བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཕྱི་ཟླ་ ༩ ཕྱི་ཚེས་ ༢༥ ཉིན་གྱི་སྔ་དྲོ་ཚོུད་ ༧.༣༠ ཡོལ་ཙམ་ནས་བཞུགས་སྒར་རྒྱལ་བའི་ཕོ་བྲང་དུ་རྒྱ་རིགས་གཙོས་པའི་ནང་པའི་རྗེས་འབྲང་པ་ ༣༠ ལ་དགེ་ཚུལ་གྱི་སྡོམ་པ་འབོག་ཆོག་མཛད་འདུག
དེ་ཡང་ལོ་ལྟར་དབྱར་ཆོས་སྐབས་ཐེ་ཝན་ཚོགས་གཉིས་ཆོས་ཚོགས་ནས་ཇི་ལྟར་གསོལ་འདེབས་ཞུས་དོན་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་ཆོས་དང་དགེ་ཚུལ་སློང་གི་སྡོམ་འབོག་རྩོལ་བཞིན་ཡོད་པ་ལྟར། དེ་རིང་སྔ་དྲོ་མགོན་པོ་༸གང་ཉིད་མཆོག་གིས་རབ་བྱུང་པ་ ༣༠ ལ་དགེ་ཚུལ་གྱི་སྡོམ་པ་བཀྲིན་སྩལ་ཡོད་པ་དང་དགེ་ཚུལ་གྱི་སྡོམ་པ་གནང་མཁན་ནང་༸གོང་ས་༸སྐྱབས་མགོན་ཆེན་པོ་མཆོག་གིས་རབ་བྱུང་གི་མཁན་པོ་གཙོ་བོ་གནང་བ་དང་རྣམ་རྒྱལ་གྲྭ་ཚང་གི་མཁན་རིན་པོ་ཆེ་ཁྲོམ་ཐོག་རིན་པོ་ཆེ་མཆོག་ལས་ཀྱི་སློབ་དཔོན། དེ་བཞིན་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲུང་ཆེ་ཡང་སྟེང་རིན་པོི་ཆེ་མཆོག་གིས་དུས་འཁོར་བ་དང་རྣམ་གྲྭ་ཕན་བདེ་ལེགས་བཤད་གླིང་གི་དཔེ་ཁྲིད་སློབ་དཔོན་དགེ་བཤེས་བློ་བཟང་གྲགས་པ་ལགས་ཀྱིས་གྲོགས་དན་བཅས་གནང་ཡོད་པ་མ་ཟད། གཞན་ཡང་ཐེ་ཝན་ཚོགས་གཉིས་ཆོས་ཚོགས་ཀྱི་མཁན་སློབ་དགེ་འདུན་པ་ཁག་ཅིག་ཀྱང་མཉམ་ཞུགས་གནང་འདུག
སྐབས་དེར་མགོན་པོ་༸གང་ཉིད་མཆོག་གིས་ད་ལྟའི་གཉན་འཕྲང་ཅན་གྱི་དུས་སྐབས་སུ་དགེ་འདུན་པ་རྣམས་ཁྱིམ་ནས་ཁྱིམ་མེད་པ་རབ་ཏུ་བྱུང་སྟེ་ད་རེས་དགེ་ཚུལ་སློང་གི་སྡོམ་པ་ཞུ་རྒྱུ་བྱུང་བ་འདི་ནི་སྐལ་པ་བཟང་པོ་ཞིག་དང་། མགོན་པོ་༸གང་ཉིད་མཆོག་གིས་ཀྱང་ལྷ་སའི་ཇོ་བོ་སྐུ་མདུན་ལ་དགེ་བསྙེན་དང་དགེ་ཚུལ་སློང་བཅས་གྲུབ་གནང་མཛད་ཡིན་སྐོར་བཀའ་སྩལ་དང་སྦྲགས། ཆོས་གྲོགས་ཚོའི་ངོས་ནས་སངས་རྒྱས་པའི་ཆོས་དེ་ཉིད་ལ་ཐོས་བསམ་སྒོམ་གསུམ་གྱི་ཐོག་ནས་ཉམས་ལེན་གནང་དགོས་གལ་གྱི་ལམ་སྟོན་མཛད་འདུག
དགེ་ཚུལ་སློང་གི་སྡོམ་པ་དེ་བཞིན་དེ་རིང་ཕྱི་ཚེས་ ༢༥ ནས་ ༢༧ བར་ཉིན་གྲངས་གསུམ་གྱི་རིང་སྒྲུབ་གཏན་འཁེལ་བ་ལྟར་དེ་རིང་སྔ་དྲོ་མགོན་པོ་༸གང་ཉིད་མཆོག་གིས་རབ་བྱུང་པ་ ༣༠ ལ་ཐུགས་བརྩེ་བ་ཆེན་པོས་དགེ་ཚུལ་ཕའི་སྡོམ་པ་འབོག་ཆོག་སྩལ་བ་དང་སང་ཉིན་དགེ་ཚུལ་མའི་སྡོམ་པ། དེ་རྗེས་དགེ་སློང་གི་སྡོམ་པ་བཀྲིན་སྩལ་གནང་གི་ཡོད་པ་རེད།
༸མགོན་པོ་༸གང་ཉིད་མཆོག་གི་མཛད་འཆར་ལ་གཞིགས་ན་རིང་མིན་ཟླ་བ་འདིའི་ཚེས་ ༣༠ ཉིན་ཐའེ་ཝན་གྱི་དད་ལྡན་མང་ཚོགས་ནས་ཇི་ལྟར་གསོལ་འདེབས་ཞུས་པ་བཞིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་ཆོས་འབྲེལ་དང་ཟླ་ ༡༠ པའི་ཚེས་ ༡ ཉིན་ཐའེ་ལྦན་གྱི་དད་ལྡན་མི་མང་ནས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་པ་རེད་འདུག
