དེ་རིང་ཟླ་ ༤ ཚེས་ ༦ ཉིན་བཞུགས་སྒར་བོད་ཀྱི་ཟློས་གར་ཚོགས་པར་བོད་ཀྱི་ཞོ་སྟོན་རྒྱས་པ་ཐེངས་ ༢༥ དབུས་འཛུགས་གནང་སོང་བ་དང་ཐེངས་འདིའི་ཞོ་སྟོན་ཐོག་རྒྱ་གར་དང་བལ་ཡུལ། ཨ་རི་བཅས་ཀྱི་ལྷ་མོ་ཚོགས་པ་བརྒྱད་ཀྱིས་མཉམ་ཞུགས་གནང་འདུག
དེ་རིང་བོད་ཀྱི་ཞོ་སྟོན་རྒྱས་པ་ཐེངས་ ༢༥ དབུ་འབྱེད་མཛད་སྒོའི་ཐོག་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག དམིགས་བསལ་སྐུ་མགྲོན་ཨ་རུ་ནཱ་ཅལ་མངའ་སྡེའི་ཆོས་རིག་གཙོ་འཛིན་འཇམ་དཔལ་དབང་འདུས་ལགས། བོད་མིའི་སྒྲིག་འཛུགས་ཀྱི་མཛད་གཙོ་ལས་ཟུར། ཉེ་འཁོར་སློབ་གྲྭ་ཁག་ཅིག་གི་དགེ་སློབ། བཞུགས་སྒར་དུ་གཉུག་མར་གནས་པ་དང་གློ་བུར་དུ་ལྷགས་པའི་སེར་སྐྱ་མང་ཚོགས་སོགས་ཆེད་ཕེབས་གནང་འདུག
སྐབས་དེར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཞོ་སྟོན་རྒྱས་པ་ཐེངས་ ༢༥ ཐོག་བཅར་བའི་མང་ཚོགས་ཡོངས་ལ་དགའ་བསུའི་འཚམས་འདྲི་གནང་བ་དང་སྦྲགས། ལྷ་མོ་སྲོལ་གཏོད་པ་པོ་གྲུབ་ཐོབ་ཀྱི་སྙན་པ་ཕྱོགས་ཀུན་ཏུ་ཁྱབ་པ་གྲུབ་ཐོབ་ཐང་སྟོང་རྒྱལ་པོ་ནི་གྲུབ་ཐོབ་གཞན་དང་མི་འདྲ་བར་ཆོས་ཕྱོགས་ཀྱི་བྱ་བ་ཙམ་མིན་པར་མི་མང་གི་བདེ་སྡུག་ལ་གཟིགས་ནས་སྐུ་ལས་མང་དག་ཅིག་སྐྱོན་པའི་མཛད་པ་ཁག་ཅིག་འགྲེལ་བརྗོད་དང་སྦྲགས། ཞོ་སྟོན་སྐབས་ལ་སྐྱེས་བུ་དམ་པ་རྣམས་ཀྱི་རྣམ་ཐར་ལ་གཟིགས་པ་ཙམ་མིན་པར་གྲུབ་ཐོབ་ཐང་སྟོང་རྒྱལ་པོའི་མཛད་པ་ཁག་ལ་རྗེས་སུ་འཛིན་པའི་ཐོག་ནས་གཞན་ཕན་དང་སྤྱི་ཚོགས་ལ་སྨན་པའི་ཞབས་འདེགས་ཞུ་གལ་ཡིན་པ་གསུངས་སོང་།
སྲིད་སྐྱོང་མཆོག་གིས་ད་དུང་ཟློས་གར་དང་ལྷ་མོའི་འཁྲབ་གཞུང་དེ་དག་ནི་བོད་ཀྱི་རིག་གནས་ཆེ་བ་ལྔ་དང་ཆུང་བ་ལྔ་བཅས་བཅུ་ཡོད་པ་ལས་ཆ་ཤས་ཤིག་ཡིན་པ་དང་། རིག་རྩལ་འདི་བརྒྱུད་ནས་བོད་ཀྱི་སྲོལ་རྒྱུན་གྱི་གཞུང་ལུགས་ཉར་ཚགས་དང་གཞུང་སོ་སོར་ཆོས་ཕྱོགས་དང་སྤྱི་ཚོགས་ཀྱི་ལས་དོན་དང་འབྲེལ་བའི་བསླབ་བྱ་མང་དག་ཅིག་ཡོད་པར་སློབ་གཉེར་གནང་གནད་ཡིན་པ་སོགས་གསུངས་ཡོད།
དེ་རིང་གི་མཛད་སྒོ་ཐོག་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་གིས་བོད་ཀྱི་ཟློས་གར་ཚོགས་པ་གཙོས་ཕྱོགས་མཐའ་ཁག་ནས་ཕེབས་པའི་ལྷ་མོའི་ཚོགས་པ་ཁག་ལ་གྲུབ་ཐོབ་ཐང་སྟོང་རྒྱལ་པོའི་སྐུ་བརྙན་གསོལ་སྩལ་དང་། བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་བསོད་ནམས་ཆོས་འཕེལ་ལགས་ཀྱིས་བོད་ནང་ལ་ལྷ་མོ་དང་ཞོ་སྟོན་གྱི་དེ་བྱུང་དར་འཕེལ་དང་བཙན་བྱོལ་དུ་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་བཀའ་སློབ་ལམ་སྟོན་འོག་བོད་ཀྱི་ལྷ་མོ་ཚོགས་སླར་གསོ་ཇི་ལྟར་ཐུབ་ཚུལ་སོགས་སྙན་སྒྲོན་གནང་ཡོད།
ཐེངས་འདིའི་བོད་ཀྱི་ཞོ་སྟོན་ཐེངས་ ༢༥ ཐོག་རྒྱ་བལ་གཉིས་ཀྱི་ནང་ཡོད་པའི་བཙན་བྱོལ་བོད་མིའི་ལྷ་མོའི་ཚོགས་པ་བཅིུས་ཡོད་པ་ལས་ད་རེས་མ་སུ་རི་བོད་ཁྱིམ་དང་སྤོན་ཊ་ཆོལ་གསུམ་བོད་མིའི་གཞིས་སྒར། ཀ་སྦུག བྷན་དྷ་ར། ཀོ་ལི་གྷར། བོད་ཀྱི་ཟློས་གར་ཚོགས་པ། བལ་ཡུལ། དེ་བཞིན་ཨ་རི་ནས་ལྕགས་ཟམ་པ་སོགས་ལྷ་མོ་ཚོགས་པ་བརྒྱད་ཀྱིས་ཁྱེའུ་པདྨ་འོད་འབར་དང་གཟུགས་ཀྱི་ཉི་མ། ཆོས་རྒྱལ་ནོར་བཟང་། སྣང་ས་འོད་འབུམ། འགྲོ་བ་བཟང་མོ། གཅུང་པོ་དོན་ཡོད་དོན་གྲུབ་བཅས་ཀྱི་ལྷ་གཞུང་སྙིང་བསྡུས་རེ་གཟིགས་ཕུད་ཞུས་ཡོད།
དེ་རིང་དབུས་འཛུགས་གནང་བའི་བོད་ཀྱི་ཞོ་སྟོན་རྒྱས་པ་ཐེངས་ ༢༥ འདི་བདུན་ཕྲག་རྗེས་མའི་རེས་གཟའ་ལྷག་པ་བར་ཁྱོན་ཉིན་ཉིན་གྲངས་བརྒྱད་རིང་ཚོགས་ཀྱི་ཡོད་པ་དང་། སང་ཉིན་མ་སུ་རི་བོད་ཁྱིམ་སློབ་གྲྭའི་ལྷ་མོ་ཚོགས་པ་ནས་ཁྱེའུ་པདྨ་འོད་འབར་གྱི་ལྷ་གཞུང་འཁྲབ་སྟོན་གནང་གི་ཡོད་པ་རེད། པར་དབང་། བོད་མིའི་སྒྲིག་འཛུགས།
