བཀའ་ཆོས།

དེ་རིང་ཟླ་ ༡༢ ཚེས་ ༡༧ ཉིན་སྔ་དྲོའི་ཆུ་ཚོད་ ༨ ནས་ ༩ བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨིན་དྷི་ནེ་ཤཱི་ཡ། མཱ་ལེ་ཞི་ཡ། འབར་མ། ཤྲིལངྒ། ཐེ་ལན་ཌི་བཅས་ཀྱི་གནས་བརྟན་སྡེ་པའི་རྗེས་འབྲང་པ་རྣམས་ལ་གཙོ་བོར་དམིགས་ཏེ་དྲ་ལམ་བརྒྱུད་མདོ་དྲན་པ་ཉེར་བཞག་གི་བཀའ་ཆོས་དབུ་འཛུགས་བསྐྱངས་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་འབྲེལ་དངོས་སུ་དབུ་འཛུགས་མ་མཛད་གོང་པ་ལིའི་ཆོས་བརྒྱུད་འཛིན་མཁན་དང་ལེགས་སྦྱར་གྱི་ཆོས་བརྒྱུད་འཛིན་མཁན་རྣམས་བཅོམ་ལྡན་འདས་ཀྱི་རྗེས་འབྲང་གཅིག་གྱུར་ཞིག་ཡིན་པ་དང་ལྟ་གྲུབ་མ་འདྲ་བ་ཡོད་པ་ནི་བཅོམ་ལྡན་འདས་སྐུ་དངོས་ཞལ་བཞུགས་པའི་སྐབས་སུའང་བྱེ་བྲག་སྨྲ་བའི་སྡེ་པ་བཅོ་བརྒྱད་ཀྱིས་མཚོན་པའི་རིམ་བཞིན་མདོ་སྡེ་པ་དང་སེམས་ཙམ་པ། དབུ་མ་བ་སོགས་བྱུང་ཡོད་པ་དང་། བཅོམ་ལྡན་འདས་ཀྱིས་རང་དབང་ཆ་ཚང་ང་ཚོར་སྤྲད་དེ་སརྒྱས་ཀྱི་བཀའ་ལ་དཔྱད་པ་བྱེད་དགོས་ཞེས་བཀའ་སྩལ་ཡོད་པ་ལྟར་སརྒྱས་ཀྱི་བཀའ་ལ་ཇི་ཙམ་གྱིས་དཔྱད་པ་གནང་བ་དེའི་ཚོད་ཀྱིས་ངེས་པ་འདྲེན་རྒྱུ་ཤུགས་ཆེ་རུ་འགྲོ་ངེས་ཡིན་སྟབས་དད་པ་ཙམ་གྱི་ཐོག་ནས་རྗེས་སུ་འབྲང་རྒྱུ་ཞིག་ཆགས་ཀྱི་མ་རེད་ཅེས་ལམ་སྟོན་བཀའ་དྲིན་ཆེ་བར་སྩལ་ཡོད།ད་ལྟའི་ཆར་མགོན་པོ་༸གང་ཉིད་མཆོག་གིས་གིས་སྤྱིར་འཛམ་གླིང་ཞི་བདེ་དང་སྒོས་སུ་ཆོས་ལུགས་མཐུན་སྒྲིལ་ཡོང་ཐབས་སུ་ཐུགས་བརྩོན་མཛད་བཞིན་ཡོད་སྐོར་བཀའ་སྩལ་བ་དང་། ཆབས་ཅིག་ཏུ་འཚེ་བ་མི་བྱ་རྒྱུ་དང་སེམས་པ་བཟང་པོ་བྱ་རྒྱུ། དེ་བཞིན་བྱམས་པ་དང་སྙིང་རྗེ་ཉམས་ལེན་བྱ་རྒྱུ་ནི་ཆོས་ལུགས་ཚང་མས་གསུང་བཞིན་པའི་བསླབ་བྱ་གཅིག་མཚུངས་ཤིག་ཡིན་པ་དང་། ལྷག་དོན་རྒྱ་གར་ལྟ་བུར་ཆ་མཚོན་ན་ལོ་ངོ་སུམ་སྟོང་གོང་ནས་འཚེ་མེད་ཞིབ་བ་དང་བྱམས་བརྩེའི་ལྟ་གྲུབ་ཡོད་པའི་རྒྱུ་མཚན་དུ་བྱས་ནས་རྒྱ་གར་ནང་ཆོས་ལུགས་མི་གཅིག་པ་དུ་མ་ཡོད་ཀྱང་ཆོས་ལུགས་ཕན་ཚུན་དབར་མཐུན་སྒྲིལ་གྱི་ཐོག་ནས་གནས་ཀྱི་ཡོད་སྟབས་དེ་ནི་མིག་དཔེ་འོས་པ་ཞིག་ཆགས་ཡོད་ཅེས་བཀའ་སྩལ་སོང་།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ཆོས་སྩལ་གྲུབ་མཚམས་སུ་ཐེ་ལན་ཌི་དང་ཤྲི་ལངྒའི་དགེ་སློང་རྣམ་པས་དོགས་འདྲི་ཕུལ་དོན་བཞིན་ཤྲི་ལངྒའི་དགེ་སློང་ Narangodapaluwe Thero ལགས་ཀྱིས་ཤྲི་ལངྒའི་ནང་མི་འདས་གྲོངས་སུ་གྱུར་སྐབས་དུར་ཁྲོད་དུ་མདོ་དྲན་པ་ཉེར་བཞག་གསུང་འདོན་གནང་སྲོལ་ཡོད་ཀྱང་། དེང་གི་ཆར་དེ་ལྟར་གནང་གི་མི་འདུག་ཅེས་ཞུས་པ་དང་འབྲེལ་ཏེ་མགོན་པོ་༸གང་ཉིད་མཆོག་ནས་སྔགས་ཀྱི་ལམ་སྲོལ་བསྐྱར་གསོ་མཛད་རྒྱུ་དེ་དགོས་གལ་ཇི་ཙམ་གཟིགས་ཀྱི་ཡོད་དམ་ཞེས་བཀའ་འདྲི་དགོངས་སྐོར་ཞུས་པར་༸གོང་ས་མཆོག་གིས་མི་འདས་གྲོངས་སུ་ཕྱིན་སྐབས་མདོ་དྲན་པ་ཉེར་བཞག་འདོན་ཚེ་སརྒྱས་ཀྱི་མཚན་དང་ཆོས་ཚིག་མང་དག་ཅིག་བར་སྲིད་དུ་ཡོད་པའི་འདས་པོའི་རྣམ་ཤེས་ལ་ཐོས་རྒྱུར་ཕན་ཐོགས་ཡོད་པ་མ་ཚད་པར་ཤུལ་ལུས་ནང་མི་སྤུན་མཆེད་རྣམས་ནས་མདོ་དེ་ཐོས་ཚེ་སེམས་ཞི་བར་ཡོང་བ་ལ་ཕན་ཐོགས་ཆེན་པོ་ཡོད་པར་ལམ་སྟོན་བཀའ་དྲིན་ཆེ་བར་མཛད་ཡོད།

དེ་རིང་ཕྱི་ཟླ་ ༡༢ ཚེས་ ༨ ཉིན་གྱི་སྔ་དྲོ་ཆུ་ཚོད་ ༩ ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲ་ཐོག་བརྒྱུད་སེམས་དང་སྲོག་ཚོགས་པས་གོ་སྒྲིག་ཞུས་པའི་ Embracing Hope, Courage and Compassion in Times of Crisis དུས་ཚོད་གཉན་འཕྲང་ཅན་གྱི་སྐབས་སུ་རེ་བ་དང་སྙིང་སྟོབས། བྱམས་བརྩེ་བཅས་དང་དུ་ལེན་པ་ཞེས་པའི་བརྗོད་གཞིའི་ཐོག་གི་བགྲོ་གླེང་གི་ཚོགས་མགོན་དུ་དབུ་བཞུགས་མཛད་ནས་བཟང་སྤྱོད་གོང་འཕེལ་དང་ཆགས་འཇིག་གི་གནས་སྟངས་ཁྲོད་བསམ་བློའི་འཁྱེར་གསོ། དེ་བཞིན་སེམས་ཁམས་རིག་པའི་རྣམ་གཞག་སོགས་ཀྱི་ཐོག་ལ་བཀའ་སློབ་ལམ་སྟོན་དང་བགྲོ་གླེང་ཐོག་ལྷན་ཞུགས་གནང་མཁན་གྱི་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་སྩལ་ཡོད།བགྲོ་གླེང་གི་ཐོག་མར་་སེམས་དང་སྲོག་ཚོགས་པའི་འགན་འཛིན་ལྕམ་ Susan Bauer ལགས་ཀྱིས་མགོན་པོ་༸གང་ཉིད་མཆོག་གིས་དབུས་པའི་བགྲོ་གླེང་ཐོག་ལྷན་ཞུགས་གནང་མན་རྒྱལ་སྤྱིའི་ཚན་རིག་མཁས་པ་དང་སློབ་དཔོན་ཡོངས་ལ་འཚམས་དྲི་ཞུས་ཟིན་མ་ཐག་སེམས་ཁམས་འཕྲོད་བསྟེན་གྱི་སློབ་དཔོན་ Elissa Epel ལགས་ཀྱིས་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་སྐབས་སུ་མིའི་སེམས་ཁམས་ཀྱི་གནས་སྟངས་སྐོར་ལ་ཉམས་ཞིབ་གནང་བའི་གྲུབ་དོན་ཁག་ཅིག་འགྲེལ་བརྗོད་དང་སྦྲགས། ཡིད་བརྟན་མེད་པའི་གནས་སྟངས་རིགས་འཕྲད་སྐབས་ང་ཚོས་གདོང་ལེན་གང་འདྲ་གནང་དགོས་སམ་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་འབྱུང་བའི་གནད་དོན་སོགས་ངེས་གཏན་མེད་པའི་གནས་སྟངས་ཁག་ཅིག་བྱུང་གི་ཡོད་ཀྱང་འཛམ་གླེང་ཐོག་ཡོད་པའི་དཀའ་ངལ་མང་པོ་ཞིག་ང་ཚོ་མི་རྣམས་ཀྱིས་ཕུགས་རྒྱང་རིང་པོའི་བསམ་བློ་མ་འཁོར་བ་དང་ང་འཛིན་གྱི་བསམ་བློ་ཆེ་བ་སོགས་ཀྱིས་བཟོས་པ་ཞིག་ཡིན་པར་བཀའ་འགྲེལ་དང་སྦྲགས་ཏེ་འགྲོ་བ་མི་རྣམ་པའི་རང་བཞིན་ལྷན་སྐྱས་སུ་བྱམས་བརྩེ་དང་གཞན་ཕན་གྱི་བསམ་བློ་ཡོད་པ་དེ་གོང་འཕེལ་ཐུབ་ཚེ་རང་བཞིན་གྱི་དཀའ་ངལ་ཉུང་དུ་གཏང་ཐུབ་པར་མ་ཟད་རང་ཉིད་སྒེར་གྱི་མི་ཚེ་སྐྱིད་པ་དང་ལྷག་དོན་སྤྱི་ཚོགས་དང་འཛམ་གླིང་སྤྱིའི་ཞི་བདེ་ལའང་ཕན་ཐོགས་ཡོང་ཐུབ་ཀྱི་རེད་ཅེས་བཀའ་སྩལ་ཡོད།མགོན་པོ་༸གང་ཉིད་མཆོག་ནས་ཞི་བདེ་ལྡན་པའི་འཛམ་གླིང་ཞིག་ཡོང་བར་ང་ཚོས་ད་ཡོད་ཤེས་ཡོན་ལམ་ལུགས་ནང་ལ་འགྲོ་བ་མིའི་རང་བཞིན་ལྷན་སྐྱེས་སུ་ཡོད་པའི་བཟང་པོའི་ཆ་དེ་དག་ཆོས་ཀྱི་ངོ་བོའི་ཐོག་ནས་མིན་པར་ཤེས་བྱའི་ངོ་བོའི་ཐོག་ནས་སློབ་ཁྲིད་ཐུབ་གལ་ཡིན་པར་བཀའ་སྩལ་སོང་།བགྲོ་གླེང་ཐོག་མཉམ་ཞུགས་གནང་བ་ Arizona མངའ་སྡེའི་གཙུགས་ལག་སློབ་ཁང་གི་སེམས་ཁམས་རིག་པའི་སློབ་དཔོན་ Lani...

༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཟླ་ ༡༢ དང་༡ པོ་ནང་བཞུགས་སྒར་༸རྒྱལ་བའི་ཕོ་བྲང་གི་གཟིམ་ཆུང་ནས་དྲྭ་ལམ་བརྒྱུད་བཀའ་ཆོས་དང་བཀའ་སློབ་ཁག་ཅིག་བསྐྱང་གཏན་ཁེལ་དོན་ལྟར་མཛད་འཆར་ཁག་ཅིག་ཡོངས་ཁྱབ་གནང་འདུག༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་ ༡༢ ཚེས་ ༡ ཉིན་རྒྱ་གར་གྱི་སྔ་དྲོ་ཆུ་ཚོད་ ༩ ནས་ ༡༠ བར་འཛམ་གླིང་ཡེ་ཤུའི་སྒོམ་སྒྲུབ་ཚོགས་སྡེ་ (World Community of Christian Meditation)  ཞེས་པ་བཙུགས་ནས་ལོ་ངོ་སུམ་ཅུ་འཁོར་བའི་དུས་དྲན་དང་བསྟུན་ཚོགས་པ་གསར་འཛུགས་གནང་མཁན་དང་དགེ་རྒན་ཡེ་ཤུའི་གྲྭ་བ་ཧྥ་དྷར་ལོ་རེན་སི་ཧྥརི་མེན་ (Father Laurence Freeman) མཆོག་དང་ལྷན་དུ་ Unified Consciousness:...

དེ་རིང་ཞོགས་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་དབུས་གཞུང་ནང་སྲིད་ལས་ཁུངས་ཀྱི་རྒྱལ་ཡོངས་རང་བྱུང་གནོད་སྐྱོན་འགོག་སྲུང་ལྷན་ཁང་གིས་ཇི་ལྟར་གསོལ་འདེབས་ཞུས་པ་ལྟར་དྲ་ལམ་བརྒྱུད་སྙིང་རྗེ་དང་བརྩེ་བ་ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་ཆེ་བར་སྩལ་དོན་ལྟར་མིའི་བྱ་བ་གང་འདྲ་ཞིག་ཡིན་ཀྱང་བྱ་བ་དེ་ཕན་ཐོགས་ཡོད་པའི་སྒོ་ནས་ཚད་དང་ལྡན་པ་ཞིག་ཡོང་མིན་ནི་ཀུན་སློང་ལ་རག་ལས་ཀྱི་ཡོད་སྟབས་བྱམས་དང་རྙིང་རྗེ་དེ་རྩ་བ་ཆགས་ཀྱི་ཡོད་པར་བཀའ་སྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་ཐོག་མར་ཚོགས་བཅར་བ་ཡོངས་ལ་ནམསྟེ་ཞེས་འཚམས་འདྲིི་སྩལ་བ་དང་སྦྲགས། རྒྱ་གར་དང་བོད་གཉིས་ནི་དམིགས་བསལ་གྱི་ཐུན་མོང་མ་ཡིན་པའི་འབྲེལ་བ་ཡོད་སྐོར་བཀའ་སྩལ་བར་མ་ཟད་དུས་རབས་བདུན་པ་ཆོས་རྒྱལ་སྲོང་བཙན་གྱི་སྐུ་དུས་སུ་རྒྱ་ནག་གོང་མའི་སྲས་མོ་བཙུན་མོར་བཞེས་པ་སོགས་འབྲེལ་བ་ཆེན་པོ་བྱུང་ཡོད་ཀྱང་། རྒྱ་ནག་གི་སྐད་ཡིག་སྦྱོང་རྒྱུའི་ཚབ་ཏུ་བོད་རང་གི་སྐད་ལ་བརྟེན་པའི་ཡི་གེ་ཞིག་དགོས་གལ་གཟིགས་ནས་རྒྱ་གར་གྱི་ཡི་གེར་དཔེར་བླངས་ཏེ་བོད་ཡིག་གསར་བཟོ་མཛད་པ་དང་དུས་རབས་བརྒྱད་པའི་ནང་ཆོས་རྒྱལ་ཁྲི་སྲོང་ལྡེའུ་བཙན་གྱི་སྐུ་དུས་སུ་མཁན་ཆེན་ཞི་བ་འཚོ་བོད་དུ་གདན་འདྲེན་ཞུས་ནས་བཀའ་འགྱུར་པོད་བརྒྱ་ལྷག་དང་དེའི་འགྲེལ་པ་བསྟན་འགྱུར་པོད་ཉིས་བརྒྱ་ལྷག་ཙམ་བོད་སྐད་དུ་བསྒྱུར་ཡོད་པ་སོགས་ལོ་རྒྱུས་ཀྱི་ཐོག་ནས་རྒྱ་གར་ནི་གནས་ཁྱད་པར་ཅན་ཆགས་སའི་རྒྱལ་ཁབ་ཙམ་མིན་པར་ནང་ཆོས་དང་འབྲེལ་བའི་བཀའ་དང་བསྟན་ཆོས་ཀྱི་འབྱུང་ཁུངས་ཤིག་ཡིན་པ་བཀའ་སྩལ་ཡོད།   དེ་བཞིན་བོད་བརྒྱུད་ནང་བསྟན་ལྟ་བུར་ཆ་མཚོན་ན་བླ་མས་གསུང་ལ་དད་པ་བྱ་རྒྱུ་ཙམ་མིན་པར་རྒྱུ་མཚན་གཙོ་བོར་བཟུང་མཁན་གྱི་ཆོས་བརྒྱུད་ཅིག་ཡིན་པར་མ་ཟད་དེང་དུས་ཀྱི་མཚན་རིག་དང་མཉམ་དུ་ནང་ཆོས་ཀྱི་ལྟ་གྲུབ་དང་འབྲེལ་ནས་དངོས་ཡོད་གནས་ཚུལ་ལ་བགྲོ་གླེང་གནང་རྒྱུར་ཐེ་ཚོམ་གང་ཡང་མེད་པར་གནང་རྒྱུ་ཡོད་པ་དེ་ནི་རྒྱ་གར་གྱི་རིག་གནས་ལ་བརྟེན་ནས་བྱུང་བ་ཞིག་ཡིན་པར་བཀའ་སྩལ་སོང་བ་དང་ཆབས་ཅིག རྒྱ་གར་ནི་ནང་པའི་རིག་གནས་འབྱུང་ཁུངས་ཀྱི་བསྟི་གནས་ཤིག་ཡིན་པར་བཀའ་སྩལ་ཡོད། དབྱིན་ཇིས་བཙན་བཟུང་བྱས་པ་ནས་གཏན་འབེབས་བྱས་པའི་དེང་དུས་ཀྱི་སློབ་སྦྱོང་ལ་དོ་དབྱིངས་དང་དར་ཁྱབ་ཆེན་པོ་བྱུང་ཡོད་སྟབས། རྒྱ་གར་རང་ཉིད་ཀྱི་ཐུན་མིན་གནའ་བོའི་རིག་གཞུང་ལ་འཐུས་ཤོར་ཆེན་པོ་ཕྱིན་པ་དེ་ལྟར་ནའང་། རྒྱ་གར་གྱི་རྒྱལ་ཁབ་ལ་དེང་དུས་ཀྱི་ཤེས་ཡོན་དང་རྒྱ་གར་གྱི་གནའ་རབས་ཤེས་ཡོན་གཉིས་ཟུང་འབྲེལ་གྱིས་གོ་ལ་སྤྱིར་ཞབས་འདེགས་རླབས་ཆེན་ཞུ་རྒྱུའི་ནུས་པ་དམིགས་བསལ་བ་ཞིག་ལྡན་ཡོད་པར་ལམ་སྟོན་བཀྲིན་ཆེ་བ་མཛད་ཡོད།མགོན་པོ་༸གང་ཉིད་མཆོག་གིས་ད་དུང་རྒྱག་གར་གྱི་གཙུག་ལག་སློབ་གྲྭ་ཆེན་མོ་ཁག་གི་སློབ་དཔོན་དང་མཉམ་དུ་རྒྱ་གར་གྱི་གནའ་བོའི་རིག་གནས་དང་དེང་དུས་ཀྱི་ཤེས་ཡོན་གཉིས་ཇི་ལྟར་ཟུང་འབྲེལ་གནང་དགོས་མིན་ཐོག་ལ་བཀའ་བསྡུར་མཛད་རྒྱུའི་དགོངས་པ་ཡོད་ཅེས་བཀའ་སྩལ་ཡོད།    ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་བསྩལ་གྲུབ་མཚམས་སུ་བཀའ་འདྲི་དགོངས་སྐོར་ཁག་ལ་བཀའ་ལན་སྩོལ་སྐབས་སློན་དཔོན་ཝི་ནོད་ལགས་ཀྱིས་གོ་ལ་འདིའི་ནང་ཆོས་ལུགས་ཀྱི་ལྟ་བ་མི་འདྲ་བར་བརྟེན་ནས་དབྱེ་འབྱེད་ཀྱི་གནས་སྟངས་འབྱུང་བཞིན་ཡོད་སྟབས། བྱམས་པ་དང་སྙིང་རྗེའི་ཐོག་ནས་ངལ་བ་སེལ་ཐབས་གང་འདྲ་གནང་དགོས་སམ་ཞེས་བཀའ་འདྲི་ཞུས་པར་༸གོང་ས་མཆོག་གིས་བྱམས་པ་དང་སྙིང་རྗེའི་བསླབ་བྱ་བཟང་པོ་སྟོན་མཁན་གྱི་ཆོས་ལུགས་ཀུན་ལ་ཡིད་ཆེས་གནང་དགོས་པ་དང་ལྟ་གྲུབ་ཀྱི་སྒོ་ནས་མི་འདྲ་བ་ཡོད་ཀྱང་དམིགས་ཡུལ་གཙོ་བོ་ནི་ལྟ་གྲུབ་དེ་ལ་བརྟེན་ནས་གྲུབ་བྱ་སྙིང་རྗེ་དང་ནང་སམས་ཀྱི་ཞི་བདེ་བསྐྲུན་རྒྱུའི་ཐབས་ཤེས་ཤིག་ཡིན་པར་བཀའ་སྩལ་སོང་། དེ་བཞིན་ཤྲི་ལངྒ་ནས་ཨེམ་ཨེས་མཱདྷ་བཱི་ལགས་ཀྱིས་གོད་ཆག་ཀྱི་ངལ་བ་འོག་ཚུད་པའི་མི་ཞིག་གིས་རང་གི་སེམས་དེ་གཞན་དབང་དུ་མི་སོང་བར་སེམས་བརྟན་པོར་གནས་ཐབས་གང་གནང་དགོས་སམ་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་དཀའ་ངལ་དངོས་སུ་མྱོང་བཞིན་པའི་སྐབས་སུ་བྱམས་པ་སྒོམ་རྒྱུའི་གོ་སྐབས་ཤིག་བསྐྲུན་གལ་ཡིན་པ་ལས་སེམས་ཞུམ་རྒྱུ་མེད་པར་བཀའ་སྩལ་ཡོད།    

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་མོན་མའོ་ཐི་གཙུག་ལག་སློབ་གཉེར་ཁང་གི་དགེ་ལས་ལ་བཀའ་སློབ་སྩལ་སྐབས་ང་ཚོའི་ངོས་ནས་གོ་མཚོན་སྤྱོད་རྒྱུ་མཚམས་འཇོག་དགོས་པའི་དུས་ལ་བསླེབས་ཡོད་པ་དང་གོ་མཚོན་དང་མ་འབྲེལ་བའི་ཐོག་ནས་ཞི་བདེ་སྐྲུན་རྒྱུར་འབད་གནད་ཡིན་པར་ལམ་སྟོན་སྩལ་ཡོད།ཨ་རིའི་མོན་མའོ་ཐི་གཙུག་ལག་སློབ་གཉེར་ཁང་ Monmouth University གྱིས་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་བ་བཏབ་པ་ལྟར་༸མགོན་པོ་མཆོག་གིས་དེ་རིང་བཞུགས་སྒར་༸རྒྱལ་བའི་ཕོ་བྲང་གི་གཟིམ་ཆུང་ནས་རྒྱ་གར་གྱི་སྔ་དྲོར་དེ་གའི་དགེ་ལས་རྣམས་ལ་ Our Happiness, Our Health, Our Future ཞེས་རང་རེའི་བདེ་སྐྱིད་དང་འཕྲོད་བསྟེན། མ་འོངས་བཅས་ཀྱི་སྐོར་བཀའ་སློབ་དང་བཀའ་འདྲི་དགོངས་སྐོར་ཞུས་པ་ཁག་ལ་བཀའ་ལན་སྩལ་བར་༸གོང་ས་མཆོག་གིས་སྤྱིར་འགྲོ་བ་མི་ལྟ་ཅི། ཐ་ན་སྲོག་ཆགས་གྲོག་སྦུར་ཚོའང་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་གྱུར་ཡིན་པ་དང་སྒོས་འགྲོ་བ་མིར་ཆ་མཚོན་ན་སེམས་ཅན་གཞན་དང་མི་འདྲ་བའི་རྣམ་དཔྱོད་ལྡན་པ་དང་ཕུགས་རྒྱང་རིང་རིང་པོར་བསམ་བློ་གཏོང་ཐུབ་པའི་ནུས་པ་ཡོད་ཀྱང་། འདས་པའི་ལོ་རྒྱུས་ལ་ཕྱིར་མིག་བལྟས་ཚེ་འཛམ་གླིང་ནང་རྙོག་ཟིང་དེ་དག་བཟོ་མཁན་གཙོ་བོ་བཟོ་འགྲོ་བ་མི་ཆགས་ཀྱི་ཡོད་པར་བཀའ་སྩལ་ཡོད། དེ་བཞིན་མགོན་པོ་༸གང་ཉིད་མཆོག་གིས་ཞི་བདེ་ཡོང་བར་གོ་མཚོན་སྤྱོད་ནས་ཡོང་རྒྱུ་མེད་པ་དང་གལ་ཏེ་འདས་པའི་དུས་ཡུན་ནང་གོ་མཚོན་སྤྱོད་མེད་ཚེ་འཛམ་གླིང་འདི་ཞི་བདེ་བག་ཕེབས་ཅན་ཞིག་ཏུ་གྱུར་ཡོད་པ་མ་ཟད་ལྷག་པར་དུ་དེང་རབས་མཚོན་ན་སྔར་དང་མི་འདྲ་བར་ཕན་ཚུན་དབར་གཅིག་ལ་གཅིག་བརྟེན་གྱི་འདུ་ཤེས་ཤུགས་ཆེ་ཡོད་སྟབས་ད་ཆ་ང་ཚོའི་ངོས་ནས་གོ་མཚོན་སྤྱོད་རྒྱུ་མཚམས་འཇོག་དགོས་པའི་དུས་ལ་བསླེབས་ཡོད་པ་དང་གོ་མཚོན་དང་མ་འབྲེལ་བའི་ཐོག་ནས་ཞི་བདེ་སྐྲུན་རྒྱུར་འབད་གནད་ཡིན་པར་ལམ་སྟོན་བཀྲིན་ཆེ་བ་སྩལ་ཡོད།མགོན་པོ་༸གང་ཉིད་མཆོག་གིས་དོན་དམ་པའི་ཞི་བདེ་ནི་ནང་བསམ་པའི་ཐོག་ནས་ཡོང་དགོས་པ་དང་ཁོང་ཁྲོ་དང་ཕྲག་དོག སུན་སྣང་བཅས་ལས་འཚེ་བའི་བློ་ཡོང་གི་ཡོད་སྟབས་ང་ཚོས་འགྲོ་བ་མིར་རང་ཆས་སུ་ཡོད་པའི་བཟང་པོའི་ཡོན་ཏན་སེམས་བཟང་པོ་ལྟ་བུ་ངེས་པར་དུ་སྐྱེས་རྒྱུར་འབད་རྩོན་གནང་དགོས་པ། ལྷག་དོན་འགྲོ་བ་མི་ནི་སྤྱི་ཚོགས་སེམས་ཅན་ཞིག་ཡིན་པས་སེམས་ཅན་གཞན་ལ་སེམས་འཁུར་གྱི་རྣམ་པ་ཡོད་ཅིང་། དེ་སྔ་ང་ཚོས་སོ་སོའི་ནང་མི་དང་རྒྱལ་ཁབ། སྤྱི་ཚོགས་ཁོ་ནའི་ཆེད་དུ་དགོངས་པ་བཞེས་ཀྱི་ཡོད། ད་ཆ་ང་ཚོས་སྔར་བཞིན་མིན་པར་འཛམ་གླིང་སྤྱི་དང་འགྲོ་བ་མི་ཡོངས་ལ་ཁྱབ་པའི་སེམས་འཁུར་གྱི་ཐོག་ནས་དགོངས་པ་བཞེས་གལ་ཡིན་སྐོར་བཀའ་སྩལ་སོང་། ༸གོང་ས་མཆོག་གིས་ང་ཚོས་ནང་སེམས་ཀྱི་ཞི་བདེ་གོང་མཐོར་ཐད་འབད་བརྩོན་གནང་དགོས་པར་བཀའ་སྩལ་དང་འབྲེལ་ནས་དེ་རིང་སྔ་དྲོར་ཕྱི་ལུགས་དང་བོད་ལུགས་གཉིས་ཀྱི་སྨན་པས་མགོན་པོ་༸གང་ཉིད་མཆོག་ལ་༸སྐུའི་འཕྲོད་བཞེས་བརྟག་དཔྱད་ཞུས་ཡོད་པ་དང་མགོན་པོ་༸གང་ཉིད་མཆོག་གི་༸སྐུའི་འཕྲོད་བཞེས་ལ་མཚོན་ན་༸སྐུ་ཁམས་གསལ་ཐང་ཡིན་སྐོར་བཀའ་སྩལ་ཏེ། ༸སྐུ་ཁམས་གསལ་ཐང་ཡིན་པ་དེ་ནི་གསོ་སྨན་ཙམ་མིན་པར་རྣམ་ཀུན་ནས་དགོངས་པ་བཞེས་ཕྱོགས་ཀྱི་ཐོག་ནས་༸སྐུའི་འཕྲོད་བཞེས་ཡག་པོ་བྱུང་བ་ཞིག་ཡིན་སྐོར་བཀའ་སྩལ་ཡོད།མགོན་པོ་༸གང་ཉིད་མཆོག་གི་བཀའ་སློབ་གྲུབ་མཚམས་སུ་བཀའ་འདྲི་དགོངས་སྐོར་ཞུ་རྒྱུའི་གོ་སྐབས་སྩལ་དོན་ལྟར་དགེ་ལས་རྣམས་ནས་བརྗོད་གཞི་འདྲ་མིན་ཐད་བཀའ་འདྲི་ཞུས་པ་དང་དེའི་ཁྲོད་གང་ཟག་གཅིག་གིས་གོ་ལའི་གནམ་གཤིས་འགྱུར་ལྡོག་དེས་མ་འོངས་པར་ཤུགས་རྐྱེན་ཇི་ཐེབས་དང་གནམ་གཤིས་འགྱུར་ལྡོག་གི་སྐུ་ངལ་སེལ་བར་ང་ཚོས་གང་ཞུ་དགོས་སམ་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་ད་ཆ་འཕྲད་བཞིན་པའི་གོ་ལའི་གནམ་གཤིས་འགྱུར་ལྡོག་གི་ཤུགས་རྐྱེན་ཁག་བཀའ་འགྲེལ་མཛད་པ་དང་སྦྲགས། ང་ཚོས་འདས་པོའི་ལོ་ངོ་བཅུ་ཕྲག་རིང་གི་གོ་ལའི་གནམ་གཤིས་འགྱུར་ལྡོག་ལ་དོ་སྣང་བྱེད་དགོས་གལ་ཡིན་པ་དང་། ལྷག་དོན་བོད་ལྟ་བུར་མཚོན་ན་ཨེ་ཤ་ཡའི་ཆུ་བོ་མང་དག་ཅིག་གི་འབྱུང་ཁུངས་ཆགས་ཡོད་སྟབས། བོད་ནང་གི་ནགས་ཚལ་དང་ཆུ་བོ་དེ་དག་སྲུང་སྐྱོབ་གནང་རྒྱུ་ནི་ཆེས་ཤིན་ཏུ་གལ་ཆེན་པོ་ཡིན་པ་སོགས་ལམ་སྟོན་བཀྲིན་ཆེ་བ་མཛད་ཡོད་པ་རེད།གཞི་རྩའི་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་རྐྱེན་གྱིས་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་ཁག་དྲ་ཐོག་ནས་སྐྱོང་བཞིན་ཡོད་པ་དང་། དྲ་རྒྱ་ཐོག་ནས་གསན་གཟིགས་གནང་མཁན་ཡོངས་ནས་ས་གནས་སོ་སོར་བཅས་པའི་སྤྱི་ཚོགས་རྒྱང་བཀྱེད་སོགས་གཉན་རིམས་སྔོན་འགོག་གི་བྱ་གཞག་ཁག་འཐུས་ཤོར་མེད་པར་བསྟེན་དགོས་ཀྱི་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ཞེས་པ་དེ་འདོན་པ་འདོན་རྒྱུ་དང་སྨོན་ལམ་རྒྱག་རྒྱུ་ཁོ་ན་ཙམ་མིན་པར་གཙོ་བོ་དུག་གསུམ་གྱི་དབང་སྒྱུར་འོག་ཚུད་པའི་རྨོངས་པའི་ཤེས་པ་དེ་དག་སེལ་བར་ཤེས་རབ་ཀྱི་སྣང་བ་འབར་བའི་ཐོག་ནས་སེལ་དགོས་པར་ལམ་སྟོན་སྩལ་སོང་།དེ་རིང་སྔ་དྲོ་ཆུ་ཚོད་ ༩ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་སིངྒ་པོར་ནང་པའི་ཆོས་ཚོགས་གཙོས་པའི་ལྷོ་ཤར་ཨེ་ཤ་ཡའི་ནང་པའི་ཆོས་ཚོགས་ཁག་བཅུས་ཇི་ལྟར་གསོལ་བ་བཏབ་པ་ལྟར་སློབ་དཔོན་ཟླ་བ་གྲགས་པས་མཛད་པའི་དབུ་མ་འཇུག་པའི་རང་འགྲེལ་གྱི་བཀའ་ཆོས་དབུ་འཛུགས་མཛད་པ་དེ་འཕྲོ་སྐྱོང་དང་ཆབས་ཅིག ནང་པའི་ཆོས་སྤྱི་དང་ལྷག་པར་དུ་ཤེར་ཕྱིན་གྱི་གཞུང་དེ་དག་གི་དགོས་པ་གང་ཡིན་ཤེས་དགོས་གལ་ཡིན་པ་དང་། ཆོས་ཞེས་པ་དེ་འདོན་པ་འདོན་རྒྱུ་དང་སྨོན་ལམ་རྒྱག་རྒྱུ་ཁོ་ན་ཙམ་མིན་པར་གཙོ་བོ་དུག་གསུམ་གྱི་དབང་སྒྱུར་འོག་ཚུད་པའི་རྨོངས་པའི་ཤེས་པ་དེ་དག་སེལ་བར་ཤེས་རབ་ཀྱི་སྣང་བ་འབར་བའི་ཐོག་ནས་སེལ་དགོས་པར་ལམ་སྟོན་སྩལ་སོང་།མགོན་པོ་༸གང་ཉིད་མཆོག་གིས་སྟོང་ཉིད་དང་བདག་མེད་ཀྱི་རྣམ་གཞག་དང་འབྲེལ་ཤེས་རབ་སྙིང་པོ་ནི་སངས་རྒྱས་ཆོས་ཀྱི་སྙིང་པོ་ཞིག་ཡིན་པ་དང་། དེའང་སྟོང་པ་ཉིད་དང་བདག་མེད་པའི་རྣམ་གཞག་དེ་ནི་སངས་རྒྱས་ཆོས་ཀྱི་གྲུབ་མཐའ་སྨྲ་བ་ཚང་མས་གསུངས་ཡོད་པ་སོགས་ངོ་སྤྲོད་མཛད་པ་མ་ཟད། ལྷག་པར་དུ་སངས་རྒྱས་ཀྱི་ཆོས་ནང་གསུངས་པའི་སྡུག་བསྔལ་དང་བདེ་བ་ཞེས་པ་ནི་རྒྱུ་དང་རྐྱེན་ལ་བརྟེན་ནས་བྱུང་དགོས་པ་དང་། སྡུག་བསྔལ་གྱི་རྒྱུ་གཙོ་བོ་མ་རིག་པ་དེ་ནི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཐོག་ནས་སེལ་དགོས་པ་དང་། ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱི་བསམ་བློ་ཇི་ཙམ་ཡོད་པ་དེའི་ཚོད་ཀྱིས་བླང་དོར་གྱི་གནས་ཤེས་ཐུབ་པ་སོགས་༸སྐུ་དངོས་ཀྱི་མྱོང་བ་དང་བཅས་ཏེ་བཀའ་སྩལ་ཡོད།དེ་བཞིན་དེ་རིང་གི་བཀའ་ཆོས་རེ་ཞིག་མཇུག་སྒྲིག་དང་བསྟུན་མགོན་པོ་༸གང་ཉིད་མཆོག་གིས་དྲ་ཐོག་ཏུ་ལྷན་ཞུགས་གནང་བའི་དད་ལྡན་ཆོས་ཞུ་བ་ཁག་ཅིག་གིས་དགེ་མི་དགེའི་ལས་དང་སེམས་སྡུག་རིགས་བྱུང་སྐབས་གདོང་ལེན་ཇི་ལྟར་གནང་ཚུལ་སོགས་ཀྱི་ཐད་ལ་བཀའ་འདྲི་དགོངས་སྐོར་ཞུས་ཁག་བཀའ་ལན་མཛད་ཡོད།ལྷག་པར་དུ་ཆོས་ཞུ་བ་རྒན་གྲས་ཤིག་གིས་འཆི་ལ་ཉེ་བའི་སྐབས་སུ་དགོངས་པ་བཞེས་ཕྱོགས་གང་འདྲ་དགོས་མིན་ཐད་ལ་བཀའ་འདྲི་ཞུས་ཡོད་པ་དང་། མགོན་པོ་༸གང་ཉིད་མཆོག་གིས་འཆི་ལ་ཉེ་བའི་སྐབས་སུ་ཆགས་སྡང་དང་འབྲེལ་བའི་དགོངས་པ་མ་བཞེས་པར་རང་ཉིད་ཀྱི་མདུན་དུ་བདག་ཅག་གི་སྟོན་པ་ཐུབ་པའི་དབང་པོའི་སྐུ་བརྙན་དང་། ཡང་ན་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་བཞག་ནས་སོ་སོའི་ཤེས་པ་རགས་པ་དེ་དེར་ཐིམ་པའི་བསམ་བློ་རྩེ་གཅིག་ཏུ་གནས་ཐུབ་ཚེ་དགེ་མཚན་ཆེན་པོ་ཡོད་པ་སོགས་ལམ་སྟོན་བཀའ་དྲིན་ཆེ་བ་སྩལ་ཡོད།ཐེངས་འདིའི་ཉིན་གྲངས་གཉིས་ཀྱི་བཀའ་ཆོས་དང་བཀའ་འདྲི་དགོངས་སྐོར་ཞུ་རྒྱུའི་མཛད་རིམ་ཁག་ལེགས་པར་གྲུབ་མཚམས་སུ་མགོན་པོ་༸གང་ཉིད་མཆོག་གིས་དད་ལྡན་ཆོས་ཞུ་བ་རྣམས་ལ་ཐུགས་བརྩེ་བ་ཆེན་པོའི་ཐོག་ནས་ཐམས་བཅད་རྣལ་འབྱོར་གྱི་སེམས་བསྐྱེད་བཀའ་དྲིན་ཆེ་བ་སྩལ་ཡོད།

དེ་རིང་སྔ་དྲོར་ཀོ་རི་ཡ་བོད་དགོན་བསླབ་གསུམ་བཤད་སྒྲུབ་གླིང་གིས་ཇི་ལྟར་གསོལ་བ་བཏབ་པ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲ་ལམ་ཐད་གཏོང་བརྒྱུད་བྱམས་བརྩེ་དང་འཚེ་མེད་ཞི་བའི་ Compassion and Non-Violence སྐོར་ལ་བཀའ་སློབ་ལམ་སྟོན་སྩལ་ཡོད་པ་རེད། མགོན་པོ་༸གང་ཉིད་མཆོག་གིས་སྐབས་དེར་འགྲོ་བ་མིའི་རིགས་ལ་ཁམས་དང་མོས་པ་སྣ་ཚོགས་ཡོད་པར་བརྟེན་ནས་ཆོས་ལུགས་ཀྱི་ལྟ་གྲུབ་ཀྱང་མི་འདྲ་བ་ཡོད་པ་དང་དེ་ལྟར་ཡོད་པ་དེས་ཀྱང་འགྲོ་བ་མིར་ཕན་ཐོགས་ཡོང་གི་ཡོད་པ་མ་ཟད་སེམས་བཟང་པོ་བྱ་རྒྱུ། གཞན་ལ་གནོད་འཚེ་སྤང་བ། བྱམས་བརྩེ་ཉམས་ལེན་བྱ་རྒྱུ་དེ་ཆོས་ལུགས་ཚང་མས་བསླབ་བྱ་གཅིག་གྱུར་གནང་གི་ཡོད་པར་བཀའ་སྩལ་བ་དང་སྦྲགས། འདས་པའི་ལོ་རྒྱུས་ནང་ཆོས་ལུགས་མི་འདྲ་བའི་རྒྱུ་མཚན་དུ་བྱས་ནས་མི་ཕན་ཚུལ་དབར་གསོད་རེས་བྱས་ཡོད་ཀྱང་། སླད་མར་ང་ཚོས་རྒྱ་གར་གྱི་ཆོས་ལུགས་མཐུན་སྒྲིལ་ལས་ལེགས་བྱ་བཞེས་དགོས་གལ་ཡིན་པར་ལམ་སྟོན་བཀྲིན་ཆེ་བ་སྩལ་ཡོད།༸གོང་ས་༸སྐྱབས་མགོན་ཆེན་པོ་མཆོག་གིས་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་ཀྱིས་གསུངས་པ་ལྟར་སེམས་ཅན་གྱི་སྡུག་བསྔལ་དེ་སརྒྱས་བཅོམ་ལྡན་འདས་རྣམས་ཀྱི་ཕྱག་གིས་མི་སེལ་བ་དང་འགྲོ་བའི་སྡིག་པ་ཆུ་ཡིས་མི་འཁྲུ་ཞིང༌། སྟོན་པའི་ཐུགས་རྒྱུད་དུ་ཡོད་པའི་ཡོན་ཏན་ནམ་སྤངས་རྟོགས་ཀྱི་མཁྱེན་པ་དེ་ང་ཚོར་སྤོ་རྒྱུ་མེད་པ་རེད་ཅེས་བཀའ་བ་སྩལ་དང་ཆབས་ཅིག་ཏུ་ཆོས་བྱོས་ཤིག་ཅེས་བརྗོད་སྐབས་སྒོ་ལྔའི་ཤེས་པ་དག་གི་སྟེང་ནས་ཡོང་རྒྱུ་མེད་པར་གཙོ་བོ་ཡིད་བློའི་ཐོག་ནས་སེམས་མ་འཁྲུག་པ་བྱ་རྒྱུ་དང་། ཡིད་བློར་བསྒྱུར་བཅོས་གཏོང་བར་ཆོས་རབ་ཏུ་རྣམ་འབྱེད་ཀྱི་ཤེས་རབ་དེ་གལ་ཆེན་པོ་ཡིན་པར་བཀའ་སྩལ་སོང་། ༸གོང་ས་མཆོག་གིས་བཀའ་སློབ་ལམ་སྟོན་སྩལ་གྲུབ་མཚམས་སུ་ཐུགས་བརྩེ་བ་ཆེན་པོས་མང་ཚོགས་ཀྱི་དོགས་དྲིར་བཀའ་ལན་སྩོལ་སྐབས་ Joong-Ang Sangha གཙུག་ལག་སློབ་གཉེར་ཁང་གི་སློབ་དཔོན་ཞིག་གིས་ནད་ཡམས་འདིའི་དབང་གིས་མིའི་བསམ་བློ་དང་དཔལ་འབྱོར་སོགས་ལ་དཀའ་ངལ་ཆེས་ཆེར་འཕྲད་བཞིན་ཡོད་པ་མ་ཟད་ཡུལ་ལུང་མང་པོར་ཆུ་ལོག་དང་རླུང་འཚུབ། མེའི་འཇིགས་པ་སོགས་རིམ་པར་འབྱུང་བཞིན་ཡོད་སྟབས་དཀའ་ངལ་དེ་དག་ལ་གདོང་ལེན་ཇི་ལྟར་གནང་དགོས་སམ་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་འཛམ་གླིང་འདིར་མིའི་འགྲོ་བ་ཆགས་ནས་ལོ་ས་ཡ་དང་བྱེ་བ་མང་པོ་སོང་ཟིན་པ་ཞིག་དང་། སངས་རྒྱས་བཅོན་ལྡན་འདས་ཕེབས་སྐབས་ཚེ་ལོ་བརྒྱ་པའི་དུས་ཞེས་བརྗོད་ཀྱི་ཡོད་ཀྱང་དུས་ཚོད་དེའི་ནང་འབྱུང་བའི་འགྱུར་ལྡོག་རིམ་པ་དང་མིའི་ཚེའང་ཐུང་དུ་འགྲོ་བཞིན་ཡོད་པ་ལྟར་ད་ལྟའི་དུས་རབས་ཀྱི་མཐའ་མ་དེ་མེ་འཇིགས་ཀྱི་ཕྱོགས་སུ་ཆས་ཀྱི་ཡོད་སྟབས། གསོན་པའི་དུས་འདིར་མིའི་རྣམ་དཔྱོད་ལེགས་པར་སྤྱད་དེ་མི་ལུས་དོན་ལྡན་ཞིག་བྱེད་དགོས་པ་་སོགས་ལམ་སྟོན་མཛད་ཡོད།༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་དང་དོགས་འདྲིེ་ཁག་ལ་བཀའ་ལན་སྩལ་གྲུབ་མཚམས་སུ་ཐེངས་འདིའི་ལས་རིམ་གསོལ་འདེབས་ཞུ་མཁན་ཀོ་རི་ཡ་བོད་དགོན་བསླབ་གསུམ་བཤད་སྒྲུབ་གླིང་གི་མཚན་བྱང་ལ་ཆ་མཚོན་ན། བསླབ་པ་གསུམ་གྱི་ཉམས་ལེན་མཐིལ་ཕྱིན་པ་ཞིག་ཡོང་རྒྱུའི་ཐུགས་རེ་གནང་སྟེ་གསོལ་སྩལ་མཛད་པ་ཞིག་ཡིན་ཞེས་བཀའ་སྩལ་བ་དང་འབྲེལ་ཏེ་ཆོས་གྲོགས་ཚོས་ཀྱང་ཐོག་མར་ཐོས་བྱུང་གི་ཤེས་རབ་དང་།དེ་ནས་བསམ་བྱུང་གི་ཤེས་རབ། དེ་རྗེས་མཐར་སྒོམ་བྱུང་གི་ཤེས་རབ་རྒྱུད་ལ་སྐྱེས་ནས་ས་དང་ལམ་གྱི་ཡོན་ཏན་རབ་རྫོགས་ནས་ཞེས་པ་ལྟར་དེ་ལྟར་གནང་ཐུབ་པར་ཐུགས་སྨོན་མཛད་བཞིན་ཡོད་པར་བཀའ་སྩལ་སོང་།

ཨིན་ཌོ་ནེ་ཤི་ཡའི་ནང་པའི་ཆོས་ཚོགས་བཀའ་གདམས་ཆོས་གླིང་གིས་ཇི་ལྟར་གསོལ་བ་བཏབ་པ་ལྟར་དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲ་ལམ་ཐད་གཏོང་བརྒྱུད་རྒྱ་གར་གྱི་ཚོུད་ ༩ མ་ཟིན་ཙམ་ནས་ཚོུད་ ༡༠ ཡོལ་ཙམ་བར་དུ་ཨིན་ཌོ་ནེ་ཤི་ཡའི་རྒྱལ་ཡོངས་སློབ་གྲྭ་འདྲ་མིན་གྱི་སློབ་ཕྲུག་རྣམས་ལ་སངས་རྒྱས་པའི་ཆོས་ཀྱི་སྤྱི་བཤད་སྐོར་བཀའ་ཆོས་དང་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་སྩལ་བ་དང་འབྲེལ་ཏེ་ཆོས་སྡེ་སོ་སོར་བྱམས་པ་དང་སྙིང་རྗེའི་ཉམས་ལེན་གོང་མཐོ་གནང་ཕྱིར་དམིགས་བསལ་འགན་ཡོད་ཅེས་ལམ་སྟོན་བཀྲིན་ཆེ་བ་སྩལ་ཡོད།དེ་རིང་གི་བཀའ་ཆོས་འདི་ནི་ཨིན་ཌོ་ནེ་ཤི་ཡའི་ནང་སློབ་གྲྭ་འདྲ་མིན་དུ་སྟོན་པ་བཅོམ་ལྡན་འདས་ཀྱི་སྐྱེས་རབས་འཆད་སྤེལ་གྱི་ལས་རིམ་ཁོངས་སུ་གོ་སྒྲིག་ཞུས་པ་ཞིག་ཡིན་པ་དང་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཀྱི་ཐོག་མར་མགོན་པོ་༸གང་ཉིད་མཆོག་གི་ཐུགས་བསྐྱེད་ཆེན་པོ་བཞི་ལས་གཉིས་པ་ཆོས་ལུགས་མཐུན་འབྲེལ་གོང་མཐོ་གནང་རྒྱུ་དེ་ཡིན་པ་དང་། སྤྱིར་ནང་པ་དང་ཧིཾདྷུ། ཡེ་ཤུ། གཅེར་བུ་བ། ཁ་ཆེ་ཆོས་ལུགས་སོགས་ནས་བསླབ་བྱ་གཅིག་མཚུངས་གནང་བ་ནི་བྱམས་པ་དང་བརྩེ་བ་ཆགས་ཀྱི་ཡོད་སྟབས་ཆོས་ལུགས་ཚང་མས་མི་ལ་ཕན་ཐོགས་ཡོད་པ་ཞིག་རེད། དེས་ན་འགྲོ་བ་མི་རྣམས་བྱམས་བརྩེ་དང་ལྡན་པ་ཞིག་གནང་རྒྱུ་ནི་དམིགས་ཡུལ་གཙོ་བོ་ཡིན་པར་བཀའ་སྩལ་སོང་།དེ་བཞིན་མགོན་པོ་༸གང་ཉིད་མཆོག་གིས་ཆོས་ལ་ཁས་ལེན་མིན་ནི་གང་ཟག་སྒེར་སོ་སོར་རག་ལུས་ཡོད་པ་དང་འགྲོ་བ་མི་རྣམས་ཐོག་མར་མ་ལས་བཙས་པ་ནས་བཟུང་ཨ་མའི་བྱམས་སྐྱོང་ལ་བརྟེན་ནས་འཚོ་བ་ཞིག་ཡིན་པ་དང་བྱམས་པ་དང་བརྩེ་བ་ནི་ང་ཚོ་འཚོ་བར་བྱེད་པའི་རྒྱུ་རྐྱེན་གཙོ་བོ་ཞིག་ཆགས་ཡོད་པར་བཀའ་སྩལ་མཛད་པ་དང་ཆབས་ཅིག འཛམ་གླིང་ནང་རྙོག་གླེང་ཆེས་ཆེར་བྱུང་བ་དེ་དག་བྱམས་བརྩེའི་བསམ་ལ་མ་འདང་བའི་རྐྱེན་གྱིས་ཡིན་སྟབས། ཆོས་སྡེ་སོ་སོར་བྱམས་པ་དང་སྙིང་རྗེའི་ཉམས་ལེན་གོང་མཐོ་གནང་ཕྱིར་དམིགས་བསལ་འགན་ཡོད་ཅེས་ལམ་སྟོན་བཀྲིན་ཆེ་བ་སྩལ་ཡོད།༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ཆོས་གྲུབ་མཚམས་སུ་བཀའ་འདྲི་དགོངས་སྐོར་གྱི་ལས་རིམ་སྐབས་སློབ་ཕྲུག་ཞིག་གིས་ནད་ཡམས་ཀྱི་དུས་སྐབས་སུ་གཞན་ལ་རོགས་རམ་ཇི་ལྟར་ཞུ་དགོས་སམ་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་གཉན་རིམས་དེ་འཛམ་གླིང་གི་ས་ཕྱོགས་གང་སར་ཁྱབ་གདལ་ཕྱིན་པའི་ཁར་ད་ཆ་གོ་ལའི་ཚ་དྲོད་ཆེ་བའི་རྐྱེན་གྱིས་གནམ་གཤིས་ལ་འགྱུར་ལྡོག་ཕྱིན་ཏེ་རང་གཞན་ཀུན་ལ་ངལ་བ་མང་དག་ཅིག་འཕྲད་བཞིན་ཡོད་སྟབས། ང་ཚོར་དཀའ་ངལ་དེ་དག་ཇེ་ཉུང་དུ་གཏོང་རྒྱུའི་ཐབས་ལམ་ཡོད་སྐོར་བཀའ་སྩལ་སོང་བ་དང་སྦྲགས། ལྷག་དོན་ད་ལྟ་ནད་ཡམས་ཀྱི་དུས་ཚིགས་འདིའི་ཁྲོད་སྨན་པ་དང་སྨན་ཞབས་པ་ཚོས་ནད་པ་དྲག་སྐྱེད་སླད་ཞབས་འདེགས་བསྒྲུབས་དང་སྒྲུབ་བཞིན་པར་བསྔགས་བརྗོད་མཛད་པ་དང་གཉན་རིམས་དེ་གནས་སྐབས་རིང་ཁྱབ་གདལ་བྱུང་བ་ཞིག་ཡིན་པས་ང་ཚོས་བློ་མ་ཞུམ་པར་དེར་གདོང་ལེན་གནང་དགོས་ཞེས་ལམ་སྟོན་སྩལ་སོང་། གཞན་ཡང་༸གོང་ས་མཆོག་གིས་བདག་ཅག་གི་སྟོན་པ་བཅོམ་ལྡན་འདས་ཀྱིས་ང་ཚོ་ཚང་མར་སངས་རྒྱས་ཀྱི་རིགས་ཁྱབ་ཡོད་ཅེས་གསུངས་ཡོད་པ་རེད། འོན་ཀྱང་ཕྱིའི་གཟུགས་པོའི་རྣམ་འགྱུར་ཇི་ལྟར་ཡོད་མེད་ལ་ལྟོས་མེད་གཙོ་བོ་སེམས་དེ་ཆགས་ཀྱི་ཡོད་སྐོར་བཀའ་སྩལ་ཡོད།  མགོན་པོ་༸གང་ཉིད་མཆོག་གིས་ད་དུང་ཨིན་ཌོ་ནེ་ཤི་ཡའི་ནང་པ་ཚོ་ཕྱོགས་གཅིག་ནས་ཁ་ཆེ་རྒྱལ་ཁབ་ཆེན་པོ་གཅིག་ནང་བཞུགས་མཁན་གྱི་ནང་པ་ཆགས་ཀྱི་ཡོད་པ་དང་། ཁྱེད་ཚོས་ཁ་ཆེ་ཚོར་སངས་རྒྱས་ཀྱི་ཆོས་ནས་གསུངས་པའི་བྱམས་པ་དང་སྙིང་རྗེའི་ཉམས་ལེན་ངོ་སྤྲོད་དང་ཕན་ཚུན་དབར་སྦྱང་བཤད་གནང་ཚེ་རང་གཞན་གཉིས་ཀར་སྤྱི་ཚོགས་འདི་བྱམས་བརྩེའི་རང་བཞིན་དང་ལྡན་པ་ཞིག་ཏུ་སྐྲུན་རྒྱུའི་དགོངས་པ་འཁོར་ཐུབ་ཀྱི་རེད་ཅེས་ལམ་སྟོན་བཀའ་དྲིན་ཆེ་བ་མཛད་ཡོད།མཛད་རིམ་བསྐྱང་གཏན་ཁེལ་ཁག་ལ་གཞིགས་ན། བདུན་ཕྲག་རྗེས་མའི་རེས་གཟའ་ལྷག་པ་སྟེ་ཕྱི་ཚེས་ ༡༨ ཉིན་ཀོ་རི་ཡ་བོད་དགོན་བསླབ་གསུམ་བཤད་སྒྲུབ་གླིང་གིས་ཇི་ལྟར་གསོལ་བ་བཏབ་པ་ལྟར་༸གོང་ས་༸སྐྱབས་མགོན་ཆེན་པོ་མཆོག་ཚོགས་མགོན་དུ་དབུ་བཞུགས་ཐོག་རྒྱ་གར་གྱི་ཆུ་ཚོད་ ༩ ནས་ ༡༠ བར་བྱམས་བརྩེ་དང་འཚེ་མེད་ཞི་བའི་སྐོར་ལ་བགྲོ་གླེང་གནང་རྒྱུ་དང་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་སྩལ་རྒྱུ་རེད་འདུག དེ་བཞིན་ཕྱི་ཚེས་ ༢༥...

དེ་རིང་ཆོས་འཁོར་དུས་ཆེན་དང་བསྟུན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ལམ་བརྒྱུད་ལ་དྭགས་ནང་པའི་ཚོགས་པ་དང་ལ་དྭགས་དགོན་པའི་ཚོགས་པ། ཁྲིག་སེ་རིནཔོ་ཆེ་བཅས་ལ་བྱང་ཆུབ་ལམ་གྱི་སྒྲོན་མའི་བཀའ་ཆོས་འཕྲོ་སྐྱོང་མཛད་པ་དང་ཆབས་ཅིག སེམས་བསྐྱེད་ཀྱི་སྡོམ་པ་འབོག་ཆོག་མཛད་ནས་ཉིན་གཉིས་ཀྱི་བཀའ་ཆོས་མཇུག་སྒྲིལ་མཛད་སོང་། ༸གོང་ས་མཆོག་གིས་དེ་རིངདད་ལྡན་ཆོས་ཞུ་བ་རྣམས་ལ་སེམས་བསྐྱེད་སྡོམ་པ་འབོག་ཆོག་མཛད་དེ་ང་ཚོ་མི་ལུས་ཐོབ་སྟེ་སྟོན་པ་ཡོངས་རྫོགས་མཇལ་ནས་ཡོད་པའི་དུས་སྐབས་འདིར་མི་ཚེ་དོན་སྙིང་ཡོད་པ་ཞིག་བྱེད་པར་གཞན་གྱི་སེམས་པ་བཟང་པོ་བྱེད་རྒྱུ་དེ་གལ་ཆེན་པོ་ཡིན་པར་བཀའ་སྩལ་བ་དང་སྦྲགས་ཏེ་གོ་ལ་འདིར་སྤྱིར་ཆོས་ཀྱི་འབྲེལ་བ་དང་དགོས་མཁོ་ཇི་ཡོད་སྐོར་བཀའ་སྩལ་བ་དང་སྦྲགས་སྐྱེ་འགྲོ་ཐམས་ཅད་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པ་དང་། ཕྱིའི་དངོས་པོ་ཡར་རྒྱས་ཇི་ཙམ་ཕྱིན་ནའང་དེས་ཕྱིའི་ལུས་པོ་བདེ་ཐང་ཐོག་ལ་ཕན་ཐོགས་ཡོང་རྒྱུ་མ་གཏོགས་ནང་སེམས་ལ་ཞི་བདེ་ཡོང་རྒྱུ་མེད་སྟབས་སེམས་ཀྱི་ཞི་བདེ་བསྐྲུན་པར་ངེས་པར་དུ་སེམས་ཁམས་རིག་པ་དང་འབྲེལ་བའི་ལྟ་གྲུབ་ལ་དམིགས་བསལ་དོ་སྣང་གནང་གི་ཡོད་པ་རེད། དེས་ན་ཆོས་ཞེས་པ་དེ་དུས་ཚོད་ཡོལ་བའི་སྐད་ཆ་ཞིག་གཏན་ནས་མིན་སྐོར་བཀའ་སྩལ་མཛད་པ་དང་ཆབས་གཅིག སྤྱིར་གོ་ལ་འདིའི་ཐོག་གི་ཆོས་ལུགས་ཚང་མའི་བསླབ་བྱ་དེ་བྱམས་བརྩེ་ཡིན་ཀྱང་། ནང་པའི་གཞུང་ལུགས་ནང་བསླབ་བྱ་དེ་གཏིང་ཟབ་ཤོས་འགྲེལ་བརྗོད་རྒྱག་གི་ཡོད་པར་ལམ་སྟོན་བཀྲིན་ཆེ་བར་སྩལ་ཡོད། ལྷག་དོན་མགོན་པོ་༸གང་ཉིད་མཆོག་གིས་ལ་དྭགས་ཆོས་ཚོགས་ལ་མཚོན་ན། ཁྱེད་རྣམས་ཕ་མེས་ནས་སངས་རྒྱས་པའི་ཆོས་ལ་ཞུགས་མཁན་ཞིག་ཆགས་དང་ད་བར་ཡུལ་དེའི་ནང་ཆབ་སྲིད་ཀྱི་འགྱུར་ལྡོག་གང་འདྲ་ཞིག་ཕྱིན་མིན་ལ་ལྟོས་མེད་ཆོས་ཀྱི་དད་པ་དེ་བརྟན་པོའི་ཐོག་ནས་གནས་ཡོད་པ་དང་དེ་བཞིན་མགོན་པོ་༸གང་ཉིད་མཆོག་གིས་དེ་སྔོན་བོད་པའི་དགོན་པ་ཚོས་འདོན་པ་འདོན་རྒྱུ་ཙམ་མིན་པར་སློབ་གཉེར་གནང་དགོས་པའི་བཀའ་སློབ་ཕེབས་དོན་ལྟར་ཉེ་བའི་ཆར་སངས་རྒྱས་པའི་ཆོས་པ་སྤྱི་དང་སྒོས་ཧི་མཱ་ལ་ཡའི་རི་རྒྱུད་ལ་ཡོད་པའི་བོད་པའི་ནང་ཆོས་འཛིན་མཁན་དག་གིས་སློབ་གྲྭ་ཁག་ཏུ་གཞུང་ཆེན་སློབ་རྒྱུའི་མིག་དཔེ་ལྟ་བུའི་ཕྱག་བསྟར་གནང་བ་དེས་ཕན་ཐོགས་ཆེན་པོ་བྱུང་ཡོད་པར་བཀའ་སྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་ནས་ཆོས་འབྲེལ་སྩལ་གྲུབ་མཚམས་སུ་སློབ་ཕྲུག་རྣམས་ལ་དོགས་འདྲི་ཞུ་རྒྱུའི་གོ་སྐབས་བཀའ་དྲིན་ཆེ་བར་སྩལ་བ་ལྟར། སློབ་ཕྲུག་རྣམས་ནས་དེང་གི་དུས་ཚོད་དཀའ་ངལ་ཁག་ལ་གདོང་ལེན་ཇི་ལྟར་བྱེད་དགོས་པ་དང་གཞོན་སྐྱེས་ཚོས་དཀའ་ངལ་དག་ལ་གདོང་ལེན་གནང་བར་རྫས་རིགས་སྤྱོད་ཀྱི་ཡོད་པའི་ཐོག་ནས་གཉེན་པོ་ཇི་ལྟར་བསྟེན་དགོས་པ་དང་ཐེག་པ་ཆེ་འབྲིང་ཆུང་གསུམ་གྱི་ཁྱད་པར། དེ་བཞིན་ཁོང་ཁྲོ་ལངས་སྐབས་སུ་སེམས་ཞི་བར་བསྐྲུན་ཐབས་སོགས་ཀྱི་སྐོར་ལ་བཀའ་འདྲི་དགོངས་སྐོར་ཞུས་པའི་ཁྲོད། སློབ་མ་གཅིག་གིས་གོ་ལ་འདིའི་ཐོག་དེང་གི་དུས་སུ་ཆོས་ལུགས་དང་ཆབ་སྲིད། དཔལ་འབྱོར་སོགས་ཀྱི་ཐད་ནས་དཀའ་ངལ་མང་དག་ཅིག་ཡོང་བཞིན་པ་དེ་དག་ལ་གདོང་ལེན་གྱི་ཐབས་ཤེས་ཇི་ཡོད་ཀྱི་བཀའ་འདྲི་ཞུས་པར་གཙོ་བོ་མགོན་པོ་༸གང་ཉིད་མཆོག་ནས་འཛམ་བུ་གླིང་འདིའི་ཐོག་ཡོད་པའི་ཆོས་ལུགས་ཚང་མ་འགྲོ་བ་མི་སོ་སོའི་བློ་དང་མཐུན་པའི་ཐོག་སྡུག་བསྔལ་ལ་གཉེན་པོ་བསྟེནཚུལ་དང་། གཞན་ཕན་བསྒྲུབ་རྒྱུ་སོགས་གསུང་མཁན་གཅིག་གྱུར་ཡིན་པར་བཀའ་འགྲེལ་དང་སྦྲགས་དཀའ་ངལ་དེ་དག་སེལ་ཐབས་སུ་གཙོ་བོ་བྱམས་ཆུབ་ཀྱི་སེམས་དང་བདག་གཞན་མཉམ་བརྗེའི་བློ་ག་ཚོད་ཐུབ་ཐུབ་ཀྱིས་ཤུགས་ཆེ་བར་ཡོང་ཐབས་བྱ་རྒྱུ་གཙོས་སེམས་གུ་ཡངས་པོ་བྱེད་དགོས་པ་དང་ཕུགས་རྒྱངས་རིང་པོ། དེ་བཞིན་གཉིས་ཕན་གྱི་བསམ་བློ་ཇི་ཙམ་གྱིས་ཆེ་བ་ཡོད་ཚེ་ཕན་ཐོགས་ཡོང་ངེས་ཡིན་པར་ལམ་སྟོན་་མཛད་ཡོད། སློབ་ཕྲུག་རྣམས་ཀྱིས་བཀའ་འདྲི་དགོངས་སྐོར་ཞུས་ཟིན་མཚམས་སུ་ཁྲིག་སེ་རིན་པོ་ཆེ་མཆོག་གིས་ལ་དྭགས་ནང་པའི་ཚོགས་པ་དང་དགོན་པའི་ཚོགས་པ། རིན་པོ་ཆེ་བཅས་ཀྱི་ཚབ་ཞུས་ཏེ་༸གོང་ས་མཆོག་ནས་བཀའ་ཆོས་བཀྲིན་སྩལ་བར་ཐུགས་རྗེ་ཆེ་ཞུས་པ་འབྲེལ། ད་ཆ་འཛམ་གླིང་འདིའི་ཐོག་ཏོག་དབྱིབས་ནད་ཡམས་རྐྱེན་པས་མགོན་པོ་༸གང་ཉིད་མཆོག་ལ་དྭགས་ནང་ཆིབས་སྒྱུར་མཛད་མ་ཐུབ་པར་ཡུལ་དེའི་མང་ཚོས་ཡོངས་ལ་བློ་ཕམ་ཆེན་པོ་ཡོད་ཅེས་དང་མ་འོངས་པར་ནད་ཡམས་འདི་ཞི་ཚེ་མགོན་པོ་༸གང་ཉིད་མཆོག་ངེས་པར་དུ་ལ་དྭགས་སུ་༸ཞབས་སོར་བཀྲིན་བསྐྱང་གནང་མཛད་རྒྱུར་རེ་འདུན་གསོལ་འདེབས་ཞུས་སོང་།