ཁམས་ཡུལ་ཤུལ་དམར་ལེབ་རྫོང་ཆིག་སྒྲིལ་གྲོང་སྔོན་ལུང་སྡེ་བ་ནས་ཡིན་པའི་ཕྲུ་གུ་གསུམ་གྱི་ཨ་མ་ནོར་འཛིན་དབང་མོ་ལགས་ལ་ཕྱི་ལོ་ ༢༠༡༣ ལོར་བོད་མི་བསྟན་འཛིན་ཤེས་རབ་ལགས་ཀྱིས་སྐུ་ལུས་ཞུགས་འབུལ་གནང་བའི་གནས་ཚུལ་ཕྱི་ལ་ཁྱབ་བསྒྲགས་བྱས་པའི་ཉེས་མེང་འོག་ཁོང་ལ་ལོ་གསུམ་གྱི་རིང་བཙོན་འཇུག་ཉེས་ཆད་བཏང་ཡོད་པ་དང་། ད་ལྟའི་ཆར་ཁོང་བཙོན་ཁང་གང་དུ་ཡོད་མེད་སོགས་ཀྱི་གནས་ཚུལ་ཞིབ་ཕྲ་ཤེས་རྟོགས་དཀའ་བར་གྱུར་ཡོད་པ་མ་ཟད། ནང་མི་བུ་ཕྲུག་དང་བཟའ་ཟླ་བཅས་པར་ཐུག་འཕྲད་གནང་བའི་རྒྱུ་རྐྱེན་འོག་ཁོང་གི་གཟུགས་གཞིའི་གནས་སྟངས་ཞན་པོ་ཆགས་ཡོད་པ་རེད་འདུག
གནས་ཚུལ་མཁོ་སྤྲོད་པས་གསུངས་པར་གཞིགས་ན། ཕྱི་ལོ་ ༢༠༡༣ ཟླ་ ༥ ཚེས་ ༢༦ ཉིན་ཆུ་དམར་ལེབ་རྫོང་ཆིག་སྒྲིལ་གྲོང་སྡེ་ནས་ཡིན་པའི་བོད་མི་ན་གཞོན་བསྟན་འཛིན་ཤེས་རབ་ལགས་ཀྱིས་སྐུ་ལུས་མེར་བསྲེགས་གནང་ཡོད་པ་བཞིན། ཕྱི་ལོ་ ༢༠༢༠ ཟླ་ ༥ པའི་ནང་ཆུ་དམར་ལེབ་རྫོང་མི་དམང་ཁྲིམས་ཁང་གིས་གསང་བའི་ཁྲིམས་ར་ཚོགས་ནས་ནོར་འཛིན་དབང་མོས་སྐབས་དེའི་གནས་ཚུལ་ཕྱིར་ཁྱབ་བསྒྲགས་གནང་ཡོད་པའི་ཉེས་འཛུགས་འོག་ལོ་གསུམ་གྱི་རིང་བཙོན་འཇུག་ཁྲིམས་ཐག་བཅད་ཡོད་པ་དང་། སྤྱིར་ས་གནས་ཉེན་རྟོག་པས་ནོར་འཛིན་དབང་མོ་ལགས་འཛིན་བཟུང་བྱས་སྐབས་ཐོག་མར་ཁོང་ཞིབ་བཤེར་ཁང་དུ་ཆུ་ཚོད་ཉི་ཤུའི་རིང་བཀག་ཉར་བྱས་པ་དང་། ལག་པར་ལྕགས་སྒྲོན་བརྒྱབ་ནས་སྐར་མ་འགའི་རིང་ནང་མིར་ཐུག་འཕྲད་གནང་བཅུག་འདུག་པ་དེ་ལྟར་ནའང་། ནང་མི་ཚོས་ཕུལ་བའི་ན་བཟའ་དང་དངོས་ཆས་གང་ཡང་ལེན་བཅུག་མི་འདུག སྐུ་ལུས་མེར་བསྲེག་གནང་མཁན་རྒྱལ་གཅེས་དཔའ་བོ་བསྟན་འཛིན་ཤེས་རབ་ལགས་དང་ནོར་འཛིན་དབང་མོ་གཉིས་དབར་གཉེན་ཉེ་སྤུན་མཆེད་སོགས་ཀྱི་འབྲེལ་བ་གང་ཡང་མེད་པ་དང་། ཁོང་གི་ནང་ལ་བཟའ་ཟླ་ཉི་མ་གཙོས་བུ་ཕྲུག་ཆུང་ཤོས་ལོ་ ༢ དང་ཆེ་ཤོས་ལོ་ ༥ བཅས་ཁྱོན་བྱིས་པ་ ༣ ཡོད་པ་རེད་འདུག
ཁོང་ནི་ཁྲི་འདུ་རྫོང་སྡོམ་མདའ་ཞང་སྐར་ཆེན་སྡེ་བའི་རུ་ཆེན་དང་པོ་ནས་ཡིན་ཞིང་། ཕྱི་ལོ་ ༢༠༡༦ ལོར་ཁོང་ཆུ་དམར་ལེབ་རྫོང་ཆིག་སྒྲིལ་གྲོང་རྡལ་སྔོན་ལུང་ས་གནས་སུ་གནས་ལ་ཕྱིན་ནས་འབྲོག་པའི་འཚོ་བ་སྐྱེལ་བཞིན་ཡོད་པ་དང་། ད་བར་རྒྱ་ནག་གཞུང་གིས་ཁོང་གི་ནང་མི་ཚོ་དང་ཐུག་འཕྲད་གནང་བཅུག་གི་མེད་པ་རེད།
