རྒྱལ་སྤྱི།

ཡུན་རིང་ནས་འདི་ག་ཡོ་རོབ་རྒྱལ་ཁབ་ནང་དུ་འཇར་མན་སྐད་ཡིག་སྤྱོད་མཁན་གྱི་རྒྱལ་ཁབ་ཁག་གི་གཞུང་མང་ལ་བོད་ནང་གི་དངོས་ཡོད་གནས་ཚུལ་གོ་རྟོགས་དང་བོད་དོན་ཞུ་གཏུག་གནང་མཁན་སྐུ་ཞབས་ Uwe Meya ལགས་ཀྱིས་ཕྱི་ལོ་ ༢༠༠༢ ནས་ ༢༠༢༡ བར་རྒྱ་གཞུང་གི་དྲག་གནོན་འོག་བོད་ནང་བྱུང་བའི་གནས་ཚུལ་ཁག་འཇར་མན་སྐད་ཡིག་ཐོག་ཕྱོགས་སྒྲིག་ཞུས་པ་ Fukus Tibet ཞེས་པའི་ཕྱག་དེབ་ཅིག་འགྲེམས་སྤེལ་གནང་འདུགསྐུ་ཞབས་ Uwe Meya ལགས་ཀྱིས་འཇར་མན་སྐད་ཡིག་ནང་བོད་གནས་ཕྱོགས་སྒྲིག་ཞུས་པའི་ཕྱག་དེབ་ནང་གཙོ་བོ་འདས་པའི་ལོ་ངོ་ ༢༠ ལྷག་གི་རིང་རྒྱ་གཞུང་གི་དྲག་གནོན་དང་དམ་བསྒྲགས་ཅན་གྱི་སྲིད་བྱུས་འོག་བོད་མིས་སྐུ་ལུས་ཞུགས་འབུལ་གནང་བ་མཚོན་བོད་ནང་བྱུང་བའི་བོད་མིའི་ལས་འགུལ་ཁག་དང་རྒྱ་ནག་གཞུང་གིས་ད་བར་བོད་མི་འཛིན་བཟུང་དང་བཙོན་འཇུག བོད་ཀྱི་ཆོས་རིག སྐད་ཡིག་བཅས་པ་རྩ་མེད་བཟོ་ཐབས་ཀྱི་སྲིད་བྱུས་སྤེལ་ཁག་དང། དེ་བཞིན་རྒྱལ་སྤྱིའི་ཁྲོད་བོད་དོན་ཞུ་གཏུག་དང་གོ་རྟོགས་ལས་འགུལ་སྤེལ་བ་སོགས་གསལ་བའི་བོད་གནས་ཕྱོགས་སྒྲིག་ཞུས་པའི་ཕྱག་དེབ་ཅིག་ཆགས་ཀྱི་ཡོད་པ་རེད།སྐུ་ཞབས་ Uwe Meya ལགས་ཀྱིས་ཕྱི་ལོ་ ༢༠༠༢ ལོར་ཁོང་འཇར་མན་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གནང་སྐབས་ནས་བཟུང་སྟེ་བོད་ནང་བྱུང་བའི་གནས་ཚུལ་ཁག་ཕྱོགས་སྒྲིག་གནང་ཞིང་། དུས་ནས་དུས་སུ་འབྲེལ་ཡོད་བོད་དོན་རྒྱབ་སྐྱོར་ཚོགས་པ་ཁག་ལ་བོད་གནས་ཆེད་གཏོང་གནང་གི་ཡོད་པ་རེད་འདུག ཕྱི་ཟླ་ ༡༡ ཕྱི་ཚེས་ ༤ ཉིན་སུད་སི་བོད་ཀྱི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་གདན་ཞུས་ཐོག་དབུ་འབྱེད་གནང་ཡོད་ཅིང། དབུ་འབྱེད་འདུ་འཛོམས་ཐོག་སུད་བོད་མཐུན་གྲོགས་ཀྱི་ཚོགས་གཙོ་གཙོས་རྒྱུན་ལས་རྣམས་ཕེབས་འདུག སུད་སི་བོད་ཀྱི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ཀྱིས་སྐུ་ཞབས་ Uwe Meya ལགས་ཀྱིས་བོད་གནས་ཕྱོགས་སྒྲིག་ཞུས་པའི་ཕྱག་དཔེ་བརྒྱུད་ནས་འཇར་མན་སྐད་ཡིག་ལོངས་སུ་སྤྱོད་མཁན་ཚོར་བོད་ནང་བྱུང་བའི་དངོས་ཡོད་གནས་ཚུལ་ཁག་སྟབས་བདེ་པོའི་ཐོག་ནས་ལྟ་ཀློག་ཐུབ་པ་དང་ཞིབ་འཇུག་གི་རྩ་འཛིན་དུ་ཕན་ཐོགས་ངེས་ཡིན་པར་གསུངས་ཡོད། རྩ་བའི་ Fukus Tibet ཞེས་པའི་དཔེ་དེབ་རྩོམ་པ་པོ་སྐུ་ཞབས་ Uwe Meya ལགས་ནི་ཡུན་རིང་ནས་བོད་དོན་ལ་རྒྱབ་སྐྱོར་གནང་མཁན་ཞིག་དང། དེ་སྔ་ཕྱི་ལོ་ ༡༩༨༨ ལོར་བོད་ཀྱི་རྒྱལ་ས་ལྷ་སར་བྱུང་བའི་བོད་མིའི་ཞི་རྒོལ་ཆེན་མོ་དངོས་སུ་གཟིགས་མཁན་ཕྱི་རྒྱལ་མི་རིགས་ཤིག་ཆགས་ཡོད་པར་མ་ཟད། ཁོང་གིས་ Tibet initiatve Deutschland ཞེས་འཇར་མན་བོད་དོན་རྒྱབ་སྐྱོར་ཚོགས་པ་ཆེས་ཐོག་མ་གསར་འཛུགས་གནང་ཡོད། ད་ལྟའི་ཆར་ཁོང་གི་སུད་བོད་མཐུན་གྲོགས་ཀྱི་འགན་འཛིན་ལྷན་ཚོགས་ཀྱི་ཚོགས་མི་ཞིག་ཀྱང་ཆགས་ཀྱི་ཡོད་པ་རེད།

འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ལྷན་ཚོགས་ཐེངས་ཉི་ཤུ་རྩ་བདུན་པ་ཚོགས་པ་དང་བསྟུན་བོད་ཀྱི་ཁོར་ཡུག་ཉམས་ཞིབ་པ་དང་ལས་འགུལ་བ་བཅས་ལས་གྲུབ་པའི་རུ་ཁག་ཞིག་གིས་བོད་ཀྱི་ཁོར་ཡུག་གནད་དོན་དང་འབྲེལ་བའི་ཞུ་གཏུག་ལས་འགུལ་སྤེལ་བཞིན་འདུགཁ་སང་ཚེས་ ༦ ཉིན་Eygpt རྒྱལ་ཁབ་ཀྱི་གྲོང་ཁྱེར་ Sharm El Sheikh ནང་དུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་དང་འབྲེལ་བའི་ COP 27 ཞེས་པའི་ཁོར་ཡུག་ལྷན་ཚོགས་དབུ་འཛུགས་གནང་བའི་ཐོག་རྒྱལ་སྤྱིའི་རྒྱལ་ཁབ་ ༡༢༠ ལྷག་གི་དབུ་ཁྲིད་དང་སྐུ་ཚབ་སོགས་ཁྱོན་གནད་ཡོད་མི་སྣ་ཁྲི་ཚོ་ལྷག་ལྷན་འཛོམས་གནང་ཡོད་པར་མ་ཟད། བོད་མིའི་ཁྲོད་ནས་དངོས་སུ་མཉམ་ཞུགས་གནང་ཐུབ་མཁན་བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་དོན་གྲུབ་དབང་མོ་ལགས་དང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཁོར་ཡུག་ཉམས་ཞིབ་པ་འབུམ་རམས་པ་བློ་བཟང་དབྱངས་མཚོ་ལགས། བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་འགན་འཛིན་པདྨ་སྒྲོལ་མ་ལགས། ཨེ་ལིངྣ་ལགས། བོད་གནས་ལྟ་ཞིབ་ཁང་གི་ཉམས་ཞིབ་པ་བསྟན་འཛིན་ཆོས་སྐྱིད་ལགས་བཅས་ཆགས་ཀྱི་འདུག ཁ་སང་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ལྷན་ཚོགས་དངོས་སུ་དབུ་འཛུགས་གནང་བ་དང་བསྟུན། བོད་མིའི་སྐུ་ཚབ་རྣམས་ཀྱིས་སྐབས་དེར་ཁོར་ཡུག་དང་འགྲོ་བ་མིའི་ཐོབ་ཐང་གི་གནད་དོན་ཐོག་ཕྱག་ལས་གནང་མཁན་ཁག་གཅིག་གིས་གོ་སྒྲིག་གནང་བའི་ཚོགས་འདུ་ཐོག་མཉམ་ཞུགས་གནང་སྟེ་བོད་མཐོ་སྒང་གི་ཁོར་ཡུག་དང་གནམ་གཤིས་གནས་སྟངས་ཀྱི་གལ་གནད། ལྷག་དོན་རྒྱ་ནག་གི་བཙན་འཛུལ་འོག་བོད་ཀྱི་ཁོར་ཡུག་ལ་གནོད་འཚེ་ཕོག་པའི་གནད་དོན་ཁག་གི་ཐོག་གཏམ་བཤད་གནང་བ་དང་ཆབས་ཅིག་ཁོར་ཡུག་གནད་དོན་ཐོག་ཕྱག་ལས་གནང་མཁན་རྒྱལ་ཚོགས་ཀྱི་སྐུ་ཚབ་ཁག་གཅིག་དང་རྒྱ་གར་དབུས་གཞུང་གི་ཁོར་ཡུག་བློན་ཆེན་སྐུ་ཞབས་ Bhunpender Yadav མཆོག་བཅས་ལ་ཞུ་གཏུག་ཡིག་ཆ་ཕུལ་འདུགརྩ་བའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོི་ལའི་གནམ་གཤིས་འགྱུར་ལྡོག་གི་ལྷན་ཚོགས་ཐེངས་ཉི་ཤུ་རྩ་བདུན་པ་ཁ་སང་ནས་ཚེས་ ༡༨ བར་ཉིན་གྲངས་ ༡༢ རིང་ཚོག་ཀྱི་ཡོད་པ་དང་བསྟུན་སང་ཉིན་བོད་མིའི་སྐུ་ཚབ་ཀྱི་ངོས་ནས་ཁུལ་དེའི་ Regency མགྲོན་ཁང་ནང་དུ་ཁོར་ཡུག་ཐོག་གི་གཏམ་བཤད་ལས་རིམ་ཞིག་ཐོག་མཉམ་ཞུགས་གནང་རྒྱུ་གཙོས་དེ་ནས་ཚེས་ ༡༢ དང་ ༡༦ བཅས་ལའང་ COP 27 ཚོགས་འདུ་འཚོག་ཡུལ་དེ་ཉིད་ཀྱི་ཚོགས་ཁང་ཆེན་མོ་ཞིག་ནང་ཚོགས་པ་ཁག་ཅིག་གིས་གོ་སྒྲིག་གནང་རྒྱུའི་ཁོར་ཡུག་ཚོགས་འདུ་འདྲ་མིན་གཉིས་ནང་མཉམ་ཞུགས་ཀྱིས་བོད་ཀྱི་ཁོར་ཡུག་གནད་དོན་སྐོར་གཏམ་བཤད་དང་ཞུ་གཏུགས་གང་མང་གནང་རྒྱུ་རེད་འདུག

དེ་རིང་དང་སང་ཉིན་བཅས་ཉིན་གྲངས་གཉིས་རིང་ཡོ་རོབ་འཇར་མ་ནིའི་རྒྱལ་ཁབ་ཀྱི་གྲོང་ཁྱེར་ Munster ནང་ G7 ཞེས་ཨ་རི་དང་དབྱིན་ཡུལ། ཁེ་ན་ཌ་དང་ཕ་རན་སི། ཨི་ཊ་ལི། འཇར་མན། དེ་བཞིན་ཉི་ཧོང་བཅས་རྒྱལ་སྤྱིའི་མང་གཙོའི་རྒྱལ་ཁབ་ཆེ་གྲས་བདུན་གྱི་ཕྱི་སྲིད་བློན་ཆེན་རྣམ་པའི་ལྷན་ཚོགས་ཤིག་ཚོགས་ཀྱི་ཡོད་པ་དང་བསྟུན། ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ལྷན་ཚོགས་ཐོག་འགྲོ་བ་མིའི་ཐོབ་ཐང་གཙོས་བོད་དོན་དང་འབྲེལ་བའི་གནད་དོན་ཁག་ལ་ངེས་པར་དུ་གླེང་སློང་གནང་དགོས་པའི་ཞུ་སྐུལ་གནང་འདུག ཞུ་སྐུལ་ནང་རྒྱ་གཞུང་གི་དྲག་པོའི་སྲིད་བྱུས་དེ་དག་བོད་དང་བོད་མིའི་གནད་དོན་ལ་གནོད་སྐྱོན་དང་དོ་ཕོག་གཏོང་བཞིན་པ་མ་ཟད་བོད་ཀྱི་ཁྱིམ་མཚེས་རྒྱལ་ཁབ་ཁག་གིས་གཙོས་པའི་རྒྱལ་སྤྱིའི་ཁྱོན་ཡོངས་ཀྱི་བདེ་འཇགས་ལའང་གནོད་སྐྱོན་དང་དོ་ཕོག་ཆེན་པོ་གཏོང་བཞིན་ཡོད་པ་སོགས་འགྲེལ་བརྗོད་དང་སྦྲགས། ཕྱི་སྲིད་བློན་ཆེན་རྣམ་པའི་ཚོགས་འདུ་ཐོག་རྒྱ་ནག་གི་སྲིད་བྱུས་དེ་དག་གི་ཤུགས་རྐྱེན་དང་གདོང་ལེན་གནང་ཕྱོགས་སོགས་ལ་དགོངས་པ་བཞེས་གལ་ཆགས་ཡོད་པ་གསུངས་འདུག འདས་པའི་ལོ་བཅུའི་ནང་ཞི་ཅིང་ཕིང་གི་དབང་འཛིན་འོག་རྒྱ་ནག་འདི་སྔར་ལས་ཆེས་དམ་བསྒྲགས་ཆེ་ཞིང་དྲག་པོའི་དམག་ཆས་ཀྱིས་བཀྲིས་པའི་གཅིག་སྡུད་རིང་ལུངས་ཀྱི་རྒྱལ་ཁབ་ཅིག་ཏུ་གྱུར་ཡོད། བོད་ལ་ཆ་མཚོན་ན་རྒྱ་ནག་དམར་ཤོག་གཞུང་གིས་བོད་ཕྲུག་གཙོས་བོད་མི་རྣམས་རང་ཉིད་ཀྱི་སྐད་ཡིག་དང་ནང་ཆོས་སོགས་ཐུན་མོང་མ་ཡིན་པའི་རིག་གཞུང་ཁག་དང་རྒྱང་ཐག་རིང་དུ་གཏོང་བཞིན་ཡོད་པ་སོགས་འགྲེལ་བརྗོད་དང་སྦྲགས། རྒྱལ་སྤྱིའི་འགོ་ཁྲིད་དང་མང་ཚོགས་རྣམས་ཀྱིས་རྒྱ་གཞུང་གི་ཐབས་བྱུས་ལྡན་པའི་སྲིད་བྱུས་དེ་དག་ལ་ངོས་ལེན་གནང་རྒྱུ་མེད་པར་མ་ཟད་ལྷག་པར་དུ་རྒྱ་གཞུང་གིས་བོད་གཙོས་ཤིན་ཅང་དང་ཧོང་ཀོང་སོགས་ཀྱི་ནང་ལག་བསྟར་བྱེད་བཞིན་པའི་སྲིད་བྱུས་ཁག་ལ་རྒྱལ་སྤྱིའི་འགོ་ཁྲིད་རྣམ་པས་གླེང་སློང་དང་གདོང་ལེན་སོགས་མ་གནང་བར་སྣང་མེད་དུ་བཏང་ཚེ་རྒྱ་ནག་གཞུང་ནས་ད་ཡོད་སྲིད་བྱུས་ཁག་གི་ཐོག་ལ་མུ་མཐུད་དྲག་པོའི་སྲིད་གཞན་ལག་བསྟར་བྱེད་ཀྱི་རེད་ཅེས་གསུངས་འདུག རྒྱལ་སྤྱིའི་བོད་དོན་ལས་འགུལ་ཁང་ནས་ཐེངས་འདིའི་ཕྱི་སྲིད་བློན་ཆེན་རྣམ་པའི་ཚོགས་འདུ་ཐོག་རྒྱ་ནག་གཞུང་གིས་བོད་མིའི་བླ་སྤྲུལ་ཡང་སྲིད་ཀྱི་གནད་དོན་ལ་ཐེ་བྱུས་བྱས་པར་ངོ་རྒོལ་གྱི་རྣམ་འགྱུར་གསལ་པོ་བཏོན་དགོས་པ་དང་། བོད་ཀྱི་གནད་དོན་འདི་རྒྱལ་སྤྱིའི་བདེ་འཇགས་དང་འབྲེལ་ནས་ཡོད་སྟབས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་སྐོར་དང་བོད་མཐོ་སྒང་གི་གནམ་གཤིས་སྟངས་ཀྱི་གལ་གནད། རྒྱ་གཞུང་གིས་བོད་ནང་ལག་བསྟར་བྱེད་བཞིན་པའི་དྲག་པོའི་སྲིད་བྱུས་དང་ཁོར་ཡུག་ལ་གནོད་འཚེ་གཏོང་བཞིན་པའི་བྱ་སྤྱོད་སོགས་ལ་ངེས་པར་དུ་གླེང་སློང་གནང་དགོས་པ་མ་ཚད་པར་བོད་ནང་གི་དངོས་ཡོད་གནས་སྟངས་ཤེས་རྟོགས་སླད་རྒྱལ་སྤྱིའི་རང་དབང་ལྡན་པའི་ཚོགས་ཆུང་དང་གསར་འགོད་པ། གཞི་རིམ་མང་ཚོགས་དང་འབྲེལ་བའི་ཚོགས་པ་ཁག་གི་སྐུ་ཚབ་བོད་ནང་ལ་རང་དབང་ལྡན་པའི་ཐོག་འགྲོ་སྐྱོད་ཐུབ་ཐབས་ལ་འབད་བརྩོན་གནང་དགོས་པ་གསུངས་འདུག © imageBROKER

རྒྱ་ནག་གཞུང་གིས་རྒྱལ་ནང་ཙམ་མ་ཚད་པར་རྒྱལ་སྤྱིའི་རྒྱལ་ཁབ་འདྲ་མིན་ནང་ཐེ་བྱུས་ཅན་གྱི་བྱ་སྤྱོད་སྣ་ཚོགས་སྤེལ་བཞིན་པ་ལྟར་བར་སྐབས་ Netherlands ནང་ཡོད་པའི་བོད་མི་རྣམས་ལ་ས་གནས་རྒྱ་ནག་གཞུང་ཚབ་ལས་ཁུངས་ཀྱི་ལས་བྱེད་སོགས་ཀྱིས་ཁ་པར་བརྒྱུད་འཇིགས་སྐུལ་ཡང་ཡང་བྱེད་བཞིན་པའི་གནས་སྟངས་འབྱུང་བཞིན་ཡོད་པ་རེད། ཁ་ཉིན་ཕྱི་ཚེས་ ༣༡ ཉིན་ནི་ཐར་ལན་ཌི་བོད་རིགས་ཚོགས་པ་དང་ནི་ཐར་ལན་ཌི་བོད་དོན་རྒྱབ་སྐྱོར་ཚོགས་པ། དེ་བཞིན་ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་བཅས་ཐུན་མོང་གིས་ཡུལ་དེའི་སྲིད་བློན་སྐུ་ཞབས་ Mark Rutte མཆོག་གི་མཚན་ཐོག་ལ་རྒྱ་ནག་གིས་ཁ་པར་བརྒྱུད་ནི་ཐར་ལན་ཌིའི་མི་སེར་དང་ལྷག་པར་ས་གནས་བོད་མི་རྣམས་ལ་འཇིགས་སྐུལ་ཡང་ཡང་བྱེད་བཞིན་ཡོད་པར་འགྲེལ་བརྗོད་དང་སྦྲགས་ཏེ། སྲིད་བློན་མཆོག་གིས་གནད་དོན་དེར་ངེས་པར་དུ་དགོངས་བཞེས་ཀྱིས་གདོང་ལེན་གནང་རོགས་ཞེས་སོགས་ཀྱི་སྙན་ཞུ་ཕུལ་འདུག་པར་མ་ཟད། ཚོགས་པ་ཁག་གསུམ་གྱིས་ཞིབ་འཇུག་གནང་སྐབས་ས་གནས་བོད་མི་བཅུ་ལྷག་ལ་ཁ་པར་བརྒྱུད་འཇིགས་སྐུལ་བྱས་པའི་གནས་སྟངས་ར་སྤྲོད་བྱུང་བར་མངོན་གསལ་དང་སྦྲགས། ཁ་པར་གཅིག་གི་སྒྲ་འཇུག་དང་བཅས་པའི་ཞིབ་ཕྲའི་གནས་ཚུལ་དཔང་རྟགས་ཚུལ་དུ་ཕུལ་ཡོད་པ་མ་ཚད་པར་ཞིབ་འཇུག་གི་བརྒྱུད་རིམ་ཁྲོད་ལ་ལས་རྒྱ་ནག་གཞུང་ཚབ་ལས་ཁུངས་ཀྱི་ལས་བྱེད་ཡིན་ཞེས་ངོས་ལེན་བྱས་ཡོད་པ་དང་། ཁག་གཅིག་གིས་སོ་སོའི་ངོ་སྤྲོད་སྦས་གསང་བྱེད་བཞིན་ཡོད་པ་གསལ་འདོན་གནང་འདུག རྒྱ་གཞུང་གིས་ཕྱིར་རང་དབང་ལུང་པའི་ནང་ལ་ཡོད་པའི་མི་སེར་ཐོག་ལྟ་སྲུང་དང་འཇིགས་སྐུལ་གྱི་བྱ་སྤྱོད་སྤེལ་བཞིན་པ་འདི་ནི་ས་གནས་ཀྱི་མི་ཙམ་མིན་པར་ཡུལ་དེའི་མི་སེར་དང་རྒྱལ་ཁབ་སྤྱིའི་བདེ་འཇགས་སོགས་ལ་བློ་འཚབ་གནང་གནད་ཡིན་པ་སོགས་འགྲེལ་བརྗོད་དང་སྦྲགས། སྲིད་བློན་སྐུ་ཞབས་ Mark Rutte མཆོག་གིས་རྒྱ་ནག་གི་བྱ་སྤྱོད་འདི་ཡོ་རོབ་མཐུན་ཚོགས་ནང་གླེང་སློང་དང་སྦྲགས་ཐུན་མོང་གི་ངོས་ནས་གདོང་ལེན་གནང་རྒྱུའི་ཐབས་བྱུས་མངོན་གསལ་གནང་དགོས་པ་མ་ཟད་བོད་མི་དང་ཡུ་གུར་བ་སོགས་དང་དངོས་སུ་ཐུག་འཕྲད་ཀྱིས་ཁོང་རྣམ་པའི་གནས་སྟངས་སྦས་གསང་མེད་པར་འགྲེལ་བརྗོད་ཐུབ་པའི་ཁོར་ཡུག་བསྐྲུན་དགོས་པ་གསུངས་འདུག ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བཀྲས་མཐོང་བསྟན་འཛིན་དབང་པོ་ལགས་ཀྱིས་ཞུ་སྙན་དེ་དང་འབྲེལ་ནས་གསུངས་པར་དེ་ལྟ་བུའི་མི་སྒེར་གྱི་གནས་ཚུལ་ལ་བརྩི་མེད་རྡོག་རོལ་བཏང་བ་ནི་ཁྲིམས་འགལ་ཡིན་སྟབས་ཁུལ་དེའི་གཙོ་འཛིན་རྣམས་ཀྱིས་སྟངས་འཛིན་བྱེད་ཕྱོགས་དང་མཇུག་སྐྱོང་དོན་འཁྱོལ་གནང་རྒྱུ་ཁག་པོ་ཡོད་ཀྱང་། གལ་ཏེ་གནད་དོན་དེ་གླེང་སློང་ཤུགས་ཆེར་མ་བྱས་ཚེ་དེའི་མཇུག་འབྲས་སུ་འཇིགས་སྐུལ་བ་དེ་དག་སྣང་མེད་དུ་འགྲོ་རྒྱུ་ཙམ་མ་ཟད་འཇིགས་སྐུལ་བྱ་ཡུལ་དེ་ནག་ཉེས་ཅན་ཆགས་ཉེན་ཡོད་སྐོར་གསུངས་འདུག

ཉེ་ཆར་རྒྱ་ནག་དམར་ཤོག་ཚོགས་པའི་ཚོགས་ཆེན་ཐེངས་ ༢༠ ཚོགས་པ་དང་བསྟུན་དབུས་ཆབ་སྲིད་ལྷན་ཚོགས་ཀྱི་འགོ་ཁྲིད་བདུན་གསར་འདེམས་བྱུང་ཡོད་པ་ལྟར་ཁ་སང་འདི་ག་རྒྱ་གར་གྱི་རྒྱལ་ས་ལྡི་ལིར་ Non-Violent Alternatives འཚེ་མེད་ཞི་བ་གདམ་ཀ་གཞན་ཞེས་པའི་ཚོགས་པའི་གོ་སྒྲིག་འོག་རྒྱལ་སྤྱིའི་མཁས་པའི་བགྲོ་གླེང་ཞིག་ཚོགས་ཡོད།  བགྲོ་གླེང་གི་ལྷན་ཚོགས་ཐོག་རྒྱ་གར་དང་ཐེ་ཝན། བོད་མི་བཅས་རྒྱ་ནག་གི་ཆབ་སྲིད་ཉམས་ཞིབ་པ་མི་གྲངས་བཞི་མཉམ་ཞུགས་གནང་ཡོད་པར་མ་ཟད་མཁས་པ་དེ་དག་གིས་སྲིད་འཛིན་ཤི་ཅིང་ཕིང་གི་དབང་འཛིན་འོག་སྐབས་ ༢༠ པའི་རྒྱ་ནག་གི་གནས་བབ་དང་འབྲེལ་བའི་གནད་དོན་ཐོག་དཔྱད་རྩོམ་སྤེལ་ཏེ་བཀའ་མོལ་གནང་ཡོད། བགྲོ་གླེང་ལྷན་ཚོགས་ཐོག་ Flame གཙུག་ལག་སློབ་གཉེར་ཁང་གི་རྒྱལ་སྤྱིའི་ཆབ་སྲིད་དང་སྤྱི་ཚོགས་ཚན་རིག་གི་སློབ་དཔོན་སྐུ་ཞབས་ Roger Liu མཆོག་གིས་སྲིད་འཛིན་གསར་པ་ཞི་ཅིན་ཕིང་ལ་ད་ལྟའི་ཆར་རྒྱལ་སྤྱི་དང་རྒྱལ་ནང་གཉིས་ཀར་གདོང་ལེན་མང་དག་ཅིག་བྱེད་དགོས་པ་དང་། དཀའ་ངལ་དེ་དག་ལས་ཁོ་པས་གདོང་ལེན་བྱེད་དགོས་ས་དང་པོ་དེ་ཆབ་སྲིད་བདེ་འཇགས་དང་དེ་ནས་ཨ་རི་དང་འབྲེལ་ལམ་བྱེད་ཕྱོགས་སོགས་ཀྱི་སྐོར་ཡིན་པར་འགྲེལ་བརྗོད་གནང་སྟེ། ཞི་ཅིན་ཕིང་གིས་འདེམས་སྒྲུག་བྱས་པའི་འགོ་ཁྲིད་དེ་དག་རང་ཉིད་དང་བློ་མཐུན་ཡིད་ཆེས་ཡོད་པ་འབའ་ཞིག་ཡིན་ཀྱང་། འགོ་ཁྲིད་དེ་དག་དྲུང་ཆེའི་ངོ་བོའི་ཐོག་ནས་ལས་ཀ་བྱེད་རྒྱུ་མ་གཏོགས་ཆབ་སྲིད་ཀྱི་ཐག་གཅོད་བྱེད་དབང་གང་ཡང་མེད་པ་གསལ་པོ་རེད་ཅེས་སོགས་གསུངས་ཡོད།  ཁ་སང་རྒྱལ་ས་ལྡི་ལིའི་ IIC འམ་རྒྱ་གར་དང་རྒྱལ་སྤྱའི་ལྟེ་གནས་ཁང་དུ་གོ་སྒྲིག་ཞུས་པའི་བགྲོ་གླེང་ལྷན་ཚོགས་དེ་རྒྱ་གར་གྱི་ཕྱི་སྲིད་བློན་ཆེན་ཟུར་པ་སྐུ་ཞབས་ KanwalSibal མཆོག་གིས་གཙོ་སྐྱོང་གནང་ཡོད་པ་དང་། གསུང་བཤད་གནང་མཁན་ཁོངས་སུ་རྒྱ་གར་དཔལ་འབྱོར་དུས་བབ་གསར་ཁང་གི་ཕྱི་འབྲེལ་རྩོམ་བྲིས་པ་སྐུ་ཞབས་ Dipanjee Roy Chaudhary ལགས་དང་ནེཧ་རུ་གཙུག་ལག་སློབ་གཉེར་ཁང་གི་རྒྱ་ནག་ཚན་པའི་སློབ་དཔོན་ SrikanthKondapalli ལགས། དབུས་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་དང་། Flame གཙུག་ལག་སློབ་གཉེར་ཁང་གི་རྒྱལ་སྤྱིའི་ཆབ་སྲིད་དང་སྤྱི་ཚོགས་ཚན་རིག་གི་སློབ་དཔོན་སྐུ་ཞབས་ Roger Liu ལགས་བཅས་ལྷན་ཞུགས་གནང་ཡོད་པ་རེད། བགྲོ་གླེང་ལྷན་ཚོགས་ཐོག་དཔལ་འབྱོར་དུས་བབ་གསར་ཁང་གི་སྐུ་ཞབས་ Dipanjee Roy Chaudhary ལགས་ཀྱིས་ཞི་ཅིན་ཕིང་གི་ངོས་ནས་ཕྱི་ལོ་ ༢༠༥༠ ལོའི་བར་རྒྱ་མིའི་དངུལ་ལོར་ Renminbi དེ་ཨ་རིའི་ཌོ་ལོ་ལས་ཀྱང་རིན་ཐང་ཆེ་བ་བཟོ་རྒྱུའི་དམིགས་ཡུལ་ཡོད་པར་མ་ཟད། རྒྱལ་ཁབ་ཉམ་ཐག་རྣམས་ལ་དཔལ་འབྱོར་གྱི་བསླུ་ཁྲིད་བྱས་ཏེ་རྒྱ་གར་ལྟ་བུའི་ཁྱིམ་མཚེས་རྒྱལ་ཁབ་ལ་བདེ་འཇགས་ཀྱི་དཀའ་ངལ་འཕྲད་རྒྱུ་ཡིན་པ་སོགས་འགྲེལ་བརྗོད་གནང་ཡོད། དེ་བཞིན་ནེཧ་རུ་གཙུག་ལག་སློབ་གཉེར་ཁང་གི་རྒྱ་ནག་ཚན་པའི་སློབ་དཔོན་ SrikanthKondapalli ལགས་ཀྱིས་ཞི་ཅིན་ཕིང་གི་སྲིད་དབང་སྒེར་འཛིན་གྱི་བསམ་བློའི་འོག་ནས་འགོ་ཁྲིད་གཞན་རྣམས་སོ་སོའི་ཕྱོགས་གཏོགས་ཀྱི་བློ་ཉེ་ས་ཤ་སྟག་ཡིན་པ་དེས་ཆབ་སྲིད་ལྟ་གྲུབ་དོ་མཉམ་མེད་པའི་ཐོག་ནས་མ་འོངས་པར་རྒྱལ་ནང་གི་ཤོག་ཁག་ཕན་ཚུན་དབར་དཀའ་ངལ་འཕྲད་རྒྱུའི་ཉེན་ཁ་ཡོད་སྐོར་སོགས་གསུངས་ཡོད། བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་སྲིད་འཛིན་ཞི་ཅིན་ཕིང་གི་ད་ལྟའི་སྐབས་ ༢༠ པའི་དབུས་ཆབ་སྲིད་ལྷན་ཚོགས་ཀྱི་འགོ་ཁྲིད་གསར་པ་དེ་དག་འོག་ནས་བོད་ཀྱི་བདེན་མཐའ་སེལ་བའི་རེ་བ་ཞིག་ཡོད་རེད་ཅེས་གསུངས་ཡོད།

རྒྱལ་ཚོགས་ཀྱི་བགྲོ་གླེང་ཐོག་ཏུ་ཨ་རིས་གཙོས་པའི་རྒྱལ་ཁབ་ལྔ་བཅུའི་སྐུན་ཚབ་རྣམ་པ་ཟུང་འབྲེལ་གྱིས་རྒྱ་ནག་གཞུང་གིས་ད་ཆ་ཤིན་ཅང་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་ལ་ཚོར་ཤུགས་ཆེན་པོས་སྐྱོན་བརྗོད་དང་སྦྲགས་རྒྱ་གཞུང་ནས་རང་ཉིད་ཀྱིས་ཁ་དན་བཞག་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ལ་བརྩི་སྲུང་བྱེད་དགོས་པའི་རེ་འདུན་བཏོན་འདུག ཁ་སང་ཨ་རིའི་ནིའུ་ཡོག་གྲོང་ཁྱེར་ནང་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་ཨ་མའི་ནང་ཚོགས་པའི་རྒྱ་གཞུང་གིས་ཡུ་གུར་མི་རིགས་རྣམས་ལ་སྡུག་སྦྱོང་མནར་གཅོད་ཚབས་ཆེན་གཏོང་བཞིན་པར་ཛ་དྲག་གི་བགྲོ་གླེང་ཞིག་གི་ཐོག་རྒྱལ་ཚོགས་ཀྱི་ཁེ་ན་ཌའི་སྐུ་ཚབ་ Bob Rae ལགས་ཀྱིས་སྐབས་དེར་ཨ་རི་དང་དབྱིན་ཡུལ། ནོར་ཝེ། ཁེ་ན་ཌ། དེ་བཞིན་ཨོ་སི་ཊི་ལི་ཡ་སོགས་མང་གཙོའི་རྒྱལ་ཁབ་ལྔ་བཅུས་སྐུ་ཚབ་ཞུས་ཏེ་ཐུན་མོང་གིས་འདོན་སྤེལ་གནང་བའི་བསྒྲགས་གཏམ་ཞིག་སྒྲོག་སྦྱང་གནང་བའི་ནང་ད་རེས་རྒྱལ་ཁབ་དེ་དག་ཐུན་མོང་གིས་གོང་ཞུས་བསྒྲགས་གཏམ་དེ་ནི་གཙོ་བོ་ཉེ་ལམ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་ལས་ཁང་གིས་ཤིན་ཅང་ནང་གི་གནས་སྟངས་དང་འབྲེལ་བའི་སྙན་ཐོ་འདོན་སྤེལ་གནང་བར་རྒྱ་ནག་གཞུང་གི་ངོས་ནས་ཤིན་ཅང་ནང་ཡུ་གུར་གཙོ་བོར་གྱུར་པའི་ཁ་ཆེའི་མི་རིགས་རྣམས་ཀྱི་འགྲོ་བ་མིའི་ཐོབ་ཐང་རྡོག་རོལ་ཚབས་ཆེན་བཏང་ཡོད་པ་དང་ཡུ་གུར་མི་རིགས་རྣམས་ཁྲིམས་མེད་ལུང་མེད་སྒོ་ནས་འཛིན་བཟུང་བཀག་ཉར་དང་ཁོང་རྣམ་པར་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བྱེད་བཞིན་པ་དེ་ནི་འགྲོ་བ་མིའི་རིགས་ལ་རྒོལ་རྡུང་གི་ནག་ཉེས་ཚབས་ཆེན་ཞིག་ཆགས་ཡོད་པར་འགྲེལ་བརྗོད་ཀྱིས་སེམས་འཚབ་ཀྱིས་སྤེལ་བ་ཞིག་ཡིན་སྐོར་གསུངས་འདུག བསྒྲགས་གཏམ་ནང་རྒྱལ་ཁབ་ཀྱི་ངོས་ནས་རྒྱ་གཞུང་གིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གིས་འདོན་སྤེལ་གནང་བའི་ཤིན་ཅང་གི་སྙན་ཐོར་ཁས་ལེན་བྱས་མེད་པར་ཐུགས་འཚབ་ཡོད་སྐོར་གསུངས་པ་དང་སྦྲགས། རྒྱ་གཞུང་ནས་རང་ཉིད་ཀྱིས་ཁ་དན་ཟིན་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ལ་བརྩི་སྲུང་བྱས་ཏེ་རྒྱའི་བཀག་ཉར་འོག་ཡོད་པའི་ཡུ་གུར་མི་རིགས་རྣམས་ལ་ཆ་རྐྱེན་གང་ཡང་མེད་པར་གློད་བཀྲོལ་དང་། ཁོང་རྣམས་ཀྱི་གནས་སྟངས་ཇི་ཆགས་སོགས་གསལ་བཤད་ཡོང་བའི་འབོད་སྐུལ་ཞུས་ཏེ་རྒྱ་གཞུང་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གིས་བཏོན་པའི་དགོངས་འཆར་ཁག་ལ་ངོས་ལེན་གྱིས་ལག་བསྟར་བྱེད་དགོས་སྐོར་གསུངས་ཡོད། རྒྱལ་ཚོགས་ཀྱི་ཁེ་ན་ཌའི་སྐུ་ཚབ་ Bob Rae ལགས་ཀྱིས་ཁོང་རྣམས་ནས་འགྲོ་བ་མིའི་ཐོབ་ཐང་རྡོག་རོལ་གྱི་གནད་དོན་ཐོག་གླེང་སློང་གནང་སྟེ་ཡ་ང་བའི་གནས་སྟངས་དེ་དག་འཕྲལ་མར་མཚམས་འཇོག་ཡོང་སླད་ཐུན་མོང་ཐོག་ནས་ཕྱག་ལས་གནང་རྒྱུ་ནི་མང་ཚོགས་ཀྱི་ངོས་ནས་རང་ཉིད་ཀྱི་གཞི་རྩའི་འགྲོ་བ་མིའི་ཐོབ་ཐང་ཁག་ལོངས་སུ་སྤྱོད་ཐུབ་རྒྱུའི་ཡོངས་སྒྲིལ་གྱི་སྤྱི་ཚོགས་ཤིག་བསྐྲུན་རྒྱུའི་གཞི་རྩ་ཆགས་ཀྱི་ཡོད་པར་འགྲེལ་བརྗོད་གནང་བ་དང་ཆབས་ཅིག་ཚང་མས་ཐབས་ལམ་དེ་ཕྱག་བསྟར་གནང་སྐྱོང་ཡོང་བའི་སྐུལ་མ་གནང་འདུག

དབྱིན་ཡུལ་གྱི་གྲོས་ཚོགས་འཐུས་མི་ཁག་གཅིག་གིས་ཁུལ་དེར་རྟེན་གཞི་བྱས་པའི་ Totttenham ཞེས་རྒྱལ་སྤྱིའི་ནང་སྙན་གྲགས་ཆེ་བའི་རྐང་སྤོལ་རུ་ཁག་གིས་རུ་ཁག་དེའི་སྦྱིན་བདག་གཙོ་བོ་ AIA གིས་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་ལ་རྒྱབ་སྐྱོར་བྱས་རྐྱེན་འབྲེལ་བ་མཚམས་འཇོག་དགོས་པའི་དགོས་འདུན་བཏོན་འདུགདེ་སྔ་ཕྱི་ལོ་ ༢༠༢༠ ལོར་རྒྱ་ནག་གིས་ཧོང་ཀོང་ནང་དུ་རྒྱལ་ཁབ་བདེ་འཇགས་ཀྱི་ཁྲིམས་གཞི་ཞེས་པ་ཡོངས་ཁྱབ་དང་། ལག་བསྟར་བྱེད་འགོ་བཙུགས་ཡོད་པ་དང་སྦྲགས། ལོ་དེར་ཧོང་ཀོང་ནང་དུ་རྟེན་གཞི་བྱས་པའི་ AIA (American Insurance Association) ཞེས་ཨ་རིའི་ཉེན་སྲུང་མ་འཇོག་གིས་མཐུན་ཚོགས་ཀྱི་ངོས་ནས་ཁྲིམས་གཞི་དེར་རྒྱལ་སྤྱིའི་སྐྱོན་བརྗོད་ལ་ལྟོས་མེད་རྒྱབ་སྐྱོར་གྱིས་ཡོངས་ཁྱབ་གསལ་བསྒྲགས་སྤེལ་ཡོད་པའི་གནད་དོན་དེ་དང་འབྲེལ་ནས། ཁ་སང་ཕྱི་ཚེས་ ༣༡ ཉིན་ Evening Standard ཞེས་པའི་གསར་ཤོག་ཐོག་སྤེལ་བའི་གནས་ཚུལ་ལ་གཞིགས་ན། དབྱིན་ཡུལ་གྱི་གྲོས་ཚོགས་འཐུས་མི་ཁག་གཅིག་གིས་ Tottenham རྐང་སྤོལ་རུ་ཁག་གིས་ཧོང་ཀོང་ནང་དུ་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་ལ་རྒྱལ་སྐྱོར་བྱེད་མཁན་དང་ལྷན་དུ་ལག་འབྲེལ་བྱས་ཡོད་པར་སྐྱོན་བརྗོད་ནན་པོ་གནང་ཡོད་པ་མ་ཟད། རྐང་སྤོལ་རུ་ཁག་གི་གཙོ་འཛིན་ Daniel Levy ལ་ཕྱག་བྲིས་ཤིག་ཕུལ་ཞིང་། AIA ཞེས་པའི་མཐུན་ཚོགས་དེ་དང་འབྲེལ་བ་མཚམས་འཇོགས་བྱེད་དགོས་པའི་ནན་སྐུལ་གནང་འདུག AIA ཞེས་པའི་མཐུན་ཚོགས་ཀྱི་ངོས་ནས་རྒྱ་ནག་གིས་ཧོང་ཀོང་ནང་དུ་ཁྲིམས་འགལ་ཐོག་གདུག་རྩུབ་དང་། གཅིག་སྡུད་ལམ་ལུགས་ཀྱི་ཁྲིམས་གཞི་གསར་འཛུགས་བྱས་པ་དེ་ཁྲིམས་མཐུན་གྱི་གནས་བབ་ཡིན་ཚུལ་གྱི་རྒྱབ་སྐྱོར་བྱེད་ཀྱི་ཡོད་པར་སྐྱོན་བརྗོད་གནང་བར་མ་ཟད། ཁྲིམས་གཞི་དེ་ཚད་ལས་བརྒལ་བ་དང་། ཧ་ཅང་དྲག་གནོན་ཅན་ཞིག་ཡིན་པ་དང་འབྲེལ། Tottenham རྐང་སྤོལ་རུ་ཁག་གིས་ AIA མཐུན་ཚོགས་དང་ལྷན་དུ་སྦྱིན་བདག་གི་འབྲེལ་ལམ་བཞག་པ་དེས་རུ་ཁག་དེའི་མཚན་སྙན་ལ་གནོད་ཀྱི་ཡོད་པ་གསུངས་འདུག རྩ་བའི་ཕྱི་ལོ་ ༢༠༡༣ ལོ་ནས་ AIA མཐུན་ཚོགས་ཀྱིས་ Tottenham རྐང་སྤོལ་རུ་ཁག་ལ་སྦྱིན་བདག་བྱེད་འགོ་བཙུགས་པ་ཞིག་ཡིན་པ་དང་། དུས་དེ་ནས་བཟུང་མཐུན་ཚོགས་ཀྱི་ལས་རྟགས་དེ་རྐང་སྤོལ་རུ་ཁག་དེའི་སྟོད་གོས་ཐོག་མངོན་གསལ་བྱུང་ཡོད། ཕྱི་ལོ་ ༢༠༡༩ ལོར་རུ་ཁག་དེས་མཐུན་ཚོགས་དེ་དང་ལྷན་དུ་ཡུ་རོབ་དངུལ་ས་ཡ་ ༣༢༠ མཐུན་གྲོས་ཀྱིས་ཕྱི་ལོ་ ༢༠༢༧ བར་སྦྱིན་བདག་མུ་མཐུད་བྱ་རྒྱུའི་ཡོངས་བསྒྲགས་བྱས་ཡོད་པ་དང་འབྲེལ། གྲོས་ཚོགས་འཐུས་མི་རྣམ་པས་དབྱིན་ཡུལ་གྱི་རྐང་སྤོལ་རུ་ཁག་ལ་དེ་སྔ་མཐུན་གྲོས་བཞག་པ་དེར་བསྐྱར་ཞིབ་གནང་དགོས་སྐོར་དང་། སྦྱིན་བདག་གཞན་འཚོལ་དགོས་པའི་སྐུལ་མ་དང་སྦྲགས་ཏེ། རྐང་སྤོལ་རུ་ཁག་ནས་མང་གཙོ་དང་འདྲ་མཉམ་གྱི་ལམ་ལུགས་ལ་རྒྱབ་སྐྱོར་བྱེད་དགོས་པའི་ནན་སྐུལ་གནང་འདུགགཞི་རྩའི་ཕྱི་ལོ་ ༢༠༢༠ ཟླ་ ༦ པའི་ནང་རྒྱ་ནག་གིས་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་གཞི་ཟེར་བ་ལག་བསྟར་བྱས་པ་ནས་བཟུང་ཧོང་ཀོང་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་མུས་ཡིན་པ་དང་། ཁྲིམས་གཞི་དེའི་འོག་ཧོང་ཀོང་གཞུང་གིས་ད་བར་མང་གཙོའི་ལས་འགུལ་བ་དང་། གསར་འགོད་པ་སོགས་འཛིན་བཟུང་གིས་བཙོན་འཇུག་ཉེས་ཆད་བཏང་ཡོད།

སྦེལ་འཇམ་གྱི་ཕྱི་སྲིད་བློན་ཆེན་གྱིས་ཉེ་སྔོན་དྲ་ཐོག་བཅར་འདྲིའི་ལས་རིམ་ཞིག་གི་ཁྲོད་རྒྱ་ནག་དེ་སྦེལ་འཇམ་གྱི་ Potential Enemy འམ་དགྲ་བོ་ཡིན་སྲིད་པའི་རང་བཞིན་སོགས་འགྲེལ་བརྗོད་གནང་བར་རྒྱ་ནག་གཞུང་གིས་སྐྱོན་བརྗོད་དང་འབྲེལ་ཏེ་གནད་དོན་དེའི་རྐྱེན་གྱིས་ཕྱོགས་གཉིས་ཀྱི་ཚོང་འབྲེལ་ལ་དོ་ཕོག་འགྲོ་རྒྱུའི་ཉེན་བརྡ་ཇི་ཙམ་བཏང་མིན་ལ་མ་ལྟོས་པར་ཁོང་གིས་རྒྱ་ནག་ཐོག་གི་འགྲེལ་བརྗོད་དེ་དག་ཕྱིར་འཐེན་གནང་རྒྱུ་མིན་པར་གསུངས་འདུག ཁ་ཉིན་ EuropeanConservative ཞེས་པའི་བརྒྱུད་ལམ་གྱིས་གནས་ཚུལ་སྤེལ་བར་ཉེ་སྔོན་ཟླ་བ་འདིའི་ཟླ་མགོར་སྦེལ་འཇམ་གྱི་ཕྱི་སྲིད་བློན་ཆེན་ Hadja Lahbib མཆོག་གིས་ De Tijd གསར་ཤོག་གི་དྲ་ཐོག་བཅར་འདྲིའི་ལས་རིམ་ཐོག་ཡུལ་དེའི་དཔལ་འབྱོར་གནས་བབ་དང་འབྲེལ་བའི་དྲི་བར་ལན་འདེབས་ཁྲོད་སྦེལ་འཇམ་གཞུང་གིས་འབྲེལ་ལམ་མགོ་རྙོག་ཡོད་པའི་རྒྱ་ནག་ཐོག་ཞིབ་འཇུག་ནན་པོ་བྱེད་བཞིན་ཡོད་པ་དང་། རྒྱ་ནག་དེ་སྦེལ་འཇམ་གྱི་ཚོང་འབྲེལ་རྒྱལ་ཁབ་ཞིག་ཡིན་པ་དེ་ལྟར་ནའང་། དེ་མཚུངས་སུ་ཡུལ་དེའི་འགྲན་ཡུལ་དང་འགྲ་བོ་ཡང་ཡིན་སྲིད་པར་གསུངས་འདུག ཁོང་གིས་སྐབས་དེར་ད་དུང་ Jonathan Hotslag ཞེས་རྒྱལ་སྤྱིའི་ཆབ་སྲིད་སློབ་དཔོན་གྱི་སྙན་ཐོ་ཞིག་ལུང་འདྲེན་དང་སྦྲགས། རྒྱ་ནག་གི་ངོས་ནས་གྲུ་གཟིངས་རྣམས་དགོས་མཁོ་འབྱུང་ཚེ་དམག་གྲུར་བསྒྱུར་ཐུབ་པའི་བཟོ་བཀོད་ཡོད་པ་སོགས་འགྲེལ་བརྗོད་གནང་ཡོད། རྒྱལ་ཁབ་ཕྱོགས་གཉིས་དབར་གྱི་ཡིག་འབྲེལ་གནང་བ་དེ་དག་ཁག་གཅིག་རྗེས་སུ་བརྒྱུད་ལམ་ཁག་ཏུ་ཕྱིར་འགྱར་བྱུང་བར་བཞིགས་ན། ཟླ་བ་འདིའི་ཚེས་ ༡༤ ཉིན་སྦེལ་འཇམ་ནང་གི་རྒྱ་ནག་གཞུང་ཚབ་ལས་ཁུངས་ཀྱི་དཔོན་རིགས་ཀྱིས་ཡུལ་དེའི་ཕྱི་སྲིད་ལས་ཁུངས་ཀྱི་ལས་བྱེད་པ་ཁག་གཅིག་དང་མཇལ་འཕྲད་བྱས་ཡོད་པའི་ཁྲོད་རྒྱ་ནག་དཔོན་རིགས་ཀྱིས་སྦེལ་འཇམ་ཕྱི་སྲིད་བློན་ཆེན་གྱིས་དཀྲོག་གཏམ་སྤེལ་བར་ཉན་འཇོག་བྱེད་རྒྱུ་མེད་པར་མ་ཟད་ད་ལྟའི་ཆར་སྦེལ་འཇམ་གྱི་གྲུ་གཟིངས་གནས་བབས་བརྒྱུད་ནས་རྒྱལ་ཁབ་ཕྱོགས་གཉིས་དབར་ཚོང་འབྲེལ་ཐོག་ནས་སྦེལ་འཇམ་གཞུང་ལ་ཁེ་ཕན་ཆེན་པོ་ཡོང་བཞིན་ཡོད་པ་ལྟར། དེ་ལྟ་བུའི་ཚོང་འབྲེལ་མུ་མཐུད་གནང་འདོད་ཡོད་ན་ཕྱོགས་གཉིས་ཀྱི་འབྲེལ་ལམ་ལ་གུས་བརྩི་ཞུ་དགོས་སྐོར་དང་འབྲེལ། ཉེ་སྔོན་དྲ་ཐོག་བཅར་འདྲིའི་ལས་རིམ་ཞིག་གི་ཁྲོད་རྙོག་གླེང་བྱུང་ཡོད་སྟབས་དྲ་ཐོག་ནས་ཕྱིར་འཐེན་བྱེད་དགོས་པའི་དགོས་འདུན་བཏོན་ཡོད་ཀྱང་ལྕམ་ Hadja Lahbib ལགས་ཀྱིས་དེར་དང་ལེན་གནང་མེད་པ་རེད།

རིང་མིན་ཕྱི་ཟླ་ ༡༡ ཕྱི་ཚེས་ ༦ ནས་ ༡༨ བར་ཉིན་གྲངས་ ༡༢ ཙམ་གྱི་རིང་ལ་ Egypt རྒྱལ་ཁབ་ཀྱི་གྲོང་ཁྱེར་ Sharm El Sheikh ནང་དུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ལྷན་ཚོགས་ཐེངས་ཉི་ཤུ་རྩ་བདུན་པ་འཚོགས་གཏན་ཁེལ་ཡོད་པ་ལྟར་ལྷན་ཚོགས་ཐོག་བོད་པའི་ཁོར་ཡུག་ཉམས་ཞིབ་པ་དང་ལས་འགུལ་བ་ལྔ་མཉམ་ཞུགས་གནང་སྟེ་བོད་མཐོ་སྒང་གི་ཁོར་ཡུག་དང་གནམ་གཤིས་གནས་སྟངས་ཀྱི་གལ་གནད་དང་། རྒྱ་ནག་གི་བཙན་འཛུལ་འོག་བོད་ཀྱི་ཁོར་ཡུག་ལ་གནོད་འཚེ་ཕོག་པའི་གནད་དོན་ཁག་གི་ཐོག་ཞུ་གཏུག་སོགས་གནང་རྒྱུ་རེད་འདུགདེ་རིང་སྔ་དྲོ་ཆུ་ཚོད་ ༡༡ ཐོག་བཞུགས་སྒར་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་འབྲེལ་མཐུད་ལས་ཁང་དུ་བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་དོན་གྲུབ་དབང་མོ་ལགས་དང་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཁོར་ཡུག་ཉམས་ཞིབ་པ་བློ་བཟང་དབྱངས་མཚོ་ལགས་གཉིས་ཀྱིས་གསར་འགོད་ལྷན་ཚོགས་ཤིག་གནང་བ་དང་སྐབས་དེར་བློ་བཟང་དབྱངས་མཚོ་ལགས་ཀྱིས་བོད་ཀྱི་ཁོར་གནས་སྟངས་འདི་བོད་མི་ཙམ་མ་ཡིན་པར་བོད་ཀྱི་ཁོར་ཡུག་ལ་བརྟེན་ནས་འཚོ་བཞིན་པའི་རྒྱལ་སྤྱིའི་མི་སེར་ས་ཡ་ ༡༌༨ ལྷག་གི་བདེ་སྡུག་དང་འབྲེལ་བ་ཡོད་པའི་གནད་དོན་གལ་ཆེ་ཞིག་ཆགས་ཀྱི་ཡོད་ཀྱང་། རྒྱལ་སྤྱིའི་ཚོགས་འདུ་དེ་ལྟ་བུའི་ཐོག་བོད་མིའི་སྐུ་ཚབ་མཉམ་ཞུགས་གནང་རྒྱུ་དང་དགོངས་ཚུལ་ཞུ་རྒྱུ་སོགས་ཀྱི་ཐོག་མུ་མཐུད་དཀའ་ངལ་འཕྲད་བཞིན་ཡོད་པ་སོགས་འགྲེལ་བརྗོད་དང་སྦྲགས། ད་རེས་བོད་མིའི་སྐུ་ཚབ་ཀྱི་ངོས་ནས་གཙོ་བོ་ལྷན་ཚོགས་ཐོག་བོད་ཀྱི་ཁོར་ཡུག་གནད་དོན་སྐོར་ལ་གཏམ་བཤད་དང་ཞུ་གཏུག་གང་མང་གནང་འཆར་ཡོད་པ་གསུངས་སོང་།  དེ་བཞིན་དོན་གྲུབ་དབང་མོ་ལགས་ཀྱིས་ཐེངས་འདིའི་ཞུ་གཏུག་ཁོངས་སུ་གཏན་འབེབས་བྱས་པའི་གནད་དོན་གཙོ་ཁག་ནི་བོད་མཐོ་སྒང་གི་གནམ་གཤིས་ཀྱི་གལ་གནད་དང་དེའི་ཤུགས་རྐྱེན། བོད་ཀྱི་ཁོར་ཡུག་གནས་སྟངས་ཐོག་ཚན་རིག་དང་མཐུན་པའི་ཞིབ་མཇུག་ཚད་ལྡན་དགོས་པ། རྒྱ་ནག་གཞུང་གིས་བོད་ནང་ལ་འཛིན་བཞིན་པའི་ཁོར་ཡུག་གི་སྲིད་བྱུས་དེ་དག་རྒྱ་ནག་རང་ཉིད་ཀྱི་ཁེ་ཕན་ཁོ་ནར་དམིགས་པ་ཞིག་ཡིན་པ་སོགས་གསལ་བཤད་གནང་རྒྱུ་ཡིན་ཞེས་གསུངས་ཡོད། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཁོར་ཡུག་ཉམས་ཞིབ་པ་བློ་བཟང་དབྱངས་མཚོ་ལགས་ཀྱིས་དེ་སྔ་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ལྷན་ཚོགས་ཐེངས་གཉིས་ཐོག་མཉམ་ཞུགས་གནང་བའི་ཉམས་མྱོང་དང་འབྲེལ། བོད་ཀྱི་ཁོར་ཡུག་ཐོག་གཏམ་བཤད་གནང་རྒྱུ་དང་རྒྱལ་སྤྱིའི་འགོ་ཁྲིད་ཀྱི་ཚོགས་འདུ་ཐོག་མཉམ་ཞུགས་གནང་རྒྱུ་ཁག་པོ་ཡོད་ཀྱང་། ཚོགས་འདུ་དང་འབྲེལ་བའི་ལྷན་ཚོགས་གཞན་ཁག་གི་ཐོག་བོད་ཀྱི་ཁོར་ཡུལ་སྐོར་ལ་དྲི་བ་ཕུལ་རྒྱུ་བྱུང་བ་དང་དེ་ནི་གྲུབ་འབྲས་ཤིག་ལ་ངོས་འཛིན་ཞུ་བཞིན་ཡོད་པ་སོགས་གསུངས་ཡོད།