རྒྱ་ནག་གིས་ཕྱི་རྒྱལ་གསར་འགོད་པ་ཁག་ཅིག་ཕྱིར་འབུད་གཏོང་རྒྱུ།

ཨ་རིས་ཁུལ་དེར་གནས་བཞིན་པའི་རྒྱ་རིགས་གསར་འགོད་པར་དུས་ཡུན་ཚད་བཀག་གིས་མཐོང་མཆན་སྤྲོད་རྒྱུའི་ཐག་གཅོད་གནང་བ་དེའི་ཡར་ལན་དུ་རྒྱ་གཞུང་གིས་ཁ་སང་རེས་གཟའ་མིག་དམར་ཉིན་ཨ་རིའི་གསར་ཁང་ཆེ་གྲས་གསུམ་གྱི་གསར་འགོད་པའི་ལག་འཁྱེར་ནུས་མེད་བཟོ་རྒྱུ་ཡིན་པ་བརྗོད་འདུགཉེ་ཆར་གསར་བསྐོ་བྱས་པའི་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian ཡིས་ཉིན་རེའི་གསར་འགོད་ལྷན་ཚོགས་ཤིག་ཐོག་ཨ་རི་ནང་གི་གསར་ཁང་ཆེ་གྲས་ The Newyork Times དང་ The Wall Street Journal དེ་བཞིན་ Washington Post བཅས་གསུམ་གྱི་ལས་བྱེད་ཡིན་པ་ཨ་རིའི་གསར་འགོད་པ་ཁག་ཅིག་གི་གསར་འགོད་ཕྱག་འཁྱེར་འདི་ལོའི་ལོ་མཇུག་ཏུ་དུས་ཚོད་རྫོགས་ཀྱི་ཡོད་སྟབས་གསར་འགོད་པའི་ཕྱག་འཁྱེར་ཉིན་གྲངས་བཅུའི་ནང་ཚུད་ངེས་པར་དུ་ཕྱིར་ལོག་གནང་དགོས་པ་དང་ཁོ་ཚོ་ཧོང་ཀོང་དང་ Macao གྱི་དམིགས་བསལ་འཛིན་སྐྱོང་ས་ཁུལ་ཚུད་པའི་རྒྱ་ནག་མི་མང་སྤྱི་མཐུན་རྒྱལ་ཁབ་ནང་གསར་འགོད་པ་གནང་ནས་མུ་མཐུད་ཕྱག་ལས་གནང་འཇུག་གི་མིན་ཞེས་བརྗོད་འདུག

དེ་བཞིན་ཁོང་གིས་ད་ལན་རྒྱ་གཞུང་གིས་བྱ་སྤྱོད་དེ་ནི་དེ་སྔཨ་རིས་རྒྱ་ནག་གཞུང་འབྲེལ་གསར་ཁང་ཐོག་དམ་དྲག་བྱས་པའི་དགོས་ངེས་ཀྱི་ལན་ཞིག་ཡིན་པ་དང་ཨ་རིས་རྒྱུ་རྐྱེན་གང་ཡང་མེད་པར་རྒྱ་རིགས་གསར་འགོད་པར་ཚུལ་མིན་བྱ་སྤྱོད་རིགས་ཡིན་པར་སྐྱོན་བརྗོད་བྱས་པ་མ་ཟད། ད་ནས་བཟུང་རྒྱ་ནག་ནང་ཡོད་པའི་ཨ་རིའི་གསར་འགྱུར་ལས་ཁང་ཁག་ནས་རང་ཉིད་ཀྱི་ལས་དོན་གནང་ཕྱོགས་དང་ལྷག་དོན་རྒྱ་ནག་ནང་གསར་ཁང་སྐོར་གྱི་གནས་ཚུལ་ཞིབ་ཕྲ་རྒྱ་ནག་གཞུང་ལ་ཡིག་ཐོག་བརྒྱུད་དེ་ངེས་པར་དུ་མཁོ་སྤྲོད་བྱེད་དགོས་པར་ནན་བརྗོད་གནང་བ་དང་ཆབས་ཅིག གོང་ཞུས་རྒྱ་ནག་གི་བཙན་བཀའ་ལ་ངེས་པར་དུ་བརྩི་འཇོག་བྱེད་དགོས་པའི་གསར་ཁང་གི་ཁོངས་སུ་ཨ་རིའི་རླུང་འཕྲིན་ཁང་དང་ The Washington Post དང་། The Newyork Times དེ་བཞིན་ Time Magazine བཅས་ཡིན་པ་རེད།ཐེངས་འདིའི་རྒྱ་གཞུང་གི་བྱ་སྤྱོད་དེ་ནི་ཨ་རིའི་སྲིད་འཛིན་ཌོ་ནལ་ཌ་ཊམ་མཆོག་གིས་ཉེ་ཆར་ཁུལ་དེར་གནས་བཞིན་པའི་རྒྱ་ནག་གཞུང་གི་ཐད་ཀར་བཀོལ་སྤྱོད་འོག་ཡོད་པའི་ Xinhua དང་ China Global Television Network དེ་བཞིན་ China Daily སོགས་གསར་ཁང་ལྔའི་ལས་བྱེད་ཀྱི་བརྒྱ་ཆ་ ༤༠ ཙམ་ཞིག་ཉུང་དུ་གཏོང་དགོས་པའི་བཀའ་རྒྱ་དང་ལྷག་དོན་ཨ་རི་ནང་གནས་བཞུགས་རྒྱ་རིགས་གསར་འགོད་པ་ཚོར་དུས་ཡུན་ཚད་བཀག་གིས་མཐོང་མཆན་སྤྲོད་རྒྱུའི་ཐག་གཅོད་གནང་བ་དེར་ཡར་ལན་བྱས་པ་ཞིག་ཡིན་འདུག

གཞི་རྩའི་རྒྱ་ནག་གིས་གསར་ཁང་ལྔ་པོ་དེ་དག་རྒྱ་ནག་གཞུང་གི་སྟངས་འཛིན་འོག་བཀོལ་སྤྱོད་བྱེད་ཀྱི་ཡོད་པ་དང་དེ་དག་ཕྱི་ཕྱོགས་ཀྱི་གཞུང་ཚབ་ལས་ཁུངས་ཡིན་པར་ངོས་འཛིན་གྱིས་གསར་འགོད་པར་དམ་དྲག་བྱེད་པའི་མཇུག་འབྲས་སུ་རྒྱ་གཞུང་ནས་ཁུལ་དེར་ཡོད་པའི་ Wall Street Journal ཞེས་ཨ་རིའི་སྙན་གྲགས་ཆེ་བའི་གསར་ཁང་གི་ལས་བྱེད་ཨ་རིའི་མི་སེར་ཡིན་པ་གསར་འགོད་པ་གཉིས་ཏོག་དབྱིབས་ནད་རིམས་ཐད་མི་རིགས་དབྱེ་འབྱེད་ཀྱི་གནས་ཚུལ་སྤེལ་བར་རྒྱུ་མཚན་དུ་བྱས་ནས་ཕྱིར་འབུད་བཏང་ཡོད་པ་དང་དེ་ནི་དེ་སྔ་ཕྱི་ལོ་ ༡༩༩༨ ནས་བཟུང་རྒྱ་གཞུང་གིས་ཕྱི་རྒྱལ་གྱི་གསར་འགོད་པ་བཙན་དབང་གིས་ཐད་ཀར་ཕྱིར་འབུད་བཏང་བ་ཆེས་ཐོག་མ་ཆགས་ཀྱི་ཡོད་པ་རེད།