བོད་མིའི་སྒྲིག་འཛུགས་ལ་རོགས་དངུལ་ཨ་སྒོར་ས་ཡ་ ༢༣ ཐོབ་འདུག

དེ་རིང་བཞུགས་སྒར་གངས་སྐྱིད་སིལ་སྤོལ་རྩེད་ཐང་དུ་ཉམས་པ་སླར་གསོ་ཞེས་པའི་བོད་མིའི་དང་བླངས་ལས་འགུལ་བ་ ༢༥ ཙམ་གྱིས་དེ་སྔ་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པའི་ཐོག་སྤྱི་འཐུས་ཀྱི་རྩ་འབོར་གསུམ་ཆ་གཉིས་ཡན་ནས་རྒྱབ་སྐྱོར་གནང་སྟེ་འཕོ་འགྱུར་བཏང་ཟིན་པའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་པས་ལས་འཁུར་རྒྱུན་སྐྱོང་གནང་བ་དེ་ཁྲིམས་མཐུན་བྱུང་མེད་པ་སོགས་ཀྱི་དོན་ཚན་ཁག་ཅིག་འགྲེལ་བརྗོད་ཀྱིས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་པ་ཁྲིམས་ཞིབ་པའི་ཞབས་སྟེགས་སྟོང་པ་བཟོ་དགོས་པའི་ཟས་བཅད་ངོ་རྒོལ་གྱི་ལས་འགུལ་འགོ་འཛུགས་སོང་།ཟས་བཅད་ངོ་རྒོལ་གྱི་ལས་འགུལ་དེ་ཕྱི་ཟླ་བརྒྱད་པའི་ཟླ་མཇུག་བར་སྤེལ་རྒྱུའི་ཆོག་ཆན་ཐོབ་འདུག་པ་དང་། ལས་འགུལ་ཐོག་མཉམ་ཞུགས་ཡོད་པ་དྷ་སའི་ཉམས་པ་སླར་གསོའི་དང་བླངས་ལས་འགུལ་བའི་མགྲིན་ཚབ་པ་བྱང་ཆུབ་རིན་ཆེན་གྱིས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་པ་ཁྲིམས་མཐུན་གྱི་བརྒྱུད་ལམ་གང་ཡང་མེད་པར་སྔར་གྱི་ལས་གནས་ཐོག་ཕྱིར་ཕེབས་པའི་རྐྱེན་གྱིས་བོད་དོན་འཐབ་རྩོད་ཀྱི་གནས་བབ་ལ་དོ་ཕོག་དང་མང་གཙོའི་ཀ་བ་གསུམ་སྦོ་ལུག་པ། ནང་ཁུལ་དུ་རྣོ་ངར་ཆེ་བའི་འགལ་ཟླ་བྱུང་ནས་དགྲ་དགའ་གཉེན་སྡུག་གྱི་གནས་ཚུལ་མུ་མཐུད་འབྱུང་བཞིན་པར་བརྟེན་ཁྲིམས་ཞིབ་པ་རྣམ་པ་གསུམ་ངེས་པར་དུ་ཆེས་མཐོའི་ཁྲིམས་ཞིབ་ཁང་དང་ཁ་བྲལ་ཏེ་ཁྲིམས་ཞིབ་པའི་ཞབས་སྟེགས་སྟོང་པ་བཟོ་དགོས་པ་དང་། གལ་སྲིད་དེ་ལྟར་མ་གནང་ཚེ་ས་གནས་གང་ས་ནས་ལས་འགུལ་གཞི་རྒྱ་ཆེ་རུ་གཏང་རྒྱུའི་གྲ་སྒྲིག་ཨང་གསར་ཡོད་ཅེས་འཁོད་པའི་གསར་འགོད་བསྒྲགས་གཏམ་ཞིག་སྤེལ་ཡོད། གསར་འགོད་པས་ཆེས་མཐོའི་ཁྲིམས་ཞིབ་ཁང་ལ་ཆེད་བཅར་གྱིས་ད་རེས་ལས་འགུལ་བ་རྣམས་ཀྱི་དགོས་འདུན་དང་འབྲེལ་བཀའ་འདྲི་ཁག་ཅིག་ཞུ་ཐབས་ཞུས་ཡོད་ཀྱང་ཆེས་མཐོའི་ཁྲིམས་ཞིབ་ཁང་གིས་དེ་སྔ་ལས་འཁུར་རྒྱུན་སྐྱོང་སྐབས་གསུངས་ཟིན་པའི་དོན་ཚན་ཁག་ལས་ལྷག་པ་གཞན་གང་ཡང་གསུང་རྒྱུ་མེད་ཅེས་གསུངས་སོང་། གཞི་རྩའི་སྔ་ལོར་སྐབས་བཅུ་དྲུག་པའི་གྲོས་ཚོགས་ཚོགས་དུས་བཅུ་པ་འཕར་འགྱངས་ཀྱི་གནད་དོན་སོགས་ལས་འཕྲོས་ཏེ་འདི་ལོའི་ཕྱི་ཟླ་གསུམ་པའི་གྲོས་ཚོགས་སྐབས་སུ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་པ་གསུམ་དུས་གཅིག་ལ་འཕོ་འགྱུར་བཏང་བའི་གནས་སྟངས་བྱུང་བ་ལྟར་ཆེས་མཐོའི་ཁྲིམས་ཁང་གི་ཁྲིམས་ཞིབ་པ་རྣམ་པས་ལས་གནས་ནས་ཕྱིར་བཤོལ་གནང་ཡོད་པ་དང་། དེ་རྗེས་ཟླ་བ་གཉིས་ཙམ་གྱི་རྗེས་སུ་ཆེས་མཐོའི་ཁྲིམས་ཞིབ་པ་རྣམ་པས་དེ་སྔ་ལས་འགན་བཤོལ་བ་ཡིན་ཞེས་པ་ནི་ཁྲིམས་ལུགས་དབང་འཛིན་གྱི་རྩ་འཛིན་ཁྲིམས་ཡིག་དོན་ཚན་ ༤༢ པ་དང་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་དོན་ཚན་ ༧༩ པའི་གདོངས་དོན་འོག་གྱོད་ཡས་བདེ་སྙན་ཕུལ་བའམ། ཁྲིམས་ཞིབ་པ་རང་ཉིད་ཁ་མཆུ་དེ་དང་དམིགས་བསལ་འབྲེལ་བ་ཆགས་སྟབས་ཕྱོགས་ལྷུང་གི་ཉེན་སྐྱོན་འགོག་ཆེད་ཁྲིམས་ཞིབ་པའི་ལས་འགན་རེ་ཞིག་བཤོལ་བ་མ་གཏོགས་གྲོས་ཚོགས་ཚོགས་དུས་བཅུ་པའི་ཐོག་བཞག་པའི་ཁྲིམས་མཐུན་མ་ཡིན་པའི་གྲོས་ཆོད་ཡིག་ཆ་ཨང་ ༣༩ ནང་གསལ་བ་ལྟར་འཕོ་འགྱུར་ལ་ངོས་ལེན་གནང་བ་ཞིག་དང་། ལས་གནས་ལས་རྩ་དགོངས་ཞུས་པ་ཞིག་མིན་པ། སྐབས་དེར་ཁྲིམས་ཞིབ་པ་རྣམ་པས་བཅའ་ཁྲིམས་དོན་ཚན་ ༥ པ་མཚོན་ཆེས་མཐོའི་ཁྲིམས་ཞིབ་ཁང་གི་མཐར་ཐུག་གི་དབང་ཚད་སྤྱད་ནས་གྲོས་ཆོད་དེ་རྩིས་མེད་ཀྱི་བྱ་རིམ་ལག་བསྟར་བྱས་ཚེ་ལྷན་སྐྱེས་དྲང་བདེན་ནམ་ Natural Justice ཞེས་པའི་ཁྲིམས་ལུགས་ཀྱི་གཞི་རྩའི་ལྟ་གྲུབ་ལ་གནོད་འགལ་འབྱུང་ཉེན་ཡོད་པས་ལས་འགན་བཤོལ་བའི་ཐག་གཅོད་གནང་བ་ཞིག་ཡིན་པ་མ་ཟད། ལྷག་པར་དུ་སྐབས་དེར་འཚོགས་གཏན་ཁེལ་བའི་སྤྱི་འཐུས་ལྷན་ཚོགས་ཀྱི་ཚོགས་འདུ་འཕར་མ་དེའང་སྤྱི་འཐུས་ཀྱི་རྩ་འབོར་གྱི་ཉུང་མཐའི་གྲངས་ཚད་མ་ལོངས་པར་བརྟེན་སྐོང་ཚོགས་གནང་མ་ཐུབ་པ་དང་།...

ཨ་རིའི་གྲོས་ཚོགས་དང་སྲིད་གཞུང་གཉིས་ནས་འདས་པའི་མི་ལོ་ ༣༠ ལྷག་གི་གོང་ནས་བོད་ཕྱི་ནང་གཉིས་སུ་བོད་མི་རིགས་ཀྱི་ངོ་བོ་སྲུང་སྐྱོབ་དང། ཤེས་ཡོན། འཕྲོད་བསྟེན། དེ་བཞིན་དཔལ་འབྱོར་དང་སྤྱི་ཚོགས་ཡར་རྒྱས་ཀྱི་ལས་དོན་བཅས་ཀྱི་ཐོག་རོགས་དངུལ་གནང་བཞིན་ཡོད་པ་ལྟར། འདི་ལོ་ཕྱི་ལོ་ ༢༠༡༩ ལོའི་ཨ་རིའི་སྔོན་རྩིས་ཁོངས་ནས་མུ་མཐུད་བོད་ཕྱི་ནང་གཉིས་ཀྱི་བདེ་དོན་ཐོག་མ་དངུལ་རོགས་རམ་གནང་རྒྱུའི་ཐག་གཅོད་བྱུང་འདུག ཟླ་ ༢ ཚེས་ ༡༥ ཉིན་ཨ་རིའི་སྲིད་འཛིན་སྐུ་ཞབས་ཌོ་ནལ་ཊམ་མཆོག་གིས་ཡུལ་དེའི་གྲོས་ཚོགས་འཐུས་མི་རྣམ་པས་གཏན་འབེབས་གནང་བའི་བོད་མིར་རོགས་དངུལ་དང་འབྲེལ་བའི་གྲོས་ཆོད་ལ་མཚན་རྟགས་གནང་བའི་བརྒྱུད་འདི་ལོ་ ༢༠༡༩ ལོའི་ཨ་རིའི་ཕྱོགས་བསྡོམས་ཀྱི་སྔོན་རྩིས་ཁྲོད་ནས་བོད་མིར་ཨ་སྒོར་ས་ཡ་བཅུ་བདུན་གནང་གཏན་ཁེལ་འདུག ཨ་རིའི་སྲིད་གཞུང་གི་རོགས་སྐྱོར་ཨ་སྒོར་ས་ཡ་བཅུ་བདུན་དེ་བོད་ནང་ཡོད་པའི་བོད་མི་ཚོའི་བདེ་དོན་སྤྱིད་དང་། ལྷག་པར་དུ་བོད་མི་གནས་སྡོད་ཀྱི་ས་ཁུལ་ཁག་ཏུ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། ཤེས་ཡོན། འཕྲོད་བསྟེན། ཁོར་ཡུག་སྲུང་སྐྱོབ་བཅས་ཀྱི་ཆེད་ཨ་སྒོར་ས་ཡ་བརྒྱད་དང་། རྒྱ་གར་དང་བལ་ཡུལ་ནང་ཡོད་པའི་བོད་མིའི་རིག་གཞུང་སྲུང་སྐྱོབ་དང་སྤྱི་ཚོགས་སྲ་བརྟན། དེ་བཞིན་མི་རབས་རྗེས་མའི་འགོ་ཁྲིད་ཀྱི་ནུས་པ་གསོ་སྐྱོང་བཅས་ཀྱི་ཆེད་ཨ་སྒོར་ས་ཡ་དྲུག དེ་བཞིན་བོད་མིའི་སྒྲིག་འཛུགས་སྲ་བརྟན་ཡོང་ཐབས་དང་འཛིན་སྐྱོང་ཀྱི་ལས་དོན་ཚགས་ཚུད་ཡོང་སླད་ཨ་སྒོར་ས་ཡ་གསུམ་བཅས་སྡེ་ཚན་གསུམ་དུ་ཆ་བགོས་གནང་ཡོད་པ་རེད། ཐེངས་འདིའི་ཨ་རི་གཞུང་ནས་བོད་མིར་མུ་མཐུད་མ་དངུལ་རོགས་རམ་གནང་པ་དང་འབྲེལ་ནས་བོད་མིའི་སྒྲིག་འཛུགས་སྲིད་སྐྱོང་བློ་བཟང་སེང་གེ་མཆོག་གིས་ཨ་རིའི་གྲོས་ཚོགས་འཐུས་མི་དང་སྲིད་གཞུང་གཉིས་ཀར་ཐུགས་རྗེ་ཆེ་ཞུས་ཡོད་པ་རེད། གཞི་རྩའི་སྐུ་ཞབས་ Donald Trump...

ཟླ་བ་འདིའི་ཚེས་ ༦ ནས་ཡུ་རོབ་ཇར་མ་ནི་གྲོང་ཁྱེར་ Bonn ནང་དུ་འཚོགས་བཞིན་པའི་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་ཁོར་ཡུག་ལྷན་ཚོགས་ཐེངས་ ༢༣ པ་དེ་རིང་མཇུག་སྒྲིལ་གནང་ཡོད་པ་དང་། དེའི་ཐོག་རྒྱལ་ཚོགས་ཀྱི་ཚོགས་མི་རྒྱལ་ཁབ་ ༡༩༧ གྱི་སྐུ་ཚབ་འཐུས་མི་དང་།  རྒྱལ་ཁབ་འདྲ་མིན་གྱི་དབུ་ཁྲིད། དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་དང་ཁོར་ཡུག་ཚན་རིག་པ་དང་ཉམས་ཞིབ་པ། ཁོར་ཡུག་སྲུང་སྐྱོབ་ལས་འགུལ་བ་སོགས་ནས་མཉམ་ཞུགས་གནང་ཡོད་པ་རེད། ད་ལན་གྱི་ལྷན་ཚོགས་ཐོག་བོད་མིའི་ཕྱོགས་ནས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ཁྱབ་ཁོངས་བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཉམས་ཞིབ་པ་བསྟན་པ་རྒྱལ་མཚན་ལགས་དང་བདེ་ཆེན་དཔལ་མོ་ལགས་རྣམ་གཉིས་ནས་མཉམ་ཞུགས་ཀྱིས་བོད་མཐོ་སྒང་གི་ཁོར་ཡུག་དེ་འཛམ་གླིང་སྤྱི་ལ་གནད་ཆེ་ཆགས་ཡོད་པ་དང་འདི་བཞིན་གོ་ལའི་གནམ་གཤིས་འགྱུར་ལྡོག་མྱུར་པོ་འགྲོ་བཞིན་པར་བརྟེན་བོད་མཐོ་སྒང་གི་ཁོར་ཡུག་ལ་ཤུགས་རྐྱེན་ངན་པ་ཇི་ཐེབས་སོགས་ཀྱི་སྐོར་ལ་དངོས་ཡོད་སྟངས་གང་ཡིན་གསལ་བཏོན་གནང་འདུག་པ་མ་ཟད། ལྷག་དོན་ཁོར་ཡུག་ཚོགས་ཆེན་ཐོག་ལ་ཆེད་ཕེབས་གནང་པའི་རྒྱལ་ཁབ་ཁག་གི་འགོ་ཁྲིད་དང་ཁོར་ཡུག་ལས་བྱེད་པ་ཁག་ཅིག་དང་ལྷན་དུ་མཇལ་འཕྲད་གནང་སྟེ་བོད་ཀྱི་ཁོར་ཡུག་གནས་སྟངས་སྐོར་གོ་རྟོགས་རྒྱ་ཆེ་སྤེལ་འདུག

དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་ནས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་གསར་འགོད་ལྷན་ཚོགས་ཤིག་བསྐོང་ཚོགས་གནང་པའི་ཐོག ཨ་རིའི་གཞུང་ནས་བོད་མིའི་སྒྲིག་འཛུགས་དང་རྒྱ་བལ་འབྲུག་གསུམ་ནང་གི་གཞིས་ཆགས་སྲ་བརྟན་སླད་རོགས་དངུལ་ཨ་སྒོར་ས་ཡ་ ༢༣ གནང་རྒྱུའི་ཞལ་བཞེས་ཐོབ་ཡོད་པ་གསལ་བསྒྲགས་གནང་སོང་། སྲིད་སྐྱོང་མཆོག་གིས་ཆེས་ཐོག་མར་ཨ་རིའི་གཞུང་གིས་གཙོས་པའི་བོད་མིར་རོགས་རམ་གནང་མཁན་ཀུན་ལ་ཐུགས་རྗེ་ཆེ་ཞུ་དང་སྦྲགས། ཐེངས་འདིའི་རོགས་དངུལ་དེ་ནི་ USAID ཞེས་པའི་ཚན་པ་བརྒྱུད་ལོ་ལྔ་ཚན་གཅིག་གི་ལས་འཆར་ཞིག་ཆགས་ཀྱི་ཡོད་པ་དང་། ཕྱི་ལོ་ ༢༠༡༧ གྱི་སྔོན་རྩིས་ནས་དངོས་སུ་ལག་བསྟར་གནང་རྒྱུ་ཡིན་པ་བཅས་ངོ་སྤྲོད་གནང་ཡོད།  ལྷག་པར་དུ་སྲིད་སྐྱོང་མཆོག་གིས་དེ་རིང་གི་གསལ་བསྒྲགས་འདིའི་ཐོག་ནས་མང་ཚོགས་ལ་རོགས་དངུལ་དེ་ཐོབ་མིན་དེ་གཙོ་བོ་མི་དམངས་ཀྱི་ཆ་ཤས་བཞེས་ཕྱོགས་ལ་ཐུག་ཡོད་པ་གསུངས་ཏེ། ཐེངས་འདིའི་རོགས་དངུལ་འདི་དང་འབྲེལ་རིང་མིན་སྒྲིག་འཛུགས་ནས་ས་གནས་སོ་སོར་རྟོག་ཞིབ་ཏུ་ཕེབས་སྐབས་མང་ཚོགས་ནས་ངེས་པར་དུ་ཆ་ཤས་བཞེས་གནང་རྒྱུ་གལ་ཆེ་ཡིན་པ་འབོད་སྐུལ་ཡང་གནང་སོང་། ཐེངས་འདིའི་ཨ་རིའི་རོགས་དངུལ་དེ་ནི་རྐང་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ནས་ཐུགས་འགན་བཞེས་པའི་ཐོག སློབ་ཡོན་དང་འགོ་ཁྲིད་ནུས་པ་སྐྱེད་སྲིང་། བེུད་ནུས་སྟོབས་གོང་འཕེལ་དང་འཕྲོད་བསྟེན་སོགས་གཙོ་བོ་དོན་ཚན་བརྒྱད་ཀྱི་ཐོག་ནས་རོགས་རམ་གནང་རྒྱུ་རེད་འདུག