དེ་རིང་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་སྐབས་ལྔ་པའི་རྒྱལ་ཡོངས་ཚོགས་ཆེན་མཇུག་བསྒྲིལ་དང་བསྟུན་མ་འོངས་པའི་ལས་འགུལ་དང་དབུ་མའི་ལམ་གྱི་གོ་རྟོགས་སྤེལ་ཕྱོགས་ཐོག་གྲོས་གཞི་གྲོས་ཆོད་ཁག་ཅིག་གཏན་འབེབས་གནང་སོང་། 
དེ་རིང་ཉིན་དགུང་ཚོུད་ ༡༢ ཐོག་མེག་གྷན་ཤིང་མཁར་མགྲོན་ཁང་དུ་ཚོགས་པའི་དབུ་མའི་ལམ་མི་མང་ལས་འགུལ་ཁང་གི་སྐབས་ལྔ་པའི་རྒྱལ་ཡོངས་ཚོགས་ཆེན་གྱི་མཇུག་བསྡོམས་མཛད་སྒོར་སྐུ་མགྲོན་གཙོ་བོ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ཕེབས་པ་དང་སྐབས་དེར་ཚོགས་གཙོ་མཆོག་གིས་གཙོ་བོ་ལས་དོན་ཐོག་ཤུགས་རྒྱག་རྒྱུ་དེ་གལ་ཆེན་པོ་ཆགས་ཡོད་སྐོར་གསུངས་པ་དང་འབྲེལ། དབུ་མའི་ལམ་ནི་བོད་རྒྱ་གཉིས་ཕན་ཚུན་དབར་ཞི་འགྲིག་ཡོང་རྒྱུའི་སྲིད་བྱུས་ཤིག་ཡིན་སྟབས། སྲིད་བྱུས་དེ་ལམ་དུ་འགྲོ་བར་མང་ཚོགས་དང་འགན་ཁུར་མཁན་ཚོས་ཇི་ལྟར་གནང་དགོས་པ་དང་། ལྷག་དོན་རྒྱ་ནག་གཞུང་ནས་དེའི་ཐོག་འགན་ཁུར་ཇི་ལྟར་ཞུ་དགོས་པ་དང་འགན་ཁུར་གང་འདྲ་ཡོང་མིན་སོགས་ཀྱི་ཐད་ཐུགས་སྣང་ཆེ་བཞེས་གནང་གལ་ཡིན་པ་ལས་ང་ཚོ་ནང་ཁུལ་ལ་དབུ་མ་དང་རང་བཙན་ཞེས་རྩོད་ཚེ་དམིགས་ཡུལ་དངོས་དེ་བསྒྲུབ་པར་འགོག་རྐྱེན་བཟོ་ངེས་ཡིན་སྐོར་གསུངས་ཡོད། 
དེ་བཞིན་ང་ཚོས་བོད་ཀྱི་ཐུན་མིན་ཆོས་རིག་མ་བརླག་པར་གཙོ་འདོན་གནང་གལ་དང་། ནམ་ཞིག་ཐུན་མིན་ཆོས་རིག་དེ་བརླག་ཚེ་ང་ཚོས་སྲིད་བྱུས་ཇི་ཙམ་གཏན་འབེབས་དང་ལག་བསྟར་གནང་ཡང་མི་རིགས་ཀྱི་ངོ་བོ་སྲུང་སྐྱོབ་ཐུབ་པར་ཁ་ཡོད་ལག་ཡོད་ཀྱི་ཕན་ཐོགས་དེ་ཙམ་མེད་པས་བོད་ཀྱི་རིག་གཞུང་དང་སྐད་ཡིག་བཅས་པར་ཆེ་མཐོང་ཞུ་གནད་ཡིན་པ་གསུངས་སོང་། 
གཞི་རྩའི་ཚོགས་ཆེན་ཐོག་མ་འོངས་པར་དབུ་མའི་ལམ་གྱི་ལས་འགུལ་སྤེལ་ཕྱོགས་དང་ཤེས་ཡོན་བསྟི་གནས་ཁག་ལ་དབུ་མའི་ལམ་གྱི་གོ་རྟོགས་སྤེལ་རྒྱུ། ལས་འགུལ་སྤེལ་ཕྱོགས་ཀྱི་ཐབས་ལམ་སོགས་དང་འབྲེལ་བའི་གྲོས་གཞི་གྲོས་ཆོད་ཁག་ཅིག་གཏན་འབེབས་གནང་ཡོད།
