ཁ་སང་རྒྱལ་སྤྱིའི་ཨོ་ལམ་པིག་ཉིན་མོ་དང་བསྟུན་འཛམ་གླིང་ཡུལ་གྲུ་འདྲ་མིན་ལྔ་བཅུ་ལྷག་གི་ནང་དུ་བོད་མི་དང་བོད་དོན་རྒྱབ་སྐྱོར་བ་རྣམས་ནས་ ༢༠༢༢ ལོའི་པེ་ཅིང་དགུན་དུས་ཨོ་རྩེད་འགྲན་ཚོགས་ཕྱིར་འཐེན་དགོས་པའི་འབོད་ཚིགས་འོག་ཏུ་རྒྱལ་སྤྱིའི་རང་བཞིན་གྱི་ལས་འགུལ་ཆེན་མོ་ཞིག་སྤེལ་ཡོད་པ་རེད།
ཉིན་དེར་ཡོ་རོབ་རྒྱལ་ཁབ་སུད་སི་ནང་ལ་ཆ་མཚོན་ན། ཡོ་རོབ་བོད་ཀྱི་གཞོན་ནུ་མཐུན་ཚོགས་དང་རྒྱལ་སྤྱིའི་ཡུ་གུར་མཐུན་ཚོགས་གཉིས་ཀྱིས་སྣེ་ཁྲིད་དེ་གཞུང་འབྲེལ་མིན་པའི་ཚོགས་སྡེ་ཁག་དང་བོད་མི་རྣམས་ཀྱིས་སུད་སི་གྲོང་ཁྱེར་ལའོ་ཙང་དུ་རྟེན་གཞི་བྱས་པའི་རྒྱལ་སྤྱིའི་ཨོ་ལམ་པིག་རྩེད་འགྲན་ཚོགས་ཆུང་གི་མགྲེམས་སྟོན་ཁང་གི་མདུན་དུ་འདུ་འཛོམས་ཀྱིས་རིང་མིན་རྒྱ་ནག་ནང་འཚོགས་རྒྱུའི་དགུན་དུས་ཨོ་རྩེད་མགྲན་ཚོགས་ལ་ངོ་རྒོལ་གྱི་ལས་འགུལ་སྤེལ་ཡོད་པ་རེད།
སྐབས་དེར་ལས་འགུལ་བ་རྣམས་ནས་སུད་སི་གཙོས་རྒྱལ་སྤྱིའི་གཞུང་མང་ནས་པེ་ཅིང་ཨོ་རྩེད་འགྲན་རྩོད་ལ་མཉམ་ཞུགས་དང་རྒྱབ་སྐྱོར་མཚམས་འཇོག་དགོས་པ། བོད་ལ་རང་དབང་དགོས་ཞེས་ངོ་རྒོལ་སྐད་འབོད་གནང་བ་མ་ཟད་ལྷག་པར་དུ་རྒྱ་ནག་གི་བཙན་དབང་འོག་ཏུ་ཡོད་པའི་བོད་དང་ཧོང་ཀོང། དེ་བཞིན་ཡུ་གུར་མང་ཚོགས་ཀྱི་དཀའ་སྡུག་དང་རྒྱ་ནག་གི་སྲིད་འཛིན་ཞི་ཅིན་ཕིང་དང་རྒྱལ་སྤྱིའི་ཨོ་ལམ་པིག་ཚོགས་ཆུང་ཚོགས་འཛིན་གཉིས་ནས་མང་ཚོགས་ཀྱི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་བའི་ཁྲིམས་འགལ་གྱི་བྱ་སྤྱོད་ཁག་མཚོན་པའི་གཏམ་བརྗོད་འཁྲམ་སྟོན་གནང་འདུག
ལས་འགུལ་ཐོག་སུད་སི་ལྗངས་ཁུ་ཚོགས་པའི་གྲོས་ཚོགས་འཐུས་མི་སྐུ་ཞབས་ Nicolas walder ལགས་ཀྱིས་གཙོས་པས་ཧོང་ཀོང་དང་ཡོ་གུར། བོད་མི་ལས་འགུལ་བ་དང་ཆབ་སྲིད་བཙོན་ཟུར་བཅས་ཀྱིས་རྒྱ་ནག་གཞུང་དང་རྒྱལ་སྤྱིའི་ཨོ་ལམ་པིག་རྩེད་འགྲན་ཚོགས་ཆུང་གི་བྱ་སྤྱོད་ལ་ངོ་རྒོལ་གྱི་གཏམ་བཤད་སྤེལ་འདུག་པ་མ་ཟད། བོད་མིའི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་དང་ཡོ་གུར་གྱི་ཆབ་སྲིད་བཙོན་ཟུར་བཅས་ནས་ས་གནས་སུ་ཡོད་པའི་རྒྱལ་སྤྱིའི་ཨོ་ལམ་པིག་རྩེད་འགྲན་ཚོགས་ཆུང་གི་ལས་ཁུངས་ལ་ ༢༠༢༢ ལོའི་པེ་ཅིང་དུ་འཚོགས་རྒྱུའི་དགུན་དུས་ཨོ་རྩེད་འགྲན་ཚོགས་དེ་ཕྱིར་འཐེན་གྱིས་ས་གནས་གཞན་ལ་འཚོགས་དགོས་པའི་ཞུ་སྙན་ཕུལ་ཡོད་པ་རེད།
དེ་དང་ཕྱོགས་མཚུངས་དབྱིན་ཡུལ་རྒྱལ་ས་ལོན་ཌན་གྱི་སྲིད་བློན་ལས་ཁུངས་མདུན་དུ་བོད་མི་དང་ཡུ་གུར་བ། དེ་བཞིན་ཧོང་ཀོང་དང་ཐེ་ཝན་མང་ཚོགས། བོད་དོན་རྒྱབ་སྐྱོར་བ་བཅས་ཟུང་འབྲེལ་གྱིས་རང་དབང་མེད་ན་ཨོ་རྩེད་འགྲན་ཚོགས་མེད། པེ་ཅིང་དུ་འཚོགས་རྒྱུའི་ཨོ་རྩེད་འགྲན་ཚོགས་ཕྱིར་འཐེན་དགོས། རྒྱལ་སྤྱིའི་གཞུང་མང་ནས་པེ་ཅིང་ཨོ་རྩེད་འགྲན་རྩོད་ཐོག་ལ་མཉམ་ཞུགས་མ་རོགས་ཞེས་སོགས་ཀྱི་ལས་འགུལ་སྤེལ་ཡོད་པ་རེད།
ཡོ་རོབ་རྒྱལ་ཁབ་ཕ་རན་སི་ནང་ལ་ཆ་མཚོན་ན། ཕ་རན་སི་བོད་རང་བཙན་སློབ་ཕྲུག་ཚོགས་པས་སྣེ་ཁྲིད་དེ་ས་གནས་ཀྱི་གཞུང་འབྲེལ་མིན་པའི་ཚོགས་སྡེ་ཁག་དང་མང་ཚོགས་འདུ་འཛོམས་ཐོག་པེ་ཅིང་དགུན་དུས་ཨོ་རྩེད་འགྲན་ཚོགས་ལ་ངོ་རྒོལ་གྱི་ཞི་བའི་སྐད་འབོད་ཀྱི་ལས་འགུལ་སྤེལ་ཡོད་པ་རེད།
དེ་བཞིན་ཡོ་རོབ་རྒྱལ་ཁབ་ཨི་ཊ་ལི་དང་འཇར་མི་ནི། ནི་ཐར་ལན་ཌི། སུད་ཌན་སོགས་ཀྱི་ནང་དུ་བོད་མི་དང་བོད་དོན་རྒྱབ་སྐྱོར་བ། དེ་བཞིན་ས་གནས་ཀྱི་གྲོས་ཚོགས་འཐུས་མི་བཅས་མཉམ་ཞུགས་ཀྱིས་ས་གནས་གྱི་ཨོ་ལམ་པིག་ཚོགས་ཆུང་གི་ལས་ཁུངས་སུ་ཞུ་གཏུག་དང། རྒྱལ་སྤྱིའི་གཞུང་མང་དང་ཨོ་རྩེད་འགྲན་ཚོགས་ཀྱི་སྦྱིན་བདག་རྣམས་ནས་ ༢༠༢༢ ལོའི་པེ་ཅིང་ཨོ་རྩེད་འགྲན་ཚོགས་ལ་རྒྱབ་སྐྱོར་མཚམས་འཇོག་དགོས་པའི་ལས་འགུལ་ནང་མཉམ་ཞུགས་གནང་མཁན་ཚོས་རང་ཉིད་ཀྱི་རྒྱལ་ཁབ་ཀྱི་རྒྱལ་དར་བསྣམས་པ་དང་པེ་ཅིང་དགུན་དུས་ཨོ་ལམ་པིག་ཕྱིར་འཐེན་དགོས་ཞེས་ཕྲེད་དར་འཕྱར་ཏེ་ངོ་རྒོལ་གྱི་ལས་འགུལ་རྣམ་པ་འདྲ་མིན་ཐོག་ནས་སྤེལ་ཡོད་པ་རེད།
