Science Direct ཞེས་པའི་ཁོར་ཡུག་ཉམས་ཞིབ་ཁང་གི་ Journal of Rock Mechanics and Geotechnical Engineering ཞེས་རྡོའི་འགུལ་ཤུགས་རིག་པ་དང་ས་ཁམས་བཟོ་ལས་རིག་པའི་དུས་དེབ་ནང་རྒྱ་ནག་ཁྲེན་ཏུའུ་བཟོ་ལས་མཐོ་སློབ་ཀྱི་སློབ་དཔོན་ཆེན་མོ་འབུམ་རམ་པ་ Weili Li ལགས་དང་ཉམས་ཞིབ་པ་གཞན་ལྔ་ཡིས་ཉམས་ཞིབ་སྙན་ཐོ་ཞིག་འདོན་སྤེལ་གནང་བའི་ནང་། བོད་ཡར་ཀླུང་གཙང་པོའི་འགོ་ཁུངས་ཁུལ་དུ་ཕྱི་ལོ་ ༢༠༡༧ ནས་བཟུང་ཚ་དྲོད་ཤུགས་ཆེ་རྒྱས་བཞིན་པ་དང་། ས་རུད་སོགས་ཡང་ཡང་བྱུང་བའི་རྐྱེན་གྱིས་ཤམ་འོག་གི་ Bangladesh བཱང་ལཱ་དྴེ་དང་རྒྱ་གར། ལྷག་པར་དུ་རྒྱ་གར་གྱི་བྱང་ཤར་ས་ཁུལ་ནང་དུ་ཆུ་ལོག་སོགས་ཀྱི་ཉེན་འཚབ་ཆེན་པོ་ཡོད་པ་མངོན་གསལ་གནང་འདུག
ཟླ་བ་འདིའི་ཚེས་ ༢ ཉིན་དུས་དེབ་དེའི་ཐོག་འདོན་སྤེལ་གནང་བའི་སྙན་ཐོ་དེ་ནང་གསལ་ལྟར་ན། Sendong ཕུ་ལུང་ཞེས་ཡར་ཀླུང་གཙང་པོའི་འགོ་ཁུངས་ཁུལ་དུ་དེ་སྔ་ཕྱི་ལོ་ ༢༠༡༢ སྔོན་ཚ་དྲོད་རྒྱས་ཚད་ཀླད་ཀོར་ཡིན་སར་ཕྱི་ལོ་ ༢༠༡༧ རྗེས་སུ་ལོ་རེར་ཚ་དྲོད་རྒྱས་ཚད་ཆེ་རུ་ཕྱིན་པ་དང་འབྲེལ། ས་ཡོམས་སོགས་ཀྱི་དོན་རྐྱེན་ཇི་མང་ཁྲོད། གཙང་པོའི་འགོ་ཁུངས་ཀྱི་ལུང་གཞོང་ནང་ས་སྙིག་ cubic meter ས་ཡ་ ༧༠༠ ལྷག་བསག་ཡོད་པ་དང་། དེའི་ཐོག་ཡར་ཀླུང་གཙང་པོའི་ཆུ་རྒྱུན་སྟེང་ཆུ་མཛོད་གསར་རྒྱག་གི་ལས་གཞི་རྐྱེན་པས་གཤམ་འོག་གི་རྒྱ་གར་དང་བཱང་ལཱ་དྴེ་གཉིས་ཀྱི་ནང་དུ་ཆུ་ལོག་སོགས་ཀྱི་ཉེན་འཚབ་ཆེན་པོ་ཆགས་ཡོད་པ་མངོན་གསལ་གནང་འདུག
ཉམས་ཞིབ་པ་རྣམས་ཀྱིས་ཕྱི་ལོ་ ༡༩༦༩ ནས་ ༢༠༢༣ བར་ཡར་ཀླུང་གཙང་པོའི་འགོ་ཁུངས་ས་ཁུལ་གྱི་ཟུང་སྐར་འདྲ་པར་ ༡༤༩ ཙམ་འདོན་སྤེལ་གནང་བའི་བརྒྱུད། ས་ཁུལ་དེའི་ནང་དུ་འཁྱགས་རོམ་དང་གངས་རུད་སོགས་ཀྱི་དོན་རྐྱེན་ཆེ་བ་ ༡༩ ཙམ་བྱུང་ཡོད་པ་དང་། དེའི་ཁྲོད་གངས་རུད་ཀྱི་དོན་རྐྱེན་ཁ་ཤས་འོག ཡར་ཀླུང་གཙང་པོ་དང་དེའི་ཡན་ལག་ Yigong གཙང་པོ་གཉིས་ཀྱི་རྒྱུག་ཆུ་རེ་ཞིག་འགག་སྟེ། ཆུ་མཛོད་ལྟ་བུ་ཞིག་ཆགས་ཡོད་པ་དེ་རྒྱས་པའི་རྐྱེན་གྱིས་རྒྱ་གར་ཨ་རུ་ན་ཅལ་མངའ་སྡེའི་ཤར་ Siang གྲོང་ཁྱེར་དང་ཨ་སྶམ་མངའ་སྡེའི་ Dhumaji རྫོང་ཁུལ་དུ་ཆུ་ལོག་གི་དཀའ་ངལ་ཤུགས་ཆེ་ཕྲད་པ་མངོན་གསལ་གནང་འདུག མ་ཟད་དེང་སྐབས་རྒྱ་ནག་གཞུང་གིས་ཡར་ཀླུང་གཙང་པོས་གཙོས་བོད་ཀྱི་ཆུ་རྒྱུན་ཁག་ཏུ་ཆུ་ཤུགས་གློག་ཁང་དང་ཆུ་མཛོད་གསར་རྒྱག་སོགས་ཀྱི་ལས་གཞིའི་ཁྲོད། རྒྱ་གར་དང་བཱང་ལཱ་དྴེ་ནང་དུ་རྒྱུག་པའི་ཆུ་རྒྱུན་ཁག་ཏུ་ས་སྙིག་ཊོན་ས་ཡ་ ༨༠༠ ལྷག་གི་རྐྱེནས་པས་དཀའ་ངལ་ཤུགས་ཆེ་འཕྲད་ངེས་ཡིན་པ་གསུངས་འདུག
སྙན་ཐོར་གཞིགས་ན་ཡར་ཀླུང་གཙང་པོིའི་འགོ་ཁུངས་སུ་ཕྱི་ལོ་ ༡༩༧༤ དང་ ༡༩༧༥ སོ་སོར་ས་རུད་སོགས་ཀྱི་དོན་རྐྱེན་རེ་ཟུང་བྱུང་ཡོད་ཀྱང་། དེ་དག་གི་ཕྱི་ལོ་ ༡༩༨༧ བར་དམིགས་བསལ་གནོད་འཚེ་བྱུང་བ་མངོན་རྒྱུ་མེད། འོན་ཀྱང་ཕྱི་ལོ་ ༡༩༩༨ དང་ ༢༠༠༠ ལོར་སོ་སོར་འཁྱགས་རོམ་བཞུར་བའི་དོན་རྐྱེན་གཉིས་བྱུང་རྗེས་དཀའ་ངལ་ཇེ་ཆེར་འཕྲད་ཀྱི་ཡོད་པ་མངོན་གསལ་གནང་འདུག
རྒྱ་གར་བྱང་ཤར་ Guwahati གྲོང་ཁྱེར་ནང་དུ་རྟེན་གཞི་བྱས་པའི་ Aranyak སྐྱེ་ཁམས་ཉམས་ཞིབ་ལྟེ་གནས་ཁང་གི་ཆུ་ཁམས་དང་གནམ་གཤིས་ཉེན་ཁ་ཚན་པའི་གཙོ་འཛིན་ Partha Jyotidas ལགས་ཀྱིས་དེ་ལྟ་བུའི་གནས་སྟངས་འོག་མཉམ་མཐུན་གྱི་ཉམས་ཞིབ་མུ་མཐུད་གནང་དགོས་གལ་ཡིན་པ་དང་། ཟུང་སྐར་གྱི་འདྲ་པར་བརྒྱུད་ལྟ་སྲུང་ནན་པོ་དགོས་པ། དེ་བཞིན་མ་འོངས་ཉེན་ཁ་དང་འབྲེལ་བའི་ངལ་སེལ་གྲ་སྒྲིག་དགོས་པ། མང་ཚོགས་ལ་གོ་རྟོགས་སྤེལ་དགོས་པ། ས་ཁམས་སྲུང་སྐྱོབ་ཀྱི་ལས་འགུལ་སྤེལ་དགོས་གལ་ཡིན་པ་སོགས་གསུངས་འདུག
