བཀའ་ཆོས།

དེ་རིང་ཕྱི་ཟླ་ ༡ ཕྱི་ཚེས་ ༢༣ ཉིན་གྱི་སྔ་དྲོ་ཚོུད་ ༡༡ ཡོལ་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་བི་ཧཱར་མངའ་སྡེའི་གནས་མཆོག་རྡོ་རྗེ་གདན་དང་རྒྱ་གར་གྱི་རྒྱལ་ས་ལྡི་ལི་ཁུལ་གྱི་མཛད་འཕྲིན་ཁག་ལེགས་པར་གྲུབ་ནས་བཞུགས་སྒར་དྷརྨ་སཱ་ལཱར་ཕྱིར་༸ཞབས་སོར་བདེ་བར་འཁོད་གནང་མཛད་སོང་།མགོན་པོ་༸གང་ཉིད་མཆོག་གྷ་གྷལ་གནམ་ཐང་དུ་༸ཞབས་སོར་བདེ་བར་འཁོད་བསྟུན་གསར་འགོད་པས་ཐེངས་འདིའི་མཛད་འཆར་དང་འབྲེལ་བའི་བཀའ་འདྲི་ཞུས་པར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་མགོན་པོ་༸གང་ཉིད་མཆོག་བཞུགས་སྒར་དུ་༸ཞབས་སོར་བདེ་བར་འཁོད་ཡོད་པ་དང་ཟླ་གཅིག་བ་ལྷག་གི་རིང་ལ་སྟོན་པ་བཅོམ་ལྡན་འདས་དང་ལོ་ངོ་སྟོང་ཕྲག་གྱི་ལོ་རྒྱུས་ལྡན་པའི་རྒྱ་གར་གྱི་གནའ་བོའི་རིག་གནས་ལས་བྱམས་བརྩེའི་བརྡ་ལེན་བསྣམས་ཏེ་མང་ཚོགས་དང་མཇལ་མོལ་མཛད་ཡོད་ཡོད་པར་བཀའ་སྩལ་བ་དང་ཆགས་ཅིག་རྒྱ་གར་གྱི་གནའ་བོའི་རིག་གནས་དེ་ནི་ད་ལྟའི་འཛམ་གླིང་ལ་ཉེར་དགོས་ཅན་ཞིག་ཆགས་ཡོད་སྐོར་བཀའ་སྩལ་ཡོད།གཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༢༢ ཕྱི་ཟླ་ ༡༢ ཚེས་ ༡༩ ཉིན་གྷ་གྷལ་གནམ་ཐང་ནས་མཁའ་ལམ་བརྒྱུད་རྒྱ་གར་གྱི་རྒྱལ་ས་ལྡི་ལིར་ཆིབས་ཐོན་གྱིས་ཕྱི་ཚེས་ ༢༡ ཉིན་རྒྱལ་ས་ལྡི་ལིའི་ཉེ་འཁྲིས་སུ་ཆགས་པའི་ཧ་རི་ཡ་ན་མངའ་སྡེའི་གུ་རུ་ག་རམ་གྱི་ Salwan སློབ་གྲྭར་ལྡི་ལི་དང་རྒྱལ་སའི་ཉེ་འཁོར་ NCR ཁུལ་གྱི་སློབ་གྲྭ་ ༦༡ གི་སློབ་ཕྲུག་དང་དགེ་ལས་ཕ་མ་བཅས་མི་གྲངས་ ༥༠༠༠ བརྒལ་བར་ཆོས་ལུགས་ལ་མ་བརྟེན་པའི་བཟང་སྤྱོད་ཐོག་བཀའ་སློབ་ལམ་སྟོན་སྩལ་ཡོད་པ་དང་། སྐབས་དེར་རྒྱ་གར་ནི་མང་གཙོའི་རྒྱལ་ཁབ་དང་ལྷག་པར་དུ་མང་གཙོ་དང་ཆོས་ལུགས་ཚང་མར་གུས་བརྩི་ཞུས་དང་ཞུ་མུས་ཡིན་པ་ནི་རྒྱ་གར་གྱི་ངོས་ནས་སྤོབས་པ་གནང་འོས་པའི་རིག་གཞུང་བཟང་པོ་ཞིག་ཆགས་ཡོད་སྟབས། རྒྱ་གར་གྱི་ན་གཞོན་ཚོས་རིག་གཞུང་དེ་དག་བདག་གཅེས་གནང་གལ་ཡིན་པའི་ལམ་སྟོན་བཀྲིན་ཆེ་བ་སྩལ་ཡོད། ཕྱི་ཚེས་...

དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རྩ་བ་ཤེས་རབ་ཀྱི་བཀའ་ཆོས་དབུ་འཛུགས་མཛད་པ་དང་སྦྲགས། མགོན་པོ་༸གང་ཉིད་མཆོག་གིས་སེམས་ཞི་བདེ་བསྐྲུན་པའི་ཐོག་ནས་འཛམ་གླིང་ལ་ཞི་བདེ་ངོ་མ་བསྐྲུན་ཐུབ་ཚེ་འཛམ་གླིང་ཐོག་ཡོད་པའི་གོ་མཚོན་རྣམས་བེད་སྤྱོད་མེད་པ་ཆགས་ངེས་རེད་ཅེས་བཀའ་སྩལ་སོང་།༸གོང་ས་༸སྐྱབས་མགོན་མཆོག་གིས་ཀོ་རི་ཡའི་ནང་པའི་དད་ལྡན་ཆོས་ཞུ་བས་ཇི་ལྟར་གསོལ་འདེབས་ཞུས་དོན་ལྟར་དེ་རིང་སྔ་དྲོ་ཕྱག་ཚོད་ ༨ ཙམ་ལ་ཐེག་ཆེན་ཆོས་གླིང་གཙུག་ལག་ཁང་དུ་ཉིན་གཉིས་ཀྱི་བཀའ་ཆོས་དབུ་འཛུགས་དང་འབྲེལ་ཏེ་ཀོ་རི་ཡ་ནི་ཕ་མེས་ནས་ནང་ཆོས་ལ་དོ་སྣང་ཆེན་པོ་ཡོད་མཁན་ཞིག་དང་། ལྷོ་ཀོ་རི་ཡའི་མི་མང་རྣམས་སངས་རྒྱས་ཀྱི་ཆོས་ལ་དད་པ་རྩེ་གཅིག་པ་ཡོད་མཁན་ཞིག་ཡིན་སྟབས། ད་རེས་ཀོ་རི་ཡ་ཆོས་གྲོགས་ཚོར་ཆོས་འབྲེལ་སྕལ་རྒྱུའི་གོ་སྐབས་བྱུང་བར་དགའ་པོ་བྱུང་ཞེས་བཀའ་སྩལ་ཡོད། ༸གོང་ས་མཆོག་གིས་དེང་རབས་ཆབ་སྲིད་ཀྱི་ཐོག་ནས་འཐེན་འཁྱེར་ཡོད་པ་ཙམ་དུ་མ་ཟད་ཆོས་ལུགས་ཀྱི་ཐོག་ནས་ཀྱང་འཐེན་འཁྱེར་བྱེད་ཀྱི་ཡོད་སྐོར་བཀའ་སྩལ་བ་དང་ཆབས་ཅིག་ཨབ་གྷ་ནི་སི་ཏན་ནང་ཆོས་ལུགས་ཀྱི་འཐེན་འཁྱེར་གྱི་ངལ་འཕྲད་ལུང་འདྲེན་མཛད་དེ་དེ་ནི་བློ་ཕམ་པོ་ཞིག་དང་ཆོས་ལུགས་ཚང་མར་ལྟ་གྲུབ་མི་འདྲ་བ་ཡོད་ཀྱང་སྤྱི་ལ་ཞབས་འདེགས་ཞུ་རྒྱུ་དང་ཕན་སེམས་བྱ་རྒྱུ་ནི་ཆོས་ལུགས་ཚང་མའི་བསླབ་བྱ་གཅིག་གྱུར་ཆགས་ཡོད་པས་ཆོས་ལུགས་ཕན་ཚུན་དབར་མཐུན་ལམ་གནང་དགོས་ཞེས་ལམ་སྟོན་མཛད་ཡོད།ཉེ་ལམ་ལྷོ་ཀོ་རི་ཡ་ནང་ནུབ་ཕྱོགས་པའི་ Halloween ཞེས་ ཡི་ཤུའི་ཆོས་བྱེད་རྣམས་ཀྱི་དུས་ཆེན་སྐབས་མང་ཚོགས་འདུ་འཛོམས་ཆེ་བའི་འཚང་གའི་ཁྲོད་མི་གྲངས་ ༡༥༠ ལྷག་ཙམ་འཆི་སྐྱོན་བྱུང་ཡོད་སྟབས་འདས་པོ་རྣམས་དང་གོད་ཆག་ཁྲོད་རྨས་སྐྱོན་ཕོག་པ་བཅས་ཀྱི་ཆེད་དུ་ཐུགས་སྨོན་གནང་གལ་ཡིན་པ་བཀའ་སྩལ་སོང་།  མགོན་པོ་༸གང་ཉིད་མཆོག་གིས་བྱང་ཆུབ་སེམས་སྒོམ་སྒྲུབ་གནང་གལ་སྐོར་བཀའ་སྩལ་ཏེ་འཛམ་གླིང་ནང་མི་ཐེར་འབུམ་ཇི་ཡོད་ཐམས་ཅད་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པར་བཀའ་སྩལ་བ་དང་སྦྲགས། ཆོས་ཕྱོགས་ཀྱི་བསམ་བློ་ཡོད་མཁན་ཚོས་སེམས་ཀྱི་བདེ་སྡུག་ཐད་ལ་བསམ་བློ་གཏོང་སྟངས་རྒྱ་ཆེ་བ་དང་ཟབ་པ་ཡོད་ཅེས་དང་། གང་ལྟར་དཀའ་ངལ་རིགས་འཕྲད་ཚེ་གང་ཟག་སོ་སོའི་བསམ་བློ་གཏོང་སྟངས་ལ་རག་ལུས་ཀྱི་ཡོད་པ་སོགས་ལམ་སྟོན་མཛད་ཡོད།༸མགོན་པོ་མཆོག་གིས་སེམས་ཀྱི་ཞི་བདེ་དཀྲུག་མཁན་དེ་ཆགས་སྡང་གི་བློ་དེ་ཡིན་པ་དང་དེའི་གཉན་པོ་ནི་སྟོང་ཉིད་རྟོགས་པའི་ལྟ་བ་དང་དང་བྱང་ཆུབ་ཀྱི་སེམས་ཆགས་ཀྱི་ཡོད་པར་བཀའ་སྩལ་ཡོད། མདོར་ན་འཛམ་གླིང་ཞི་བདེ་ཡོང་བར་སེམས་རྒྱུད་འདུལ་པའི་ཐོག་ལ་རག་ལས་ཀྱི་ཡོད་པར་བརྟེན་ཚང་མས་སེམས་བཟང་པོ་བྱེད་དགོས་པ་དང་སྒོས་འཛམ་གླིང་ལ་ཞི་བདེ་བསྐྲུན་སླད་ཐོག་མར་རང་ཉིད་ཀྱི་སེམས་ཞི་བདེ་བཟོ་དགོས་པ་དང་། དེ་ནས་གཡས་གཡོན་གྱི་ཁོར་ཡུག་ཁྲོད་ཞི་བདེ་སྒྲུབ་ཚེ་འཛམ་གླིང་ལ་ཞི་བདེ་ངོ་མ་ཡོང་ཐུབ་པ་མ་ཚད་པར་འཛམ་གླིང་ཐོག་ཡོད་པའི་གོ་མཚོན་རྣམས་བེད་སྤྱོད་མེད་པ་ཆགས་ངེས་རེད་ཅེས་ལམ་སྟོན་བཀའ་དྲིན་ཆེ་བ་མཛད་སོང་།གཞི་རྩའི་ཐེངས་འདིའི་བཀའ་ཆོས་ཐོག་ཀོ་རི་ཡ་དང་ཝི་ཏི་ནམ། དེ་བཞིན་ཕྱི་རྒྱལ་ཆོས་ཞུ་བ་གཙོས་བོད་མི་དང་རྒྱ་གར་བ། ཧི་མཱ་ལ་ཡའི་རིགས་རྒྱུད་བཅས་ཀྱི་ཆོས་ཞུ་བ་ཁྱོན་ ༥༠༠༠ ཙམ་ཕེབས་འདུག

དེ་རིང་ཕྱི་ཟླ་ ༡༠ ཚེས་ ༣ ཉིན་གྱི་སྔ་དྲོ་ཕྱག་ཚད་ ༨་༣༠ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེག་ཆེན་ཆོས་གླིང་གཙུག་ལག་ཁང་དུ་ཐེ་ཝན་གྱི་དད་ལྡན་མི་མང་གིས་ཇི་ལྟར་སྔོན་ནས་གསོལ་བ་བཏབ་པ་ལྟར་༸དཔལ་ནཱ་ལེནྡཱའི་སློབ་དཔོན་ཆེན་མོ་དཔལ་ལྡན་ཆོས་ཀྱི་གྲགས་པས་མཛད་པའི་ཚད་མ་རྣམ་འགྲེལ་གྱི་ལེའུ་གཉིས་པའི་བཀའ་ཆོས་དབུ་འཛུགས་མཛད་སོང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ཆོས་ཀྱི་ཐོག་མར་གཞུང་ཆེན་ཁག་གི་ཕྱག་དཔེ་རྣམས་གཟིགས་རྒྱུ་དང་དེ་ལྟར་གཟིགས་པ་ཙམ་མིན་པར་ཉིན་ལྟར་ཕྱག་དཔེ་གཟིགས་པའི་དགོས་དམིགས་གང་ཡིན་ཐོག་དགོངས་པ་བསྐྱར་ནན་བཞེས་དགོས་པའི་ལམ་སྟོན་སྩལ་བ་དང་སྦྲགས་ཏེ་འགྲོ་བ་མི་གཅིག་གྱུར་ཡིན་པའི་འདུ་ཤེས་དེ་གཙོ་བོར་འཛིན་དགོས་པ་དང་ལྷག་དོན་གཞན་གཅེས་འཛིན་གྱི་བློ་གོང་འཕེལ་བཏང་སྟེ་བྱང་ཆུབ་སེམས་ཀྱི་ནུས་པ་ཆེ་རུ་གཏོང་དགོས་ཞེས་བཀའ་སྩལ་སོང་།དེ་བཞིན་ང་ཚོས་འཛམ་གླིང་ཞི་བདེ་ཟེར་བཞིན་དུ་གོ་མཚོན་གསར་བཟོའི་བྱ་བ་གཉེར་བཞིན་པ་ནི་ཕན་ཚུན་ནང་འགལ་ཆགས་ཀྱི་ཡོད་པ་དང་དེའང་གཙོ་བོ་བྱམས་བརྩེའི་ཐོག་ནས་ཞི་བདེ་ཡོང་གི་ཡོད་ཅེས་ལམ་སྟོན་མཛད་ཡོད།མགོན་པོ་༸གང་ཉིད་མཆོག་གིས་སློབ་གྲྭ་ཁག་གི་བསླབ་གཞིའི་ནང་དུ་སེམས་ཀྱི་ཞེ་བདེ་བསྐྲུན་ཐབས་ཐད་སློབ་ཚན་ཆེད་འཇོག་གནང་གལ་ཡིན་པར་གཟིགས་པ་ལྟར་རིང་མིན་རྒྱ་གར་གྱི་རྒྱལ་ས་ལྡི་ལིའི་མཐོ་སློབ་ཁག་གི་དགེ་རྒན་རྣམས་དང་ལྷན་དུ་མཇལ་འཕྲད་མཛད་དེ་སེམས་ཀྱི་ཞི་བདེ་བསྐྲུན་ཐབས་ཐད་བཀའ་བསྡུར་མཛད་རྒྱུའི་དགོངས་པ་ཡོད་སྐོར་བཀའ་སྩལ་སོང་།དེ་བཞིན་༸གོང་ས་མཆོག་གིས་ཚད་མ་རྣམ་འགྲེལ་གྱི་ལེའུ་གཉིས་པའི་བཀའ་ཆོས་ཀྱི་གལ་གནད་དང་འབྲེལ། སངས་རྒྱས་པའི་ཆོས་ལ་ཇི་ཙམ་སློབ་གཉེར་གཏིང་ཟབ་པ་གནང་བ་དེའི་ཚོད་ཀྱིས་དོན་རྣམས་གཏིང་ཟབ་པ་རྟོགས་རྒྱུ་ཡོད་པར་བཀའ་སྩལ་བ་དང་ཆབས་ཅིག་དབང་རྟུལ་དད་པའི་རྗེས་འབྲང་མིན་པར་དབང་རྣོན་ཆོས་ཀྱི་རྗེས་འབྲང་ཐོག་ནས་བརྟག་དཔྱད་གནང་རྒྱུ་ཡོད་སྟབས། དེ་ལྟ་བུའི་དཔྱད་པ་གནང་བར་ཚད་མ་རྣམ་འགྲེལ་གྱི་རིགས་པའི་འགྲོ་སྟངས་ཐོག་ནས་གནང་རྒྱུ་ཡོད་པ་སོགས་ལམ་སྟོན་བཀའ་དྲིན་ཆེ་བ་མཛད་ཡོད།ཐེངས་འདིའི་བཀའ་ཆོས་ཐོག་ཐེ་ཝན་གྱི་དད་ལྡན་མང་ཚོགས་ ༥༠༠ ཙམ་ཕེབས་ཡོད་པ་གཙོས་ཕྱི་ནང་གི་དད་ལྡན་པ་མང་ཚོགས་སྟོང་ཕྲག་ལྷག་འདུ་འཛོམས་གནང་འདུགརྩ་བའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་འདི་ལོའི་ཕྱི་ཟླ་ ༡༢ ཀྱི་ཟླ་འཇུག་ཏུ་གནས་མཆོག་རྡོ་རྗེ་གདན་དུ་བྱང་ཆུབ་སེམས་འགྲེལ་དང་ཐུགས་རྗེ་ཆེན་པོའི་བཀའ་དབང། སྒྲོལ་མ་གཉེར་གཅིག་གི་རྗེས་གནང་བཅས་ཉིན་གྲངས་གསུམ་རིང་གི་བཀའ་ཆོས་སྩལ་རྒྱུ་ཐུགས་གཏན་ཁེལ་དོན་ལྟར་བཀའ་ཆོས་དེ་ཏོག་དབྱིབས་གཉན་རིམས་ཁྱབ་གདལ་གྱི་གནས་སྟངས་ཇེ་བཟང་དུ་སོང་བའི་རྗེས་སུ་མགོན་པོ་༸གང་ཉིད་མཆོག་གིས་རྡོ་རྗེ་གདན་དུ་ཆོས་འབྲེལ་མཛད་པ་ཆེས་ཐོག་མ་དེ་ཆགས་ཀྱི་ཡོད་པ་རེད།

དེ་རིང་སྔ་དྲོ་ཕྱག་ཚད་ ༨་༣༠ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེག་ཆེན་ཆོས་གླིང་གཙུག་ལག་ཁང་དུ་ལྷོ་ཤར་ཨེ་ཤི་ཡའི་དད་མང་ཚོགས་ནས་ཇི་ལྟར་གསོལ་འདེབས་ཞུས་པ་བཞིན་དཔལ་ལྡན་ཟླ་བ་གྲགས་པའི་མཛད་པས་དབུ་མ་འཇུག་པ་རང་འགྲེལ་ཐོག་ཉིན་གཉིས་པའི་བཀའ་ཆོས་དབུ་འཛུགས་དང་འབྲེལ་འཕགས་པའི་བདེན་པ་བཞིའི་ངོ་སྤྲོད་དང་དད་ལྡན་ཆོས་ཞུ་བ་རྣམས་ཀྱི་བཀའ་འདྲི་ཁག་ལ་ལྗགས་ལན་སྩལ་སོང་།དེ་ཡང་དེ་རིང་མགོན་པོ་༸གང་ཉིད་མཆོག་གིས་བཀའ་ཆོས་ཀྱི་ཐོག་མར་བདེན་པ་བཞིའི་རྣམ་བཞག་ངོ་སྤྲོད་མཛད་པ་དང་སྦྲགས་ཏེ། རང་རྒྱུད་ཀྱི་མ་རིག་པའི་རྒྱུ་གང་ཡིན་པ་དེ་ལེགས་པར་ཤེས་པའི་ཐོག་ནས་གཉེན་པོ་སྟོབས་ལྡན་ཇི་ལྟར་བསྟེན་ཚུལ་སོགས་ལམ་སྟོན་བཀའ་དྲིན་ཆེ་བ་སྩལ་སོང་།དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཁ་སང་སྩལ་བའི་དབུ་མ་འཇུག་པའི་རང་འགྲེལ་གྱི་བཀའ་ཆོས་དང་འབྲེལ་ནས་ཆེད་དུ་བྱ་བའི་གདུལ་བྱ་ལྷོ་ཤར་ཨེ་ཤི་ཡའི་དད་མང་ཚོགས་ཚོའི་ཁྲོད་ནས་བཀའ་འདྲི་དགོངས་སྐོར་ཞུ་རྒྱུ་ཡོད་ཁག་ལ་དེ་ལྟར་གནང་འཐུས་ཀྱི་བཀའ་བཞེས་སྨིན་སྩལ་མཛད་དོན་བཞིན་ཆོས་ཞུ་བ་ཅིག་གིས་ཁོང་གི་བུ་འདི་ཉིད་ནང་ཆོས་ལ་དོ་སྣང་ཡོང་ཐབས་སུ་གང་གནང་དགོས་པའི་ཐད་ལ་ལམ་སྟོན་ཞུས་པར་༸གོང་ས་མཆོག་གིས་སྤྱིར་གང་ཟག་སུ་འདྲ་ཞིག་ཡིན་རུང་དེ་ཉིད་ལ་ཆོས་ལུགས་གང་ལ་དད་མོས་དང་སློབ་གཉེར་གནང་མིན་ནི་ཆོས་དད་རང་མོས་ཡིན་པས་དེ་ལྟར་རང་དབང་སྤྲོད་དགོས་གལ་ཡིན་པར་བཀའ་སྩལ་དང་སྦྲགས་ཏེ། སླད་མར་ངོས་ཀྱིས་བརྩམས་པའི་ནང་ཆོས་དང་འབྲེལ་བའི་དཔེ་ཆ་དང་། དེ་བཞིན་བརྙན་ཐོག་བཀའ་སློབ་སོགས་རིམ་པས་ངོ་སྤྲོད་བྱེད་དགོས་ཞེས་ལམ་སྟོན་མཛད་སོང་།མ་ཟད་ཆོས་ཞུ་བ་ཅིག་གིས་དེང་གི་དུས་སུ་ན་གཞོན་དེ་དག་སེམས་ཞུམ་པའི་དཀའ་ངལ་འབྱུང་གི་ཡོད་པ་དའི་ཐོག་ལམ་སྟོན་ཞུས་པར་མགོན་པོ་༸གང་ཉིད་མཆོག་གིས་གནས་ཚུལ་ཁག་ལ་ཕྱོགས་ཡོངས་ནས་བསམ་བློ་གཏང་དགོས་རྒྱུ་གལ་ཆེན་པོ་ཡིན་པ་བཀའ་སྩལ་སོང་།རྩ་བའི་༸དེ་རིང་གི་ཉིན་གཉིས་པའི་བཀའ་ཆོས་དེའི་ཐོག་ལྷོ་ཤར་ཨེ་ཤི་ཡའི་དད་ལྡན་མང་ཚོགས་གཙོས་པའི་ཕྱོགས་མཐའ་ཁག་ནས་བོད་མི་དང་ཧཱི་མ་ལའི་རི་རྒྱུད་ནས་ཆོས་ཞུ་བ་སྟོང་ཕྲག་འགའ་ཤས་ཕེབས་ཡོད་པ་དང་། དེ་བཞིན་༸མགོན་པོ་༸གང་ཉིད་མཆོག་གི་མཛད་འཆར་ལ་གཞིགས་ན་རིང་མིན་ཕྱི་ཟླ་ ༡༠ ཚེས་ ༣ དང ༥ ལ་ཐའེ་ཝན་གྱི་དད་ལྡན་མང་ཚོགས་ནས་ཇི་ལྟར་གསོལ་འདེབས་ཞུས་པ་བཞིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དཔལ་ནཱ་ལེནྡྲའི་སློབ་དཔོན་ཆེན་མོ་དཔལ་ལྡན་ཆོས་གྲགས་ཀྱི་མཛད་པའི་ཚད་མ་རྣམ་འགྲེལ་གྱི་ལེའུ་གཉིས་པའི་གསུང་ཆོས་བཀའ་དྲིན་སྩལ་རྒྱུ་རེད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་༸དཔལ་ལྡན་རྒྱུད་གྲྭ་སྟོད་སྨད་གཉིས་ཀྱིས་ཇི་ལྟར་གསོལ་འདེབས་ཞུས་དོན་ལྟར། དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བདེ་མཆོག་ལཱུ་ཨི་པའི་བཀའ་དབང་གི་སྟ་གོན་བཀྲིན་སྩལ་བ་དང་སྦྲགས་ཏེ་གཞིས་ལུས་རྒྱ་ཆེ་མང་ཚོགས་ཀྱིས་གཙོས་པའི་རྒྱ་ནག་གི་དད་ལྡན་མང་ཚོགས་ལ་སོགས་པ་རྣམས་ས་ཁྱད་ཉེ་རྒྱང་མེད་པར་བཀའ་དབང་འདི་ཐོབ་ཀྱི་རེད་ཅེས་བཀའ་སྩལ་སོང་།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལོ་ཤས་གོང་ནས་༸དཔལ་ལྡན་རྒྱུད་གྲྭ་སྟོད་སྨད་གཉིས་ཀྱིས་ཇི་ལྟར་གསོལ་བ་འདེབས་དོན་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཟླ་ ༧ ཚེས་ ༨ ཉིན་བདེ་མཆོག་ལཱུ་ཨི་པའི་བཀའ་དབང་གི་སྟ་གོན་དབུ་འཛུགས་བཀའ་དྲིན་བསྐྱང་སྐབས་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་རྡོ་རྗེ་འཆང་ཆེན་པོ་མཆོག་གིས་དབུས་པའི་མཚུངས་མེད་བྱང་རྩེ་ཆོས་རྗེ་སྒོ་སོག་རིན་པོ་ཆེ་མཆོག་དང་བོད་བརྒྱུད་ནང་བསྟན་གྱི་ཆོས་ལུགས་རིས་མེད་མཁན་བླ་སྤྲུལ་གསུམ་དང་དགེ་འདུན་པ་རྣམ་པ་བཅས། གཞན་ཡང་ཕྱི་ནང་གི་དད་ལྡན་སེར་སྐྱ་མང་ཚོགས་ཁྲི་ཚོ་བརྒལ་ཕེབས་འདུག༸གོང་ས་༸སྐྱབས་མགོན་ཆེན་པོ་མཆོག་གིས་ཆེས་ཐོག་མར་༸དཔལ་ལྡན་རྒྱུད་སྟོད་གྲྭ་ཚང་གིས་རྐང་འགན་བཞེས་ཏེ་བདེ་མཆོག་ལཱུ་ཨི་པའི་བཀའ་དབང་བཀའ་དྲིན་བསྩལ་གནང་ཡོང་བའི་གསོལ་འདེབས་ཞུས་ཡོད་པ་བཀའ་སྩལ་བ་དང་སྦྲགས། བདག་ཅག་གི་སྟོན་པ་མཉམ་མེད་སངས་རྒྱས་བཅོམ་ལྡན་འདས་ཀྱིས་ཀྱང་གདུལ་བྱར་དབང་པོ་རབ་འབྲིང་མཐའ་གསུམ་ཡོད་པ་ལྟར་སེམས་ཅན་གྱི་ཁམས་དང་མོས་པ། བསམ་པ་བཅས་དང་མཐུན་པའི་མདོ་སྔགས་ཀྱི་ཆོས་ཇི་ལྟར་བསྟན་ཚུལ་སོགས་ཞིབ་རྒྱས་སུ་ངོ་སྤྲོད་མཛད་སོང་།དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་གསང་བདེ་འཇིགས་གསུམ་གྱི་དམིགས་བསལ་ཐུན་མིན་ཁྱད་ཆོས་གང་ཡོད་པ་རྣམས་ངོ་སྤྲོད་མཛད་པ་དང་སྦྲགས། གསང་བདེ་འཇིགས་གསུམ་ཡ་མ་བྲལ་བ་ཉམས་བཞེས་ཇི་ལྟར་གནང་དགོས་པའི་ཚུལ་སོགས་གསུངས་སོང་།༸གོང་ས་མཆོག་གིས་༸དཔལ་ལྡན་རྒྱུད་གྲྭ་སྟོད་སྨད་གཉིས་ཀྱི་དགེ་འདུན་པ་གཙོས་གདན་ས་ཁག་ནས་ཕེབས་པའི་དགེ་འདུན་པ་ཚོར་ཆེད་དམིགས་ཀྱིས་མགོན་པོ་༸གང་ཉིད་མཆོག་གིས་ཉིན་ལྟར་བྱང་ཆུབ་ཀྱི་སེམས་དང་སྟོང་ཉིད་ལྟ་བར་དགོངས་བཞེས་ཀྱིས་ཉམས་བཞེས་མཛད་ཀྱི་ཡོད་སྐོར་བཀའ་སྩལ་བ་དང་ཆབས་ཅིག་ཏུ་དེ་ལྟར་ཉམས་ལེན་གནང་དགོས་གལ་ཡིན་པའི་ལམ་སྟོན་བཀྲིན་ཆེ་བ་སྩལ་སོང་། ༸གོང་ས་མཆོག་གིས་གཞིས་ལུས་རྒྱ་ཆེ་མང་ཚོགས་ཀྱིས་གཙོས་པའི་རྒྱ་ནག་གི་དད་ལྡན་མང་ཚོགས་ལ་སོགས་པ་རྣམས་ངོས་ཀྱིས་དམིགས་འོག་ཏུ་བཅུག་གི་ཡིན་ཞེས་བཀའ་བཞེས་བཟང་པོ་སྨིན་སྩལ་མཛད་སོང་བར་མ་ཟད་ས་ཁྱད་ཉེ་རྒྱང་མེད་པར་བདེ་མཆོག་ལཱུ་ཨི་པའི་བཀའ་དབང་འདི་འཐོབ་རྒྱུ་ཡོད་ཅེས་བཀའ་སྩལ་སོང་། ཤེས་རྟོགས་བྱུང་བར་གཞིགས་ན། དེ་རིང་གི་བཀའ་ཆོས་ཀྱི་སྟ་གོན་ཐོག་བཅར་བའི་ཕྱི་ནང་གི་དད་ལྡན་མང་ཚོགས་ཁྲི་ཚོ་བརྒལ་བ་ཡོད་པ་ཁྲོད་མཁན་ཆེན་དང་སྤྲུལ་སྐུ་ཁྱོན། ༡༢༨ གྲྭ་བཙུན་ཁྱོན། ༢༥༤༢ དགེ་བཤེས་དང་དགེ་བཤེས་མ། དེ་བཞིན་མཁན་པོ་ཁྱོན་ ༡༡༤༥ ཧི་མཱ་ཡའི་མི་རིགས། ༢༥༠ དེ་བཞིན་རྒྱ་གར་མི་རིགས། ༢༡༥ དང་ཕྱི་རྒྱལ་བ།...

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ས་ཟླའི་དུས་ཆེན་ཉིན་མོར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཉིན་གཉིས་རིང་གི་བཀའ་ཆོས་བཀའ་དྲིན་སྩལ་རྒྱུ་དང་། རིང་མིན་མགོན་པོ་༸གང་ཉིད་མཆོག་ལ་བོད་མིའི་ཚོགས་སྡེ་ཁག་ཅིག་ནས་བརྟན་བཞུགས་བསྟར་འབུལ་ཞུ་གཏན་ཁེལ་འདུགལོ་ཤས་གོང་ནས་ཏཱའི་སི་ཏུ་རིན་པོ་ཆེ་མཆོག་གིས་ཇི་ལྟར་གསོལ་འདེབས་ཞུས་པ་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་ ༦ ཚེས་ ༡༣ བོད་ཟླ་ ༤ ཚེས་ ༡༤ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མང་ཚོགས་ལ་འཕགས་པ་སྤྱན་རས་གཟིགས་རྒྱལ་བ་རྒྱ་མཚོའི་བཀའ་དབང་གི་སྟ་གོན་དང་ཕྱི་ཚེས་ ༡༤ ཉིན་དབང་དངོས་གཞི་དང་། རྗེའི་ལམ་རིམ་བསྡུས་དོན་གྱི་བཤད་ལུང་བཅས་སྩལ་གཏན་ཁེལ་འདུགཕྱི་ཟླ་ ༧ ཚེས་ ༨ ནས་ ༡༠ བར་ཉིན་གྲངས་གསུམ་རིང་༸དཔལ་ལྡན་སྟོད་རྒྱུད་གྲྭ་ཚང་དང་༸དཔལ་ལྡན་སྨད་རྒྱུད་གྲྭ་ཚང་གཉིས་ཀྱིས་ཇི་ལྟར་གསོལ་བ་བཏབ་པ་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དུ་བདེ་མཆོག་ལཱུ་ཨི་པའི་བཀའ་དབང་བཀའ་དྲིན་སྩལ་རྒྱུ་དང་། དེ་ཡང་ཚེས་ ༨ ཉིན་གྱི་སྔ་དྲོ་སྔོན་འགྲོའི་སྟ་གོན་གྱི་རིམ་པ་དང་། ཚེས་ ༩...

དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རིགས་གཞོན་སྐྱེས་རྣམས་ལ་ཉིན་གཉིས་ཀྱི་འཕགས་པ་སྤྱན་རས་གཟིགས་ཀྱི་བཀའ་དབང་དང་༸རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་བཀའ་ཆོས་མཇུག་སྒྲིལདང་སྦྲགས་ཏེ་༸གོང་ས་མཆོག་གིས་༸རྒྱལ་བ་རིན་པོ་ཆེས་རྩ་ཆེན་པོ་རྩིས་ས་དེ་བྱང་ཆུབ་ཀྱི་སེམས་ཡིན་སྟབས། ཁྱེད་རང་ཚོས་ངོས་ལ་རྩིས་པོ་ཡོད་ན་བྱང་ཆུབ་སེམས་དང་སྟོང་ཉིད་ཀྱི་ལྟ་བ་སྒོམས་ཤིག་ཅེས་བཀའ་སྩལ་སོང་། དེ་རིང་སྔ་དྲོ་ཕྱག་ཚོད་ ༧ པ་མ་ཟིན་ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་༸རྒྱལ་བའི་ཕོ་བྲང་ནས་ཕྱི་ནང་གི་དད་ལྡན་མང་ཚོགས་སྟོང་ཚོགས་བརྒལ་བའི་འདུ་འཛོམས་གནང་ཡུལ་ཐེག་ཆེན་ཆོས་གླིང་དུ་གཙུག་ལག་ཁང་དུ་ཆིབས་བསྒྱུར་བཀྲིན་བསྐྱངས་ཏེ་གདོང་ལྔས་གཏེགས་པའི་གསེར་གྱི་ཁྲི་འཕང་མཐོན་པོར་༸ཞབས་སོར་བདེ་བར་འཁོད་མཚམས་སུ་སྤྱན་རས་གཟིགས་ཀྱི་བཀའ་དབང་དངོས་གཞི་དབུ་འཛུགས་མཛད་པ་དང་འབྲེལ། ༸གོང་ས་མཆོག་གིས་འཕགས་པ་སྤྱན་རས་གཟིགས་ནི་ནང་པའི་ལུང་པ་མང་པོར་རྩ་ཆེན་པོ་རྩིས་ཀྱི་ཡོད་པ་དང་རྒྱ་ནག་ལྟ་བུ་ནང་དུའང་ཨ་ཝ་ལོ་ཀི་ཏེཤ་ཝ་ར་ཟེར་ནས་རྩ་ཆེན་པོ་རྩིས་ཀྱི་ཡོད་མ་ཟད་བོད་ལ་ཆ་བཞག་ན་འཕགས་པ་སྤྱན་རས་གཟིགས་ཀྱི་འདུལ་ཞིང་ཆགས་ཏེ་སྔར་ཆོས་རྒྱལ་ཚོའི་སྐབས་ནས་དམིགས་བསལ་གྱི་འབྲེལ་བ་ཡོད་པར་བཀའ་སྩལ་མཛད་སོང་། དེ་བཞིན་མགོན་པོ་༸གང་ཉིད་མཆོག་གིས་བཀའ་དབང་སྩལ་བའི་ཁྲོད་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་གཉིས་སྒོམ་པས་སེམས་ལ་ཞི་བདེ་ཡོང་གི་ཡོད་པ་དང་། སེམས་ལ་ཞི་བདེ་ཡོང་བའི་རྒྱུ་རྐྱེན་ལ་བརྟེན་ནས་ལུས་པོ་བདེ་ཐང་ཡོང་གི་ཡོད་སྟབས། སེམས་ལ་ཞི་བདེ་འཐོབ་རྒྱུ་དེ་ནི་འཕྲོད་བསྟེན་ལེགས་ཤོས་རེད། ཁྱེད་རང་ཚོའི་སེམས་ཀྱི་ཞི་བདེར་དོ་སྣང་བྱེད་དགོས་ཞེས་ལམ་སྟོན་བཀྲིན་ཆེ་བ་སྩལ་ཡོད།༸གོང་ས་མཆོག་གིས་ཁྱེད་རང་ཚོས་གལ་ཏེ་༸རྒྱལ་བ་རིན་པོ་ཆེ་བླ་མར་བརྩིས་ཀྱི་ཡོད་ན། ༸རྒྱལ་བ་རིན་པོ་ཆེས་རྩ་ཆེན་པོར་བརྩི་ས་དེ་བྱང་ཆུབ་ཀྱི་སེམས་ཡིན། ཁྱེད་རང་ཚོས་ངོས་ལ་རྩིས་པོ་ཡོད་ན་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམས་ཤིག་ཅེས་བཀའ་སྩལ་ཡོད།ད་དུང་མགོན་༸གང་ཉིད་མཆོག་གིས་ངོས་རང་རྒྱ་གར་ནང་བསྡད་ནས་སེམས་ཅན་གྱི་འགྲོ་དོན་རྒྱ་ཆེན་པོ་བྱེད་ཐུབ་པ་ཆགས་ཡོད་པ་དེ་ལྟར་ནའང་བོད་ནང་ཡོད་པ་ཡིན་ན་དེ་ལྟར་གནང་དཀའ་སྐོར་བཀའ་སྩལ་བ་དང་འབྲེལ། ཁྱེད་རང་ཚོས་རང་ཉིད་ཀྱི་ངོ་ཤེས་པ་ཚོར་༸སྐུ་མདུན་གྱིས་སེམས་བཟང་པོ་དང་ཀུན་ལ་ཕན་སེམས། དེ་བཞིན་མ་ཎི་བགྲོངས་ཤིག་ཅེས་བཀའ་སྩལ་སྐོར་ལན་སྤྲོད་དགོས་ཞེས་བཀའ་སྩལ་མཛད་སོང།སྤྱིར་ཐེངས་འདིའི་ཆོས་འབྲེལ་ཐོག་རྒྱ་གར་གཙོས་པའི་ཨ་རི་ནས་སློབ་གྲྭ་དང་མཐོ་སློབ་འགྲིམ་བཞིན་པའི་བོད་ཕྲུག་ ༣༠༠༠ མན་ཙམ་ནས་མཉམ་ཞུགས་གནང་ཡོད་པ་དང་། ཉིན་གཉིས་ཀྱི་བཀའ་ཆོས་རྣམས་རྣམ་ཀུན་ལྟར་སྐད་ཡིག་སྣ་མང་ཐོག་ཐད་སྲིང་གནང་ཡོད།དེ་རིང་༸གོང་ས་མཆོག་གིས་ཐུགས་རྗེ་ཆེན་པོའི་དབང་དངོས་གཞི་སྩལ་སྒྲུབ་རྗེས་ངོས་ཀྱི་དམིགས་འོག་ཏུ་ཡོད་པའི་བོད་ཀྱི་རྒྱ་ཆེ་མི་མང་རྣམས་ནི་༸རྒྱལ་བ་རིན་པོ་ཆེར་ཡིད་ཆེས་རྩེ་གཅིག་བྱེད་མཁན་ཤ་སྟག་ཆགས་ཡོད་ཁྱེད་རང་ཚོར་དབང་ཐོབ་ཡོད་ལ། ངོས་ལ་རྒྱ་རིགས་དད་མོས་ཡོད་མཁན་ཚོས་འཕགས་པ་སྤྱན་རས་གཟིགས་ཀྱི་བྱིན་བརླབས་འཇུག་པར་ཤོག་ཟེར་ནས་སྨོན་ལམ་སྐྱོན་གྱི་ཡོད་ཅེས་བཀའ་སྩལ་བ་དང་སྦྲགས། ཁྱེད་རང་ཚོ་ཚང་མ་བློ་བདེ་པོ་དང་སེམས་སྐྱིད་པོ་བགྱིས་ཤིག ངོས་རང་ལོ་ན་ ༨༧ ལ་བསླེབས་ཡོད་པ་དང་ད་དུང་ལོ་བཅོ་ལྔ་ཉི་ཤུ་བསྡད་རྒྱུ་ཡིན། བོད་ནང་གི་དཀའ་ངལ་དེ་རིམ་པས་སེལ་ཐུབ་ཀྱི་རེད་ཅེས་ཀྱི་བཀའ་སྩལ་སོང་། ༸སྐུ་པར་ཁག་ཅིག་གི་བདག་དབང་༸སྐུ་སྒེར་ཡིག་ཚང་།

དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་རིགས་གཞོན་སྐྱེས་རྣམས་ལ་ཉིན་གྲངས་གཉིས་རིང་བསྐྱང་རྒྱུའི་འཕགས་པ་སྤྱན་རས་གཟིགས་ཀྱི་བཀའ་དབང་དང་ཡོན་ཏན་གཞིར་འགྱུར་མ། ༸རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་བཀའ་ཆོས་དབུ་འཛུགས་མཛད་སོང་། དེ་རིང་ཉིན་དང་པོའི་སྔ་དྲོ་ཕྱག་ཚོད་ ༦།༣༠ ཡོལ་ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་༸རྒྱལ་བའི་ཕོ་བྲང་གི་གཟིམ་ཆུང་ནས་ཐེག་ཆེན་ཆོས་གླིང་གཙུག་ཁང་དུ་སྤོས་སྣེའི་སྤྱན་འདྲེན་ཞུས་པ་དང་། མགོན་པོ་༸གང་ཉིད་མཆོག་གདོང་ལྔས་གཏེགས་པའི་གསེར་གྱི་ཁྲི་འཕང་མཐོན་པོར་༸ཞབས་སོར་བདེ་བར་འཁོད་མཚམས་སུ་བོད་རིགས་གཞོན་སྐྱེས་རྣམས་ཀྱིས་གཙོས་པའི་མང་ཚོགས་སྟོང་ཕྲག་ལྷག་ལ་འཕགས་པ་སྤྱན་རས་གཟིགས་ཀྱི་བཀའ་དབང་གི་སྟ་གོན་དང་རྟེན་འབྲེལ་བསྟོད་པའི་བཀའ་ཆོས་བཀའ་དྲིན་སྩལ་སོང་། སྐབས་དེར་༸གོང་ས་མཆོག་གིས་དྲ་རྒྱ་བརྒྱུད་བཀའ་དབང་ཞུ་མཁན་ཚོར་དབང་ཐོབ་ཀྱི་ཡོད་སྐོར་བཀའ་སྩལ་བ་དང་འབྲེལ་ཏེ། སྡོད་ས་ཉེ་འགྱངས་ཀྱི་ཁྱད་པར་མེད་པ་དང་དད་པ་དམ་ཚིག་ལའང་ས་མཚམས་མེད་སྟབས། ངོས་ཀྱིས་བོད་ནང་གི་གཞིས་ལུས་རྒྱ་ཆེ་མང་ཚོགས་རྣམས་ཀྱིས་གཙོས་པའི་རྒྱ་རིགས་ནང་པ་དད་མོས་ཡོད་མཁན་ཚང་མ་ དམིགས་འོག་ཏུ་བཅུག་གི་ཡིན་ཞེས་བཀའ་བཞེས་བཟང་པོ་སྨིན་སྩལ་མཛད་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་རྟེན་འབྲེལ་བསྟོད་པའི་བཀའ་ཆོས་སྩལ་བའི་ཁྲོད་བོད་ཕྲུག་ཚོའི་ངོས་ནས་ཕྱག་དཔེ་བལྟ་དགོས་གལ་ཡིན་པ་དང་དེ་ལྟར་གནང་བར་ངེས་པར་དུ་རབ་ཏུ་བྱུང་མི་དགོས། ང་ཚོ་སྟོན་པའི་རྗེས་འབྲངས་པ་ཞིག་ཡིན་སྟབས། ཕྱག་དཔེ་གཟིགས་རྒྱུ་དེ་ཤིན་ཏུ་ནས་གལ་ཆེན་པོ་ཆགས་ཡོད་སྐོར་ལམ་སྟོན་བཀྲིན་ཆེ་བ་སྩལ་བ་དང་ཆབས་ཅིག བོད་ཕྲུག་ཚོའི་ཚད་མ་རིག་པའི་འགྲོ་སྟངས་ལ་དོ་སྣང་རྒྱ་གང་ཆེ་བྱེད་དགོས་པ་དང་། རིགས་ལམ་གྱི་ཐོག་ནས་སྐད་ཆ་བཤད་རྒྱུ་དེ་དག་ཆོས་དད་ཀྱི་སྐད་ཆ་ཞིག་མིན་པ་དང་། མཚན་ཉིད་རིགས་པའི་འགྲོ་སྟངས་ཤེས་པ་དེས་རང་ཉིད་སྒེར་གྱི་མི་ཚེལའང་ཕན་ཐོགས་ཡོད་པར་བཀའ་སྩལ་ཡོད། ༸གོང་ས་༸སྐྱབས་མགོན་ཆེན་པོ་མཆོག་ནས་བོད་རིགས་གཞོན་སྐྱེས་ཚོར་བཀའ་ཆོས་སྩལ་རྒྱུ་དེ་དྷ་སའི་ནང་ཆོས་ངོ་སྤྲོད་ཚོགས་ཆུང་དང་བོད་ཁྱིམ་གཉིས་ཟུང་སྦྲེལ་གྱིས་གོ་སྒྲིག་ཞུས་པ་ཞིག་པ་ལྟར་དྷ་སའི་ནང་ཆོས་ངོ་སྤྲོད་ཚོགས་ཆུང་གི་ཚོགས་གཙོ་སྤྱི་འཐུས་ཟླ་བ་ཚེ་རིང་ལགས་སུ་དེ་ལྟར་གོ་སྒྲིག་ཞུ་དགོས་པའི་དམིགས་ཡུལ་གང་ཡིན་དང་ཐེངས་འདིའི་བཀའ་ཆོས་ཐོག་བོད་ཕྲུག་ཐོ་འགོད་གནང་མཁན་ག་ཚོད་བྱུང་ཡོད་པ་སོགས་ཀྱི་ཐོག་བཅར་འདྲི་ཞུས་པར་ཁོང་གིས་༸གོང་ས་མཆོག་གིས་དུས་ཀུན་ཏུ་བོད་རིགས་གཞོན་སྐྱེས་ཚོས་ནང་ཆོས་ཐོག་སློབ་སྦྱོང་བྱེད་དགོས་གལ་དང་ནང་ཆོས་ཀྱི་ཐོག་ནས་འཛ་གླིང་སྤྱིར་ཞབས་འདེགས་ཞུ་ཐུབ་པའི་ནུས་པ་ཡོད་སྐོར་བཀའ་སློབ་ཡང་ཡང་ཕེབས་ཀྱི་ཡོད་པ་ལྟར་ང་ཚོས་ཕྱི་ལོ་ ༢༠༠༧ ནས་བཟུང་ལོ་ལྟར་མ་ཆད་པར་༸མགོན་པོ་མཆོག་ལ་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་གྱིས་བཀའ་ཆོས་བསྩལ་བ་ཞིག་ཆགས་ཡོད་སྐོར་གསུངས་སོང་། དེ་བཞིན་ཁོང་གིས་ཐེངས་འདིའི་བོད་རིགས་གཞོན་སྐྱེས་རྣམས་ལ་སྩལ་བའི་བཀའ་ཆོས་འདི་ནི་ཐེངས་ ༡༥ པ་ཆགས་ཀྱི་ཡོད་པ་དང་བཀའ་ཆོས་ཞུ་བར་ཐོ་འགོད་གནང་མཁན་བོད་ཕྲུག་ ༣༠༠༠ མིན་ཙམ་བྱུང་ཡོད་པར་ངོ་སྤྲོད་གནང་ཡོད།རྩ་བའི་༸གོང་ས་མཆོག་གི་བཀའ་ཆོས་རྣམས་དུས་རྒྱུན་བཞིན་སྐད་ཡིག་སྣ་མང་ཐོག་ཐད་སྲིང་གནང་ཡོད་པ་དང་། སང་ཉིན་ཉིན་གཉིས་པའི་བཀའ་ཆོས་ཐོག་༸གོང་ས་མཆོག་གིས་འཕགས་པ་སྤྱན་རས་གཟིགས་ཀྱི་བཀའ་དབང་དངོས་གཞི་སྩལ་གནང་མཛད་རྒྱུ་ཡིན་པ་རེད། ...

དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲྭ་ལམ་ཐད་གཏོང་བརྒྱུད་མདོ་དྲན་པ་ཉེར་བཞག་གི་བཀའ་ཆོས་ཉིན་གཉིས་པ་སྩོལ་བཅོམ་ལྡན་འདས་ཀྱི་རྗེས་འབྲང་རྣལ་མ་ཡིན་མཁན་ཚོས་ཕན་ཚུལ་དབར་ཟུང་སྦྲེལ་ཐོག་ནས་སངས་རྒྱས་ཀྱི་བསྟན་པ་མི་ཉམས་གོང་འཕེལ་དང་ཉམས་པ་སོར་ཆུད་གནང་དགོས་གལ་ཡིན་པར་ལམ་སྟོན་སྩལ་སོང་། མགོན་པོ་༸གང་ཉིད་མཆོག་གིས་ཨིན་དྷི་ནེ་ཤཱི་ཡ། མཱ་ལེ་ཞི་ཡ། འབར་མ། ཤྲིལངྒ། ཐེ་ལན་ཌི་བཅས་ཀྱི་གནས་བརྟན་སྡེ་པའི་རྗེས་འབྲང་པ་རྣམས་ལ་ཁ་སང་གི་མདོ་དྲན་པ་ཉེར་བཞག་གི་བཀའ་ཆོས་འཕྲོ་སྐྱོང་མ་མཛད་པའི་སྔོན་དུ་སངས་རྒྱས་པའི་ཆོས་འདི་མི་ལོ་ ༥༠༠༠ ཙམ་གྱི་རིང་ལ་གནས་རྒྱུ་ཡིན་པ་གསུངས་སྲོལ་ཡོད་པ་དང་ད་ཆ་ལོ་ཉིས་སྟོང་ལྷག་འགྲོ་མུས་ཁྲོད་ཆོས་ལུགས་མང་པོ་ཡར་རྒྱས་དང་ཉམས་རྒུད་ཀྱི་གནས་སུ་གྱར་ཡོད་ཀྱང་བོད་ཀྱི་སངས་རྒྱས་པའི་ཆོས་འདི་བརྟན་པོར་གནས་ཡོད་པར་བཀའ་སྩལ་བ་དང་སྦྲགས། ཉེ་བའི་ཆར་ནུབ་ཕྱོགས་ཀྱི་ཡུལ་གྲུ་ཁག་ཅིག་ནང་ལ་དེ་སྔ་སངས་རྒྱས་པའི་ཆོས་མེད་ས་ཁག་ནས་ནང་ཆོས་ལ་དམིགས་བསལ་དོ་སྣང་གང་ཙམ་གནང་བཞིན་པའི་མཚམས་འདིར་ང་ཚོ་བཅོམ་ལྡན་འདས་ཀྱི་རྗེས་འབྲང་རྣལ་མ་ཡིན་མཁན་ཚོས་ཕན་ཚུལ་གཅིག་གིས་གཅིག་ལ་གནས་ཚུལ་ཤེས་པའི་སྒོ་ནས་ཐུན་མོང་གིས་འཛམ་གླིང་འདིའི་ཐོག་གནས་པའི་སྟོན་པའི་སྤྱོད་ཚུལ་འདི་མི་ཉམས་གོང་འཕེལ་དང་ཉམས་པ་སོར་ཆུད་གནང་དགོས་གལ་ཡིན་པ་མ་ཟད། བོད་རྒྱ་ཧོར་གྱི་ཡུལ་གྲུ་ཁག་ཅིག་གི་ནང་བར་སྐབས་སངས་རྒྱས་ཀྱི་བསྟན་པ་ཉམས་ཡོད་པ་དེ་དག་ཉམས་པ་སོར་ཆུད་དང་མི་ཉམས་གོང་འཕེལ་ཡོང་རྒྱུར་དམིགས་ཏེ་མགོན་པོ་༸གང་ཉིད་མཆོག་གིས་ཐུགས་སྨོན་མཛད་མུས་ལྟར་ཆོས་གྲོགས་ཚོས་ཀྱང་དེའི་ཐོག་དགོངས་པ་བཞེས་རོགས་ཞེས་གཞེན་སྐུལ་མཛད་ཡོད། ལྷག་དོན་དེང་རབས་ཆོས་དད་ཡོད་མེད་ལ་ལྟོས་མེད་སངས་རྒྱས་པའི་ཆོས་ཀྱི་ནང་ནས་སེམས་ཁམས་རིག་པ་དང་ལྟ་གྲུབ་སྐོར་ལ་ཐུགས་སྣང་གནང་མཁན་ཇེ་མང་དུ་འགྲོ་བཞིན་པའི་དུས་མཚམས་འདིར་པཱ་ལི་དང་ལེགས་སྦྱར་གྱི་ཆོས་བརྒྱུད་འཛིན་མཁན་རྣམས་བཅོམ་ལྡན་འདས་ཀྱི་རྗེས་འབྲང་པ་གཅིག་གྱུར་ཡིན་པ་གཞིར་བཞག་ཐོག་ཕན་ཚུན་དབར་སྔར་ལྷག་འབྲེལ་བ་དམ་གཟབ་གནང་སྟེ་བགྲོ་གླེང་མང་ཙམ་གནང་ཐུབ་ན་ཕན་ཐོགས་ཆེན་པོ་ཡོད་པར་ལམ་སྟོན་བཀྲིན་ཆེ་བ་སྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་ཆོས་འཕྲོ་སྐྱོང་མཛད་གྲུབ་མཚམས་སུ་ཆོས་ཞུ་བ་དགེ་སློང་རྣམས་ལ་བཀའ་འདྲི་དགོངས་སྐོར་ཞུ་རྒྱུའི་གོ་སྐབས་བཀའ་དྲིན་ཆེ་བར་སྩོལ་སྐབས། བྷན་མར་ནས་ཡིན་པའི་དགེ་སློང་ཞིག་གིས་མགོན་པོ་མཆོག་ལ་དཀའ་རྙོག་དང་འབྲེལ་བའི་དོགས་འདྲི་ཞུས་པ་དང་འབྲེལ་ཏེ་དེར་ཁོང་ཁྲོའི་གཞན་དབང་དུ་མ་སོང་བར་དྲན་པ་ཉེར་བཞག་ཐོག་ནས་ཇི་ལྟར་གནང་དགོས་སམ་ཞེས་་བཀའ་འདྲི་ཞུས་པར་མགོན་པོ་མཆོག་གིས་མི་བདེ་བའི་གནས་སྟངས་བྱུང་འཕྲལ་དེ་འབྲེལ་གནས་ལུགས་ལ་ཞིབ་འཇུག་མཐིལ་ཕྱིན་པ་ཞིག་གནང་རྒྱུའི་གོ་སྐབས་ཐོབ་ཀྱི་ཡོད་པ་དེ་ནི་དཔལ་ནཱ་ལེནྡྲའི་ཆོས་བརྒྱུད་ཀྱི་རྒྱུན་སྲོལ་ཞིག་ཆགས་ཀྱི་ཡོད་ཅེས་བཀའ་ལན་སྩལ་ཡོད།