རྡོ་རྗེ་ཚེ་རིང་ལགས་ཀྱིས་ཁོང་ཆུང་དུས་ནས་བོད་དོན་སླད་སེམས་ཤུགས་ཆེན་པོ་ཡོད་ཅེས་གསུངས་ཀྱི་འདུག

ཟླ་སྔོན་མའི་ཕྱི་ཚེས་ ༢༩ ཉིན་རྒྱ་གར་བྱང་ཕྱོགས་ཨུ་ཏར་ཁནྜ་མངའ་སྡེ་ཧར་བར་པུར་བོད་མིའི་གཞིས་སྒར་འདོད་རྒུ་གཡུ་རྒྱལ་གླིང་རྒས་གསོ་ཁང་དུ་རང་ལུས་མེར་བསྲེགས་གནང་མཁན་རྒྱལ་གཅེས་པ་རྡོ་རྗེ་ཚེ་རིང་ལགས་ཁ་སང་ཚེས་ ༣ ཉིན་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་འདུག གཞི་རྩའི་རྡོ་རྗེ་ཚེ་རིང་ལགས་ཀྱིས་ཧར་བར་པུར་དུ་ཟླ་ ༢ ཚེས་ ༢༩ ཉིན་གྱི་སྔ་དྲོ་ཚོུད་ ༩།༠༠ ཙམ་ལ་རང་ལུས་མེར་བསྲེགས་གནང་པས་ཁོང་གི་ལུས་པོ་བརྒྱ་ཆ་ ༩༥ མེར་བསྲེགས་ཟིན་ཡོད་པ་རེད། ཁོང་གི་སྤུན་མཆེད་གཙོས་པའི་གཞིས་སྒར་བོད་མི་ཚོས་ཁོང་ཐོག་མར་ཧར་བར་པུར་ཉེ་འཁོར་གྱི་སྨན་ཁང་ཞིག་དང་། དེ་རྗེས་རྡེ་ར་ལྡུན་གྱི་སྨན་ཁང་ཞིག་ཏུ་ཁྲིད་ཡོད་ནའང་སྨན་པས་མེར་བསྲེག་དང་འབྲེལ་བའི་ཛ་དྲག་གྱི་སྨན་བཅོས་མཐུན་རྐྱེན་ལེགས་ཤོས་རྒྱལ་ས་ལྡི་ལིར་རྟེན་གཞི་བྱས་པའི་ Safdarjung སྨན་ཁང་ཡིན་པ་སློབ་སྟོན་གནང་དོན་ལྟར། ཕ་མ་གཉིས་ཀྱིས་ཁོང་ལྡི་ལིར་རྟེན་གཞི་བྱས་པའི་ Safdarjung སྨན་ཁང་དུ་ཁྲིད་ནས་ཛ་དྲག་ལྟ་སྐྱོང་ཁང་དུ་སྨན་པས་མྱུར་སྐྱོབ་ཞུས་ཀྱང་། ཁ་སང་ཕྱི་ཚེས་ ༣ ཉིན་གྱི་དགོང་དྲོ་ཚོུད་ ༨།༣༠...

དེ་ཡང་ཁ་ཉིན་ཕྱི་ཚེས་ ༢༩ ཉིན་རྒྱ་གར་བྱང་ཕྱོགས་ཨུ་ཏར་ཁནྜ་མངའ་སྡེ་ཧར་བར་པུར་བོད་མིའི་གཞིས་སྒར་འདོད་རྒུ་གཡུ་རྒྱལ་གླིང་རྒས་གསོ་ཁང་གི་ཉེ་འདབས་སུ་རང་ལུས་མེར་བསྲེགས་གནང་མཁན་རང་ལོ་ ༡༦ སོན་པའི་རྡོ་རྗེ་ཚེ་རིང་ལགས་རང་ཉིད་ཀྱི་ལུས་པོ་བརྒྱ་ཆ་ ༩༥ མེར་བསྲེགས་ཟིན་ཀྱང་། ཁོང་ད་ལྟའི་ཆར་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ Safdarjung སྨན་ཁང་དུ་ཛ་དྲག་གྱི་མྱུར་སྐྱོབ་སྨན་བཅོས་གནང་བཞིན་ཡོད་པ་ལྟར། འདི་ག་རླུང་འཕྲིན་ཁང་གི་གསར་འགོད་པ་སྨན་ཁང་དུ་ཆེད་བསྐྱོད་ཀྱིས་ཁོང་ལ་བཅར་འདྲི་ཞུས་པར་ཁོང་གིས་ཆུང་དུས་ནས་ང་བོད་ཀྱི་ཆེད་དུ་སེམས་ཤུགས་ཆེན་པོ་ཡོད་སྟབས། ངས་དང་ཐོག་ཤེས་ཡོན་གྱི་ཐོག་ནས་ལས་ཀ་ཞིག་བྱེད་དགོས་བསམ་བྱུང་། འོན་ཀྱང་ང་རང་འཛིན་གྲྭ་བཅུ་པའི་ཡིག་རྒྱུགས་ཡག་པོ་མ་བྱུང་པས་བོད་དོན་སླད་གཞན་གང་ཡང་ཐུབ་པ་མིན་འདུག་ཀྱང། བོད་དོན་ཆེད་རང་ལུས་མེར་བསྲེག་གཏང་ཐུབ་པ་འདུག་བསམ་ནས་དེ་ལྟར་བྱས་པ་ཡིན། དེ་སྔོན་ཕ་མ་གཉིས་པོར་རང་ལུས་མེར་བསྲེག་གཏང་ན་གང་འདྲ་ཡོད་རེད་ཅེས་དྲིས་པ་ཡིན། གལ་ཏེ་ཁྱེད་ཀྱིས་དེ་ལྟར་བྱ་ཚེ་ང་གཉིས་ཤི་རྒྱུ་ཡིན་ཞེས་གསུངས་སོང། ད་ལྟ་ངས་བོད་སྤྱིའི་དོན་དུ་རང་གི་ཕ་མ་གཉིས་ཀ་བློས་གཏོང་བྱས་པ་ཡིན། མཐར་སློབ་ཕྲུག་ཚོར་༸གོང་ས་མཆོག་གི་བཀའ་དགོངས་ལྟར་སློབ་སྦྱོང་ཡག་པོ་བྱ་རྒྱུ་དང་། དེ་མཚུངས་སུ་བོད་དེ་རྒྱའི་ལག་ནས་བླང་ཐུབ་པ་བྱ་གལ་ཡིན་པ་གསུངས་སོང། གཞན་ཡང་ཁོང་གི་ཕ་ཐུབ་བསྟན་བཀྲིས་ལགས་སུ་ད་ལྟའི་ཆར་ཁོང་གི་གནས་སྟངས་ཇི་ཡོད་སྐོར་བཅར་འདྲི་ཞུས་པར་དེ་སྔོན་ཕྱི་ཟླ་ ༡༢ པའི་ནང་སློབ་གྲྭའི་དགུན་དུས་གུང་གསེང་སྐབས་པ་ལགས་ང་བོད་སྤྱིའི་དོན་དུ་རང་ལུས་མེར་བསྲེག་གཏང་ན་དགའ་བ་འདུག་གམ་ཞེས་དྲིས་ཀྱི་འདུག་ཀྱང། ངས་བུར་༸གོང་ས་མཆོག་གི་བཀའ་དགོངས་བཞིན་སློབ་སྦྱོང་ཡག་པོ་བྱེད་པ་དང་བོད་སྤྱིའི་དོན་དུ་ལས་ཀ་བྱེད་ན་ང་ཞེ་དྲག་དགའ་བ་འདུག་ཅེས་བཤད་པ་ཡིན། དེ་མིན་རང་ལུས་མེར་བསྲེག་གཏང་ན་ང་དགའ་བ་མི་འདུག་ཅེས་བཤད་སྟབས། ཟླ་ཤས་རྗེས་སུ་བུས་ང་ལ་ཕྱི་ཟླ་གཉིས་པ་དང་གསུམ་པ་ནས་ང་མཐོང་གི་མ་རེད་ཅེས་བཤད་ཀྱི་འདུག...