས་རྒྱ་ནག་གིས་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་དང་གཏོང་བཞིན་པའི་གནད་དོན་ཐོག་ཞིབ་འཇུག་གནང་ཟིན་གྲབས་ཡོད་སྐོར་དང་འབྲེལ། སྔ་ལོའི་ཞིབ་འཇུག་སྙན་ཐོ་དེ་ཡོངས་གྲགས་གནང་འཆར་ཡོད་སྐོར་གསུངས་ཡོད། དེ་རྗེས་ད་བར་སྙན་ཐོ་འདོན་སྤེལ་གནང་མེད་པའི་ཁར་འདི་ལོའི་ཕྱི་ཟླ་ ༣ ཚེས་ ༨ ཉིན་ལྕམ་སྐུ་མཆོག་ནས་རིང་མིན་ལོ་འདིའི་ཕྱི་ཟླ་ ༥ པ་ནང་ཤིན་ཅང་གཙོ་བོར་གྱུར་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཞན་པའི་ས་ཁུལ་ཁག་ཏུ་སྐོར་སྐྱོད་གནང་གཏན་ཁེལ་བ་ཡོངས་གྲགས་གནང་ཡོད་པ་རེད། ཁ་སང་ Human Rights Watch འམ་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་དྲ་གནས་ཐོག་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་ཆེ་གྲས་ཁག་དང་རྒྱ་ནག་གི་མནར་གཅོད་མྱོང་བཞིན་པའི་བོད་མི་དང་ཡུ་གུར་བ། དེ་བཞིན་ཧོང་ཀོང་སོགས་ཀྱི་ཚོགས་པ་དང་མི་རིགས་དེ་དག་གི་རྒྱབ་སྐྱོར་ཚོགས་པ་བཅས་ཁྱོན་ཚོགས་པ་ཁག་ ༦༠ མཉམ་འབྲེལ་གྱིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གཙོ་འཛིན་ལྕམ་སྐུ་ Michelle Bachelet མཆོག་གི་མཚན་ཐོག་ལ་ཞུ་སྐུལ་གྱི་ཕྱག་བྲིས་དེ་འདོན་སྤེལ་གནང་འདུག དེ་སྔ་རྒྱལ་ཚོགས་ཀྱི་དམིགས་བསལ་སྐུ་ཚབ་ Finonnuala Ni Aolian ལགས་ཀྱི་སྙན་ཐོ་འགོད་འབུལ་ཞུས་པའི་ནང་ཤིན་ཅང་གི་ཡུ་གུར་མང་ཚོགས་རྣམས་གསང་བའི་བཀག་ཉར་དང་བཙན་དབང་གིས་ངལ་རྩོལ་འོག་འཇོག་བཞིན་པ་སོགས་མངོན་གསལ་དང་འབྲེལ། གནད་དོན་དེ་དག་ཐོག་ཛ་དྲག་གི་ཞིབ་འཇུག་དགོས་པ་དང་། རྒྱལ་སྤྱིའི་ཁྲིམས་དང་འགལ་བའི་ཆ་རྣམས་ཐེར་འདོན་དགོས་སྐོར་གསུངས་ཡོད། དེ་བཞིན་རྒྱལ་ཚོགས་ཀྱི་དབུལ་ཕོངས་བའི་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་སྐུ་ཞབས་ Philip Alston ལགས་ཀྱིས་དེ་སྔ་ཁོང་རྒྱ་ནག་ནང་སྐོར་སྐྱོད་ཕེབས་པ་དང་འབྲེལ་བའི་སྙན་ཐོ་འགོད་འབུལ་ཞུས་པའི་ནང་སྐོར་སྐྱོད་ཁྲོད་ཁོང་ལ་རང་དབང་ཐོག་མང་ཚོགས་ཀྱི་ཚོགས་ཁག་གི་སྐུ་ཚབ་རྣམ་པ་དང་ཐུག་འཕྲད་གནང་མ་བཅུག་པར་མ་ཚད་ས་གནས་གང་དུ་ཕེབས་ཀྱང་དེར་སྒྲིག་ཆས་མ་གྱོན་པའི་ཉེན་རྟོག་པ་ཡོང་བ་དང་། གང་ཟག་སུ་དང་ཐུག་འཕྲད་དང་བཀའ་མོལ་གང་གནང་བ་དེ་དག་རྒྱ་གཞུང་ལ་འཕྲལ་མར་སྙན་སེང་ཞུ་དགོས་པ་དང་། སྐབས་དེར་ཐུག་འཕྲད་བྱུང་བའི་མི་སྣ་གཅིག་ནི་རྒྱ་རིགས་ཁྲིམས་རྩོད་པ་ Jiang Tianyong ལགས་ཡིན་སྟབས་ཐུག་འཕྲད་རྗེས་སུ་ལོ་གསུམ་གྱི་རིང་འཛིན་བཟུང་བྱས་པ་མ་ཟད། ད་ལྟའང་བཟང་བཙོན་འོག་ཡོད་པ་སོགས་ལུང་འདྲེན་གྱིས་ད་བར་གཞུང་འབྲེལ་མིན་པའི་ཚོགས་པ་ཁག་དང་རྒྱལ་ཚོགས་ཀྱི་དམིགས་བསལ་སྐུ་ཚབ་དང་ཆེད་ལས་པ་རྣམས་ནས་རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནད་དོན་དང་སྒོས་བོད་དང་ཤིན་ཅང་ནང་དུ་བཙན་དབང་གིས་ངལ་རྩོལ་བཏང་བ། མང་ཚོགས་སྡེབས་ལ་ཆད་པ་བཏང་བ། ཁྲིམས་རྩོད་པ་དང་འགྲོ་བ་མིའི་ཐོབ་ཐང་སྲུང་སྐྱོབ་པ་འཛིན་བཟུང་། དེ་བཞིན་ཧོང་ཀོང་ནང་གི་ཞི་བའི་ངོ་རྒོལ་གནང་མཁན་ཐོག་དྲག་གནོན་བྱས་པ་སོགས་ཀྱི་གནད་དོན་ཞིབ་ཕྲ་ངོ་སྤྲོད་དང་འབྲེལ་དེ་དག་ཐོག་སེམས་འཚབ་ཀྱི་རྣམ་པ་མངོན་གསལ་དང་སྦྲགས། ཞིབ་འཇུག་དགོས་སྐོར་གསུངས་པ་ཐེར་འདོན་གནང་འདུག འགྲོ་བ་མིའི་ཐོབ་ཐང་ཚོགས་པ་དེ་དག་གིས་ཉེ་སྔོན་ཕྱི་ཟླ་ ༣ ཚེས་ ༨ ཉིན་གཙོ་འཛིན་མཆོག་གིས་ཁོང་ཤིན་ཅང་དུ་ཕེབས་གཏན་ཁེལ་བའི་གསལ་གྲགས་གནང་བར་དེ་སྔ་གཙོ་འཛིན་མཆོག་གི་ལས་ཁུངས་ནས་རྒྱ་ནག་ཐོག་གི་ཞིབ་འཇུག་སྙན་ཐོ་དེ་ནམ་འདོན་སྤེལ་གནང་རྒྱུ་ཡིན་མིན་སྐོར་གསལ་ཁ་གང་ཡང་གནང་མེད་པར་བློ་ཕམ་ཡོད་པ་དང་། གཙོ་འཛིན་མཆོག་ནས་ཐོག་མར་རྒྱ་ནག་ནང་དུ་སྐོར་སྐྱོད་གནང་འཆར་ཡོད་སྐོར་གསུངས་ནས་ད་ཆ་ཟླ་བ་གསུམ་དང་ཕྱེད་ཀ་ཙམ་ཕྱིན་པའི་མཚམས་འདིར་རྒྱ་ནག་ནང་གི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གྱི་ཚབས་ཆེ་བའི་གནད་དོན་དང་འབྲེལ་སྐྱོན་བརྗོད་དང་བསྒྲགས་གཏམ་སྤེལ་རྒྱུ་བཅས་ནི་སྔར་གྱི་གཙོ་འཛིན་ཚོ་དང་བསྡུར་ཚེ་འགན་ཁུར་ཉུ་བ་བཞེས་ཀྱི་ཡོད་སྐོར་གསུངས་ཡོད། རྒྱ་ནག་གཞུང་གི་ངོས་ནས་ད་བར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་ཕེབས་རྒྱུ་དེ་ཕན་ཚུན་འབྲེལ་ལམ་ཡར་རྒྱས་དང་མཉམ་འབྲེལ་ལ་དམིགས་པའི་ Friendly Visit འམ་མཛའ་འབྲེལ་གྱི་སྐོར་སྐྱོད་ཡིན་པ་མ་གཏོགས་རྒྱ་ནག་ནང་གི་དངོས་ཡོད་གནས་སྟངས་ལ་རྟོག་ཞིབ་གནང་ཕྱིར་མིན་སྐོར་གསལ་བཟོ་བྱས་འདུག་པ་ལུང་འདྲེན་དང་སྦྲགས། ད་ལན་ལྕམ་སྐུ་ Bachelet མཆོག་རྒྱ་ནག་ཏུ་ཏོག་དབྱིབས་གཉན་རིམས་ཁྱབ་གདལ་གྱི་ཛ་དྲག་གནས་སྐབས་སུ་ཕེབས་ཀྱི་ཡོད་སྟབས། ལྕམ་སྐུ་མཆོག་ནས་འགྲོ་བ་མིའི་ཐོབ་ཐང་ལྷན་ཚོགས་ལ་སྙན་སེང་ཞུས་པའི་ནང་ཁོང་གི་རུ་ཁག་ལ་དོན་དངོས་ཐོག་བཀག་སྡོམ་མེད་པར་ཞིབ་འཇུག་གནང་འཐུས་མིན་སྐོར་གླེང་སློང་གནང་ཡོད་མེད་གང་ཡང་བཀོད་མེད་པར་བློ་འཚབ་དང་འབྲེལ། དེ་ལྟར་གནང་མ་ཐུབ་ཚེ་སྐོར་སྐྱོད་དེ་དོན་སྨིན་ལྡན་པ་ཞིག་ཡོང་དཀའ་བ་ཡིན་སྐོར་གསུངས་འདུག དེ་བཞིན་ལྕམ་སྐུ་མཆོག་ལ་ཕྱི་ཟླ་ ༥ པ་ནང་རྒྱ་ནག་ཏུ་མ་ཕེབས་སྔོན་ཚུད་དུ་བོད་དང་ཤིན་ཅང་ནང་གི་གནས་སྟངས་དང་འབྲེལ་བའི་དེ་སྔ་ཁས་ལེན་གནང་བ་སྙན་ཐོ་དེ་ཡོངས་གྲགས་འདོན་སྤེལ་གནང་དགོས་པ་དང་། སྐོར་སྐྱོད་ཀྱི་སྔོན་ཚུད་དུ་སྤྱི་དམངས་ཚོགས་པ་དང་འགྲོ་བ་མིའི་ཐོབ་ཐང་སྲུང་སྐྱོབ་པ་དང་། ཕྱིའི་རྒྱལ་ཁབ་ཏུ་ཡོད་པ་རྣམས་གཙོས་རྒྱ་ནག་གི་གདུག་རྩུབ་མྱོང་མཁན་གྱི་མི་སྣ་ཚོ་དང་མཇལ་འཕྲད་གནང་སྟེ་གནས་སྟངས་རྒྱུས་ལོན་གནང་དགོས་པ། སྐོར་སྐྱོད་དངོས་ཀྱི་སྐབས་སུ་རྒྱ་ནག་གཞུང་དང་ཉེན་རྟོག་པའི་ཐེ་བྱུས་གང་ཡང་མེད་པར་རང་དབང་ཐོག་ནས་རྟོག་ཞིབ་གནང་ཐུབ་དགོས་པ། རྟོག་ཞིབ་རུ་ཁག་ནང་མཁས་དབང་མཉམ་ཁྲིད་དགོས་པ་སོགས་ཀྱི་དགོས་འདུན་ཆེད་བཀོད་དང་ཆབས་ཅིག  རང་དབང་ལྡན་པའི་རྟོག་ཞིབ་ཀྱི་འབྲུ་དོན་ཡོངས་སུ་ཚང་བའི་དོན་ལ་སྨིན་པའི་སྐོར་སྐྱོད་གནང་དགོས་པའི་ཞུ་སྐུལ་གནང་འདུག

རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་སྡེ་ཁག་དྲུག་གིས་རྒྱ་གཞུང་གིས་ལོ་བཞིའི་བཙོན་འཇུག་ཁྲིམས་ཐག་བཅད་པའི་རྩོམ་པ་པོ་བློ་བཟང་ལྷུན་འགྲུབ་ལགས་དང། ལོ་དྲུག་གི་བཙོན་འཇུག་ཁྲིམ་ཐག་བཅད་པའི་གླུ་བ་ལྟུན་འགྲུབ་གྲགས་པ་ལགས། དེ་བཞིན་རྒྱ་གཞུང་གིས་འཛིན་བཟུང་བཙན་ཁྲིད་འོག་གར་སོང་ཆ་མེད་དུ་གྱུར་བའི་མགོ་ལོག་དར་ལག་རྫོང་སེང་འབྲུག་སྟག་རྩེ་སློབ་གྲྭའི་དགེ་རྒན་རིན་ཆེན་སྐྱིད་ལགས་བཅས་བོད་ནང་བོད་མི་ཆབ་སྲིད་བཙོན་པ་གསུམ་གྱི་གཟུགས་གཞིའི་གནས་སྟངས་ཁ་གསལ་དགོས་སྐོར་རྒྱ་ནག་གཞུང་ལ་ཡིག་ཐོག་ནས་འདྲི་རྩད་གནང་འདུག རྒྱལ་ཚོགས་ཀྱི་དྲ་ཚིགས་ཐོག་གསལ་བར་གཞིགས་ན། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་སྡེ་ཁག་དྲུག་གིས་རྒྱ་གཞུང་ལ་བཏང་བའི་ཡིག་ཐོག་འདྲི་རྩད་ནང་གོང་དུ་གསལ་བའི་བོད་མི་ཆབ་སྲིད་བཙོན་པ་གསུམ་ཐོག་མར་རྒྱ་གཞུང་ཉེན་རྟོག་པས་འཛིན་བཟུང་བཙན་འཁྲིད་དང། རྒྱུན་རིང་བཀག་ཉར་འོག་གར་སོང་ཆ་མེད་དུ་གྱུར་བ། མཐར་ཕྱི་གསལ་ནང་གསལ་མེད་པར་གསང་བའི་ཐོག་ནས་བཙོན་འཇུག་ཁྲིམས་ཐག་བཅད་པའི་དོ་བདག་ཆབ་སྲིད་བཙོན་པ་ཁོང་གསུམ་གྱི་ཐོག་མཐའ་བར་གསུམ་གྱི་གནས་ཚུལ་རྣམས་ཞིབ་ཁྲ་མངོན་གསལ་གནང་སྟེ། རྒྱ་ཆེ་ས་ནས་ད་ལྟའི་ཆར་རྒྱ་ནག་གཞུང་གིས་བོད་ནང་བོད་མི་རིགས་ཀྱི་སྐད་ཡིག་དང་བོད་མིའི་ངོ་བོ་མཚོན་པའི་ལེགས་བྱང་ཁག་སྲུང་སྐྱོབ་དར་སྤེལ་གནང་མཁན་དང། དེ་བཞིན་རྒྱ་གཞུང་གི་བོད་ཐོག་འཛིན་པའི་སྲིད་བྱུས་ལ་སྐྱོན་བརྗོད་གནང་མཁན་མི་སྣ་ཁག་ལ་དྲག་གནོན་བྱེད་བཞིན་པའི་གནས་སྟངས་དངོས་ར་འཕྲོད་པ་ཞིག་མཚོན་གྱི་ཡོད་པ་མ་ཟད། ད་ལྟའི་ཆར་རྒྱ་གཞུང་གིས་བོད་ནང་ཤེས་ཡོན་ཅན་དང་སྒྱུ་རྩལ་བ་སོགས་མང་ཚོགས་ཀྱི་རང་དབང་སྲུང་སྐྱོབ་གནང་མཁན་གྱི་མི་སྣ་ཁག་འཛིན་བཟུང་བཙན་ཁྲིད་དང། རྒྱུན་རིང་བཀར་ཉར་གྱི་གར་ཡོད་ཤེས་རྟོགས་མེད་པ་བཟོས་པ། དེ་བཞིན་བཙོན་འཇུག་ཁྲིམས་ཐག་བཅད་པ་སོགས་ཀྱི་གནད་དོན་ཁག་རྒྱུན་ལྡན་གྱི་ལམ་ལུགས་ལྟར་ཆགས་ཡོད་པར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་སྡེ་ཁག་གི་ངོས་ནས་ཧ་ཅང་སེམས་འཚབ་ཡོད་ཅེས་གསུངས་འདུག ལྷག་པར་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དམིགས་བསལ་ཁེ་ལས་རྟོག་ཞིབ་སྡེ་ཁག་དྲུག་ནས་ད་ལན་རྒྱ་གཞུང་ལ་འདྲི་རྩད་གནང་བའི་ནང་ལ་ད་ལྟ་རྒྱ་ནག་གི་བཙོན་ཁང་དུ་ཡོད་པ་རྩོམ་པ་པོ་བློ་བཟང་ལྷུན་འགྲུབ་ལགས་དང། གླུ་བ་ལྟུན་འགྲུབ་གྲགས་པ་ལགས། གར་སོང་ཆ་མེད་དུ་གྱུར་བའི་མགོ་ལོག་དར་ལག་རྫོང་སེང་འབྲུག་སྟག་རྩེ་སློབ་གྲྭའི་དགེ་རྒན་རིན་ཆེན་སྐྱིད་ལགས་བཅས་གསུམ་གང་དུ་ཡོད་མེད་དང་གཟུགས་གཞིའི་བདེ་ཐང་གང་ཡིན། ཁོང་གསུམ་ཐོག་མར་འཛིན་བཟུང་དང་བཀག་ཉར། དེ་ནས་འབྲེལ་ཡོད་ནང་མི་ཚོར་ཤེས་རྟོགས་གང་ཡང་མེད་པར་བཙོན་འཇུག་ཁྲིམས་ཐག་བཅད་པ་སོགས་རྒྱལ་སྤྱིའི་འགྲོ་བ་མིའི་ཐོབ་ཐང་གི་འབྲུ་དོན་དང་མཐུན་པ་ཞིག་ཆགས་ཀྱི་ཡོད་མེད་སོགས་ལན་འདེབས་ཁ་གསལ་དགོས་པ། རྒྱ་གཞུང་གི་ངོས་ནས་ད་བར་བོད་ཀྱི་ས་ཁུལ་ཁག་གི་མང་ཚོགས་ཚོར་རང་ཉིད་ཀྱི་སྐད་ཡིག་རང་དབང་དང་ཆོས་དད་རང་དབང། དེ་བཞིན་སྨྲ་བརྗོད་རང་དབང་། བསམ་བློའི་རང་དབང་སོགས་འགན་སྲུང་ཆེད་དུ་གང་དང་གང་བྱས་པ་ཁ་གསལ་བཟོ་དགོས་པ་བཅས་ཀྱི་འདྲི་རྩད་ཁག་ཅིག་གནང་ཡོད། རྒྱ་ནག་གཞུང་ལ་བོད་མི་ཆབ་སྲིད་བཙོན་གསུམ་གྱི་གནད་དོན་དང་འབྲེལ་ནས་ཡིག་ཐོག་འདྲི་རྩད་གནང་མཁན་རྒྱལ་ཚོགས་ཀྱི་སྡེ་ཁག་དྲུག་ནི། རྒྱལ་ཚོགས་ཀྱི་འཛིན་བཟུང་བཀག་ཉར་ཐོག་རྟོག་ཞིབ་གནང་མཁན་གྱི་དམིགས་བསལ་ཁེ་ལས་རྟོག་ཞིབ་ཚོགས་ཆུང་དང། བཙན་ཁྲིད་དམ་གར་སོང་ཆ་མེད་ཀྱི་གནད་དོན་རྟོག་ཞིབ་གནང་མཁན་དམིགས་བསལ་ཁེ་ལས་རྟོག་ཞིབ་ཚོགས་ཆུང། རྒྱལ་ཚོགས་ཀྱི་ཤེས་ཡོན་རང་དབང་གི་དམིགས་བསལ་ཁེ་ལས་རྟོག་ཞིབ་མི་སྣ། སྨྲ་བརྗོད་རང་དབང་དང་བསམ་བློའི་རང་དབང་དར་སྤེལ་དང་སྲུང་སྐྱོབ་གནང་མཁན་ཁེ་ལས་རྟོག་ཞིབ་མི་སྣ། ལེགས་བྱང་རང་དབང་དང་གྲངས་ཉུང་མི་རིགས་ཐོག་གི་ཁེ་ལས་རྟོག་ཞིབ་མི་སྣ་བཅས་ཡིན་པ་རེད།

ཟླ་འདིའི་ཕྱི་ཚེས་ ༡༧ ཉིན་བོད་དར་རྩེ་མདོ་བརྒྱད་ཟུར་རྫོང་ཀྱི་ནས་ཚེ་གྲོང་བརྡལ་ནས་ཡིན་པ་བོད་མི་བློ་དགའ་ལགས་དང་ཁོང་གི་སྐུ་ཟླ་གཡུ་མཚོ་ལགས་རྣམ་གཉིས་ས་གནས་ཉིན་རྟོག་པས་འཛིན་བཟུང་བྱས་པར་བརྟེན་ད་ལྟའི་ཆར་ས་གནས་གང་དུ་བཀག་ཉར་བྱས་ཡོད་མེད་སོགས་ཀྱི་གནས་ཚུལ་ཤེས་རྟོགས་མ་ཐུབ་པར་ལྷག་ཡོད་འདུག གསར་འགོད་པར་གནས་ཚུལ་མཁོ་སྤྲོད་པས་གསུངས་དོན་ལ། ཉེ་ཆར་ཟླ་ ༤ ཚེས་ ༡༧ ཉིན་བོད་ནང་གི་དགོང་དྲོའི་ཆུ་ཚོད་ ༣ ཡས་མས་སུ་དར་རྩེ་མདོ་བརྒྱད་ཟུར་ས་གནས་ཉེན་རྟོག་པ་ཡོང་སྟེ་བློ་དགའ་དང་ཁོང་གི་སྐུ་ཟླ་གཡུ་མཚོ་རང་ཁྱིམ་ནས་འཛིན་བཟུང་བྱས་ཏེ་རྫོང་ཐོག་ཏུ་འཁྲིད་ཡོད་པ་དང་། ཉེན་རྟོག་པས་ཁོང་གཉིས་འཛིན་བཟུང་བྱེད་དོན་ཅི་ཡིན་དང་ས་གནས་གང་དུ་བཀག་ཉར་བྱས་ཡོད་མེད་སོགས་ཀྱི་གནས་ཚུལ་ཤེས་རྟོགས་མ་ཐུབ་པར་ལྷག་ཡོད་སྟབས། ཁོང་གི་ནང་མི་ཚོ་ད་ཆ་ཐུགས་འཚབ་ཆེན་པོ་གནང་བཞིན་ཡོད་འདུག  ཁོང་གིས་ད་དུང་ད་ལྟའི་ཆར་བཟའ་མི་གཉིས་འཛིན་བཟུང་བྱེད་དགོས་དོན་གང་ཡིན་གསལ་ཁ་མེད་ཀྱང་། བློ་དགའ་ལགས་ཀྱིས་ཕྱི་ཕྱོགས་སུ་ཡོད་པའི་རང་ཉིད་ཀྱི་སྤུན་མཆེད་ཅིག་ལ་འབྲེལ་བ་གནང་རྐྱེན་ཡིན་སྲིད་སྐོར་གསུངས་སོང་། གཞི་རྩའི་བོད་དར་རྩེ་མདོ་བརྒྱད་ཟུར་རྫོང་ཀྱི་ནས་ཚེ་གྲོང་བརྡལ་ནས་འཛིན་བཟུང་བྱས་པའི་བློ་དགའ་ལགས་ནི་དགུང་ལོ་ ༣༦ དང་ཁོང་གི་སྐུ་ཟླ་གཡུ་མཚོ་ལགས་ནིི་དགུང་ལོ་ ༣༠ ཡིན་པ་དང་ཁོང་བཟའ་མི་གཉིས་ལ་བུ་ཕྲུག་ལོ་ན་ ༡༤ སོན་པ་ཞིག་འདུག