དེ་སྔ་དམ་འབུལ་ཕུལ་ཟིན་པའི་ལངས་ཕྱོགས་དང་ཐག་གཅོད་ལ་འགྱུར་བ་གཏན་ནས་མེད།

སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་སུ་བདམས་ཐོན་བྱུང་བའི་འཐུས་མི་རྣམ་པ་སྡིངས་ཆ་གཅིག་གི་ཐོག་ཏུ་བབས་ཏེ་ཚོགས་གཙོ་ཚོགས་གཞོན་གྱི་འོས་བསྡུའི་ལས་རིམ་གཙོས་གྲོས་ཚོགས་ཀྱི་ལས་དོན་ཁག་སྔར་རྒྱུན་བཞིན་གནང་མ་ཐུབ་པའི་དཀའ་རྙོག་དེ་དེ་མུར་ལྷག་སྟེ་ཟླ་བ་གསུམ་ལ་ཉེ་བའི་མཚམས་འདིར་ཆོས་བརྒྱུད་དང་མདོ་སྟོད་ཆོལ་ཁའི་བདམས་ཐོན་སྤྱི་འཐུས་ ༢༠ ཐུན་མོང་གིས་དོན་ཚན་བརྒྱད་ཅན་གྱི་གསལ་བཤད་ལན་འདེབས་ཤིག་ཡོངས་གྲགས་བྱས་པར་ད་ལྟའི་ཆར་བཅའ་ཁྲིམས་དོན་ཚན་ ༤༧ པའི་དགོངས་དོན་ཁྲིམས་མཐུན་དམ་འབུལ་ཞུ་ཡུལ་ཞིག་མེད་པར་གྱུར་ཟིན་ཡོད་སྟབས་དེ་སྔ་དམ་འབུལ་ཕུལ་ཟིན་པའི་ལངས་ཕྱོགས་དང་ཐག་གཅོད་ལ་འགྱུར་བ་གཏན་ནས་མེད་ཅེས་བརྗོད་འདུག ཟླ་བ་འདིའི་ཕྱི་ཚེས་ ༤ ཉིན་བཞུགས་སྒར་དུ་རྟེན་གཞི་བྱས་པའི་བོད་མིའི་གཞུང་འབྲེལ་མ་ཡིན་པའི་ཚོགས་པ་ཆེ་གྲས་བཞིསས་སྐབས་ ༡༧ པའི་བོད་མི་མང་བདམས་ཐོན་སྤྱི་འཐུས་རྣམ་པའི་དམ་འབུལ་གྱི་དཀའ་ངལ་སེལ་ཐབས་སུ་འབྲེལ་ཡོད་ཡོངས་ལ་རེ་སྐུལ་དོན་ཚན་གསུམ་ཅན་གྱི་ཞུ་སྐུལ་ལས་འགུལ་ཞིག་སྤེལ་ཡོད་པ་དང་། རེ་སྐུལ་དེར་ཕྱི་ཚེས་ ༡༡ ཉིན་དེ་སྔ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༤༧ དགོངས་དོན་ལྟར་བར་བརྒལ་ཚོགས་གཙོའི་དྲུང་ནས་དམ་འབུལ་ཞུ་མཁན་ཁོངས་སུ་ཡོད་པ་དབུས་གཙང་དང་མདོ་སྨད་བདམས་ཐོན་སྤྱི་འཐུས་ ༡༩ ཐུན་མོང་གིས་ཤོག་གྲངས་ལྔ་ཅན་གྱི་གསལ་བཤད་དང་སྦྲགས་ཏེ་ཚོགས་ཁག་བཞི་ལ་ཁྲིམས་སྒྲིག་ལྟར་སྐབས་ ༡༧ པའི་སྤྱི་འཐུས་ལྷན་ཚོགས་ཚུགས་ཐབས་ཡོད་ཚེ་མཉམ་ཞུགས་གནང་རྒྱུར་གྲ་སྒྲིག་ཨང་གསར་ཡོད་ཅེས་གསུངས་ཡོད་པ་རེད། གནད་དོན་དེ་དག་ལས་འཕྲོས་ཏེ་ཉེ་ཆར་ཕྱི་ཚེས་ ༢༤ ཉིན་དེ་སྔ་༸གོང་ས་མཆོག་གི་༸སྐུ་པར་དང་བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་མདུན་ནས་དམ་འབུལ་ཞུས་པའི་ཁོངས་སུ་ཡོད་པ་ཆོས་བརྒྱུད་དང་མདོ་སྟོད་ཆོལ་ཁའི་བདམས་ཐོན་སྤྱི་འཐུས་ ༢༠ ཐུན་མོང་གིས་དོན་ཚན་བརྒྱད་ཅན་གྱི་གསལ་བཤད་ལན་འདེབས་ཞིག་སྤེལ་འདུག་པ་དང་དེའི་ནང་དུ་རྐང་དེ་སྔ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༤༧ པའི་དགོངས་དོན་གཞིར་བཟུང་དམ་འབུལ་ཞུ་མཁན་གྱི་བདམས་ཐོན་སྤྱི་འཐུས་ ༡༩ ཐུན་མོང་གིས་ཚོགས་ཁག་བཞིར་ཕུལ་བའི་གསལ་བཤད་ཀྱི་དོན་ཚན་ཁག་ལ་ལན་འདེབས་ཤིག་ཆགས་ཀྱི་འདུག་པ་དང་། དེའང་ད་ལྟ་འཕྲད་བཞིན་པའི་དཀའ་རྙོག་གི་འབྱུང་རྩ་ངོ་མ་ནི་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་པས་འཛམ་གླིང་སྤྱི་ཡོངས་སུ་འཕྲད་བཞིན་པའི་ཏོག་དབྱིབས་ནད་ཡམས་ཀྱི་དཀའ་ངལ་དང་། གནས་ཡུལ་གཞུང་གི་བཀའ་རྒྱ།...