རྐང་སྤོལ་རུ་ཁག

འདི་ལོའི་འབྲས་ལྗོངས་མངའ་སྡེའི་སྲིད་སྐྱོང་གི་རྐང་སྤོལ་འགྲན་བསྡུར་ཐེངས་ ༣༧ ཐོག་བོད་ཀྱི་རྐང་སྤོལ་རུ་ཁག་གི་སྒོ་རགས་པ་བསྟན་འཛིན་བསམ་འགྲུབ་ལགས་ལ་ Best goal Keeper འམ་སྒོ་རགས་པ་རྩེད་ཕུད་ཀྱི་བྱ་དགའ་ཐོབ་འདུག ཟླ་བ་འདིའི་ཕྱི་ཚེས་ ༥ ནས་རྒྱ་གར་བྱང་ཤར་འབྲང་ལྗོངས་མངའ་སྡེའི་ནང་དུ་ Sikkim Governors Gold Cup ཞེས་འབྲས་ལྗོངས་མངའ་སྡེའི་སྲིད་སྐྱོང་གི་རྐང་སྤོལ་འགྲན་བསྡུར་ཐེངས་ ༣༧ པ་དེ་ཚོགས་ཡོད་པ་དང། འདི་ལོའི་འགྲན་བསྡུར་ནང་དུ་བོད་ཀྱི་རྒྱལ་ཡོངས་རྩེད་རིགས་ཚོགས་པའི་རྐང་སྤོལ་རུ་ཁག་ནས་མཉམ་ཞུགས་བྱས་ཡོད་པ་ལྟར། ཐེངས་དེའི་རྩེད་འགྲན་ཁྲོད་བོད་ཀྱི་རྐང་སྤོལ་རུ་ཁག་གི་སྒོ་རགས་པ་བསྟན་འཛིན་བསམ་འགྲུབ་ལགས་ལ་སྒོ་རགས་རྩེད་ཕུད་ཀྱི་བྱ་དགའ་ཐོབ་འདུག འདི་ག་རླུང་འཕྲིན་ཁང་ནས་བསྟན་འཛིན་བསམ་འགྲུབ་ལགས་སུ་ཞལ་པར་བརྒྱུད་བཀའ་འདྲི་ཞུས་པར་ཁོང་གིས་བྱ་དགའ་འདི་ནི་ཁོང་རང་ཉིད་གཅིག་པོ་མ་ཡིན་པར་བོད་ཀྱི་རྐང་སྤོལ་རུ་ཁག་དང་བོད་མི་ཡོངས་ལ་ཐོབ་པ་ཞིག་ཏུ་ངོས་འཛིན་ཞུ་བཞིན་ཡོད་ཅེས་གསུངས་སོང། རྩ་བའི་བོད་ཀྱི་རྐང་རྩེད་སྤོ་ལོའི་རུ་ཁག་ནས་འབྲས་ལྗོངས་མངའ་སྡེའི་སྲིད་སྐྱོང་གི་རྐང་སྤོལ་རྩེད་འགྲན་ནང་ཐེངས་གསུམ་འཛུལ་ཞུགས་གནང་པ་ཡོད་པ་དང་། ཐེངས་འདིའི་རྩེད་འཁྲོད་མཐའ་མའི་རིམ་པ་གསུམ་པའི་ནང་ཚུད་ནས་རྩེད་འགྲན་ཐེངས་ ༩ ཐོབ་མྱོང་ཡོད་པའི་རྒྱ་གར་གྱི་རུ་ཁག་ཆེ་གྲས་ Mohun Bagan དང་ལྷན་དུ་རྩེད་འགྲན་གནང་པ་ལས་རུ་ཁག་དེས་སྤོ་ལོ་གཅིག་མ་གཏོགས་བླུགས་ཐུབ་མེད་པ་རེད།...