བོད་རྒྱའི་དབར་གྲོས་མོལ་གནང་རྒྱུ་ནི་ཐབས་ལམ་བཟང་ཤོས་ཤིག་ཡིན་པར་གསུངས་འདུག

རྒྱ་ནག་གཞུང་གིས་བོད་ཀྱི་བླ་ན་མེད་པའི་དབུ་འཁྲིད་༸གོང་ས་༸སྐྱབས་མགོན་ཆེན་པོ་མཆོག་དང་བོད་ཐོག་འཛིན་པའི་སྲིད་བྱུས་ཁག་ལ་བཟང་ཕྱོགས་ཀྱི་འགྱུར་བ་ཞིག་ཡོང་བར་ཕྱོགས་གཉིས་དབར་དོན་སྙིང་ལྡན་པའི་གྲོས་མོལ་གནང་རྒྱུ་དེ་ནི་ཐབས་ལམ་བཟང་ཤོས་ཤིག་ཡིན་པར་འགྲེལ་བརྗོད་གནང་འདུག   དེ་ཡང་ཉེ་ཆར་ཟླ་བ་སྔོན་མའི་ཕྱི་ཚེས་ ༢༤ ཉིན་རྒྱ་ནག་གི་རྒྱལ་ས་པེ་ཅིང་ནང་དུ་འཇར་མ་ནི་དང་རྒྱ་ནག་དབར་འགྲོ་བ་མིའི་ཐོབ་ཐང་གི་གྲོས་མོལ་ཐེངས་ ༡༣ དེ་གྲུབ་ཟིན་པ་དང་བསྟུན། ཁ་ཉིན་འཇར་མ་ནིའི་  deutsche welle གསར་སྤེལ་ཁང་ནས་འཇར་མ་ནི་གཞུང་གི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་ Christoph Straesser ལགས་སུ་གནད་དོན་དེ་དང་སྦྲགས་ཏེ། རྒྱ་ནག་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་དང་བོད་ལ་ལྟ་ཚུལ་ཇི་འདྲ་ཡོད་མེད་ཐད་ལ་བཅར་འདྲི་ཁག་ཅིག་ཞུ་འདུག་པར།  སྐུ་ཞབས་ Christoph Straesser ལགས་ཀྱིས་༸གོང་ས་མཆོག་ནི་རྒྱལ་ཁབ་དང་མི་རིགས་ཁ་བྲལ་གཏོང་མཁན་ཞིག་མ་ཡིན་པར་འཛམ་གླིང་ཞི་བདེ་དེད་དཔོན་ཆེན་པོ་ཡིན་པ་ང་ཚོ་འཇར་མ་ནི་གཞུང་མང་གཉིས་ནས་ཤེས་གསལ་རེད། འོན་ཀྱང་རྒྱ་ནག་གཞུང་གིས་༸གོང་ས་མཆོག་ལ་འཛིན་བཞིན་པའི་ཁ་བྲལ་བའི་ལྟ་སྟངས་དེ་ལ་བཟང་ཕྱོགས་ཀྱི་འགྱུར་བ་ཞིག་ཡོང་བར་ཕྱོགས་གཉིས་དབར་དོན་སྙིང་ལྡན་པའི་གྲོས་མོལ་གནང་རྒྱུ་དེ་ནི་ཐབས་ལམ་བཟང་ཤོས་ཤིག་རེད་ཅེས་གསུངས་འདུག དེ་བཞིན་སྐུ་ཚབ་རྣམས་ནས་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱི་ས་ཁུལ་ཁག་ཅིག་གི་ནང་ལ་འཚམས་གཟིགས་ཕེབས་ཡོད་སྟབས། བོད་ནང་གི་ཆོས་དད་རང་དབང་དང་སྐད་ཡིག་སྲུང་སྐྱོབ་སོགས་ཀྱི་ཐད་ལ་བཅར་འདྲི་ཞུ་སྐབས། ཁོང་གིས་ང་ཚོ་བོད་ནང་ཕྱིན་པ་ཙམ་ལས་བོད་ནང་གི་དངོས་ཡོད་གནས་སྟངས་ཇི་ཡིན་ཤེས་རྟོགས་གསལ་པོ་ཞིག་བྱུང་མ་སོང་། འོན་ཀྱང་དུས་ད་ལྟའི་ཆར་ལའང་བོད་ཀྱི་ས་ཁུལ་ཁག་གི་ནང་ལ་ཡོད་པའི་བོད་རིགས་རྣམས་ལ་ཆོས་དད་ཀྱི་རང་དབང་མེད་པ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་ལ་དགའ་གུས་དད་གསུམ་དང་༸གང་ཉིད་མཆོག་གི་༸སྐུ་པར་རིགས་བདག་ཉར་ཞུ་ཚེ་ཁྲིམས་འགལ་གྱི་ནག་ཉེས་འོག་དམ་དྲག་དང་སེམས་འཚབ་ཀྱི་ངང་གནས་དགོས་པའི་བོད་མི་ཚོའི་རྣམ་པ་ཤུགས་ཆེ་མངོན་རྒྱུ་འདུག་བཅས་གསུངས་འདུག...