གསར་འགྱུར།

ཁ་ཉིན་རེས་གཟའ་སྤེན་པའི་ཉིན་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་དྷ་ས་མེག་གྷན་བོད་ཁྱིམ་ཉིན་སློབ་ཏུ་ཤེས་རིག་ལས་ཁུངས་ནས་དཔར་བསྐྲུན་ཞུས་པའི་དཔེ་དེབ་དང་འགུལ་བརྙན་ཁག་ཅིག་དབུ་འབྱེད་དང་འབྲེལ་ཉིན་འཁྱོངས་རིང་ལ་དཔེ་དེབ་ཁྲོམ་འདུས་གོ་སྒྲིག་གནང་སོང་། ཤེས་ཤེས་རིག་ལས་ཁུངས་ཀྱི་དེབ་འགྱུར་ལས་གཞིའི་ཁྲོད་ད་བར་ཕྱིའི་སྐད་ཡིག་ཐོག་ཡོད་པའི་སྒྲུང་དེབ་བསྒྱུར་ཟིན་པའི་དཔེ་དེབ་ ༡༨ དང་བྱིས་པའི་འགུལ་བརྙན་ ༡༡ གསར་དུ་དཔར་བསྐྲུན་ཞུས་པ་ཁག་ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས་དབུ་འབྱེད་གནང་བ་དང་སྦྲགས། བཙན་བྱོལ་ནང་དུ་བྱིས་སྒྲུང་གསར་རྩོམ་དང་ཕབ་སྒྱུར་གྱི་འཕེལ་རིམ་ངོ་སྤྲོད་གནང་སོང་བ་མ་ཟད། ལྷག་པར་དུ་ཕ་མ་རྣམས་ཀྱིས་སོ་སོའི་ཕྲུ་གུ་ལ་དཔེ་ཀློག་གོམས་གཤིས་བསྐྲུན་གལ་ཡིན་པ་དང་། དཔེ་ཀློག་གི་གོམས་གཤིས་འཇགས་ཐུབ་ཚེ་སྐད་ཡིག་ཡར་རྒྱས་དང་སློབ་ཚན་སྤྱིའི་ནང་དོན་རྟོགས་པར་ཕན་ཐོགས་ཆེན་པོ་ཡོང་གི་སོགས་གསུངས་ཡོད། གཞི་རྩའི་སྐབས་དེའི་དཔེ་དེབ་དབུ་འབྱེད་མཛད་སྒོ་ཐོག་བཞུགས་སྒར་ཁུལ་གྱི་ཕ་མ་མི་ཉུང་བ་ཞིག་ནས་རང་ཉིད་ཀྱི་ཕྲུ་གུ་དང་ལྷན་དུ་མཛད་སྒོར་མཉམ་ཞུགས་གནང་འདུག་པ་ལྟར། ཤེས་རིག་ལས་ཁུངས་ཀྱི་བྱིས་པའི་ཀློག་རྩལ་ལས་གཞིའི་འབྲེལ་མཐུད་པ་བསོད་ནམས་གང་བཟང་ལགས་ཀྱིས་ཕྲུ་གུར་སྒྲུང་གཏམ་བཤད་རྒྱུའི་གལ་གནད་དང་། སཾ་བྷོ་ཊ་བོད་སློབ་ཚོགས་པའི་བོད་ཀྱི་སྐད་ཡིག་རྒྱུས་སྟོན་པ་པ་སངས་ཚེ་རིང་ལགས་ཀྱིས་ཕྲུ་གུའི་སྐད་ཡིག་འཚར་ལོངས་ཐད་ཕ་མའི་འགན་འཁུར་བཞེས་ཕྱོགས་ཐོག་གསུང་བཤད་གནང་བ་མ་ཟད། དྷ་ས་བོད་ཁྱིམ་གྱི་ཨིན་ཇིའི་སྐད་ཡིག་རྒྱུས་སྟོན་པ་བསྟན་འཛིན་དཔལ་མོ་ལགས་ཀྱིས་དཔེ་ཀློག་གི་གལ་གནད་དང་འབྲེལ་ཏེ་ཕ་མ་དང་དགེ་རྒན་གྱི་ངོས་ནས་བྱིས་ཚོར་དཔེ་ཀློག་གི་འཁོར་ཡུལ་བསྐྲུན་གནད་དང་དེར་ཤུགས་སྣོན་རྒྱག་དགོས་སྐོར་གསུངས་ཡོད། ལྷག་པར་དུ་ཕ་མ་དང་དགེ་རྒན་ཚོས་བྱིས་པའི་མདུན་དུ་དཔེ་ཀློག་གང་མང་གནང་ཐུབ་ཚེ་བྱིས་པའི་རྣ་བར་ཚིག་འདྲ་མིན་ཐོས་པའི་དབང་གིས་རིམ་པས་ཚིག་ཕྱུག་པོ་ཆགས་ཏེ་སྐད་ཡིག་དང་ཤེས་བྱའི་གནས་ཚད་ཡག་པོ་ཆགས་པར་དགེ་མཚན་ཡོད་པ་སོགས་གསུངས་ཡོད།  དཔེ་དེབ་དབུ་འབྱེད་དང་འབྲེལ་བའི་མཛད་རིམ་ཁག་གྲུབ་མཚམས་སུ་ཉིན་འཁྱོངས་རིང་ལ་ཤེས་རིག་ལས་ཁུངས་དང་ཤེས་རིག་དཔར་ཁང་། དྷ་ས་བོད་ཁྱིམ། སཾ་བྷོ་ཊ་བོད་སློབ་ཚོགས་པ། འཇམ་དབྱངས་ཤེས་ཡོན་ཞབས་ཞུ་ཁང་བཅས་ནས་དཔར་སྐྲུན་ཞུས་པའི་དཔེ་དེབ་དང་བྱིས་པའི་ཤེས་རིག་དང་འབྲེལ་བའི་དཔེ་རིས་སོགས་འགྲེམས་སྟོན་དང་ཁག་ཅིག་རིམ་མེད་ཐོག་འགྲེམས་སྤེལ། ཁག་ཅིག་གོང་ཚད་གཅོག་ཆ་ཐོག་ནས་ཚོང་འགྲེམས་གནང་ཡོད།

ཉེ་ཆར་ཕྱི་ཚེས་ ༤ ཉིན་ནས་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་མཆོག་གྱི་སྣེ་ཁྲིད་འོག་སྤྱི་འཐུས་མི་གྲངས་བཞི་ ལས་གྲུབ་པའི་བོད་མི་མང་སྤྱི་འཐུས་རྒྱུན་ལས་སྐུ་ཚབ་ཚོགས་ཆུང་གིས་རྒྱལ་ས་ལྡི་ལིའི་ཁུལ་དུ་རྒྱ་གར་གྱི་སྔོན་རྩིས་གྲོས་ཚོགས་འཚོགས་བཞིན་པ་དང་བསྟུན་བོད་དོན་ཞུ་སྐུལ་གྱི་ལས་འགུལ་སྤེལ་བཞིན་ཡོད་པ་དང་། སྐུ་ཚབ་ཚོགས་ཆུང་སྣེ་ཁྲིད་གནང་མཁན་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་བོད་དེ་དུས་ནམ་ཡང་རྒྱ་ནག་གི་ཆ་ཤས་མིན་པ་དང་རྒྱ་གར་གཞུང་མང་གཉིས་ཀྱི་ངོས་ནས་བོད་དེ་བཙན་འཛུལ་བྱས་པའི་རྒྱལ་ཁབ་ཅིག་ལ་ངོས་འཛིན་ཡོང་ཐབས་གནང་རྒྱུ་དེ་བོད་མི་ཚོའི་སྐབས་བབ་ཀྱི་ལས་འགན་ཞིག་རེད་གསུངས་ཡོད། བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་སྣེ་ཁྲིད་འོག་སྤྱི་འཐུས་བསྟན་པ་ཡར་འཕེལ་ལགས་དང་། སྤྱི་འཐུས་མཁན་པོ་ཀཿབྲག་དངོས་གྲུབ་བསོད་ནམས་ལགས། སྤྱི་འཐུས་རྒྱལ་ལྡོང་ཕུར་པ་རྡོ་རྗེ་ལགས་བཅས་ལས་གྲུབ་པའི་བོད་མི་མང་སྤྱི་འཐུས་རྒྱུན་ལས་སྐུ་ཚབ་ཚོགས་ཆུང་གིས་ད་བར་འདས་པའི་ཉིན་གྲངས་ལྔའི་རིང་རྒྱ་གར་གྱི་གནད་ཡོད་ཆབ་སྲིད་མི་སྣ་གྲངས་ ༤༠ ལྷག་དང་མཇལ་འཕྲད་ཞུས་ཡོད་པ་མ་ཟད། སྐུ་ཚབ་རྣམ་པས་རྒྱ་གར་གྱི་གནད་ཡོད་དཔོན་རིགས་རྣམས་ལ་རྒྱ་ནག་གཞུང་གིས་བོད་མིའི་ཆོས་དང་རིག་གཞུང་རྩ་མེད་བཟོ་བཞིན་པའི་ཁར་བོད་མིའི་ཡུལ་གོམས་གཤིས་ལུགས་དང་འགྲོ་འདུག་སྤྱོད་གསུམ་བཅས་ལ་དམ་དྲག་བྱས་དང་བྱེད་པའི་རྐྱེན་གྱིས་ད་བར་བོད་མི་ ༡༦༠ ཙམ་གྱིས་རང་ལུས་མེར་བསྲེགས་གནང་སྟེ་ཆེས་ཡ་ང་བའི་གནས་སྟངས་དང་། བོད་ཀྱི་སྐད་ཡིག་དང་ཁོར་ཡུག། དེ་བཞིན་རྩོམ་པ་པོ་རྣམས་ལ་ཉེས་མིང་སྣ་ཚོགས་འོག་འཛིན་བཟུང་བཀག་ཉར་བྱས་པ། ལྷག་པར་དུ་རྒྱ་ནག་གཞུང་གིས་ཡར་རྒྱས་ཀྱི་མིང་བྱང་འོག་བོད་ནང་གི་ཁོར་ཡུག་ལ་དོ་ཕོག་ཤུགས་ཆེར་བཏང་བ་སོགས་བོད་ནང་གི་ཛ་དྲག་གནས་ཐོག་རྒྱབ་སྐྱོར་གནང་དགོས་པའི་ཞུ་སྐུལ་གནང་ཡོད་པ་མ་ཚད་པར་རྒྱ་དཀར་ནག་གཉིས་ཀྱི་ས་མཚམས་ལ་བདེ་འཇགས་ཡོང་བའི་ཐབས་ལམ་གཙོ་བོ་དེ་བོད་ཀྱི་དཀའ་ངལ་ལ་ཐུག་ཡོད་སྟབས། རྒྱ་གར་གྱི་གནད་ཡོད་དཔོན་རིགས་ཚོས་བོད་རྒྱའི་དབར་ཆབ་སྲིད་ཀྱི་གྲོས་མོལ་ཡོང་ཐབས་སུ་འབད་བརྩོན་གནང་དགོས་གནད་སོགས་ཀྱི་ཞུ་སྐུལ་ཞུས་ཡོད། ལྷག་དོན་ཚོགས་ཆུང་སྣེ་ ཁྲིད་གནང་མཁན་ཚོགས་གཞོན་སྒྲོལ་མ་ཚེ་རིང་མཆོག་གིས་བོད་མི་མང་སྤྱི་འཐུས་རྒྱུན་ལས་སྐུ་ཚབ་ཚོགས་ཆུང་གིས་དམིགས་བསལ་རྒྱ་གར་བྱང་ཤར་གྱི་གྲོས་ཚོགས་འཐུས་མི་ ༢༠ ལྷག་དང་མཇལ་འཕྲད་ཞུས་པ་བརྒྱུད་ནས་ཁོར་ཡུག་དང་འབྲེལ་བའི་ཆུའི་དཀའ་ངལ་ཐོག་ཐུན་མོང་གི་ནུས་པ་མཉམ་སྤུངས་ཡོང་ཐབས་ཐོག་བཀའ་མོལ་ཞིབ་རྒྱས་བྱུང་ཡོད་པ་དང་། རྒྱ་གར་དཔོན་རིགས་ཚོའི་ངོས་ནས་བོད་ནང་གི་ཆེས་ཡ་ང་བའི་གནས་སྟངས་ཁག་གསན་རྗེས་ཐུགས་འཚབ་ཆེན་པོ་གནང་གི་ཡོད་པར་འགྲེལ་བརྗོད་གནང་སོང་།   འདས་པའི་ཉིན་གྲངས་ལྔའི་རིང་སྤྱི་འཐུས་རྒྱུན་ལས་ཀྱི་སྐུ་ཚབ་རྣམས་ནས་ད་དུང་ཐེ་ཝན་གཙོས་པའི་ཕྱི་རྒྱལ་གཞུང་ཚབ་པ་ཁག་ཅིག་དང་མཇལ་འཕྲད་གནང་འདུག ཐོག་མའི་ཆར་བོད་མི་མང་སྤྱི་འཐུས་རྒྱུན་ལས་སྐུ་ཚབ་ཚོགས་ཆུང་གིས་ཕྱི་ལོ་ ༢༠༢༢ ཟླ་ ༤ ཚེས་ ༤ ནས་ ༨ བར་རྒྱ་གར་གྲོས་ཚོགས་འཐུས་མི་དང་། ཕྱི་རྒྱལ་གཞུང་ཚབ་ཁག་གི་གནད་ཡོད་མི་སྣ་སོགས་མཇལ་འཕྲད་ཀྱིས་བོད་དོན་ཞུ་སྐུལ་སོགས་ཀྱི་ལས་རིམ་སྒྲིག་ཡོད་ཀྱང་། ད་ཆ་སྔོན་སྒྲིག་གི་ལས་རིམ་ལ་འགྱུར་བ་ཕྲན་བུ་ཕྱིན་སྟབས་ཁོང་རྣམས་ད་དུང་ཉིན་ཤས་རིང་མུ་མཐུད་དེ་བོད་དོན་ཞུ་སྐུལ་གནང་འཆར་འདུག།

བོད་མི་རྣམས་བཙན་བྱོལ་དུ་འབྱོར་བ་ནས་བཟུང་སྟེ་རྒྱ་གར་དབུས་དང་ས་གནས་གཞུང་གིས་བཙན་བྱོལ་བོད་མིའི་བདེ་དོན་དང་འབྲེལ་བའི་ཐོག་རོགས་རམ་སྣ་ཚོགས་ཤིག་གནང་དང་གནང་མུས་ཡིན་པ་དང་། ལྷག་པར་དུ་ཕྱི་ལོ་ ༢༠༡༦ ནས་དབུ་འཛུགས་ཀྱིས་ལོ་ལྔ་རེའི་མཚམས་སུ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་དབུས་བོད་མིའི་ངལ་སེལ་ཚོགས་པར་ཧིན་སྒོར་ས་ཡ་བཞི་བརྒྱ་ཐམ་པའི་རོགས་དངུལ་ཞིག་གནང་ཡོད་པ་རེད། ལོ་ལྔ་ཚན་ཅན་གྱི་རོགས་དངུལ་དེ་ཕྱི་ལོ་ ༢༠༢༡༌༢༢ ལོའི་རྩིས་མཇུག་སྒྲིལ་ཟིན་གྱི་ཡོད་སྟབས། ཉེ་ཆར་རེས་གཟའ་ལྷག་པའི་ཉིན་རྒྱ་གར་གྱི་གྲོས་ཚོགས་འཐུས་མི་སྐུ་ཞབས་ Sujeet Kumar ལགས་ནས་ཡུལ་འདིའི་གྲོས་ཚོགས་གོང་མར་རྒྱ་གར་གཞུང་ནས་དབུས་བོད་མིའི་ངལ་སེལ་ཚོགས་པར་ཧིན་སྒོར་ས་ཡ་བཞི་བརྒྱ་ཐམ་པའི་རོགས་དངུལ་མུ་མཐུད་གནང་འཆར་ཡོད་དམ་ཞེས་བཀའ་འདྲི་ཞུས་འདུག་སྟབས། སྐབས་དེར་རྒྱ་གར་དབུས་གཞུང་གི་ནང་སྲིད་ལས་དོན་དང་འབྲེལ་བའི་བློན་ཆེན་སྐུ་ཞབས་ Ajay Kumar Mishra ལགས་ཀྱིས་རྒྱ་གར་དུ་ཡོད་པའི་བཙན་བྱོལ་བོད་མིའི་སྤྱི་ཚོགས་བདེ་དོན་ལ་ཆེད་དམིགས་ཀྱིས་ཕྱི་ལོ་ ༢༠༡༦ ནས་ ༢༠༢༡ བར་ཁྱོན་རོགས་དངུལ་ས་ཡ་བཞི་བརྒྱ་ཐམ་པ་གསོལ་སྩལ་གནང་ཡོད་པ་དང་། རོགས་དངུལ་འདི་ཕྱི་ལོ་ ༢༠༢༥༌༢༦ ལོའི་རྩིས་ལོ་བར་ཁྱོན་ལོ་ལྔ་རིང་མུ་མཐུད་གནང་གཏན་ཁེལ་ཡོད་སྐོར་གསུངས་འདུག གཞི་རྩའི་རྒྱ་གར་གཞུང་གིས་དབུས་བོད་མིའི་ངལ་སེལ་ཚོགས་པར་གནང་བཞིན་པའི་ལོ་ལྔ་ཚན་ཅན་གྱི་རོགས་དངུལ་ཧིན་སྒོར་ས་ཡ་བཞི་བརྒྱ་དེ་འཆར་འགོད་ཐོག་རྩིས་ལོ་རེ་རེར་ཧིན་སྒོར་ས་ཡ་བརྒྱད་ཅུ་རེ་གནང་བཞིན་ཡོད་པ་དང་། སྐུ་ཞབས་ Ajay Kumar Mishra ལགས་ཀྱིས་ཁ་ཉིན་དེ་འབྲེལ་ལན་འདེབས་གསལ་བཤད་གནང་བར་རྒྱ་གར་དབུས་ནང་སྲིད་ལས་ཁུངས་ནས་བོད་མི་གནས་ཡུལ་རྒྱ་གར་གྱི་མངའ་སྡེ་དང་དབུས་གཞུང་གི་ཐད་ཀར་འཛིན་སྐྱོང་བཏང་འཛིན་འོག་ཡོད་པའི་ས་གནས་ཁག་གི་འབྲེལ་ཡོད་ཚོ་དང་གྲོས་བསྡུར་གནང་སྟེ་བཙན་བྱོལ་བོད་མིར་མཐུན་རྐྱེན་གནང་ཕྱོགས་ཀྱི་སྲིད་བྱུས་ ༢༠༡༤ ཞེས་པར་དགོས་ངེས་བསྐྱར་ཞིབ་ཅིག་གནང་འཆར་ཡོད་པ་གསུངས་འདུག

ཨུ་རུ་སུའི་ཉེ་ཆར་ཡུག་རེན་རྒྱལ་ཁབ་ལ་བཙན་འཛུལ་བྱས་ཏེ་ཕྱོགས་གཉིས་ཀྱི་དམག་འཐབ་རིམ་པ་བྱུང་བའི་ཁྲོད་མང་ཚོགས་ཤི་རྨས་ཐེབས་བཞིན་པའི་གནད་དོན་དང་འབྲེལ་ནས། ཁ་སང་མཉམ་འབྲེལ་རྒྱལ་ཚོགས་ཀྱི་ལྷན་ཚོགས་ཀྱི་ཐོག་ནས། ཨུ་རུ་སུ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་ཕྱིར་ཕུད་བཏང་འདུག ཁ་སང་གི་ལྷན་ཚོགས་ཀྱི་ཐོག་ཏུ། མཉམ་འབྲེལ་རྒྱལ་ཚོགས་ཀྱི་རྒྱལ་ཁོངས་ནས་རྒྱལ་ཁབ་༩༣ གྱིས་ཨུ་རུ་སུ་རྒྱལ་ཚོགས་ཀྱི་ཁོངང་ནས་ཕྱིར་ཕུད་གཏོང་རྒྱུར་འོས་འཕངས་ཡོད་པ་དང་། རྒྱལ་ཁབ་༢༤ ཡིས་གྲོས་གཞི་དེར་དགག་གཞག་གནང་ཡོད་པ་དང་རྒྱལ་ཁབ་ ༥༨ གྲོས་གཞི་དེར་ཞུགས་ཐུབ་མི་འདུགགྲོས་ཆོད་དེ་དང་འབྲེལ་ནས། ཁ་སང་མཉམ་འབྲེལ་རྒྱལ་ཚོགས་ཀྱི་གཞུང་ཚབ་པ་ཟུར་བ། ལྕམ Nikki Haley ལགས་ཀྱིས་ Fox News Digital གསར་ཁང་ལ་འགྲེལ་བརྗོད་བྱས་པའི་ནང་། ཨུ་རུ་སུ་རྒྱལ་ཚོགས་ཀྱི་འགྲོ་བ་མིའི་ལྷན་ཚོགས་ནས་ཕྱིར་ཕུད་བཏང་བའི་གྲོས་ཆོད་དེར་དགའ་བསུ་ཞུས་ཏེ། ལྷན་ཚོགས་ཀྱི་ངོས་ནས་ཨུ་རུ་འགྲོ་བ་མིའི་ཐོབ་ཐང་གི་ལྷན་ཚོགས་ནས་ཕྱིར་ཕུད་བཏང་བ་དེ་ནི་དོན་ལ་གནས་བ་ཞིག་ཆགས་ཡོད་པར་འགྲེལ་བརྗོད་ཀྱིས། དམག་དོན་གྱི་ཉེས་ཅན་པ་ཞིག་ལ་ལྷན་ཚོགས་སུ་ཞབས་སྟེགས་སྤྲད་པ་ཡིན་ན་ལྷན་ཚོགས་ཀྱི་མཚན་གནས་ལ་གནོད་ཀྱི་ཡོད་པར་ངོ་སྤྲོད་ཀྱིས། འགྲོ་བ་མིའི་ཐོབ་ཐང་གི་གནས་བབ་ཞན་པའི་རྒྱལ་ཁབ་རྒྱ་ནག་དང་བྱང་ཀོ་ཡི་ཡ། དེ་བཞིན་སི་རི་ཡཱ་དང་ཨེ་རན་སོགས་ཀྱང་རྗེས་སུ་ཕྱིར་ཕུད་གཏོང་དགོས་བར་བརྗོད་འདུག གཞི་རྩའི་རེས་གཟའ་ཟླ་བའི་ཉིན། མཉམ་འབྲེལ་རྒྱལ་ཚོགས་ཀྱི་ཨ་རིའི་གཞུང་ཚབ་པ། ལྩམ་ Thomas-Greenfield ལགས་ཀྱིས་མཉམ་འབྲེལ་རྒྱལ་ཚོགས་ཀྱི་ལྷན་ཚོགས་ཐེངས་༤༧ པའི་ཐོག་ཨུ་རུ་སུ་དམག་འཐབ་དང་འབྲེལ་ནས་མང་ཚོགས་ཤི་རྨས་ཐེབས་པའི་གནད་དོན་མངོན་གསལ་གནང་བ་བརྒྱུད་ནས་ཨུ་རུསུ་རྒྱལ་ཚོགས་ཀྱི་ལྷན་ཚོགས་ནས་ཕྱིར་ཕུད་གཏོང་དགོས་བའི་སྐུལ་མ་གནང་བ་མ་ཟད། ཨུ་རུ་སུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཁོངས་སུ་ཡོད་པ་ནི་གད་མོ་སློང་བྱེད་ཀྱི་གནད་དོན་ཞིག་ཡིན་པའི་ཟུར་ཟ་གནང་འདུག ཁ་སང་ལྷན་ཚོགས་ཀྱི་དབུས་སུ་ཨུ་རུ་སུ་རྒྱལ་ཚོགས་ཀྱི་འགྲོ་བ་མིའི་ཐོབ་ལྷན་ཁང་ནས་ཕྱིར་ཕུད་བཏང་མ་ཐག ལྩམ་ Thomas-Greenfield ལགས་ཀྱིས་ཁོང་གི་འཕྲུལ་སྒྲའི་སྟེང་། ཁ་སང་ནི་གལ་གནད་ཆེ་བའི་ལོ་རྒྱུས་རང་བཞིན་གྱི་ཉིན་མོ་ཞིག་ཡིན་པ་ཕྱིར་བསྒྲགས་ཀྱིས། རྒྱལ་སྤྱིའི་སྤྱི་ཚོགས་ཀྱིས་མཉམ་འབྲེལ་གྱི་ཐོག་ནས་ཨུ་རུ་སུ་ལྷན་ཚོགས་ནས་ཕྱིར་ཕུད་བཏང་ཡོད་ལུགས་མངོན་གསལ་གནང་བརྒྱུད་ནས། རྒྱལ་སྤྱིའི་སྤྱི་ཚོགས་ཀྱི་ངོས་ནས་ཨུ་རུ་སུ་ཕྱི་གསལ་ནང་གསལ་བཟོ་དགོས་བའི་བརྡ་ལན་གལ་ཆེན་ཞིག་སྤྲད་ཡོད་པར་བསྒྲགས་འདུག གཞི་རྩའི་ཕྱི་ལོ་ ༢༠༠༦ ལོར་མཉམ་འབྲེལ་རྒྱལ་ཚོགས་ཀྱིས་ཐུན་མོང་གིས་གྲོས་ཆོད་གཏན་འབེབས་གནང་བའི་ནང་དུ། རྒྱལ་ཁབ་སུ་ཞིག་གིས་མངོན་སུམ་གྱི་ཐོག་ནས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་ན་རྒྱལ་ཁབ་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ནང་ནས་ཕྱིར་ཕུད་གཏོང་དགོས་བར་འཁོད་ཡོད་དང་། སྤྱིར་མཉམ་འབྲེལ་རྒྱལ་ཚོགས་ཀྱི་ཁོངས་སུ་རྒྱལ་ཁབ་ ༡༩༣ ལྷག་ཡོད་པའི་ཁྲོད། གྲོས་ཆོད་གཏན་འབེབས་ལ་རྒྱལ་ཁོངས་ནས་ངོ་ཡོད་སུམ་ཆ་གཉིས་ཀྱིས་རྒྱབ་སྐྱོར་དགོས་བར་འཁོད་ཡོད་པ་ལྟར། ཁ་སང་གི་གྲོས་ཆོད་དེར་རྒྱལ་ཁབ་༩༣ ལྷག་གིས་རྒྱབ་སྐྱོར་གྱིས་མང་མོས་ཐོག་གཏན་འབེབས་བྱུང་འདུག

དེ་རིང་སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དུ་འཚོགས་བཞིན་པའི་བོད་ཀྱི་ཞོ་སྟོན་རྒྱས་པ་ཐེངས་ ༢༥ ཐོག་མཉམ་ཞུགས་གནང་མཁན་བོད་ཀྱི་ཟློས་གར་ཚོགས་པ་གཙོས་ཕྱོགས་མཐའ་ཁག་ནས་བཅར་བའི་ལྷ་མོའི་ཚོགས་པ་ཁག་གི་ཚོགས་མི་ལས་བྱེད་ཡོངས་ལ་དམིགས་བསལ་མཇལ་དང་བླང་དོར་བཀའ་སློབ་བཀྲིན་ཆེ་བ་སྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་དེ་སྔ་བོད་ཀྱི་རྒྱལ་ས་ལྷ་སར་ཞོ་སྟོན་ཉིན་མ་ལྔ་ཙམ་རིང་ཚོགས་ཀྱི་ཡོད་པ་དང་སྐབས་དེར་མགོན་པོ་༸གང་ཉིད་མཆོག་༸རྒྱལ་ཡུམ་ཆེན་མོ་མཆོག་དང་མཇལ་འཕྲད་ཡང་ཡང་བྱུང་གི་སྟབས་དུས་ཚོད་དེ་ནི་ཆེས་སྐྱིད་ཤོས་ཤིག་དང་། དེ་ནི་དབྱར་ཁའི་གུང་སེང་རིང་ཤོས་ཤིག་ཀྱང་ཡིན་པ་སོགས་དྲན་གསོ་མཛད་ཡོད། མགོན་པོ་༸གང་ཉིད་མཆོག་ནས་ང་ཚོ་བཙན་བྱོལ་བ་ཆགས་ནས་རང་མགོ་གང་ཐོན་བྱས་ནས་མ་ཕྱིན་པར་བོད་ཀྱི་ཆོས་དང་རིག་གཞུང་། ལེགས་བྱང་ཁག་འཛིན་སྐྱོང་གནང་སྟེ་གནས་ཡོད་པ་དང་། ལྷག་པར་དུ་བོད་མི་ཚོས་བཤད་སྒྲུབ་ཟུང་འབྲེལ་ཐོག་བདག་གཅེས་གནང་བའི་ནང་པ་སངས་རྒྱས་པའི་ཆོས་ལ་ད་ཆ་རྒྱ་ནག་ནང་ལ་དམིགས་བསལ་དོ་སྣང་བྱེད་མཁན་མང་དུ་འགྲོ་བཞིན་པ་མ་ཚད་པར་དད་པ་ཙམ་མིན་པར་ཚན་རིག་དང་མཐུན་པའི་བོད་ཀྱི་ནང་ཆོས་ལ་རྒྱལ་སྤྱིའི་ཚན་རིག་མཁས་པ་ཚོས་ཀྱང་དོ་སྣང་ཆེན་པོ་བྱེད་བཞིན་ཡོད་པ་སོགས་བཀའ་སྩལ་བ་དང་ཆབས་ཅིག ང་ཚོ་བཙན་བྱོལ་ལ་གྱུར་བའི་རྐྱེན་ངན་དེ་གྲོགས་ལ་ཤར་ནས་འཛམ་གླིང་ས་ཕྱོགས་གང་སར་བོད་ཀྱི་ཆོས་རིག་དང་ལེགས་བྱང་སོགས་ཁྱབ་སྤེལ་ཐུབ་ཡོད་སྟབས། བོད་མི་ཚོའི་ངོས་ནས་བོད་ཀྱི་ཆོས་རིག་དེ་དག་མུ་མཐུད་བདག་གཅེས་གནང་གལ་ཡིན་པའི་ལམ་སྟོན་མཛད་ཡོད། དེ་བཞིན་ཆོས་རྒྱལ་སྲོང་བཙན་སྒམ་པོ་མཆོག་གིས་དབུས་པའི་ཆོས་རྒྱལ་ཚོས་བོད་ཀྱི་ཡི་གེ་གསར་གཏོད་དང་དཔལ་ནཱ་ལེནྡཱའི་རིག་གཞུང་རྣམས་བོད་བསྒྱུར་གནང་བ་སོགས་རླབས་ཆེན་གྱི་མཛད་རྗེས་བསྐྱངས་ཁག་དྲན་གསོ་མཛད་དེ། ང་ཚོ་བོད་མི་རྣམས་བཙན་བྱོལ་བ་ཞིག་ཆགས་ཡོད་ཀྱང་ལོ་རྒྱུས་ལྡན་པའི་བོད་པའི་རིག་གཞུང་དག་ལ་གཞིགས་ན་བོད་མི་རྣམས་སེམས་ཞུམ་མི་དགོས་པར་སྤོབས་པ་གནང་འོས་པ་ཞིག་ཆགས་ཡོད་པར་བཀའ་སྩལ་གྲུབ་མཚམས་སུ་བོད་ཀྱི་ཟློས་གར་ཚོགས་པ་གཙོས་ཕྱོགས་མཐའ་ཁག་ནས་བཅར་བའི་ལྷ་མོའི་ཚོགས་ཁག་གི་སྐུ་ཚབ་རེ་རེའི་ངོས་ནས་མགོན་པོ་༸གང་ཉིད་མཆོག་ལ་རྣམ་ཐར་རེ་གཟིགས་ཕུད་ཞུས་ཡོད། རྣམ་མཐར་གཟིགས་ཕུད་སྤྱན་འབུལ་ཞུ་གྲུབ་མཚམས་༸གོང་ས་༸སྐྱབས་མགོན་ཆེན་པོ་མཆོག་གིས་མདོ་སྨད་ཙོང་ཁའི་ཡུལ་ནས་ཡོང་བའི་ལྷ་མོ་དོན་གྲུབ་ཞུ་བའི་བུ་དེས་ད་བར་༸རྒྱལ་བའི་བསྟན་པ་ཉམས་པ་སོར་ཆུད་དང་མི་ཉམས་གོང་འཕེལ་གཙོ་གྱུར་རིས་སུ་མ་ཆད་པའི་བསྟན་པ་སྤྱིར་སྨན་པའི་ཞབས་འདེགས་ཞུས་ཡོད་པ་དེ་དག་ལ་བོད་མི་ཚོའི་ངོས་ནས་སྤོབས་པ་གནང་འོས་པ་དང་། ད་ལྟའི་ཆར་ལྷ་བླའི་བཀའ་ལུང་ཁག་ལ་གཞིགས་ན་མགོན་པོ་༸གང་ཉིད་མཆོག་ད་དུང་དགུང་ལོ་བཅུ་བཅོ་ལྔ་བར་བཞུགས་ངེས་ཡིན་པ་ལྟར་བོད་མི་ཚོའི་ངོས་ནས་ཀྱང་ཧུར་ཐག་གནང་རོགས་ཞེས་བཀའ་སྩལ་མཛད་ཡོད། དེ་རིང་མཇལ་ཁའི་ཐོག་ཉེ་ཆར་བཞུགས་སྒར་དུ་ཚོགས་པའི་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་སྐབས་ལྔ་པའི་རྒྱལ་ཡོངས་ཚོགས་ཆེན་ཐོག་བཅར་བའི་ཚོགས་མི་རྣམས་ཀྱང་ལྷན་ཞུགས་གནང་ཡོད་པ་དང་འབྲེལ། མགོན་པོ་༸གང་ཉིད་མཆོག་གིས་དབུ་མའི་ལམ་ཞེས་རྒྱ་ཆེ་ས་ནས་དགོངས་པ་བཞེས་ཚེ་བོད་ཙམ་མིན་པར་རྒྱ་ནག་ལའང་འགྱུར་བ་འགྲོ་ཐབས་དང་། ལྷག་པར་དུ་ང་ཚོས་རང་སྐྱོང་ཞེས་པ་དེ་ཆབ་སྲིད་འཛིན་སྐྱོང་གི་སྐད་ཆ་ཞིག་མིན་པར་བོད་ཆོལ་ཁ་གསུམ་ལ་མིང་དོན་མཚུངས་པའི་རང་སྐྱོང་གི་གནས་བབ་འོག་བོད་ཀྱི་ཐུན་མིན་ཆོས་རིག་དང་ལེགས་བྱང་བཅས་པ་བདག་གཅེས་གནང་རྒྱུའི་ཐོབ་ཐང་བྱུང་རྒྱུ་ཡིན་སྐོར་བཀའ་སྩལ་བ་མ་ཟད། རིམ་པས་ཆོས་རིག་ཐོག་ནས་རྒྱ་ནག་ལ་ཕར་དབང་བསྒྱུར་བྱེད་ཐུབ་པའི་ཐུགས་རེ་ཡོད་པར་བཀའ་སྩལ་མཛད་ཡོད་པ་རེད།

འདི་ལོ་ ༢༠༢༢ ལོའི་ཇི་ནི་ཝའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྙིང་སྟོབས་གཟེངས་རྟགས་དེ་རྒྱ་ནག་གཞུང་གིས་བོད་མི་དང་ཡུ་གུར་མང་ཚོགས་ཀྱི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་དང་གཏོང་བཞིན་པ་མངོན་གསལ་གནང་མཁན་ཨ་རིའི་སིལ་སྤོལ་རྩེད་འགྲན་པ་གྲགས་ཅན་སྐུ་ཞབས་ Enes Kanter Freedom ལགས་སུ་ཁ་སང་ལྷན་ཚོགས་ཐོག་དངོས་སུ་འབུལ་བཞེས་གནང་སོང་བ་དང་འབྲེལ། སྐུ་ཞབས་ཨི་ནེས་ལགས་ཀྱིས་རྒྱ་གཞུང་གིས་བོད་ནང་བོད་མིའི་ཐོག་སྤེལ་བྱེད་བཞིན་པའི་བྱ་སྤྱོད་དེས་བོད་མིའི་ངོ་བོ་རྩ་མེད་བཟོ་བཞིན་པ་དང་རྒྱ་ནག་གཞུང་གི་ངོས་ནས་བོད་ཀྱི་བདག་པོ་བོད་མི་ཡིན་པ་ཤེས་དགོས་ཞེས་གསུངས་སོང་།རྒྱལ་སྤྱི་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གཞུང་འབྲེལ་མིན་པའི་ཚོགས་པ་ ༢༥ ལས་གྲུབ་པའི་ཇི་ནི་ཝའི་འགྲོ་བ་མིའི་ཐོབ་ཐང་མང་གཙོ་ལྷན་ཚོགས་ནས་ལྷན་ཚོགས་རིམ་པའི་ནང་འཛམ་གླིང་དབང་ཆ་གཅིག་བསྡུས་རིང་ལུགས་ལ་དཔའ་ངར་ཞུམ་མེད་ཀྱིས་གདོང་ལེན་དང་མང་ཚོགས་ཀྱི་འགྲོ་བ་མིའི་ཐོབ་ཐང་དང་། རང་དབང་སྲུང་སྐྱོབ་གནང་མཁན་གྱི་སྐྱེ་བོ་རྣམས་ཀྱི་བྱས་རྗེས་ལ་ཆེ་བསྟོད་ཚུལ་དུ་སྙིང་སྟོབས་གཟེངས་རྟགས་སམ་ Courage Award ཞེས་པ་ཞིག་འབུལ་སྲོལ་ཡོད་པ་ལྟར། སྐུ་ཞབས་ Enes Kanter Freedom ལགས་སུ་ཁ་སང་ལྷན་ཚོགས་ཐོག་དངོས་སུ་འབུལ་བཞེས་གནང་ཡོད་པ་རེད།འདི་ག་རླུང་འཕྲིན་ཁང་གིས་ཇི་ནི་ལྦའི་ལྷན་ཚོགས་ཀྱི་ ༢༠༢༢ ལོའི་སྙིང་སྟོབས་གཟེངས་རྟགས་བཞེས་མཁན་སྐུ་ཞབས་ཨི་ནེས་ཁེན་ཊར་ཕྷི་རི་ཌོམ་ལགས་སུ་བཅར་འདྲི་ཞུས་པར་དང་ལེན་དང་སྦྲགས། ཁོང་གིས་འདི་ལོ་ ༢༠༢༢ ལོའི་ཇི་ནི་ཝའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྙིང་སྟོབས་གཟེངས་རྟགས་བཞེས་པ་དེ་ནི་འཛམ་གླིང་ནང་འགྲོ་བ་མིའི་ཐོབ་ཐང་དང་རང་དབང་སྲུང་སྐྱོབ་གནང་མཁན་མང་ཚོགས་ཚོའི་ཆེད་དུ་ལེན་པ་ཞིག་ལ་ངོས་འཛིན་གནང་གི་ཡོད་སྐོར་གསུངས་སོང་། དེ་བཞིན་ཁོང་གིས་གོ་སྐབས་འདི་ནི་རང་ཉིད་ཀྱི་སྤོབས་པ་ཞིག་ལ་ངོས་འཛིན་གྱི་ཡོད་པ་དང་། ད་རེས་གཟེངས་རྟགས་དེ་བརྒྱུད་རྒྱ་གཞུང་ལ་བརྡ་ལན་སྤྲོད་རྒྱུ་ཞིག་ལ། རྒྱ་གཞུང་གིས་བོད་ནང་གི་བོད་མིའི་ཐོག་སྤེལ་བཞིན་པའི་བྱ་སྤྱོད་དེ་ནི་བོད་མི་རིགས་ཀྱི་ངོ་བོ་རྩ་མེད་བཟོ་བཞིན་པའི་བྱ་སྤྱོད་ཅིག་ཆགས་ཡོད། རྒྱ་ནག་གཞུང་གི་ངོས་ནས་ངེས་པར་དུ་བོད་དེ་བོད་མིར་བདག་གི་ཡོད་པ་ཤེས་དགོས། ང་ཚོའི་ངོས་ནས་དུས་ནམ་ཡང་བོད་མིའི་འགྲོ་བ་མིའི་ཐོབ་ཐང་དང་རང་དབང་འཐབ་རྩོད་ལ་རྒྱབ་སྐྱོར་ཞུ་རྒྱུ་ཡིན་ཞེས་གསུངས་ཡོད།དེ་བཞིན་ཁོང་གིས་དེ་སྔ་ཁོང་བོད་མིའི་མགོན་སྐྱབས་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་མོལ་ཞུ་རྒྱུའི་གོ་སྐབས་བྱུང་སྐོར་དྲན་གསོ་དང་འབྲེལ། སྐབས་དེར་མགོན་པོ་༸གང་ཉིད་མཆོག་གིས་རང་ཉིད་ཀྱི་མི་ཚེ་ནང་དུ་གནད་དོན་ལེགས་ངན་གང་འདྲ་ཞིག་འཕྲད་ཀྱང་དུས་དང་རྣམ་པ་ཀུན་ཏུ་དྲང་བདེན་དང་རང་དབང་། དེ་བཞིན་འགྲོ་བ་མིའི་ཐོབ་ཐང་ལ་རྒྱབ་སྐྱོར་ཞུ་དགོས་པར་ལམ་སྟོན་བཀའ་སྩལ་བ་དེས་སེམས་འགུལ་ཞེ་དྲག་ཐེབས་སོང་ཞེས་དང་། ངས་ཀྱང་དེ་ལྟར་འབད་བརྩོན་བྱེད་བཞིན་ཡོད། གལ་སྲིད་འཛམ་གླིང་གི་རྒྱལ་ཁབ་ཁག་གི་འགོ་ཁྲིད་ཚོས་༸གོང་ས་ཏཱ་ལའི་བླ་མ་མཆོག་གི་རླབས་ཆེན་གྱི་བཀའ་སློབ་དེ་ཡིད་ལ་དྲན་ཚེ་ད་ལྟའི་འཛམ་གླིང་འདི་དམག་འཁྲུག་མེད་པར་ཞི་བ་དང་བདེ་སྐྱིད་ལྡན་པ་ཞིག་ཡོང་གི་རེད་ཅེས་གསུངས་སོང་།སྤྱིར་ཇི་ནི་ཝའི་འགྲོ་བ་མིའི་ཐོབ་ཐང་ལྷན་ཚོགས་ནི་ཐོག་མར་ཕྱི་ལོ་ ༢༠༠༩ ལོར་ UN watch ཞེས་རྒྱལ་ཚོགས་ལ་ལྟ་སྲུང་གནང་མཁན་གྱི་གཞུང་འབྲེལ་མིན་པའི་ཚོགས་པས་སྣེ་ཁྲིད་གནང་སྟེ་རྒྱལ་སྤྱིའི་ནང་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གཞུང་འབྲེལ་མིན་པའི་ཚོགས་པ་ ༢༠ ལྷག་མཉམ་རུབ་ཀྱིས་བཙུགས་པའི་ལྷན་ཚོགས་ཤིག་ཡིན་ཞིང་། ལྷན་ཚོགས་ཐོག་འཛམ་གླིང་སྲིད་སྐྱོང་སྒེར་སྤྱོད་གཞུང་གི་འོག་དཀའ་སྡུག་མྱངས་པའི་ཆབ་སྲིད་བཙོན་ཟུར་དང་གསར་འགོད་པ་། འགྲོ་བ་མིའི་ཐོབ་ཐང་རྩེད་ལེན་པ་སོགས་མགྲོན་འབོད་གནང་སྟེ་རྒྱལ་ཁབ་སོ་སོ་ནང་གི་འགྲོ་བ་མིའི་ཐོབ་ཐང་གི་དངོས་ཡོད་གནས་སྟངས་གླེང་སློང་གནང་སའི་སྡིངས་ཆ་གྲགས་ཅན་ཞིག་ཡིན་པ་རེད། ཕྱི་ལོ་ ༢༠༡༩ ལོར་ཇི་ནི་ཝའི་ལྷན་ཚོགས་ཀྱི་ངོས་ནས་ལྷན་ཚོགས་ཀྱི་སྙིང་སྟོབས་གཟེངས་རྟགས་དེ་ཕྱི་ལོ་ ༢༠༠༨ ལོའི་པེ་ཅིང་ཨོ་རྩལ་དང་འབྲེལ་བོད་ནང་གི་བོད་མིའི་ཐུགས་ཚོར་མངོན་གསལ་གནང་མཁན་འཇིགས་བྲལ་གློག་བརྙན་བཟོ་སྐྲུན་པ་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ལ་གནང་ཡོད་པ་རེད།

ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས། རྒྱ་ནག་གཞུང་གིས་ཉེ་ཆར་བོད་ཀྱི་ཆབ་སྲིད་བཙོན་ཟུར་མཆོག་སྤྲུལ་ཟླ་བ་རིན་པོ་ཆེ་མཆོག་དགུང་ལོ་གྱ་དྲུག་ཐོག་དགོངས་པ་རྫོགས་པའི་པའི་སྔ་རྗེས་ཀྱི་གནད་དོན་ལ་གསང་རྒྱ་དང་། རིན་པོ་ཆེའི་འདས་མཆོད་ལ་དམ་དྲག་བྱེད་སྟངས་ལ་གཞིགས་ཚེ། རྒྱ་གཞུང་ངོས་ནས་དྲག་གནོན་བརྒྱུད་༸གོང་ས་མཆོག་གི་ཤུགས་རྐྱེན་བཙན་འགོག་དང་། བོད་བརྒྱུད་ནང་བསྟན་དང་འབྲེལ་བའི་བྱེད་སྒོ་དག་ལ་ཚད་མཐོའི་སྟངས་འཛིན་བྱེད་བཞིན་པ་གསལ་པོ་ཡིན་པ་ར་སྤྲོད་གནང་འདུགདེའང་ཚོགས་པ་དེས་ཁ་སང་སྤེལ་བའི་གནས་ཚུལ་ནང་དུ། རྒྱ་ནག་གིས་བོད་ཁུལ་དུ་དྲག་གནོན་གྱིས་བོད་ཀྱི་གནད་དོན་ཕྱི་ཕྱོགས་སུ་ཁྱབ་སྤེལ་བྱེད་རྒྱུར་བཀག་སྡོམ་བྱེད་མུས་ཡིན་ཡང་། ཉེ་ཆར་ཆབ་སྲིད་བཙོན་ཟུར་མཆོག་སྤྲུལ་ཟླ་བ་རིན་པོ་ཆེ་མཆོག་དགུང་ལོ་གྱ་དྲུག་གི་ཐོག་ལྷ་སར་དགོངས་པ་རྫོགས་པའི་གནས་ཚུལ་དང་། ལྷག་པར་གནས་ཚུལ་དེའི་ཐོག་རྒྱ་ནག་གིས་གསང་རྒྱ་ཤུགས་ཆེ་བྱས་པའི་གནད་དོན་དེ་ཕྱི་ལ་ཐོན་ཡོད་པར་འགྲེལ་བརྗོད་ཀྱིས། རིན་པོ་ཆེ་དགོངས་རྫོགས་ཀྱི་སྔ་རྗེས་གནས་ཚུལ་ཞིབ་ཕྲ་ཡོང་གྲགས་གནང་འདུག གནས་ཚུལ་དེའི་ནང་གསལ་ལྟར་ན།  ནག་ཆུའི་ཤག་རོང་པོ་དགོན་དགའ་ལྡན་དར་རྒྱས་གླིང་གི་མཆོག་སྤྲུལ་ཟླ་བ་རིན་པོ་ཆེ་མཆོག་སྤྲུལ་ཕྱི་ལོ ༢༠༡༠ ལོའི་ཕྱི་ཟླ་ ༥ པའི་ནང་འཛིན་བཟུང་བྱས་པ་དང་། དེའང་གཙོ་བོ་རིན་པོ་ཆེ་མཆོག་གིས་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་དང་འབྲེལ་བའི་གནད་དོན་ཐད་་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དྲུང་ནས་ལམ་སྟོན་ཞུས་པའི་ནག་ཉེས་འོག་འཛིན་བཟུང་གིས་ལོ་བདུན་ལ་བཙོན་འཇུག་ཁྲིམས་ཐག་བཅད་དེ་ནམ་ཡང་ཕྱིར་རང་དགོན་དུ་ཕེབས་མི་ཆོག་པའི་བཀའ་རྒྱ་བཏང་ཡོད་པ་མ་ཟད། དགོན་པའི་ནང་ཆབ་སྲིད་སློབ་གསོ་ཤུགས་ཆེར་སྤེལ་བའི་ཁྲོད། གྲྭ་བ་བགྲས་སོང་ཞིག་གིས་རང་སྲོག་བཅད་པའི་གནད་དོན་ཡང་བྱུང་ཡོད་པ་རེད་འདུགགནད་དོན་དེ་དང་འབྲེལ་ནས་ཤག་རོང་པོ་དགོན་དུ་ཕྱི་ལོ་ ༢༠༡༣ ལོར་གྲྭ་མང་གིས་རྒྱ་གཞུང་ལ་ངོ་རྒོལ་གྱི་ལས་འགུལ་བརྩམས་པར་རྒྱ་ནག་གིས་དྲག་གནོན་ཆེས་ཆེར་བྱས་ཏེ་མི་ལྔ་བཅུ་ཙམ་འཛིན་བཟུང་བྱས་པ་ཟད། ཤག་རོང་པོ་དགོན་པའི་དགེ་འདུན་པ་མང་པོ་ཕྱི་ལ་བྲོས་བྱོལ་དུ་ཕྱིན་རྗེས་རྒྱ་ནག་གིས་དགོན་པ་གནས་སྐབས་སྒོ་བརྒྱབ་ཀྱང་བདུན་ཤས་རྗེས་དགོན་པ་བསྐྱར་དུ་སྒོ་འབྱེད་བྱས་ཏེ་རྒྱ་ནག་གིས་ངོས་འཛིན་བྱས་པའི་ཤག་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་ཁྲི་སར་བཀོད་ཡོད་པ་སོགས་བཀོད་འདུག རྒྱ་ནག་གིས་མཆོག་སྤྲུལ་ཟླ་བ་རིན་པོ་ཆེ་མཆོག་ལ་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་ཀྱང་། དམ་པ་ཁོང་གི་དགུང་ནའི་བབ་དང་སྐུ་གཟུགས་འཕྲོད་བསྟེན་སོགས་ཞན་པའི་རྐྱེན་གྱིས་ལྷ་སར་བཟང་བཙོན་དུ་བཞག་ཡོད་པའི་ཁྲོད།  ཕྱི་ལོ་ ༢༠༡༤ ལོར་ཐེངས་གཅིག་ཁོང་གི་མ་དགོན་དུ་ཕྱིར་ཕེབས་སུ་བཅུག་རྗེས་སྔར་བཞིན་བཟང་བཙོན་འོག་བཅུག་ཡོད་པར་གསལ་འདུག འདི་ལོའི་ཟླ་བ་དང་པོའི་ཚེས་སུམ་ཅུའི་ཉིན་དམ་པ་ཁོང་དགོངས་པ་རྫོགས་འཕྲལ། རྒྱ་ནག་གིས་ལྷ་ས་ཁུལ་དུ་ཡོད་པའི་ཁོང་གི་དད་ལྡན་རྗེས་འཇུག་པ་རྣམས་སྐུ་གདུང་ལ་མཇལ་བཅར་ཞུ་རུ་བཅུག་པ་ལས།  ཁོང་གི་མ་དགོན་གྱི་དད་ལྡན་མང་ཚོགས་དང་སློབ་མ་རྣམས་སྐུ་གདུང་ལ་མཇལ་བཅར་ཞུ་རུ་བཅུག་མེད་པ་མ་ཟད།  དམ་པ་ཁོང་གི་དགོངས་རྫོགས་ཀྱི་གནད་དོན་དང་པར་རིས་སོགས་སྤྱི་ཚོགས་དྲ་ལམ་ནས་ནག་གསུབ་བཏང་བ་དང་། སྐུ་གདུང་མཇལ་མཁན་རྣམ་པས་པར་སོགས་བརྒྱབ་ན་བཙོན་འཇུག་ཉེས་ཆད་གཅོད་རྒྱུ་ཡིན་པའི་བཙན་བཀའ་བཏང་བ་བརྒྱུད།  དམ་པ་ཁོང་གི་སྐུ་གདུང་ཤག་རོང་པོ་དགོན་དུ་ཞུགས་འབུལ་བྱེད་དུ་བཅུག་ཡོད་ཀྱང་མང་ཚོགས་འདས་མཆོད་དུ་ཞུགས་བཅུག་མེད་པ་མ་ཟད།  འདས་མཆོད་སྒྲུབ་མཁན་གྱི་དགེ་འདུན་པ་རྣམས་ཀྱི་ལུས་པོར་ཞིབ་བཤེར་ནན་པོ་བྱས་ཡོད་པ་མངོན་གསལ་གནང་འདུགའགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་ནག་གཞུང་གིས་ད་རེས་མཆོག་སྤྲུལ་ཟླ་བ་རིན་པོ་ཆེ་མཆོག་གི་སྐུ་གདུང་ཞུགས་འབུལ་ལ་དམ་དྲག་དང་། ཤག་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་ཁྲི་སྟོན་བྱེད་སྟངས་བཅས་ཀྱི་གནད་དོན་ལ་གཞིགས་ན། རྒྱ་ནག་གིས་བོད་བརྒྱུད་ནང་བསྟན་དང་འབྲེལ་བའི་༸གོང་ས་མཆོག་གི་ཤུགས་རྐྱེན་དག་བཙན་འགོག་དང་། ཆོས་ལུགས་ཀྱི་ལས་དོན་སྤྱི་ལ་ཚད་མཐོའི་སྟངས་འཛིན་སླད་མང་ཚོགས་ལ་དྲག་གནོན་དང་། འཇིགས་སྐུལ། སོ་མྱུལ་སོགས་བྱ་རྒྱུར་ཐེ་ཚོམ་མེད་པ་གསལ་པོ་ཡིན་པ་དང་། སྲོལ་རྒྱུན་གྱི་ལམ་ལུགས་ཁག་མ་འོངས་པར་མུ་མཐུད་རྡོག་རོལ་དང་དྲག་གནོན་བྱ་ངེས་ཡིན་པ་གསལ་སྟོན་བྱས་འདུག གཞི་རྩའི་མཆོག་སྤྲུལ་ཟླ་བ་རིན་པོ་ཆེ་མཆོག་ཕྱི་ལོ་ ༡༩༣༧ ལོར་ནག་ཆུ་ས་ཁུལ་ཁམས་སྟོད་རུ་གསར་དུ་འཁྲུངས་པ་དང་། ཕྱི་ལོ་ ༡༩༦༠ ལོར་རྒྱ་ནག་གིས་བོད་ལ་དབང་བསྒྱུར་བྱེད་སྐབས་རྒྱ་ལ་ཁ་གཏད་ལངས་པའི་ཉེས་འཛུགས་ཀྱིས་དམངས་གཙོ་བཅོས་བསྒྱུར་ཟེར་བའི་སྐབས་སུ་འཛིན་བཟུང་དང་། ལན་མང་འཐབ་རྩོད་དང་རྡུང་རྡེག་ཚབ་ཆེན་བཏང་སྟེ་བཙོན་འཇུག་ལོ ༥ དང་། གཞན་ཡང་རིག་གནས་གསར་བརྗེ་སྐབས་ལས་མི་རུ་ཁག་ཟེར་བའི་ནང་ནས་སླར་ཡང་འཛིན་བཟུང་བྱས་ཏེ་འཐབ་རྩོད་དང་མནར་གཅོད་བཟོད་བཀའ་བ་བཏང་སྟེ་ལོ་ ༧ བཙོན་འཇུག་བྱས་ཡོད་པ་རེད། དེ་རྗེས་ཕྱི་ལོ་ ༢༠༡༠ ཟླ་ ༥ ཚེས་ ༢༠ ཉིན་མདོ་ཁམས་ཤག་རོང་པོ་ཁུལ་དུ་སླར་ཡང་རྒྱ་གཞུང་གིས་ལྔ་ཉི་ཤུའི་དོན་རྐྱེན་ཟེར་བའི་འོག་རོང་པོ་ཆོས་རྗེ་སྐུ་ཕྲེང་བརྒྱད་པའི་ཡང་སྲིད་སྐོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་བ་ཡོད་པའི་ནག་ཉེས་བཙུགས་ཏེ་སླར་ཡང་ལོ་ ༧ བཙོན་འཇུག་ཁྲིམས་ཐག་བཅད་ཡོད་པ་ཞིག་ཡིན་པ་རེད།

ལོ་ལྟར་སུད་སི་གྲོང་ཁྱེར་ཇི་ནི་ཝ་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་དུས་ཡུན་སྔ་རྗེས་དང་བསྟུན་རྒྱལ་སྤྱིའི་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གཞུང་འབྲེལ་མིན་པའི་ཚོགས་པ་ ༢༥ ཟུང་འབྲེལ་ཐོག་འགྲོ་བ་མིའི་ཐོབ་ཐང་དང་མང་གཙོ་ཞེས་པའི་གླེང་བརྗོད་ཐད་ཇི་ནི་ཝའི་འགྲོ་བ་མིའི་ཐོབ་ཐང་ལྷན་ཚོགས་ཞེས་པ་ཞིག་ཚོགས་ཀྱི་ཡོད་པ་དང་། འདི་ལོའི་ ༢༠༢༢ ཇི་ནི་ཝའི་ལྷན་ཚོགས་ཐེངས་ ༡༤ པ་དེ་རིང་ཕྱི་ཚེས་ ༦ ཉིན་ཇི་ནི་ཝར་བསྐོང་ཚོགས་གནང་ཡོད་པ་དང། སྐབས་དེའི་མང་ཚོགས་ཧ་ཅང་མང་པོ་འདུ་འཛོམས་བྱུང་བའི་ལྷན་ཚོགས་ཀྱི་སྡིངས་ཆའི་སྟེང་བོད་མིའི་སྐུ་ཚབ་ཐོག་ནས་གཏམ་བཤད་གནང་མཁན་བཙན་བྱོལ་ནང་གི་བོད་མི་སྙན་ངག་པ་དང་བོད་དོན་འཐབ་རྩོད་ལས་འགུལ་བ་བསྟན་འཛིན་བརྩོན་འགྲུས་ལགས་ཀྱིས་རང་ཉིད་ཀྱི་གཏམ་བཤད་མ་གནང་གོང་ལ་བོད་ཀྱི་རྒྱལ་དར་འཕྱར་ནས་འབྲོག་གླུ་བླངས་ཤིང་ལྷན་ཚོགས་ཐོག་ཚོགས་བཅར་བའི་ཁྲོད་བོད་མི་རིགས་ཀྱི་ངོ་བོ་དང་བོད་རྒྱལ་ཁབ་མཚོན་པར་གནང་སོང་།དེ་བཞིན་ཁོང་གིས་དེ་སྔ་ཁོང་རྒྱ་ནག་གི་བཙོན་ཁང་ནང་མྱངས་བའི་དཀའ་སྡུག་གི་བརྒྱུད་རིམ་འགྲེལ་བརྗོད་གནང་སྟེ། རྒྱ་ནག་གཞུང་གིས་བོད་བཙན་འཛུལ་བྱས་པ་ནས་བཟུང་དུས་ད་ལྟ་ད་བར་འདས་པའི་ལོ་ངོ་དྲུག་ཅུའི་ནང་བོད་མི་ས་ཡ་བརྒལ་བ་དམར་གསོད་བཏང་བ་སོགས་འདས་མ་ད་གསུམ་གྱི་བོད་ནང་གི་དངོས་ཡོད་གནས་སྟངས་སྐོར་གཏམ་བཤད་གནང་བ་དང་ཆབས་ཅིག རྒྱ་ནག་དམར་པོ་གཞུང་གི་ངོས་ནས་རྒྱ་མི་རིགས་ཙམ་མ་ཟད་རྒྱ་ནག་གི་མངའ་འོག་བོད་གཙོས་པའི་ས་གནས་ཁག་གི་མང་ཚོགས་ཐོག་འཛིན་པའི་དྲག་གནོན་དང་དམ་དྲག་གྱི་སྲིད་བྱུས་དེ་རྒྱུན་གནས་ཐུབ་ཐབས་མེད་སྐོར་གསུངས་ཡོད་པ་མ་ཟད། ལྷག་པར་དུ་རྒྱལ་སྤྱིའི་ནང་རྒྱ་ནག་གཞུང་དང་ལྷན་དུ་ཚོང་འབྲེལ་བྱེད་མཁན་རྒྱལ་ཁབ་ཚོས་དཔལ་འབྱོར་གྱི་ཁེ་ཕན་རྣམས་རྒྱ་ནག་བཙན་འཛུལ་འོག་ཡོད་པའི་མང་ཚོགས་ཀྱི་སྡུག་བསྔལ་ལས་བྱུང་གི་ཡོད་པ་ཤེས་པའི་ཐོག་ནས་རྒྱ་ནག་དང་ལྷན་ངེས་པར་དུ་ཚོང་འབྲེལ་མཚམས་འཇོག་དགོས་པ་དང་། རྒྱལ་ཁབ་དེ་དག་ལ་བོད་གཙོས་དེའི་མངའ་འོག་གི་མང་ཚོགས་ཀྱི་འགྲོ་བ་མིའི་ཐོབ་ཐང་དང་རང་དབང་སྲུང་སྐྱོབ་གནང་རྒྱུའི་འགན་ཡོད་ཅེས་གསུངསས་ཡོད། སྤྱིར་ཇི་ནི་ཝའི་འགྲོ་བ་མིའི་ཐོབ་ཐང་ལྷན་ཚོགས་ནི་ཐོག་མར་ཕྱི་ལོ་ ༢༠༠༩ ལོར་ UN watch ཞེས་རྒྱལ་ཚོགས་ལ་ལྟ་སྲུང་གནང་མཁན་གྱི་གཞུང་འབྲེལ་མིན་པའི་ཚོགས་པས་སྣེ་ཁྲིད་གནང་སྟེ་རྒྱལ་སྤྱིའི་ནང་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་གཞུང་འབྲེལ་མིན་པའི་ཚོགས་པ་ ༢༠ ལྷག་མཉམ་རུབ་ཀྱིས་བཙུགས་པའི་ལྷན་ཚོགས་ཤིག་ཡིན་ཞིང་། ལྷན་ཚོགས་ཐོག་འཛམ་གླིང་སྲིད་སྐྱོང་སྒེར་སྤྱོད་གཞུང་གི་འོག་དཀའ་སྡུག་མྱངས་པའི་ཆབ་སྲིད་བཙོན་ཟུར་དང་གསར་འགོད་པ་། འགྲོ་བ་མིའི་ཐོབ་ཐང་རྩེད་ལེན་པ་སོགས་མགྲོན་འབོད་གནང་སྟེ་རྒྱལ་ཁབ་སོ་སོ་ནང་གི་འགྲོ་བ་མིའི་ཐོབ་ཐང་གི་དངོས་ཡོད་གནས་སྟངས་གླེང་སློང་གནང་སའི་སྡིངས་ཆ་གྲགས་ཅན་ཞིག་ཡིན་པ་རེད། ཕྱི་ལོ་ ༢༠༡༠ ལོ་ནས་སུད་སི་བོད་ཀྱི་བེུད་ལྷན་ཚོགས་ལྷན་ནས་ལྷན་ཚོགས་འདིའི་ཚོགས་མིའི་མི་ཁོངས་སུ་འཛུལ་ཞུགས་གནང་སྟེ་ཐོག་མར་རྒྱ་ནག་གཞུང་གི་བཙོན་ཁང་ནང་བཙོན་འཇུག་གིས་དུས་ཡུན་རིང་ཤོས་བཞུགས་མྱོང་མཁན་བེུད་ཆབ་སྲིད་བཙོན་ཟུར་ཕུན་ཚོགས་ཉི་སྒྲོན་ལགས་ཀྱིས་བོད་མིའི་སྐུ་ཚབ་གནང་སྟེ་བོད་དོན་ཉན་ཞིབ་ཐོག་མ་གནང་ཐུབ་པ་བྱུང་འདུག་པ་མ་ཟད། འདས་པའི་ལོ་ངོ་བཅུ་ལྷག་ནང་ལྷན་ཚོགས་ཐོག་སུད་སི་བོད་ཀྱི་བེུད་ལྷན་ཚོགས་བརྒྱུད་ལྷན་ཚོགས་སྟེང་བོད་མིའི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་མགོ་ལོག་འཇིགས་མེད་ལགས། བོད་མིའི་སྒྲིག་འཛུགས་ཀྱི་བཀའ་བློན་དང་འགྲོ་བ་མིའི་ཐོབ་ཐང་ཐོག་ཕྱག་ལས་གནང་མཁན་སོགས་འབྲེལ་ཡོད་མི་སྣ་ཁག་ཅིག་གིས་བོད་དོན་གཏམ་བཤད་དང་ཉན་ཞིབ་སོགས་ཀྱང་གནང་ཐུབ་པ་བྱུང་ཡོད་པ་རེད།ད་བར་གྱི་ལྷན་ཚོགས་དེའི་ཚོགས་དུས་ནམ་ཡིན་ལ་སུད་སི་བོད་ཀྱི་བེུད་ལྷན་ཚོགས་ནས་གོ་སྐབས་ཆེ་བཞེས་ཀྱིས་ལྷན་ཚོགས་བརྒྱུད་དེ་བོད་མིའི་ཆབ་སྲིད་བཙོན་ཟུར་དང་ལས་འགུལ་བ་སོགས་མགྲོན་འབོད་ཀྱིས་བོད་ནང་གི་འགྲོ་བ་མིའི་ཐོབ་ཐང་དང་། བོད་མིའི་ཆབ་སྲིད་བཙོན་པའི་གནས་སྟངས་སོགས་རྒྱལ་སྤྱིའི་མང་ཚོགས་ལ་བརྒྱུད་བསྒྲགས་གནང་བཞིན་ཡོད་པ་ལྟར། སུད་སི་ས་གནས་བེུད་ལྷན་ཚོགས་ཀྱི་ཚོགས་གཙོ་ཚེ་རིང་གཡུ་སྒྲོན་ལགས་ནས་ཚོགས་པའི་ངོས་ནས་ཐེངས་འདིའི་ལྷན་ཚོགས་ཐེངས་ ༡༤ ཐོག་བསྟན་འཛིན་བརྩོན་འགྲུས་ལགས་མགྲོན་འབོད་གནང་སྟེ་བོད་དོན་གཏམ་བཤད་སྤེལ་རྒྱུའི་གོ་སྐབས་བསྐྲུན་རྒྱུ་དང་མཐུར་འགྱུར་ཞུ་རྒྱུ་བྱུང་བར་དགའ་སྤོབས་བྱུང་ཞེས་སོང་།ཇི་ནི་ཝའི་འགྲོ་བ་མིའི་ཐོབ་ལྷན་ཚོགས་ཀྱི་ངོས་ནས་འཛམ་གླིང་ནང་དཔའ་ངར་ཞུམ་མེད་ཀྱིས་སྲིད་དབང་སྒེར་སྤྱོད་རིང་ལུགས་ལ་གདོང་ལེན་གྱིས་འགྲོ་བ་མིའི་ཐོབ་ཐང་རྩོད་ལེན་མཁན་གང་ཟག་ལ་སྙིང་སྟོབས་གཟེངས་རྟགས་སམ་ Courage Award ཞེས་པ་ཞིག་འབུལ་སྲོལ་ཡོད་པ་ལྟར། འདི་ལོ་ ༢༠༢༢ ལོའི་ཇི་ནི་ཝའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྙིང་སྟོབས་གཟེངས་རྟགས་དེ་རྒྱ་ནག་གཞུང་གིས་བོད་མི་དང་ཡུ་གུར་མང་ཚོགས་ཀྱི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་དང་གཏོང་བཞིན་པ་མངོན་གསལ་གནང་མཁན་ཨ་རིའི་སིལ་སྤོལ་རྩེད་འགྲན་པ་གྲགས་ཅན་སྐུ་ཞབས་ Enes Kanter Freedom ལགས་སུ་དེ་རིང་ལྷན་ཚོགས་ཐོག་དངོས་སུ་འབུལ་བཞེས་གནང་ཡོད་པ་རེད། དེ་སྔ་ལྷན་ཚོགས་ཀྱི་སྙིང་སྟོབས་གཟེངས་རྟགས་དེ་བོད་མི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ལ་གནང་ཡོད་པ་རེད།  

དེ་རིང་ཟླ་ ༤ ཚེས་ ༦  ཉིན་བཞུགས་སྒར་བོད་ཀྱི་ཟློས་གར་ཚོགས་པར་བོད་ཀྱི་ཞོ་སྟོན་རྒྱས་པ་ཐེངས་ ༢༥ དབུས་འཛུགས་གནང་སོང་བ་དང་ཐེངས་འདིའི་ཞོ་སྟོན་ཐོག་རྒྱ་གར་དང་བལ་ཡུལ། ཨ་རི་བཅས་ཀྱི་ལྷ་མོ་ཚོགས་པ་བརྒྱད་ཀྱིས་མཉམ་ཞུགས་གནང་འདུག དེ་རིང་བོད་ཀྱི་ཞོ་སྟོན་རྒྱས་པ་ཐེངས་ ༢༥ དབུ་འབྱེད་མཛད་སྒོའི་ཐོག་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག དམིགས་བསལ་སྐུ་མགྲོན་ཨ་རུ་ནཱ་ཅལ་མངའ་སྡེའི་ཆོས་རིག་གཙོ་འཛིན་འཇམ་དཔལ་དབང་འདུས་ལགས། བོད་མིའི་སྒྲིག་འཛུགས་ཀྱི་མཛད་གཙོ་ལས་ཟུར། ཉེ་འཁོར་སློབ་གྲྭ་ཁག་ཅིག་གི་དགེ་སློབ། བཞུགས་སྒར་དུ་གཉུག་མར་གནས་པ་དང་གློ་བུར་དུ་ལྷགས་པའི་སེར་སྐྱ་མང་ཚོགས་སོགས་ཆེད་ཕེབས་གནང་འདུག སྐབས་དེར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཞོ་སྟོན་རྒྱས་པ་ཐེངས་ ༢༥ ཐོག་བཅར་བའི་མང་ཚོགས་ཡོངས་ལ་དགའ་བསུའི་འཚམས་འདྲི་གནང་བ་དང་སྦྲགས། ལྷ་མོ་སྲོལ་གཏོད་པ་པོ་གྲུབ་ཐོབ་ཀྱི་སྙན་པ་ཕྱོགས་ཀུན་ཏུ་ཁྱབ་པ་གྲུབ་ཐོབ་ཐང་སྟོང་རྒྱལ་པོ་ནི་གྲུབ་ཐོབ་གཞན་དང་མི་འདྲ་བར་ཆོས་ཕྱོགས་ཀྱི་བྱ་བ་ཙམ་མིན་པར་མི་མང་གི་བདེ་སྡུག་ལ་གཟིགས་ནས་སྐུ་ལས་མང་དག་ཅིག་སྐྱོན་པའི་མཛད་པ་ཁག་ཅིག་འགྲེལ་བརྗོད་དང་སྦྲགས། ཞོ་སྟོན་སྐབས་ལ་སྐྱེས་བུ་དམ་པ་རྣམས་ཀྱི་རྣམ་ཐར་ལ་གཟིགས་པ་ཙམ་མིན་པར་གྲུབ་ཐོབ་ཐང་སྟོང་རྒྱལ་པོའི་མཛད་པ་ཁག་ལ་རྗེས་སུ་འཛིན་པའི་ཐོག་ནས་གཞན་ཕན་དང་སྤྱི་ཚོགས་ལ་སྨན་པའི་ཞབས་འདེགས་ཞུ་གལ་ཡིན་པ་གསུངས་སོང་། སྲིད་སྐྱོང་མཆོག་གིས་ད་དུང་ཟློས་གར་དང་ལྷ་མོའི་འཁྲབ་གཞུང་དེ་དག་ནི་བོད་ཀྱི་རིག་གནས་ཆེ་བ་ལྔ་དང་ཆུང་བ་ལྔ་བཅས་བཅུ་ཡོད་པ་ལས་ཆ་ཤས་ཤིག་ཡིན་པ་དང་། རིག་རྩལ་འདི་བརྒྱུད་ནས་བོད་ཀྱི་སྲོལ་རྒྱུན་གྱི་གཞུང་ལུགས་ཉར་ཚགས་དང་གཞུང་སོ་སོར་ཆོས་ཕྱོགས་དང་སྤྱི་ཚོགས་ཀྱི་ལས་དོན་དང་འབྲེལ་བའི་བསླབ་བྱ་མང་དག་ཅིག་ཡོད་པར་སློབ་གཉེར་གནང་གནད་ཡིན་པ་སོགས་གསུངས་ཡོད། དེ་རིང་གི་མཛད་སྒོ་ཐོག་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གིས་བོད་ཀྱི་ཟློས་གར་ཚོགས་པ་གཙོས་ཕྱོགས་མཐའ་ཁག་ནས་ཕེབས་པའི་ལྷ་མོའི་ཚོགས་པ་ཁག་ལ་གྲུབ་ཐོབ་ཐང་སྟོང་རྒྱལ་པོའི་སྐུ་བརྙན་གསོལ་སྩལ་དང་། བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་བསོད་ནམས་ཆོས་འཕེལ་ལགས་ཀྱིས་བོད་ནང་ལ་ལྷ་མོ་དང་ཞོ་སྟོན་གྱི་དེ་བྱུང་དར་འཕེལ་དང་བཙན་བྱོལ་དུ་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་བཀའ་སློབ་ལམ་སྟོན་འོག་བོད་ཀྱི་ལྷ་མོ་ཚོགས་སླར་གསོ་ཇི་ལྟར་ཐུབ་ཚུལ་སོགས་སྙན་སྒྲོན་གནང་ཡོད།ཐེངས་འདིའི་བོད་ཀྱི་ཞོ་སྟོན་ཐེངས་ ༢༥ ཐོག་རྒྱ་བལ་གཉིས་ཀྱི་ནང་ཡོད་པའི་བཙན་བྱོལ་བོད་མིའི་ལྷ་མོའི་ཚོགས་པ་བཅིུས་ཡོད་པ་ལས་ད་རེས་མ་སུ་རི་བོད་ཁྱིམ་དང་སྤོན་ཊ་ཆོལ་གསུམ་བོད་མིའི་གཞིས་སྒར། ཀ་སྦུག བྷན་དྷ་ར། ཀོ་ལི་གྷར། བོད་ཀྱི་ཟློས་གར་ཚོགས་པ། བལ་ཡུལ། དེ་བཞིན་ཨ་རི་ནས་ལྕགས་ཟམ་པ་སོགས་ལྷ་མོ་ཚོགས་པ་བརྒྱད་ཀྱིས་ཁྱེའུ་པདྨ་འོད་འབར་དང་གཟུགས་ཀྱི་ཉི་མ། ཆོས་རྒྱལ་ནོར་བཟང་། སྣང་ས་འོད་འབུམ། འགྲོ་བ་བཟང་མོ། གཅུང་པོ་དོན་ཡོད་དོན་གྲུབ་བཅས་ཀྱི་ལྷ་གཞུང་སྙིང་བསྡུས་རེ་གཟིགས་ཕུད་ཞུས་ཡོད།དེ་རིང་དབུས་འཛུགས་གནང་བའི་བོད་ཀྱི་ཞོ་སྟོན་རྒྱས་པ་ཐེངས་ ༢༥ འདི་བདུན་ཕྲག་རྗེས་མའི་རེས་གཟའ་ལྷག་པ་བར་ཁྱོན་ཉིན་ཉིན་གྲངས་བརྒྱད་རིང་ཚོགས་ཀྱི་ཡོད་པ་དང་། སང་ཉིན་མ་སུ་རི་བོད་ཁྱིམ་སློབ་གྲྭའི་ལྷ་མོ་ཚོགས་པ་ནས་ཁྱེའུ་པདྨ་འོད་འབར་གྱི་ལྷ་གཞུང་འཁྲབ་སྟོན་གནང་གི་ཡོད་པ་རེད། པར་དབང་། བོད་མིའི་སྒྲིག་འཛུགས།