གསར་འགྱུར།

ཁ་སང་ཟླ་ ༨ ཚེས་ ༣༠ ཉིན་གྱི་ཐོ་རེངས་ཚོུད་ ༤།༣༠ ཡས་མས་སུ་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་རྨ་ཆེན་རྫོང་ཁོངས་རྭ་རྒྱ་རྡལ་གསེར་ཆེན་སྡེ་བར་རི་ཉིལ་བའི་དོན་རྐྱེན་འོག་ས་གནས་ཀྱི་བོད་མི་བདུན་གྱི་ཚེ་སྲོག་ཤོར་འདུག དེའང་ཀྲུང་གོའི་བོད་སྐད་དྲ་ཐོག་ཏུ་གནས་ཚུལ་སྤེལ་བར་གཞིགས་ན། ཐོག་མའི་ཆར་ཁ་སང་མགོ་ལོག་ཁུལ་རྨ་ཆེན་རྫོང་ར་རྒྱ་གྲོང་རྡལ་གསེར་ཆེན་སྡེ་བར་རི་ཉིལ་བའི་གནོད་འཚེ་བྱུང་སྟབས། གསེར་ཆེན་སྡེ་བའི་འབྲོག་ཁྱིམ་གསུམ་གྱི་མི་དགུ་དང་སྒོ་ཕྱུགས་སེམས་ཅན་བརྒྱ་ལྷག་ས་འོག་ཏུ་མནན་འདུག་པ་དང་། ཁ་སང་ཉིན་རྒྱབ་ཚོུད་ ༢།༠༠ བར་གྱི་ས་གནས་གཞུང་གིས་མྱུར་སྐྱོབ་གནང་པའི་བརྒྱུད་ས་འོག་ཏུ་ཚུད་པའི་མི་རྣམས་རྙེད་འདུག་ཀྱང་། དེ་དག་ཁྲོད་ནས་བདུན་གྱི་ཚེ་ཤོར་འདུག་པ་དང་མི་གཉིས་ལ་རྨས་སྐྱོན་ཚབས་ཆེ་ཕོག་ཡོད་པ་རེད་འདུག དེ་བཞིན་ད་རེས་ཀྱི་རི་ཉིལ་བའི་འཇིག་པ་དེའི་འོག་ས་གནས་འབྲོག་པའི་སྒོ་ཕྱུགས་སེམས་ཅན་བརྒྱ་ལྷག་འདས་གྲོངས་སུ་གྱུར་འདུག་པ་མ་ཟད། ད་ལྟའི་ཆར་ས་གནས་ཡོངས་རྫོགས་ལ་ཆར་ཆུ་འཁྱིལ་ཡོད་པ་མངོན་རྒྱུ་འདུག སྨད་རྒྱུད་ཀྱི་འབྲོག་དམངས་ ༦༠ ལྷག་བདེ་འཇགས་ངང་ས་གནས་གཞན་དུ་གནས་སྤོས་ཟིན་ཡོད་པ་རེད་འདུག

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་སྔོན་ཨ་རིའི་ Texas མངའ་སྡེ་ནང་དྲག་ཆར་རླུང་འཚུབ་ཤུགས་ཆེན་འོག་ཡུལ་དེའི་མི་རྒྱུ་གཉིས་ཀར་གནོད་འཚེ་ཚབས་ཆེ་ཕོག་པར་ཐུགས་ཕམ་ཆེན་པོ་བྱུང་ཞེས་ཐུགས་གསོ་མཛད་འདུག དེའང་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཚེས་ ༣༠ ཉིན་ཨ་རིའི་ Texas མངའ་སྡེའི་སྲིད་སྐྱོང་སྐུ་ཞབས་ Greg Abbot མཆོག་གི་མཚན་ཐོག་ཏུ་གསུང་འཕྲིན་ཞིག་བསྩལ་ཡོད་པ་དེའི་ནང་ལྷོ་ཤར་ཊེག་སིས་མངའ་སྡེ་དང་ལྷག་པར་ཧུས་ཊོན་གྲོང་ཁྱེར་དུ་སྔར་བྱུང་མྱོང་མེད་པའི་དྲག་ཆར་རླུང་འཚུབ་ཀྱི་འཇིག་པ་ཤུགས་ཆེ་བྱུང་རྐྱེན་མང་ཚོགས་ཚོའི་ཚེ་སྲོག་ཤོར་བ་དང་སྡོད་ཁང་སོགས་ལ་གནོད་འཚེ་དཔག་མེད་བྱུང་བར་ཐུགས་སྨོན་མཛད་པ་དང་། དེ་བཞིན་ཤུལ་ལུས་ནང་མི་དགའ་ཉེ་སྤུན་མཆེད་སྟོང་ཕྲག་དུ་མ་ཆེས་དཀའ་སྡུག་མྱོང་བཞིན་པའི་ཡིད་སྐྱོའི་གནས་སྟངས་ལ་གདུང་སེམས་མཉམ་སྐྱེད་གནང་འདུག ༸གོང་ས་མཆོག་གིས་དེ་སྔ་མགོན་པོ་༸གང་ཉིད་མཆོག་ཨ་རིའི་ཊེག་སིས་མངའ་སྡེའི་ནང་ཐེངས་འགའ་ཤས་ཕེབས་མྱོང་ཡོད་པ་དེ་དག་དགོངས་པ་འཁོར་སྐབས་ཐུགས་དགྱེས་ཚོར་ཡོང་བཞིན་ཡོད་པ་བཀའ་གནང་པ་དང་སྦྲགས། ༸གང་ཉིད་མཆོག་གི་མཛའ་གྲོགས་ཨ་རིའི་སྲིད་འཛིན་ཟུར་པ་སྐུ་ཞབས་ George W. Bush མཆོག་གིས་མགྲོན་འབོད་གནང་དོན་ལྟར་མངའ་སྡེ་དེའི་ནང་ཆིབས་སྒྱུར་མཐའ་མ་དེ་ལོ་གཉིས་གོང་ལ་གནང་སྐོར་བཀའ་བསྩལ་འདུག ༸གོང་ས་མཆོག་གིས་ད་དུང་ཊེག་སིས་མངའ་སྡེ་གཞུང་ནས་ད་ཆ་ཁུལ་དེའི་ནང་ངལ་བ་ཁྱད་གསོད་ཀྱིས་ཉེན་སྐྱོབ་ལས་གཞི་སྤེལ་མུས་ཡིན་པར་ཡི་རངས་བསྔགས་བརྗོད་མཛད་པ་དང་ཆབས་ཅིག གཉན་འཕྲང་ཅན་གྱི་དུས་སྐབས་འདིར་ངོས་རང་གི་བསམ་བློ་ཊེག་སིས་མི་མང་རྣམས་དང་ལྷན་དུ་ཡོད་ཅེས་བཀའ་བསྩལ་འདུག གཞི་རྩའི་ཟླ་བ་འདིའི་གཟའ་འཁོར་སྔོན་མའི་ནང་ཨ་རིའི་ Texas མངའ་སྡེ་ནང་དུ་ Harvey ཞེས་པའི་དྲག་ཆར་རླུང་འཚུབ་ཤུགས་ཆེན་འོག་མི་རྒྱུ་གཉིས་ཀར་གནོད་འཚེ་ཚབས་ཆེ་ཕོག་པ་ལས་མི་ ༣༡ གི་ཚེ་སྲོག་ཤོར་བ་དང་སྡོད་ཁང་ ༥༠,༠༠༠ ལྷག་ཙམ་ལ་སྐྱོན་ཆག་ཕོག་ཡོད་པ་རེད།

དེ་རིང་ཟླ་ ༨ ཚེས་ ༣༠ ཉིན་སྔ་དྲོ་ཚོུད་ ༩།༣༠ ཡོལ་ཙམ་ལ་གངས་སྐྱིད་གཉའ་ཁྲི་ཚོགས་ཁང་དུ་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་གོ་སྒྲིག་འོག་སྐུ་མགྲོན་གཙོ་བོར་དཔལ་འབྱོར་བཀའ་བློན་ཀརྨ་ཡེ་ཤེས་མཆོག དཔལ་འབྱོར་དྲུང་ཆེ་འཕྲིན་ལས་རྒྱ་མཚོ་ལགས་དང་དཔལ་འབྱོར་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དྲུང་འཕར་དབུ་དཀར་ཚང་སྐལ་རྡོ་ལགས། དེ་བཞིན་བཙན་བྱོལ་བོད་མི་ཡར་ཐོན་ཚོང་པའི་མ་དངུལ་རོགས་སྐྱོར་གཟེངས་རྟགས་འགྲན་བསྡུར་ནང་མཉམ་ཞུགས་བ་བོད་རིགས་ཡར་ཐོན་ཚོང་ལས་པ་ཁག་དང་བཞུགས་སྒར་གཙོས་པའི་བོད་མིའི་གཞིས་ཁག་དང་། བལ་ཡུལ་བཅས་ཀྱི་ནང་ཚོང་ལས་གཉེར་བཞིན་པའི་བོད་མི་བཅས་ཁྱོན་མི་གྲངས་བརྒྱ་སྐོར་ཚང་འཛོམས་ཐོག་ཉིན་གཉིས་རིང་གི་བཙན་བྱོལ་བོད་མིའི་ཡར་ཐོན་ཚོང་པའི་འདུ་འཛོམས་ཐེངས་གསུམ་པ་དབུ་འཛུགས་གནང་སོང་། འདི་ལོའི་བཙན་བྱོལ་བོད་མིའི་ཡར་ཐོན་ཚོང་ལས་འགྲན་བསྡུར་གྱི་ཐོག་མའི་ཁྲོད་བོད་རིགས་ཡར་ཐོན་ཚོང་ལས་པ་ ༢༤ ནས་མཉམ་ཞུགས་གནང་ཡོད་ཀྱང་། འདས་པའི་འགྲན་བསྡུར་སྤྱི་དང་། ལྷག་པར་དུ་ཟུར་དཔང་རྣམ་པའི་དྲི་བ་དྲིས་ལན་སོགས་གནང་པའི་བརྒྱུད་སང་ཉིན་མཐའ་མའི་འགྲན་བསྡུར་སྐབས་ལ་བོད་མི་དྲུག་འདེམས་ཐོན་བྱུང་ཡོད་པ་རེད། དེ་དག་རྣམས་ནི་རྒྱལ་ས་ལྡི་ལིར་ཡོད་པའི་རིང་སྒྲོལ་མ་ལགས་ཀྱི་མཐའ་རི་ཚེམ་བཟོ་ཁང་དང་། རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་ནང་ཡོད་པའི་ཉི་མ་རྒྱལ་མཚན་ལགས་ཀྱི་ Dairy Farm ཞེས་ཕྱུགས་གསོ་ཁང་གི་ཚོང་ལས། དེ་བཞིན་བཞུགས་སྒར་དང་ལྡི་ལི་གཉིས་སུ་ཡོད་པའི་བློ་བཟང་བཀྲ་ཤིས་ལགས་ཀྱི་ TAC Enterprise ཞེས་ཁྲལ་འབབ་དང་འབྲེལ་བའི་ཚོང་ལས་བཅས་དེ་སྔ་ནས་ཆེད་འཛུགས་ཟིན་པའི་ཚོང་ལས་གསུམ་དང་། རིང་མིན་གསར་དུ་འགོ་འཛུགས་གནང་འཆར་ཡོད་པའི་འགྱུར་མེད་བསྟན་འཛིན་ལགས་ཀྱི་ I Lab Coaching Center ཞེས་ཤེས་ཡོན་སྦྱོང་བརྡར་གཏི་གནས་ཁང་དང་། རྟ་མགྲིན་སྐྱབས་ལགས་ཀྱི་སྒྲ་བཅོམ་པ་ Tech LLP ཞེས་དེང་དུས་ཀྱི་འཕྲུལ་ཆས་དང་མཉན་ཆས་རིགས་བཟོ་བསྐྲུན་ཁང་། དེ་བཞིན་ཀུམ་རའོ་བོད་མིའི་གཞིས་ཆགས་ནང་ཆེད་འཛུགས་གནང་འཆར་ཡོད་པའི་ངག་དབང་བློ་གྲོས་ལགས་ཀྱི་ Drawu Mashroom ཞེས་ཤ་མོ་འདེབས་ལས་ཀྱི་ཚོང་ལས་བཅས་ཆགས་ཀྱི་ཡོད་པ་རེད། སྐབས་དེར་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བཀའ་བློན་ཀརྨ་ཡེ་ཤེས་མཆོག་གིས་སྤྱི་ཚོགས་ཚགས་ཚུད་ཡོང་བར་ཤེས་ཡོན་དང་རིང་གཞུང་ཙམ་མ་ཡིན་པར། དཔལ་འབྱོར་གྱི་གནས་བབས་དེ་མཚུངས་ཀྱི་གལ་ཆེན་པོ་ཆགས་ཀྱི་ཡོད་པ་སོགས་འགྲེལ་བརྗོད་དང་སྦྲགས། བོད་པའི་ཚོང་པ་རྣམས་ནས་ཚོང་ལས་འགོ་འཛུགས་ཐུབ་པ་ཙམ་མིན་པར་སེམས་ཤུགས་དང་ལྷག་བསམ། ལྷག་པར་དུ་རང་ཉིད་ཀྱི་དུས་ཚོད་བསྟུད་མར་བཏང་ནས་ཚོང་གི་ལས་དོན་གང་ཞིག་ཡིན་རུང་མུ་མཐུད་ནས་གནང་རྒྱུ་གལ་ཆེན་པོ་ཡིན་པ་གསུངས་སོང་། དེ་བཞིན་ཁོང་གིས་བོད་པའི་ཚོང་པ་རྣམས་ནས་ཚོང་ལས་གང་ཞིག་གཉེར་ཡང་ཁྲིམས་ལུགས་དང་མཐུན་པ། འཁོར་ཡུག་ལ་གནོན་འཚེ་མེད་པ། ལྷག་པར་དུ་ཚོང་ལས་བརྒྱུད་མ་འོངས་པར་རང་ཉིད་ཀྱི་སྤྱི་ཚོགས་ནང་ཕན་ཐོགས་བསམ་པའི་ཀུན་སློང་ཁྱེར་རྒྱུ་གལ་ཆེན་པོ་ཡིན་པར་ལམ་སྟོན་གནང་པ་མ་ཟད། ཐེངས་འདིའི་ཚོགས་བཅར་བའི་གྲངས་འབོར་ཁྲོད་བོད་པའི་བེུད་ཉུང་ཤས་ལས་མཉམ་ཞུགས་གནང་མེད་སྟབས། མ་འོངས་པར་སྒྲིག་འཛུགས་ཀྱི་གོ་སྐབས་བསྐྲུན་པའི་ལས་གཞིའི་ཐོག་བེུད་རྣམས་ནས་གཅིག་མཚུངས་ཀྱིས་མཉམ་ཞུགས་གནང་རྒྱུ་གལ་ཆེན་པོ་ཆགས་ཀྱི་འདུག་ཅེས་གསུངས་ཡོད་པ་རེད། རྩ་བའི་བཙན་བྱོལ་བོད་མིའི་ཡར་ཐོན་ཚོང་པའི་འདུ་འཛོམས་དེ་ནི་བོད་མིའི་སྒྲིག་འཛུགས་ནས་བོད་པའི་སྤྱི་ཚོགས་ཁྲོད་ཚོང་ལས་ཀྱི་ལས་རིགས་གཉེར་བཞིན་པ་དང་། ལྷག་པར་དུ་ཚོང་ལས་གསར་པ་འགོ་འཛུགས་གནང་མཁན་ཚོར་མ་དངུལ་གྱི་རྒྱབ་སྐྱོར་གནང་རྒྱུ་དང་། འདུ་འཛོམས་སྐབས་ཕེབས་པའི་བོད་པའི་ཚོང་པ་རྣམས་ལ་ཉིན་གྲངས་གྲངས་གཉིས་རིང་ལ་བཙན་བྱོལ་བོད་མིའི་དཔལ་འབྱོར་དང་ཚོང་ལས་ཀྱི་གནས་བབས། དེ་བཞིན་ས་གནས་ཡུལ་མིའི་ཁྲལ་འབབ་དང་ཚོང་འབྲེལ་གནང་སྟངས་གཙོས་ཚོང་ལས་དང་འབྲེལ་བའི་གྲོས་བསྡུར་སྦྱངས་བཤད་དང་གནད་ཡོད་མི་སྣ་ཁག་ནས་གསུང་བཤད་སོགས་གནང་གི་ཡོད་པ་རེད། སང་ཉིན་མཐའ་མའི་འགྲན་སྡུར་ཐོག་སྔར་ལོ་དང་མི་འདྲ་བར་ཐེངས་འདིའི་འགྲེན་བསྡུར་ནང་མཉམ་ཞུགས་གནང་མཁན་ཡོངས་ལ་ལེགས་གསོའི་མ་དངུལ་བྱ་དགའ་ཞིག་ཀྱང་གནང་གི་འདུག                    

ཀུམ་རའོ་དང་སྤུ་རུ་ཝ་བ་ལ་ས་གནས་གཉིས་སུ་ལོ་ངོ་ ༡༨ རིང་སློབ་གྲྭའི་དགེ་རྒན་གྱི་ཞབས་ཞུ་ཧུར་ཐག་གནང་ནས་འདས་གྲོངས་སུ་གྱུར་བའི་ཚེ་དབང་རབ་བརྟན་ལགས་དམ་པ་ཁོང་གིས་གསོག་དངུལ་ཡོངས་རྫོགས་བོད་ཕྲུག་གི་ཤེས་ཡོན་ཆེད་ཞལ་འདེབས་ཕུལ་འདུག ཚེ་དབང་རབ་བརྟན་ལགས་དམ་པ་ཁོང་ནི་ཕྱི་ལོ་ ༡༩༦༤ ལོར་བོད་གཞིས་ཀ་རྩེར་འཁྲུངས་ཤིང་། དེ་ནས་རྒྱ་གར་ནང་བཙན་བྱོལ་དུ་ཕེབས་རྗེས་ ༡༩༩༧ ནས་ ༢༠༠༨ བར་ཧི་མཱ་ཅལ་མངའ་ཁུལ་གྱི་སིར་མོར་རྫོང་ཁོངས་སུ་ཡོད་པའི་ཀུམ་རའོ་སློབ་གྲྭ་དང་དེ་ནས་ ༢༠༠༩ ནས་ ༢༠༡༥ བར་སམ་བྷོ་ཊ་ཁྱབ་ཁོངས་སྤུ་རུ་ཝ་ལ་ཉིན་སློབ་ཏུ་འཛིན་རིམ་དང་པོ་ནས་ལྔ་པ་བར་གྱི་རྩིས་རིག་དགེ་རྒན་གནང་ནས་ཁྱོན་ལོ་ངོ་ ༡༨ རིང་སློབ་གྲྭའི་དགེ་རྒན་གྱི་ཞབས་ཞུ་གནང་སྟེ་མཐར་ཕྱི་ལོ་ ༢༠༡༥ ལོར་སྐུ་གྲོངས་ཡོད་པ་རེད་འདུག དམ་པ་ཁོང་ནས་རང་ཉིད་ཀྱི་གསོག་དངུལ་བརྒྱ་ཆ་ ༡༠༠ ཡི་འབབ་ཧིན་སྒོར་སུམ་འབུམ་བཞི་ཁྲི་ལྔ་སྟོང་བཞི་བརྒྱ་བཅུ་གཉིས་སོ་སོའི་དམིགས་ཡུལ་ལྟར་བོད་མིའི་སྒྲིག་འཛུགས་ཤེས་རིག་ལས་ཁུངས་བརྒྱུད་བོད་ཕྲུག་ཉམ་ཐག་རྣམས་ཀྱི་ཤེས་ཡོན་ཆེད་ཞལ་འདེབས་འབུལ་རྒྱུའི་དཔང་ཡིག་འཇོག་གནང་པ་ལྟར། སམ་བྷོ་ཊ་སྤྱི་ཁྱབ་ཡིག་ཚང་ནས་ཟླ་བ་འདིའི་ཚེས་ ༢༣ ཉིན་དངུལ་འབོར་དེ་དག་ཤེས་རིག་ལས་ཁུངས་སུ་གནང་འབྱོར་བྱུང་འདུག བོད་མིའི་སྒྲིག་འཛུགས་ཤེས་རིགས་ལས་ཁུངས་ཀྱི་སློབ་ཡོན་ཚན་པའི་འགན་འཛིན་ངག་དབང་ཡོན་ཏན་ལགས་ཀྱིས་དམ་པ་ཁོང་གིས་སྐུ་འཚོ་བཞུགས་རིང་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་ཆེད་སེམས་འཁུར་ཆེ་བཞེས་གནང་པར་ཡི་རངས་བསྔགས་བརྗོད་ཞུས་པ་དང་། ལྷག་དོན་དམ་པ་ཁོང་གིས་བོད་སྤྱིའི་སླད་དུ་རང་ཉིད་ཀྱི་གསོག་དངུལ་ཡོངས་རྫོགས་བོད་ཕྲུག་གི་ཤེས་ཡོན་ཆེད་ཞལ་འདེབས་གནང་པ་དེ་ནི་རླབས་ཆེན་གྱི་བྱ་གཞག་ཞིག་ལ་ངོས་འཛིན་ཞུས་ཐོག་ཁོང་གི་གསོག་དངུལ་དེ་དག་དམ་པ་ཁོང་གིས་དམིགས་ཡུལ་གཞིར་བཟུང་བོད་ཕྲུག་ཉམ་ཐག་ཚོའི་ཁྲོད་དུ་བགོས་འགྲེམས་གནང་རྒྱུ་ཡིན་པ་གསུངས་སོང་། རྩ་བའི་ཚེ་འདས་རྒན་ཚེ་དབང་རབ་བརྟན་ལགས་ཕྱི་ལོ་ ༢༠༠༩ ལོར་སྤུ་རུ་ཝ་ལ་ཉིན་སློབ་ཏུ་གནས་སྤོས་ཀྱིས་དེར་ ༢༠༡༥ བར་རྩིས་རིག་དགེ་རྒན་གྱི་ཕྱག་ལས་གནང་རིང་རྒྱུན་དུ་རང་གི་ལས་སྣེ་ལ་བརྩི་ཆེ་དང་སློབ་ཕྲུག་རྣམས་ལ་ཤ་ཚ་ཆེན་པོ་གནང་མཁན་ཡིན་པ་མ་ཟད། ཁྱད་པར་དུ་ཁོང་ནས་དགེ་ལས་ཚོར་ངེས་མེད་ཀྱི་ཐོབ་གསེང་ཡོད་ཀྱང་ད་བར་སློབ་མའི་ཤེས་ཡོན་ཆེད་དགོངས་ཞུ་རྩ་བ་ནས་གནང་མྱོང་མེད་པ་རེད་འདུག དམ་པ་ཁོང་གི་གསོག་དངུལ་རྣམས་བོད་ཕྲུག་ཉམ་ཐག་རྣམས་ཀྱི་ཤེས་ཡོན་ཆེད་ཞལ་འདེབས་གནང་པའི་ཐད་ལ་ད་ཆ་སྤུ་རུ་ཝ་ལ་སློབ་གྲྭའི་དགེ་ཆེ་གནང་བཞིན་པ་བསྟན་འཛིན་ཆོས་སྒྲོན་ལགས་སུ་བཀའ་འདྲི་ཞུས་པར་ཁོང་གིས་དམ་པ་ཁོང་ལ་ཨ་མའི་སྤུན་གཅིག་འདུག་པ་དེའི་མཚན་ཐོག་ལ་གསོག་དངུལ་མ་བཞག་པར་སློབ་ཕྲུག་ཉམ་ཐག་ཚོའི་ཆེད་གནང་དགོས་པའི་གན་རྒྱ་བཞག་ཡོད་པ་དེ་ནི་ཡི་རངས་ཞུ་དགོས་པ་ཞིག་དང་། ཁོང་ལྟ་བུར་ང་ཚོ་དགེ་ལས་ཚང་མས་དམིགས་དཔེ་ལྟ་དགོས་པ་ཞིག་ཏུ་གཟིགས་ཀྱི་ཡོད་སྐོར་གསུངས་སོང་། གཞི་རྩའི་བོད་མིའི་སྒྲིག་འཛུགས་ཤེས་རིག་ལས་ཁུངས་ངོས་ནས་ཕྱི་རྒྱལ་གྱི་རོགས་ཚོགས་ཁག་གི་བརྒྱུད་ལོ་ལྟར་བོད་པའི་སློབ་ཕྲུག་ཚོར་ཤེས་ཡོན་གྱི་སློབ་ཡོན་མང་དག་ཞིག་གནང་གི་ཡོད་པ་དང་། འདི་ལོ་མཚོན་ན་ཤེས་རིག་ལས་ཁུངས་ནས་མཐོ་སློབ་ཏུ་བསྐྱོད་མཁན་བོད་ཕྲུག་སློབ་མ་ ༡༡༠༠ མན་ཙམ་ལ་ཤེས་ཡོན་གྱི་སློབ་ཡོན་གནང་མུས་ཡིན་པ་དང་། དེའི་ཁོངས་སུ་འདས་པའི་ལོ་ཁ་ཤས་ནང་ཨ་རི་དང་ཁེ་ན་ཊ། དེ་བཞིན་ཡོ་རོབ་རྒྱལ་ཁབ་ཁག་གི་ནང་གི་བོད་རིགས་སྤྱི་མཐུན་ཚོགས་པ་དང་བོད་ཕྲུག་ལས་འཆར་ཚོགས་པ་སོགས་གཙོས་པའི་བོད་རིགས་ཁྱིམ་ཚང་སོ་སོ་ནས་མཐོ་སློབ་དང་སློབ་གྲྭ་ཁག་ལ་སྐྱོད་བཞིན་པའི་བོད་ཕྲུག་སློབ་མ་ ༦༩ ཙམ་གྱི་ཤེས་ཡོན་གྱི་སློབ་ཡོན་ཆེད་ཞལ་འདེབས་གནང་མཁན་བྱུང་ཡོད་པ་རེད།

སུད་སི་ཕྱི་མི་ཞིབ་དཔྱོད་དོ་དམ་ལས་ཁུངས་ནས་བོད་མི་སྐྱབས་བཅོལ་ཞུ་མཁན་ ༣༠༠ ཡས་མས་ཤིག་ལ་སྐྱབས་བཅོལ་གྱི་ཐོབ་ཐང་སྤྲོད་རྒྱུའི་ཆ་རྐྱེན་ཚང་མེད་པས་རང་གནས་སུ་ཕྱིར་ལོག་དགོས་ཞེས་བརྡ་ལན་སྤྲད་འདུག ཟླ་ ༨ ཚེས་ ༢༧ ཉིན་སུད་སིའི་གྲོང་ཁྱེར་ Zurich ནང་གི་བོད་རིགས་ཚོགས་ཁང་དུ་སུད་སི་བོད་རིགས་མི་མང་གི་འཐུས་མི་དང་གཞན་ཕན་ཚོགས་པ། དེ་བཞིན་ས་གནས་སྐུ་ཚབ་དོན་གཅོད་ཀྱི་མི་སྣ་སོགས་འདུ་འཛོམས་ཀྱིས་བསྐོང་ཚོགས་གནང་པའི་བོད་རིགས་ཚོགས་པའི་ཟླ་རེའི་ཚོགས་འདུ་ཞིག་གི་ཐོག་སུད་སིའི་ཕྱི་མི་ཞིབ་དཔྱོད་ལས་ཁུངས་ཀྱི་ལས་བྱེད་གསུམ་ཆེད་ཕེབས་གནང་སྟེ། དེང་སྐབས་སུད་སིར་སྐྱབས་བཅོལ་ཞུ་མཁན་ལོ་རེ་བཞིན་ཇེ་མང་དུ་འགྲོ་བཞིན་པའི་ཁྲོད། བོད་མི་ཡང་མང་དུ་འགྲོ་གི་ཡོད་པ་དང་བོད་མི་དེ་དག་གི་དཀའ་ངལ་སེལ་ཐབས་སུ་སྐྱབས་བཅོལ་གྱི་གནས་བབས་སྤྲོད་རྒྱུ་སོགས་ཀྱི་མཐུན་རྐྱེན་གང་ཡོང་བསྐྲུན་མུས་ཡིན་ཀྱང་། ཉེ་ལམ་སྐྱབས་བཅོལ་གྱི་གནས་བབས་མཁོ་སྤྲོད་དགོས་པའི་སྙན་ཞུ་འབུལ་མཁན་གྱི་བོད་རིགས་ཁག་ཅིག་ལ་སུད་སི་གཞུང་ནས་བོད་ནས་ཡོང་བ་ཡིན་མིན་འདྲི་རྩད་ཀྱི་ལམ་ནས་ཞིབ་དཔྱད་གནང་པ་ལས་མི་གྲངས་ ༣༠༠ ཡས་མས་ཤིག་ལ་བདེན་དཔང་གི་ཡིག་ཆ་མེད་པ་ཤེས་རྟོགས་བྱུང་རྗེས། དེ་དག་ཚང་མར་ཕྱིར་ལོག་དགོས་པའི་བརྡ་ལན་སྤྲད་འདུག་པ་མ་ཟད། གལ་ཏེ་རང་འགུལ་གྱིས་ཕྱིར་ལོག་བྱ་ཚེ་ལམ་གྲོན་དང་། དེ་བཞིན་སུད་སི་སྒོར་མོ་ལྔ་སྟོང་རེ་གནང་རྒྱུའི་ཁས་ལེན་གནང་འདུག འདི་ག་རླུང་འཕྲིན་ཁང་ནས་སུད་སི་བོད་མི་སྐྱབས་བཅོལ་བའི་གནས་བབས་དང་ཁུངས་ལྡན་གྱི་དཔང་ཡིག་མེད་པའི་བོད་མི་དེ་དག་ཕྱིར་ལོག་དགོས་པའི་གནས་ཚུལ་བྱུང་དོན་སྐོར་སུད་སི་བོད་ཀྱི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་སུ་བཀའ་འདྲི་ཞུས་པ་ཡིན།

ཨིན་དྷུ་ནེ་ཤི་ཡ། ཀོ་རི་ཡ། མཱ་ལེ་ཤེ་ཡ། སིངྒ་པུར། ཐའེ་ལན་ཌི། ཝི་ཏི་ནམ་སོགས་ལྷོ་ཤར་ཨེ་ཤ་ཡའི་དད་ལྡན་པ་ཁག་ཅིག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་པ་བཞིན། དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དྷརྨ་སཱ་ལཱའི་ཐེག་ཆེན་ཆོས་གླིང་གཙུག་ལག་ཁང་དུ་གཞུང་སྐུལ་བ་པོ་གཙོས་པའི་ཕྱི་ནང་གི་མང་ཚོགས་སྟོང་ཕྲག་ཁ་ཤས་ལ་སློབ་དཔོན་སངས་རྒྱས་བསྐྱངས་ཀྱིས་མཛད་པའི་དབུ་མ་རྩ་བ་ཤེས་རབ་ཀྱི་འགྲེལ་པ་བུདྡྷ་པཱ་ལི་ཏའི་བཀའ་ཆོས་དབུ་འཛུགས་བསྐྱངས་སོང་། ཐེངས་འདིའི་ཆོས་འབྲེལ་ཐོག་ལ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༤ རྗེ་བཙུན་བློ་བཟང་བསྟན་འཛིན་རིན་པོ་ཆེ་མཆོག་དང་། དེ་བཞིན་༸གོང་ས་མཆོག་གིས་བུདྡྷ་པཱ་ལི་ཏའི་ལུང་ཞུ་ཡུལ་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་ཀྱང་ཕེབས་ཡོད་སྟབས། ༸གོང་ས་མཆོག་གིས་དེ་རིང་ཆོས་འབྲེལ་བྱ་རྒྱུའི་གོ་སྐབས་འདི་ལྟར་བྱུང་བ་སྐལ་བ་བཟང་པོ་ཞིག་ཏུ་བཀའ་གནང་པ་དང་སྦྲགས། འགྲེལ་པ་འདི་ནི་བསྟན་འགྱུར་ནང་གི་གཞུང་གལ་ཆེ་ཞིག་ཆགས་ཀྱི་ཡོད་པ་གསུངས་ཡོད། གཞུང་དངོས་གཞི་དབུ་འཛུགས་མ་མཛད་གོང་དུ་རྣམ་ཀུན་ལྟར་༸གོང་ས་མཆོག་གིས་ཐོག་མར་ཆོས་ཞུ་བ་ཀུན་ལ་སངས་རྒྱས་བཅོམ་ལྡན་འདས་ཀྱི་ཆོས་བརྒྱུད་འདི་ཆོས་ལུགས་གཞན་དང་མི་འདྲ་བ་གཙོ་བོ་རྒྱུ་མཚན་བརྟག་དཔྱད་དམ་རིག་པ་གཙོ་འདོན་གནང་གི་ཡོད་པ་ནང་ཆོས་ངོ་སྤྲོད་སྤྱི་བཤད་བསྩལ་སོང་བ་དང་། ༸གོང་ས་མཆོག་གིས་དེང་གི་འཛམ་གླིང་འདིའི་ནང་ཕྱི་དངོས་པོ་ཡར་རྒྱས་ཇི་ཙམ་སོང་ཡང་མི་གསོད་ཁྲག་སྦྱོར་དང་དབུལ་ཕྱུག་གི་ཁྱད་པར་སོགས་དཀའ་ངལ་མང་དག་ཅིག་འཕྲད་དང་འཕྲད་མུས་ཡིན་པ་དེ་ནི་བྱམས་བརྩེ་མ་འདང་བའི་རྐྱེན་གྱིས་རེད་ཅེས་བཀའ་སྩལ་སོང་། འཛམ་གླིང་འདིའི་སྟེང་གི་ཆོས་ལུགས་ཀུན་གྱིས་བསླབ་བྱ་གཙོ་བོ་རང་གཞན་ཀུན་གྱི་བདེ་སྐྱིད་ཀྱི་རྩ་བ་བྱམས་བརྩེའི་བློ་ལ་ཡོན་ཏན་དུ་བལྟ་ནས་དང་འདོད་གནང་གལ་ཡིན་པ་ལམ་སྟོན་མཛད་སོང་། རྩ་བའི་སློབ་དཔོན་སངས་རྒྱས་བསྐྱངས་ཀྱིས་མཛད་པའི་དབུ་མ་རྩ་བ་ཤེས་རབ་ཀྱི་འགྲེལ་པ་བུདྡྷ་པཱ་ལི་ཏའི་གཞུང་ལ་རབ་བྱེད་ ༢༧ ཡོད་པ་ལྟར་དེ་རིང་སྔ་དྲོའི་ཆོས་ཐུན་གྱི་ཐོག་མར་ནང་ཆོས་ངོ་སྤྲོད་དང་དེ་གྲུབ་བསྟུན་མགོན་པོ་མཆོག་གིས་གཞུང་དངོས་ལས་རྐྱེན་བརྟག་པའི་འགྲེལ་པ་སྟེ་རབ་བྱེད་དང་པོ་དབུ་འཛུགས་བཀྲིན་བསྐྱངས་གནང་ཡོད་པ་རེད། ཁྱད་པར་དུ་མགོན་པོ་༸གང་ཉིད་མཆོག་གིས་ཆོས་འབྲེལ་དུ་ཕེབས་མཁན་རྣམས་ལ་འདིར་ཆོས་ཞུས་ནས་བྱིན་རླབས་ཐོབ་ཆེད་ཙམ་མིན་པར་སྔར་མ་ཤེས་པ་ཤེས་སོང་བསམ་ནས་ཕར་ལོག་ཐུབ་ན་ཆོས་ཞུ་བའི་ཞུ་གོ་ཆོད་པ་རེད་ཅེས་བཀའ་གནང་ཡོད་པ་རེད། འདི་ལོའི་ལྷོ་ཤར་ཨེ་ཤ་ཡའི་རྒྱལ་ཁབ་ཁག་ཅིག་ནས་ཕེབས་པའི་ཆོས་ཞུ་བའི་ཞལ་གྲངས་ ༡༥༠༠ ཡས་མས་ཆགས་ཀྱི་འདུག་པ་འདི་ནི་སྔ་ལོ་ལས་ལྡབས་ཀྱི་མང་བ་ཆགས་ཀྱི་འདུག་པ་མ་ཟད། དེའི་ཁྲོད་ཀོ་རི་ཡའི་ཆོས་ཞུ་བ་ ༤༠༠ ལྷག་བཅར་ཡོད་པ་རྣམས་བཀའ་ཆོས་ལ་དོན་གཉེར་ཆེན་པོ་ཡོད་པ་རེད་འདུག ཉིན་གྲངས་བཞིའི་ཆོས་འབྲེལ་དེ་སྔ་དྲོ་ཚོུད་ ༨༣༠ ནས་ ༡༡:༣༠ བར་ཡིན་པ་དང་། ཉིན་རྒྱབ་ཏུ་མཁན་པོ་དང་དགེ་བཤེས་རྣམ་པས་ཉིན་སོ་སོའི་ཆོས་ཐུན་བསྐྱར་བཤད་དང་དྲི་བ་དྲིས་ལན་བཅས་གནང་ཡོད་པ་རེད། ལྷག་དོན་དེ་རིང་སྔ་དྲོ་ཆོས་འབྲེལ་ཉིན་དང་པོའི་ཐོག་གསར་དུ་བསྐོ་གཞག་མཛད་པའི་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༤ རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་མནྡྲལ་འདེགས་འབུལ་དང་སྦྲགས་གསར་མཇལ་ཞུས་གནང་སོང་བ་དང་། ༸གོང་ས་མཆོག་གིས་གསར་མཇལ་དེ་ལས་འཕྲོས་ནས་དགའ་ལྡན་ཁྲི་པར་ཕེབས་སྟངས་ཀྱི་ལམ་སྲོལ་དེ་ཡག་པོ་ཞིག་ཡོད་པ་བཀའ་བསྩལ་སོང་།

དེ་རིང་ཟླ་ ༨ ཚེས་ ༢༩ ཉིན་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནང་རྟེན་གཞི་བྱས་པའི་བོད་ཁྱིམ་ གཞོན་ནུའི་སྡོད་ཁང་གི་ཚོགས་ཁང་དུ་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༤༨ དབུ་འཛུགས་གནང་སོང་། ཚོགས་ཆེན་དེའི་ཐོག་ས་གནས་ཁག་ ༣༥ ཙམ་ནས་ཚོགས་བཅར་བ་མི་གྲངས་ ༡༠༠ ཙམ་ཞིག་ནས་མཉམ་ཞུགས་གནང་ཡོད་པ་དང་། ལྷག་དོན་མཛད་སྒོའི་ཐོག་རྒྱ་གར་རྒྱལ་ཡོངས་ཁྲིམས་ཀྱི་སློབ་གྲྭའི་ཉེ་བའི་རིགས་བདག་མཆོག་དང་ས་གནས་བི་ཇི་སྦི་ཆབ་སྲིད་ཚོགས་པའི་སྤྱི་ཁྱབ་དྲུང་ཆེ། རྒྱ་གར་དམག་སྤྱི་ཟུར་པ་བཅས་གནད་ཡོད་སྐུ་མགྲོན་གསུམ་གྱིས་བོད་དོན་ལ་རྒྱབ་སྐྱོར་དང་གདུང་སེམས་མཉམ་བསྐྱེད་ཀྱིས་གསུང་བཤད་གནང་ཡོད་པ་རེད། དེ་རིང་གི་ཚོགས་ཆེན་དབུ་འབྱེད་མཛད་སྒོར་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་ཚོགས་གཙོ་མཆོག་ནས་འགན་འཛིན་ལྷན་ཚོགས་ཐེངས་ ༤༨ པའི་ཚོགས་འདུའི་ངོ་སྤྲོད་གནང་པ་དང་། བོད་ཀྱི་གཞོན་ནུ་ལྷན་ཚོགས་སྤྱིི་ཁྱབ་རྒྱུན་ལས་ཁང་གི་ངོས་ནས་འདི་ལོར་རྒྱ་གར་རྒྱལ་ཡོངས་བོད་པའི་སློབ་གྲྭ་ཁག་གི་འཛིན་རིམ་ ༡༢ ཀྱི་བོད་ཕྲུག་ཁག་ཅིག་ལ་བོད་ཡིག་རྒྱུགས་ལེགས་སོན་བྱུང་བར་ཆེ་བསྟོད་ཀྱི་གཟེངས་རྟགས་དང་ཕྱག་འཁྱེར་གནང་ཡོད་པ་རེད། ཕྱི་ལོ་ ༢༠༠༩ ལོ་ནས་བཟུང་ད་བར་བོད་ཕྱི་ནང་གཉིས་ནས་བོད་རྒྱལ་ཁབ་དང་མི་རིགས་ཀྱི་སླད་སྐུ་ལུས་མཆོད་འབུལ་གནང་མཁན་རྒྱལ་གཅེས་དཔའ་བོ་དཔའ་མོ་ཁྱོན་ ༡༦༠ མིན་ཙམ་བྱུང་བ་རྣམས་ཀྱི་དགོས་འདུན་དང་གནས་སྟངས་དང་ལོ་རྒྱུས་བཅས་འཛམ་གླིང་ཡོངས་ལ་གསལ་རྟོགས་ཐུབ་ཕྱིར་འབར་བཞིན་པའི་བོད་ཅེས་པའི་དྲ་རྒྱ་གསར་པ་ཞིག་ཀྱང་དབུ་འབྱེད་གནང་ཡོད་པ་རེད། དུས་ཡུན་ཉིན་གྲངས་ལྔ་རིང་ཚོགས་རྒྱུའི་ལྷན་ཚོགས་འདིའི་སྐབས་གྲོས་གཞི་མི་འདྲ་བ་ཁག་ ༩ ཐོག་གྲོས་བསྡུར་གནང་རྒྱུ་རེད་འདུག་པ་དེ་ལྟར་ཡང་། དབུས་བོད་ཀྱི་གཞོན་ནུ་ལྷན་ཚོགས་དང་ས་གནས་ཁག་གི་ལོ་འཁོར་མོ་གཅིག་གི་ལས་བསྡོམས་དང་རྩིས་ཁྲ་ཁག་སྙན་སྒྲོན་གནང་རྒྱུ་དང་འགན་འཛིན་ལྷན་ཚོགས་ཐེངས་ ༤༧ པའི་གྲོས་ཆོད་ལག་བསྟར་ཇི་ལྟར་བྱུང་ཡོད་མེད། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཕྱྭ་དང་འབྲེལ་བའི་སྐོར་གོ་བསྡུར་གནང་རྒྱུ། བོད་ཀྱི་གཞོན་ནུ་ལྷན་གྱི་ཆབ་སྲིད་ལས་འགུལ་སྤེལ་ཕྱོགས་སྐོར་གྲོས་གཞི་དོན་ཚན་ཁག་གསུམ་དང་། མང་གཙོ་གོ་རྟོགས་སྤེལ་ཕྱོགས། སྤྱི་ཚོགས་ཞབས་ཞུའི་ལས་དོན།  གཞོན་ནུའི་སྒྲིག་འཛུགས་སྲ་བརྟན་ཡོང་ཐབས་་དེ་མིན་སྤྱི་སྨན་དགོངས་འཆར་བཅས་ཀྱི་གྲོས་གཞི་ཁག་དགུའི་ཐོག་གྲོས་བསྡུར་གནང་གི་ཡོད་པ་རེད། དེ་དང་ཕྱོགས་མཚུངས་ཁ་སང་ཕྱི་ཚེས་ ༢༨ ཉིན་གཞོན་ནུའི་ཡན་ལག་ས་ཁག་ནས་ཕེབས་པའི་ཚོགས་བཅར་པ་ཚོར་ཉིན་གཅིག་གི་ཟབ་སྦྱོང་ཞིག་གནང་ཡོད་པ་དང་། ཟབ་སྦྱོང་དེའི་བརྗོད་གཞིའི་ནང་གཞོན་ནུའི་སྒྲིག་འཛུགས་ངོ་སྤྲོད་དང་། ལས་དོན་བྱེད་ཕྱོགས། རྒྱ་གཞུང་གི་ངོས་ནས་བོད་དོན་ཐོག་དམིགགས་བསལ་སྲིད་བྱུས་འཛིན་སྟངས་གང་འདྲ་ཡོད་མེད། བོད་མིའི་སྤྱི་ཚོགས་ཀྱི་འགོ་ཁྲིད་ཚན་ལྡན་ཇི་ལྟར་ཡོང་མིན་བཅས་ཀྱི་བརྗོད་གཞི་ཐོག་དམིགས་བསལ་གདན་ཞུ་ཆེད་ལས་མཁས་དབང་གིས་ཟབ་ཁྲིད་གནང་ཡོད་པ་མ་ཟད་འཚེ་མེད་ཞི་བའི་ནུས་པ་དང་ཐབས་བྱུས་སྐོར་དབུས་བོད་ཀྱི་གཞོན་ནུའི་ཚོགས་གཙོས་ཟབ་ཁྲིད་གནང་ཡོད་པ་རེད།

ཁ་སང་བོད་དང་ཐེ་ཝན། དེ་བཞིན་ཧོང་ཀོང་བཅས་ཀྱི་གཞོན་སྐྱེས་ལས་འགུལ་སྣེ་ཁྲིད་པ་བཞིས་དྲ་རྒྱའི་བརྒྱུད་ཧོང་ཀོང་གི་འཐབ་རྩོད་དང་འབྲེལ་ཐད་གཏོང་གི་བགྲོ་གླེང་ཞིག་གནང་ཡོད་པ་རེད། དེའང་ཉེ་ལམ་ཧོང་ཀོང་གི་ཆེས་མཐོའི་ཁྲིམས་ཁང་ནས་ཕྱི་ལོ་ ༢༠༡༤ ལོར་ཧོང་ཀོང་ནང་ཁྲིམས་འགལ་ཐོག་མི་མང་འདུ་འཛོམས་ཀྱིས་ཆར་གདུགས་གསར་བརྗེ་ལས་འགུལ་སྤེལ་ཏེ་སྲིད་གཞུང་ལ་ངོ་རྒོལ་བྱས་པའི་ཉེས་མིང་འོག་ལས་འགུལ་སྣེ་ཁྲིད་པ་རང་ལོ་ ༢༠ ཡིན་པ་Joshua Wong ལགས་དང་རང་ལོ་༢༦ ཡིན་པ་ Alex Chow ལགས། དེ་བཞིན་རང་ལོ་ ༢༤ ཡིན་པ་ Nathan Law ལགས་བཅས་གསུམ་ལ་ཟླ་བ་དྲུག་ནས་བརྒྱད་བར་གྱི་བཙོན་འཇུག་ཁྲིམས་ཐག་བཅད་ཡོད་པ་དང་། སྐབས་དེར་མང་གཙོར་རྒྱབ་སྐྱོར་བྱེད་མཁན་མི་མང་པོ་ཞིག་གིས་ཧོང་ཀོང་ཁྲིམས་ཁང་གི་ཐག་གཅོད་ལ་སྐྱོན་བརྗོད་བྱས་ཡོད་པ་མ་ཟད། ཨ་རིའི་གྲོས་ཚོགས་ཀྱི་ TOM Lantos འགྲོ་བ་མིའི་ཐོབ་ཐང་ཚོགས་ཆུང་དང་CECC ཞེས་ཨ་རི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་། དེ་བཞིན་རྒྱལ་སྤྱིའི་ཉེས་ཡངས་ཚོགས་པ་སོགས་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་ཁག་གིས་ཀྱང་སྐྱོན་བརྗོད་ཤུགས་ཆེ་བྱས་པར་ལྟོས་མེད་ཧོང་ཀོང་སྲིད་གཞུང་གིས་ཉེས་ཅན་འཛིན་བཟུང་བྱས་པར་ཆབ་སྲིད་ཀྱི་དམིགས་ཡུལ་གང་ཡང་མེད་ཅེས་ལན་འདེབས་བྱས་ཡོད་པ་རེད། བོད་རང་བཙན་སློབ་ཕྲུག་ཚོགས་པས་ཁ་སང་ཧོང་ཀོང་གི་འཐབ་རྩོད་དང་འབྲེལ་རྒྱ་གར་གྱི་ཕྱི་དྲོ་ཚོུད་ ༨ ཡོས་ཙམ་ལ་ཐད་གཏོང་གི་བགྲོ་གླེང་ཞིག་གནང་འདུག་པ་དང་། སྐབས་དེར་གཏམ་བཤད་གནང་མཁན་ཁོངས་སུ་བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་ངེས་སྟོན་པ་བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་དང་སྤྱི་ཁྱབ་ངེས་སྟོན་པ་ཟུར་པ་དང་བོད་དོན་ལས་འགུལ་བསྟི་གནས་ཁང་གི་ལས་འཆར་ངེས་སྟོན་པ་བསྟན་འཛིན་རྡོ་རྗེ་ལགས། ཁྱད་པར་དུ་ཧོང་ཀོང་གི་གཞོན་སྐྱེས་ལས་འགུལ་སྣེ་ཁྲིད་པ་ Johnson Yeung ལགས་དང་ཐེ་ཝན་གཞོན་སྐྱེས་ལས་འགུལ་སྣེ་ཁྲིད་པ་ Lin Fei Fan ལགས་བཅས་བཞི་གདན་ཞུས་གནང་འདུག། ཁོང་རྣམས་ཀྱིས་སྐབས་དེར་གཙོ་བོ་ཧོང་ཀོང་ནང་ད་ཆ་འགྲོ་བཞིན་པའི་ཡུལ་དེའི་འཐབ་རྩོད་ཀྱི་གནས་བབས་དང་དེར་བོད་མིའི་ངོས་ནས་རྒྱབ་སྐྱོར་གནང་ཕྱོགས། ལྷག་དོན་རྒྱ་ནག་གཞུང་ནས་ཧོང་ཀོང་ནང་གི་གཞོན་སྐྱེས་མི་རབས་གསར་པ་རྣམས་ལ་ཞེད་སྣང་བྱེད་དགོས་དོན་ཞེས་པའི་བརྗོད་གཞི་ཁག་གི་ཐོག་གྲོས་བསྡུར་ལྷུག་པོ་གནང་ཡོད་པ་རེད། འདི་ག་རླུང་འཕྲིན་ཁང་ནས་བགྲོ་གླེང་གི་ལས་རིམ་དེ་གོ་སྒྲིག་གནང་མཁན་བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་ངེས་སྟོན་པ་རྡོ་རྗེ་ཚེ་བརྟན་ལགས་སུ་བཅར་འདྲི་ཞུས་ཡོད།

བོད་ཁམས་དཀར་མཛེས་རྫོང་ཉེན་རྟོག་མི་སྣ་ ༣༠ ལྷག་ཙམ་གྱིས་དཀར་མཛེས་ཁུལ་བྲག་འགོ་རྫོང་ཏྲེ་ཧོར་མཚོ་འགོ་གྲོང་བརྡལ་སྒང་རོང་སྡེ་བའི་སྡེ་དཔོན་གཙོས་བོད་མི་བཅུ་ལྷག་ལ་གཅར་བརྡུང་དྲག་པོ་བཏང་འདུག་པ་མ་ཟད། རང་ལོ་ ༧༠ ཡས་མས་ཡིན་པའི་ལོ་རྒན་བསོད་ནམས་སྟོབས་ལྡན་ཞུ་མཁན་ཞིག་ལ་རྨས་སྐྱོན་ཚབས་ཆེ་བཏང་ནས་ད་ལྟ་ཁྲེན་ཏུའུ་སྨན་ཁང་ཆེ་བར་འཁྲིད་དགོས་བྱུང་འདུག་པ་དང་། བོད་མི་གཅིག་གི་རྩིབས་མ་བཅག་ནས་ཐེན་ཆིན་སྨན་ཁང་དུ་བསྐྱལ་འདུག བཞུགས་སྒར་དུ་བཅའ་བཞུགས་མཚན་གསུང་འདོད་མེད་པའི་བོད་མི་ཞིག་གིས་ཁུངས་ལྡན་གནས་ཚུལ་འགྲེལ་བརྗོད་གནང་པར་གཞིགས་ན། གནས་ཚུལ་འདི་ནི་ཟླ་ ༨ ཚེས་ ༢༤ ཉིན་བྱུང་འདུག་པ་དང་། ཉིན་དེར་སྒང་རོང་སྡེ་བའི་ས་གནས་བོད་མི་རྣམས་ནས་དབྱར་ཁའི་ནས་འབྲུ་འདེབས་ལས་སོགས་གྲུབ་རྗེས། ཡུལ་སྲོལ་ལྟར་གྲོང་ཉེ་འཁྲིས་ཀྱི་རི་མགོར་བསང་གསོལ་བཏང་པ་དང་དེའི་རྗེས་སུ་རང་གི་ས་ཐོག་ཏུ་སྤྲོ་སྐྱིད་གནང་བཞིན་པའི་སྐབས། གློ་བུར་དུ་དཀར་མཛེས་རྫོང་གི་ཉེན་རྟོག་པ་ ༣༠ ཡས་མས་ཤིག་གློ་བུར་དུ་འབྱོར་ནས་ཁོང་ཚོ་བང་བསྒྲིགས་བཅུག་ནས་མི་རེའི་ཐོབ་ཐང་ལག་འཁྱེར་བརྟག་དཔྱད་བྱས་འདུག སྐབས་དེར་བོད་མི་དེ་དག་ཁྲོད་སྡེ་དཔོན་གྱིས་བྲག་འགོ་རྫོང་མཚོ་འགོ་གྲོང་བརྡལ་སྲིད་གཞུང་ལ་ཁ་པར་བཏང་ནས་ཉེན་རྟོག་པས་དེ་ལྟར་བྱེད་དོན་ཇི་ཡིན་སོགས་གནས་ཚུལ་བཀའ་འདྲི་ཞུ་མཚམས་ཉེན་རྟོག་པ་གཉིས་ཀྱིས་སྡེ་དཔོན་ཁོང་ལ་གཅར་རྡུང་བཏང་པ་མ་ཟད། བོད་མི་གཞན་ཀུན་ལའང་ལག་ཆ་འདྲ་མིན་སྤྱོད་ནས་རྡུང་འདུག ད་ལྟའི་ཆར་ཤེས་རྟོགས་བྱུང་བར་ཉིན་དེར་རྨས་སྐྱོན་ཕོག་མཁན་མང་ཆེ་བ་བྲག་འགོ་རྫོང་སྨན་དུ་ལུས་འདུག་ཀྱང་། ལོ་རྒན་བསོད་ནམས་སྟོབས་ལྡན་ལགས་ཀྱི་མགོ་ལ་རྨས་སྐྱོན་ཚབས་ཆེ་བཟོས་སྟབས་ཁྲེན་ཏུའུ་སྨན་ཁང་ཆེ་སར་འཁྱེར་འདུག་པ་དང་། བོད་མི་གཅིག་གི་རྩིབས་མ་བཅག་པས་ཐེམ་ཆིན་སྨན་སུ་བསྐྱལ་འདུག ཁོང་གིས་མུ་མཐུད་གསུང་པར་སྤྱིར་སྟངས་སྒང་རོང་སྡེ་བ་ནི་བྲག་འགོ་རྫོང་འོག་སླེབས་ཀྱི་ཡོད་ནའང་། དཀར་མཛེས་རྫོང་ཉེན་རྟོག་པས་སྒང་རོང་སྡེ་བའི་ས་གནས་བོད་མི་རྣམས་ལ་དོན་མེད་གཅར་རྡུང་བཏང་པ་འདི་ནི་དཀར་མཛེས་རྫོང་ཉེན་རྟོག་པས་དབང་ཆ་བདེ་སྤྱོད་བཏང་པ་ཞིག་ཏུ་གསུངས་ཡོད། གནས་ཚུལ་བྱུང་རྗེས་སྒང་རོང་སྡེ་བའི་མི་རྣམས་ནས་རྒྱ་ནག་དབུས་གཞུང་དང་ཞིང་ཆེན། དེ་བཞིན་ཁུལ་རིམ་པའི་ལས་ཁུངས་དང་དཔོན་རིགས་ཚོ་ལ་ཞུ་ཡིག་གཅིག་ཕུལ་ནས་འབྲེལ་ཡོད་ཀྱི་སྲིད་གཞུང་དང་དཔོན་པོ་རྣམས་པས་ངེད་སྡེ་མི་རྣམས་ལ་དོན་མེད་དཀར་མཛེས་རྫོང་ཉེན་རྟོག་པས་གཅར་རྡུང་བཏང་བ་ཐུགས་ཁུར་དང་དོ་སྣང་མཛད་རོགས་ཞེས་སོགས་གསུངས་འདུག འདི་ག་རླུང་འཕྲིན་ཁང་གི་གསར་འགོད་པས་ཁོང་ལ་ད་ལྟའི་ས་གནས་ཀྱི་གནས་ཚུལ་ཇི་ཆགས་སྐོར་ལ་བཀའ་འདྲི་ཞུས་པར་གནས་ཚུལ་གསར་པ་གང་ཡང་ཤེས་རྟོགས་ཐུབ་ཀྱི་མེད་པ་དང་། ས་གནས་ཀྱི་གནས་ཚུལ་ཁག་ཤེས་རྟོགས་ཐུབ་རྒྱུར་དཀའ་བ་གྱུར་འདུག་ཅེས་གསུང་གི་འདུག