ཕྱི་ལོ་ ༡༩༦༠ ཙམ་ནས་ནུབ་ཕྱོགས་རྒྱལ་ཁབ་སུད་སིར་སྐྱབས་བཅོལ་བ་བོད་མི་ཐོག་མར་འབྱོར་འགོ་བཙུགས་ཡོད།
སུད་སི་ནི་ནུབ་ཕྱོགས་རྒྱལ་ཁབ་ཁྲོད་ནས་སྐྱབས་བཅོལ་བོད་མི་ཐོག་མར་བཞེས་མཁན་གྱི་རྒྱལ་ཁབ་ཆགས་ཀྱི་ཡོད་པ་རེད། སྐབས་དེར་འབྱོར་བའི་བོད་མིའི་ཕྲུ་གུ་ཚོར་དེང་དུས་ཀྱི་ཤེས་ཡོན་གོ་སྐབས་ཐོབ་དོན་བཞིན་ད་ཆ་སུད་སི་ནང་དུ་ལས་རིགས་འདྲ་མིན་ཐོག་མི་རིགས་གཞན་ལྟར་དཔུང་པ་མཉམ་གཤིབ་ཐོག་ནས་ལས་རིགས་གཉེར་གྱི་ཡོད་པ་རེད། དེ་རིང་ང་ཚོའི་བཙན་འབྱོལ་བོད་མིའི་གནས་སྟངས་ངོ་སྤྲོད་ཀྱི་ལས་རིམ་ནང། ཉེ་ཆར་སུད་སི་ཛུ་རིག་མངའ་སྡེའི་ཁྱབ་ཁོངས་སུ་གཏོགས་པའི་ Otwil am see གྲོང་སྡེའི་སྤྱི་ཁྱབ་མང་ཚོགས་ཚད་མཐོའི་འོས་བསྡུའི་ལམ་ལས་གྲོང་སྡེའི་སྤྱི་ཁྱབ་པར་འདེམས་ཐོན་བྱུང་བ་གངས་གཞོན་ཚང་རྣམ་རྒྱལ་ལགས་དང་ལྷན་དུ་གླེང་མོལ་ཞུས་ཡོད།
རྣམ་རྒྱལ་ལགས་ནི་ད་བར་སུད་སིར་བོད་མི་སྐྱབས་བཅོལ་བ་འབྱོར་བ་ནས་བཟུང་སྟེ་བོད་མི་ཞིག་ས་གནས་ཀྱི་གྲོང་སྡེའི་སྤྱི་ཁྱབ་པར་འདེམས་ཐོན་བྱུང་བ་ཆེས་ཐོག་མ་དེ་ཆགས་ཀྱི་ཡོད།
