བོད་ཕྲུག་ཁྱིམ་སྡེའི་འཛིན་རིམ་བརྒྱད་པ་མན་གྱི་སློབ་མ་རྣམས་གནས་སྐབས་རིང་ཕྱིར་སློག་གནང་འདུག

རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་རིམས་ནད་ཏོག་དབྱིབས་ནད་དུག་གསར་པའི་གློ་ཚད་དམ་ Corona virus ཞེས་པ་དེ་ད་ལྟའི་ཆར་རྒྱ་ནག་རྒྱལ་ཡོངས་ཙམ་མ་ཟད་འཛམ་གླིང་ཡུལ་གྲུ་དུ་མར་རིམ་བཞིན་ཁྱབ་བརྡལ་ཤུགས་ཆེར་སོང་བར་བརྟེན་རྒྱལ་སྤྱིའི་ཐོག་ཛ་དྲག་གི་རང་བཞིན་ལྡན་པའི་རིམས་ནད་ཅིག་ཏུ་ངོས་འཛིན་གནང་བཞིན་ཡོད་སྟབས། རིམས་ནད་དེར་སྔོན་འགོག་ཆེད་དུ་དྷ་སྟེང་བོད་ཕྲུག་ཁྱིམ་སྡེའི་ཁྱབ་ཁོངས་ཀྱི་སློབ་གྲྭ་ཁག་གི་འཛིན་རིམ་བརྒྱད་པ་མན་གྱི་སློབ་མ་རྣམས་གནས་སྐབས་རིང་འཛིན་གྲྭ་འཚོགས་རྒྱུ་ཕྱིར་བཤོལ་གནང་བ་མ་ཟད། སློབ་ཕྲུག་ཚོའི་ཕ་མ་ཚོར་རང་ཉིད་བུ་ཕྲུག་རྣམས་ཕྱིར་རང་ཁྱིམ་དུ་ཁྲིད་དགོས་པའི་རེ་སྐུལ་གནང་འདུག རྩ་བའི་ད་ལྟའི་ཆར་རྒྱ་གར་ནང་ཏོག་དབྱིབས་ནད་དུག་གསར་དུ་ཕོག་མཁན་རྒྱ་གར་གྱི་རྒྱལ་ས་ལྡི་ལི་ནས་གཅིག་དང་ལྷོ་ཕྱོགས་ Telangana མངའ་སྡེ་ནས་གཅིག་བྱུང་ཡོད་པ་དང་། རྒྱ་གར་གྱི་སྲིད་བློན་མཆོག་གིས་མང་ཚོགས་ལ་དེ་འབྲེལ་དངངས་སྐྲག་གནང་རྒྱུ་མེད་པར་ལམ་སྟོན་གནང་ཡོད་པ་རེད།འདི་ག་རླུང་འཕྲིན་ཁང་གིས་བོད་ཕྲུག་ཁྱིམ་སྡེའི་སྤྱི་ཁྱབ་དབུ་འཛིན་ཐུབ་བསྟན་རྡོ་རྗེ་ལགས་སུ་ད་ལན་རིམས་ནད་སྔོན་འགོག་གནང་ཕྱིར་དྷ་སྟེང་བོད་ཕྲུག་ཁྱིམ་སྡེའི་ཁྱབ་ཁོངས་ཀྱི་སློབ་གྲྭ་ཁག་གི་འཛིན་རིམ་བརྒྱད་པ་མན་གྱི་སློབ་མ་རྣམས་གནས་སྐབས་རིང་འཛིན་གྲྭ་འཚོགས་རྒྱུ་ཕྱི་བཤོལ་གནང་དོན་སོགས་ཀྱི་ཐོག་ལ་བཀའ་འདྲི་ཁག་གཅིག་ཞུས་ཡོད།