ལྟ་བ་དང་ལངས་ཕྱོགས་ལ་ཡིད་ཆེས་མེད་ན་གཞོན་ནུའི་སྒྲིག་འཛུགས་ནང་མ་བཞུགས་ན་ཡག་གི་རེད་ཅེས་གསུངས་འདུག

བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་ལགས་ཀྱིས། གཞོན་ནུ་ལྷན་ཚོགས་ཀྱི་ལྟ་བ་དང་ལངས་ཕྱོགས་ལ་ཡིད་ཆེས་མེད་པ་ཡིན་ན། སྒྲིག་འཛུགས་ནང་བཞུགས་པ་ལས་མ་བཞུགས་ན་ཡག་གི་རེད་ཅེས་གསུངས་འདུག
རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་བོད་སྒར་བསམ་ཡས་གླིང་དུ་དེ་རིང་ཕྱི་ཚེས་༢༤ནས་ཉིན་དྲུག་རིང་། བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་༤༦པ་དེ་དབུ་འཛུགས་གནང་ཡོད་པ་དང། ཚོགས་འདུ་དེེའི་ཐོག་ས་གནས་ཁག་༣༠་ནས་གཞོན་ནུའི་རྒྱུན་ལས་མི་གྲངས་༡༢༠ལྷག་ཙམ་མཉམ་ཞུགས་གནང་ཞིང་གཙོ་བོ་གྲོས་གཞི་དོན་ཚན་༡༡ཐོག་བཀའ་བསྡུར་གནང་གི་འདུག
ཚོགས་འདུ་དབུ་འབྱེད་ཀྱི་མཛད་སྒོའི་ཐོག་ཚོགས་གཙོ་བསྟན་འཛིན་འཇིགས་མེད་ལགས་ཀྱིས། ཉེ་ཆར་ཨ་མི་རི་ཀའི་ནིའུ་ཡོག་དང་ནིའུ་ཇར་སི་ས་གནས་གཞོན་ནུས་དབུས་བོད་ཀྱི་གཞོན་ནུ་ལྷན་ཚོགས་ལ་གལ་ཏེ་སྒྲིག་འཛུགས་ཀྱི་ལངས་ཕྱོགས་ལ་འགྱུར་བ་མ་བཏང་ཚེ། ཁོང་རྣམས་དབུས་ཀྱི་ཁྱབ་ཁོངས་འོག་གནས་ཐུབ་ཐབས་མེད་སྐོར་གྱི་ཡི་གེ་འབྱོར་ཡོད་པ་ལུང་འདྲེན་དང་འབྲེལ། བསྟན་འཛིན་འཇིགས་མེད་ལགས་ཀྱིས་གསུངས་དོན། ད་ལྟའང་ཡིན་པ་ཡིན། ང་ཚོའི་ས་གནས་ཁག་གཅིག་སྒྲིག་འཛུགས་ནས་མར་བཏོན་བཞིན་པ་དེ། བློ་ཕམ་རང་རེད། གཞོན་ནུའི་སྒྲིག་གཞི་ཞེས་པ་དེ་ཧ་ཅང་གི་རྩ་ཆེན་པོ་རེད། རང་གི་འདོད་པ་ལྟར་འདེམས་སྒྲུག་རྒྱབ་ན་འགྲིག་གི་མ་རེད་ཅེས་སོགས་གསུངས་འདུག
དེ་རིང་ཚོགས་འདུ་དབུ་འབྱེད་མཛད་སྒོའི་སྐུ་མགྲོན་གཙོ་བོར། ལྡི་ལི་བོད་ཀྱི་སྐུ་ཚབ་དོན་གཅོད་བཀའ་ཟུར་བསྟན་པ་ཚེ་རིང་མཆོག་གདན་འདྲེན་ཞུས་ཡོད་པ་དང། ཁོང་གིས་སྐབས་དེར་ གཞོན་ནུའི་ཚོགས་མི་ཁག་གཅིག་ནས་རང་བཙན་ཁ་ལ་ཁྱེར་ནས་སྤྱི་ཚོགས་ནང་འཐེན་འཁྱེར་དང་ཉེས་མེད་ཉེས་འཛུགས་བྱེད་ཀྱི་ཡོད་པ་དེས། གཞོན་ནུའི་སྒྲིག་འཛུགས་ལ་སྐྱོན་བྱེད་ཀྱི་ཡོད་སྐོར་གསུང་པ་དང་འབྲེལ། རྒྱུན་དུ་ནས་མི་མང་དང་འབྲེལ་བ་དམ་ཟབ་དགོས་པ་དང་མི་མང་གི་བསམ་ཚུལ་ཤེས་ཐབས་དགོས་པ་མ་ཟད། རྒྱ་མིའི་གཞུང་ཚབ་སོགས་ཀྱི་མདུན་དུ་ལས་འགུལ་སྤེལ་སྐབས་སུའང་། དོན་དམ་པའི་ཕན་ཐོགས་གང་ཡོང་གི་ཡོད་མེད་བསམ་ཞིབ་ནན་ཏན་གནང་དགོས་ཀྱི་ཡོད་པ་སོགས་གསུངས་བཤད་གནང་འདུག