དེ་རིང་ཕྱི་ཟླ་ ༩ པའི་ཚེས་ ༢ ཉིན་བཞུགས་སྒར་རྡ་རམ་ས་ལར་ཚོགས་པའི་བོད་ཀྱི་མང་གཙོའི་དུས་དྲན་ཐེངས་ ༦༤ པའི་གཞུང་འབྲེལ་མཛད་སྒོའི་ཐོག Estonia འི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དབུས་པའི་གྲོས་ཚོགས་འཐུས་མི་ཁག་གཅིག་ནས་ལྷན་བཞུགས་གནང་བ་ལྟར། Estonia འི་རྒྱལ་ས་ Tallinn ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁང་ནས་ཡུལ་དེའི་ཕྱི་སྲིད་ལས་ཁུངས་དང་གྲོས་ཚོགས་བཅས་ལ་ཆེད་དུ་ཡི་གེ་བཏང་སྟེ་གནད་དོན་དེར་སེམས་འཚབ་དང་འབྲེལ་སྐྱོན་བརྗོད་ཤུགས་ཆེ་བྱས་འདུག
དེའང་རྒྱ་ནག་གི་གཞུང་ཚབ་ཁང་གིས་ཡི་གེ་དེའི་ནང་། བོད་ལ་དབྱིན་སྐད་ཐོག་ Tibet ཞེས་པའི་ཚབ་ཏུ་ Xizang ཞེས་པའི་ཐ་སྙད་བཀོལ་སྤྱོད་དང་འབྲེལ། Xizang ཟེར་བ་དེ་ནི་གནའ་རབས་ནས་རྒྱ་ནག་གི་ཆ་ཤས་ཡིན་པ་དང་། བཙན་བྱོལ་བོད་གཞུང་ཟེར་བ་དེ་ནི་ཆབ་སྲིད་ཀྱི་ཁ་བྲལ་ཤོ་ཁག་ཞིག་དང་རྒྱ་ནག་གི་རྩ་ཁྲིམས་ལས་འགལ་བའི་སྒྲིག་འཛུགས་ཤིག་ཡིན་པའི་སྐྱོན་འཛུགས་བྱས་པ་མ་ཟད། ༸གོང་ས་མཆོག་ཀྱང་བཙན་བྱོལ་དུ་བོད་དེ་བཞིན་རྒྱ་ནག་ནས་ཁ་བྲལ་གྱི་ལས་འགུལ་སྤེལ་མཁན་ཆབ་སྲིད་ཀྱི་བཙན་བྱོལ་བ་ཞིག་ཡིན་པའི་སྐྱོིན་འཛུགས་བྱས་འདུག
ཡི་གེ་དེའི་ནང་ Estonia འི་གཞུང་གིས་རྒྱ་ནག་ལ་བོད་དེ་བཞིན་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཤིག་ཡིན་པ་དང་། བོད་རང་བཙན་ལ་རྒྱབ་སྐྱོར་གྱི་ལས་འགུལ་རིགས་ལ་རྒྱབ་སྐྱོར་བྱ་རྒྱུ་མེད་པའི་ཁས་ལེན་བྱས་ཡོད་པ་དྲན་སྐུལ་དང་འབྲེལ། ཡུལ་དེའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་འཐུས་མི་ཁག་གཅིག་བཙན་བྱོལ་བོད་གཞུང་གི་ལྟེ་གནས་ལ་བསྐྱོད་པ་དེ་ནི་ཁས་ལེན་དེ་དག་ལ་རྩིས་མེད་རྡོག་རོལ་དང་རྒྱ་ནག་གི་ནང་སྲིད་གནད་དོན་ལ་ཐེ་བྱུས་ཤིག་ཆགས་ཀྱི་ཡོད་པ་བརྗོད་འདུག
རྒྱ་ནག་གི་གཞུང་ཚབ་ཁང་གིས་ད་དུང་ཡི་གེ་དེའི་བརྒྱུད་ Estonia འི་ཕྱི་སྲིད་ལས་ཁུངས་ནས་ཡུལ་དེའི་གྲོས་ཚོགས་ལ་རྒྱ་ནག་གི་བདག་དབང་དང་ས་ཁོངས་གོང་བུར་བརྩི་བཀུར་ཞུ་དགོས་པ་མ་ཟད། བོད་ཀྱི་གནད་དོན་ཐད་ཡིག་ངག་གཉིས་ཀའི་ཐོག་ཡིད་གཟབ་དང་བཙན་བྱོལ་བོད་གཞུང་ཟེར་བ་དང་ལྷན་དུ་འབྲེལ་བ་ཅི་འདྲ་ཞིག་ཀྱང་བྱ་རྒྱུ་མེད་པའི་སྐུལ་དེད་བཏང་དགོས་པའི་ནན་སྐུལ་བྱས་འདུག