བོད་མིའི་སྒྲིག་འཛུགས་བཀའ་ཤག་གིས་ཟླ་སྔོན་མའི་ཕྱི་ཚེས་ ༣༠ ཉིན་དྷ་ས་མེག་གྷན་གཞུང་ལམ་དུ་བོད་མི་ན་གཞོན་ཚུལ་ཁྲིམས་མཆོག་ལྡན་ལགས་རྒྱ་གར་བས་བསད་པའི་ཡིད་སྐྱོ་གནས་ཚུལ་ཐོན་པར་གསུང་སེམས་མཉམ་སྐྱེད་དང་འབྲེལ། གནད་དོན་དེ་འབྲེལ་གྱིས་བོད་མི་མང་ཚོགས་དང་གནས་ཡུལ་རྒྱ་གར་གྱི་ཡུལ་མིའི་དབར་མཐུན་ལམ་ལ་དོ་ཕོག་འགྲོ་བའི་གནད་དོན་རིགས་ཡིད་གཟབ་གནང་དགོས་པའི་གཞེན་སྐུལ་ཞིག་གནང་འདུག ཁ་སང་ཕྱི་ཚེས་ ༥ ཉིན་བོད་མིའི་སྒྲིག་འཛུགས་ཀྱི་བཀའ་ཤག་ནས་སྤེལ་བའི་གསར་འགོད་བསྒྲགས་གཏམ་དེའི་ནང་། ཉེ་ཆར་ཕྱི་ཟླ་ ༡༠ ཕྱི་ཚེས་ ༣༠ ཉིན་བཞུགས་སྒར་དུ་གནས་སྡོད་བོད་པའི་གཞོན་སྐྱེས་ཚུལ་ཁྲིམས་མཆོག་ལྡན་ལགས་ལ་རྒྱ་གར་བ་གསུམ་གྱིས་མེག་གྷན་གཞུང་ལམ་དུ་གྲི་བརྒྱབ་ནས་བཀྲོངས་པ་དེ་ནི་ཆེས་ཐབས་སྡུག་དང་བློ་ཕམ་དགོས་པའི་ཡིད་སྐྱོའི་གནས་ཚུལ་ཞིག་ཐོན་ཡོད་ཀྱང་། ས་གནས་རྒྱ་གར་ཉེན་རྟོག་པས་ལག་དམར་ཉེས་ཅན་པ་གསུམ་འཕྲལ་མར་འཛིན་བཟུང་བཀག་བསྐྱིལ་ཐུབ་པ་བྱུང་ཡོད། དེ་ནི་ཆེས་བསྔགས་འོས་ཀྱི་གནས་ཡིན་པ་མ་ཟད། ཉེས་ཅན་པ་གསུམ་པར་རྒྱ་གར་ཁྲིམས་ཐོག་ནས་དྲང་བདེན་གྱི་ཐག་གཅོད་གནང་རྒྱུ་ཡིན་པར་བོད་མིའི་སྒྲིག་འཛུགས་ཀྱིས་ཡིད་ཆེས་བརྟན་པོ་ཡོད་སྐོར་གསུངས་འདུག དེ་བཞིན་དོན་རྐྱེན་དེ་བྱུང་རྗེས་རང་རིགས་བོད་མི་འགས་བོད་མི་སྐྱབས་བཅོལ་བ་དང་གནས་ཡུལ་རྒྱ་གར་གྱི་ཡུལ་མིའི་དབར་མཐུན་ལམ་ལ་དོ་ཕོག་འགྲོ་བའི་འཆལ་གཏམ་འདྲ་མིན་སྤྱི་ཚོགས་ཀྱི་བརྒྱུད་ལམ་དྲ་རྒྱ་སོགས་ནང་སྤེལ་བཞིན་འདུག་ན། བོད་རིགས་མང་ཚོགས་རྣམ་པས་དེ་དོན་ངེས་པར་དུ་ཡིད་གཟབ་གནང་གལ་དང་ལྷིང་འཇགས་ཐོག་གནས་དགོས་པའི་གཞེན་སྐུལ་གནང་འདུག རྩ་བའི་དྷ་ས་གནས་འགོ་འཛིན་བསོད་ནམས་རྡོ་རྗེ་ལགས་ཀྱིས་ཀྱང་བོད་རིགས་མང་ཚོགས་ལ་དེ་སྔོན་གནས་ཚུལ་དེའི་བྱུང་རིམ་དང་ད་ལྟའི་གནས་སྟངས་ཇི་ཆགས་སོགས་ངོ་སྤྲོད་གནང་པ་དང་ཆབས་ཅིག གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་འོག སྐྱབས་བཅོལ་བོད་མི་ཚོས་གནད་དོན་དེ་འབྲེལ་ཟང་ཟིང་མི་གནང་བ་གནང་གལ་ཡིན་པ་དང་། ལྷག་དོན་རྒྱ་གར་གྱི་ཡུལ་མི་རྣམས་ལ་ཚིག་ངན་དང་མི་ལེགས་པའི་རྣམ་འགྱུར་མི་བསྟན་པའི་ནན་སྐུལ་གནང་པ་མ་ཟད། བོད་པའི་བོུ་དེར་སྲུང་སྐྱོབ་བྱ་རྒྱུའི་འགན་འཁྲི་རྒྱ་གར་གྱི་ཉེན་རྟོག་པ་ཙམ་མ་ཡིན་པར་བོད་མི་ཚོར་ཡང་དེ་མཚུངས་ཡོད་པས་ཚང་མས་ཧུར་ཐག་གནང་དགོས་སྐོར་ནན་བརྗོད་གནང་འདུག
