༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་ཀར་ནཱ་ཊ་ཀ་མངའ་སྡེའི་ཧུན་སུར་རབ་གླིང་བོད་མིའི་གཞིས་ཆགས་སུ་ཞབས་སོར་བདེ་བར་འཁོད་པ་དང། ཁུལ་དེའི་ནང་རྟེན་གཞི་བྱས་པའི་དཔལ་ལྡན་སྨད་རྒྱུད་གྲྭ་ཚང་དུ་དེ་རིང་ཉིན་རྒྱབ་ནས་ཆོས་འབྲེལ་དབུ་འཛུགས་མཛད་ཡོད་པ་རེད། 
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་རབས་ཉེར་གཅིག་དེའི་ནང་བོད་མི་ཚོས་རང་ཉིད་བཙན་བྱོལ་བའི་གནས་སྟངས་འོག་ཡོད་ཀྱང་བོད་ཀྱི་ཆོས་དང་རིག་གཞུང་འདི་བཞིན་རང་ཉིད་ཀྱི་ཚེ་སྲོག་ལྟར་གཅེས་འཛིན་བྱས་ཡོད་པ་མ་ཟད། ལྷག་པར་དུ་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་ཞུ་ཆེད་རྒྱུད་གྲྭ་སྟོད་སྨད་སོགས་གདན་ས་གྲྭ་ཚང་རྣམས་ཀྱང་མི་རབས་རྒན་པ་ཚོས་སྐུ་ལས་བསྐྱོན་པ་ལས་ད་ལྟའི་གནས་སྟངས་ལེགས་པོ་ཆགས་ཡོད་པས་ཁོང་རྣམ་པའི་མཛད་རྗེས་ལ་རྗེས་དྲན་དང་བསྔགས་བརྗོད་གནང་ཡོད་པ་རེད། དེ་བཞིན་༸གང་ཉིད་མཆོག་གིས་དེ་རིང་སླར་ཡང་རྒྱུད་སྨད་གྲྭ་ཚང་དུ་ཞབས་སོར་འཁོད་དེ་དཔལ་གསང་བ་འདུས་པའི་བཀའ་དབང་བརྩལ་རྒྱུའི་གོ་སྐབས་བྱུང་བར་ཐུགས་དགྱེས་ཚོར་ཆེན་པོ་བྱུང་བའི་བཀའ་སློབ་ཕེབས་པ་མ་ཟད། སྔོན་འགྲོའི་ཆོས་བཤད་སྐྱབས་འགྲོའི་སྐོར་ལ་ངོ་སྤྲོད་གནང་བ་དང་ཆབས་ཅིག དེ་རིང་བཀའ་ཆོས་བསྩལ་གནང་རྒྱུའི་རྟེན་འབྲེལ་བསྟོད་པ་དང་། རྟོགས་བརྗོད་མདུན་ལེགས་མ། ལྟ་ཁྲིད་དྲན་པ་བཞི་ལྡན་སོགས་ཀྱི་བཤད་ལུང་གནང་རྒྱུ་དབུ་འཛུགས་གནང་ཡོད་པ་རེད། 
རྩ་བའི་ཐེངས་འདིའི་ཆོས་ཞུ་བའི་གྲས་སུ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གཙོས་པའི་ཤར་བྱང་ཆོས་རྗེ་རྣམ་གཉིས། འཁོན་རིགས་བསྟན་པའི་བདག་པོ་དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག སྐྱབས་རྗེ་ཡོངས་འཛིན་གླིང་རིན་པོ་ཆེ་མཆོག བཀའ་ཟུར་མཁས་དབང་སློབ་དཔོན་ཟམ་གདོང་རིན་པོ་ཆེ་མཆོག གདན་ས་ཁག་གི་མཁན་པོ། མཁན་ཟུར་རྣམ་པ་དང། བླ་སྤྲུལ་དགེ་བའི་བཤེས་གཉེན་སོགས་སེར་སྐྱ་མང་ཚོགས་ ༢༠༠༠༠ ལྷག་ཙམ་ཆེད་བཅར་ཞུས་ཡོད་པའི་ཁོངས་སུ་ཕྱི་རྒྱལ་ཡུལ་གྲུ་ཀོ་རི་ཡ་དང་། སིང་ག་པུར་་ཐེ་ལྦན། མ་ལི་ཤི་ཡ་སོགས་ཕྱི་རྒྱལ་ཡུལ་གྲུ་ཁག་མང་པོ་ཞིག་བཅར་ཡོད་པ་མ་ཟད། དེ་བཞིན་བོད་ནས་ཆོས་ཞུར་བཅར་མཁན་ཡང་ ༨༠༠ ཙམ་ཞིག་བཅར་ཡོད་པ་རེད་འདུག
