ཁ་སང་བཞུགས་སྒར་དུ་རྟེན་གཞི་བྱས་པའི་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་ནས་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་རྒྱ་གར་གྱི་ས་གནས་འདྲ་མིན་ནང་གི་མཐོ་སློབ་ཁག་ཏུ་སྐྱོད་བཞིན་པའི་བོད་རིགས་གཞོན་སྐྱེས་ལྔ་བཅུ་ཙམ་འདུ་འཛོགས་ཀྱིས་དབུ་མའི་ལམ་ཐོག་བོད་རིགས་གཞོན་སྐྱེས་བསམ་བློ་བ་ཞེས་པའི་ཚོགས་འདུ་ཐེངས་དང་པོ་ཚོགས་ཡོད་པ་དང་། ཚོགས་འདུ་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་གོ་ལ་གཅིག་གྱུར་གྱི་དུས་སྐབས་འདིར་རང་བཙན་དང་དབུ་མའི་ལམ་གང་ཡིན་ཀྱང་རྒྱ་ནག་ལ་ལྟོས་དགོས་པ་གསལ་པོ་རེད་ཅེས་གསུངས་སོང་།
ཁ་སང་དང་དེ་རིང་བཅས་ཉིན་གྲངས་གཉིས་རིང་ཚོགས་པའི་དབུ་མའི་ལམ་ཐོག་བོད་རིགས་གཞོན་སྐྱེས་བསམ་བློ་བ་ཞེས་པའི་ཚོགས་འདུ་ཐེངས་དང་པོའི་ཐོག་རྒྱ་གར་གྱི་ས་གནས་མི་འདྲ་བ་ཁག་དགུའི་ནང་མཐོ་སློབ་འགྲིམ་བཞིན་པའི་བོད་རིགས་གཞོན་སྐྱེས་ ༤༨ ནས་མཉམ་ཞུགས་གནང་འདུག་པ་དང་། དབུ་མའི་ལམ་གྱི་རྒྱབ་ལྗོངས་དང་གལ་གནད། རྒྱ་ནག་གི་ཤེས་ཡོན་མི་སྣས་དབུ་མའི་ལམ་ལ་ལྟ་སྟངས། དེ་བཞིན་བོད་ཀྱི་འཐབ་རྩོད་རྒྱུན་གནས་ཆེད་བོད་རིགས་གཞོན་སྐྱེས་ཚོའི་འགན་འཁྲི། དབུ་མའི་ལམ་དང་སྤྱི་ཚོགས་དྲྭ་རྒྱ་སོགས་བརྗོད་གཞི་ཁག་ཅིག་གི་ཐོག་མཁས་ལས་མི་སྣའི་གསུང་བཤད་དང་གྲོས་བསྡུར་སྦྱང་བཤད་སོགས་གནང་ཡོད་པར་མ་ཟད། ཚོགས་བཅར་བ་རྣམས་སྡེ་ཚན་འཆར་འགོད་ཐོག་བོད་ནང་དབུ་མའི་ལམ་གྱི་གོ་རྟོགས་སྤེལ་ཐབས་དང་། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་ནས་འབྱུང་འགྱུར་སྤེལ་དགོས་པའི་ལས་འགུལ། དེ་བཞིན་བོད་རིགས་མཐོ་རིམ་སློབ་མའི་ཁྲོད་དབུ་མའི་ལམ་གྱི་གོ་རྟོགས་སྤེལ་ཐབས་བཅས་བརྗོད་གཞི་གསུམ་ཐོག་བགྲོ་གླེང་གནང་ཡོད་པ་རེད། 
ཚོགས་གཙོ་མཆོག་ནས་ཐེངས་འདིའི་ཚོགས་འདུའི་ཐོག་བཅར་བའི་བོད་ཕྲུག་གཞོན་སྐྱེས་རྣམས་ལ་ད་ལྟའི་དབུ་མའི་ལམ་གྱི་སྲིད་བྱུས་འདི་གཙོ་བོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ཡིན་པ་དང་། རིམ་པས་དུས་ནས་དུས་སུ་སྐབས་སོ་སོའི་བོད་མིའི་སྒྲིག་འཛུགས་ཀྱི་ཤག་དང་བོད་མི་མང་སྤྱི་འཐུས་ལྷན་ཚོགས་བཅས་སུ་གྲོས་བསྡུར་སྦྱང་བཤད་དང་། ལྷག་པར་དུ་བོད་ཕྱི་ནང་གཉིས་སུ་ཡོད་པའི་བོད་མི་རྣམས་ཀྱི་བསམ་ཚུལ་དང་མཐུན་པའི་ཐོག་མང་གཙོའི་ལམ་ནས་གཏན་འབེབས་གནང་བའི་ཆབ་སྲིད་ཀྱི་ལྟ་གྲུབ་དེ་ཡང་དག་པ་དང་ལྡན་པའི་སྲིད་བྱུས་ཤིག་ཡིན་པ་སོགས་དབུ་མའི་ལམ་གྱི་བྱུང་རིམ་ངོ་སྤྲོད་གནང་ཡོད།
གཞོན་སྐྱེས་རྣམས་ནས་དབུ་མའི་ལམ་གྱི་སྲིད་བྱུས་དང་འབྲེལ་བའི་༸གོང་ས་མཆོག་གི་དགོངས་གཞི་དང་། སྲིད་བྱུས་འདི་ད་ལྟའི་བོད་ཀྱི་གནས་སྟངས་ཐོག་འཛིན་དགོས་པའི་རྒྱུ་མཚན་གང་ཡིན་སོགས་ཀྱི་ཐད་སློབ་སྦྱོང་དང་དཔྱད་པ་གནང་རྒྱུ་གལ་ཆེན་པོ་ཡིན་སྐོར་གསུངས་པ་དང་ཆབས་ཅིག དེང་སྐབས་གོ་ལ་གཅིག་གྱུར་དུས་སྐབས་འདིར་ཆབ་སྲིད་དང་ཚོང་སོགས་གནད་དོན་གང་གི་ཆ་ནས་ཀྱང་རྒྱལ་ཁབ་ཕན་ཚུན་དབར་གཅིག་ལ་གཅིག་བརྟེན་གྱི་འདུ་ཤེས་དེ་མང་དུ་འགྲོ་བཞིན་ཡོད་སྟབས། རང་བཙན་དང་དབུ་མའི་ལམ་གང་ཡིན་ཀྱང་རྒྱ་ནག་ལ་ལྟོས་དགོས་པ་གསལ་པོ་རེད་ཅེས་གསུངས་སོང་། 
དེ་བཞིན་ཚོགས་གཙོ་མཆོག་ནས་དབུ་མའི་ལམ་གྱི་སྲིད་བྱུས་འདི་རྒྱ་ནག་གི་གནས་བབ་དང་ད་ལྟའི་བོད་ནང་གི་ཛད་དྲག་གནས་སྟངས་ཐོག་ནས་ཁ་ཚ་དགོས་གཏུགས་ཀྱི་ཁེ་ཕན་ལྡན་པའི་སྲིད་བྱུས་ཤིག་ཡིན་པ་མ་ཟད། སྲིད་བྱུས་འདིར་ཨ་རིས་གཙོས་པའི་རྒྱལ་སྤྱིའི་གཞུང་དང་། ལྷག་པར་དུ་རྒྱ་ནག་ནང་གི་ཤེས་ལྡན་མི་སྣ་མང་པོས་དཔྱད་རྩོམ་རིགས་སྤེལ་ཏེ་རྒྱབ་སྐྱོར་ཤུག་ཆེ་གནང་བཞིན་ཡོད་པ་སོགས་འགྲེལ་བརྗོད་དང་སྦྲགས། སྲིད་བྱུས་འདི་ལམ་ལྷོངས་ཡོང་དང་མི་ཡོང་ཟེར་བ་དེ་ད་ལྟའི་ཆར་རྒྱ་གཞུང་གི་ལག་པ་ལ་ཡོད་པ་སོགས་ཀྱང་གསུངས་ཡོད།
