ཨ་རིའི་ནིའུ་ཡོག་གྲོང་ཁྱེར་ནང་རྟེན་གཞི་བྱས་པའི་བོད་ཁང་གིས་ཕྱི་ལོ་ ༡༩༩༨ ནས་བཟུང་རྒྱལ་ཚོགས་ཀྱི་ཞི་བདེའི་ཕོ་ཉའི་ཐུགས་འགན་བཞེས་བཞིན་པའི་ཨ་རིའི་གློག་བརྙན་འཁྲབ་སྟོན་པ་གྲགས་ཅན་ Michael Douglas ལགས་དང་། བོད་རིག་པའི་མཁས་པ་དང་བོད་དོན་རྒྱབ་སྐྱོར་བ། དེ་བཞིན་ཨ་རིའི་བོད་ཁང་ཐོག་མར་གསར་འཛུགས་གནང་མཁན་གྲས་སུ་ཡོད་པ་ Robert Tenzin Thurman དམ་པ་དེ་ཉིད་དང་ཁོང་གི་སྐུ་ཟླ་ Birgitte Nena Thurman ལགས་བཅས་མི་གསུམ་ལ་ལོ་འདིའི་ Art of Freedom འམ་རང་དབང་གི་སྒྱུ་རྩལ་གཟེངས་རྟགས་འབུལ་བཞེས་གནང་འདུག་པ་དང་། སྐུ་ཞབས་ Robert Thurman ལགས་དམ་པ་ཁོང་གི་གཟེངས་རྟགས་དེ་ Posthumously འམ་ཁོང་གི་སྐུ་ཚེ་མཐའ་འཁྱོངས་ཟིན་རྗེས་སུ་གནང་འདུག
རྩ་བའི་ Tibet House US འམ་ཨ་རིའི་བོད་ཁང་གི་ངོས་ནས་ཤེས་རབ་དང་སྙིང་རྗེ་ལྡན་པའི་འཛམ་གླིང་ཞིག་བསྐྲུན་རྒྱུར་དམིགས་ཏེ། ཕྱི་ལོ་ ༡༩༩༨ ལོར་ Art of Freedom གཟེངས་རྟགས་དེ་དབུ་འཛུགས་གནང་བའི་ཁྲོད། ལོ་ལྟར་འཛམ་གླིང་ཞི་བདེ་དང་བོད་དོན་ལ་ཁ་ཞེ་གཉིས་མེད་ཀྱི་རྒྱབ་སྐྱོར་དང་ཞབས་ཞུ། དེ་བཞིན་བོད་ཁང་གི་དམིགས་ཡུལ་གཞིར་བཟུང་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་གཏོང་མཁན་གྱི་གང་ཟག་ཁག་ཅིག་ལ་གཟེངས་རྟགས་དེ་འབུལ་ལམ་ཞུ་སྲོལ་ཡོད་པ་རེད།
ཨ་རིའི་བོད་ཁང་གི་དྲ་གནས་ཐོག་འདི་ལོའི་གཟེངས་རྟགས་ཐོབ་མཁན་མི་སྣ་གསུམ་ངོ་སྤྲོད་དང་སྦྲགས། སྐུ་ཞབས་ Robert Thurman ལགས་དང་ཁོང་གི་སྐུ་ཟླ་ Birgitte Nena Thurman ལགས་གཉིས་ནས་བོད་ཁང་གསར་འཛུགས་ཀྱི་ཐུགས་འགན་བཞེས་པ་དང་། བོད་ཀྱི་རིག་གཞུང་མི་ཉམས་རྒྱུན་འཛིན་གྱི་ཐད་ལ་འབུར་དུ་ཐོན་པའི་ཚེ་གང་གི་ལས་དོན་དང་བྱས་རྗེས་ལ་གུས་བཀུར་ཞུ་བའི་ཆེད་དུ་གཟེངས་རྟགས་དེ་དབུལ་རྒྱུ་ཡིན་པ་དང་། གློག་བརྙན་འཁྲབ་སྟོན་པ་སྐུ་ཞབས་ Michael Douglas ལགས་ནས་ཕྱི་ལོ་ ༡༩༩༨ ནས་བཟུང་རྒྱལ་ཚོགས་ཀྱི་ཞི་བདེའི་ཕོ་ཉའི་ཚུལ་དུ་འགྲོ་བ་མིའི་རིགས་ལ་ཞབས་འདེགས་བསྒྲུབས་པ་དང་། ལྷག་པར་དུ་ཁོང་གི་ཞི་བདེ་དང་རྡུལ་ཕྲན་མཚོན་ཆ་མེད་པའི་འཛམ་གླིང་ཞིག་བསྐྲུན་རྒྱུར་ཆོད་སེམས་བརྟན་པོའི་སྐུལ་འདེད་གནང་བའི་ལས་དོན་ལ་གུས་བཀུར་ཞུས་པ་དང་འབྲེལ་ནས་གཟེངས་རྟགས་དབུལ་རྒྱུ་ཡིན་པ་གསུངས་འདུག །
