ཡོ་རོབ་རྒྱལ་ཁབ་བཅུ་དྲུག་གི་དཔེ་མཛོད་ཁང་དུ་༸གོང་ས་མཆོག་ཕྱག་དེབ་འགྲེམས་སྤེལ།

བོད་མིའི་བླ་ན་མེད་པའི་དབུ་ཁྲིད་སྤྱིར་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་དང་བོད་མིའི་སླད་དུ་བསྐྱངས་གནང་མཛད་པའི་བླ་ན་མེད་པའི་བཀྲིན་ལ་རྗེས་དྲན་ཞུ་ཕྱིར་འཛམ་གླིང་མང་ཚོགས་ལ་མགོན་པོ་༸གང་ཉིད་མཆོག་གི་ཐུགས་བསྐྱེད་ཁག་ལ་གོ་རྟོགས་རྒྱ་ཆེ་ཡོང་བར་ཆེད་དམིགས་ཀྱིས་དབུས་ཤར་ཡོ་རོབ་རྒྱལ་ཁབ་བཅུ་དྲུག་ནང་རྟེན་གཞི་བྱས་པའི་དཔེ་མཛོད་ཁང་ ༡༡༣ ལ་༸གོང་ས་མཆོག་ཕྱག་དེབ་ཁག་འགྲེམས་སྤེལ་ཞུ་རྒྱུའི་ལས་རིམ་ཞིག་དབུ་འཛུགས་གནང་སོང་། ལས་གཞི་དེ་གཅོ་བོ་དབུས་ཤར་ཡོ་རོབ་རྒྱལ་ཁབ་ནང་་ཡོད་པའི་དཔེ་མཛོད་ཁང་ཁག་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྗགས་རྩོམ་མཛད་པའི་ཕྱག་དེབ་ཁག་འགྲེམས་སྤེལ་བརྒྱུད་དེ་འཛམ་གླིང་གི་མང་ཚོགས་ལ་མགོན་པོ་མཆོག་གིས་འགྲོ་བ་མིའི་བདེ་རྩར་སྨིན་པའི་བྱམས་བརྩེ་དང་འཚེ་མེད་ཞི་བ། དེ་བཞིན་ཆོས་ལུགས་མཐུན་སྒྲིལ་སོགས་ཟབ་ཅིང་རྒྱ་ཆེ་བའི་ཐུགས་བསྐྱེད་ཁག་ལ་གོ་རྟོགས་སྔར་ལྷག་རྒྱ་ཆེ་ཡོང་ཐབས་སུ་ཆེད་དམིགས་གནང་བ་ཞིག་ཆགས་ཀྱི་འདུག སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་རླུང་འཕྲིན་ཁང་ལ་༸གོང་ས་མཆོག་གི་ཕྱག་དེབ་འགྲེམས་སྤེལ་ཞུ་ཡུལ་དབུས་ཤར་ཡོ་རོབ་རྒྱལ་ཁབ་ ༡༦ དང་དཔེ་མཛོད་ཁང་ ༡༡༣ བཅས་ཀྱི་གྲངས་ཚད་ངེས་ཅན་བཞག་པའི་རྒྱུ་མཚན་ནི་མགོན་པོ་༸གང་ཉིད་མཆོག་གི་དགུང་གྲངས་ ༡༦ ནས་བོད་ཀྱི་ཆོས་སྲིད་གཉིས་ཀྱི་མཛད་འགན་བཞེས་པར་བོད་འབངས་ཡོངས་ནས་མགོན་པོ་མཆོག་ལ་བཀྲིན་རྗེས་དྲན་ཞུས་པ་མཚོན་ཆེད་དང། དེ་བཞིན་འགྲེམས་སྤེལ་ཞུ་ཡུལ་གྱི་དཔེ་མཛོད་ཁང་ ༡༡༣ གྱིས་མགོན་པོ་༸གང་ཉིད་མཆོག་གིས་དགུང་གྲངས་ ༡༡༣ བར་༸སྐུ་བཞུགས་མཛད་རྒྱུའི་ཞལ་བཞེས་གནང་བར་རྟེན་འབྲེལ་མཚོན་ཆེད་དུ་ཡིན་པ་གསུངས་ཡོད། སྤྱིར་ད་ལན་༸གོང་ས་མཆོག་གི་ཕྱག་དེབ་འགྲེམས་སྤེལ་ཞུ་རྒྱུའི་ལས་གཞི་ཐོག་དཔལ་འབྱོར་གྱི་མཐུན་འགྱུར་གནང་མཁན་ནི་སུད་སི་བོད་རིགས་མི་རིགས་མང་སྒྲིག་འཛུགས་ཁྱབ་ཁོངས་ Wadenswil ས་གནས་ཚོགས་ཆུང་ཆགས་ཀྱི་འདུག་ཅིང། སྐབས་ ༡༧ པའི་ཚོགས་ཆུང་གི་འཐུས་མི་ནོར་བུ་ཚེ་རིང་ལགས་ཀྱིས་ཚོགས་ཆུང་གི་ངོས་ནས་ད་ལན་མགོན་པོ་༸གང་ཉིད་མཆོག་གི་ཕྱག་དེབ་འགྲེམས་སྤེལ་ཞུ་རྒྱུའི་ལས་གཞིར་དཔལ་འབྱོར་གྱི་མཐུན་འགྱུར་ཞུ་རྒྱུའི་གོ་སྐབས་བྱུང་བ་ནི་ཚོགས་ཆུང་གི་ཚོགས་མི་རྣམས་ལ་སྐལ་པ་བཟང་པོ་ཞིག་ལ་ངོས་འཛིན་ཞུ་བཞིན་ཡོད་ཅེས་གསུངས་སོང་། དབུས་ཤར་ཡོ་རོབ་རྒྱལ་ཁབ་ཁག་ཏུ་འགྲེམས་སྤེལ་ཞུ་རྒྱུའི་༸གོང་ས་༸སྐྱབས་མགོན་ཆེན་པོ་མཆོག་གི་ཕྱག་དེབ་ཁག་ནི་བདེ་སྐྱིད་ཀྱི་ལམ་བུ་དང་ཆོས་ལུགས་ཀྱི་མཚམས་ལས་འདས་པ། བཙན་འབྱོལ་ནང་གི་རང་དབང། དེ་བཞིན་ཆོས་ལུགས་མཐུན་སྒྲིལ་བཅས་ཆགས་ཀྱི་འདུག