གསར་འགྱུར།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཟླ་ ༨ ཚེས་ ༡༠ ཉིན་དབྱིན་ཇིའི་ཉམས་ཞིབ་ཚོགས་པ་ Association of British Scholars  ཞེས་པ་ནས་ཇི་ལྟར་གསོལ་འདེབས་ཞུ་དོན་ལྟར། རྒྱལ་ས་ལྡི་ལིའི་ siri fort ཚོགས་ཁང་དུ་ས་གནས་ཀྱི་སློབ་གྲྭ་གྲགས་ཅན་དང་གཙུག་ལག་ཁང་། དེ་བཞིན་མཐོ་སློབ་ཁག་ཅིག་གིས་གཙོས་པའི་ས་གནས་མི་མང་བཅས་ཁྱོན་མི་གྲངས་ཉིས་སྟོང་ལྷག་ལ་བདེ་སྐྱིད་ཀྱི་གཞི་རྩའི་སྐོར་ལ་ལམ་སྟོན་སྩལ་བ་མ་ཟད། སྐབས་དེར་༸གོང་ས་མཆོག་གི་ཞལ་མཇལ་དང་གསུང་ཐོས་ཕྱིར་ཆེད་བཅར་ཞུས་པའི་ས་གནས་ཀྱི་བོད་མི་རྣམས་ལ་མགོན་པོ་༸གང་ཉིད་མཆོག་གིས་སོ་སོའི་རྩ་ཆེ་བའི་རིག་གཞུང་དང་སྐད་ཡིག་ལ་དམིགས་བསལ་དོ་སྣང་བྱེད་དགོས་ཞེས་ལམ་སྟོན་བཀའ་སློབ་བཀྲིན་བསྩལ་གནང་ཡོད་པ་རེད། མགོན་པོ་༸གང་ཉིད་མཆོག་གིས་ཐོག་མར་ང་ཚོ་འགྲོ་བ་མི་ཡོངས་རྫོགས་བདེ་སྐྱིད་འདོད་པ་ཞིག་དང་།  ད་ཆ་ཚན་རིག་པ་ཚོས་ཀྱང་མིའི་གཞི་རྩའི་རང་བཞིན་དེ་བྱམས་བརྩེ་ལྡན་པ་ཞིག་ཡིན་པར་ངོས་འཛིན་ཐུབ་ཡོད་སྐོར་སོགས་ངོ་སྤྲོད་གནང་པ་དང་སྦྲགས། ང་ཚོའི་འདས་པའི་དུས་རབས་ཉེ་ཤུའི་ནང་མི་བསད་ཁྲག་སྦྱོར་གྱི་གནས་ཚུལ་མང་དག་ཞིག་བྱུང་ཡོད་པའི་ཉམས་མྱོང་ལ་གཞིགས་ཏེ་ད་ཆ་བསམ་ཤེས་ཡོད་པའི་མི་ཚང་མས་དུས་རབས་ཉེར་གཅིག་འདི་བདེ་སྐྱིད་ལྡན་པ་ཞིག་ཡོང་ཐབས་གནང་དགོས་གལ་ཡིན་པ་སོགས་ཀྱི་ལམ་སྟོན་བཀའ་སློབ་བསྩལ་སོང་། ལྷག་དོན་༸གོང་ས་མཆོག་གིས་སྨོན་ལམ་ཁོ་ན་བརྒྱབ་པ་དང་ཆོས་བྱས་པ་དེས་ཞི་བདེ་ཡོང་ཐུབ་ཀྱི་མེད་པ་རེད། དཔེར་ན་ང་ཚོ་བོད་མིར་ཆ་མཚོན་ན་ ༡༩༤༠ དང་། ༡༩༥༠ ནང་ང་ཚོས་སྨོན་ལམ་མང་པོ་བརྒྱབ་ཡོད་ཀྱང་དེས་དོན་གང་ཡང་ལེགས་གྲུབ་བྱུང་མེད་པ་རེད། དེར་བརྟེན་སྨོན་ལམ་བརྒྱབ་པ་ཙམ་མིན་པར་ཕུགས་རྒྱང་རིང་པོར་ཕན་པའི་ཀུན་སློང་བཟང་པོ་དེ་དངོས་སུ་ལག་ལེན་དུ་འཁེལ་བ་ཞིག་བྱེད་དགོས་ཞེས་བཀའ་སློབ་བསྩལ་ཡོད་པ་རེད། འདས་པའི་དུས་རབས་ནང་དུ་བྱུང་བའི་དཀའ་ངལ་དེ་དག་ཚང་མ་ང་ཚོ་འགྲོ་བ་མིའི་རིགས་ཀྱིས་བཟོས་པའི་དཀའ་ངལ་ཞིག་ཡིན་སྟབས། དཀའ་ངལ་དེ་དག་སེལ་བའི་ཐབས་ཤེས་ཀྱང་ང་རང་ཚོས་བྱེད་དགོས་ཀྱི་རེད།   ད་ལྟའི་ང་ཚོའི་ཤེས་ཡོན་སྲིད་བྱུས་དེས་འཛམ་བུ་གླིང་ནང་བདེ་སྐྱིད་དང་ཞི་བདེ་བསྐྲུན་ཐུབ་ཀྱི་མེད་པར་བརྟེན་དེང་དུས་ཀྱི་མིའི་བསམ་བློ་དང་འཚམ་པའི་ཆོས་ལུགས་ལ་མ་བརྟེན་པའི་སེམས་དང་ཚོར་བའི་ཐོག་ནས་སེམས་ཀྱི་བདེ་སྐྱི་དང་ཞི་བདེ་ཡོང་ཐབས་ཀྱི་སློབ་གསོ་སྤེལ་ཐབས་གནང་དགོས་གལ་ཡིན་པར་ལམ་སྟོན་བཀའ་སློབ་བཀྲིན་ཆེ་བ་བསྩལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་མང་ཚོགས་ལ་བཀའ་སློབ་སྩལ་བ་འདི་རྒྱལ་ས་ལྡི་ལིའི་ནང་གི་ཐེངས་འདིའི་མཛད་འཆར་མཐའ་མ་དེ་ཡིན་པ་དང་། ༸གོང་ས་མཆོག་རྒྱ་གར་བྱང་ཕྱོགས་ཇཱ་མུ་ཀཤྨིར་མངའ་སྡེའི་ལ་དྭགས་སུ་ཟླ་བ་གཅིག་ལྷག་ཙམ་རིང་ལ་མཛད་འཕྲིན་བཀྲིན་བསྐྱངས་གནང་ཡོད་པ་ལྟར། ཁ་སྔོན་ཟླ་ ༨ ཕྱི་ཚེས་ ༢ ཉིན་རྒྱ་གར་གྱི་རྒྱལ་ས་ལྡི་ལིར་༸ཞབས་སོར་བདེ་བར་འཁོད་ཡོད་པ་ལྟར་༸གང་ཉིད་མཆོག་ཚེས་ ༥ བར་སྐུ་ངལ་གསོ་བཞུགས་མཛད་པ་དང་། ཕྱི་ཚེས་ ༧ དང་ ༨ བཅས་སུ་རུ་སུའི་ཁོངས་གཏོགས་ནས་ཡིན་པའི་ཚན་རིག་པ་དང་ནང་པའི་མཁས་པ་དབར་གྱི་བགྲོ་གླེང་གི་ཚོགས་མགོན་དུ་དབུ་བཞུགས་མཛད་ཡོད་པ་དང་། དེ་རྗེས་ཚེས་ ༩ ཉིན་ནེའུ་རུ་དྲན་རྟེན་དཔེ་མཛོད་ཁང་དུ་རྒྱ་གར་རྒྱལ་ཡོངས་ཀྱི་གསར་ཁང་ཁག་གི་རྩོམ་སྒྲིག་ཚོགས་པར་གསར་འགོད་ཀྱི་རང་དབང་དང་ཚུལ་ཁྲིམས་སྐོར་ལ་བཀའ་སློབ་སྩལ་བ་དང་། ཚེས་ ༡༠ ཉིན་ལྡི་ལི་ཁུལ་གྱི་སློབ་གྲྭ་གྲགས་ཅན་དང་གཙུག་ལག་ཁང་། དེ་བཞིན་མཐོ་སློབ་ཁག་ཅིག་གིས་གཙོས་པའི་ས་གནས་མི་མང་བཅས་ཁྱོན་མི་གྲངས་ཉིས་སྟོང་ལྷག་ལ་བདེ་སྐྱིད་ཀྱི་གཞི་རྩའི་སྐོར་ལ་བཀའ་སློབ་བཀྲིན་ཆེ་བ་བསྩལ་གནང་ཡོད་པ་རེད།

དེ་རིང་ཟླ་ ༨ ཚེས་ ༡༠ ཉིན་རྒྱབ་ཏུ་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ནོར་བུ་གསོལ་མགྲོན་ཁང་དུ་གསར་འགོད་ལྷན་ཚོགས་ཤིག་བསྐོང་ཚོགས་གནང་ཐོག་འདས་པའི་དུས་ཡུན་ནང་གསང་བའི་ཐོག་བོད་ནང་ནས་གསེར་རྟ་བླ་རུང་སྒར་དང་འབྲེལ་བའི་གནས་ཚུལ་པར་རིས་དང་བརྙན་ཐུང་སོགས་ཡོད་པ་མཁོ་སྒྲུབ་ཞུས་པ་ཁག་ཅིག་གཟིགས་འབུལ་དང་སྦྲགས། ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་རྒྱ་ནག་གཞུང་གིས་སྔ་ལོ་ཕྱི་ལོ་ ༢༠༡༦ ཟླ་ ༧ ནས་འདི་ལོའི་ཟླ་ ༤ བར་བསྟུད་མར་བོད་གསེར་རྟ་ཁུལ་གྱི་ཆོས་སྡེ་བླ་རུང་སྒར་གྱི་གྲྭ་བཙུན་རྣམས་དགོན་པ་ནས་ཕྱིར་འབུད་བཏང་སྟེ། གྲྭ་ཤག་ཁག་གཏོར་བཤིག་བཏང་པའི་ས་ཆ་ཁག་ཏུ་ཡུལ་སྐོར་སྤྲོ་འཆམ་པ་འགྲོ་སའི་རྒྱ་ལམ་དང་སྐས་བརྫེགས་ས་སྟོང་སོགས་གསར་རྒྱག་བྱེད་བཞིན་ཡོད་པ་འགྲེལ་བརྗོད་གནང་སོང་། གཞན་ཡང་རྒྱ་གཞུང་གིས་ཡུལ་སྐོར་སྤྲོ་འཆམ་པར་དམིགས་ཏེ་གཞི་རྒྱ་ཆེ་བའི་མགྲོན་ཁང་ཁག་ཅིག་གསར་རྒྱག་བྱེད་བཞིན་ཡོད་པ་ཟད། ཆོས་སྡེ་དེར་ད་ཆ་ནང་ཆོས་སློབ་གཉེར་བ་ལས་ཡུལ་སྐོར་སྤྲོ་འཆམ་པ་མང་བ་ཆགས་ཡོད་པ་སོགས་འགྲེལ་བརྗོད་གནང་སོང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཟླ་ ༨ ཚེས་ ༩ ཉིན་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ནེའུ་རུ་དྲན་རྟེན་དཔེམཛོད་ཁང་དུ་རྒྱ་གར་རྒྱལ་ཡོངས་ཀྱི་གསར་ཁང་ཁག་གི་རྩོམ་སྒྲིག་ཚོགས་པའི་གོ་སྒྲིག་གནང་པའི་ལྷན་ཚོགས་ཐོག་གསར་འགོད་ཀྱི་རང་དབང་དང་ཚུལ་ཁྲིམས་སྐོར་ལམ་སྟོན་བཀའ་སློབ་བཀྲིན་བསྩལ་གནང་ཡོད་པ་རེད། དེའང་རྒྱ་གར་གྱི་ཧིཾདཱི་གསར་འགོད་པ་གྲགས་ཅན་སྐུ་ཞབས་ Rajendra Mathur ལགས་དམ་པར་རྗེས་དྲན་ཞུ་ཕྱིར་གོ་སྒྲིག་ཞུས་པ་ཞིག་ཡིན་པ་དང་། སྐབས་དེར་༸གོང་ས་མཆོག་གིས་མགོན་པོ་༸གང་ཉིད་མཆོག་༸སྐུ་ན་གཞོན་ནུའི་དུས་ནས་མང་གཙོ་དང་གསར་འགྱུར་གྱི་རང་དབང་བཅས་ལ་ཐུགས་མོས་ཆེན་པོ་གནང་མཁན་ཞིག་ཡིན་ཞེས་སོགས་ལམ་སྟོན་བཀའ་སློབ་རྒྱ་ཆེ་བཀྲིན་བསྩལ་གནང་འདུག འདི་ག་རླུང་འཕྲིན་ཁང་གི་ས་གནས་གསར་འགོད་པས་ལྷན་ཚོགས་དེ་དང་འབྲེལ་བའི་ཆེད་གཏོང་གནང་པའི་ཞིབ་ཕྲའི་གནས་ཚུལ་ཁག་གཤམ་དུ་གསན་རྒྱུ་ཡོད།

རྒྱ་གཞུང་གིས་དབྱེ་བའི་སི་ཁྲོན་ཞིང་ཆེན་རྔ་བ་ཁུལ་གཟི་རྩ་སྡེ་དགུ་རྫོང་ཁོངས་སུ་ཁ་སང་དགོང་དྲོ་ཚོུད་༩།༡༩ ཙམ་ལ་ས་ཡོམ་ཤུགས་ཚད་རིམ་པ་ ༧ ཅན་ཞིག་བརྒྱབ་ནས་དེ་རིང་ཉིན་གུང་ཚོུད་ ༡།༠༠ བར་མི་ ༡༩ འི་ཚེ་སྲོག་ཤོར་ཡོད་པ་ཤེས་རྟོགས་བྱུང་འདུག ད་ལྟའི་གནས་སྐབས་སུ་བརྒྱུད་ལམ་ཁ་ཤས་ཀྱིས་གནས་ཚུལ་སྤེལ་བར་གཞིགས་ན། ས་ཡོམ་བྱུང་ས་དེར་ནམ་རྒྱུན་ཕྱི་ནས་ཡུལ་སྐོར་བ་མང་དག་ཕེབས་ཡུལ་ཞིག་ཆགས་ཀྱི་ཡོད་སྟབས། རྐྱེན་འདས་སུ་སོང་མཁན་ཁོངས་སུ་ས་གནས་ཀྱི་མི་ཙམ་མ་ཟད་རེ་ཟུང་ཡུལ་སྐོར་སྤྲོ་འཆམ་བ་ཡིན་པ་གསུངས་འདུག ད་བར་ཤེས་རྟོགས་བྱུང་བར་ས་ཡོམ་གྱི་འཇིགས་པ་དེའི་ཁྲོད་དུ་རྨས་སྐྱོན་ཕོག་མཁན་མི་གྲངས་ ༢༤༧ དང་རྨས་སྐྱོན་ཚབས་ཆེ་ཕོག་མཁན་མི་གྲངས་ ༤༠ ཡོད་པ་རྣམས་འབྲེ་ལ་ཡོད་ས་གནས་ཀྱི་སྨན་ཁང་དུ་བསྐྱལ་ཡོད་འདུག འདི་ག་རླུང་འཕྲིན་ཁང་ནས་འབྲེལ་ཡོད་མི་སྣ་ཁག་ཅིག་ལ་བཅར་འདྲི་ཞུས་པའི་ཁྲོད་གཟི་རྩ་སྡེ་དགུའི་ཉེ་འཁྲིས་ས་གནས་ཁག་ཅིག་ཏུ་ས་འགུལ་ཚོར་བ་ཙམ་ལས་ཚེ་སྲོག་ཤོར་བའི་གནས་ཚུལ་ཐོས་རྒྱུ་མི་འདུག་གསུངས་ཀྱི་འདུག བོད་ནང་གི་བོད་སྐད་རླུང་འཕྲིན་དྲ་བ་ཞེས་པའི་ཐོག་གནས་ཚུལ་སྤེལ་བར་གཟི་རྩ་སྡེ་དགུ་རྫོང་དེའི་ནང་གི་གཡུང་དྲུང་བོན་གྱི་དགོན་པ་ཆེ་ཤོས་རབ་དབེན་དགོན་བཀྲིས་ཕུན་ཚོགས་གླིང་གི་གཡུང་དྲུང་ལྷ་རྩེ་མཆོད་རྟེན་དང་འདུ་ཁང་སོགས་ལ་གས་སྲུབས་བྱུང་ཡོད་པ་དང། དགོན་པའི་གྲྭ་བཙུན་རྣམས་ནས་ས་ཡོམ་ལ་གཡོལ་ཆེད་ཕྱི་ལོགས་སུ་བཞུགས་འདུག རྩ་བའི་ཁ་སང་རྔ་པ་གཟི་རྩ་སྡེ་དགུ་རྫོང་ཁུལ་གྱི་ས་ཡོམ་དེ་ཤུགས་ཚད་ཆེ་བ་གྲས་ཤིག་ཆགས་ཀྱི་ཡོད་སྟབས། སི་ཁྲོན་ཞིང་ཆེན་ཁྱབ་ཁོངས་ཀྱི་སྡོད་ཁང་འབུམ་གཅིག་ལྷག་ཙམ་ལ་གས་རྡིབ་དང་། གཞུང་ལམ་ཁག་ཅིག་བཅད་པ་སོགས་གོད་ཆགས་ཆེན་བྱུང་འདུག ཁ་སང་དགོང་དྲོ་ཚོུད་ ༩།༡༩ ཐོག་ས་ཡོམ་ཐོག་མ་དེ་བྱུང་པ་མ་ཟད་དེའི་རྗེས་སུ་ཤུགས་ཚད་ཆུང་བའི་ས་འགུལ་སྔ་རྗེས་བྱུང་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཁ་སང་ཨོ་སི་ཊོ་ལི་ཡའི་རྒྱལ་ས་ Canberra ནང་རྒྱ་རིགས་ཁག་ཅིག་ལ་གསུང་བཤད་གནང་སྐབས་རྒྱ་གཞུང་གིས་དམ་དྲག་ལ་ལྟོས་མེད་བོད་མིའི་ཕྱོགས་ནས་རྒྱ་རིགས་ཚོར་འཁོན་འཛིང་གི་བློ་ནམ་ཡང་བཅང་མྱོང་མེད་པ་དང་། རྒྱ་བོད་གཉིས་ཀྱི་འབྲེལ་ལམ་ཁྲོད་འདས་པའི་ལོ་ ༦༠ དེ་ཆེས་ནོར་འཁྲུལ་ཅན་ཞིག་ཡིན་པ་གསུངས་འདུག ཁ་སང་ཟླ་ ༨ ཚེས་ ༧ ཉིན་རྒྱ་བོད་མཛའ་འབྲེལ་ཚོགས་མི་རྣམ་པས་སྲིད་སྐྱོང་མཆོག་ལ་ Canberra ནང་ཡོད་པའི་ཐང་རྒྱལ་རབས་ཀྱི་ཟ་ཁང་དུ་གསོལ་ཚིགས་འདེགས་འབུལ་ཞུས་པ་དང་བསྟུན། སྲིད་སྐྱོང་མཆོག་གིས་བོད་བཙན་པོའི་རྒྱལ་རབས་དང་ཐང་རྒྱལ་རབས་དབར་བྱུང་བའི་ཐོག་མའི་འབྲེལ་ལམ་སྐོར་ངོ་སྤྲོད་གནང་པ་འབྲེལ། བོད་མི་ཚོའི་ངོས་ནས་དུས་ད་ལྟ་ཡང་ལྷ་སའི་གཙུག་ལག་ཁང་གི་རྟེན་གཙོ་ཇོ་བོ་ཤཱཀྱ་མུ་ནིའི་སྐུ་བརྙན་དང་དེ་བསྣམས་ཕེབས་མཁན་རྒྱ་བཟའ་ཀོང་ཇོ་གཉིས་ལ་དད་གུས་ཞུ་མུས་ཡིན་པ་དང་། རྒྱ་ནག་གཞུང་ཕྱོགས་ནས་དུས་རྟག་ཏུ་བོད་མིའི་ཐོག་ཚད་ལས་འགལ་བའི་དྲག་གནོན་བྱས་པ་མ་ཟད་ལྷག་དོན་ཇོ་ཁང་ངམ་གཙུག་ལག་ཁང་གི་ཡང་སྟེང་དང་དེའི་གཡས་གཡོན་སོགས་སུ་རྟག་ཏུ་དྲག་ཆས་དམག་མི་ཕོན་ཆེ་འགྲེམས་འཇོག་གིས་མཆོད་མཇལ་བ་རྣམས་ལ་དམ་དྲག་ཆེན་པོ་བྱེད་བཞིན་ཡོད་པ་སོགས་འགྲེལ་བརྗོད་གནང་འདུག སྲིད་སྐྱོང་མཆོག་གིས་བོད་བཙན་པོའི་རྒྱལ་རབས་དང་ཐང་རྒྱལ་རབས་བར་གྱི་འབྲེལ་ལམ་དང་ཡང་ན་དེའི་སྔོན་གྱི་འབྲེལ་ལམ་ལ་ཕྱི་ལྟ་བྱ་ཚེ། རྒྱ་བོད་གཉིས་ཀྱི་ལོ་རྒྱུས་ཀྱི་འབྲེལ་ལམ་ཁྲོད་ཉེ་བའི་ལོ་ ༦༠ དེའི་རིང་གི་འབྲེལ་ལམ་དེ་ཆེས་བློ་ཕམ་དང་ནོར་འཁྲུལ་ཅན་ཞིག་ལ་ངོས་འཛིན་ཞུ་བཞིན་ཡོད་ཅེས་གསུངས་པ་མ་ཟད། ང་ཚོས་དེ་སྔ་ཐང་རྒྱལ་རབས་སྐབས་བོད་མིར་གནས་བབས་གང་ཡོད་པ་དེ་ངོ་བཞེས་ཐུབ་ཀྱི་ཡོད་ཀྱང་། འདས་པའི་ལོ་ ༦༠ དེ་ཆེས་ནོར་འཁྲུལ་ཅན་གྱི་འབྲེལ་ལམ་ཞིག་ཆགས་ཡོད་པས་དེ་སླར་དགོས་སམ་ཞེ་ན་ངོས་ལེན་རྩ་བ་ནས་ཞུ་ཐུབ་ཐབས་མེད་ཅེས་གསུངས་འདུག ད་དུང་སྲིད་སྐྱོང་མཆོག་གིས་རྒྱ་རིགས་དེ་དག་ལ་བོད་མིའི་ངོས་ནས་རྒྱ་ནག་གི་ས་ཁོངས་བདག་དབང་དང་མེས་རྒྱལ་གཅིག་སྒྲིལ་བཅས་ལ་བསམ་ཤེས་ཐུབ་ཀྱི་ཡོད་པ་འགྲེལ་བརྗོད་དང་སྦྲགས། ༸གོང་ས་མཆོག་གིས་ལམ་སྟོན་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་དེ་ནི་གཙོ་བོ་འདས་པའི་རྒྱ་བོད་གཉིས་དབར་གྱི་ལོ་རྒྱུས་རྒྱབ་ལྗོངས་ལ་གཞིགས་པའི་ཆེས་འཚམས་པ་ཞིག་ཆགས་ཀྱི་ཡོད་པ་དང་། སྲིད་བྱུས་དེ་ནི་རྒྱ་གཞུང་གི་རྩ་ཁྲིམས་ནང་གང་གསལ་བ་ལྟར་བོད་མི་ཚོས་མིང་དོན་མཚུངས་པའི་རང་སྲིད་རང་སྐྱོང་གི་གནས་བབས་རྩོད་བཞིན་ཡོད་ཅེས་བསྐྱར་ནན་གསུངས་འདུག གཞན་ཡང་ཁོང་སྒེར་གི་ངོས་ནས་བོད་མིའི་འཐབ་རྩོད་དེ་གོ་སྐབས་བཟང་པོ་ཞིག་ཏུ་ངོས་འཛིན་ཞུ་གྱི་ཡོད་པ་དང་། འཐབ་རྩོད་དེའི་བརྒྱུད་རྒྱ་ནག་མི་དམངས་སྤྱི་མཐུན་རྒྱལ་ཁབ་དེ་མང་གཙོར་ཤར་སྐྱོད་གནང་ནས་རྒྱ་རིགས་སྤྱི་དང་སྒོས་སུ་བོད་མི་བཅས་ལ་གང་མགྱོགས་རང་དབང་ཐོབ་པའི་རེ་བ་ཞུ་བཞིན་ཡོད་ཅེས་གསུངས་འདུག རྩ་བའི་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ད་ཆ་ཨོ་སི་ཊོ་ལི་ཡ་ནང་གཞུང་འབྲེལ་སྐོར་སྐྱོད་གནང་བཞིན་པ་དང་བསྟུན། Guardian གསར་ཤོག་ཐོག་དཔྱད་རྩོམ་ཞིག་སྤེལ་པའི་ནང་རྒྱ་གཞུང་གིས་བོད་ནང་འཛུགས་སྐྲུན་ཀྱི་ལས་གཞི་གང་ཞིག་བརྩམ་རུང་དེ་དག་ཐམས་ཅད་ཁོར་ཡུག་དང་རིག་གཞུང་ལ་དོ་ཕོག་མི་འགྲོ་བ་དང་ས་གནས་ཀྱི་བོད་མིར་དཔལ་འབྱོར་གྱི་ཁེ་ཕན་སྐྲུན་ཐུབ་དགོས་ངེས་ཤིག་དགོས་གལ་ཡིན་པར་ནན་བརྗོད་གནང་འདུག སྲིད་སྐྱོང་མཆོག་གིས་སྤེལ་བའི་དཔྱད་རྩོམ་དེའི་ནང་བོད་འདི་ཨེ་ཤ་ཡའི་རྒྱལ་ཁབ་ཡོངས་རྫོགས་ཀྱི་ཆུའི་འབྱུང་ཁུངས་གཙོ་བོ་ཞིག་ཆགས་ཀྱི་ཡོད་པ་མ་ཟད། ཨེ་ཤ་ཡའི་རྒྱལ་ཁབ་ཁག་གི་མི་མང་ཐེར་འབུམ་གཅིག་དང་ཕྱེད་ཀ་ལྷག་ཙམ་གྱི་འཚོ་རྟེན་དང་འབྲེལ་བ་དམ་ཟབ་ཡོད་པ་མ་ཟད། ཆེས་ཐོག་མར་རྒྱ་ནག་གི་མི་མང་རྣམས་ལ་དོ་ཕོག་ཤུགས་ཆེ་ཐེབས་ངེས་ཡིན་པ་སོགས་གསུངས་འདུག རྒྱ་ནག་གི་ཚན་རིག་པ་ཚོས་འདས་པའི་ལོ་ཤས་རིང་བོད་ནང་རང་བྱུང་སྲུང་སྐྱོབ་ས་ཁུལ་ཇེ་མང་དུ་གཏང་དགོས་པའི་གྲོས་འཆར་གནང་པ་མ་ཟད། འདི་ལོའི་ཕྱི་ཟླ་བཞི་པའི་ནང་བོད་མཐོ་སྒང་གི་ས་ཁུལ་ཆ་ཚང་རྒྱལ་ཡོངས་རང་བྱུང་སྲུང་སྐྱོབ་ས་ཁུལ་དུ་བསྒྱུར་འཆར་ཡོད་པ་ཡོངས་བསྒྲགས་གནང་པ་བཅས་ནི་དགའ་བསུ་ཞུ་རྒྱུའི་རྣམ་པ་ཞིག་ཆགས་ཡོད་ཀྱང་། ལས་གཞི་དེ་དངོས་སུ་ལག་བསྟར་སྐབས་བོད་མཐོ་སྒང་གི་ཚོར་བ་རྣོ་བའི་ཁོར་ཡུག་གནས་བབས་ཐོག་ངེས་པར་དུ་དགོངས་པ་བཞེས་དགོས་པ་དང་། རྒྱ་གཞུང་གིས་དུས་ད་ལྟ་བར་དུ་བོད་མཐོ་སྒང་གི་ཁོར་ཡུག་སྲུང་སྐྱོབ་དང་འཛུགས་སྐྲུན་གྱི་ལས་གཞིར་ཁ་གཡར་ནས་བོད་ནང་གི་འབྲོག་པ་ས་ཡ་འགའ་ཤས་གནས་སྤོས་ཟིན་པ་དང་དེ་བཞིན་རྒྱ་རིགས་མི་འབོར་ཕོན་ཆེ་བོད་ནང་གཞི་སྤོས་བྱས་པ་མ་ཟད། ཆུ་མཛོད་གསར་རྒྱག་གི་ལས་གཞི་འོག་གང་བྱུང་གཏེར་ཁ་སྔོག་འདོན་སོགས་བྱས་པ་དེས་མི་ཐེར་འབུམ་དུ་མའི་འཚོ་རྟེན་ལ་དོ་ཕོག་འགྲོ་ངེས་ཡིན་པ་གསུངས་འདུག དེ་མཚུངས་སུ་རྒྱ་གཞུང་ནས་བོད་མཐོ་སྒང་ནང་འཛུགས་སྐྲུན་གྱི་ལས་གཞི་གང་ཞིག་བརྩམས་རུང་དེ་དག་ཐམས་ཟད་ཁོར་ཡུག་ལ་མི་གནོད་པ་དང་བོད་མིའི་གནའ་བོའི་གོམས་སྲོལ་དང་མཐུན་པ། དེ་བཞིན་དཔལ་འབྱོར་གྱི་ཐོག་ནས་ས་གནས་ཀྱི་བོད་མིར་ཁེ་ཕན་སྐྲུན་ཐུབ་པ་ཞིག་དགོས་གལ་ཡིན་པ་དང་། དེང་ཆར་བོད་མཐོ་སྒང་འདི་རྒྱ་གཞུང་གིས་ཆུ་མཛོད་རྒྱག་ས་དང་གཏེར་འདོན་ལས་གཞི་སྤེལ་ཡུལ་གཙོ་གྲས་ཤིག་ཆགས་ཡོད་པས་ཨེ་ཤ་ཡའི་ཁྱབ་ཁོངས་ཀྱི་ཆུའི་ས་ཁྲ་ལ་དོ་ཕོག་བཏང་བ་ཙམ་མིན་པར་བོད་ཀྱི་ཁྱིམ་མཚེས་རྒྱལ་ཁབ་ཡོངས་ཀྱི་ཁོར་ཡུག་གནས་སྟངས་ལ་ཉེན་ཚབས་ཆེན་པོ་བཟོ་ངེས་ཡིན་པའི་ཉེན་བརྡ་བཏང་ཡོད་པ་སོགས་བཀོད་འདུག

དེ་རིང་ཟླ་ ༨ ཚེས་ ༧ ཉིན་སྔ་དྲོ་རྒྱ་གར་གྱི་རྒྱལ་ས་ལྡི་ལིའི་ Taj Mansingh  གསོལ་མགྲོན་ཁང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་ཞུགས་ཐོག་ཨུ་རུ་སུའི་ཚན་རིག་པ་གྲགས་ཅན་ཁག་ཅིག་དང་ནང་པའི་མཁས་དབང་དབར་ཤེས་པའི་རང་བཞིན་ཐོག་གི་བགྲོ་གླེང་ཞིག་དབུ་འཛུགས་གནང་འདུག དེ་སྔོན་ཨུ་རུ་སུའི་ཚན་རིག་པ་ཁག་ཅིག་ནས་ཚན་རིག་དང་ནང་པའི་ལྟ་གྲུབ་དང་འབྲེལ་བའི་སེམས་དང་སྲོག་གི་བགྲོ་གླེང་སོགས་ཀྱི་ཐོག་ནང་མཉམ་ཞུགས་གནང་མྱོང་ཡོད་ཀྱང་། ༸གོང་ས་མཆོག་དབུ་བཞུགས་མཛད་ཐོག་ཨུ་རུ་སུའི་ཚན་རིག་པ་དང་ནང་པའི་མཁས་དབང་དབར་ལོགས་སུ་བགྲོ་གླེང་གནང་པ་འདི་ནི་ཆེས་ཐོག་མ་དེ་ཆགས་ཀྱི་ཡོད་པ་རེད། ཐེངས་འདིའི་བགྲོ་གླེང་ལྷན་ཚོགས་ནི་རུ་སོག་བོད་ཀྱི་དོན་གཅོད་ཁང་དང་། Russian Academy of Science འམ་ཨུ་རུ་སུའི་ཚན་རིག་སློབ་གཉེར་ཁང་། Moscow State University འམ་མོས་ཀོ་མངའ་སྡེའི་གཙུག་ལག་སློབ་གཉེར་ཁང་བཅས་ཐུན་མོང་གིས་གོ་སྒྲིག་ཞུས་པ་ཞིག་ཡིན་པ་དང་།   དེའང་དེ་རིང་ཚེས་ ༧ ཉིན་དབུ་འཛུགས་ཀྱིས་ཉིན་གྲངས་གཉིས་རིང་འཚོགས་རྒྱུའི་བགྲོ་གླེང་དེའི་ཐོག་ཨུ་རུ་སུའི་ཚན་རིག་པ་གྲགས་ཅན་མི་གྲངས་བདུན་གྱིས་གཙོས་པའི་ནང་པའི་མཁས་དབང་སོགས་མི་གྲངས་ ༥༠ ལྷག་ནས་མཉམ་ཞུགས་གནང་འདུག འདི་ག་རླུང་འཕྲིན་ཁང་གི་གསར་འགོད་པས་ཐེངས་འདིའི་བགྲོ་གླེང་གོ་སྒྲིག་ཞུ་མཁན་གཙོ་བོ་རུ་སོག་བོད་ཀྱི་དོན་གཅོད་ཁང་གི་སྐུ་ཚབ་ཏེ་ལོ་རིན་པ་ཆེ་མཆོག་ལ་བགྲོ་གླེང་གནང་སྒོ་ཁག་དངའབྲེལ་བའི་བཅའ་འདྲི་ཁག་ཅིག་ཞུས་ཡོད།  

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཨོ་སི་ཊོ་ལི་ཡ་ནང་དུ་གཞུང་འབྲེལ་སྐོར་སྐྱོད་གནང་བཞིན་པ་དང་བསྟུན། ཡུལ་དེའི་ནང་གི་གསར་འགྱུར་བརྒྱུད་ལམ་ཁག་དང་མཇལ་འཕྲད་སྐབས་ཨོ་སི་ཊོ་ལི་ཡ་གཞུང་གི་ངོས་ནས་བོད་མིའི་གཉིས་སྨན་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་གནང་དགོས་པའི་འབོད་སྐུལ་ཞུས་འདུག དེ་ཡང་ཁ་ཉིན་ཕྱི་ཚེས་ ༥ ཉིན་ Sydney ནང་གི་སྙན་སྒྲགས་ཆེ་བའི་ Opera House ཚོགས་ཁང་དུ་བོད་དོན་གསུང་བཤད་ཀྱི་ལས་རིམ་གྲུབ་རྗེས་ཕྱི་ཚེས་ ༦ ཉིན་ཡུལ་དེའི་ Fairfax Media ཞེས་པའི་ Australia དང་། New Zealand གཉིས་ནང་གི་གསར་ཁང་ཆེ་ཤོས་ཀྱི་བཅར་འདྲི་དང་ལེན་གནང་པར་རྒྱ་ནག་ཞུང་གིས་བོད་ནང་དྲག་གནོན་གྱི་ལས་དོན་མཚམས་འཇོག་ཐོག་རྒྱ་གཞུང་གི་རྩ་ཁྲིམས་ནང་གསལ་ལྟར་བོད་མིར་མིང་དོན་མཚུངས་པའི་རང་སྲིད་རང་སྐྱོང་གི་ཁེ་དབང་སྤྲད་པ་ཡིན་ན། བོད་མིའི་ངོས་ནས་རྒྱ་ནག་ནས་ཁ་བྲལ་རྩོད་ཀྱི་མ་རེད་ཅེས་དང་། གནད་དོན་དེ་དོན་སྨིན་སོན་པར་ཨོ་སི་ཊོ་ལི་ཡ་གཞུང་གི་ངོས་ནས་བོད་མིའི་གཉིས་སྨན་དབུ་མའི་ལམ་གྱི་སྲིད་བྱུས་འོག་བོད་མིར་མིང་དོན་མཚུངས་པའི་རང་སྲིད་རང་སྐྱོང་ཡོང་བར་རྒྱབ་སྐྱོར་གནང་དགོས་པའི་འབོད་སྐུལ་ཞུས་འདུག སྲིད་སྐྱོང་མཆོག་གིས་སྐབས་དེར་ད་དུང་ད་ལྟ་བོད་རང་སྐྱོང་ལྗོངས་ཟེར་བའི་འགོ་ཁྲིད་ནི་རྒྱ་ནག་དམར་ཤོག་ཚོགས་པའི་བསྐོ་གཞག་བྱས་པའི་རྒྱ་རིགས་དཔོན་པོ་ཞིག་ཡིན་ཀྱང་། སྲིད་སྐྱོང་མཆོག་ནི་བོད་མི་མང་གིས་རྒྱབ་སྐྱོར་གནང་ཐོག་བོད་མིའི་འགོ་ཁྲིད་ཅིག་ལ་བསྐོ་གཞག་གནང་ཡོད་སྐོར་གསུང་པ་དང་འབྲེལ། དེ་སྔ་ཕྱི་ལོ་ ༢༠༡༡ ལོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་ནས་འོས་འདེམས་བྱས་པའོ་འགོ་ཁྲིད་ལ་གསོམ་སྩལ་གནང་ཡོད་པ་ལུང་འདྲེན་གྱིས་དེ་ནི་མ་འོངས་པར་བོད་མིའི་འཐབ་རྩོད་དེ་གང་ཟག་གཅིག་ལ་རག་ལུས་མེད་པས་བོད་མི་ཚོས་རྒྱུན་སྐྱོང་གནང་ཐུབ་རྒྱུ་ཡོད་པ་ཞིག་ཡིན་པ་མངོན་གསལ་གནང་འདུག ལྷག་པར་དུ་སྲིད་སྐྱོང་མཆོག་གིས་དེང་སྐབས་བོད་མཐོ་སྒང་གི་ཚོར་བ་རྣོ་བའི་ཁོར་ཡུག་ཐོག་རྒྱ་གཞུང་གིས་རྒྱ་རིགས་མི་འབོར་ཕོན་ཆེ་གཞི་སྤོས་བྱེད་བཞིན་ཁར་འཛུགས་སྐྲུན་གྱི་ལས་གཞི་ཤུགས་ཆེ་སྤེལ་བ་དེ་དག་གིས་བོད་ཀྱི་ཁོར་ཡུག་སྤྱི་དང་སྒོས་མི་མང་ཐེར་འབུམ་གཅིག་དང་ཕྱེད་ཀ་ལྷག་ཙམ་གྱི་འཚོ་རྟེན་དང་འབྲེལ་བ་དམ་ཟབ་ཡོད་པ་མ་ཟད། ཆེས་ཐོག་མར་རྒྱ་ནག་གི་མི་མང་རྣམས་ལ་དོ་ཕོག་ཤུགས་ཆེ་ཐེབས་ངེས་ཡིན་པ་སོགས་གསུངས་འདུག དེ་བཞིན་ཁོང་རང་ཉིད་བཙན་བྱོལ་ནང་དུ་སྐྱེས་པའི་བོད་མི་ཞིག་ཡིན་པའི་ཆ་ནས་བོད་མཐོང་མྱོང་མེད་ནའང་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་གནས་ངོ་མ་ལྷ་ས་ནང་དུ་ཕྱིར་ཕེབས་ཐུབ་པར་རེ་བ་ཞུ་བཞིན་ཡོད་སྐོར་དང། Australia མང་ཚོགས་ཀྱི་ངོས་ནས་ད་བར་རྒྱབ་སྐྱོར་གང་ཐུབ་གནང་པར་ཐུགས་རྗེ་ཆེ་ཞུས་པ་འབྲེལ་ནམ་ཞིག་བོད་མིའི་བདེན་དོན་དེ་སེལ་ཐུབ་ངེས་ཡིན་པས་ཨོ་སི་ཊོ་ལི་ཡ་གཞུང་མང་གཉིས་ནས་རྒྱབ་སྐྱོར་མི་མཐུད་གནང་རོགས་ཞེས་འབོད་སྐུལ་ཞུས་འདུག རྩ་བའི་སྲིད་སྐྱོང་མཆོག་ཕྱི་ཚེས་ ༥ ཉིན་ Sydney ནང་གི་ལས་རིམ་གྲུབ་རྗེས་ཁ་སང་ཕྱི་ཚེས་ ༦ ཉིན་སྔ་དྲོ་ཁུལ་དེའི་རྒྱ་རིག་མང་ཚོགས་ལྷན་དུ་ད་ལྟའི་བོད་ནང་གི་གནས་སྟངས་ལ་གཞིགས་པའི་མ་འོངས་བོད་ཀྱི་གནས་བབས་ཞེས་པའི་བརྗོད་གཞིའི་ཐོག་གྲོས་བསྡུར་ལས་རིམ་ནང་མཉམ་ཞུགས་གནང་པ་མ་ཟད། ཉིན་རྒྱབ་ཏུ་ New South Wales མངའ་ཁུལ་དུ་གནས་སྡོད་བོད་རིག་མང་ཚོགས་རྣམས་དང་མཇལ་འཕྲད་གནང་ཡོད་པ་རེད་འདུག  

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཕྱི་ཚེས་ ༦ ཉིན་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་གྱི་ Times now གསར་ཁང་གི་གསར་འགོད་པ་ Srinjoy Chowdhury ལགས་ཀྱིས་བཀའ་འདྲི་ཞུས་པའི་ལས་རིམ་ཞིག་ཐོག་རྒྱ་དཀར་ནག་གཉིས་ཀྱི་རྩོད་རྙོག་ཁག་སེལ་ཐབས་སུ་ཕྱོགས་གཉིས་གྲོགས་པོ་བྱས་ནས་བསྡད་རྒྱུ་ནི་ཐབས་ལམ་ཡག་ཤོས་རེད་ཅེས་བཀའ་སྩལ་འདུག གསར་འགོད་པ་ Srinjoy Chowdhury ལགས་ནས་༸གོང་ས་མཆོག་ལ་ཐུན་མོང་མ་ཡིན་པའི་གནའ་བོའི་རིག་གཞུང་ཁག་དེང་གི་སྤྱི་ཚོགས་ནང་འབྲེལ་བ་གང་ཡོད་མེད་དང་། མགོན་པོ་༸གང་ཉིད་མཆོག་གི་༸སྐུའི་ཡང་སྲིད་ཀྱི་གནད་དོན། དེ་བཞིན་རྒྱ་ནག་གི་དྲག་རྩུབ་སྲིད་བྱུས་ཆེ་རུ་འགྲོ་བཞིན་པ་སོགས་ཀྱི་ཐོག་བཀའ་འདྲི་ཞུས་འདུག ལྷག་པར་དུ་སྐབས་དེར་གསར་འགོད་པས་རྒྱ་ནག་ཕྱོགས་ནས་འདས་པའི་ལོ་དུས་ནང་ལ་མགོན་པོ་༸གང་ཉིད་མཆོག་ཙམ་མ་ཟད། རྒྱ་གར་ལ་ཡང་དྲག་རྩུབ་བྱེད་ཤུགས་ཆེ་རུ་བཏང་པ་དང་ད་ལྟའི་ཆར་རྒྱ་གར་དང་རྒྱ་ནག འབྲུག་ཡུལ་བཅས་ཀྱི་ས་མཚམས་སུ་ཆགས་པའི་འབྲོག་ལམ་ཁུལ་དུ་རྒྱ་དཀར་ནག་གཉིས་ཀྱི་དབར་ལ་རྩོད་རྙོག་འགྲོ་བཞིན་པའི་ཐད་བཀའ་འདྲི་ཞུས་པར་༸གང་ཉིད་མཆོག་ནས་ཁུལ་དེར་རྒྱ་དཀར་ནག་གཉིས་པོ་དབར་དཀའ་རྙོག་འཕྲད་བཞིན་པ་དེ་རྒྱ་ནག་བོད་ནང་དུ་བཙན་འཛུལ་བྱས་རྗེས་བྱུང་བ་ཞིག་ཡིན་པར་བཀའ་འགྲེལ་གནང་པ་དང་ཆབས་ཅིག་ཏུ་ད་ལྟའི་ཆར་རྒྱ་དཀར་ནག་གཉིས་ཀ་རྒྱལ་སྤྱིའི་ཐོག་ལོ་རྒྱུས་ལྡན་པའི་རྒྱལ་ཁབ་ཆེན་པོ་ཞིག་ཆགས་ཀྱི་ཡོད་སྟབས། གནད་དོན་གང་འདྲ་ཞིག་ཡིན་རུང་ཕྱོགས་གཉིས་དབར་ལ་གཅིག་ཕན་གཅིག་གྲོགས་བྱས་ཏེ་གནས་རྒྱུ་གལ་ཆེན་པོ་ཡིན་པ་མ་ཟད། ལྷག་པར་དུ་ད་ལྟའི་རྩོད་རྙོག་དེ་སེལ་ཐབས་སུ་རྒྱ་དཀར་ནག་གཉིས་གྲོགས་པོ་བྱས་ནས་བསྡད་རྒྱུ་ནི་ཐབས་ལམ་ཡག་ཤོས་རེད་ཅེས་བཀའ་སྩལ་འདུག མགོན་པོ་མཆོག་ནས་རྒྱ་གཞུང་གི་དྲག་པོའི་སྲིད་བྱུས་རྒྱ་སྐྱེད་འགྲོ་བཞིན་པ་དང་འབྲེལ། ལྟ་བ་མཁྲེགས་བཟུང་ཅན་གྱི་རྒྱ་གཞུང་འགོ་ཁྲིད་ཚོས་རྣམ་ཀུན་གཏན་ལྷིང་དང་གཅིག་སྒྲིལ་དགོས་སྐོར་བཤད་བཞིན་ཡོད་ཀྱང་། དོན་དངོས་ཐོག་དྲག་པོ་ཁོ་ནར་བརྟེན་ནས་མང་ཚོགས་ཁྲོད་འཇིགས་སྣང་དང་ཡིད་ཆེས་མེད་པའི་བསམ་བློ་རྒྱ་སྐྱེད་དུ་གཏོང་མུས་ཡིན་པ་དེས་ཕུགས་རྒྱང་རིང་པོར་དོན་ཕན་གསོན་དཀའ་བ་དང་གཏན་ལྷིང་ལྡན་པའི་ཁོར་ཡུག་བསྐྲུན་དཀའ་བའི་གནས་ཡིན་པ་བཀའ་ནན་སྩལ་འདུག དེ་བཞིན་སྐབས་དེར་གསར་འགོད་པས་༸སྐུའི་ཡང་སྲིད་ཀྱི་གནས་དོན་སྐོར་བཀའ་འདྲི་ཞུས་པར་༸གོང་ས་མཆོག་ནས་ཞལ་མོ་བཞེས་ཏེ་༸སྐུའི་ཡང་སྲིད་ཀྱི་གནད་དོན་ཐད་ལ་མགོན་པོ་མཆོག་ལས་ཀྱང་རྒྱ་ནག་གཞུང་ནས་སེམས་ཚབས་མང་བ་བྱེད་བཞིན་ཡོད་སྐོར་བཀའ་སྩལ་དང་འབྲེལ། ༸གོང་ས་མཆོག་གིས་རིང་མིན་ཆོས་ཕྱོགས་ཀྱི་དབུ་ཁྲིད་རྣམ་པ་དང་ལྷན་དུ་དེ་འབྲེལ་ཐོག་གྲོས་བསྡུར་ཞུ་འཆར་ཡོད་ཅེས་བཀའ་ལན་སྩལ་པ་དང་ཆབས་ཅིག རྒྱ་བོད་གཉིས་ཀྱི་གནད་དོན་ཁྲོད་བོད་མི་རྣམས་ནས་རང་བཙན་རྩོད་ཀྱི་མེད་ཀྱང་། བོད་མི་རྣམས་རང་ཉིད་ཀྱི་ཐུན་མོང་མ་ཡིན་པའི་སྐད་ཡིག་དང་རིག་གཞུང་། ལྷག་པར་དུ་དཔལ་ནཱ་ལེནྡྲ་ནས་བརྒྱུད་པའི་ཐུན་མོང་གི་རིག་གནས་ཁག་མི་ཉམས་རྒྱུན་འཛིན་ཐུབ་ཆེད་མིང་དོན་མཚུངས་པའི་རང་སྐྱོང་གི་གནས་བབས་ཤིག་རྩོད་བཞིན་ཡོད་པ་བཀའ་སློབ་ནན་པོ་མཛད་འདུག སྐབས་དེར་གསར་འགོད་པ་ Chowdhury ལགས་ཀྱིས་བཀའ་འདྲི་ཞུས་པའི་ལས་རིམ་ཐོག་ད་ལྟའི་རྒྱ་གར་གྱི་གནས་སྟངས་དང་འབྲེལ། སྲིད་བློན་མོ་དི་མཆོག་གིས་དབུ་ཁྲིད་པའི་འོག་རྒྱ་གར་དེ་དེང་སྐབས་རྒྱལ་སྤྱིའི་རྒྱལ་ཁབ་མང་པོ་ཞིག་ནས་ཆེ་མཐོང་དང་དོ་སྣང་བྱེད་ས་ཞིག་ཏུ་འགྱུར་ཡོད་པ་དེ་བཟང་ཕྱོགས་ཀྱི་རྣམ་པ་ཞིག་ཡིན་པ་དང་། ལྷག་པར་དུ་རྒྱ་གར་འདི་བཞིན་འཛམ་གླིང་སྟེང་གི་མང་གཙོའི་རྒྱལ་ཁབ་ཆེ་ཤོས་དེ་ཆགས་ཡོད་པས་རྒྱལ་སྤྱིའི་ཁྲོད་འགན་མང་ཙམ་བཞེས་རྒྱུ་གནད་ཆེ་ཡིན་པ་བཀའ་སྩལ་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཕྱི་ཚེས་ ༣ ཉིན་རྒྱ་གར་གྱི་རྒྱལ་ས་ལྡི་ལིར་ཨུ་རུ་སུའི་གསར་འགོད་པ་ Dmitry Portnyagin ལགས་ཀྱིས་བཀའ་འདྲི་ཞུས་པའི་ལས་རིམ་ཞིག་གི་ཁྲོད། མགོན་པོ་༸གང་ཉིད་མཆོག་གིས་ཨུ་རུ་སུ་ནང་ཆིབས་སྒྱུར་བསྐྱང་ཐུབ་ཀྱི་མེད་ནའང། ཁུལ་དེའི་ནང་གི་ནང་པ་ཚོ་ལ་ཕན་ཐོགས་བསྒྲུབ་ཐུབ་པའི་དགོངས་པ་བཞེས་གནང་གི་ཡོད་སྐོར་བཀའ་གནང་འདུག དེ་ཡང་གསར་འགོད་པ་སྐུ་ཞབས་ Dmitry Portnyagin ལགས་ནས་ཁ་སང་༸གོང་ས་༸སྐྱབས་མགོན་ཆེན་པོ་མཆོག་ལྡི་ལིར་བཞུགས་ཞག་མཛད་པ་དང་བསྟུན་བཀའ་འདྲི་ཞུ་རྒྱུའི་གོ་སྐབས་ཐོབ་དོན་ལྟར་ཁོང་གིས་༸གོང་ས་མཆོག་ལ་དེང་དུས་ཕྱི་དངོས་པོ་ཡར་རྒྱས་འགྲོ་བ་དང་མཉམ་དུ་ཆོས་ཀྱི་བསླབ་བྱ་དེ་དོ་མཉམ་པ་ཇི་ལྟར་ཡོང་ཚུལ་དང་། དེ་བཞིན་འཛམ་གླིང་འདི་ད་ལྟ་ལས་ལྷག་པའི་ཞི་བདེ་ཡོང་ཐུབ་མིན་སོགས་ཀྱི་ཐོག་བཀའ་འདྲི་ཞུས་འདུག ལྷག་པར་གསར་འགོད་པ་སྐུ་ཞབས་ Portnyagin ལགས་དང་དེ་བཞིན་སྐབས་དེར་ཁོང་དང་ལྷན་དུ་ཡོད་པ་ཨུ་རུ་སའི་རྒྱལ་ས་ Moscow འི་ Synergy Business སློབ་གྲྭའི་སློབ་སྤྱི་ Grigory Avetov ལགས་གཉིས་ནས་༸གོང་ས་མཆོག་ལ་རིང་མིན་འདི་ལོའི་ཕྱི་ཟླ་ ༡༡ ནང་དུ་སློབ་གྲྭ་དེའི་ནང་འཚོགས་འཆར་ཡོད་པའི་ Synergy རྒྱལ་སྤྱིའི་ལྷན་ཚོགས་ཐོག་མགོན་པོ་མཆོག་ཆིབས་སྒྱུར་བསྐྱང་ཐུབ་མིན་གསོལ་འདེབས་ཞུས་པར་༸གོང་ས་མཆོག་ཞལ་མོ་བཞེས་ནས་དེང་སང་རང་གི་རྒྱལ་ཁབ་ནང་སུ་གདན་འདྲེན་ཞུ་མིན་རྒྱ་ནག་ལ་ཆོག་མཆན་ཞུ་དགོས་པ་ལྟར་ཆགས་ཡོད། རྒྱ་གཞུང་གི་འགོ་ཁྲིད་ཚོས་༸གང་ཉིད་མཆོག་ལ་ཁ་བྲལ་བ་དང་འཇིགས་སྐུལ་བ། དེ་བཞིན་འདྲེ་རེད་ཅེས་བརྗོད་ཀྱི་ཡོད་སྟབས་༸གང་ཉིད་མཆོག་ཁུལ་དེར་ཆིབས་སྒྱུར་བསྐྱང་ཐུབ་རྒྱུ་ཁག་པོ་ཡིན་པ་གསུངས་འདུག འོན་ཀྱང་༸གོང་ས་མཆོག་གིས་ཨུ་རུ་སུའི་ཁྱབ་ཁོངས་ Kalmykia དང་། Buryatia དེ་བཞིན་ Tuva སྤྱི་མཐུན་རྒྱལ་ཁབ་ཀྱི་མང་ཚོགས་རྣམས་ནི་བོད་པ་ལྟར་དཔལ་ནཱ་ལེནྜའི་ཆོས་བརྒྱུད་ཉམས་ལེན་གནང་མཁན་གཅིག་མཚུངས་ཆགས་ཀྱི་ཡོད་སྟབས། ༸གང་ཉིད་མཆོག་ནས་ག་དུས་ཡིན་ཡང་ཨུ་རུ་སུའི་ཁྱབ་ཁོངས་ཀྱི་ནང་པ་ཁོང་ཚོ་ལའང་ཕན་ཐོགས་བསྒྲུབ་ཐུབ་པའི་སྨོན་ལམ་རྒྱག་གི་ཡོད། སྨོན་ལམ་དེ་ད་ལྟ་འབྲས་བུ་སྨིན་རྒྱུ་རེད་ཅེས་བཀའ་ལན་བསྩལ་འདུག དེ་བཞིན་༸གོང་ས་མཆོག་གིས་གསར་འགོད་པས་བཀའ་འདྲི་ཞུས་ཁག་ཅིག་ལ་བཀའ་ལན་གནང་པའི་ཁྲོད་དེ་རིང་སང་ཉིན་ང་ཚོར་འ ཕྲད་བཞིན་པའི་དཀའ་ངལ་མང་ཆེ་བ་ནི་མིས་བཟོས་པ་ཤ་སྟག་ཆགས་ཀྱི་ཡོད་པ་དང་། དེ་དེ་བཞིན་ཕྱི་དངོས་པོ་ཡར་རྒྱས་ག་ཚོད་སོང་ཡང་དེ་གཅིག་པུས་འགྲོ་བ་མི་ལ་བདེ་སྐྱིད་སྤྲོད་ཐུབ་ཐབས་མེད་པས་མི་གཞན་ཕུན་ཚུན་གྱི་བདེ་སྡུག་ལ་སེམས་ཚོར་ཡོད་པ་དང་རང་གཞན་ཀུན་ལ་འགྲོ་བ་མི་ཡིན་པའི་གཅིག་གྱུར་གྱི་འདུ་ཤེས་དགོས་རྒྱུ་ནི་ཤིན་ཏུ་ནས་གལ་གནད་ཆགས་ཡོད། མིའི་ལྷན་སྐྱེས་སུ་བྱམས་བརྩེ་ལྡན་པ་ཞིག་ཆགས་ཀྱི་ཡོད་སྟབས་ང་ཚོར་རེ་བ་ཏན་ཏན་ཡོད་པ་སོགས་ལམ་སྟོན་རྒྱ་ཆེ་མཛད་འདུག གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་ཁ་ཉིན་ཟླ་ ༨ ཚེས་ ༢ ཉིན་ལ་དྭགས་ནས་རྒྱལ་ས་ལྡི་ལིར་༸ཞབས་སོར་འཁོད་ཡོད་པ་རེད། མཛད་འཆར་ལྟར་ཕྱི་ཚེས་ ༧ དང་ ༨ བཅས་སུ་ལྡི་ལིར་ཨུ་རུ་སུའི་ཁྱབ་ཁོངས་ནས་ཕེབས་པའི་ཚན་རིག་པ་དང་མཁས་པ་ཁག་ཅིག་གི་བགྲོ་གླེང་ཚོགས་འདུར་ཚོགས་མགོན་དུ་ལྷན་བཞུགས་མཛད་ཀྱི་ཡོད་པ་རེད།