བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་ལྕམ་སྐུ་Uzra Zeya མཆོག་དང་ Diane Fienstin མཆོག་རྣམ་གཉིས་དང་མཇལ་མོལ།

ཨ་རིའི་རྒྱལ་ས་ Washington DC ནང་དེ་རིང་ནས་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་  ༨ པ་དབུ་འཛུགས་གནང་གི་ཡོད་པ་ལྟར་ཁུལ་དེའི་ནང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོ་དང་སྲིད་སྐྱོང་སྤེན་པ་ཚེ་རིང་མཆོག་གིས་དབུས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་ལྷན་འཛོམས་གནང་བ་དང་བསྟུན། ཁ་སང་ཚེས་ ༢༡ སྔ་དྲོ་ཆུ་ཚོད་ ༡༠་༣༠ ཐོག་ཁོང་རྣམ་པས་ཨ་རིའི་ཕྱི་སྲིད་ལས་ཁུངས་ནང་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ Uzra Zeya མཆོག་དང་མཇལ་མོལ་གནང་བ་དང་། ཕྱི་དྲོར་བོད་དོན་ལ་ཡུན་རིང་ནས་རྒྱབ་སྐྱོར་གནང་མཁན་ཨ་རིའི་གྲོས་ཚོགས་གོང་མའི་འཐུས་མི་ལྕམ་སྐུ་ Diane Fienstin མཆོག་དང་ལྷན་མཇལ་མོལ་གནང་འདུགབོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་གསལ་ལྟར་ན། ལྕམ་སྐུ་ Zeya མཆོག་གིས་ཇི་ལྟར་མགྲོན་འབོད་གནང་བ་བཞིན་ཁ་སང་སྲིད་སྐྱོང་སྤེན་པ་ཚེ་རིང་མཆོག་གིས་དབུ་ཁྲིད་པའི་འོག་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་ཚོགས་གཞོན་སྒྲོལ་མ་ཚེ་རིང་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བྱང་ཨ་རི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་བཅས་ལྕམ་སྐུ་མཆོག་གི་ལས་ཁུངས་སུ་ཆེད་ཕེབས་ཀྱིས་མཇལ་མོལ་གནང་འདུགཚོགས་གཞོན་སྒྲོལ་མ་ཚེ་རིང་མཆོག་གིས་བོད་ཀྱི་དྲྭ་བརྙན་ཚན་པར་འགྲེལ་བརྗོད་གནང་བར་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་སྐབས་དེར་གཙོ་བོ་དམིགས་བསལ་འབྲེལ་མཐུད་པ་མཆོག་ལ་དབུ་མའི་ལམ་གྱི་སྒྲོམ་གཞིའི་འོག་བོད་ཀྱི་གནད་དོན་སེལ་ཆེད་བོད་རྒྱ་ཕྱོགས་གཉིས་དབར་གྱི་འབྲེལ་མོལ་བསྐྱར་གསོ་ཡོང་ཐབས་ཐད་ཞུ་འབོད་གནང་ཡོད་པ་དང་། སྤྱིར་ཨ་རི་གཞུང་གི་ངོས་ནས་བོད་རྒྱ་འབྲེལ་མོལ་བསྐྱར་གསོ་ཐད་ད་བར་རྒྱབ་སྐྱོར་ཆ་ཚང་གནང་ཡོད་ཀྱང་། ད་ལྟའི་ཆར་གདོང་ལེན་གནང་དགོས་པ་ནི་ཨ་རིའི་མཐུན་ཕྱོགས་རྒྱལ་ཁབ་ཚོར་ཇི་ལྟར་འབྲེལ་གཏུག་བརྒྱུད་བོད་ཀྱི་གནད་དོན་ལ་འཛིན་སྐྱོང་རིམ་པའི་ཐོག་ནས་རྒྱབ་སྐྱོར་འཚོལ་སྒྲུབ་བྱ་རྒྱུ་དེ་ཡིན་པ་གསུངས་འདུགབོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དེ་རྗེས་ཕྱི་དྲོར་འདི་ལོའི་ཕྱི་ཟླ་དང་པོའི་ནང་དགོངས་པ་རྫོགས་པའི་བོད་ཀྱི་གྲོགས་པོ་རྙིང་གྲས་དང་བོད་དོན་རྒྱབ་སྐྱོར་བ་སྐུ་ཞབས་ Richard Blum མཆོག་གི་སྐུ་ཟླ་དང་ཨ་རིའི་གྲོས་ཚོགས་གོང་མའི་འཐུས་མི་ལྕམ་སྐུ་ Diane Fienstin མཆོག་དང་ལྷན་མཇལ་མོལ་གྱིས་བོད་དོན་གླེང་མོལ་དང་འབྲེལ་ཁོང་ལ་བཀྲིན་རྗེས་དྲན་མཚོན་ཕྱིར་སྤྱན་རས་གཟིགས་ཕྱག་བཞི་མའི་ཞལ་ཐང་ཞིག་ཕུལ་འདུགགཞི་རྩའི་ཨ་རིའི་རྒྱལ་ས་ Washington DC ནང་དེ་རིང་ནས་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་  ༨ པ་དབུ་འཛུགས་གནང་གི་ཡོད་པ་དང་། ཐེངས་འདིའི་ཚོགས་ཆེན་ཐོག་རྒྱལ་སྤྱིའི་རྒྱལ་ཁབ་ ༢༦ ནས་གྲོས་ཚོགས་འཐུས་མི་དང་མཁས་དབང་། དེ་བཞིན་ལས་འགུལ་བ་སོགས་ཁྱོན་ཚོགས་བཅར་བ་ ༡༠༠ ལྷག་དངོས་སུ་མཉམ་ཞུགས་གནང་སྟེ་བོད་ཀྱི་གནད་དོན་ཐད་ལ་བཀའ་བསྡུར་སྦྱང་བཤད་དང་བགྲོ་གླེང་སོགས་གནང་རྒྱུ་ཡིན་པ་རེད། འབྲེལ་ཡོད་པར་ཁག་བོད་མིའི་སྒྲིག་འཛུགས།