༸སྐྱབས་རྗེ་འཇིགས་བྲལ་བདག་ཆེན་རིན་པོ་ཆེ་མཆོག་སྐུ་ཞི་བར་གཤེགས་པར་གཞུང་འབྲེལ་མཆོད་འབུལ་སྨོན་ལམ།

དེ་རིང་ཟླ་ ༥ ཚེས་ ༥ ཉིན་གུང་ཚོུད་ ༡༢ ཐོག་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱིས་གོ་སྒྲིག་འོག གངས་སྐྱིད་ལས་བྱེད་གསོལ་ཐབ་ཀྱི་ཡང་སྟེང་གཉའ་ཁྲི་ཚོགས་ཁང་དུ་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དབུས་སྲི་ཞུ་ལས་བྱེད་ཡོངས་ནས་ཟླ་བ་སྔ་མའི་ཚེས་ ༢༩ ཉིན་དཔལ་ས་སྐྱ་ཕུན་ཚོགས་ཕོ་བྲང་གི་འཇིགས་བྲལ་བདག་ཆེན་རིན་པོ་ཆེ་མཆོག་དགུང་གྲངས་ ༨༨ ཐོག་གདུལ་བྱ་རྟག་འཛིན་ཅན་གྱི་ངོར་དགོངས་པ་ཞི་བར་གཤེགས་པའི་ཚུལ་བསྟན་པར་གདུང་སེམས་མཉམ་བསྐྱེད་ཀྱིས་མྱ་ངན་གུས་བཏུད་ཞུ་ཕྱིར། ལྷན་འཛོམས་ཀྱིས་བསྔོ་སྨོན་གསུང་འདོན་གནང་པ་མ་ཟད། ཉིན་རྒྱབ་ཏུ་དབུས་ལས་ཁུངས་ཁག་ལས་མཚམས་འཇོག་ཡོད་པ་རེད། བཀའ་ཤག་གི་ཐུགས་གསོའི་གནས་འཕྲིན་ནང་འཁོད་དོན། འཁོན་རིགས་བསྟན་པའི་གསལ་བྱེད་དཔལ་ས་སྐྱ་ཕུན་ཚོགས་ཕོ་བྲང་གི་༸སྐྱབས་མགོན་གོང་མ་འཇིགས་བྲལ་བདག་ཆེན་རིན་པོ་ཆེ་མཆོག་བར་ལམ་ཟླ་ཤས་གོང་ནས་སྐུ་ཁམས་བསྙུན་ཚུལ་བཞེས་ཏེ་དྭངས་སྐྱེད་ཆེར་མ་བྱུང་བ་དང་། ཉེ་སྔོན་༸སྐྱབས་མགོན་ས་སྐྱ་ཁྲི་འཛིན་རིན་པོ་ཆེ་མཆོག་ངོ་ཕེབས་ཀྱིས་སྐུ་རིམ་དང་བརྟན་བཞུགས་ཟབ་འབུལ་ཞུས་པར་དགྱེས་ཚོར་ཆེན་པོ་མཛད་ཐོག་སྐུ་ཁམས་ཀྱང་ཅུང་ཟད་དྭངས་སྐྱེད་བཞེས་ཡོད་འདུག་རུང་། འདི་ལོའི་ཟླ་ ༤ ཚེས་ ༢༩ ཉིན་ཨ་རིའི་ནུབ་མཐའི་ཕྱི་དྲོ་ཚོད་ ༨།༡༥ ཙམ་ལ་ངོ་མཚར་བའི་རྟགས་མཚན་དུ་མ་དང་བཅས་དགོངས་པ་ཆོས་དབྱིངས་སུ་ཐིམ་པའི་ཚུལ་བསྟན་པའི་ཡིད་སྐྱོའི་གནས་ཚུལ་བྱུང་བར་བོད་མིའི་སྒྲིག་འཛུགས་སྤྱི་དང་བཀའ་ཤག་གི་ཐོག་ནས་དེར་བཞུགས་འཁོན་གདུང་རྣམ་པ་དང་བདག་མོ་སྐུ་ཞབས་ཀྱིས་དབུས་སྐུ་འཁོར་དང་མཁན་ལས་ཡོངས་ལ་ཐུགས་གསོ་ཞུས་འདུག་པ་མ་ཟད། ལྷག་དོན་༸སྐྱབས་མགོན་གོང་མ་བདག་ཆེན་རིན་པོ་ཆེ་དམ་པ་དེ་ཉིད་ཀྱི་ཐུགས་ཀྱི་དགོངས་པ་ཟབ་མོ་མཐའ་དག་ཡོངས་སུ་རྫོགས་ཤིང་།...