སེར་ར་བྱེས་སྨད་གཉིས་ཀྱིས་སྦེང་ལོར་ཁ་འཐོར་བོད་མིར་སྔོན་ཁབ་མཐུན་འགྱུར་གནང་བ།

རྒྱ་ནག་ནས་མཆེད་པའི་ཏོག་དབྱིབས་གཉན་རིམས་ཁྱབ་གདལ་རྐྱེན་གྱིས་ད་བར་རྒྱ་གར་ནང་མི་གྲངས་འབུམ་བཞི་ཙམ་གྱི་ཚེ་སྲོག་ཤོར་ཡོད་པ་མ་ཟད་རྒྱ་གར་དང་བལ་ཡུལ། འབྲུག་བཅས་སུ་ཡོད་པའི་བཙན་བྱོལ་བོད་མི་ཁྱོན་ ༡༢༦ ལྷག་གི་ཚེ་སྲོག་ཀྱང་ཤོར་ཡོད་པ་རེད།  ཏོག་དབྱིབས་གཉན་རིམས་དེ་ནི་ནད་རིགས་གཞན་དང་མི་འདྲ་བར་སྔོན་འགོག་གི་སྨན་ཁབ་རྒྱག་རྒྱུ་ལས་དམིགས་བསལ་སྨན་བཅོས་ཀྱི་མཐུན་རྐྱེན་མེད་པ་མ་ཟད་ལྷག་པར་དུ་རྒྱ་གར་ནང་ལ་ཆ་མཚོན་ན་འདི་ལོའི་ཕྱི་ཟླ་ ༣ ཙམ་ནས་ནད་རླབས་གཉིས་པ་དེ་ཆེས་ཆེར་ཁྱབ་ནས་བོད་མིའི་འདུ་སྡོད་ས་གནས་ཁག་ཅིག་ཏུ་གནས་སྟངས་ཤིན་ཏུ་ཛ་དྲག་ཆགས་ཏེ་ཁྱོན་བོད་མི་གྲངས་ ༥༠༠༠ མ་ཟིན་ཙམ་ལ་གོད་ཆག་ཕོག་པ་དང་ནད་ཡམས་དེ་ནས་སྐྱོབ་ཐབས་ཀྱི་ལམ་ཞིག་ཡོད་པ་ནི་སྔོན་ཁབ་རྒྱག་རྒྱུ་དེ་ཡིན་ནའང་། རྒྱ་གར་གྱི་མི་འབོར་ལ་གཞིགས་པའི་ནད་འགོག་སྨན་མཁོ་སྒྲུབ་གནང་མ་ཐུབ་པའི་དཀའ་ངལ་ཆེན་པོ་ཞིག་འཕྲད་བཞིན་ཡོད་པ་རེད། འོན་ཏང་རྒྱ་གར་དུ་ཡོད་པའི་བོད་མི་ཚོར་བོད་བརྒྱུད་ནང་བསྟན་གྱི་བླ་ཆེན་ཁག་ཅིག་དང་བརྩེ་སེམས་ལྡན་པའི་རང་རིགས་ཁག་ཅིག་གིས་བོད་མིའི་གནས་སྡོད་ཀྱི་ས་གནས་ཁག་ཏུ་རིན་མེད་ཐོག་སྔོན་ཁབ་ཀྱི་མཐུན་འགྱུར་གནང་ཡོད་པ་ལྟར། རྒྱ་གར་གྱི་རྒྱལ་ས་ལྡི་ལིར་ཀུན་བཟང་སྤྲུལ་སྐུ་མཆོག་ནས་མཐུན་འགྱུར་གནང་སྟེ་ཁ་ཉིན་རེས་གཟའ་སྤེན་པ་དང་ཉི་མ་བཅས་ཉིན་གཉིས་ཀྱི་རིང་ལ་རང་ལོ་ ༡༨ ནས་ ༤༤ བར་གྱི་ན་གཞོན་གྲངས་ ༤༠༠ ལྷག་ལ་སྔོན་ཁབ་ཀྱི་མཐུན་འགྱུར་གནང་ཡོད་པ་རེད།གཞི་རྩའི་༸སྐྱབས་རྗེ་ཀུན་རྡོར་རིན་པོ་ཆེ་མཆོག་ནས་དེ་སྔོན་ཕྱི་ཟླ་ ༤ ཙམ་ནས་བོད་མིའི་གཞིས་ཆགས་ཁག་ཅིག་དང་སློབ་གྲྭ། དེ་བཞིན་མགོན་སྡེ་གྲྭ་ཚང་ཁག་ཅིག་བཅས་ལ་ནད་ཡམས་སྔོན་འགོག་གི་ཁ་རས། དུག་རྫས་སོགས་ཀྱི་མཐུན་འགྱུར་གནང་ཡོད་པ་ཟད།  སྲོག་འཛིན་རླུང་རྫས་དང་། ཚ་དྲོད་དང་སྲོག་རླུང་ཚད་འཇལ་སོགས་ཀྱི་སྨན་བཅོས་ཡོ་ཆས་ཀྱི་མཐུན་རྐྱེན་ཡང་གནང་མྱོང་ཡོད་པ་རེད།...

ཁ་སང་ལྷོ་ཕྱོགས་སྦེལ་ཀོབ་དུ་རྟེན་གཞི་བྱས་པའི་གདན་ས་ཆེན་མོ་སེར་ར་བྱེས་དང་སྨད་གཉིས་ཀྱིས་སྦེང་ལོར་ཁ་འཐོར་བོད་མི་རང་ལོ་ ༡༨ སོན་པ་རྣམས་ལ་ཏོག་དབྱིབས་གཉན་རིམས་ ༡༩ པའི་འགོག་ཁབ་ Covi Shield ཞེས་པ་དེ་མཐུན་འགྱུར་གནང་སོང་།སྔ་དྲོའི་ཚོུད་ ༩ ་༣༠ སྟེང་ལྷོ་སྤྱི་ལས་ཁུངས་ནས་འགོག་ཁབ་སྨན་སྦྱིན་གནང་བའི་ལས་འགུལ་དེ་གོ་སྒྲིག་གནང་ཡོད་པ་ལྟར་མི་མང་རྣམས་ཀྱི་དང་ཐོག་རང་ཉིད་ཀྱི་མིང་ཐོ་འགོད་གནང་བ་དང་རིམ་བཞིན་སྔོན་ཁབ་བཞེས་པ་མ་ཟད་བོད་ཁྱིམ་གྱི་གསོལ་ཐབ་ཁང་དུ་སྐར་མ་ཉི་ཤུ་ཙམ་གྱི་རིང་ལ་ངལ་གསོ་གནང་ཡོད། སྐབས་དེར་ལྷོ་སྤྱི་ཁྱབ་ཁོངས་སུ་ཚུད་པའི་བོད་མི་ཁྱོན་ ༣༣༩ ལ་སྔོན་ཁབ་རག་ཡོད་པ་རེད།གསར་འགོད་པས་སྔོན་ཁབ་མཐུན་འགྱུར་གནང་མཁན་སེར་སྨད་གྲྭ་ཚང་གི་ཕྱག་མཛོད་དགེ་བཤེས་བློ་བཟང་དབྱིག་གཉེན་ལགས་སུ་མང་ཚོགས་དག་ལ་སྔོན་ཁབ་མཐུན་འགྱུར་བསྐྲུན་པའི་དགོས་པ་གང་ལ་གཟིགས་སམ་ཞེས་སོགས་བཀའ་འདྲི་ཞུས་པར་ཁོང་གིས་སྤྱིར་༸གོང་ས་མཆོ་གིས་རྣམ་ཀུན་ནས་བོད་པའི་དགེ་འདུན་པ་རྣམས་ལ་ཡི་ཤུའི་ཆོས་པ་ལྟར་གཞན་ལ་ཕན་པའི་ཞབས་འདེགས་ཞུ་རྒྱུའི་གལ་ཆེ་ཡིན་པར་ལམ་སྟོན་བཀྲིན་ཆེ་བ་དུས་ནས་དུས་སུ་ཕེབས་དོན་བཞིན་དེ་རེས་གཉན་རིམས་ཁྱབ་གདལ་གྱི་ཛ་དྲག་དུས་སྐབས་འདིར་ཁ་ཡོད་ལག་ཡོད་ཕན་ཐོགས་ཡོད་པར་གཟིགས་ཏེ་ཐོག་སྨན་སྦྱིན་གནང་བར་གསུངས་སོང་།དེ་བཞིན་ཉིན་རྒྱབ་ཏུ་ཏཱ་ལའི་བླ་མའི་མཐོ་རིམ་སློབ་གཉེར་ཁང་གི་སློབ་ཕྲུག་དང་སྨན་རྩིས་ཁང་གི་སློབ་ཕྲུག ལས་བྱེད། ཉེ་འགྲམ་སུ་བཞུགས་པའི་བོདམི་ཁྱོན་ ༢༣༨ ལ་སྔོན་ཁབ་བརྒྱབ་ཡོད་པ་རེད།སྤྱིར་བཏང་རྒྱ་གར་དབུས་གཞུང་ནས་རང་ལོ་ ༡༨ སོན་པ་རྣམས་ལ་སྔོན་ཁབ་རྒྱག་ཆོག་པའི་བཀའ་བརྒྱ་དེ་ཟླ་བ་གཅིག་གི་སྔོན་ལ་བཏང་ཟིན་ཡོད་ཀྱང་། དངོས་སུ་གཞོན་སྐྱེས་རྣམས་ལ་ཐོབ་རྒྱུ་དཀའ་ལས་ཁག་པོ་ཆགས་པའི་གནས་སྟངས་གྱུར་ཡོད་པ་རེད།གདན་ས་ཆེན་མོ་སེར་ར་བྱེས་དང་སྨད་གཉིས་ཀྱིས་གཞོན་སྐྱེས་གཙོས་མང་ཚོགས་ལ་རིན་མེད་ཐོག་སྔོན་ཁབ་ཀྱི་མཐུན་འགྱུར་གནང་དོན་ལྟར་སྔོན་ཁབ་བཞེས་མཁན་གྱི་གཞོན་སྐྱེས་འགར་བཅར་འདྲི་ཞུས་པར་སྔོན་ཁབ་རག་པར་འབད་བརྩོན་གང་ཐུབ་ཞུས་ཀྱང་རག་མེད་སྐོར་དང་ད་རེས་རིན་མེད་ཐོག་བོད་པའི་ཁོར་ཡུག་ནང་དུ་སྔོན་ཁབ་བཞེས་རྒྱུ་བྱུང་བར་དགའ་སྤྲོ་དཔག་མེད་བྱུང་སོང་ཞེས་སོགས་གསུངས་ཡོད།