ཁ་སང་ཕྱི་ཟླ་ ༨ ཚེས་ ༡༡ གི་ཉིན་རྒྱབ་ཕྱག་ཚོད་ ༢༌༣༠ ཐོག་བོད་ཀྱི་ཟློས་གར་ཚོགས་པ་དབུ་བརྙེས་ནས་མི་ལོ་ ༦༢ འཁོར་བའི་དུས་དྲན་དང་བསྟུན་བོད་ཀྱི་ཟློས་གར་ཚོགས་པའི་ཚོགས་ཁང་ནང་རྒྱ་ལུ་རུ་ཁག་དང་རྔོན་པ་རུ་ཁག་གཉིས་དབར་རྐང་བྲོ་གླུ་གཞས་འགྲན་བསྡུར་གནང་སྟེ་རྔོན་པ་རུ་ཁག་ལ་རྒྱལ་ཁ་ཐོབ་སོང་།
རྐང་བྲོ་གླུ་གཞས་ཀྱི་འགྲན་བསྡུར་ཐོག་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་དམིགས་བསལ་སྐུ་མགྲོན་ཨ་རུ་ནཱ་ཅལ་མངའ་སྡེ་གཞུང་གི་ཆོས་རིག་ལྷན་ཁང་གི་དབུ་འཛིན་འཇམ་དཔལ་དབང་འདུས་མཆོག དེ་བཞིན་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་གཞུང་འབྲེལ་མིན་པའི་ཚོགས་ཁག་གི་འགན་འཛིན་རྣམ་པ་ཆེད་ཕེབས་གནང་ཡོད་པ་རེད།
མཛད་སྒོའི་ཐོག་སྲིད་སྐྱོང་སྤེན་པ་ཚེ་རིང་མཆོག་གིས་བོད་ཀྱི་ཟློས་གར་ཚོགས་པའི་བསླབ་གཞི་རྩ་འཛིན་གྱི་དེབ་ཕྲེང་གསུམ་དང་ཆོས་རྒྱལ་ཁྲི་རལ་པ་ཅན་གྱི་མཛད་རྣམ་འཁྲབ་གཞུང་གི་དཔེ་དེབ་བཅས་དབུ་འབྱེད་གནང་བ་དང་སྦྲགས། བོད་དང་ཧི་མཱ་ལ་ཡའི་དབར་ཆོས་དང་རིག་གཞུང་། སྨན་གཞུང་སོགས་ཕྱོགས་མང་དག་ཅིག་ནས་འབྲེལ་བ་རྙིང་པ་ཡོད་པ་དང་འབྲེལ་བ་གསར་དུ་བཟོ་རྒྱུའི་གནས་སྟངས་མང་པོ་ཞིག་ཆགས་བཞིན་ཡོད། 
ལྷག་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞི་དང་བསྟན་བདག་བླ་ཆེན་རྣམ་པའི་བཀའ་དྲིན་འོག་དགོན་སྡེ་ཁག་ཏུ་ཧི་མཱ་ལ་ཡའི་གྲྭ་བཙུན་སློབ་གཉེར་བྱེད་མཁན་མང་དུ་འགྲོ་བཞིན་པ་ལྟར་བཀའ་དྲིན་རྗེས་སུ་དྲན་རྒྱུ་དང་མགོན་པོ་མཆོག་གི་བཀའ་དགོངས་ལྟར་གནང་རྒྱུར་ཚང་མས་འབད་བརྩོན་གནང་དགོས་གལ་ཡིན་པར་གསུངས་སོང་།
སྲིད་སྐྱོང་མཆོག་གིས་ད་ལྟའི་བཙན་བྱོལ་བོད་མིའི་གནས་སྟངས་དང་འབྲེལ་སྐབས་ ༡༧ པའི་གྲོས་ཚོགས་ཚོགས་མ་ཐུབ་པར་བརྟེན་རྒྱལ་སྤྱིའི་ཁྲོད་ང་ཚོ་དང་མཐུན་ཕྱོགས་རྒྱལ་ཁབ་མང་དག་ཅིག་གིས་ཐུགས་འཚབ་གནང་བཞིན་ཡོད་པ་དང་ལྷག་པར་དུ་གཞིས་བཞུགས་བོད་མི་ཚོས་ཀྱང་ཐུགས་འཚབ་ཆེན་པོ་གནང་གི་ཡོད་པ་མ་ཟད་རྒྱ་ནག་གཞུང་གིས་ཀྱང་གནད་དོན་འདི་བདེ་སྤྱོད་ལོག་པར་གཏོང་མུས་ཡིན་སྐོར་གསུངས་པ་དང་ཆབས་ཅིག ང་ཚོར་དབང་བའི་ས་ལག་མཐིལ་ཙམ་མེད་པ་མ་ཟད། ང་ཚོར་ལུང་པ་མེད་ཀྱང་མཐུན་རྐྱེན་དེ་ལྟར་སྦྱོར་ཐུབ་པ་འདི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བསྟན་བདག་བླ་ཆེན་རྣམ་པའི་བཀའ་དྲིན་ལ་བརྟེན་ནས་བྱུང་བ་ཞིག་ཡིན་སྟབས་བཀའ་དྲིན་རྗེས་སུ་དྲན་དགོས་རྒྱུ་ཧ་ཅང་གལ་ཆེན་པོ་རེད་ཅེས་གསུངས་ཡོད།
དམིགས་བསལ་སྐུ་མགྲོན་ཨ་རུ་ནཱ་ཅལ་མངའ་སྡེ་གཞུང་གི་ཆོས་རིག་ལས་ཁང་གི་དབུ་འཛིན་འཇམ་དཔལ་དབང་འདུས་ལགས་ཀྱིས་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་གིས་བོད་ཀྱི་ཟློས་གར་ཚོགས་པ་དབུ་བརྙེས་ནས་མི་ལོ་ ༦༢ འཁོར་བའི་དུས་དྲན་ཐོག་སྩལ་བའི་འཚམས་འདྲི་སྒྲོག་སྦྱང་གནང་བ་དང་སྦྲགས། མོན་པའི་གཞོན་སྐྱེས་རྣམས་ཤ་ཁྲག་མོན་ལས་བསྒྲུབ་པ་ཞིག་ཡིན་ཀྱང་ནུབ་ཕྱོགས་པའི་ལྟ་བ་དང་ལངས་ཕྱོགས་བཅས་ལ་ཕྱོགས་པར་བརྟེན་ཕ་མེས་ཀྱི་རིག་གཞུང་རྣམས་བརླག་ཉེན་ལ་མཐོང་ནས་ ༢༠༡༧ ལོར་སྤྱི་ཁྱབ་བློན་ཆེན་མཆོག་དང་གྲོས་བསྡུར་གྱིས་བོད་ཀྱི་ཟློས་གར་ཚོགས་པ་འབྲེལ་བ་གསར་འཛུགངས་གནང་སྟེ་ཐོག་མར་བུ་ཕྲུག་བཅུ་ལ་ལོ་གཅིག་དང་ཟླ་བ་གསུམ་གྱི་ཟབ་སྦྱོང་ཐོབ་ཡོད་པ་མ་ཟད། འདི་ལོ་སླར་ཡང་མོན་པའི་སྒྱུ་རྩལ་བ་དགུ་ལ་བོད་ཀྱི་ཟློས་གར་ཚོགས་པར་སློབ་གཉེར་གནང་རྒྱུའི་གོ་སྐབས་བྱུང་བར་བསོད་ནམས་ཆེན་པོར་དགོངས་བཞིན་ཡོད་པ་དང་། ད་བར་སྲིད་སྐྱོང་གསར་རྙིང་གཉིས་ཀྱིས་གཙོས་པའི་བོད་ཀྱི་ཟློས་གར་ཚོགས་པས་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞེས་གསུང་བཤད་གནང་སོང་།
ཁ་སང་ཕྱི་ལོ་ ༢༠༢༡ ལོའི་དབྱར་སྐྱིད་ཀྱི་དུས་སྟོན་ཐོག་བོད་ཀྱི་ཟློས་གར་ཚོགས་པའི་རུ་ཁག་གཉིས་ནས་མཉམ་གཞས་རེ་དང་། ཟུང་གཞས་རེ། དེ་བཞིན་འཁྲབ་གཞས་གཉིས་བཅས་གཟིགས་འབུལ་ཞུས་ཡོད་པ་རེད།
