༸གོང་ས་མཆོག་གིས་ Wroclaw གྲོང་ཁྱེར་གྱི་ངོས་ནས་འགྲོ་བ་མིའི་གཅིག་འགྱུར་གྱི་བློ་གོང་འཕེལ་དང་འབྲེལ་བའི་ལས་དོན་ལ་ཤུགས་སྣོན་ཆེ་ཙམ་སྐྱོན་དགོས་པའི་ལམ་སྟོན་མཛད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་པོ་ལན་ཌིའི་ Wroclaw གྲོང་ཁྱེར་གྱི་ངོས་ནས་ནང་སེམས་ཀྱི་ཞི་བདེ་དང་འགྲོ་བ་མིའི་གཅིག་འགྱུར་གྱི་བློ་གོང་འཕེལ་གྱི་ལས་དོན་ལ་ཤུགས་སྣོན་ཆེ་ཙམ་སྐྱོན་ཐུབ་པ་ཡིན་ན། གྲོང་ཁྱེར་དེ་ཡུ་རོབ་རིག་གཞུང་གི་རྒྱལ་ས་མིང་དོན་མཚུངས་པ་ཞིག་ལ་འགྱུར་ཐུབ་ཀྱི་རེད་ཅེས་བཀའ་གནང་འདུག དེའང་ཡུ་རོབ་མཐུན་ཚོགས་ཀྱི་ངོས་ནས་ལོ་ལྟར་སྒྲིགས་འཛུགས་དེའི་ཚོགས་མི་རྒྱལ་ཁབ་གྱི་གྲོང་ཁྱེར་གཉིས་རེ་རེ་མོས་གནང་སྟེ་ཡུ་རོབ་རིག་གཞུང་གི་རྒྱལ་ས་ཞེས་འདེམས་སྲོལ་ཡོད་པ་ལྟར། འདི་ལོ་ ༢༠༡༦ ལོའི་ཡུ་རོབ་རིག་གཞུང་གི་རྒྱལ་ས་པོ་ལན་ཌིའི་ Wroclaw གྲོང་ཁྱེར་དང་། Spain ཡི་ San Sebastian གྲོང་ཁྱེར་གཉིས་འདེམས་ཐོན་གནང་ཡོད་པ་རེད། Wroclaw གྲོང་ཁྱེར་གྱི་སྤྱི་ཁྱབ་མཆོག་གིས་ད་རེས་མཚན་གནས་དེའི་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གྲོང་ཁྱེར་དེའི་ནང་དམིགས་བསལ་གདན་འདྲེན་ཞུས་པ་ཞིག་ཡིན་པ་རེད་འདུག དེ་རིང་སྔ་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་ཁོ་རོ་ལོ་གྲོང་ཁྱེར་གྱི་སྤྱི་ཁྱབ་མཆོག་ནས་གདན་ཞུ་གསོལ་འདེབས་ཕུལ་བ་ལྟར་གྲོང་སྡེ་ལས་ཁུངས་ཀྱི་མི་སྣ་དང་། གཙུག་ལག་སློབ་གཉེར་ཁང་འདྲ་མིན་ཁག་ཅིག་གི་སྐུ་ཚབ་མཚོན་པའི་ཤེས་ཡོན་གྱི་མི་སྣ་། དེ་བཞིན་གཞོན་སྐྱེས་ཤ་སྟགས་འདུ་འཛོམས་ཡོད་སར་རང་དབང་གི་རྨི་ལམ་ཞེས་པའི་བརྗོད་གཞིའི་ཐོག་བཀའ་སློབ་བཀྲིན་སྩལ་ཡོད་པ་དང་། སྐབས་དེར་༸གོང་ས་མཆོག་གིས་ད་ལྟའི་དུས་སྐབས་འདིར་ང་ཚོའི་ངོས་ནས་འཛམ་གླིང་གཅིག་འགྱུར་དང་འགྲོ་བ་མིའི་གཅིག་འགྱུར་གྱི་བློ་གོང་འཕེལ་གཏོང་རྒྱུའི་དུས་ལ་འབབ་ཡོད་སྐོར་བཀའ་ནན་བསྩལ་བ་མ་ཟད། ༸གང་ཉིད་མཆོག་གིས་ངོས་ནས་ད་ལྟ་རང་གྲོང་ཁྱེར་སྤྱི་ཁྱབ་མཆོག་ལ་ཞུ་རྒྱུ་བྱུང་། གྲོང་ཁྱེར་འདི་བཞིན་ཕྱི་ལོ་ ༢༠༡༦ ལོའི་ཡུ་རོབ་རིག་གཞུང་གི་རྒྱལ་སར་འདེམས་ཐོན་བྱུང་བ་ལྟར། གྲོང་ཁྱེར་དེའི་ངོས་ནས་གཙོ་བོ་དུས་ཡུན་དེའི་རིང་ལ་མང་ཚོགས་ནང་སེམས་ཀྱི་ཞི་བདེ་དང་འགྲོ་བ་མིའི་གཅིག་འགྱུར་གྱི་བློ་གོང་འཕེལ་གཏོང་རྒྱུའི་ལས་དོན་ཐད་ཤུགས་སྣོན་ཆེ་ཙམ་སྐྱོན་དགོས་ཀྱི་རེད།...