རྒྱ་ནག

རྒྱ་དཀར་ནག་གཉིས་དབར་འདས་པའི་ལོ་གཅིག་དང་ཕྱེད་ཀ་ཙམ་ནས་ས་མཚམས་དང་འབྲེལ་བའི་གནད་དོན་ཐད་དང་གདོང་ཐུག་རིམ་པ་བྱུང་བཞིན་པའི་ཁྲོད། ཉེ་ལམ་རྒྱ་ནག་གི་རྒྱལ་ཡོངས་མི་མང་འཐུས་མི་ཚོགས་ཆེན་གྱི་རྒྱུན་ལས་ལྷན་ཚོགས་ནས། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ས་ཁོངས་གཅིག་སྒྲིལ་དང་མཐའ་མཚམས་ཀྱི་བདག་དབང་སྲུང་སྐྱོབ་ནི་ཧ་ཅང་རྩ་ཆེན་ཡིན་ལུགས་ཀྱི་ངོས་འཛིན་གྱི་ཐོག་ནས།  དེར་འབྲེལ་གྱི་ཁྲིམས་སྒྲིག་གསར་བ་ཞིག་གཏན་འབེབས་བྱས་ཏེ་སང་ལོའི་ཟླ་བ་དང་པའི་ནང་ནས་དངོས་སུ་ལག་བསྟར་བྱེད་རྒྱུ་རེད་འདུགདེ་ཡང་དེ་རིང་རྒྱ་གར་གྱི་གསར་ཁང་ཆེ་ཁག་འདྲ་མིན་ཁག་ཅིག་གི་ཐོག་གནས་ཚུལ་ཐོན་པར་གཞིགས་ན། རྒྱ་ནག་གི་རྒྱལ་ཡོངས་མི་མང་འཐུས་མི་ཚོགས་ཆེན་གྱི་རྒྱུན་ལས་ལྷན་ཚོགས་ནས་ཟླ་བ་འདིའི་ཚེས་ ༢༣ ཉིན་གཏན་འབེབས་བྱས་པའི་ཁྲིམས་གཞི་དེ་ནི་རྒྱ་ནག་གི་མཐའ་མཚམས་སྲུང་སྐྱོབ་དང་འབྲེལ་བའི་ཁྲིམས་གཞི་ཐེངས་དང་པོ་དེ་ཆགས་ཀྱི་ཡོད་པ་དང་། དེ་ནི་རྒྱ་དཀར་ནག་བར་རྩོད་རྙོག་ཅན་གྱི་འཕགས་བོད་མཐའ་མཚམས་ཁག་ལ་ཡང་འབྲེལ་བ་ཆགས་ཡོད་པ་ཞིག་ཡིན་མ་ཟད། རྒྱ་གར་གྱི་དཔྱད་ཞིབ་པ་ཁག་ཅིག་གིས། རྒྱ་ནག་གི་ངོས་ནས་ཐེངས་འདིའི་ཁྲིམས་གཞི་དེ་བརྒྱུད། དེ་སྔོན་ཡུལ་དེའི་མཐའ་མཚམས་ཀྱི་དཔུག་དམག་རྣམས་ཀྱིས་རྒྱ་གར་གྱི་ས་མཚམས་ལ་སིམ་འཛུལ་སོགས་ཀྱི་བྱ་སྤྱོད་རིམ་པ་སྤེལ་བ་རྣམས་ཁྲིམས་མཐུན་བཟོ་ངེས་ཡིན་པའི་ཚོད་དཔག་གནང་བཞིན་ཡོད་པ་རེད་འདུགTimes of India གསར་ཁང་གིས། རྒྱ་ནག་གིས་མཐའ་མཚམས་དང་འབྲེལ་བའི་ཁྲིམས་སྒྲིག་དེ་ལག་བསྟར་བྱས་པ་བརྒྱུད་ནས་མཐའ་མཚམས་ཀྱི་བདེ་འཇགས་ལ་འགྱུར་བ་ཐེབས་མིན་གྱི་ངེས་བ་མེད་ནའང་། ལས་གཞི་དེ་ནས་རྒྱ་གིས་མཐའ་མཚམས་ཁག་ལ་དོ་དམ་བྱ་རྒྱུའི་གདེང་སྤོབས་རྙེད་ཡོད་པ་ཞིག་ཡིན་པ་གསལ་བོར་མཚོན་ཐུབ་ཡོད་པ་འགྲེལ་བརྗོད་གནང་འདུག་པ་དང་། ཁྲིམས་གཞི་དེའི་ནང་དུ་རྒྱ་ནག་གི་བཅིངས་གྲོལ་དམག་མི་དང་ཉེན་རྟོག་རུ་ཁག་སོགས་ཀྱིས་མཐའ་མཚམས་དང་འབྲེལ་བའི་གདོང་ཐུག་གི་རིགས་ལ་ཁ་གཏད་གཅོག་རྒྱུ་དང་།  མཐའ་སྲུང་གི་འགན་འཁྲིར་ཤུགས་སྣོན་གྱིས་དམག་སྦྱོང་གི་རིགས་སྤེལ་རྒྱུ་མ་ཟད། ཆོད་སེམས་བརྟན་པོའི་ཐོག་ནས་ཕྱིའི་སྟོབས་ཤུགས་ལ་ཁ་གཏད་གཅོག་རྒྱུ་ཡིན་ལུགས་བསྒྲགས་འདུག དོན་ཚན་ ༦༢ ཅན་གྱི་ཁྲིམས་སྒྲིག་དེའི་ནང་གཞན་ཡང་མཐའ་མཚམས་ཁག་ཏུ་འཛུགས་སྐྲུན་གྱི་ལས་གཞི་རྒྱ་བསྐྱེད་དང་གྲོང་ཚོ་གསར་རྒྱག་ལ་ཤུགས་སྣོན་སྔར་ལྷག་བྱེད་རྒྱུ་དང་།དེའི་ཐད་རྒྱ་ནག་བཅིང་འགྲོལ་དམག་དང་། ས་གནས་གཞུང་། དེ་བཞིན་དྲག་ཆས་དམག་བཅས་ཁུངས་སོ་སོའི་འབྲེལ་ཡོད་ལས་འགན་གསལ་བཀོད་བྱས་པ་མ་ཟད། མཐའ་མཚམས་ས་ཁུལ་དུ་ཚོང་གི་ཁྲོམ་རྭ་དང་། དཔལ་འབྱོར་མཉམ་ལས་ཀྱི་དམིགས་བསལ་ས་ཁུལ་འཛུགས་སྐྲུན། གཞན་ཡང་ནད་ཡམས་དང་ཆུ་ལོག མེ་སྐྱོན་སོགས་འབྱུང་བའི་རང་བཞིན་གྱི་གནོད་འཚེ་ཁག་ལ་གདོང་ལེན་གྱི་ལས་གཞི་བཅས་སྤེལ་རྒྱུ་ཡིན་སྐོར་བརྗོད་འདུགའདི་ག་རླུང་འཕྲིན་ཁང་ནས་བོད་མིའི་སྒྲིག་འཛུགས་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ། འབུམ་རམས་པ་ཚེ་དབང་རྡོ་རྗེ་ལགས་སུ་ཐེངས་འདིའི་ཁྲིམས་སྒྲིག་དེའི་གལ་གནད་ཀྱི་སྐོར་ལ་བཀའ་འདྲི་ཞུས་པར་ཁོང་གིས། གཞི་རྩའི་རྒྱ་ནག་གིས་བོད་ཀྱི་མཐའ་མཚམས་ཀྱི་ཁུལ་དུ་འཛུགས་སྐྲུན་དང་སྲུང་སྐྱོབ་སོགས་ཀྱི་མཚོན་པའི་ལས་གཞི་སྣ་མང་ཞིག་སྤེལ་མུས་ཡིན་པ་དང་འབྲེལ་ནས། རྒྱ་ནག་གིས་ཐེངས་འདིར་ཁྲིམས་སྒྲིག་གཏན་འབེབས་བྱས་པ་དེ་ལག་བསྟར་བྱས་པ་ཡིན་ན་བོད་ཀྱི་མཐའ་མཚམས་ཁག་ཏུ་གནས་བའི་བོད་མི་རྣམས་ཀྱི་འགྲོ་འདུག་གི་རང་དབང་ལ་དོ་ཕོག་ཆེན་པོ་ཐེབས་ངེས་ཡིན་པ་མ་ཟད། རྒྱ་ནག་གིས་ཁྲིམས་འགལ་གྱི་བསྙད་འདོགས་འདྲ་མིན་གྱི་ཐོག་ནས་བོད་མི་རྣམས་ལ་དམ་དྲག་ཤུགས་ཆེར་བྱེད་རྒྱུར་དམིགས་པ་ཞིག་ཡིན་སྐོར་གསུངས་ཡོད། གཞི་རྩའི་ཐེངས་འདིའི་ཁྲིམས་གཞི་དེ་ནི་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་ཁྱིམ་མཚེས་རྒྱལ་ཁབ་ཨུ་རུ་སུ་དང་བྱང་ཀོ་རི་ཡ། སོག་ཡུལ། རྒྱ་གར། འབྲུག་ཡུལ་སོགས་ཁྱོན་རྒྱལ་ཁབ་ ༡༤ དང་ས་འབྲེལ་ཡོད་པའི་མཐའ་མཚམས་ས་ཁུལ་སྲུང་སྐྱོབ་ཀྱིས་ཁྲིམས་སྒྲིག་ཐེངས་དང་པོ་དེ་ཆགས་ཡོད་པ་དང་། སྤྱིར་རྒྱ་ནག་གཞུང་ངོས་ནས་ད་བར་ས་འབྲེལ་རྒྱལ་ཁབ་དེ་དག་ཕལ་མོ་ཆེ་དང་མཉམ་དུ་ས་མཚམས་གཏན་འབེབས་ཟིན་ཡོད་ཀྱང་། རྒྱ་གར་དང་འབྲུག་ཡུལ་གཉིས་དང་ལྷན་དུ་ས་མཚམས་ཀྱི་གནད་དོན་སེལ་མ་ཐུབ་པར་དེ་མུར་ལྷག་ཡོད་པ་རེད། རྒྱ་གར་གཞུང་གི་འགྲེལ་བརྗོད་གནང་བར་གཞིགས་ན། རྒྱ་ནག་མི་མང་བཅིང་འགྲོལ་དམག་གིས་སྔར་ལོའི་དབྱར་དུས་ཁོ་ནའི་རིང་རྒྱ་དཀར་ནག་གཉིས་དབར་གྱི་མཐའ་མཚམས་དང་འབྲེལ་བའི་དེ་སྔའི་གྲོས་མཐུན་བཞི་ཙམ་ལ་རྩིས་མེད་རྡོག་རོལ་བྱས་ཡོད་པ་མ་ཟད། རྒྱ་ནག་གི་གཞུང་འབྲེལ་ཞིན་ཧྭ་གསར་ཁང་གིས་གནས་ཚུལ་སྤེལ་བའི་ནང་གསལ་ལྟར་ན།ཕྱི་ལོ་ ༢༠༢༠ ལོའི་ལོ་མཇུག་གི་བར་དུ་རྒྱ་ནག་གིས་འཕགས་བོད་མཐའ་མཚམས་སུ་གྲོང་ཚོ་གསར་བ་ ༦༠༠ ལྷག་གསར་འཛུགས་བྱས་ཡོད་པ་དང། སྤྱི་ལེ་ ༣༠༨༠ ལྷག་གི་གཞུང་ལམ་ ༡༣༠ ཙམ་གསར་རྒྱག    གཞན་ཡང་ཉེ་བའི་ལོ་འགའི་རིང་འཕགས་བོད་མཐའ་མཚམས་དང་འབྲེལ་བའི་མེ་འཁོར་ལྕགས་ལམ་དང་གནམ་ཐང་སོགས་ཀྱང་གསར་རྒྱག་བྱས་ཡོད་པ་རེད།རྒྱ་གར་གྱི་ཕྱི་སྲིད་དྲུང་ཆེ་Harsh Vardhan Shringlaམཆོག་གིས་རྒྱ་ནག་གིས་བྱང་ཕྱོགས་ལ་དྭགས་ཁུལ་གྱི་འཕགས་བོད་མཐའ་མཚམས་སུ་འཛུགས་སྐྲུན་གྱི་ལས་གཞི་གཉེར་བ་དེ་ཡིས་ཕྱོགས་གཉིས་ཀྱི་མཐའ་མཚམས་དང་འབྲེལ་བའི་ཞི་བདེ་དང་བརྟན་བརླིང་ལ་དོ་ཕོག་ཆེན་པོ་བཏང་ཡོད་པ་ཞིག་ཡིན་པར་བསྒྲགས་ཡོད་དང་། རྒྱ་གར་གྱི་ཕྱི་སྲིད་བློན་ཆེན་jaishankar མཆོག་གིས་ཀྱང་རྒྱ་ནག་གིས་ཕྱོགས་གཉིས་ཀྱི་མངོན་འདོད་དང་ཞི་བདེ་གཞིར་བཞག་གི་ཐོག་ནས་མཐའ་མཚམས་ཀྱི་དཀའ་རྙོག་སེལ་རྒྱུར་མཉམ་ལས་བྱེད་རྒྱུར་རེ་བ་ཆེན་པོ་ཡོད་པར་གསུངས་ཡོད་པ་རེད།

བོད་ཨ་མདོ་རྔ་བ་ཀིརྟི་དགོན་གྱི་དགེ་འདུན་པ་བློ་བཟང་ཆོས་འཕེལ་ལགས་རྒྱ་ནག་གིས་ཟླ་བ་འདིའི་ཟླ་འགོར་འཛིན་བཟུང་གིས་བཀག་སྐྱིལ་བྱས་ཡོད་འདུགབཞུགས་སྒར་ཀིརྟི་དགོན་དུ་རྟེན་གཞི་བྱས་པའི་བོད་གནས་འབྲེལ་མཐུད་པ་ཀ་ཉག་ཚེ་རིང་ལགས་ཀྱིས་འདི་གའི་གསར་ཁང་ལ་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཟླ་ ༡༠ ཚེས་འགོ་ཙམ་ལ།  རྒྱ་ནག་དམར་གཞུང་གིས་རྔ་བ་ཀིརྟི་དགོན་པའི་གྲྭ་བློ་བཟང་ཆོས་འཕེལ་ལགས་འཛིན་བཟུང་བཀག་ཉར་བྱས་ཡོད་པའི་གནས་ཚུལ་ཁོངས་ལྡན་ཤེས་རྟོགས་བྱུང་ཡང་།  ཁོང་འཛིན་བཟུང་བྱེད་དགོས་པའི་རྒྱུ་མཚན་དང་བཙོན་ཁང་གང་དུ་བཀག་ཉར་བྱས་ཡོད་མེད་སོགས་ཞིབ་ཕྲའི་གནས་ཚུལ་ཤེས་རྟོགས་མི་ཐུབ་པའི་གནས་སུ་ལྷུང་ཡོད་པར་འགྲེལ་བརྗོད་གནང་སོང་། གྲྭ་བློ་བཟང་ཆོས་འཕེལ་ལགས་ནི་ས་བྱི་ལོའི་ཞི་རྒོལ་དང་འབྲེལ་ནས་སྔ་རྗེས་སུ་ཐེངས་གཉིས་ཙམ་ལ་འཛིན་བཟུང་གིས། ཟླ་བ་བཞི་ཙམ་ལ་བཀག་སྐྱིལ་བྱས་མྱོང་ཡོད་པ་ཞིག་ཡིན་པ་དང་།  ད་ཆ་སླར་ཡང་ཐེངས་གསུམ་པར་འཛིན་བཟུང་གིས་བཙན་ཁྲིད་བྱས་ཡོད་པ་རེད། གཞན་ཡང་ཀ་ཉག་ཚེ་རིང་ལགས་ཀྱིས་ད་ཆ་རྒྱ་ནག་གིས་སྔར་ལྷག་བོད་གཞིས་བྱེས་གཉིས་ཀྱི་དབར་གྱི་འབྲེལ་ལམ་ལ་དམ་དྲག་ཤུགས་ཆེར་བྱེད་བཞིན་པ་དང་འབྲེལ་ནས། ཐེངས་འདིར་འཛིན་བཟུང་བྱས་པའི་གནད་དོན་དེ་ཡང་ཟླ་བ་གཅིག་མ་ཟིན་ཙམ་གྱི་རྗེས་ནས་མ་གཏོགས་གནས་ཚུལ་ཤེས་རྟོགས་བྱེད་མ་ཐུབ་པར་ལྷག་ཡད་ཡོད་པ་ཞིག་ཡིན་སྐོར་གསུངས་ཡོད། གཞི་རྩའི་དགེ་འདུན་པ་བློ་བཟང་ཆོས་འཕེལ་ལགས་ནི་རྔ་བ་རྫོང་ཁོངས་ཀྱི་རྔ་སྲིབ་ཀ་ཉག་སྡེ་བ་ནས་ཡིན་ཞིང་།  ་ཁོང་ཆུང་དུས་ནས་་རྔ་བ་ཀིརྟི་དགོན་དུ་གྲྭར་ཞུགས་ཀྱིས་སློབ་གཉེར་གནང་ཞོར་དུ།  ཀིརྟི་དགོན་པ་གཞུང་གི་གློག་ཀླད་སྡེ་ཚན་གྱི་ཕྱག་ལས་གནང་མུས་ཡིན་པ་དང་། དུས་རྒྱུན་ནས་ཁོང་པར་ལེན་སྒྱུ་རྩལ་ལ་དོ་དབྱིངས་ཡོད་མཁན་ཞིག་ཡིན་པ་ཟད། བོད་ཁུལ་དུ་པར་ལེན་འགྲན་བསྡུར་ཁག་ཅིག་གི་ནང་དུ་བྱ་དགའ་ཡར་རེ་འགའ་ཐོབ་མྱོང་མཁན་ཞིག་ཡིན་པ་དང་། ཁོང་གི་ཕ་འདས་བའི་མཚན་ལ་རིག་ཁོ། ཨ་མའི་མིང་ལ་མིང་ལ་ཚེ་རིང་སྐྱིད་ཟེར་ཞིང་། ད་ཆ་ཁོང་དགོང་ལོ་ ༣༤ ཡིན་པའི་གྲྭ་གཞོན་དར་མ་ཞིག་ཡིན་ཆགས་ཡོད་པ་རེད།

ཁ་སང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་གྱི་ཐོག་ཏུ། རྒྱལ་སྤྱིའི་རྒྱལ་ཁབ་ ༤༣ ལྷག་གིས་རྒྱ་ནག་གིས་ཤིན་ཅང་གི་ནང་དུ་ཡུ་གུར་གྲངས་ཉུང་མི་རིགས་ཀྱི་མཚོན་པའི་ཁུལ་དེའི་ཆོས་ལུགས་གཞན་གྱི་ཚོགས་སྡེ་ལ་དྲག་གནོན་གྱི་སྲིད་བྱུས་ལག་བསྟར་བྱེད་བཞིན་པར་ཡོངས་གྲགས་ཀྱིས་སྐྱོན་བརྗོད་བྱས་འདུག སྐབས་དེའི་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་གྱི་ཐོག་ཏུ། ཧྥ་རན་སིའི་མཉམ་འབྲེལ་རྒྱལ་ཚོགས་ཀྱི་སྐུ་ཚབ། སྐུ་ཞབས Nicolas De Riviere ལགས་ཀྱིས་རྒྱལ་ཁབ་༤༣ གྱིས་མཉམ་འབྲེལ་གྱིས་རྒྱ་ནག་ལ་སྐྱོན་བརྗོད་ཀྱི་བསྒྲགས་གཏམ་སྒྲོག་སྦྱང་གནང་བའི་ནང་དུ། རྒྱལ་ཁབ་༤༣་དེ་དག་གིས་རྒྱ་ནག་གིས་ཡུ་གུར་མི་རིགས་ལ་དྲག་གནོན་གྱིས་བཀག་སྐྱིལ་བྱེད་བཞིན་པའི་གནད་དོན་དེར་སེམས་འཚབ་ཡོད་པ་དང་འབྲེལ་ནས། རྒྱ་ནག་གིས་ཤིན་ཅང་གི་ཁུལ་དུ་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་རྟོག་ཞིབ་རུ་ཁག་གི་གཙོ་བྱས་པའི་ཕྱི་ཕྱོགས་ཀྱི་རང་དབང་ཅན་གྱི་རྟོག་ཞིབ་རུ་ཁག་ཁུལ་དེར་འགྲོ་རྒྱུར་ཆོག་མཆན་སྤྲོད་དགོས་བའི་འབོད་སྐུལ་བྱས་འདུག གཞི་རྩའི་ཐེངས་འདིའི་རྒྱལ་ཁབ་ ༤༣ གྱི་སྐྱོན་བརྗོད་ཀྱི་བསྒྲགས་གཏམ་ནང་དུ། ཡུ་གུར་མི་མང་ས་ཡ་གཅིག་དང་འབུམ་བརྒྱད་ལྷག་གིས་ Zapya ཞེས་པའི་ཁ་པར་མཉེན་ཆས་བཀོད་སྤྱོད་བྱས་པར་བརྟེན་ནས་རྒྱ་ནག་གིས་བཀག་སྐྱིལ་བྱས་ཡོད་པར་འཁོད་ཡོད་པ་རེད། གཞན་ཡང་བདུན་ཕྲག་འདིའི་ནང་དུ་ཨོ་གླིང་གི་སྲིད་བྱུས་ཉམས་ཞིབ་ཀྱི་ལྟེ་གནས་ཁང་ཞིག་གིས་ཀྱང་རྒྱ་ནག་གིས་ཤིན་ཅང་གི་ནང་དུ་དྲག་གནོན་གྱི་སྲིད་བྱུས་ལག་བསྟར་བྱེད་བཞིན་པའི་སྙན་ཐོ་བཏོན་ཡོད་པ་མ་ཟད། འདི་ལོ་ནི་ཡུ་རོབ་ཀྱི་རྒྱལ་ཁབ་རྣམས་ཀྱིས་འགྲོ་བ་མིའི་ཐོབ་ཐང་གི་ཚོགས་ཆེན་ཐོག་རྒྱ་ནག་གིས་ཡུ་གུར་མི་རིགས་ལ་དྲག་གནོན་གྱི་སྲིད་བྱུས་སྤེལ་བཞིན་པར་ལོ་ལྟར་སྐྱོན་བརྗོད་བྱས་པའི་ལོ་གསུམ་པ་དེ་ཆགས་ཡོད་པ་རེད། སྐབས་དེར་མཉམ་འབྲེལ་རྒྱལ་ཚོགས་ཀྱི་རྒྱ་ནག་གི་སྐུ་ཚབ་ Zhang Jun ཟེར་བས་རྒྱལ་ཁབ་ ༤༣ གྱི་མཉམ་འབྲེལ་གྱི་སྐྱོན་བརྗོད་དེར་དགག་གཞག་བྱས་ཏེ། ཨ་རིའི་གཙོ་བྱས་པའི་རྒྱལ་ཁབ་གཞན་ཁག་ཅིག་གིས་འགྲོ་བ་མིའི་ཐོབ་ཐང་གི་གནད་དོན་ལ་ཁ་གཡར་ནས་རྒྱ་ནག་ལ་འགྲན་སློང་བྱེད་བཞིན་པ་ཞིག་ཡིན་པ་མ་ཟད། རྒྱ་ནག་གིས་ཡུ་གུར་མི་རིགས་ལ་དྲག་གནོན་བྱེད་བཞིན་པར་བརྗོད་པ་དེ་ནི་གཞི་རྩ་བྲལ་བའི་བསྙོན་འཛུགས་ཤིག་ཡིན་པར་འགྲེལ་བརྗོད་ཀྱིས། ཤིན་ཅང་གི་མི་མང་གི་འཚོ་བ་ཉིན་རེ་ནས་ཉིན་རེར་ཡར་རྒྱས་ཆེན་པོ་འགྲོ་བཞིན་པ་ཞིག་ཡིན་པར་བསྒྲགས་ཡོད་པ་དང་། སྐབས་དེར་རྒྱ་ནག་གི་མཐུན་ཕྱོགས་རྒྱལ་ཁབ་ ༦༢ ཡིས་ཡུ་གུར་གྱི་གནད་དོན་དེ་ནི་རྒྱ་ནག་ནང་ཁུལ་གྱི་གནད་དོན་ཞིག་དང་། ཕྱི་ཕྱོགས་ནས་ཆབ་སྲིད་ཀྱི་དམིགས་འབེན་གྱི་ཐོག་ནས་གནད་དོན་དེ་གླེང་སློང་བྱེད་བཞིན་པ་ཞིག་ཡིན་པར་བརྗོད་འདུག རྩ་བའི་རྒྱ་ནག་གིས་ཡུ་གུར་མི་རིགས་ལ་དྲག་གནོན་གྱིས་མི་རིགས་རྩ་གཏོར་གཏོང་བཞིན་པ་དང་འབྲེལ་ནས། ཨིན་ཡུལ་དང་ཨོ་གླིང་། དེ་བཞིན་ཁེ་ན་ཌ། གཞན་ཡང་ནེའུ་ཛ་ལན་ཌི་སོགས་ཀྱི་མཚོན་པའི་རྒྱལ་ཁབ་མང་པོ་ཞིག་གིས་རྒྱལ་ཁོངས་སོ་སོའི་གྲོས་ཚོགས་ནང་དུ་ཤིན་ཅང་གི་གནད་དོན་དེ་མི་རིགས་རྩ་གཏོར་གྱི་གནད་དོན་ངོས་འཛིན་དང་། ཨིན་ཡུལ་དང་ཡུ་རོབ་མཐུན་ཚོགས་ཀྱིས་ཨ་རི་དང་ཁེ་ན་ཌ་དང་ལྷན་དུ་ཤིན་ཅང་ནང་གི་འབྲེལ་ཡོད་དཔོན་རིགས་ཁག་ཅིག་ལ་སྲིད་དོན་ཉེས་ཆད་ཡང་བཅད་ཡོད་པ་རེད།

བོད་མདོ་སྨད་མཛོད་དགེ་སོག་ཚང་དགོན་གྱི་གྲྭ་དགེ་འདུན་གྲགས་པ་ལགས་མི་ལོ་ལྔ་ཡི་བཙོན་འཇུག་གི་དུས་ཚང་ནས་གློད་གྲོལ་བཏང་ཡོད་ནའང་། ད་ལྟ་གཟུགས་གཞིའི་འཕྲོད་བསྟེན་གྱི་གནས་བབ་ཞན་པའི་རྐྱེན་གྱིས་ཁྲིན་འདུ་གྲོང་ཁྱེར་གྱི་སྨན་ཁང་ཞིག་ཏུ་ཞག་སྡོད་ཀྱིས་སྨན་བཅོས་བྱེད་མུས་རེད་འདུག བོད་ནས་ཕྱི་ལོག་ཏུ་གནས་ཚུལ་མཁོ་སྤྲོད་བྱས་པ་ལྟར་ན། ཕྱི་ཟླ་༨ པའི་ཟླ་མཇུག་ཙམ་ལ་བོད་ཀྱི་ཆབ་སྲིད་བཙོན་པ་དགེ་འདུན་གྲགས་པ་ལགས་གློད་གྲོལ་ཐོབ་ནས་རང་ཁྱིམ་དུ་འབྱོར་ཡོད་ཀྱང་ད་ཆ་ཁོང་མཁྲིས་པའི་ནད་གཞིའི་རྐྱེན་གྱིས་རྒྱ་ནག་ཁྲིན་འདུ་གྲོང་ཁྱེར་གྱི་སྨན་ཁང་དུ་སྨན་བཅོས་བྱེད་མུས་ཡིན་ཡང་། རྒྱ་ནག་གཞུང་གིས་ད་དུང་ཡང་ཁོང་གི་འགྲོ་འདུག་ལ་ལྟ་རྟོག་ནན་མོ་བྱེད་བཞིན་ཡོད་འདུག གཞི་རྩའི་དགེ་འདུན་པ་ཁོང་གློད་གྲོལ་བཏང་ནས་ཟླ་གཉིས་ཙམ་འགྲོ་བཞིན་ཡོད་ནའང་། ཁོང་ད་དུ་སྲིད་གཞུང་གི་ལྟ་རྟོག་གི་འོག་ན་ཡོད་པས་ཟླ་རེ་བཞིན་ས་གནས་ཉེན་རྟོག་ཁང་ལ་ངེས་པར་དུ་ཐོ་འགོད་བྱེད་དགོས་བར་བརྗོད་འདུག རྩ་བའི་ཕྱི་ལོ་ ༢༠༡༦ ལོར་མཛོད་དགེ་རྫོང་ཐང་སྐོར་སོག་ཚང་བཀྲིས་ཐེག་མཆོག་གླིང་དགོན་པའི་དགེ་འདུན་པ་དགེ་འདུན་གྲགས་པ་ལགས་དང་། བློ་བཟང་ཤེས་རབ་ལགས་གཉིས་རྒྱ་ནག་གིས་འཛིན་བཟུང་གིས་དུས་ཡུན་གང་འཚམས་ཤིག་གི་རིང་ལ་གར་ཡོད་ཆ་མེད་དུ་གྱུར་ཀྱང་། ཕྱིས་སུ་ཕྱི་ལོ་ ༢༠༡༧ ཟླ་ ༦ ཚེས་ ༡༧ ཡས་མས་ཤིག་ལ་ཟི་ཁྲོན་ཞིང་ཆེན་རྔ་པ་བོད་རིགས་ཆང་རིགས་རང་སྐྱོང་ས་ཁུལ་ཟེར་བའི་རྒྱལ་རོང་ཁྲོ་ཆུ་རྫོང་དུ་རྒྱ་གཞུང་གིས་ཁྲིམས་ར་ཚོགས་ཏེ་དགེ་འདུན་པ་ཁོང་གཉིས་ལ་རྒྱལ་ཁབ་ཁ་བྲལ་དང་ཕྱི་ཕྱོགས་སུ་འབྲེལ་བ་གནང་པའི་ཉེས་མིང་འོག་གྲྭ་གྲགས་པ་ལགས་ལ་ལོ་ལྔ་བཙོན་འཇུག་དང་། གྲྭ་བློ་བཟང་ཤེས་རབ་ལགས་ལའང་ལོ་བཞིའི་བཙོན་འཇུག་ཁྲིམས་ཐག་བཅད་པ་རེད། སྔོན་ཆད་ཁོང་གཉིས་ལ་ཁྲིམས་ཐག་གཅོད་སྐབས་ཁྲིམས་རའི་ནང་དོ་བདག་སྒེར་གྱི་ཁྲིམས་རྩོད་པ་ཁྲིད་པ་དང་དག་སེལ་གྱི་སྐད་ཆ་གང་ཡང་ཤོད་མ་བཅུག་པ་མ་ཟད། ཕ་མ་སྤུན་མཆེད་དང་ཐུག་འཕྲད་བྱེད་མ་བཅུག་པ་དང་། ཁྲིམས་ར་དངོས་སུ་ཚོགས་སྐབས་ཁྲིམས་རའི་ནང་ཟུར་ཉན་འགྲོ་མཁན་རྣམས་ལ་དམ་དྲག་ནན་པོ་བྱས་ཡོད་པ་ཤེས་རྟོགས་བྱུང་ཡོད་པ་རེད། གཞི་རྩའི་རྒྱ་ནག་གིས་བོད་ཁུལ་དུ་དྲག་གནོན་གྱི་སྲིད་བྱུས་ལག་བསྟར་གྱི་ཁྲོད་ནས་བོད་ཕྱི་ནག་གཉིས་ཀྱི་འབྲེལ་ལམ་ཁྲོད་ལ་ལྟ་རྟོག་ནན་པོ་བྱེད་བཞིན་པ་མ་ཟད། བོད་ནང་དུ་གང་བྱུང་འཛིན་བཟུང་དང་ཁ་པར་སོགས་བཙན་འཕྲོག་གིས་ཞིབ་བཤེར། དེ་བཞིན་མི་སྒེར་གྱི་ནང་དུ་ཡང་སྔོག་བཤེར་སོགས་ཀྱི་གནས་ཚུལ་རིམ་པ་བྱུང་བཞིན་པ་དང་། བོད་པའི་སྤྱི་ཚོགས་ནང་ཁུལ་དུ་ཡང་སོ་ཉུལ་གྱི་རིགས་སམ་གནས་ཚུལ་རྒྱ་གཞུང་ལ་ཡར་ཞུ་བྱེད་མཁན་ཡོད་ཚེ་དངུལ་དངོས་ཀྱི་རྔན་པ་སྤྲོད་ཀྱི་ཡོད་སྟབས་ད་ཆ་བོད་ཕྱི་ནང་གི་བར་དུ་ཆབ་སྲིད་ཀྱི་ལས་འགུལ་དང་འབྲེལ་བའི་གནས་ཚུལ་རྒྱུས་ལོན་བྱེད་དཀའ་བའི་གནས་སུ་ལྷུང་སྟབས། བོད་མི་རྣམས་འཛིན་བཟུང་བཙོན་འཇུག་དང་ཁྲིམས་ཆད་བཅད་པ་སོགས་ཀྱི་གནས་ཚུལ་དུས་ཐོགཏུ་ཕྱི་ཕྱོགས་ཀྱི་གསར་ལམ་ཁག་ཏུ་ཐོན་ཁག་པོ་ཆགས་ཡོད་པ་རེད།

ཁ་སང་ཕྱི་ཚེས ༡༩ཉིན། རྒྱ་ནག་གཞུང་གིས་བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ཝང་དབྱིང་ཅེ་ཟེར་བ་འགྱུར་བ་བཏང་སྟེ།  དེའི་ཚབ་ཏུ་རྒྱ་ནག་གི་ནང་དུ་དབང་བསྒྱུར་དྲག་གནོན་ཆེ་ཤོས་ཀྱི་ཡུ་གུར་རང་སྐྱོང་ལྗོངས་ཀྱི་དམར་ཤོག་ཚོགས་པའི་འགོ་གཙོ་གཞོན་པ་ཧན་མི་རིགས་ཝང་ཅུན་ཀྲེང་ཟེར་བ་བསྐོ་བཞག་བྱས་འདུགགཞི་རྩའི་ཝང་ཅུན་ཀྲེང་ནི་ཕྱི་ལོ་ ༢༠༡༩ ཟླ་ ༡ ནས་ཤིན་ཅང་ཡུ་གུར་མི་རིགས་རང་སྐྱོང་ཁུལ་དམར་ཤོག་ཚོགས་པའི་རྒྱུན་ལས་དང་སྲིད་ཁྲིམས་རྒྱུན་ལས་ལྷན་ཁང་གི་དྲུང་ཆེ། ཕྱི་ལོ་ ༢༠༢༠ ཟླ་ ༥ ནས་ལོ་དེའི་ཕྱི་ཟླ་ ༩ པའི་བར་ཤིན་ཅང་ཡུ་གུར་མི་རིགས་རང་སྐྱོང་ཁུལ་དམར་ཤོག་དྲུང་ཆེ་གཞོན་པ་དང་སྲིད་ཁྲིམས་རྒྱུན་ལས་ལྷན་ཁང་གི་དྲུང་ཆེ། ཤིན་ཅང་ཐོན་སྐྱེད་འཛུགས་སྐྲུན་དམག་སྡེའི་དམར་ཤོག་དྲུང་ཆེ། རྒྱ་ནག་ཡུ་གུར་འཛུགས་སྐྲུན་ལྷན་ཚོགས་ཀྱི་མགོ་འཁྲིད་སོགས་བྱས་པའི་ཁྲོད། ཤིན་ཅིང་གི་ཁུལ་དུ་དྲག་གནོན་གྱི་སྲིད་བྱུས་ལག་བསྟར་གྱིས་མི་མང་བཀག་སྐྱིལ་དང་ངལ་རྩོལ་བསྒྱུར་བཀོལ་སོགས་ཀྱི་ནག་ཉེས་དང་འབྲེལ་ནས།  ཨ་རི་དང་དབྱིན་ཡུལ། དེ་བཞིན་ཁ་ན་ཊ་དང་ཡུ་རོབ་སོགས་ཀྱིས་ནུབ་ཕྱོགས་སུ་འགྲོ་སྐྱོད་བཀག་སྡོམ་བྱས་པའི་རྒྱ་ནག་གི་དཔོན་རིགས་ཁྲོད་ཀྱི་གཅིག་ཆགས་ཡོད་པ་རེད། ཐེངས་འདིའི་བོད་རང་སྐྱོང་ལྗོངས་ཀྱི་དཔོན་རིགས་བརྗེ་བསྒྱུར་གྱི་གནད་དོན་དང་འབྲེལ་ནས་རྒྱ་རིགས་ཉམས་ཞིབ་པ་དང་ཐེ་ཝན་དོན་གཅོད་སྐལ་བཟང་རྒྱལ་མཚན་ལགས་སུ་བཀའ་འདྲི་ཞུས་པར་ཁོང་གིས་བོད་རང་སྐྱོང་ལྗོངས་སུ་རྒྱ་ནག་གི་འགོ་ཁྲིད་སུ་སླེབས་མིན་ལ་མ་ལྟོས་བར་ད་ལྟའི་སྲིད་འཛིན་ཞི་ཅིན་ཕིང་གི་འགོ་ཁྲིད་ཀྱི་འོག་ཏུ་བོད་ཁུལ་དུ་༸གོང་ས་མཆོག་གི་ཆོས་ཕྱོགས་ཀྱི་ཤན་ཤུགས་རྩ་གཏོར་གྱི་སྲིད་བྱུས་ལག་བསྟར་གྱིས་བོད་ནང་དུ་དམ་དྲག་བྱེད་མུས་ཡིན་པ་ལྟར། ཝང་ཅུན་ཀྲེང་གིས་ཀྱང་ད་ལྟའི་དམ་དྲག་གི་སྲིད་བྱུས་དེ་ལག་བསྟར་བྱེད་རྒྱུ་ཉག་གཅིག་ཡིན་པ་མ་ཟད། ཁོ་ནི་ཤིན་ཅང་གི་ནང་དུ་ཡང་དྲག་གནོན་གྱི་སྲིད་བྱུས་ལག་བསྟར་བྱེད་མཁན་ཞིག་ཡིན་པ་ལྟར། བོད་ནང་དུ་ཡ་ང་སྙིང་རྗེ་བྲལ་བའི་བྱ་སྤྱོད་སྤེལ་རྒྱུ་ཡིན་པར་གསུངས་སོང་། གཞན་ཡང་ཁོང་གིས། རྒྱ་ནག་དམར་ཤོག་གི་དབང་བསྒྱུར་སྲིད་བྱུས་ཀྱི་འོག་ཏུ། བོད་རང་སྐྱོང་ལྗོངས་དང་ཤིན་ཅིང་རང་སྐྱོང་ལྗོངས་གཉིས་སུ་རྒྱ་ནག་གི་དཔོན་རིགས་བརྗེ་སྤོར་གྱི་ལམ་སྲོལ་ཡོད་པ་ཞིག་ཡིན་པར་ལུང་འདྲེན་གྱིས། ཝང་དབྱིང་ཅེ་དང་ཝང་ཅུན་ཀྲེང་གཉིས་ནི་རྒྱ་ནག་གི་ཧྲན་ཏུང་ཞིང་ཆེན་ནས་ཡིན་པ་གཅིག་མཚུངས་ཡིན་པ་ལྟར། ཧྲན་ཏུང་གི་མི་རིགས་དེ་རྒྱ་ནག་གིས་ཧན་མི་རིགས་ཀྱི་ངོ་བོར་བསྒྱུར་ཟིན་པ་ཞིག་ཡིན་པ་མ་ཟད། ཁུལ་དེའི་དཔོན་རིགས་རྣམས་མི་རིགས་་གཞན་ལ་སྡང་ཟུག་དང་དྲག་གནོན་བྱེད་རྒྱུར་ཡ་ང་སྙིང་རྗེ་བྲལ་བ་ཞིག་ཡིན་པ་དང་།  ཝང་དབྱིང་ཅི་ཡིས་བོད་ཁུལ་དུ་ལོ་ངོ་སུམ་ཅུ་ལྷག་ལ་ལས་ཀ་བྱས་པའི་ཁྲོད་ནས་དྲག་གནོན་སྲིད་བྱུས་ལག་བསྟར་བྱས་པ་མངོན་གསལ་ཡིན་པ་ལས། བོད་སྐད་བོད་ཡིག་ཚིག་གཅིག་ཀྱང་མི་ཤེས་བའི་དཔོན་རིགས་ཆགས་ཡོད་པར་འགྲེལ་བརྗོད་གནང་སོང་།ཁ་སང་ཝང་ཅུན་ཀྲེང་བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་འགོ་ཁྲིད་དུ་བསྐོ་བཞག་བྱས་པའི་མཛད་སྒོའི་སྟེང་ཁོས་གཏམ་བཤད་སྤེལ་བའི་ནང་དུ། ཞི་ཅིན་ཕིང་གི་བོད་ཀྱི་ལས་དོན་སྐོར་ལ་སྤེལ་བའི་བསམ་བློའི་མཛུབ་སྟོན་གྱི་འོག་ནས།  བོད་ཁུལ་དུ་རྒྱ་ནག་དམར་གཞུང་གི་འཐབ་བྱུས་བཀོད་སྒྲིག་ལག་བསྟར་བྱས་ཏེ་སྤྱི་ཚོགས་བརྟན་བརླིང་ལ་ཤུགས་སྣོན་དང་། ཏཱ་ལའི་ཁ་བྲལ་ལ་རྒོལ་རྡུང་དང་བོད་ནང་གི་ཆོས་ལུགས་ལས་དོན་ཁྲིམས་ལྟར་ལག་བསྟར། དེ་བཞིན་མཐའ་མཚམས་ས་ཁུལ་ལ་འཛུགས་སྐྲུན་གསར་རྒྱག་ལ་ཤུགས་སྣོན་བྱེད་རྒྱུ་ཡིན་པར་བསྒྲགས་འདུག རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་གིས་བོད་ས་བཙན་བཟུང་བྱས་ནས་མི་ལོ་༦༠ ལྷག་འགྲོ་བཞིན་ཡོད་ཀྱང་། ད་ལྟའི་བར་དུ་བོད་མི་ཞིག་བོད་རང་སྐྱོང་ལྗོངས་ཀྱི་འགོ་ཁྲིད་དུ་བསྐོ་བཞག་བྱེད་མ་ཐུབ་པ་དེ་ཡིས་རྒྱ་ནག་གིས་དུས་ལྟ་དའི་བར་དུ་བོད་མི་རྣམས་ཀྱི་ཡིད་སེམས་འགུག་ཐུབ་མེད་པ་ཞིག་ཡིན་པ་གསལ་སྟོན་བྱས་ཡོད་པ་ལུང་འདྲེན་གྱིས། རྒྱ་ནག་གིས་མུ་མཐུད་དུ་བོད་ཁུལ་དུ་དྲག་གནོན་གྱི་སྲིད་བྱུས་ལག་བསྟར་བྱེད་རྒྱུ་ཡིན་པ་མངོན་གསལ་གནང་འདུག རྩ་བའི་ཝང་ཅུན་ཀྲེང་ནི་ཕྱི་ལོ་༡༩༦༣ལོ་རྒྱ་ནག་ཧྲན་ཏུང་ལིན་ཞི་ཞེས་པར་སྐྱེས་པ་དང་།  ཕྱིས་སུ་ཧྲན་ཏུང་སློབ་ཆེན་གྱི་སྤྱི་ཚོགས་རིང་ལུགས་སྡེ་ཚན་དུ་སྤྱི་ཚོགས་རིང་ལུགས་ཆེད་ལས་སློབ་སྦྱོང་གནང་སྟེ་ཕྱི་ལོ་༡༩༨༧ལོ་ནས་དམར་ཤོག་ཚོགས་པའི་ཁྲོད་འཛུལ་ཞུགས་ཀྱིས་ལས་གནས་འདྲི་མིན་ཁྲོད་ལས་ཀ་བྱེད་མྱོང་མཁན་ཞིག་རེད་འདུག

རྒྱ་ནག་གཞུང་འབྲེལ་གྱི་ Global Times གསར་ཁང་གིས་གནས་ཚུལ་སྤེལ་བའི་ནང་དུ། རྒྱ་གར་གྱིས་འདི་ལོའི་ལོ་འགོ་ནས་བཟུང་མཐའ་དམག་གི་དཔུང་སྡེ་ཁག་ལ་བོད་སྐད་བོད་ཡིག་དང་བོད་ཀྱི་ས་གཤིས་སོགས་ཀྱི་སློབ་ཁྲིད་བྱེད་འཆར་ཡོད་པ་དེ་ནི། རྩོད་རྙོག་ཅན་གྱི་མཐའ་མཚམས་ཁག་ཏུ་དམག་སྡེ་ཡུན་གནས་ཡོང་རྒྱུར་དམིགས་པའི་སྲིད་བྱུས་ཤིག་ཡིན་པའི་དགག་གཞག་བྱས་འདུག གཞི་རྩའི་འདི་ལོའི་ལོ་འགོ་ནས་བཟུང་། རྒྱ་གར་གྱི་གསར་ལམ་ཁག་གིས་གནས་ཚུལ་སྤེལ་བའི་ནང་དུ་། སྔར་ལོ་ནས་རྒྱ་གར་བྱང་ཕྱོགས་ཀྱི་ལ་དྭགས་དང་འབྲས་ལྗོངས་སུ་འཁེལ་བའི་འཕགས་བོད་ས་མཚམས་སུ་རྒྱ་དཀར་ནག་གི་དམག་མིའི་བར་གདོང་ཐུག་གནད་དོན་རིམ་པ་བྱུང་ཡོད་པ་ལྟར། རྒྱ་གར་གྱིས་རྒྱ་ནག་གི་དྲིལ་བསྒྲགས་དང་ཤུགས་རྐྱེན་ལ་ཁ་གཏད་གཅོག་ཆེད་རྒྱ་གར་གྱི་མཐའ་དམག་ཚོས་བོད་ཀྱི་ལོ་རྒྱུས་དང་། རིག་གནས། སྐད་ཡིག་བཅས་སློབ་སྦྱོང་བྱེད་རྒྱུའི་ལས་གཞི་གསར་བ་ཞིག་འཛུགས་འཆར་ཡོད་པར་ཡོངས་གྲགས་གནང་ཡོད་པ་མ་ཟད། ། ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དང་ལྡི་ལི་མཐོ་སློབ་གྱི་ནང་ཆོས་སློབ་གཉེར་ཁང་། དེ་བཞིན་རྒྱ་གར་ལྷོ་ཕྱོགས་སུ་ཡོད་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་སོགས་རྒྱ་གར་གྱི་དམག་མིས་བོད་ཀྱི་ལོ་རྒྱུས་དང་སྐད་ཡིག་རིག་གནས་སློབ་སྦྱོང་བྱེད་སའི་ཁོངས་སུ་མིང་འདོན་བྱས་ཡོད་པ་རེད། སྐབས་དེར་རྒྱ་གར་གྱི་དམག་མི་ཞིག་གིས་གསར་ཁང་ལ་བརྗོད་པ་ལྟར་ན། རྒྱ་གར་གྱི་དམག་མི་རྣམས་པཱ་ཀི་སི་ཐན་ཀྱི་སྐོར་ལ་རྒྱུས་ལོན་ཟབ་མོ་ཡོད་ཀྱང་། རྒྱ་ནག་གི་སྐོར་སྤྱི་དང་སྒོས་སུ་རྒྱ་ནག་གི་བསམ་བློ་གཏོང་ཕྱོགས་བཅས་ལ་རྒྱུས་མངའ་ཡོད་མཁན་ཆེས་ཉུང་ཤོས་ཤིག་ལ་མེད་པ་མ་ཟད། བོད་ཀྱི་སྐོར་ལ་ཤེས་རྟོག་ཡོད་མཁན་དེ་བས་ཀྱང་མེད་སྟབས། ད་ཆ་རྒྱ་གར་གྱི་དམག་མི་རྣམས་ཀྱིས་བོད་ཀྱི་སྐད་ཡིག་རིག་གཞུང་དང་རྒྱལ་རབས་ལོ་རྒྱུས་བཅས་ལ་སློབ་སྦྱོང་བྱེད་རྒྱུ་གལ་ཆེན་ཡིན་སྐོར་དང་། མཐའ་མཚམས་ཀྱི་དམག་མི་རྣམས་ཀྱིས་བོད་སྐད་བོད་ཡིག་དང་རྒྱ་སྐད་རྒྱ་ཡིག་སོགས་ལ་སློབ་སྦྱོང་བྱས་ཏེ་དམིགས་བཀར་གྱིས་མཐའ་མཚམས་ཁག་གི་དམག་མིའི་ལས་གནས་སུ་ཡུན་རིང་བསྐོ་བཞག་བྱེད་རྒྱུ་ཡིན་པར་བརྗོད་འདུག རྒྱ་ནག་གི་འཐབ་བྱུས་ཉམས་ཞིབ་ཁང་གི་འབྲེལ་ཡོད་ཀྱི་ཉམས་ཞིབ་པ་ Qian ཟེར་བ་ཞིག་གིས་ Global Times གསར་ཁང་ལ་འགྲེལ་བརྗོད་བྱས་པའི་ནང་དུ། ཕྱོགས་གཉིས་ཀྱི་མཐའ་མཚམས་ཀྱི་ཁག་ཏུ་དཀའ་རྙོག་ཅན་གྱི་ས་ཁུལ་མང་པོ་ཡོད་སྟབས། རྒྱ་གར་གྱིས་དངོས་ཡོད་གནས་ཚུལ་གཞིར་བཞག་གིས་རྒྱ་ནག་ལ་ཁོང་ཁྲོ་སློང་བྱེད་ཀྱི་བྱ་བཞག་ཁག་མཚམས་འཇོག་མ་བྱས་པ་ཡིན་ན། ཕྱོགས་གཉིས་ཀྱི་མཐའ་མཚམས་ཁག་ཏུ་ཉེན་འཚབ་ཆེ་བའི་དོན་རྐྱེན་བྱུང་སྲིད་པའི་ཉེན་བརྡ་བཏང་པ་མ་ཟད། གཞན་ཡང་ཁོས། རྒྱ་ནག་གིས་ས་ཁོངས་བདག་དབང་སྲུང་སྐྱོབ་བྱེད་རྒྱུའི་ལངས་ཕྱོགས་བརྟན་པོ་ཡིན་པར་ལུང་འདྲེན་གྱིས། རྒྱ་གར་གྱིས་དྲག་ཆས་ཀྱི་རྣམ་འགྱུར་ལ་འགྱུར་བ་་མ་བཏང་བ་ཡིན་ན། རྒྱ་ནག་གིས་ལས་དོན་མཐའ་འཁྱོངས་མ་བྱས་པར་དུ་འཐབ་འཛིང་བྱེད་རྒྱུ་ཡིན་པར་བསྒྲགས་འདུག།གཞི་རྩའི་འདས་བའི་ལོ་འགའི་རིང་ནས་རྒྱ་ནག་གིས་རྒྱལ་ཁོངས་རྒྱ་བསྐྱེད་ཀྱི་སྲིད་བྱུས་ལག་བསྟར་གྱི་འོག་ནས་མཐའ་མཚམས་ཁག་ཏུ་གྲོང་ཚོ་གསར་འཛུགས་དང་འབྲོག་ཁྱིམ་གནས་སྤོར་གྱིས་ལས་གཞི་རྒྱ་བསྐྱེད་ཀྱིས། ཕྱོགས་ཡོངས་ནས་བོད་ཀྱི་མཐའ་མཚམས་ཁག་ཏུ་མ་དངུལ་མང་པོ་ཆེད་གཏོང་གིས་འཛུགས་སྐྲུན་གྱི་ལས་གཞི་སྣ་མང་སྤེལ་བཞིན་པ་མ་ཟད། བོད་དམག་བསྡུ་རུབ་ཀྱིས་ས་བབ་མཐོ་ཞིང་གནམ་གཤིས་འཁྱགས་པའིི་འཕགས་བོད་མཐའ་མཚམས་སུ་བོད་ཀྱི་ཡུལ་དམག་གསར་འཛུགས་བྱེད་བཞིན་པའི་གནས་ཚུལ་རིམ་ཕྱིར་ཐོན་ཡོད་དང་། ད་ཆ་རྒྱ་གར་གྱི་ཕྱོགས་ནས་ཀྱང་མཐའ་དམག་གི་ཁྲོད་དུ་བོད་ཀྱི་ས་གཤིས་དང་བོད་སྐད་བོད་ཡིག་ཤེས་ཀྱི་སློབ་ཁྲིད་ཀྱིས་ཕྱོགས་ཡོངས་ཀྱི་གནས་ཚུལ་མཁོ་བསྡུ་དང་རྒྱུས་ལོན་བྱེད་རྒྱུར་གྲོས་བསྡུར་གནང་མུས་ཡིན་པ་རེད།

ཡུ་རོབ་སྤྱི་མཐུན་ལྷན་ཚོགས་ཀྱི་གཙོ་འཛིན་སྐུ་ཞབས་Charles Michel ལགས་ཀྱིས་དེ་རིང་ཞལ་པར་བརྒྱུད་ནས་རྒྱ་ནག་གི་སྲིད་འཛིན་ཞི་ཅིན་ཕིང་དང་ལྷན་དུ་རྒྱ་ནག་ནང་གི་འགྲོ་བ་མིའི་ཐོབ་ཐང་དང་ཚོང་དོན་སོགས་ཀྱི་གནད་དོན་ཁག་གཅིག་གི་སྐོར་ནས་གླེང་མོལ་བྱེད་རྒྱུ་རེད་འདུགགཞི་རྩའི་རྒྱ་ནག་དང་ཡུ་རོབ་གཉིས་ཀྱི་ད་ལྟའི་འབྲེལ་ལམ་དེ་དངངས་འཚབ་རང་བཞིན་གྱི་ངང་གནས་ཡོད་པ་མ་ཟད། རྒྱ་ནག་གིས་ཡུ་གུར་མི་རིགས་ཀྱི་གཙོ་བྱས་པའི་རྒྱ་ནག་གི་དབང་བསྒྱུར་འོག་གི་གྲངས་ཉུང་མི་རིགས་ཁག་ལ་དྲག་གནོན་གྱི་སྲིད་བྱུས་ལག་བསྟར་བྱེད་བཞིན་པ་དང་འབྲེལ་ནས། ཡུ་རོབ་རྒྱལ་ཁབ་ཁག་གཅིག་གིས་སྒྲིག་འཛུགས་དེའི་ངོས་ནས་རྒྱ་ནག་དང་འབྲེལ་ལམ་མཁྲེགས་འཛིན་བྱེད་དགོས་བའི་སྐུལ་མ་རིམ་པར་བཏང་ཡོད་པ་རེད། མཚན་གསལ་བོ་མ་གནང་བའི་ཡུ་རོབ་མཐུན་ཚོགས་ཀྱི་ཕྱི་འབྲེལ་མི་སྣ་ཞིག་གིས Politico གསར་ལམ་ལ་འགྲེལ་བརྗོད་གནང་དོན་ལྟར་ན། ཡུ་རོབ་སྤྱི་མཐུན་ལྷན་ཚོགས་ཀྱི་གཙོ་འཛིན་སྐུ་ཞབས་Charles Michel ལགས་ཀྱིས་ཐེངས་འདིར་རྒྱ་ནག་གི་སྲིད་འཛིན་ཞི་ཅིན་ཕིང་དང་ལྷན་དུ་བཀའ་མོལ་གནང་བའི་སྐབས་སུ་རྒྱ་ནག་གིས་ཤིན་ཅང་ནང་གི་མང་ཚོགས་ལ་ངལ་རྩོལ་བསྒྱུར་བཀོལ་བྱས་པའི་གནད་དོན་དང་འབྲེལ་ནས་ཕྱོགས་གཉིས་ཀྱིས་འབྲེལ་ཡོད་ཀྱི་དཔོན་རིགས་ཁག་རྒྱལ་ཁོངས་སོ་སོར་འགྲོ་སྐྱོད་བཀག་སྡོམ་བྱས་པའི་གནད་དོན་དེར་བསྐྱར་དུ་བསམ་གཞིགས་བྱེད་དགོས་བའི་སྐུལ་མ་གནང་རྒྱུ་ཡིན་པ་དང་། ཡུ་རོབ་ཀྱི་ཕྱི་འབྲེལ་མི་སྣ་གཞན་ཞིག་གིས་ཐེངས་འདིར་ཁ་པར་བརྒྱུད་ནས་རྒྱལ་ཁབ་ཕྱོགས་གཉིས་ཀྱི་གླེང་མོལ་དེ་ཡིས་ཡུ་རོབ་རྒྱལ་ཁབ་ཀྱིས་འཐབ་བྱུས་ལྡན་པའི་རང་སྐྱོང་གི་གནས་བབ་ཐོག་ནས་རྒྱ་ནག་དང་ལྷན་དུ་སྲིད་བྱུས་གསར་བ་ཞིག་ཆེད་བཟོ་བྱེད་དགོས་གལ་ཡིན་པ་གསལ་སྟོན་གནང་གི་ཡོད་སྐོར་གསུངས་འདུག་ཀྱང་། སྐུ་ཞབས་Michelལགས་ཀྱི་མགྲིན་ཚབ་པས་དེར་འབྲེལ་གྱི་གནད་དོན་ཐད་ནས་གསར་ལམ་ཁག་གི་བཅར་འདྲི་དང་ལེན་བྱས་མེད་པ་རེད་འདུག ཡུ་རོབ་གྲོས་ཚོགས་ཀྱི་འཐུས་མིའི་ཁྲོད་ཀྱི་རྒྱ་ནག་གི་ལས་དོན་དང་འབྲེལ་བའི་འགོ་ཁྲིད་དང་རྒྱ་ནག་གི་སྲིད་དོན་ཉེས་ཆད་ཕོག་སའི་ཁོངས་སུ་ཡོད་པ་། སྐུ་ཞབས་Reinhard Bütikofer ལགས་ཀྱིས་ཐེངས་འདིར་རྒྱལ་ཁོངས་གཉིས་ཀྱི་དབུ་འཁྲིད་དབར་གྱི་ཞལ་པར་གྱི་གླེང་མོལ་དེ་ནི་ཁ་ཕྱོགས་ལེགས་པོ་ཞིག་ཡིན་པར་འགྲེལ་བརྗོད་ཀྱིས། ད་ཆ་རྒྱ་ནག་གིས་བསླབ་བྱ་གསར་བ་ཞིག་ཤེས་རྟོགས་བྱུང་བར་འགོ་ཚུགས་པ་ཞིག་ཡིན་པར་བརྗོད་དེ། རྒྱ་ནག་གིས་ཡུ་རོབ་མཐུན་ཚོགས་ཀྱི་མངའ་ཁོངས་ཀྱི་རྒྱལ་ཁབ་བྱེ་བྲག་པའི་འགོ་ཁྲིད་རྐྱང་པར་སྐད་ཆ་བཤད་པ་ཙམ་གྱིས་ཕྱོགས་གཉིས་ཀྱི་འབྲེལ་ལམ་ལ་འཕེལ་རྒྱས་འབྱུང་ཐབས་མེད་པར་བསྒྲགས་འདུགགཞི་རྩའི་ཉེ་བའི་ལོ་ཤས་ཁྲོད་ཨ་རི་དང་རྒྱ་ནག་གཉིས་དབར་གྱི་འབྲེལ་ལམ་ཁྲོད་དུའང། ཚོང་འབྲེལ་དང་འཕྲུལ་ལས། འགྲོ་བ་མིའི་ཐོབ་ཐང་གི་གནད་དོན། དེ་བཞིན་ཏོག་དབྱིབས་ཀྱི་འབྱུང་ཁུངས་སོགས་ཀྱི་གནད་དོན་མང་དག་ཅིག་གི་ཐོག་དཀའ་ངལ་རིམ་པ་འཕྲད་པ་དང་། ཟླ་བ་འདིའི་ཟླ་འགོར་སུད་སི་གྲོང་ཁྱེར་ཛུ་རིག་ཏུ་ཨ་རིའི་རྒྱལ་སྲུང་སློབ་སྟོན་པ་ Jake Sullivan ལགས་དང་རྒྱ་ནག་ཕྱི་འབྲེལ་ལས་ཁང་གི་འགན་འཛིན yang Jiechiགཉིས་དངོས་སུ་ཐུག་འཕྲད་ཀྱིས་ཕྱོགས་གཉིས་ཀྱི་འབྲེལ་ལམ་གཙོས་རྒྱ་ནག་གི་བོད་དང་ཐེ་ཝན། ཧོང་ཀོང་། ཤིན་ཅང་བཅས་ཀྱི་ཐོག་འཛིན་པའི་སྲིད་བྱུས་བཅས་ཀྱི་ཐོག་ལ་གོ་བསྡུར་གནང་བ་མ་ཟད། ལྷག་པར་འདི་ལོའི་ལོ་མཇུག་ཏུ་ཨ་རིའི་སྲིད་འཛིན་བྷ་ཊན་མཆོག་དང་རྒྱ་ནག་གི་སྲིད་འཛིན་ཞི་ཅིན་ཕིང་རྣམ་གཉིས་དབར་དྲ་ཐོག་བརྒྱུད་མཇལ་མོལ་གནང་རྒྱུའི་ཐད་གོ་བསྡུར་གནང་ཡོད་པ་དང་། ཕྱོགས་གཉིས་ཀྱི་དཔོན་རིགས་ཀྱི་མཇལ་མོལ་ཁྲོད་གོ་ལའི་གནམ་གཤིས་འགྱུར་ལྡོག་གི་གནད་དོན་དང་ཐེ་ཝན་གཙོས་ཕྱོགས་གཉིས་ཀྱི་འབྲེལ་ལམ་ཐད་ཉེན་ཁ་རིགས་འབྱུང་བའི་གནད་དོན་ལ་གོ་བསྡུར་གནང་རྒྱུ་ཡིན་པར་བསྒྲགས་ཡོད་པ་རེད།

ཨ་རིས་བཟོ་བསྐྲུན་བྱས་ཤིང་རྒྱལ་སྤྱིའི་ཐོག་སྐད་གྲགས་ཆེ་བའི་སྤྱི་ཚོགས་དྲ་རྒྱའི་གླེང་སྟེགས་ LinkedIn ཞེས་པ་དེ་རྒྱ་ནག་གཞུང་གི་གཏན་འབེབས་བྱས་པའི་དྲ་རྒྱའི་ཁྲིམས་སྒྲིག་གི་འགོག་རྐྱེན་དང་། བདེ་འཇགས་ཀྱི་གནད་དོན་སོགས་ལ་གཞིགས་ཏེ་རྒྱ་ནག་ནང་གླེང་སྟེགས་དེ་སྒོ་རྒྱག་རྒྱུ་རེད་འདུགདེ་རིང་བརྒྱུད་ལམ་ཁག་གི་ཐོག་གནས་ཚུལ་སྤེལ་བར་གཞིགས་ན། ཨ་རིའི་སྤྱི་ཚོགས་དྲ་རྒྱའི་གླེང་སྟེགས་ LinkedIn ཞེས་པ་བདེ་འཇགས་ཀྱི་གནད་དོན། ལྷག་པར་དུ་གླེང་སྟེགས་དེ་བེད་སྤྱོད་བྱེད་མཁན་གྱི་མང་ཚོགས་རྣམས་ཀྱི་སྒེར་གྱི་གནད་དོན་སྲུང་སྐྱོབ་གནང་རྒྱུ་སོགས་ལ་དམིགས་ཏེ་རྒྱ་ནག་གི་ཁྲོམ་རའི་ནང་ནས་ཕྱིར་འཐེན་གནང་དགོས་བྱུང་ཡོད་སྐོར་སོགས་བཀོད་འདུག་ལ། LinkedIn སྤྱི་ཚོགས་དྲ་རྒྱའི་གླེང་སྟེགས་ཀྱི་འགན་འཛིན་གཞོན་པ་ Mohak Shroff ལགས་ནས། གླེང་སྟེགས་འདི་རྒྱ་ནག་ནང་ལ་ཚད་དང་ལྡན་པ་ཞིག་བེད་སྤྱོད་ཐུབ་རྒྱུར་རྒྱ་ནག་གཞུང་གི་གཏན་འབེབས་བྱས་པའི་དྲ་རྒྱ་དང་འབྲེལ་བའི་ཁྲིམས་སྒྲིག་ནང་གི་ཆ་རྐྱེན་ཁག་དང་། སྤྱི་ཡོངས་ཀྱི་དྲ་རྒྱ་དང་འབྲེལ་བའི་ཁྲོམས་རའི་ཁོར་ཡུག་གི་གནས་བབ་སོགས་ཀྱི་ཐད་ནས་དཀའ་ངལ་མང་དག་ཅིག་འཕྲད་བཞིན་ཡོད་སྟབས། ལོ་འདིའི་ལོ་མཇུག་ཏུ་གླེང་སྟེགས་འདི་རྒྱ་ནག་ནང་སྒོ་རྒྱག་རྒྱུ་ཡིན་ཞེས་གསུངས་པ་དང་ཆབས་ཅིག རྒྱ་ནག་ནང་གི་ཚོང་པ་དང་ལས་ཀ་འཚོལ་མཁན་ཚོ་ལ་དམིགས་ཏེ་ InJobs ཞེས་པའི་མཉེན་ཆས་ཤིག་གསར་སྐྲུན་གནང་འཆར་ཡོད་པ་གསུངས་འདུག རྩ་བའི་ LinkedIn སྤྱི་ཚོགས་དྲ་རྒྱའི་གླེང་སྟེགས་འདི་ཐོག་མར་ཕྱི་ལོ་ ༢༠༠༣ གི་ལོ་ལ་ཨ་མི་རི་ཀའི་དྲ་རྒྱའི་ཆེད་ལས་པ་ Reid Hoffman ལགས་ཀྱིས་གསར་སྐྲུན་གནང་སྟེ་ནུབ་ཕྱོགས་རྒྱལ་ཁབ་ཁག་གཙོ་བོར་གྱུར་བའི་རྒྱལ་སྤྱིའི་ཡུལ་གྲུ་འདྲ་མིན་ནང་གི་ཆེད་ལས་མི་སྣ་དང་མང་ཚོགས་མི་ཉུང་བ་ཞིག་ནས་རང་ཉིད་ཀྱི་ངོ་སྤྲོད་སྤེལ་ས་དང་ལས་ཀའི་གོ་སྐབས་འཚོལ་སའི་གླེང་སྟེགས་ཆེ་གྲས་ཤིག་ཏུ་གྱུར་ཏེ་ལོ་ངོ་བཅུ་ལྷག་སོང་བའི་མཚམས་སུ་ Microsoft ཚོང་ལས་ཁང་ནས་གླེང་སྟེགས་དེའི་བདག་དབང་ཨ་སྒོར་ཐེར་འབུལ་ ༢༦ སྤྲད་དེ་ཉོས་ཡོད་པ་དང་། གླེང་སྟེགས་འདི་བཞིན་རྒྱ་ནག་གི་ཁྲོམ་རའི་ནང་ལ་ཐོག་མར་ ༢༠༡༤ ལོར་འཛུལ་ཞུགས་བྱས་ཏེ་ད་ཆ་ལོ་ངོ་ ༧ ཙམ་ལས་འགྲོ་གི་མེད་པ་མ་ཟད། གླེངས་སྟེགས་འདི་ནི་རྒྱ་ནག་ནང་ཡོད་པའི་ཨ་རིའི་སྤྱི་ཚོགས་དྲ་རྒྱའི་གླེང་སྟེགས་གཅིག་པོ་དེ་ཡང་ཆགས་ཀྱི་ཡོད་པ་རེད།གླེང་སྟེགས་འདི་ཐོག་མར་རྒྱ་ནག་གི་ཁྲོམ་རའི་ནང་འཛུལ་སྐབས་རྒྱ་ནག་གཞུང་གིས་བཏོན་པའི་དོན་ཚན་ཁག་ཅིག་གི་ཐོག་ལ་ཁས་ལན་བྱས་ཡོད་པ་དང་། གླེང་སྟགས་ཀྱི་འབྲེལ་ཡོད་རྣམས་ནས་ཕྱོགས་གཉིས་དབར་གན་ཡིག་འཇོག་སྐབས་ཕྱི་གསལ་གང་གསལ་བྱེད་རྒྱུའི་དོན་ཚན་དེ་བློས་གཏོང་གནང་མེད་ཅེས་འགྲེལ་བརྗོད་གནང་བཞིན་ཡོད་ཀྱང་། ཉེ་བའི་དུས་སུ་ LinkedIn སྤྱི་ཚོགས་དྲ་རྒྱའི་གླེང་སྟེགས་ཐོག་རྒྱ་ནག་གཞུང་གིས་བོད་མིར་དྲག་གནོན་བྱེད་སྟངས་སྐོར་གནས་ཚུལ་སྤེལ་མཁན་གསར་འགོད་པ་ Greg Bruno ལགས་གཙོས་པའི་གཞན་ཁག་ཅིག་གི་དྲ་བྱང་བཀག་སྡོམ་བྱས་པའི་གནས་ཚུལ་ཐོན་སྐབས། རྒྱལ་སྤྱིའི་གསར་འགོད་པ་ཙམ་མ་ཟད། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Rick Scott ལགས་སོགས་ནས་ LinkedIn སྤྱི་ཚོགས་དྲ་རྒྱའི་གླེང་སྟེགས་ངོས་ནས་རྒྱ་གཞུང་གི་དགོས་འདུན་སྒྲུབ་བཞིན་འདུག་ཅེས་སྐྱོན་བརྗོད་ནནས་པོ་བྱས་པའི་གནང་སྟངས་ཡང་བྱུང་ཡོད། དཔྱད་ཞིབ་པ་རྣམས་ནས་ད་རེས་རྒྱ་ནག་ནང་ཡོད་པའི་ཨ་རིའི་སྤྱི་ཚོགས་དྲ་རྒྱའི་གླེང་སྟེགས་གཅིག་པོ་དེ་ཡང་སྒོ་བརྒྱབ་པ་དེ་ཕྱོགས་ནས་རྒྱ་ནག་གཞུང་གི་དྲ་རྒྱའི་ཐོག་སྟངས་འཛིན་དང་དམ་དྲགས་བྱེད་བཞིན་པའི་དབང་གིས་རྒྱ་ནག་ནང་ཚོང་ལས་ཡག་པོ་ཡོང་གི་མེད་པ་དང་། ཕྱོགས་གཞན་ཞིག་ནས་གླེང་སྟགས་སྟེགས་འདིས་རྒྱ་ནག་ལ་བསྟུན་མཁས་བྱེད་རྒྱུ་མང་དྲག་པའི་དབང་གིས་ཨ་རིའི་གཞུང་ནས་ནས་ཀྱང་ཕྱིར་འཐེན་བྱེད་དགོས་པའི་གནོན་ཤུགས་སྤྲད་ཡོད་སྲིད་པ་རེད་ཅེས་གསུངས་བཞིན་འདུག གཞི་རྩའི་དུས་རྒྱུན་ནས་རྒྱ་ནག་གཞུང་གིས་རྒྱལ་ཁབ་ཀྱི་བདེ་འཇགས་སོགས་ཀྱི་མིང་བྱང་འོག་རྒྱ་ནག་ནང་ཡོད་པའི་ཕྱིའི་ཚོང་ལས་སྡེ་ཚན་དང་གཞུང་འབྲེལ་མ་ཡིན་པའི་ཚོགས་པ་ཁག་གི་ལས་དོན་ལ་དམ་དྲགས་སྣ་ཚོགས་ཤིག་བྱེད་བཞིན་ཡོད་སྟབས། འདས་པའི་ལོ་དུས་ནང་ལ་ཨ་རིའི་སྤྱི་ཚོགས་དྲ་རྒྱའི་གླེང་སྟགས་ Twitter དང་ངོ་དེབ་ཀྱང་རྒྱ་ནག་བེད་སྤྱོད་མི་ཐུབ་པར་བཟོས་པ་མ་ཟད། Google ཚོང་ལས་སྡེ་ཚན་ཀྱང་འདི་ལོ་རྒྱ་ནག་གི་ཁྲོམ་ར་ནས་ཕྱིར་འཐེན་བྱེད་དགོས་བྱུང་ཡོད་པ་རེད།  

ཉེ་ཆར་རེ་གཟའ་ཉི་མའི་ཉིན་རྒྱ་གར་བྱང་ཕྱོགས་ལ་དྭགས་དང་བོད་གཉིས་ཀྱི་ས་མཚམས་ས་ཁུལ་ Moldo ཞེས་པ་དེར་རྒྱ་དཀར་ནག་གཉིས་ཀྱི་དམག་མིའི་འགོ་ཁྲིད་དབར་རྒྱལ་ཁབ་ཕྱོགས་གཉིས་དབར་འཕྲད་བཞིན་པའི་མཐའ་མཚམས་ཀྱི་གནད་དོན་ཁག་སེལ་ཐབས་དང་འབྲེལ་བའི་གྲོས་མོལ་ཐེངས་ ༡༣ པ་དེ་གནང་ཡོད་ཀྱང་། མཐའ་མཚམས་དང་འབྲེལ་བའི་དཀའ་རྙོག་ཁག་སེལ་ཐབས་ཀྱི་ཐབས་ལམ་ཞིག་གི་ཐོག་ལ་འབབ་ཐུབ་མེད་པ་རེད།གནད་དོན་དེ་དང་འབྲེལ་བདེ་འཇགས་དང་ཐབས་བྱུས་ཐོག་དཔྱད་ཞིབ་གནང་མཁན་རྒྱ་གར་གྱི་རྐང་དམག་སྡེ་ཚན་གྱི་དམག་སྤྱི་ཟུར་པ་སྐུ་ཞབས་ S B Asthana ལགས་ནས་ FirstPost གསར་ཁང་གི་དྲ་གནས་ཐོག་དཔྱད་གཏམ་ཞིག་འདོན་སྤེལ་གནང་སྟེ། ད་རེས་རྒྱ་དཀར་ནག་གཉིས་དབར་གྱི་གྲོས་མོལ་ཐེངས་ ༡༣ པ་དེར་གྲུབ་འབྲས་ཤིག་ཐོན་ཐུབ་མེད་པ་དེ་ལ་ཧང་སང་དགོས་དོན་གང་ཡང་མེད་པ་དང་། དེ་ཡང་གྲོས་མོལ་དེ་འགོ་འཛུགས་མ་བྱས་པའི་གོང་ཙམ་དུ་རྒྱ་ནག་ཕྱོགས་ནས་རྒྱ་གར་གྱི་ Uttarakhand དང་ཨ་རུ་ན་ཅན་མངའ་སྡེའི་ས་ཁུལ་ཁག་ཅིག་ཏུ་བཙན་འཛུལ་བྱས་པའི་བྱ་སྤྱོད་དང་། དེ་བཞིན་འཕགས་བོད་གཉིས་ཀྱི་ས་མཚམས་ཁག་ཏུ་གྲོང་སྡེ་གསར་རྒྱག་བྱེད་བཞིན་པའི་གནས་སྟངས་ཁག་ལ་ལྟ་སྐབས་རྒྱ་ནག་ཕྱོགས་ནས་མཐའ་མཚམས་ཀྱི་གནད་དོན་དེ་ཞི་འགྲིག་ཡོང་རྒྱུར་འདོད་པ་རྩ་བ་ནས་མེད་པ་གསལ་པོ་རེད་ཅེས་བཀོད་འདུགམ་ཟད་ཁོང་ནས་རྒྱ་ནག་གཞུང་གི་ཆབ་སྲིད་ཀྱི་དམིགས་ཡུལ་གཙོ་བོ་ཞིག་ནི་རྒྱ་ནག་རྒྱལ་ཁབ་དེ་ཨེ་ཤ་ཡའི་ནང་གི་དབང་ལྡན་རྒྱལ་ཁབ་ཅིག་ཏུ་འགྱུར་རྒྱུ་དེ་ཡིན་པ་དེ་ལྟར་ཡང་། རྒྱ་ནག་གཞུང་ལ་སེམས་འཚབ་ཅིག་ཡོད་པ་ནི་རྒྱ་གར་ཕྱོགས་ནས་རྒྱ་ནག་ལ་སྒུར་མིན་དང་། ལྷག་པར་དུ་ལ་དྭགས་ཀྱི་ཤར་ངོས་སུ་ཡོད་པའི་རྒྱ་གར་གྱི་ས་གནས་དེ་དག་རྒྱ་ནག་གི་དམིགས་ཡུལ་སྒྲུབ་རྒྱུའི་ཐབས་བྱུས་དང་འབྲེལ་བའི་ས་ཚིགས་གལ་ཆེན་པོ་ཞིག་ཆགས་ཀྱི་ཡོད་སྟབས་ས་ཁུལ་དེ་དག་གི་བདག་དབང་ཐོག་མུ་མཐུད་རྩོད་བཞིན་ཡོད་པ་སོགས་འགྲེལ་བརྗོད་བྱས་འདུགལྷག་པར་དུ་ཁོང་གི་དཔྱད་གཏམ་དེའི་ནང་ལ་རྒྱ་གར་གཞུང་གི་ངོས་ནས་དོ་སྣང་བྱེད་པའི་དོན་ཚན་ཁག་ཅིག་གསལ་འདོན་གནང་པའི་ནང་ལ། རྒྱ་གར་གཞུང་ནས་རྒྱལ་ཁབ་ཀྱི་ཐབས་བྱུས་ཁག་ཡོངས་གྲགས་བྱེད་ཀྱི་མེད་ཀྱང་། འདས་པའི་ལོ་ངོ་བཅུ་ཕྲག་འགའི་རིང་ལ་རྒྱ་གར་གཞུང་ནས་རྒྱ་ནག་ལ་གདོང་ལེན་བྱེད་སྐབས་རྒྱ་ནག་གཞུང་ལ་ཕོག་ཐུགས་རིགས་རྩ་བ་ནས་མི་གཏོང་རྒྱུ་དེ་ནི་འཐབ་ཇུས་ཀྱི་རྨང་གཞི་གཙོ་བོ་དེ་ཟིན་ཡོད་པ་གསལ་པོ་ཡིན་སྟབས། འཐབ་ཇུས་ཀྱི་རྨང་གཞིའི་དེའི་འོག་ནས་ད་བར་རྒྱ་གར་ལ་ཁེ་ཕན་གང་ཡང་བྱུང་མེད་པ་མ་ཟད། རྒྱ་ནག་ཕྱོགས་ནས་ཀྱང་དེར་ཆ་འཇོགས་རྩབ་ནས་བྱས་མེད་པ་རེད་ཅེས་གསུངས་པ་དང་ཆབས་ཅིག་རྒྱ་གར་ངོས་ནས་རྒྱ་ནག་དང་འབྲེལ་བ་བྱེད་སྐབས་གྲོས་མོལ་གྱི་འཐབ་བྱུས་ཙམ་མིན་པར། བོད་དང་ཧོང་ཀོང་། དེ་བཞིན་ཤིན་ཅང་བཅས་ཀྱི་བདག་དབང་གི་གནད་དོན་ཐོག་འདྲི་རྩད་བྱེད་དགོས་ཀྱི་རེད་ཅེས་གསུངས་འདུག མ་ཟད་ཁོང་ནས་ད་བར་རྒྱ་གར་ཕྱོགས་ནས་བོད་དང་ཤིན་ཅང་། ཧོང་ཀོང་བཅས་ཀྱི་གནད་དོན་དངོས་སུ་གླེང་སློང་མ་བྱས་ཀྱང་རྒྱ་ནག་ཕྱོགས་ནས་Kashmir གི་གནད་དོན་བེད་སྤྱོད་བྱས་ཏེ་རྒྱ་གར་འདི་བཞིན་རྒྱལ་ཚོགས་ཀྱི་བདེ་འཇགས་ཚོགས་མིའི་ཁོངས་སུ་ཚུད་རྒྱུར་འགོག་རྐྱེན་སྣ་ཚོགས་བཟོས་ཡོད་པ་ལུང་འདྲེན་དང་སྦྲགས། རྒྱ་གར་གཞུང་ནས་རྒྱལ་ཁབ་ཀྱི་བདེ་འཇགས་དང་ཐབས་བྱུས་ཀྱི་གནད་དོན་ཐོག་ལ་བསམ་བློ་གསར་པ་ཞིག་གཏོང་རྒྱུ་གལ་ཆེན་པོ་ཡིན་པ་དང་། དེ་ཡང་རྣམ་འགྱུར་ཙམ་མིན་པར། དགོས་ངེས་བྱུང་ན་རྒྱ་གཞུང་གི་འཐབ་བྱུས་དང་འབྲེལ་བའི་ས་ཚིགས་ཁག་ལ་བཙན་འཛུལ་བྱེད་དགོས་པ་ཡང་གསུངས་འདུགདེ་བཞིན་རྒྱ་ནག་གི་བྱེད་བབ་ལ་གཞིགས་ན་རྒྱ་ནག་རང་ཉིད་ཀྱི་དམིགས་ཡུལ་མ་འགྲུབ་ཀྱི་བར་དུ་མཐའ་མཚམས་ཀྱི་གནད་དོན་ཞི་འགྲིག་ཡོང་རྒྱུར་གྲ་སྒྲིག་མེད་སྟབས། རྒྱ་གར་ངོས་ནས་ཀྱང་དེ་མཚུངས་ཀྱིས་རང་ས་སྲུང་སྐྱོབ་དང་འབྲེལ་བའི་འཛུགས་སྐྲུན་གྱི་ལས་གཞི་བརྒྱུད་མཐའ་མཚམས་ཁག་ཏུ་ཡོད་པའི་ཡུལ་མི་ཚོར་འཚོ་བའི་རོགས་རམ་གང་ཐུབ་གནང་དགོས་པ་དང་། དམག་དོན་དང་འབྲེལ་བའི་དམག་སྡེ་སྤྱི་དང་། ལྷག་པར་དུ་རྒྱ་ནག་གཞུང་ནས་མཚོ་ཐོག་ཏུ་དམག་དང་འབྲེལ་བའི་ལས་དོན་སྤེལ་བཞིན་པ་ཁག་ལ་གདོང་ལེན་གྱི་ལས་གཞི། དེ་བཞིན་མང་གཙོའི་རྒྱལ་ཁབ་གཙོས་པའི་མཐུན་ཕྱོགས་ཀྱི་རྒྱལ་ཁབ་ཁག་དང་ཟུང་འབྲེལ་ཐོག་རྒྱ་ནག་ལ་གདོང་ལེན་བྱེད་རྒྱུའི་འཐབ་བྱུས་གཏན་འབེབས་ཀྱི་ལས་དོན་རྣམས་སྔ་ས་ནས་གྲ་སྒྲིག་བྱེད་དགོས་པ་སོགས་གསུངས་འདུག གཞི་རྩའི་ལོ་གཅིག་ཙམ་གྱི་གོང་ལ་ལ་དྭགས་སྤང་གོང་མཚོའི་ཁུལ་དུ་རྒྱ་དཀར་ནག་གཉིས་ཀྱི་མདག་མིའི་དབར་མཐའ་མཚམས་ཀྱི་གནད་དོན་དང་འབྲེལ་གདོང་ཐུག་རིམ་པ་བྱུང་ཡོད་པ་དང་། སྐབས་དེར་ཕྱོགས་གཉིས་ཀྱི་དམག་མིའི་འགོ་ཁྲིད་དབར་གྲོས་མོལ་ཐེངས་ ༡༢ ཙམ་གནང་པའི་རྗེས་སུ་སྤང་གོང་དང་ Gogra ཁུལ་གྱི་གནད་དོན་སེལ་ཐུབ་ཙམ་བྱུང་ཡོད་ཀྱང་། Depsang དང་བདེན་མཆོག་གཙོས་པའི་ཨ་རུ་ན་ཅལ་མངལ་ཁུལ་གྱི་རྩོད་རྙོག་ཁག་ད་ལྟ་ཡང་ཞི་འགྲིག་ཡོང་མེད་པ་རེད། ཐེངས་འདིའི་གྲོས་མོལ་ ༡༣ མཇུག་སྒྲིལ་མཚམས་སུ་རྒྱ་ནག་གི་དམག་ཁུལ་གྱི་མགྲིན་ཚབ་པ་ཞིག་ནས་རྒྱ་གར་ཕྱོགས་ནས་དངོས་ཡོད་གནས་སྟངས་དང་མི་འཚམས་པའི་རེ་བ་ཁག་ཅིག་མུ་མཐུད་བཏོན་ཏེ་གྲོས་མོལ་ལམ་ལྷོང་ལྡན་པ་ཞིག་འགྲོ་བཅུག་མ་སོང་ཞེས་བཤད་འདུག་ཀྱང་། རྒྱ་གར་བདེ་སྲུང་ལས་ཁུངས་ཀྱི་ངོས་ནས། རྒྱ་གར་ཕྱོགས་ནས་དཀའ་རྙོག་སེལ་ཐབས་ཀྱི་ཐབས་ལམ་ཡང་དག་ཁག་ཅིག་བཏོན་ཡོད་ཀྱང་། རྒྱ་ནག་ཕྱོགས་ནས་དེར་ངོས་ལེན་མ་བྱས་པ་མ་ཟད། དཀའ་རྙོག་དེ་དག་སེལ་ཐབས་ཀྱི་ཐབས་དང་འབྲེལ་བའི་བསམ་འཆར་ཞིག་ཀྱང་སྟོན་རྒྱུ་མི་འདུག་ཅེས་གསུངས་ཡོད། གཞི་རྩའི་རྒྱ་ནག་གཞུང་ནས་བོད་དང་ས་འབྲེལ་ཡོད་པའི་རྒྱ་གར་གྱི་ས་ཁུལ་འདྲ་མིན་ཐོག་བཙན་འཛུལ་བྱས་ཏེ་ས་ཁུག་དེ་དག་གི་བདག་དབང་རྒྱ་ནག་གཞུང་ལ་ཡོད་སྐོར་བཤད་བཞིན་ཡོད་པ་མ་ཟད། ཉེ་ཆར་རྒྱ་གར་གྱི་སྲིད་འཛིན་གཞོན་པ་སྐུ་ཞབས་ Venkaiah Naidu མཆོག་རྒྱ་གར་བྱང་ཤར་ཨ་རུ་ན་ཅལ་མངའ་ཁུལ་དུ་ཕེབས་སྐབས་རྒྱ་ནག་གཞུང་ནས་རྒྱ་གར་གྱི་འགོ་ཁྲིད་ས་ཁུལ་དེར་བསྐྱོད་པ་དེ་ཡིས་ཕྱོགས་གཉིས་ཀྱི་འབྲེལ་ལམ་ལ་དོ་ཕོག་བཏང་ཡོད་སྐོར་སོགས་བཤད་དེ་དགག་པ་རྒྱབ་ཡོད་པ་དང་། སྐབས་དེར་རྒྱ་གར་ཕྱི་སྲིད་ལས་ཁུངས་ནས་ཨ་རུ་ན་ཅལ་མངའ་སྡེའི་བདག་དབང་རྒྱ་གར་ལ་ཡོད་པ་མ་ཟད། མངའ་སྡེ་དེ་རྒྱ་གར་དང་ཁ་བྲལ་ཐབས་མེད་པ་ཞིག་རེད་ཅེས་རྒྱ་གཞུང་ལ་ལན་འདེབས་བྱས་པའི་གནས་སྟངས་ཡང་བྱུང་ཡོད།