ནོར་གླིང་ཁུལ་གྱི་བོད་མི་ ༣༣ ཙམ་ལ་ལ་གཉན་རིམས་ཕོག་རྐྱེན་བཀག་སྐྱིལ་གྱི་ས་ཚིགས་སུ་བཞག་པ།

དྷརྨ་ས་ལའི་ཉེ་འདབས་སུ་རྟེན་གཞི་བྱས་པའི་ནོར་བུ་གླིང་ཁར་གནས་བཞུགས་བོད་མི་ ༣༣ ཙམ་ལ་གཉན་རིམས་ཕོག་འདུག་ཀྱང་ནད་གཞི་ཕོག་མཁན་རྣམས་ཀྱི་གནས་སྟངས་ཛ་དྲག་གང་ཡང་མི་འདུག ཟླ་བ་འདིའི་ཕྱི་ཚེས་ ༡༧ ཉིན་རྒྱ་གར་གྱི་སྲིད་བློན་ན་རེནྡྲ་མོ་དི་མཆོག་གི་འཁྲུངས་སྐར་དང་བསྟུན་བདེ་ལེགས་སྨན་ཁང་གིས་རིན་མེད་ཐོག་ཏོག་དབྱིབས་ནད་གཞི་ཕོག་ཡོད་མེད་ཀྱི་བརྟག་དཔྱད་གནང་སྐབས་ནོར་བུ་གླིང་ཁའི་ཁྱབ་ཁོངས་ནས་བོད་མི་ ༩ ལ་ནད་གཞི་ཕོག་ཡོད་པར་ཤེས་རྟོགས་བྱུང་ཡོད་པ་དང་། ཕྱོགས་མཚུངས་ཕྱི་ཚེས་ ༢༠ ཉིན་བསྐྱར་དུ་མི་བརྒྱད་དང་། དེ་བཞིན་ཚེས་ ༢༡ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་བདེ་ལེགས་སྨན་ཁང་གཉིས་ཟུང་འབྲེལ་གྱིས་མི་ ༩༥ ལ་བརྟག་དཔྱད་གནང་འབྲས་སུ་མི་དགུར་ནད་རྟགས་ཐོན་པ་མ་ཟད། ཁག་ཅིག་ཛོ་ནཱལ་སྨན་ཁང་སོགས་ལ་བརྟག་དཔྱད་སླད་ཕེབས་སྐབས་མི་འགར་ནད་གཞི་ཐོན་པ་བྱུང་སྟེ་ཁྱོན་ཁ་སང་ཚེས་ ༢༢ བར་ནོར་བུ་གླིང་ཁ་ཁུལ་ནས་བོད་མི་ ༣༣ ཙམ་ལ་ནད་གཞི་ཕོག་འདུག་སྟབས། ད་ཆ་ནོར་བུ་གླིང་ཁ་དེ་  Containment Zone འམ་བཀག་སྐྱིལ་གྱི་ས་ཚིགས་སུ་ངོས་འཛིན་གྱིས་དམ་གནང་བར་བརྟེན་ནོར་གླིང་གི་ཉེ་འཁོར་དུ་འཁེལ་བའི་ས་ཁུལ་ལ་ཕེབས་རྒྱུ་སོགས་ཀྱི་གནང་སྒོ་ཁག་ཡོང་རྫོགས་བཀག་སྡོམ་གནང་མུས་ཡིན་པ་རེད།དེ་དོན་དྷ་ས་ས་གནས་འགོ་འཛིན་ཀུན་དགའ་ཚེ་རིང་ལགས་སུ་བཅར་འདྲི་ཞུས་པར་ནོར་བུ་གླིང་ཁར་གནས་བཞུགས་བོད་མི་ནད་གཞི་ཕོག་པ་རྣམས་ལ་ནད་རྟགས་ཕྲན་བུ་ཡོད་པ་མ་གཏོགས་ཛ་དྲག་གི་གནས་སྟངས་མེད་པ་དང་ད་ཆ་ཁོང་རྣམས་ཟུར་བཀག་དུ་བཞུགས་མུས་ཡིན་པ་རེད། འཕྲོད་བསྟེན་ལས་ཁུངས་དང་དབུས་ཛ་དྲག་ཚོགས་ཆུང་། བདེ་ལེགས་སྨན་ཁང་། དེ་བཞིན་ས་གནས་འགོ་འཛིན་ལས་ཁུངས་བཅས་ཐུན་མོང་གིས་ཁོང་རྣམས་ལ་ཉེར་མཁོའི་མཐུན་འགྱུར་ཁག་གནང་མུས་ཡིན་པར་གསུངས་ཡོད།གཞི་རྩའི་རྒྱ་གར་ནང་ནད་རླབས་གཉིས་པའི་སྐབས་གཉན་རིམས་ཕོག་མཁན་གྱི་གྲངས་ཐོ་ཇེ་མང་ཕྱིན་པ་དང་སྦྲགས་འདས་གྲོངས་སུ་གྱུར་མཁན་མང་དག་ཅིག་བྱུང་བར་བརྟེན་ས་གནས་སོ་སོར་ཐེམ་སྤང་གི་བཀོད་ཁྱབ་དང་། སློབ་གྲྭ་ཁག་ཕྱིར་བཤོལ་གནང་བ། འདུ་འཛོམས་རིགས་གནང་སྒོ་ཚང་མར་དམ་དྲག་གནང་ཡོད་པ་རེད།...