རྒྱ་ནག་ནང་གི་དངོས་ཡོད་གནས་སྟངས་ཁག་ཇེ་གསལ་དུ་ཡོང་ངེས་ཡིན་པ་གསུངས་འདུག

རྒྱ་ནག་གཞུང་གིས་ལོ་ངོ་བཞི་ལྷག་རིང་བཟང་བཙོན་གྱི་ངོར་བཙན་བཀག་འོག་བཞག་པའི་རྒྱུ་རྩལ་བ་དང་འཐབ་རྩོད་པ་གྲགས་ཅན་སྐུ་ཞབས་ Ai Wei Wei ལགས་ཀྱིས་རིན་མིན་རྒྱ་གཞུང་གིས་གཡོ་བྱུས་འོག་སྦས་གསང་བྱེད་བཞིན་པའི་རྒྱ་ནག་ནང་གི་དངོས་གནས་སྟངས་ཁག་ཇེ་གསལ་དུ་ཡོང་ངེས་ཡིན་པ་གསུངས་འདུག རྒྱ་ནག་དམར་ཤོག་རྒྱལ་ཁབ་འདི་མང་གཙོའི་རྒྱལ་ཁབ་ཅིག་ཏུ་མ་འགྱུར་ཚེ་། ཁ་ཉིན་ཕྱི་ཚེས་ ༥ ཉིན་ Irish Times གསར་ཁང་གི་གསར་ཤོག་ཐོག་ཏུ་སྤེལ་བའི་གནས་ཚུལ་ལ་གཞིགས་ན། སྐུ་ཞབས་ Ai Wei Wei ལགས་ལ་འཇར་མ་ནིའི་ Suddeutsche Zeitung གསར་ཁང་ནས་བཅར་འདྲི་ཞུས་དོན་ལྟར་ཁོང་གིས་དང་ལེན་གནང་བ་དང་སྦྲགས། སྐབས་དེར་རྒྱ་ནག་སྲིད་གཞུང་ནས་རྒྱ་ནག་རྒྱལ་ཁབ་དང་མི་སེར་རྣམས་ལ་འཕྲད་བཞིན་པའི་དཀའ་ངལ་ཁག་མུ་མཐུད་སྦས་གསང་བྱེད་བཞིན་པར་སྐྱོན་བརྗོད་གནང་འདུག རྒྱ་ནག་གི་དཔལ་འབྱོར་ཐད་ཚད་མཐོ་པོའི་ཡར་རྒྱས་ཕྱིན་ཡོད་ཀྱང། མི་དམངས་ནས་རང་དབང་ལ་བཅངས་པའི་མངོན་འདོད་དང་སེམས་ཤུགས་ནི་དུས་ནམ་ཡང་རྩ་མེད་དུ་བཏང་ཐབས་མེད་པ་མ་ཟད། རིམ་པས་རྒྱ་ནག་གི་འགོ་ཁྲིད་རྣམས་མི་དམངས་ཀྱི་གནོན་ཤུགས་འོག་དངོས་ཡོད་གནས་སྟངས་ཁག་ཕྱི་གསལ་ཡོང་རྒྱུ་ཡིན་པར་འགྲེལ་བརྗོད་གནང་འདུག ཁོང་གིས་མུ་མཐུད་གསུངས་དོན་ལ་ད་ལྟའི་ཆར་རྒྱ་ནག་ནང་མི་སྒེར་གྱི་རང་དབང་དང་འགྲོ་བ་མིའི་སྨྲ་བརྗོད་ཀྱི་རང་དབང་སོགས་གང་ཡང་མེད་པའི་ཁར། སྤྱི་ཚོགས་ཀྱི་གནས་སྟངས་ཁག་ཤིན་ཏུ་ཞན་པོ་ཡོད་ལུགས་ཀྱི་དངོས་ཡོད་གནས་ཚུལ་ཁག་ཅིག་ཐེར་འདོན་གྱིས་ལུང་འདྲེན་དང་སྦྲགས། རྒྱ་ནག་ནང་ལྐོག་ཟ་རུལ་སུངས་དང་དབང་ཆ་འཐབ་རྩོད་སོགས་ཀྱི་དཀའ་ངལ་མི་ཉུང་བ་ཞིག་འཕྲད་བཞིན་པ་དེ་དག་ངེས་པར་དུ་སེལ་ཐབས་གནང་དགོས་པ་དང་། དཀའ་ངལ་དེ་དག་བརྒྱུད་རིམ་པས་རྒྱ་ནག་རྒྱལ་ཁབ་འདི་བཞིན་ལྷིང་འཇགས་མེད་པའི་སྤྱི་ཚོགས་ཤིག་ཏུ་འགྱུར་ཉེན་ཡོད་པའི་དགོངས་ཚུལ་སོགས་གསུངས་འདུག རྩ་བའི་སྐུ་ཞབས་ Ai WeiWei ལགས་རྒྱ་ནག་གིས་བཟང་བཙོན་འོག་ལོ་ངོ་བཞི་ལྷག་བཞག་རྗེས་ཟླ་བ་སྔོན་མིའི་ཕྱི་ཚེས་ ༢༢ ཉིན་རྒྱ་གཞུང་ནས་ཁོང་གི་ཕྱིར་བསྐྱོད་ལག་འཁྱེར་སྤྲོད་ཡོད་ཅིང། ད་ལྟའི་ཆར་ཁོང་འཇར་མ་ནི་ནང་ཁོང་གི་ནང་མི་ལྷན་དུ་བཞུགས་ཡོད་པ་དང། རྒྱལ་ས་ Berlin ནང་རྟེན་གཞི་བྱས་པའི་ Berlin fine art Academy ནང་གཙུགས་ལག་སློབ་དཔོན་གྱི་མཚན་གནས་ཕུལ་བ་མ་ཟད། ཁོང་གིས་ཡུ་རོབ་རྒྱལ་ཁབ་ཁག་གི་ནང་རྒྱུ་རྩལ་འགྲེམས་སྟོན་ཆེད་སྐོར་བསྐྱོད་གནང་རྒྱུ་ཡིན་པ་རེད་འདུག